1. Ua li cas peb ho muaj kev zoo siab?

PEB zoo siab pom Vajtswv cov tub qhe ci lam lug tab meeg neeg sawvdaws! Tsaib no Yehauvas Cov Timkhawv qhia Vajlugkub rau tshaj li 10 plhom leej. Tseem muaj plhom plhom tus tuaj koom hmo ua kevcai nco txog Yexus thiab. Lawv kawm txog Yehauvas txojkev hlub rau noob neej uas nws tau txib nws tib leeg Tub los tuag theej peb lub txhoj.​—1 Yauhas 4:9.

2, 3. (1) Yehauvas Cov Timkhawv zoo li cas? (2) Hauv zaj no peb yuav kawm txog dabtsi?

² Yehauvas Cov Timkhawv nyob thoob qab ntuj thiab nyias hais nyias ib yam lus. Tiamsis peb sawvdaws yog tib tse neeg koom tib lub siab qhuas peb Leej Txiv Yehauvas. (Qhia Tshwm 7:9) Txawm peb hais yam lus twg thiab nyob lub tebchaws twg los, peb puavleej “ci rau lub ntiajteb” no pom.​—Filipi 2:15.

³ Peb yuav ua li cas thiaj ci tab meeg neeg sawvdaws kom lawv thiaj qhuas Yehauvas? Peb yuav tau tshaj tawm txoj xov zoo, koom ua ib lub siab, thiab ceev faj zov tos. Hauv zaj no peb  yuav kawm seb peb yuav ua 3 yam no li cas.​—Nyeem Mathai 5:14-16.

4, 5. (1) Peb tshaj tawm txoj xov zoo tiamsis peb yuav tsum ua dabtsi thiab, thiaj yog peb ci tab meeg neeg sawvdaws? (2) Vim li cas peb yuav tsum ua siab mos muag hais lus luag ntxhi rau luag? (Saib thawj daim duab hauv zaj no.)

⁴ Yog peb xav ci tab meeg neeg sawvdaws peb yuav tsum tshaj tawm txoj xov zoo thiab coj tibneeg los ua Yexus cov thwjtim. (Mathai 28:19, 20) Phau Tsom Faj xyoo 1925 hais tias nyob rau tiam kawg no yog leejtwg tsis kam ci tab meeg neeg sawvdaws ces nws yuav npuab siab tsis tau rau tus Tswv. Phau Tsom Faj ntawd hais ntxiv tias tus ntawd yuav tau tshaj tawm txoj xov zoo rau noob neej, thiab yuav tau coj raws nkaus li Yehauvas tej kevcai ncaj ncees. (Phau Tsom Faj Askiv, lub 6 Hli tim 1, 1925, zaj “Light in the Darkness”) Peb qhuas tau Yehauvas thaum peb mus tshaj tawm txoj xov zoo. Tiamsis peb kuj qhuas tau Yehauvas thaum peb coj tus yam ntxwv zoo thiab. Thaum peb mus tshaj tawm yuav muaj tibneeg coob tus pom peb. Yog peb ua ntsej muag luag ntxhi hu lawv ces lawv yuav pom tias peb thiab peb tus Vajtswv zoo li cas.

⁵ Yexus hais rau nws cov thwjtim tias: “Thaum nej nkag rau hauv lub tsev, cia li foom lo lus nyob kaj siab lug rau lub tsev ntawd.” (Mathai 10:12) Yexus tshaj tawm txoj xov zoo rau ib thaj tsam uas nyiam tos txais qhua heev. Nimno tibneeg feem coob tsis coj li ntawd lawm. Thaum lawv pom leejtwg tuaj txog ntawm lawv qhov rooj lawv kuj ntshai lossis meem txom. Yog peb ua siab mos muag hais lus luag ntxhi rau lawv ces lawv yuav tsis ntshai peb. Thaum peb teeb laub los peb yuav tau coj ib yam li ntawd thiab. Yog peb hu lawv luag ntxhi ces lawv yuav tsis txaj muag los nqa ntaub ntawv. Tej zaum ib txhia kuj yuav xav nrog peb tham thiab!

