1. Raws li 1 Petus 5:2, tes hauj lwm tseem ceeb uas Yehauvas muab rau cov txwj laus ua yog dab tsi?

 YEHAUVAS tsa cov txwj laus ua cov saib xyuas nws cov yaj. Cov txwj laus zoo siab kawg uas Yehauvas tso siab rau lawv saib xyuas lawv cov kwv tij nkauj muam ces cov txwj laus “yeej mob siab saib xyuas lawv.” (Yelemis 23:4; nyeem 1 Petus 5:2.) Peb zoo siab uas muaj cov txwj laus zoo li no nyob hauv peb lub koom txoos.

2. Tej zaum cov txwj laus yuav ntsib tej teeb meem zoo li cas?

² Cov txwj laus muaj hauj lwm ntau heev, tiam sis lawv tseem yuav tau saib xyuas Yehauvas lub koom txoos thiab ces yeej tsis yooj yim rau lawv. Ib tug txwj laus hauv teb chaws Yunaithim Xatej (United States) hu ua Thoonis (Tony) yuav tau xyaum tsis txhob lees hauj lwm ntau tshaj li nws ua tau. Nws hais tias: “Thaum nyuam qhuav pib muaj tus kab mob Khaus Viv-19 (COVID-19), kuv ua hauj lwm ntau heev los pab lub koom txoos tej kev sib txoos thiab kev tshaj tawm. Txawm kuv sib zog ua npaum li cas los zoo li hauj lwm pheej muaj ntau zuj zus xwb. Kuv thiaj tsis muaj sij hawm los nyeem thiab los kawm Vajlugkub, thiab thov Vajtswv.” Is Lawj (Ilir) uas yog ib tug txwj laus nyob hauv teb chaws Khoxovaum (Kosovo) ho muaj lwm yam kev nyuaj siab. Thaum nws tseem nyob rau thaj tsam uas muaj tsov muaj rog mas nyuaj heev rau nws ua li lub koom haum hais. Nws hais tias: “Thaum peb ceg Npe-ee hais seb kuv puas kam mus pab cov kwv tij nkauj muam ntawm tej thaj tsam muaj kev phom sij ntau mas ua rau kuv ntshai heev. Kuv thiaj xav hais tias tej uas lub koom haum hais ntawd yeej ua tsis tau ib zaug li.” Kwv tij This (Tim) uas yog ib tug tub txib tshaj tawm txawv teb chaws nyob sab Axias pom tias txawm yog tej uas nws niaj hnub ua xwb los yeej nyuaj heev rau nws. Nws hais tias: “Muaj tej thaud kuv sab sab thiab lim lim ces kuv twb tsis nco txhawj txog cov kwv tij nkauj muam li.” Puas muaj dab tsi yuav pab tau cov txwj laus uas muaj kev nyuaj siab li no?

3. Nkide-oos tus qauv pab tau peb sawv daws li cas?

 ³ Nkide-oos yog ib tug thawj coj, nws saib xyuas thiab tiv thaiv Vajtswv cov neeg. (Cov Thawjtswj 2:16;1 Xwmtxheej Vajntxwv 17:6) Nws tso tau ib tug tus qauv zoo heev rau cov txwj laus xyaum. (Henplais 6:12; 11:32) Zoo ib yam li Nkide-oos, Yehauvas tsa cov txwj laus los saib xyuas nws cov neeg rau lub sij hawm uas muaj kev kub ntxhov ntau heev thiab. (Tes Haujlwm 20:28; 2 Timautes 3:1) Peb pom hais tias Nkide-oos yog ib tug neeg txo hwj chim thiab mloog Vajtswv lus. Nws ua siab ntev ua tes hauj lwm uas Yehauvas muab rau nws ua. Txawm peb yog ib tug txwj laus thiab tsis yog los, peb yeej ris cov txwj laus txiaj ntsig thiab xav txhawb lawv vim lawv yeej khwv heev los pab lub koom txoos.​—Henplais 13:17.

