1-2. Tej teeb meem uas peb muaj niaj hnub nim no uas muaj nyob rau Lauj tiam yog dab tsi?

 THAUM peb pom tej kev phem kev qias uas tib neeg ua niaj hnub no, peb yeej xav ib yam li Lauj thiab. “Lauj nyuaj siab rau cov neeg uas ua kev phem kev qias kawg li” vim nws paub tias peb Leej Txi Yehauvas ntxub kev phem kev qias. (2 Petus 2:7, 8) Lauj ntxub tej kev phem kev qias uas tib neeg ua los twb yog vim nws hwm thiab hlub Yehauvas. Niaj hnub no los yeej muaj cov neeg uas saib tsis taus Yehauvas tej kev cai dawb huv nyob puag ncig peb. Txawm li ntawd los, peb yeej ua tau neeg dawb huv yog hais tias peb hwm Yehauvas thiab hlub nws.​—Pajlug 14:2.

² Yehauvas muab cov lus qhuab ntuas hauv Pajlug los pab peb ua neeg dawb huv. Txhua tus Khixatia, tsis hais poj niam txiv neej, tus laus tus hluas los cov lus qhuab ntuas no yeej pab tau peb sawv daws.

3. Raws li 1 Xwmtxheej Vajntxwv 28:9, ib qho uas pab peb tiv thaiv peb lub siab yog dab tsi? (Saib daim duab.)

³ Ib qho uas tiv thaiv tau peb lub siab yog peb paub tias Yehauvas paub txhua yam uas peb xav hauv peb lub siab. Qhov no qhia tias Yehauvas tsis yog pom peb sab nraud li neeg pom xwb tiam sis nws paub peb lub siab tias peb zoo li cas tiag. (Nyeem 1 Xwmtxheej Vajntxwv 28:9.) Yog peb nco ntsoov Yehauvas tej lus ntuas uas yuav pab tau peb nyob mus ib txhis ces tej kev phem kev qias thiab tej lus dag ntawm Xatas thiab nws lub qab ntuj yuav ntxias tsis tau peb mus ua phem ua qias. (Yauhas 4:14; 1 Yauhas 5:18, 19) Thaum peb paub Yehauvas zoo zuj zus ces peb yuav hlub thiab hwm nws. Peb yuav tsis xav ua kom mob nws siab. Thaum peb lub siab yuav coj peb mus ua txhaum, peb yuav xav tias, ‘Kuv yuav txhob txwm ua kom mob tus uas hlub kuv tshaj plaws siab tau li cas?’​—1 Yauhas 4:9, 10.

4. Qhov uas ib tug muam paub ntshai tsam Yehauvas tu siab pab tau nws tsis mus ua txhaum li cas?

 ⁴ Tus muam Matam (Marta) hauv teb chaws Khau-esa (Croatia) hais tias: “Kuv paub tias thaum yus lub siab xav mus ua txhaum mas yeej nyuaj heev rau yus tswj yus lub siab. Tiam sis qhov uas kuv ntshai tsam Yehauvas tu siab tiv thaiv tau kuv.” b Matam hais tias qhov uas pab tau nws tsis mus ua plees ua yi yog nws ua tib zoo xav tias yog nws mus ua tej ntawd nws yuav ntsib teeb meem li cas. Peb yeej ua tau li nws thiab. Qhov uas phem tshaj plaws rau peb ces yog peb ua rau Yehauvas tu siab thiab yuav tsis tau teev tiam nws mus ib txhiab ib txhis.​—Chivkeeb 6:5, 6.

5. Koj kawm tau li cas los ntawm tej uas kwv tij Li-aus ua?

⁵ Thaum peb hwm Yehauvas, peb yuav tsis mus ua phooj ywg nrog cov neeg ua phem. Kwv tij Li-aus (Leo) nyob teb chaws Khonkaus (Congo) paub zoo txog qhov no. Plaub xyoos tom qab nws ua kev cai raus dej nws mus poo tau ib co neeg phem. Nws xav hais tias tsuav tsis yog nws ua phem kiag xwb ces nws tsis tau ua txhaum Yehauvas. Tiam sis tsis ntev xwb ces lawv twb yaum tau nws mus quav dej quav cawv thiab ua plees ua yi ib yam li lawv lawm. Thaum ntawd nws mam li xav txog tej uas nws niam thiab nws txiv cob qhia nws thiab nco txog tej kev zoo siab thaum uas nws tseem teev tiam Yehauvas. Ces nws mam li thim xav thiab tig rov qab los ua zoo. Cov txwj laus pab tau nws rov los teev tiam Yehauvas. Nim no nws yog ib tug txwj laus thiab yog ib tug tho kev tshwj xeeb.

