1. Peb kheev txhawj ntshai txog tej yam twg?

 CIA peb mus piav txog qho yam uas raug Yehauvas Cov Tim Khawv. Muaj ib tug kwv tij npe hu ua Teeb thiab nws tus poj niam npe hu ua Ntxhi. * Nkawv ob niam txiv xav mus tshaj tawm txoj moo zoo rau tej cheeb tsam tsis muaj cov ntseeg coob pes tsawg. Txawm li ntawd los nkawv ho txhawj tias nkawv tsis xav nyob txom nyem ntsuav. Cia peb ho mus tham txog ib tug kwv tij npe hu ua Nyiaj Npliam. Nws nyob rau lub teb chaws uas txwv tsis pub muaj Yehauvas Cov Tim Khawv. Nws ho txhawj ntshai nyob tsam nws raug tsim txom thiab nws tsis paub xyov nws tsev neeg yuav xav li cas rau nws. Txuas ntxiv no cia peb ho mus tham txog tus muam hu ua Vab uas mob qog los sis kheeb xawm (cancer). Nws twb nrhiav rau qhov txhia qhov chaw seb puas muaj ib tug kws tshuaj yuav phais tau nws tus mob es tsis txhob siv ntshav. Nws txhawj tsam nws ho tuag ua ntej kho tau nws tus mob.

2. Vim li cas zoo rau peb tswj kom tsis txhob ntshai dhau?

² Koj puas tau txhawj ntshai yam li tau hais tas los no? Muaj coob leej ntau tus yeej tau txhawj ntshai kawg nkaus. Yog peb tsis tswj txoj kev ntshai ces tej thaud peb yuav txiav txim siab ua tau tej qhov tsis yog thiab yuav rhuav tau peb txoj kev sib raug zoo nrog Yehauvas. Thaum muaj li no Xatas yuav zoo siab heev. Tsis tas li ntawd, Xatas tseem yuav siv txoj kev ntshai ua rau peb tsis nco txog Yehauvas tej kev cai, tsis hais mus qhia txoj moo zoo los yog. (Tshwmsim 12:17) Xatas mas phem tshaj plaws tsis zam leej twg thiab nws muaj hwj chim heev. Txawm li ntawd los peb yeej muaj peev xwm tiv thaiv tau peb tus kheej. Peb yuav tiv thaiv tau li cas?

3. Yuav ua li cas thiaj daws tau peb txoj kev txhawj ntshai?

 ³ Yog peb nco ntsoov tias Yehauvas hlub peb thiab tuaj peb tog ces peb yeej yuav kov yeej txoj kev txhawj ntshai. (Phau Ntawv Nkauj 118:6) Xws li tus uas sau Phau Ntawv Nkauj 118. Nws raug ntau tsav ntau yam. Nws tej yeeb ncuab los haj tseem yog tej neeg muaj meej muaj mom (nqe 9, 10). Qee lub sij hawm, nws twb tsis pom qab rau siav rau qhov twg (nqe 13). Yehauvas kuj qhuab ntuas nws hnyav kawg li (nqe 18). Txawm li ntawd los tus sau nkauj haj tseem hu nkauj seev yees tias: “Kuv yuav tsis ntshai li.” Ua li cas nws thiaj li nyob sov siab so yam li no? Vim nws paub hais tias txawm Yehauvas qhuab ntuas nws los Yehauvas yeej hmov tshua nws kawg nkaus li. Tus sau nkauj paub ntsoov tias txawm nws yuav raug li cas los xij peem, Yehauvas yeej yuav sawv nreg nroos pab nws.​—Phau Ntawv Nkauj 118:29.

4. Yog peb tso siab rau Vajtswv, peb yuav kov yeej tej kev txhawj ntshai twg?

⁴ Peb yuav tau nco ntsoov tias Yehauvas hlub tshua peb. Yog peb nco ntsoov li ntawd, yuav pab peb kov yeej peb txoj kev ntshai no xws li (1) txhawj ntshai tsam koob tsis tau lub cuab lub yig, (2) ntshai neeg, thiab (3) txhawj ntshai kev ploj kev tuag. Cov kwv tij nkauj muam uas hais tas los no nco ntsoov Yehauvas txoj kev hlub tshua, lawv thiaj kov yeej lawv tej kev ntshai.

