1. Peb yuav ua li cas peb thiaj yuav dim thaum Yehauvas hnub los txog?

 THAUM phau Vajlugkub hais txog Yehauvas hnub, yog hais txog hnub uas Yehauvas los rhuav tshem nws cov yeeb ncuab thiab los cawm nws cov neeg. Yav thaum ub, Yehauvas rau txim thiab rhuav tshem tej haiv neeg. (Yaxayas 13:1, 6; Exekees 13:5; Xefaniyas 1:8) Tiam sis nyob rau tiam no, Yehauvas hnub yuav pib thaum tej nom tswv rhuav tshem kev ntseeg cuav mus txog rau thaum ntsuj rog Amankedoos. Yexus hais tias yuav kom peb dim “hnub” ntawd, peb yuav tsum tau npaj tam sim no rau thaum muaj “kev txom nyem loj kawg nkaus” thiab peb “yuav tsum zov tos” hnub ntawd”.​—Mathais 24:21; Lukas 12:40.

2. Vim li cas 1 Thexalaunikes ho pab tau peb?

² Povlauj thawj tsab ntawv uas nws sau mus rau cov ntseeg hauv Thexalaunikes, nws siv lus piv txwv ntau los pab kom lawv paub npaj rau Yehauvas hnub. Txawm nws paub hais tias Yehauvas hnub yuav tsis tau los thaum ntawd los nws xav kom lawv npaj txhij rau hnub uas Yehauvas yuav los phua txim rau nws cov yeeb ncuab. (2 Thexalaunikes 2:1-3) Povlauj txhawb kom lawv npaj li hnub ntawd twb yuav los tag kis ntag. Peb los yuav tau ua ib yam li ntawd thiab. Cia peb mus tham seb Povlauj piav li cas txog peb qho no: (1) Yehauvas hnub yuav los li cas, (2) leej twg yuav tsis dim, thiab (3) peb yuav npaj li cas peb thiaj li yuav dim.

3. Yehauvas hnub yuav los li tub sab tuaj hmo ntuj li cas? (Saib daim duab.)

³ Yehauvas hnub “yuav los ib yam li tubsab tuaj.” (1 Thexalaunikes 5:2) Ntawm no yog thawj lo lus piv txwv uas Povlauj piav tias Yehauvas hnub yuav los li cas. Peb yeej paub tias tub sab keev nyiag tuaj hmo ntuj thaum uas peb tsis nco ceev faj thiab lawv tsuas tuaj ntawg ntiag tib pliag ntshis xwb. Yehauvas hnub yuav los ib yam li ntawd ces tib neeg yuav tsis faj txog tiam sis cov tseem Khixatia yuav tsis ceeb tias ua cas tib ntsais muag  xwb twb dua tag lawm thiab lawv yuav tsis raug kev puas tsuaj li cov neeg siab phem.

4. Yehauvas hnub yuav los li tus pojniam mob plab yuav yug me nyuam li cas?

⁴ Yehauvas hnub yuav los “ib yam li tus pojniam uas mob plab yuav yug menyuam.” (1 Thexalaunikes 5:3) Tus tub txib Povlauj hais tias Yehauvas hnub yeej yuav los tiam sis peb tsis paub tias yuav los thaum twg ib yam li tus poj niam yuav yug me nyuam. Tiam sis thaum txog caij lawm, nws yuav mob plab nthawv nthav tib pliag ntshis xwb ces twb tau me nyuam lawm, tsis muaj leej twg yuav cheem tau. Zoo ib yam li ntawd, txawm peb tsis paub tias Yehauvas hnub yuav los thaum twg los peb yeej paub tias hnub ntawd yeej yuav los xwb xwb li. Thiab tib pliag ntshis xwb Yehauvas yuav muab cov neeg phem rhuav tshem tag nrho mus, tsis muaj ib tug yuav dim hlo li.

