▪ Phau Vajlugkub tsis hais dab tsi txog qhov nod. Tiam sis phau Vajlugkub hais txog yam puav uas tej zaum yog vim li cas nkawd thiaj txiav txim siab nyob hauv Npelehees lub sij hawm ntawd.

Vajtswv ib tug tub txib saum ntuj los hais rau Maivliag tias nws yuav suab me nyuam thiab yuav yug tau ib tug tub. Thaum no, Maivliag thiab Yauxej nkawd nyob hauv lub nroog Naxales uas nyob ntawm cheeb tsam Kalilais uas Yauxej loj hlob. (Lukas 1:26-31; 2:4) Tom qab no lawv tsiv nram teb chaws Iyiv rov los nyob hauv Naxales. Yexus loj hlob hauv lub zos no, luag thiaj muab nws hu ua neeg Naxales. (Mathais 2:19-23) Yog li ntawd thaum peb xav txog Yauxej, Maivliag los sis Yexus, peb thiaj li xav txog Naxales.

Maivliag muaj ib tug txheeb ze nyob hauv Yudas uas hu ua Elixanpes. Nws yog tus pov thawj Xekhaliyas tus poj niam thiab yog Yauhas tus uas muab neeg ua kev cai raus dej niam. (Lukas 1:5, 9, 13, 36) Maivliag twb mus xyuas Elixanpes hauv Yudas tau peb hlis, nws mam rov los rau Naxales. (Lukas 1:39, 40, 56) Ces nws thiaj paub thaj tsam ntawd.

Tom qab no, Yauxej tawm hauv lub nroog Naxales mus rau hauv Npelehees uas yog “Daviv lub nroog” rau qhov nom tswv Loos sam hwm kom cov pej xeem nyias yuav tsum “mus rau npe” hauv nyias lub nroog. Tsis tas li ntawd xwb, Npelehees kuj yog lub nroog uas cov lus faj lem hais tias tus Mexiyas yuav los yug rau hauv. (Lukas 2:3, 4; 1 Xamuyees 17:15; 20:6; Mikhas 5:2) Thaum yug tau Yexus, Yauxej tsis xav coj Maivliag thiab tus me nyuam mos taug kev deb deb rov mus rau Naxales. Lawv thiaj nyob hauv Npelehees uas deb kwv lam li cuaj kilumev (kwv lam 6 mais) kev ntawm Yeluxalees. Nws ua li no thiaj yooj yim rau nkawd coj tus me nyuam mos mus ua kev cai hauv Yehauvas lub tuam tsev raws li Yehauvas Txoj Cai.​—Levis Kevcai 12:2, 6-8; Lukas 2:22-24.

Thaum Yehauvas tus tub txib saum ntuj los hais rau Maivliag tias nws tus tub yuav tau zaum saum nws yawg koob “Daviv lub rooj vaj ntxwv” thiab ua “Vaj Ntxwv kav,” tej zaum Yauxej thiab Maivliag to taub tias tseem ceeb rau tus me tub los yug rau hauv Npelehees uas yog Daviv lub nroog thiab zoo rau nkawd nyob hauv tos seb Yehauvas yuav hais li cas ntxiv.​—Lukas 1:32, 33; 2:11, 17.

Peb tsis paub tias lawv nyob hauv Npelehees ntev npaum li cas cov neeg txawj saib hnub qub mam li tuaj txog. Tiam sis thaum lawv tuaj txog, nkawd tus me tub twb loj thiab tsis yog me nyuam mos lawm. (Mathais 2:11) Ces ntxim li lawv nyob tsheej hauv Npelehees tau ib nyuag ntu ntev tsawv.

Thaum Helauj txib neeg “mus hauv Npelehees thiab ib cheeb tsam ntawd mus muab cov me nyuam tub uas muaj ob xyoos rov hauv tua pov tseg tib si” ces Vajtswv ib tug tub txib saum ntuj los hais rau Yauxej thiab Maivliag nkawd kom coj tus me tub khiav mus nram teb chaws Iyiv thiab nyob twj ywm nrad mus txog thaum tsis muaj Helauj lawm. (Mathais 2:16) Tom qab ntawd, Yauxej coj nws tsev neeg rov qab los rau pem Naxales. Tiam sis vim li cas lawv ho tsis mus rau hauv Npelehees? Lawv tsis mus rau qhov thaum ntawd Helauj tus tub Akhilaus yog tus kav Yudias thiab nws phem heev. Thiab Vajtswv tus tub txib saum ntuj kuj los hais rau Yauxej lawv kom tsis txhob mus thiab. Naxales yog qhov chaw uas Yauxej tso siab thiab tsis ntshai tu Yexus kom loj hlob los pe hawm Yehauvas.​—Mathais 2:19-22; 13:55; Lukas 2:39, 52.

Ntxim li Yauxej tuag ua ntej Yexus tuag theej tib neeg lub txhoj xwv ib txhia neeg thiaj mus tau rau saum ntuj. Yog li ntawd, Yehauvas yuav tsa Yauxej sawv rov qab los nyob hauv ntiaj teb no. Thaum ntawd yuav muaj coob tus pom nws, nws mam li qhia seb yog vim li cas thaum yug tau Yexus nkawd thiaj txiav txim siab nyob hauv Npelehees.