6. Ob tug poj niam uas peb tham hauv zaj no piv txwv txog dab tsis?

⁶ Tam sim no peb yuav mus kawm txog ob tug poj niam hauv Pajlug tshooj 9. Ib tug ua  piv txwv txog “lub tswv yim”, hos ib tug ua piv txwv txog “kev ruam.” (Muab piv rau Loos 5:14; Kalatias 4:24) Thaum peb tham txog ob tug poj niam no, nco ntsoov tias Xatas lub qab ntuj nyiam ua plees ua yi, sib daj sib dee, thiab nyiam saib duab liab qab heev. (Efexus 4:19) Thiaj li tseem ceeb heev rau peb yuav tsum hwm Yehauvas thiab tsis txhob mus ua phem ua qias. (Pajlug 16:6) Txawm peb yog poj niam thiab txiv neej los tej peb kawm txog ob tug poj niam hauv Pajlug tshooj 9 yeej pab tau peb sawv daws. Ob tug poj niam no puav leej caw cov uas ruam tsis paub tab tias, ‘Cia li los hauv kuv tsev thiab nrog kuv noj mov.’ (Pajlug 9:1, 5, 6, 13, 16, 17) Tiam sis cov uas mus nrog nkawd noj mov thaum kawg tsis zoo ib yam.

7. Raws li Pajlug 9:13-18, yuav ua li cas rau cov uas mus rau hauv tus poj niam ruam lub tsev? (Saib daim duab.)

⁷ Tam sim no peb yuav tham txog tus poj niam uas piv txwv txog kev ruam. (Nyeem Pajlug 9:13-18.) Tus poj niam ruam tsa suab hlo hu nrov nrov tsis paub txaj muag li rau cov neeg ruam tsis thoob ntsib tias “cia li los ntawm no” thiab nrog kuv noj mov. Thaum kawg ua li cas xwb? “Cov neeg uas tuag lawm, twb yog cov uas mus hauv tus pojniam ntawd tsev.” Pajlug twb ceeb toom peb txog tus poj niam uas “hais lus mos lus muag ntxias kom luag tej yuam kev ua txhaum” lawm tias: “Yog koj mus rau hauv nws tsev, ces yog koj taug kev mus rau txojkev tuag ntag.” (Pajlug 2:11-19) Pajlug 5:3-10 ceeb toom ntxiv txog lwm tus poj niam uas “hais lus mos lus muag” tias “txojkev uas nws taug yog kev tuag.”

8. Peb yuav tau txiav txim siab seb peb yuav ua li cas rau tej yam twg?

⁸ Cov uas hnov tus poj niam ruam hu yuav tau txiav txim siab seb lawv yuav mus los tsis mus rau hauv nws tsev. Peb los yuav tau txiav txim siab seb peb yuav ua li cas thaum muaj neeg yaum peb mus ua plees ua yi los sis peb ho pom tej duab liab qab.

9-10. Piav seb yog vim li cas peb yuav tsum tsis txhob ua kev plees kev yi.

⁹ Tseem ceeb heev rau peb yuav tsum tsis txhob ua kev plees kev yi. Tus poj niam ruam hais tias: “Cov dej uas nyiag los yeej qab zib dua.” Phau Vajlugkub muab kev pw ua niam txiv ntawm ob niam txiv piv rau cov dej hauv yus lub thoob. (Pajlug 5:15-18) Thaum ob niam txiv sib yuav raws kev raws cai lawm ces nkawd thiaj li pw tau ua niam txiv tsis txhaum. Tiam sis “cov dej uas nyiag los” tsis zoo li ntawd. Tej zaum cov dej no yog hais txog thaum cov neeg uas mus nrog lwm tus neeg uas tsis yog lawv tus txij nkawm pw ua ke li tus  tub sab nyiag ua xwb tsis pub leej twg paub. “Cov dej uas nyiag los” tsuas qab zib, thaum lawv xav hais tias tsis muaj leej twg paub xwb. Lawv rov dag lawv tus kheej xwb rau qhov Yehauvas pom txhua yam uas lawv ua. Tsis muaj ib yam dab tsi uas yuav iab yuav daw tshaj qhov uas peb plam peb txoj kev sib raug zoo nrog Yehauvas. Ces “cov dej uas nyiag los” yeej tsis qab zib hlo li. (1 Kauleethaus 6:9, 10) Tiam sis tsis yog tag li ntawd xwb.