6. Ob niam txiv laus laus tau ua li cas nkawd thiaj tau tshaj tawm txoj xov zoo?

⁶ Nyob hauv tebchaws Askiv muaj ob niam txiv laus laus uas muaj mob ntsuav. Nkawd mus qhia tsis taus Vajlugkub ib lub tsev rau ib lub lawm, nkawd thiaj teeb rooj rau ntawm nkawd tog tsev. Vim nkawd nyob ze ib lub tsev kawm ntawv, nkawd xaiv tej ntaub ntawv uas cov niam txiv xav nyeem. Thaum cov niam txiv tuaj tos menyuam, ib txhia kuj nqa ntawv mus nyeem xws li 2 phau uas hais txog cov tub ntxhais hluas. Ib tug tho kev nyob hauv nkawd lub koom txoos nrog nkawd tshaj tawm rau cov neeg dua kev li no thiab. Cov niam txiv pom tias lawv 3 tug no hais lus luag ntxhi thiab xav pab tibneeg zej zog. Nimno kuj muaj ib leej txiv pib kawm Vajlugkub lawm thiab.

7. Koj yuav pab cov neeg thoj nam li cas lawv thiaj los paub Yehauvas?

⁷ Ob peb xyoos no coob leej ntau tus tau tsiv teb tsaws chaw ua neeg thoj nam. Koj yuav pab lawv li cas lawv thiaj los paub Yehauvas? Cia li kawm lawv yam lus ob peb los koj thiaj paub hu lawv. Lub twj JW Language yuav pab tau koj. Yog koj ua li no ces lawv yuav xav nrog koj tham. Yog muaj tej  yeeb yaj kiab thiab tej ntaub ntawv hauv jw.org ua lawv yam lus, cia li muab rau lawv saib.​—Kevcai 10:19.

8. Txojkev sib txoos Lub Neej Thiab Tes Haujlwm Khixatia qhia kom peb txawj ua dabtsi?

⁸ Yehauvas muab txhua yam rau peb kom peb txawj tshaj tawm txoj xov zoo xws li txojkev sib txoos Lub Neej Thiab Tes Haujlwm Khixatia. Yehauvas muab txojkev sib txoos no los qhia kom peb txawj ua dabtsi? Txojkev sib txoos no qhia kom peb txawj rov mus xyuas cov uas peb twb ntsib lawd thiab kom peb txawj qhia Vajlugkub rau lawv.

9. Cov niam txiv yuav cob qhia kom menyuam teb li cas?

⁹ Thaum cov tshiab tuaj koom peb cov kev sib txoos es hnov cov menyuam teb, lawv xav tsis thoob li. Cia li cob qhia koj cov menyuam kom lawv tsis txhob nyeem hauv phau ntawv lossis qog koj xwb tiamsis kom lawv txawj teb tawm hauv lawv lub siab tuaj. Ib txhia los paub qhov tseeb twb yog vim lawv tuaj pom tej menyuam qhuas Vajtswv tawm hauv lawv lub siab tuaj.​—1 Khaulee 14:25.

10. Yog tsev neeg pe hawm Vajtswv ua ke yuav pab tau lawv muaj kev sib koom siab li cas?

¹⁰ Thaum peb siv zog txhawb kom peb tsev neeg thiab peb lub koom txoos muaj kev sib haum xeeb koom tau ua ib lub siab ces yuav qhuas tau Yehauvas. Yog koj muaj menyuam, npaj ib hmos rau nej tsev neeg los pe hawm Vajtswv ua ke txhua lub lim tiam. Muaj ntau yim nyiam saib Yehauvas Cov Timkhawv Tshooj T.V. ua ke. Tom qab saib tas lawv tham  seb lawv kawm tau dabtsi. Nco ntsoov tias cov yau txawv cov hlob. Siv zog cob qhia lawv xwv hmo uas nej tsev neeg pe hawm Vajtswv ua ke, koj thiaj pab tau tus hlob tus yau huv tibsi.​—Ntawv Nkauj 148:12, 13.

11-13. Peb yuav ua li cas lub koom txoos thiaj hajyam muaj kev sib koom siab?