5. Muaj tej yam twg ua rau cov txiv tsev txhawj xeeb? (Saib daim duab ntawm lub khaum.)

⁵ Ib tug txiv tsev uas ntseeg Yehauvas yeej txhawj xeeb tsam koob tsis tau nws lub cuab lub yig. (1 Timautes 5:8) Nyob rau lub caij muaj kab mob no, ua rau cov txiv tsev txhawj nyob tsam lawv ho poob hauj lwm, nrhiav tsis tau nyiaj los mus them vaj them tsev, thiab yuav tsis tau zaub mov los yug lub ciab lub yig. Tsis tas li ntawd, cov txiv tsev yeej txhawj tsam poob hauj lwm thiab nrhiav tsis tau hauj lwm ua. Zoo li Teeb thiab Ntxhi nkawv ob niam txiv, ho txhawj nyob tsam txom nyem tsis muaj nyiaj siv. Txoj kev xav li no ua rau coob leej ntau tus tau muab Yehauvas tso pov tseg. Yog li ntawd, Xatas yeej ntxias tau coob leej ntau tus lawm tiag.

6. Xatas xav kom peb ntseeg li cas?

⁶ Xatas xav kom peb ntseeg hais tias txawm peb yuav ntxeev tiaj khwb rwg los Yehauvas tsis quav ntsej peb thiab nws yeej yuav tsis cev tes pab yog peb koob tsis tau peb lub cuab lub yig. Yog peb ntseeg yam li no ces peb yuav xav hais tias peb yuav tau ua tiag tuav peb tes hauj lwm xwv thiaj koob tau peb lub cuab lub yig, tab txawm yuav hla tej hauv paus ntsiab lus hauv phau Vajlugkub qho me ntsis los xij peem.

7. Yexus txhawb tau peb lub zog li cas?

⁷ Tsis muaj leej twg yuav paub Yehauvas zoo npaum li Yexus. Yog li ntawd, Yexus thiaj hais tias: “Koj Leej Txiv yeej paub tej uas koj cheem tsum ua ntej koj thov nws.” (Mathais 6:8) Yexus paub hais tias Yehauvas tos tsis hnyu yuav pab peb. Vim peb teev tiam Yehauvas ces peb yeej yog nws tsev neeg. Yehauvas yeej saib xyuas nws lub cuab lub yig, nws thiaj qhia kom cov txiv tsev saib xyuas lawv lub cuab lub yig li tau hais hauv 1 Timautes 5:8.

8. (1) Qhov yuav pab tau peb kom tsis txhob ntshai nyob tsam peb koob tsis tau lub cuab lub yig yog li cas tiag? (Mathais 6:31-33) (2) Raws li nyob hauv daim duab, peb khaws tau li cas los ntawm khub txij nkawm uas nqa zaub mov mus pub rau ib tug nkauj muam ntseeg tsev neeg noj?

⁸ Yog peb tso siab tias Yehauvas hlub tshua peb thiab saib xyuas peb tsev neeg ces peb yeej tso siab tau tias Yehauvas yuav pab kom peb koob tau peb lub cuab lub yig. (Nyeem Mathais 6:31-33.) Nco ntsoov tias Yehauvas yeej yuav pab peb rau thaum lub caij peb muaj tsis  txawm peem vim thaum nws tsim lub ntiaj teb, tsis yog nws tsim kom muaj txaus noj los yug peb txoj sia xwb tiam sis nws tsim lub ntiaj teb no puv ntia txhua yam kom ua rau peb nyob kaj siab lug tso siab plhuav. (Chivkeeb 2:9) Txawm qee lub sij hawm peb tsuas muaj me ntsis txuas pluas lawm xwb los nco ntsoov hais tias Yehauvas yeej pub kom peb muaj txuas pluas tsis tu. (Mathais 6:11) Txawm peb tau tso qho yam tseg lawm los Yehauvas yeej yuav muab txhab ntxiv rau peb thiab yav tom ntej nws haj tseem yuav muab txoj sia ntev dhawv mus ib txhis rau peb. Teeb thiab Ntxhi kuj ras txog tib yam li ntawd thiab.​—Yaxayas 65:21, 22.

9. Teeb thiab Ntxhi nkawv tso tau yam ntxwv li cas rau peb xyaum?

⁹ Nyob rau hauv lub teb chaws Khaulaunpias (Colombia), Teeb thiab Ntxhi nkawv muaj vag muaj tse thiab muaj hauj lwm ua nyob sov siab so. Nkawv hais tias: “Wb xav muab qho yam tso tseg xwv wb thiaj ua tau Yehauvas tes hauj lwm los wb ntshai tsam wb tsis muaj nyiaj los siv.” Yam uas pab tau kom nkawv tsis txhob txhawj ntshai yog xav txog tej uas Yehauvas tau pab nkawv dua los lawm. Nkawv txawm tso nkawv ob txog hauj lwm tseg thiab tso siab rau Yehauvas ua tus pab nkawv. Nkawv muab nkawv lub tsev muag thiab tsiv mus rau ib thaj chaw uas tsis tshua muaj cov ntseeg coob pes tsawg. Teeb hais tias: “Wb yeej nyob lub neej raws li Mathais 6:33 tau hais tseg. Wb yeej muaj txhua yam txawm peem thiab wb lub neej yeej kaj siab dua lawm tiag.”