¹⁰ Kev ua plees ua yi yuav ua rau koj poob ntsej muag, ua rau koj tsis muaj nuj nqis, ua rau koj muaj me nyuam thaum koj tsis xav muaj, thiab ua rau koj lub cuab lub yig tawg. Tus neeg ntse muaj tswv yim thiab yuav txav deb ntawm tus poj niam ruam. Tsis tas li ntawd xwb, cov uas ua plees ua yi yuav plam lawv txoj kev sib raug zoo nrog Yehauvas thiab muaj coob tus tseem kis tau kab mob phem uas ua rau lawv tuag ntxov. (Pajlug 7:23, 26) Pajlug 9:18 xaus lus li no: “Cov neeg uas mus rau hauv nws tsev, yog cov uas nyob hauv [lub qhov tuag] uas tob tshaj plaws.” Yog hais tias cov uas mus hauv nws tsev yuav raug kev puas tsuaj, ua cas lawv yuav mus coob ua luaj?​—Pajlug 9:13-18.

11. Vim li cas kev saib duab liab qab thiaj yog kev puas tsuaj?

¹¹ Ib qho uas tib neeg nyiam ua niaj hnub no yog saib duab liab qab. Ib txhia hais tias saib duab liab qab tsis phem. Tiam sis tsis yog li ntawd, peb thiaj yuav tsum tsis txhob ua. Cov uas ua li ntawd, yuav muaj yees, lawv yuav saib lawv thiab lwm tus tsis tsim txiaj, yuav nyuaj heev rau lawv tso tseg, thiab cov duab lawv pom yuav nyob nrog nraim lawv mus li. Yog peb tsis xav mus ua plees ua yi, peb yuav tsum tsis txhob saib duab liab qab. Rau qhov cov duab no yuav ua rau peb haj yam xav mus ua phem ua qias xwb. (Kaulauxais 3:5; Yakaunpaus 1:14, 15) Twb yog vim li ntawd, cov uas pheej siab duab liab qab thiaj muaj coob tus mus ua plees ua yi ua phem ua qias.

12. Yog peb tsis xav pom tej duab uas yuav ua rau peb xav tsis huv, peb yuav ua li cas?

¹² Peb yuav ua li cas yog hais tias cia li muaj duab liab qab tshwm plaws los hauv peb lub koos pis tawj los sis peb lub twj ntawm tes? Peb yuav tsum muab tua kiag, tsis txhob saib. Yuav tsis nyuaj rau peb ua li ntawd yog peb nco ntsoov tias peb txoj kev sib raug zoo nrog Yehauvas yog qhov uas muaj nqis tshaj plaws hauv peb lub neej. Txawm ib co tsis yog duab liab qab los yeej ua rau peb xav tsis huv ces peb tsis txhob saib cov ntawd vim peb tsis xav ua txhaum hauv peb lub siab. (Mathais 5:28, 29) Ib tug txwj laus nyob Thaib Teb hu ua Devem (David) hais tias: “Kuv nug kuv li no: ‘Txawm tsis yog duab liab qab los yog kuv pheej saib tas zog, Yehauvas puas yuav txaus siab rau kuv?’ Thaum kuv ua li no thiaj pab tau kuv ua haum Yehauvas siab.”

13. Dab tsi thiaj yuav pab kom peb muaj tswv yim?

¹³ Thaum peb hwm Yehauvas ces peb thiaj yuav “muaj tswvyim” thiab ua tau haum nws siab. (Pajlug 9:10) Peb pom tias Pajlug 9:1 muab “lub tswvyim” piv rau ib tug poj niam thiab.

14. Cov lus caw hauv Pajlug 9:1-6 txawv ntawm tus poj niam ruam li cas?

¹⁴ Nyeem Pajlug 9:1-6. Cov nqe Vajlugkub uas peb nyuam qhuav nyeem tag no yog cov lus uas Yehauvas caw peb. Nws yog peb tus Tswv Tsim. Nws muab tswv yim thiab kev txawj ntse rau peb. (Pajlug 2:6; Loos 16:27) Qhov uas peb nyeem txog lub tsev loj loj uas muaj xya tus ncej txheem qhia rau peb tias Yehauvas siab dawb siab zoo thiab nws xav caw txhua tus uas xav muaj nws lub tswv yim mus kawm ntawm nws.

15. Yehauvas caw peb mus ua dab tsi?

 ¹⁵ Pajlug tshooj 9 muab “lub tswmyim” piv rau ib tug poj niam. Tej uas tus poj niam muaj tswv yim no ua qhia rau peb tias Yehauvas siab dawb siab zoo. Nws pub ntau yam zoo rau peb. Tus poj niam no caw neeg mus nrog nws noj ib pluas mov, nws muaj dej caw, thiab muaj nqaij qab heev. (Pajlug 9:2) Hauv nqe 4 thiab 5, nws hais rau cov neeg ruam tias: “Cia li tuaj, tuaj noj kuv tej zaub mov.” Vim li cas thiaj zoo rau peb mus hauv nws tsev thiab noj nws tej zaub mov? Peb mus vim Yehauvas xav kom nws cov me nyuam muaj tswv yim thiab muaj kev nyab xeeb. Nws tsis xav kom peb twb ntsib teeb meem lawm es peb mam li paub. Nws thiaj “ceev lub tswvyim cia rau cov uas siab ncaj.” (Pajlug 2:7) Peb zoo siab hlo ua li Yehauvas tej lus qhuab ntuas los twb yog peb hwm nws thiab xav ua kom haum nws siab.​—Yakaunpaus 1:25.