¹¹ Txawm koj tseem hluas los, koj yeej pab tau lwm tus hauv lub koom txoos. Yog koj ntaus phoojywg nrog ib tug kwvtij lossis ib tug muam laus, koj yuav kawm tau ntau yam. Cia li nug seb ua li cas lawv thiaj teev tiam tau Yehauvas los txog niaj hnub nimno. Yog koj ua li no yuav txhawb tau lawv zog heev, lawv kuj yuav txhawb tau koj zog thiab! Tsis tas li ntawd xwb, txawm peb laus peb hluas los peb txhua tus yeej muaj feem tos txais cov uas tuaj tshiab. Thaum lawv tuaj txog lub Tsev Nceeg Vaj cia li mus ntsib lawv, hu lawv thiab hais lus luag ntxhi rau lawv. Pab lawv nrhiav rooj zaum, thiab coj lawv mus ntsib cov phoojywg, ua li no lawv thiaj tsis txaj muag.

¹² Yog koj ua tus faib cov kwvtij nkauj muam mus qhia Vajlugkub, koj kuj pab tau cov laus ci tab meeg neeg sawvdaws thiab. Muab tej koog uas yoojyim rau lawv mus. Tej zaum zoo rau koj faib cov hluas nrog cov laus mus xwv thiaj pab tau lawv. Cov kwvtij nkauj muam laus uas mob ntsuav ib txhia tu siab heev vim lawv ua tsis taus npaum li thaum lawv tseem hluas. Tiamsis yog lawv pom tias koj hlub tshua lawv thiab xam pom lawv, lawv yuav kaj siab lawm ntau. Yog koj ua siab mos siab muag hais lus rau cov kwvtij nkauj muam tsis hais tus laus tus hluas, tus ib txwm ntseeg los tus nyuam qhuav los tshiab, koj yuav pab tau lawv muaj lub siab kub lug tshaj tawm txoj xov zoo.​—Levi Tej Kevcai 19:32.

¹³ Thaum cov Yixayee pe hawm Yehauvas ua ke lawv muaj kev zoo siab heev. Tus sau nkauj thiaj hais tias: “Qhov uas kwvtij nyob ua ke sib haum xeeb mas kuj yog qhov zoo thiab kaj siab kawg li.” (Nyeem Ntawv Nkauj 133:1, 2.) Nws muab qhov uas sawvdaws nyob ua ke sib haum xeeb piv rau tej roj tsw qab. Peb txhua tus kuj zoo li tej roj tsw qab thaum peb hwm thiab hlub tshua peb cov kwvtij nkauj muam. Yog peb ua li no ces peb yuav txhawb tau lub koom txoos kom hajyam muaj kev sib koom siab. Koj yuav ua li cas xwv koj thiaj yimhuab nrog cov kwvtij hauv lub koom txoos sib raug zoo?​—2 Khaulee 6:11-13.

14. Txawm peb nyob qhovtwg los peb yeej ci tau tab meeg neeg sawvdaws li cas?

¹⁴ Txawm peb nyob qhovtwg los, peb yeej ci tau tab meeg neeg sawvdaws. Yog koj coj tau zoo, tej zaum kuj yuav pab tau tej neeg zej zog xav kawm txog Yehauvas thiab. Xav li no: ‘Thaum cov neeg zej zog pom koj lawv xav li cas? Koj puas tu koj lub vaj lub tsev kom du lug? Koj puas ua qauv zoo rau luag xyaum? Koj puas pab tej neeg zej zog thiab?’ Cia li nrog lwm tus Timkhawv tham txog tej no thiab. Tej zaum lawv yuav muaj ntau zaj qhia rau koj mloog. Koj yuav pom tias lawv tus qauv zoo pab tau lwm tus qhuas Vajtswv, tsis hais lawv tej nruab ze, cov nyob ib ncig lawv, cov ua haujlwm nrog lawv, thiab cov kawm ntawv nrog lawv.​—Efexau 5:9.

15. Vim li cas peb yuav tsum ceev faj zov tos?

¹⁵ Yexus hais ob peb zaug rau nws cov thwjtim tias: “Yuav tsum ceev faj zov tos.” (Mathai 24:42; 25:13; 26:41) Peb yuav tsum nco ntsoov tias peb nyob rau tiam kawg lawm, peb thiaj kub siab lug ci tab meeg rau neeg sawvdaws. Yog peb xav tias tseem tshuav ntev mam txog lub caij muaj kev ceeblaj txom nyem loj kawg li, ces peb yuav tsis kub siab mus pab lwm tus kawm txog Yehauvas. (Mathai 24:21) Tej zaum peb kuj yuav qaug zog zuj zus thiab tsis ci tab meeg neeg lawm.