4. Ua cas peb thiaj paub tias Nkide-oos yog ib tug neeg txo hwj chim?

⁴ Nkide-oos yog ib tug neeg txo hwj chim. b Thaum Yehauvas tus tub txib saum ntuj los hais kom Nkide-oos mus cawm cov Ixayees ntawm cov Midias, Nkide-oos hais tias: “Kuv cuab kwvtij yog ib cuab uas tsawg heev nyob hauv xeem Manaxes, thiab kuv yog tus uas tsis tseemceeb nyob hauv kuv tsevneeg.” (Cov Thawjtswj 6:15) Nws xav hais tias nws yuav ua tsis tau tiam sis Yehauvas paub tias nws yeej ua tau. Twb yog muaj Yehauvas pab nws es nws thiaj ua tau nws tes hauj lwm tiav.

5. Thaum twg yuav tsis yooj yim rau cov txwj laus ua neeg txo hwj chim?

⁵ Cov txwj laus txo hwj chim thiab ua siab ntev npaum li lawv ua tau rau txhua yam. (Mikhas 6:8; Tes Haujlwm 20:18, 19) Lawv tsis khav theeb txog tej uas lawv txawj ua los sis tej uas lawv ua tau yav tas los. Thiab yog muaj tej yam lawv ua yuam kev los sis ua tsis tau los lawv tsis xav hais tias lawv tsis muaj nuj nqis dab tsi. Txawm li ntawd los muaj qee zaus yuav tsis yooj yim rau lawv ua neeg txo hwj chim. Xws li thaum ib tug txwj laus lees tau hauj lwm ntau tshaj li nws ua tau. Thiab thaum muaj neeg thuam nws los sis qhuas nws rau tej uas nws ua. Thaum muaj li no, cov txwj laus yuav xyaum Nkide-oos tus qauv li cas?

6. Cov txwj laus yuav xyaum txo hwj chim li Nkide-oos li cas?

⁶ Thov lwm tus pab. Tus neeg txo hwj chim paub hais tias muaj tej yam nws yuav ua tsis tau. Peb paub hais tias Nkide-oos txo hwj chim vim nws tsis txaj muag thiab tsis ntshai mus thov lwm tus pab nws. (Cov Thawjtswj 6:27, 35;  7:24) Cov txwj laus los yuav tau ua li ntawd thiab. Thoonis, tus txwj laus uas peb tham txog puag ta, piav hais tias: “Vim cov laus ib txwm cob qhia tias kom tsis txhob yig hauj lwm puag thaum yaus los ces kuv thiaj pheej lees hauj lwm ntau tshaj li kuv ua tau. Hmo peb tsev neeg pe hawm Vajtswv ua ke, kuv thiaj xav hais tias cia peb tham txog kev txo hwj chim thiab kuv kuj nug kuv tus poj niam seb nws xav li cas. Kuv kuj mus saib zaj yeeb kiab hu ua Cob Thiab Txhawb, Thiab Tso Siab Rau Lwm Tus, Ib Yam Li Yexus Tau Ua hauv lub vej xaij jw.org/hmn.” Nim no Thoonis thiaj mus thov lwm tus pab nws lawm. Nws hais tias: “Nim no kuv muaj sij hawm los txhawb kuv txoj kev sib raug zoo nrog Yehauvas thiab tej hauj lwm hauv lub koom txoos los muaj neeg nrog saib xyuas lawm.”

