1-2. Phau Ntawv Nkauj 25:14 hais tias yog peb xav ua phooj ywg zoo nrog Yehauvas, peb yuav tau ua li cas?

 KOJ sim xav seb yog peb xav ua phooj ywg zoo nrog ib tug twg no peb yuav tsum muaj tus cwj pwm zoo li cas? Tej zaum koj yuav xav tias peb yuav tsum txawj sib hlub sib pab thiab sib hwm. Twb yog li ntawd, lub ntsiab rau zaj kawm no thiaj hais tias, cov uas xav ua phooj ywg zoo nrog Yehauvas yuav tsum “hwm” nws.​—Nyeem Phau Ntawv Nkauj 25:14.

² Txawm yog peb nyuam qhuav los teev tiam Vajtswv Yehauvas los sis peb twb teev tiam nws ntev lawm los peb txhua leej txhua tus yuav tsum paub hwm nws. Hauv zaj no peb yuav kawm tias hwm Yehauvas yog li cas tiag? Yuav ua li cas peb thiaj paub hwm Yehauvas? Thiab qhov uas peb hwm Vajtswv yog li cas los ntawm Aunpadiyas, tus pov thawj hlob Yehauyadas, thiab Vaj Ntxwv Yau-ases.

3. Piav seb ua li cas peb thiaj ntshai, thiab qhov uas ua rau peb ntshai ntawd ho tiv thaiv tau peb li cas.

³ Thaum peb xav tias yuav muaj xwm phem los raug peb, tej zaum yuav ua rau peb ntshai. Qhov uas peb paub ntshai li ntawd yog ib qho zoo uas yuav tiv thaiv tau peb. Xws li thaum peb ntshai tsam peb poob pob tsuas ces peb yuav tsis mus ze ntawm npoo tsua, thaum peb ntshai tsam peb raug mob ces peb yuav ua neeg xyuam xim, thiab yog peb ntshai tsam peb plam kev phooj ywg nrog ib tug uas peb hlub tshua ces peb yuav tsis hais los sis ua tej yam uas yuav ua rau nws tu siab.

4. Xatas xav kom peb ntshai Yehauvas li cas?

⁴ Xatas tsis xav kom peb hwm Yehauvas tiam sis nws xav kom peb ntshai Yehauvas li Elifas hais. Elifas hais tias Yehauvas mas chim tas mus li, yeej tsis muaj leej twg ua tau haum nws siab,  thiab Yehauvas yuav rau txim rau peb. (Yauj 4:18, 19) Xatas xav ua kom peb ntshai Yehauvas dhau es peb cia li tso tseg tsis teev tiam Yehauvas ntxiv lawm. Peb tsis txhob qaug rau Xatas tej lus dag thiab tsis txhob ntshai Yehauvas li ntawd. Kav tsij rau siab ntso kawm Vajtswv Txoj Lus kom peb paub hwm nws.

5. Qhov uas peb hwm Vajtswv yog li cas tiag?

⁵ Tus uas hwm Yehauvas yuav tsis ua ib yam dab tsi los rhuav nws txoj kev sib raug zoo nrog Yehauvas. Yexus hwm Yehauvas li ntawd. (Henplais 5:7) Nws tsis ntshai tias Yehauvas yuav ua phem rau nws. (Yaxayas 11:2, 3) Tiam sis nws hlub Yehauvas heev thiab xav mloog Yehauvas lus xwb. (Yauhas 14:21, 31) Peb los yeej hwm thiab hlub Yehauvas ib yam li Yexus thiab vim Yehauvas hlub peb, nws txawj ntse, nws coj ncaj ncees, thiab nws muaj hwj chim tshaj plaws. Peb paub tias Yehauvas hlub peb nws thiaj xav kom peb mloog nws lus. Thaum nws cob qhia peb es peb mloog nws lus ces peb ua rau nws zoo siab tiam sis yog peb tsis mloog nws lus ces peb yuav ua rau nws tu siab.​—Phau Ntawv Nkauj 78:41; Pajlug 27:11.