5. Lub sij hawm muaj kev txom nyem loj kawg nkaus yuav zoo li thaum kaj ntug txoog li cas?

⁵ Yehauvas hnub yuav los zoo li thaum kaj ntug txoog. (1 Thexalaunikes 5:4) Povlauj zaj lus piv txwv peb, nws rov hais txog tus tub sab tuaj hmo ntuj, tiam sis zoo li zaum no nws muab Yehauvas hnub piv rau thaum kaj ntug txoog. Povlauj muab Yehauvas hnub piv rau thaum kaj ntug txoog rau qhov thaum tub sab rau rau siab vuag ub vuag no ces tos nco twb kaj ntug lawm, thaum ntawd neeg pom lawv tes hauj lwm phem. Thaum lub sij hawm muaj kev txom nyem loj kawg nkaus los, cov neeg phem tseem yuav ua phem thiab ua tej uas Yehauvas ntxub quj qees. Lawv zoo ib yam li cov tub sab uas tos nco xwb twb kaj ntug lawm. Peb tsis zoo li cov neeg phem ntawd. Peb npaj tos Yehauvas hnub thiab tsis ua tej uas tsis haum Yehauvas siab, kub siab lug ua “txhua yam zoo, ua neeg ncaj ncees thiab hais lus tseeb” xwb. (Efexus 5:8-12) Povlauj ob zaj lus piv txwv tom ntej no muaj ntsis zoo ib yam, nws siv ob zaj no los qhia peb txog cov uas yuav tsis dim thaum Yehauvas hnub los.

6. Ua li cas tib neeg feem coob thiaj zoo li cov neeg uas pw tsaug zog? (1 Thexalaunikes 5:6, 7)

⁶ “[Cov] tsaug zog.” (Nyeem 1 Thexalaunikes 5:6, 7.) Povlauj muab cov uas yuav tsis dim Yehauvas hnub piv rau cov neeg tsaug zog. Cov neeg tsaug zog tsis ras txog tej uas muaj tshwm sim puag ncig lawv thiab lub caij lub nyoog uas lawv nyob. Lawv thiaj tsis paub tias tej xwm txheej txog lub sim ceeb kawg twb muaj tiav li cas lawm thiab tsis paub tias lawv yuav ua li cas. Niaj hnub no tib neeg feem coob zoo li cov neeg tsaug zog ntawd. (Loos 11:8) Txawm lawv pom tej xwm txheej no los lawv tsis ntseeg tias peb nyob rau lub sim ceeb kawg lawm, thiab lub sij hawm muaj kev txom nyem loj kawg nkaus twb los ze lawm. Muaj tej tug tsuas mloog txoj xov zoo txog Vajtswv Lub Nceeg Vaj thaum muaj tej xwm txheej loj tshwm sim xwb. Txawm li los, feem coob yeem rov qab mus pw tsaug zog. Hos cov uas ntseeg tias muaj ib hnub Vajtswv yuav los txiav txim los lawv hais tias tseem nyob deb heev. (2 Petus 3:3, 4) Tiam sis peb paub tias niaj hnub no haj yam tseem ceeb rau peb yuav tsum tsis txhob tsaug zog thiab ceev faj zov tos.

7. Ua cas thiaj muab cov uas yuav raug Yehauvas nrhuav tshem piv rau cov neeg qaug cawv?

⁷ Cov uas qaug cawv. Povlauj muab cov uas yuav raug Yehauvas rhuav tshem piv rau cov uas qaug cawv vim rau qhov lawv tsis meej pem ces txawm muaj dab tsi tshwm sim los lawv tsis paub thiab ua tsis tau li cas, thiab lawv tsis paub txiav txim siab zoo. Cov neeg phem zoo li cov neeg qaug cawv, lawv tsis mloog Vajtswv tej lus sam hwm. Lawv ua lub neej uas coj lawv mus raug kev puas tsuaj. Tiam sis cov Khixatia tsis zoo li ntawd, lawv yog neeg meej pem thiab tsis qaug cawv. Ib tug neeg tshawb fawb Vajlugkub piav tias tus neeg uas meej pem muaj lub siab tus thiab tsis ntshai. Nws ua zoo xav ua ntej nws txiav txim siab ua ib yam dab tsi. Peb yuav tsum muaj lub siab tus thiab tsis txhob ua ywj fab ywj fwj, peb thiaj yuav tsis mus nrog luag koom kev nom kev tswv los sis nrog zej zog ua txij tog txij peg. Rau qhov thaum Yehauvas hnub los ze zuj zus tib neeg yuav ua kom nyuaj heev rau peb mloog Yehauvas lus. Txawm li los, peb tsis txhob txhawj. Thaum ntawd Yehauvas lub hwj huam dawb huv mam li pab kom peb muaj lub siab tus thiab paub txiav txim siab zoo tias peb yuav ua li cas.​—Lukas 12:11, 12.