10. Vim li cas ib leeg ho ntshai ib leeg?

¹⁰ Neeg ib leeg yeej ua phem rau ib leeg txij ntua puag thaum Adas thiab Evas nkawv tawm tsam Yehauvas los lawm. (Tej Lus Qhia 8:9) Xws li neeg yeej siv lawv tej meej mom los mus tsim txom lwm tus, tej tub sab ua tau tej yam twb ras tsis txog rau lwm tus, nyob rau hauv tej tsev kawm ntawv ib tug ua lim hiam rau ib tug, thiab hauv lub cuab lub yig ib leeg ua phem rau ib leeg. Yog li ntawd, tej neeg ib leeg thiaj ntshai ib leeg. Xatas siv txoj kev ntshai neeg no coj los tawm tsam peb li cas?

11-12. Xatas siv txoj kev ntshai neeg los tawm tsam peb li cas?

¹¹ Xatas xav kom peb ntshai tib neeg xwv peb thiaj li tsis kam mus qhia txoj moo zoo los sis ua ub ua no rau Yehauvas. Xatas tshoov tej nom tswv siab kom tsim txom peb thiab txwv tsis pub peb qhia txoj moo zoo. (Lukas 21:12; Tshwmsim 2:10) Xatas tshoov tib neeg siab kom hais lus dag txog Yehauvas  Cov Tim Khawv. Peb raug thuam thiab raug ntaus vim tib neeg ntseeg tej lus dag ntawd. (Mathais 10:36) Tej yam Xatas ua no tsis yog tshiab tshiab es peb tsis paub txog. Tiam sis cov ntseeg uas nyob thawj 100 xyoo twb raug tej no tib yam nkaus.​—Tes Haujlwm 5:27, 28, 40.

¹² Xatas tsis yog siv tej nom tej tswv los tsim txom kom peb ntshai xwb. Tej thaud raug ntaus twb tsis npaum li ntshai peb tsev neeg. Muaj ib txhia ntshai tias xyov lawv tsev neeg yuav xav li cas thaum lawv los ntseeg Yehauvas. Lawv yeej xav kom lawv tej txheeb ze los paub Yehauvas. Yeej mob lawv siab kawg li thaum hnov tej txheeb ze thuam Yehauvas thiab Yehauvas cov tib neeg. Muaj tej zaud ib txhia nruab ze kuj hloov siab los ntseeg Yehauvas lawm thiab. Peb yuav ua li cas yog hais tias peb tej nruab ze muab peb txiav tu npawv vim peb ntseeg Yehauvas lawm?

13. Vajtswv txoj kev hlub tshua yuav pab kom peb nco ntsoov li cas thaum peb tsev neeg tsis yuav peb lawm? (Phau Ntawv Nkauj 27:10)

¹³ Nyob rau hauv Phau Ntawv Nkauj 27:10 txhawb tau peb zog heev. (Nyeem.) Yog peb nco ntsoov Yehauvas txoj kev hlub tshua ces txawm peb tsev neeg yuav ua txij tog txij peg los tsis luaj twg. Tsis tas li ntawd, peb yuav tso siab plhuav tias Yehauvas yuav foom koob hmoov rau peb vim peb tiv dhau tej no. Tsis muaj leej twg yuav saib xyuas tau peb zoo npaum li Yehauvas vim nws yeej yuav pub kom peb muaj txawm peem, muaj lub siab tus, thiab nrog nws sib raug zoo. Nyiaj Npliam kuj ras txog tib yam li ntawd thiab.