6. Ib qho uas yuav pab kom peb hwm Vajtswv yog dab tsi? (Phau Ntawv Nkauj 34:11)

⁶ Tsis yog peb yug los ces peb txawm yuav paub hwm Yehauvas, peb yuav tsum tau kawm peb thiaj li paub. (Nyeem Phau Ntawv Nkauj 34:11.) Ib qho yog peb kawm los ntawm tej uas Yehauvas tsim. Thaum peb pom hais tias Vajtswv muaj laj lim tswv yim, muaj hwj chim, thiab hlub peb npaum li cas los ntawm “tej uas Vajtswv tsim” ces yuav ua rau peb yim huab xav hwm nws thiab hlub nws. (Loos 1:20) Tus muam Ebnriam (Adrienne) hais tias: “Thaum kuv pom txhua yam uas Yehauvas tsim, kuv pom tias nws muaj tswv yim heev. Kuv thiaj tso siab tias nws yeej paub tias dab tsi thiaj zoo tshaj rau kuv.” Thiab thaum nws ua zoo xav txog tej no, nws hais tias: “Yehauvas yog tus muab txoj sia rau kuv, kuv yuav tsis ua ib yam dab tsi los rhuav kuv txoj kev sib raug zoo nrog Yehauvas.” Yog li kav tsij lauj sij hawm lub lim tiam no los xav txog tej Yehauvas tsim. Yog koj ua li ntawd ces koj yuav yim huab xav hwm thiab hlub Yehauvas ntxiv.​—Phau Ntawv Nkauj 111:2, 3.

7. Vim li cas kev thov Vajtswv thiaj pab kom peb paub hwm Yehauvas?

⁷ Ib qho ntxiv uas yuav pab kom peb paub hwm Yehauvas yog thov nws tsis tu ncua. Peb yim nquag thov Yehauvas ces peb yim huab paub Yehauvas zoo. Txhua zaus uas peb thov Yehauvas kom nws pab peb nyiaj taus peb tej kev sim siab, yuav ua rau peb nco tias nws muaj hwj chim npaum li cas. Thaum peb ua Yehauvas tsaug rau nws tus Tub tus nqi txhiv, ua rau peb nco tias nws hlub peb heev. Thiab thaum peb muaj teeb meem es peb thov Yehauvas pab peb, ua rau peb ras tias nws muaj tswv yim tshaj plaws. Tej kev thov zoo li no ua rau peb yim huab xav hwm Yehauvas. Tsis tas li ntawd xwb, tseem yuav pab kom peb zam tsis ua tej uas yuav rhuav tau peb txoj kev sib raug zoo nrog nws.

8. Yuav ua li cas peb thiaj li yuav hwm Yehauvas tas mus li?

⁸ Yuav kom peb hwm Yehauvas tas mus li, peb yuav tau xyaum ua li tej qauv zoo thiab zam tsis ua li tej qauv phem uas peb kawm hauv phau Vajlugkub. Peb yuav tham txog Yehauvas ob tug tub qhe uas muab siab npuab nws. Ib tug yog Aunpadiyas uas yog tus saib xyuas Vaj Ntxwv Ahaj lub loog. Hos ib tug yog tus pov thawj hlob Yehauyadas. Thiab seb peb ho yuav kawm tau li cas los ntawm tus Vaj Ntxwv Yau-ases uas kav teb chaws Yudas uas teev tiam Yehauvas thaum xub thawj tiam sis tom qab no ho tsis teev tiam Yehauvas lawm.

9. Qhov uas Aunpadiyas hwm Yehauvas pab tau nws li cas? (1 Vajntxwv 18:3, 12)

⁹ Thawj zaug uas Phau Vajlugkub hais txog Aunpadiyas, phau Vajlugkub hais tias: “Aunpadiyas yog ib tug uas hwm [Yehauvas] heev.” b (Nyeem 1 Vajntxwv 18:3, 12.) Qhov uas Aunpadiyas hwm Yehauvas ua rau Vaj Ntxwv Ahaj ntseeg nws siab thiab muab nws ua tus saib xyuas tag nrho vaj ntxwv lub loog. (Muab piv rau Nehemis 7:2.) Thiab pab tau nws muaj lub siab tawv. Nws yuav tsum muaj lub siab tawv rau qhov Ahaj yog tus vaj ntxwv uas phem tshaj plaws uas “ua txhaum rau [Yehauvas] heev tshaj cov vajntxwv thaum ub ua lawm thiab.” (1 Vajntxwv 16:30) Tsis tas li ntawd xwb, Ahaj tus poj niam Yexenpees tseem teev tiam Npa-as thiab ntxub Yehauvas kawg nkaus li. Nws thiaj tsis pub kaum xeem Ixayees teev tiam Yehauvas thiab muab cov cev Yehauvas lus tua tuag coob tus. (1 Vajntxwv 18:4) Yog li ntawd, Aunpadiyas teev tiam Yehauvas nyob rau lub caij nyuaj kawg li.