7. Cov txwj laus yuav xyaum Nkide-oos tus qauv li cas thaum muaj neeg thuam lawv? (Yakaunpaus 3:13)

⁷ Tsis txhob chim thaum muaj neeg thuam. Ib qho uas nyuaj heev rau cov txwj laus txo hwj chim yog thaum muaj neeg thuam lawv. Nkide-oos tus qauv yuav pab tau cov txwj laus rau qhov no thiab. Nws paub tias nws zoo tsis tiav ces nws yeej ua siab ntev thaum cov Efalayees tuaj yws nws. (Cov Thawjtswj 8:1-3) Nws tsis ua npau taws vog rov rau lawv tiam sis nws txo hwj chim thiab ua zoo mloog lawv tej lus yws thiab ua zoo teb lawv. Lawv siab thiaj li nqig thiab tsis chim lawm. Cov txwj laus yuav tau xyaum Nkide-oos es ua siab ntev ua zoo mloog thiab ua zoo teb thaum muaj neeg thuam lawv. (Nyeem Yakaunpaus 3:13.) Yog cov txwj laus ua li ntawd ces lawv yuav pab tau lub koom txoos muaj kev sib haum xeeb.

8. Piav seb cov txwj laus yuav ua li cas thaum muaj neeg qhuas lawv.

⁸ Cia sawv daws qhuas Yehauvas xwb. Thaum Nkide-oos mus tua yeej cov Midias, cov Ixayees tuaj qhuas nws tiam sis nws hais kom lawv qhuas Yehauvas xwb. (Cov Thawjtswj 8:22, 23) Cov txwj laus yuav xyaum Nkide-oos tus qauv li cas? Txawm lawv yuav ua tau li cas los lawv yuav tsum qhuas Yehauvas xwb. (1 Kauleethaus 4:6, 7) Muab piv txwv li no, thaum muaj neeg qhuas ib tug txwj laus tias nws txawj cev lus qhuab qhia heev, nws yuav hais li cas? Tej zaum nws kuj teb tau lawv tias tej lus qhuab qhia ntawd yog nws muab ntawm Vajtswv Txoj Lus los xwb thiab nws tsuas ua li tej uas Yehauvas lub koom haum cob qhia peb sawv daws xwb. Muaj tej thaud kuj zoo rau cov txwj laus ua zoo xav seb lawv tej kev cob qhia puas ua rau tib neeg qhuas Yehauvas los sis ua rau tib neeg qhuas lawv xwb. Cia peb tham txog ib tug txwj laus hu ua Timautes uas nyiam cev lus qhuab qhia heev thaum nws nyuam qhuav tau ua txwj laus. Nws hais tias: “Kuv npaj lus ntau ntau los hais rau thaum kuv pib thiab kuv nrhiav cov lus piv txwv cov cov los hais xwb. Thaum kuv ua li ntawd ces tib neeg tsuas saib ntsoov kuv xwb, lawv tsis xav txog phau Vajlugkub los sis Yehauvas hlo li.” Tiam sis tom qab no nws pom tias nws yuav tau hloov, tib neeg thiaj li yuav tsis pheej saib ntsoov nws xwb. (Pajlug 27:21) Nws hais ntxiv tias: “Thaum kuv hloov li ntawd, muaj ib txhia kwv tij nkauj muam los hais rau kuv tias kuv cov lus qhuab qhia pab tau lawv nyiaj taus lawv tej teeb meem, lawv tej kev sim siab, los sis pab tau lawv txoj kev sib raug zoo nrog Yehauvas. Qhov no ua rau kuv zoo siab tshaj li tej uas yav tas los lawv qhuas kuv.”

9. Ua li cas thiaj nyuaj heev rau Nkide-oos ua li Yehauvas hais thiab vim li cas nws yuav tsum ua siab tawv? (Saib daim duab ntawm lub khaum.)

⁹ Thaum Yehauvas tsa Nkide-oos ua cov Ixayees tus thawj coj, Yehauvas muab ib teg hauj lwm uas nyuaj heev thiab phom sij kawg rau nws ua. Nws yuav tsum mloog Yehauvas lus thiab ua siab tawv nws thiaj yuav ua tau. Yehauvas hais kom nws muab nws txiv lub thaj teev Npa-as tsoo pov tseg. (Cov Thawjtswj 6:25, 26) Tom qab ntawd, thaum Nkide-oos npaj nws pab tub rog mus tua cov Midias, Yehauvas hais ob zaug rau nws tias nws cov tub rog coob dhau  lawm. (Cov Thawjtswj 7:2-7) Thaum kawg, Yehauvas tseem hais kom nws coj nws pab tub rog mus tua lawv cov yeeb cuab rau thaum ntuj teb tag hmo thiab.​—Cov Thawjtswj 7:9-11.