14. Peb khaws tau Nyiaj Npliam tus yam ntxwv li cas?

¹⁴ Lub teb chaws uas Nyiaj Npliam nyob, tej nom tej tswv tsim txom Yehauvas Cov Tim Khawv kawg nkaus li. Txawm li ntawd los Nyiaj Npliam txaus siab hlo los ntseeg Yehauvas. Nyiaj Npliam nco ntsoov hais tias Yehauvas hlub tshua nws heev, nws thiaj tsis ntshai neeg. Nws hais tias: “Tej kev tsim txom kuv raug mas tseem loj tshaj li kuv xav tau. Kuv twb tsis txhawj nom tswv tsim txom npaum li kuv txhawj tsam kuv tsev neeg tawm tsam kuv. Yog kuv txiv thiab kuv tsev neeg paub hais tias kuv mus ua Yehauvas ib tug Tim Khawv lawm, ntshe lawv yuav tsis txaus siab thiab tu siab rau kuv heev.” Txawm muaj li no los Nyiaj Npliam nco ntsoov hais tias Yehauvas yeej saib xyuas cov uas teev tiam Nws. Nyiaj Npliam thiaj tau hais li no tias: “Kuv yeej pom ntsoov Yehauvas pab lwm tus uas khwv tsis tau los  koob lub cuab lub yig, raug luag tej ntxub ntxaug, thiab raug neeg phem ntaus. Kuv paub tias Yehauvas yeej yuav pab kuv yog kuv nrog nraim nws. Muaj ntau ntau zaus kuv kuj raug ntes thiab raug tsim txom, kuv yeej nco ntsoov Yehauvas pab kuv thaum kuv tsa ncauj thov txog nws. Yog peb ntseeg Yehauvas lawm, nws yeej yuav tsis tso peb tseg.” Raws li no, Yehauvas yeej suav tam li ib Leeg Txi rau Nyiaj Npliam tiag thiab Yehauvas cov tib neeg los suav tam li Nyiaj Npliam tsev neeg.

15. Vim li cas peb ho tsis xav ploj tuag?

¹⁵ Nyob hauv phau Vajlugkub yeej qhia meej tseeb hais tias kev tuag yog peb tus yeeb ncuab. (1 Kauleethaus 15:25, 26) Thaum peb los sis ib tug peb hmov tshua muaj mob muaj nkeeg, peb yeej txhawj ntshai tsam raug txoj kev ploj kev tuag. Peb tsis xav raug kev ploj kev tuag vim Yehauvas tsim kom peb muaj lub siab xav nyob mus ib txhis. (Tej Lus Qhia 3:11) Peb yuav txawj txuag peb txoj sia yog peb txhawj ntshai tsam peb ho lam tuag. Muab piv txwv tias yog peb ntshai ces peb yuav noj tej zaub mov kom zoo, mus dhia ua si, mus ntsib kws tshuaj, yog tsim nyog noj tshuaj los yuav tau noj tshuaj thiab txhob ua tej yam txo tau peb txoj sia.

16. Vim peb ntshai kev ploj kev tuag, Xatas siv qhov no los tawm tsam peb li cas?

¹⁶ Xatas paub ntsoov tias peb xav ciaj xwb tsis xav tuag. Nws thiaj tau hais tias peb yeem tso ib puas tsav yam tseg tsis hais teev tiam Yehauvas los xij peem, tsuas yog kom peb ciaj sia xwb. (Yauj 2:4, 5) Tsis muaj tseeb raws li Xatas hais ntawd. Twb yog Xatas yog tus uas siv nws “lub hwjchim uas ua kom neeg tuag,” los nws haj tseem siv txoj kev tuag los hem kom peb tso Yehauvas tseg thiab. (Henplais 2:14, 15) Cov neeg uas raug Xatas tshoov lawv lub siab yuav hem hais tias lawv yuav muab peb tua yog peb tsis tso Yehauvas. Hos muaj qee zaug yog peb muaj mob muaj nkeeg ces Xatas yuav hem kom peb hla Vajtswv tej kev cai. Tej kws tshuaj los sis peb tsev neeg uas tsis ntseeg Yehauvas yuav txhob kom peb txhaj ntshav uas yog txhaum Vajtswv txoj cai. Los sis muaj ib txhia neeg ho yuav txhob kom peb txais tej yam kev kho mob uas txhaum tej hauv paus ntsiab lus hauv phau Vajlugkub.