8. Ua cas 1 Thexalaunikes 5:8 thiaj pab tau peb kom tsis txhob tsaug zog thiab ceev faj zov tos? (Saib daim duab.)

⁸ Hnav “daim thaiv hauv siab, thiab . . . muab . . . lub kausmom hlau ntoo.” (Nyeem 1 Thexalaunikes 5:8.) Povlauj muab peb piv rau ib pab tub rog uas npaj txhij vog yuav mus ua rog. Tus tub rog yuav tsum npaj kom txhij thiab tos ntsoov yuav mus ua rog txhua lub sij hawm. Peb los yuav tsum npaj kom txhij es muab kev ntseeg thiab kev hlub uas yog daim thaiv hauv siab los hnav thiab muab peb txoj kev cia siab uas yog lub kaus mom hlau los ntoo tos Yehauvas hnub. Yog peb ua li no ces thiaj yuav pab tau peb.

9. Peb txoj kev ntseeg tiv thaiv tau peb li cas?

⁹ Daim thaiv hauv siab tiv thaiv tus tub rog lub hauv siab. Kev ntseeg thiab kev hlub tiv thaiv peb lub siab thiab pab kom peb teev tiam Yehauvas thiab taug nraim Yexus tus hneev taw. Kev ntseeg pab kom peb tso siab tau tias Yehauvas yuav muab nqi zog rau cov uas mus cuag nws. (Henplais 11:6) Kev ntseeg kuj yuav pab kom peb tsis tso Yexus tseg txawm hais tias peb yuav tau nyiaj ntau yam kev nyuaj siab. Peb txoj kev ntseeg yuav ruaj khov yog hais tias peb xyaum cov kwv tij nkauj muam niaj hnub no uas txawm yog lawv raug kev tsim txom thiab kev txom nyem los lawv yeej tuav rawv lawv txoj kev ntseeg. Thiab peb yuav tsis nrog luag ntshaw nyiaj txiag thiab ntshaw muaj ub muaj  no ntau ntau yog hais tias peb xyaum cov uas ua lawv neej yooj yim thiab muab Vajtswv lub Nceeg Vaj tso ua ntej hauv lawv lub neej.

10. Qhov uas peb hlub Vajtswv thiab hlub neeg zej zog pab tau peb ua siab ntev mus tshaj tawm li cas?

¹⁰ Kev hlub yuav pab kom peb tsis tsaug zog thiab ceev faj zov rawv tos. (Mathais 22:37-39) Kev hlub rau Vajtswv yuav pab kom peb ua siab ntev mus tshaj tawm txawm hais tias peb yuav ntsib teeb meem li cas los xij. (2 Timautes 1:7, 8) Peb mus tshaj tawm tsis tseg thiab hu xov tooj los sis sau ntawv mus rau cov uas tsis tau los teev tiam Yehauvas hauv peb thaj tsam los twb yog vim peb hlub lawv. Peb vam tias muaj ib hnub lawv yuav thim xav thiab hloov ua li Yehauvas lub siab nyiam.​—Exekees 18:27, 28.