10. Vim li cas muaj tej thaud thiaj tsis yooj yim rau cov txwj laus ua neeg mloog lus?

¹⁰ Cov txwj laus yuav tsum mloog lus. (Yakaunpaus 3:17) Tus txwj laus uas mloog lus yuav zoo siab hlo ua li phau Vajlugkub thiab Yehauvas lub koom haum hais. Yog nws ua li ntawd ces nws yuav ua tau qauv zoo rau lwm tus xyaum. Tiam sis muaj tej thaud yuav tsis yooj yim. Muab piv txwv li no, cov txwj laus muaj hauj lwm ntau ces muaj tej thaud lawv yuav kov tsis yeej tej uas lub koom haum hais kom lawv ua. Hos muaj tej thaud, muaj tej tug txwj laus yuav ua xyem xyav tias xyov tej uas lub koom haum hais kom lawv ua puas tsim nyog ua thiab puas zoo. Los sis qhov uas lub koom haum hais kom nws ua yuav ua rau nws raug ntes. Thaum muaj li tej no, Nkide-oos tus qauv yuav pab tau cov txwj laus li cas?

11. Nkide-oos tus qauv pab tau cov txwj laus mloog Yehauvas lub koom haum lus li cas?

¹¹ Cov txwj laus ua zoo mloog thiab ua li Yehauvas lub koom haum hais. Yehauvas qhia Nkide-oos tias nws yuav rhuav nws txiv lub thaj teev tiam Npa-as li cas, nws yuav ua lub thaj tshiab los teev tiam Yehauvas nyob rau qhov twg, thiab coj tus tsiaj twg mus tua fij rau Yehauvas. Nkide-oos yeej ua raws nraim li Yehauvas hais thiab tsis nug ib los li. Niaj hnub no, Yehauvas siv nws lub koom haum tshaj tawm thiab sau ntawv tuaj rau cov txwj laus txog tej uas lub koom haum xav kom cov txwj laus ua los pab peb xwv peb thiaj tsis raug xwm dab tsi thiab tsis plam peb txoj kev sib raug zoo nrog Yehauvas. Peb hlub thiab ris cov txwj laus txiaj ntsig. Twb yog vim lawv mloog Yehauvas lub koom haum lus, lawv thiaj pab tau peb sawv daws.​—Phau Ntawv Nkauj 119:112.