10. Ua li cas peb thiaj paub tias Aunpadiyas muaj lub siab tawv heev?

¹⁰ Aunpadiyas muaj lub siab tawv heev thaum tus poj vaj ntxwv Yexenpees nrhiav cov cev Vajtswv lus tua pov tseg. Nws “coj tau ib puas leej mus zais rau hauv ob lub qhovtsua, ib pab twg tsib caug leej,” thiab nws “xa zaub mov thiab dej mus rau lawv noj thiab haus.” (1 Vajntxwv 18:13, 14) Yog Yexenpees paub ces nws yeej kawg tuag xwb. Aunpadiyas yog neeg xwb ces nws yeej ntshai tuag kawg tiam sis twb yog vim nws hlub Yehauvas thiab cov uas teev tiam Yehauvas tshaj li nws hlub nws tus kheej, nws thiaj ua tau siab tawv.

11. Yehauvas Cov Tim Khawv niaj hnub no ua tau siab tawv ib yam li Aunpadiyas li cas? (Saib daim duab.)

¹¹ Niaj hnub no, Yehauvas Cov Tim Khawv uas nyob rau tej teb chaws uas lawv txwv Yehauvas tes hauj lwm ua ib yam Aunpadiyas. Lawv hwm nom hwm tswv tiam sis lawv tsis ntshai teev tiam Yehauvas. (Mathais 22:21) Lawv mus tshaj tawm tsis tseg thiab nyiag kev ntshis mus kev sib txoos. (Mathais 10:16, 28)  Tej lawv ua no qhia tias lawv mloog Yehauvas lus dua li lawv mloog neeg lus. (Tes Haujlwm 5:29) Lawv ua zoo xyuas kom lawv cov kwv tij nkauj muam tau tej uas yuav pab lawv txoj kev sib raug zoo nrog Yehauvas. Thaum tej nom tswv txwv Yehauvas tes hauj lwm hauv ib lub teb chaws hauv Afika (Africa) tau ib ntus, kwv tij O-nrim (Henri) mus ua tus xa ntaub ntawv Vajlugkub rau cov kwv tij nkauj muam. Nws sau tias: “Twb yog kuv hwm Yehauvas kuv thiaj ua tau siab tawv ua kuv tes hauj lwm. Kuv paub li ntawd rau qhov kuv ib txwm txaj txaj muag.” Koj puas xav tias koj yuav ua tau siab tawv li O-nrim thiab? Koj yeej ua tau, yog hais tias koj hwm Yehauvas li nws.

12. Ua cas peb thiaj paub hais tias Yehauyadas thiab nws poj niam muab siab npuab Yehauvas?

¹² Qhov uas tus pov thawj hlob Yehauyadas hwm Yehauvas ua rau nws muab siab npuab Yehauvas thiab pab lwm tus teev tiam Yehauvas. Xws li thaum Yexenpees tus ntxhais Athaliyas txeeb ua tus poj vaj ntxwv, nws ua rau cov neeg hauv teb chaws Yudas ntshai nws heev rau qhov thaum ntawd nws sam hwm muab tag nrho nws cov tub xeeb ntxwv tua kom tuag tag nws thiaj tau ua poj vaj. (2 Xwmtxheej Vajntxwv 22:10, 11) Tiam sis nws tua tsis tau nws tus xeeb ntxwv Yau-ases vim Yehauyadas tus poj niam Yehausenpas coj Yau-ases mus zais lawm. Vim nkawd ob niam txiv npuab siab rau Yehauvas dua li ntshai Athaliyas thiaj cawm tau Vaj Ntxwv Daviv caj ces kom tsis tuag tu noob.​—Pajlug 29:25.

13. Thaum Yau-ases muaj xya xyoo, Yehauyadas ua li cas peb thiaj paub tias nws yeej tseem muab siab npuab rawv Yehauvas?

¹³ Yehauyadas npaj tswv yim tias thaum Yau-ases muaj xya xyoo, nws yuav ua li cas Yau-ases thiaj tau ua vaj ntxwv. Qhov nws ua li no kuj qhia tias nws muab siab npuab Yehauvas rau qhov yog nws ua tsis tau raws li nws npaj tseg ces tej zaum nws yuav raug tua pov tseg. Tiam sis Yehauvas pab nws. Cov thawj tub rog thiab cov Levis los kuj pab nws thiab, lawv thiaj muab tau Yau-ases tsa ua vaj ntxwv thiab muab tau Athaliyas tua pov tseg. (2 Xwmtxheej Vajntxwv 23:1-5, 11, 12, 15; 24:1) Thaum ntawd, Yehauyadas thiaj hais kom vaj ntxwv thiab cov pej xeem sawv daws “cog lus rau [Yehauvas] hais tias lawv yuav ua [Yehauvas] haivneeg.” (2 Vajntxwv 11:17) Thiab “Yehauyadas tseem tso tubrog zov lub Tuamtsev tej roojvag thiab tsis pub tus neeg uas tsis huv mus rau hauv li.”​—2 Xwmtxheej Vajntxwv 23:19.