17. Raws li Loos 8:37-39, ua li cas peb ho tsis txhawj ntshai txog kev ploj kev tuag?

¹⁷ Txawm peb tsis xav raug kev ploj kev tuag los yog ib hnub twg peb ib pas nqus tsis tuaj lawm, Yehauvas haj tseem hmov tshua txog peb. (Nyeem Loos 8:37-39.) Cov neeg uas muaj kev sib raug zoo nrog Yehauvas, txawm lawv nruam sim lawm los lawv haj tseem nyob rau hauv Yehauvas lub cim xeeb. (Lukas 20:37, 38) Yehauvas yeej tos tsis hnyu yuav tsa kom lawv rov muaj txoj sia dua. (Yauj 14:15) Nws twb txhiv peb kim kawg li kom peb “tau txojsia ntev dhawv mus ibtxhis.” (Yauhas 3:16) Tej no qhia tias Yehauvas hlub tshua peb kawg nkaus li. Yog li ntawd, thaum peb raug kev mob kev nkeeg los sis yuav ntsib txoj kev ploj kev tuag, cia peb vam khom Yehauvas lub tswv yim, lub dag lub zog, thiab nplig peb lub siab es tsis txhob muab nws tso pov tseg. Vab nkawv ob niam txiv kuj ras txog tib yam li ntawd thiab.​—Phau Ntawv Nkauj 41:3.

18. Peb khaws tau Vab tus yam ntxwv li cas?

¹⁸ Thaum Vab muaj 35 xyoos, nws txawm xeeb ib lub qog los sis kheeb xawm ua rau nws mob hnyav heev. Nws nco ntsoov Yehauvas txoj kev hlub tshua nws, nws thiaj tsis ntshai kev ploj kev tuag. Nws hais tias: “Tib hmos xwb kuv lub neej txawm hloov hlo thaum kuv paub tias kuv xeeb tus mob no. Kuv yuav tau mus muab phais tawm kuv thiaj li tsis tuag. Kuv mus nrog ntau tus kws tshuaj tham tiam  sis lawv pheej yuav txhab ntshav xwb lawv thiaj phais. Kuv ntshai kawg li tiam sis kuv tsis xav hla Vajtswv txoj kev cai mus txhab ntshav. Nyob rau hauv kuv lub neej, Yehauvas ib txwm hlub kuv. Zaum no kuv yuav tsis kam muab nws tso tseg. Txhua zaus kuv hnov ib qho xwm tsis zoo ces kuv huab yam mob siab ua kom haum Yehauvas siab, tsis yog haum Xatas siab. Tom qab no kuv mus phais thiab tsis siv ntshav. Txawm kuv tseem muaj mob ntsuav los Yehauvas yeej pab kuv rau tej ntwb ntu ntawd. Kuv nco ntsoov thaum kuv tseem tsis tau mob, wb mus kev sib txoos peb twb tham txog zaj kawm uas hais txog ua siab tawv thaum muaj kev nyuaj siab. * Zaj kawm no txhawb tau wb lub zog kawg nkaus li. Wb muab nyeem mus nyeem los tas zaj tas zog. Muaj tej zaj kawm zoo li no, niaj hnub mus qhia txoj moo zoo thiab mus kev sib txoos mas rub tau kom wb lub siab tus thiab txiav txim siab tau ua qhov zoo qhov yog.”

19. Tsis ntev tom ntej no yuav muaj li cas?

¹⁹ Vim muaj Yehauvas ua tus pab nws cov tib neeg nyob thoob plaws ntiaj teb no, lawv thiaj kov yeej Xatas tej kev dag ntxias lawm tiag. (1 Petus 5:8, 9) Koj los yeej muaj peev xwm kov yeej tib yam nkaus. Tsis ntev tom ntej no, Yehauvas yuav hais kom Yexus thiab cov nrog Yexus “rhuav dab Ntxwgnyoog tes haujlwm.” (1 Yauhas 3:8) Tom qab ntawd, Yehauvas cov tib neeg “yuav tsis muaj kev txhawj kev ntshai” ntxiv li lawm. (Yaxayas 54:14; Mikhas 4:4) Cheem tseem tsis tau txog lub sij hawm ntawd, peb yuav tau ua npaum li peb ua tau kom kov yeej txoj kev ntshai.

20. Muaj dab tsi pab tau kom peb tsis txhob txhawj ntshai?

²⁰ Peb yuav tau tso siab tias Yehauvas hlub tshua thiab yuav tiv thaiv nws cov tib neeg. Yog peb ua zoo xav txog thiab muab tham tuj taws rau lwm tus txog tej Yehauvas tau tiv thaiv nws cov tib neeg puag thaum ub ces yuav tsav tau peb txoj kev ntseeg kom loj ntxiv. Peb yuav tau nco ntsoov xav txog tej kev nyuaj siab uas peb ntsib es Yehauvas tau pab peb dua los. Peb yeej yuav kov yeej txhua yam kev ntshai yog peb muaj Yehauvas ua tus pab peb lawm.​—Phau Ntawv Nkauj 34:4.