12. Thaum Yehauvas lub koom haum hloov ib yam twg, cov txwj laus yuav ua li Henplais 13:17 hais li cas?

¹² Yoog raws Yehauvas. Koj puas nco tias Yehauvas hais kom Nkide-oos xa nws cov tub rog rov mus tsev yuav luag tag? (Cov Thawjtswj 7:8) Tej zaum thaum ntawd, Nkide-oos yuav xav tias: ‘Puas tsim nyog kuv ua li no? Yog kuv ua li no no, peb puas yuav muaj yeej?’ Txawm nws yuav xav li cas los, nws yeej ua raws nraim li Yehauvas hais. Niaj hnub no, cov txwj laus ua ib yam nkaus li Nkide-oos ua thaum lub koom haum hais kom lawv hloov ua ib yam tshiab. (Nyeem Henplais 13:17.) Muab piv txwv li no, yav tas los lub koom haum txais nyiaj rau cov koom txoos ua Tsev Nceeg Vaj thiab Tsev Rooj Sib Txoos ces lawv yuav tau thev rov qab. Tiam sis xyoo 2014, Pab Uas Ntaus Thawj hais tias lawv tsis ua li ntawd lawm thiab cov koom txoos tsis tas them cov nyiaj lawv txais rov qab lawm. Yog qhov chaw twg cheem tsum Tsev Nceeg Vaj thiab Tsev Rooj Sib Txoos ces lub koom haum mam li muab cov nyiaj siab dawb uas cov koom txoos thoob qab ntuj muab rau lawv coj mus ua. Txawm lawv lub koom txoos tso tau nyiaj siab dawb me me xwb los tsis ua li cas. Thaum kwv tij Hauxes (José) hnov li ntawd, nws yeej ntseeg tsis tau li. Nws xav tias: ‘Ntshe yuav ua  tsis tau ib lub Tsev Nceeg Vaj tshiab li lawm rau qhov nyob peb sab ntuj no yeej tsis tau muaj dua li no ib zaug li.’ Ua li cas Hauxes thiaj li hloov siab lawm? Nws hais tias: “Cov lus hauv Pajlug 3:5, 6 pab kom kuv tso siab rau Yehauvas. Txij li thaum uas peb ua li Pab Uas Ntaus Thawj hais no mas zoo kawg nkaus li. Tsis yog hais tias peb ua tau Tsev Nceeg Vaj ntau tshaj qub xwb tiam sis tseem pab kom peb sawv daws muaj sib npaug zos thiab.”

13. (1) Nkide-oos tso siab tias Yehauvas yuav ua li cas? (2) Cov txwj laus yuav xyaum Nkide-oos tus qauv li cas? (Saib daim duab.)

¹³ Ua siab loj tsis txhob ntshai ua Yehauvas tes hauj lwm. Txawm hais tias tes hauj lwm uas Yehauvas muab rau Nkide-oos ua yeej txaus ntshai thiab muaj kev phom sij ntau los nws yeej ua li Yehauvas hais. (Cov Thawjtswj 9:17) Nws yeej tso siab plhuav tias Yehauvas yeej yuav pab nws tiv thaiv Yehauvas cov neeg li Yehauvas hais. Niaj hnub cov txwj laus uas nyob rau tej thaj tsam uas nom tswv txwv peb tes hauj lwm xyaum ua ib yam nkaus li Nkide-oos. Lawv ua siab loj siab tawv ntaus thawj hlo coj kev sib txoos thiab kev tshaj tawm txawm lawv twb paub lawm tias tej zaum lawv yuav raug luag ntes, raug luag thom, yuav poob hauj lwm, los sis yuav raug luag ua phem. c Thaum lub sij hawm uas txom nyem loj kawg nkaus los txog, cov txwj laus yuav tau ua siab loj siab tawv tiag tiag lawv thiaj li yuav ua tau li Yehauvas lub koom haum hais. Rau qhov thaum ntawd yuav muaj kev phom sij thiab txaus ntshai heev. Tej zaum lawv yuav tau mus tshaj tawm txog kev txiav txim hnyav rau tib neeg los sis yuav ua li cas peb thiaj li dim thaum Nkos uas nyob hauv teb chaws Mankos sawv tawm tsam Yehauvas cov neeg.​—Exekees 38:18; Tshwmsim 16:21.

14. Vim li cas thiaj tsis yooj yim rau Nkide-oos ua nws tes hauj lwm?

¹⁴ Nkide-oos yog thawj coj ces nws yeej khwv heev. Thaum Nkide-oos mus tua cov Midias hmo ntuj es cov Midias khiav lawm, nws caum lawv ntawm lub Hav Yexelees mus txog ntua ntawm ntug dej Yauladees uas tej zaum muaj nroj tsuag thiab me nyuam ntoo ntau ntau  thiab tuab tuab. (Cov Thawjtswj 7:22) Thaum ntawd, Nkide-oos thiab nws 300 tus tub rog sab heev lawm, lawv puas yuav cia li tso tseg li no? Lawv tsis tso tseg tiam sis lawv hla kiag tus dej mus rau sab tid mus caum tau cov Midias thiab tua yeej lawv kiag.​—Cov Thawjtswj 8:4-12.