16. Qhov uas Alees hwm Yehauvas pab tau nws thiab lwm tus li cas?

¹⁶ Kwv tij Alees (Alain) yog ib tug txwj laus thiab yog ib tug xib hwb qhia ntawv. Qhov uas nws hwm Yehauvas pab tau nws txiav txim siab zoo. Nws hais tias: “Cov xib hwb uas qhia ntawv nrog kuv muaj coob tus nyiam saib yeeb yaj kiab liab qab. Lawv hais tias yog ib qho kev kawm rau lawv xwb.” Tiam sis Alees paub tias tsis yog li lawv hais. Nws hais tias: “Vim kuv hlub thiab hwm Yehauvas, kuv thiaj tsis nrog lawv saib. Kuv ua zoo qhia rau lawv tias yog vim li cas kuv thiaj tsis kam saib.” Alees ua li “lub tswvyim” thiab “raws txojkev txawj ntse qab.” (Pajlug 9:6) Ib co xib hwb qhia ntawv pom tias qhov uas nws ua ntawd yeej yog ib qho zoo, lawv thiaj los kawm Vajlugkub thiab tuaj kev sib txoos lawm.

17-18. Cov uas kawm ntawm tus poj niam muaj tswv yim yuav tau dab tsi tam sim no thiab yav tom hauv ntej? (Saib daim duab.)

¹⁷ Yehauvas siv ob tug poj niam piv txwv no los qhuab qhia kom peb tau lub neej zoo thiab muaj kev zoo siab yav tom hauv ntej. Cov uas mus nrog tus poj niam ruam ua ke tsuas nrhiav ntshis kev plees kev yi thiab kev lom zem uas tsuas nyob ib vuag xwb. Lawv tsis xav txog yav tom hauv ntej. Lawv tsis paub tias tej uas lawv ua ntawd yuav coj lawv mus raug kev ploj kev tuag.​—Pajlug 9:13, 17, 18.

¹⁸ Tiam sis tsis zoo li ntawd rau cov uas mus nrog tus poj niam uas “muaj tswvyim.” Tus poj niam muaj tswv yim cov qhua zoo siab heev vim lawv muaj txhua yam pab lawv muaj kev sib raug zoo nrog Yehauvas. (Yaxayas 65:13) Yaxayas cev Vajtswv cov lus tias: “Cia li mloog kuv hais, nej thiaj tau noj tej zaub mov uas zoo, nej lub siab thiaj tsau npo rau tej zaub mov uas zoo.” (Yaxayas 55: 1, 2) Cia peb xyaum nyiam tej uas Yehauvas nyiam thiab ntxub tej uas nws ntxub. (Phau Ntawv Nkauj 97:10) Thiab peb zoo siab heev mus caw lwm tus los kawm ntawm tus poj niam uas “muaj tswvyim” ib yam li nws cov qhev uas “mus rau saum qhov chaw siab hauv lub nroog hu tuaj tias, ‘Cov neeg ruam, nej cia li los ntawm no!’” Tej uas peb thiab cov uas los nrog peb kawm ntawm tus poj niam muaj tswv yim yuav “muaj sia nyob” mus ib txhis thaum peb sawv daws “raws txojkev txawj ntse qab.”​—Pajlug 9:3, 4, 6.

19. Raws li Tej Lus Qhia 12:13, 14 hais, peb yuav tsum txiav txim siab tias peb yuav ua li cas? (Saib lub ntsiab “ Qhov Uas Peb Hwm Vajtswv Pab Tau Peb.”)

¹⁹ Nyeem Tej Lus Qhia 12:13, 14. Thov kom qhov uas peb hwm Yehauvas pab tiv thaiv peb thiab pab peb ua neeg dawb huv thiab muaj kev sib raug zoo nrog Yehauvas rau lub sim ceeb kawg uas phem kawg nkaus no. Peb yuav tau kub siab lug mus caw kom tau neeg coob li coob tau los kawm ntawm tus poj niam uas muaj tswv yim vim peb hlub thiab hwm Yehauvas kawg siab kawg ntsws.