11. Qhov uas peb hlub tshua peb cov kwv tij nkauj muam pab tau peb li cas? (1 Thexalaunikes 5:11)

¹¹ Peb kuj hlub peb cov kwv tij nkauj muam Khixatia thiab thaum peb ib tug txhawb ib tug lug zog thiab ib tug pab ib tug. (Nyeem 1 Thexalaunikes 5:11.) Zoo li cov tub rog mus ntaus rog ua ke, peb ib leeg yeej pab ib leeg. Tiam sis thaum muaj kev sib tua hnyav heev yuav muaj tej tug rov ua yuam kev raug nws pab tub rog ib tug, txawm li ntawd los yeej tsis yog nws txhob txwm ua. Zoo ib yam li ntawd, yeej tsis muaj ib zaug uas peb yuav txhob txwm ua kom mob peb cov kwv tij nkauj muam los sis ua phem pauj phem rov rau lawv. (1 Thexalaunikes 5:13, 15) Peb kuj hlub tshua cov kwv tij uas saib xyuas lub koom txoos thaum peb hwm lawv. (1 Thexalaunikes 5:12) Thaum Povlauj sau tsab ntawv no, lub koom txoos hauv Thexalaunikes twb tsis tau muaj ib xyoos ces cov txwj laus yuav tsis paub hauj lwm zoo thiab tej zaum yuav ua tau ntau yam yuam kev. Txawm li los yeej tsim nyog sawv daws hwm lawv. Thaum lub sij hawm uas muaj kev txom nyem loj kawg nkaus los ze zuj zus peb haj yam yuav tau mloog cov txwj laus dua li tam sim no. Thiab thaum ntawd tej zaum cov kwv tij pem lub hauv paus koom haum loj thiab tej ceg Npe-ee yuav nrog tsis tau peb tham li niaj hnub no lawm ces thiaj haj yam tseem ceeb rau peb yuav tau hlub tshua cov txwj laus thiab hwm lawv tam sim no. Txawm yuav muaj dab tsi yav tom hauv ntej los thov peb sawv daws ceev faj zov  tos, tsis txhob pheej tsom ntsoov qhov uas cov txwj laus zoo tsis tiav xwb, tiam sis nco ntsoov hais tias Yehauvas thiab Yexus nkawd yog ob tug uas coj cov txwj laus.

12. Kev vam thiab kev cia siab tiv thaiv peb txoj kev xav li cas?

¹² Ib yam li lub kaus mom hlauv tiv thaiv tus tub rog lub taub hau, peb txoj kev cia siab tias peb yuav dim peb lub txim yuav tiv thaiv peb txoj kev xav. Yog peb txoj kev ntseeg ruaj khov ces peb yuav pom tias txhua yam uas lub qab ntuj no muab tau rau peb tsis muaj nuj nqis dab tsi li. (Filipis 3:8) Peb txoj kev vam kev cia siab pab kom peb muaj lub siab tus thiab muaj kev ntseeg ruaj khov li kwv tij Vaulav (Wallace) thiab tus muam Laulidas (Laurinda) ua hauj lwm rau Npe-ee hauv Afika (Africa). Peb lub lim tiam sib law sib liag xwb, nkawd ib tug, nws niam tau tas sim neej lawm hos ib tug nws txiv kuj tas sim neej lawm thiab. Tiam sis nkawd los xyuas tsis tau nkawd tsev neeg vim tseem muaj tus kab mob Khaus Viv-19 (COVID-19). Vaulav sau tias: “Qhov uas Vajtswv yuav tsa cov tuag sawv rov los pab kom kuv tsis txhob xav txog hnub uas nkawd tas sim neej xwb tiam sis kom kuv xav txog hnub uas nkawd yuav sawv rov qab los nyob hauv lub qab ntuj tshiab. Kuv txoj kev vam thiab kev cia siab pab kom kuv muaj lub siab tus thaum kuv nco nco nkawd.”

13. Peb yuav ua li cas Vajtswv thiaj muab nws lub hwj huam dawb huv rau peb?

¹³ “Tsis txhob txwv [lub hwj huam dawb huv].” (1 Thexalaunikes 5:19) Povlauj hais li no los twb yog vim Yehauvas muab nws lub hwj huam dawb huv los pab kom peb xav ua qhov ncaj qhov yog thiab muaj siab zim ua Yehauvas tes hauj lwm. (Loos 12:11) Yehauvas yuav muab nws lub hwj huam dawb huv rau peb yog hais tias peb thov nws, rau siab ntso kawm nws Txoj Lus, thiab nyob nrog nraim nws lub koom haum. Thaum peb ua li ntawd ces peb yuav muaj tus cwj pwm zoo uas tsuas yog Vajtswv lub hwj huam dawb huv xwb thiaj li muab tau rau peb.​—Kalatias 5:22, 23.