15. Vim li cas tsis yooj yim rau ib tug txwj laus ua nws tes hauj lwm?

¹⁵ Ua ib tug txwj laus ces yeej sab thiab lim heev vim tsis yog hais tias nws saib xyuas lub koom txoos xwb tiam sis nws tseem yuav tau saib xyuas nws tsev neeg thiab. Thaum cov txwj laus sab sab thiab lim lim li no, lawv yuav xyaum Nkide-oos tus qauv li cas?

16-17. Ua cas Nkide-oos thiaj ua tau siab ntev ua nws tes hauj lwm thiab cov txwj laus tso siab tau li cas? (Yaxayas 40:28-31) (Saib daim duab.)

¹⁶ Tso siab plhuav tias Yehauvas yuav txhawb koj lub zog. Nkide-oos tso siab tias Yehauvas yuav txhawb nws lub zog ces Yehauvas yeej ua li ntawd. (Cov Thawjtswj 6:14, 34) Muaj ib zaug, Nkide-oos thiab nws pab tub rog khiav ko taw caum cov Midias ob tug vaj ntxwv uas tej zaum nkawd caij ntxhuav khiav. (Cov Thawjtswj 8:12, 21) Tiam sis Yehauvas pab cov Ixayees mus caum tau nkawd thiab tua yeej ntsuj rog ntawd. Cov txwj laus los kuj tso siab tau rau Yehauvas, tus uas “ibtxwm tsis tsaug leeg lossis qaug zog ib zaug li.” Nws yuav txhawb lawv lub zog thaum lawv sab sab thiab lim lim.​—Nyeem Yaxayas 40:28-31.

¹⁷ Cia peb mus tham txog kwv tij Mathais (Matthew) seb nws ho tso siab li cas rau Yehauvas. Nws yog ib tug ntawm Pab Kwvtij Sawv Cev Kev Kho Mob. Nws hais tias: “Kuv pom tias Yehauvas yeej txhawb kuv lub dag lub zog li Filipis 4:13 hais tiag. Muaj ntau zaus, kuv lim heev kuv xav hais tias kuv tsis muaj ib lub zog ua dab tsi li lawm es kuv thov Yehauvas nws yeej pub dag pub zog rau kuv kom kuv muaj zog thiab muaj siab mus pab tau kuv cov kwv tij nkauj muam.” Txawm muaj tej thaud yeej tsis yooj yim kiag li los, peb cov txwj laus yeej kub siab lug ua npaum li lawv ua tau los saib xyuas Yehauvas cov neeg. Txawm li los, lawv yuav tsum paub hais tias lawv tsuas ua tau npaum li cas xwb. Lawv kuj tso siab tau tias Yehauvas yeej hnov lawv tej lus thov thiab nws yuav pub dag pub zog rau lawv kom lawv muaj lub siab ntev ua nws tes hauj lwm.​—Phau Ntawv Nkauj 116:1; Filipis 2:13.

18. Raws li zaj peb kawm no, cov txwj laus xyaum tau li cas los ntawm Nkide-oos?

¹⁸ Cov txwj laus kawm tau ntau yam los ntawm Nkide-oos. Lawv kawm tau tias lawv yuav tau txo hwj chim es tsuas lees hauj lwm npaum li lawv muaj cuab kav ua tau xwb thiab txo hwj chim thaum muaj neeg qhuas lawv los sis thuam lawv. Lawv yuav tau mloog lus thiab ua siab tawv tsis txhob ntshai tam sim no, tshwj xeeb tshaj plaws yog rau thaum lub sim ceeb kawg los ze zus. Thiab lawv yuav tsum tso siab tias txawm yuav muaj teeb meem dab tsi yav tom ntej los Yehauvas yeej yuav pab lawv thiab txhawb lawv zog. Cov txwj laus yeej khwv khwv saib xyuas peb sawv daws ces yeej “tsim nyog peb hlub tshua” lawv thiab nco lawv txiaj ntsig tsis txawj tag.​—Filipis 2:29.