16, 17. Yuav ua li cas peb thiaj ceev faj zov tos?

¹⁶ Nimno peb yuav tsum yimhuab ceev faj zov tos. Lub qab ntuj tsuas muaj phem zuj zus lawm xwb. Peb paub tias lub sijhawm kawg yeej yuav los raws nkaus li Yehauvas tau teem tseg. (Mathai 24:42-44) Yog li ntawd, peb yuav tsum ua siab ntev thev thiab ntsia ntsoov rau lub neej yav tom hauv ntej, nyeem phau Vajlugkub txhua txhua hnub, thiab thov Vajtswv tsis tu ncua. (1 Petus 4:7) Xyaum cov kwvtij nkauj muam uas twb teev tiam Yehauvas tau ntau xyoo lawm. Mus nyeem txog lawv tej neej hauv peb tej ntaub ntawv.

 ¹⁷ Rau siab ntso teev tiam Yehauvas. Hlub lwm tus thiab siv sijhawm nrog koj cov kwvtij nkauj muam ua ke. Yog koj ua li no koj yuav muaj kev kaj siab thiab sijhawm yuav ntws sai heev. (Efexau 5:16) Tau 100 xyoo no Yehauvas cov tub qhe ua tau ntau yam haujlwm tiav. Thiab niaj hnub no los tseem hajyam muaj haujlwm ntau heev rau peb ua. Peb tsis xav tias Yehauvas tes haujlwm yuav nthuav dav npaum no. Peb yeej ci tab meeg neeg sawvdaws tiag!

18, 19. Cov txwj laus yuav pab kom peb kub siab lug teev tiam Yehauvas li cas? Piav txog tus qauv.

¹⁸ Txawm peb yog neeg txhaum los Yehauvas tseem cia peb teev tiam nws. Nws kuj muab cov txwj laus hauv lub koom txoos los pab peb thiab. (Nyeem Efexau 4:11, 12.) Yog li ntawd, thaum cov txwj laus tuaj xyuas koj, cia li nrog lawv tham thiab mloog lawv hais xwv koj thiaj khaws tau tswvyim coj los siv.

¹⁹ Muaj ob niam txiv nyob tebchaws Askiv tau thov kom cov txwj laus mus xyuas nkawd vim nkawd muaj teeb meem. Tus niam hais tias tus txiv tsis ntaus thawj coj tsev neeg teev tiam Yehauvas. Tus txiv hais tias nws tsis txawj qhia thiab kuj lees tias nws tsis npaj ib hmos rau tsev neeg pe hawm Yehauvas ua ke. Ob tug txwj laus thiaj kom nkawd xav txog Yexus tus qauv. Nkawd txhawb tus txiv kom saib xyuas nws tsev neeg ib yam li Yexus tau saib xyuas cov thwjtim. Hos tus niam yuav tau ua siab ntev rau tus txiv ib yam li Yexus. Ob tug txwj laus kuj muab tswvyim rau khub niam txiv no kom paub cob qhia nkawd 2 tug menyuam thaum lawv pe hawm Yehauvas ua ke. (Efexau 5:21-29) Tus txiv thiaj siv zog xyaum kom nws txawj ua lub taubhau txiv. Ob tug txwj laus rau siab ntso txhawb kom nws tsis txhob tso tseg, thiab kom nws tso siab rau Yehauvas lub hwj huam pab. Vim cov txwj laus hlub tshua tsev neeg no, thiaj pab tau lawv ci tab meeg neeg sawvdaws!

20. Yog koj ci tab meeg neeg sawvdaws lawv yuav ua li cas?

²⁰ “Txhua tus uas hwm thiab paub ntshai [Yehauvas] kuj yuav tau nyob kaj siab lug, yog cov uas taug nws txojkev.” (Ntawv Nkauj 128:1) Yog koj ci tab meeg neeg sawvdaws koj yuav muaj kev kaj siab dua. Yog li ntawd, cia li pab lwm tus los pe hawm Yehauvas, txhawb kom lub koom txoos muaj kev sib koom siab, thiab cia li ceev faj zos tos. Ces thaum lwm tus pom koj tus qauv zoo, lawv yuav qhuas peb Leej Txiv Yehauvas.​—Mathai 5:16.