14. Yog peb xav tau Vajtswv lub hwj huam dawb huv peb yuav tsum tsis txhob ua dab tsi? (Saib daim duab.)

¹⁴ Thaum Vajtswv muab nws lub hwj huam dawb huv pub rau peb, peb yuav tsum cia nws  lub hwj huam dawb huv pab peb. Vajtswv tsuas muab nws lub hwj huam dawb huv rau cov uas lawv txoj kev xav dawb huv thiab coj lub neej dawb huv xwb. Yog hais tias peb pheej xav thiab pheej ua tej uas tsis dawb huv ces Vajtswv yuav tsis pub nws lub hwj huam dawb huv los pab peb ntxiv lawm. (1 Thexalaunikes 4:7, 8) Tsis tas li ntawd xwb, peb yuav tsum tsis txhob thuam Vajtswv cov lus faj lem. (1 Thexalaunikes 5:20) Cov lus faj lem yog cov lus uas Vajtswv siv nws lub hwj huam dawb huv tshoov cov cev Vajtswv lus hais tseg rau peb txog yav tom hauv ntej. Xws li cov lus faj lem txog Yehauvas hnub thiab tej uas qhia rau peb tias Yehauvas hnub twb los ze lawm. Peb tsis txhob xav tias Yehauvas hnub los sis Amankedoos yuav tsis los rau peb tiam kiag li. Tiam sis peb yuav tsum zov rawv tos hnub ntawd thiab rau siab ntso ua Vajtswv tes hauj lwm, muaj siab npuab rawv nws, thiab ua neeg dawb huv txhua lub sij hawm.​—2 Petus 3:11, 12.

15. Peb yuav ua li cas peb thiaj yuav tsis qaug rau tib neeg thiab dab tej lus dag ntxias? (1 Thexalaunikes 5:21)

¹⁵ Tsis ntev tom ntej no, Vajtswv cov yeeb ncuab yuav hais tias “Peb tau zoo noj thiab tau zoo nyob kawg li lawm.” (1 Thexalaunikes 5:3) Thaum ntawd dab tej lus dag ntxias yuav muaj thoob plaws qab ntuj thiab yuav ntxias tau tib neeg coob heev. (Tshwmsim 16:13, 14) Tiam sis yog peb “ua tib zoo saib txhua yam huv tibsi” ces peb yuav tsis lam tau lam ntseeg tej uas peb hnov. (Nyeem 1 Thexalaunikes 5:21.) Lo lus Kilis uas txhais hais tias “ua tib zoo saib” yog lawv siv thaum lawv muab tshuaj los sim nyiaj sim kub seb puas tseem. Peb yuav tau ua zoo tshuaj xyuas tej uas peb hnov thiab tej uas peb nyeem seb puas muaj tseeb tiag. Yog hais tias twb tseem ceeb rau cov ntseeg hauv Thexalaunikes ua li ntawd ces nim no haj yam tseem ceeb rau peb ua li ntawd vim lub sij hawm muaj kev txom nyem loj kawg nkaus twb los ze ze lawm. Peb tsis txhob ntseeg txhua yam uas peb hnov thiab peb nyeem. Tiam sis ua tib zoo tshuaj xyuas seb phau Vajlugkub thiab Yehauvas lub koom haum hais li cas txog tej ntawd. Yog peb ua li no ces peb thiaj yuav tsis qaug rau dab tej lus dag ntxias.​—Pajlug 14:15; 1 Timautes 4:1.

16. Peb tos ntsoov tias peb yuav tau dab tsi, thiab peb txiav txim siab tias peb yuav ua li cas?

¹⁶ Peb paub tias thaum lub sij hawm muaj kev txom nyem loj kawg nkaus los, Yehauvas cov neeg yeej yuav dim. Tiam sis rau peb tus kheej, peb yeej tsis paub tias xyov tag kis yuav zoo li cas. (Yakaunpaus 4:14) Txawm hais tias peb yuav dim los sis peb yuav tuag ua ntej hnub ntawd los txog los peb paub tseeb tias Yehauvas yeej yuav muab txoj sia nyob mus ib txhis rau cov uas muab siab npuab nws. Cov xaiv tseg yuav tau mus nrog Yexus nyob saum ntuj. Hos cov uas yog lwm pab yaj yuav tau nyob hauv lub vaj kaj siab. Thov kom peb txhua leej txhua tus tuav rawv peb txoj kev vam khom kom khov kho thiab ceev faj zov rawv tos Yehauvas hnub.