14. Vim Yehauyadas hwm Yehauvas, Yehauvas ho ua rau nws tau ntsej muaj li cas?

¹⁴ Yav tas los Yehauvas cog lus rau cov Ixayees tias: “Tus uas hwm kuv, kuv yuav pub rau nws tau ntsejmuag.” Ces Yehauvas yeej ua li ntawd rau Yehauyadas. (1 Xamuyees 2:30) Yehauvas thiaj li muab Yehauyadas li keeb kwm sau cia rau hauv phau Vajlugkub ua qauv rau peb xyaum. (Loos 15:4) Thiab thaum Yehauyadas tuag los Yehauvas yeej ua rau nws tau ntsej muag. “Luag thiaj coj nws mus faus rau ntawm cov vajntxwv lub toj ntxas hauv Daviv lub nroog.”​—2 Xwmtxheej Vajntxwv 24:15, 16.

15. Peb kawm tau li cas los ntawm Yehauyadas li keeb kwm? (Saib daim duab.)

¹⁵ Yehauyadas tus qauv pab kom peb sawv daws hwm Yehauvas thiab pab kom cov txwj laus faj seeb thiab mob siab tiv thaiv cov kwv tij nkauj muam hauv lub koom txoos. (Tes Haujlwm 20:28) Cov laus los yog lawv hwm Yehauvas thiab muab siab npuab nws li Yehauyadas ces Yehauvas yeej yuav siv lawv ua nws tes hauj lwm thiab tsis tso lawv tseg. Thaum Yehauyadas laus laus lawm los Yehauvas  yeej tseem hlub tshua nws thiab saib nws muaj nuj nqis. Cov hluas uas xyaum Yehauvas yuav paub hwm thiab muab meej mom rau cov laus, tshwj xeeb tshaj yog rau cov uas teev tiam Yehauvas ntev lawm. (Pajlug 16:31) Peb kuj kawm tau los ntawm cov thawj tub rog thiab cov Levis uas txhawb Yehauyadas thiab. Yog li, cia peb sawv daws “mloog cov thawj uas saib xyuas” peb lus thiab ua li lawv hais.​—Henplais 13:17.

16. Ua cas peb thiaj paub tias Vajntxwv Yau-ases tsis hwm Yehauvas?

¹⁶ Yehauyadas pab kom Vaj Ntxwv Yau-ases ua neeg zoo. (2 Vajntxwv 12:2) Ces thaum Yau-ases tseem hluas nws thiaj xav ua kom haum Yehauvas siab. Tiam sis tom qab Yehauyadas tuag lawm, nws txawm mus mloog cov nom tswv uas fav xeeb rau Yehauvas lus. Nws thiab cov Yudas thiaj mus “pe tej mlom thiab tus mlom pojniam Aselas lawm.” (2 Xwmtxheej Vajntxwv 24:4, 17, 18) Txawm lawv ua rau Yehauvas tu siab heev los nws tseem “tso cov cev Vajtswv lus mus coj lawv rov los cuag nws, tiamsis lawv tsis mloog.” Yehauyadas tus tub Xakhaliyas yog ib tug cev Vajtswv lus, thiab yog ib tug pov thawj. Nws kuj yog Yau-ases tus npawg thiab. Thaum nws mus hais lawv los lawv yeej tsis mloog. Vaj Ntxwv Yau-ases yeej tsis ris Yehauyadas tsev neeg txiaj ntsim ib qho li. Nws tseem muab Xakhaliyas tua lawm thiab.​—2 Xwmtxheej Vajntxwv 22:11; 24:19-22.

17. Vim Yau-ases tsis hwm Yehauvas, thaum kawg thiaj ua li cas rau nws lawm?

 ¹⁷ Vim Yau-ases tso tseg tsis hwm Yehauvas, thaum kawg nws thiaj raug kev puas tsuaj. Yehauvas twb yeej hais lawm tias: “Tus uas saib tsis tau kuv, kuv yuav cia nws poob ntsejmuag.” (1 Xamuyees 2:30) Tom qab no cov Xilias ib pab tub rog tsawg tsawg txawm tuaj tua yeej Yau-ases pab tub rog coob coob thiab ua rau nws “raug mob sab kawg li.” Thaum cov Xilias rov qab lawm, Yau-ases ob tug tub rog txawm muab nws tua vim nws tua Xakhaliyas. Thaum nws tuag, cov neeg tsis coj nws mus “faus rau ntawm cov vajntxwv lub toj ntxas” vim nws phem heev.​—2 Xwmtxheej Vajntxwv 24:23-25.

18. Peb yuav ua li cas peb thiaj ua tau li Yelemis 17:7, 8 hais thiab tsis ua li Yau-ases ua?

¹⁸ Peb kawm tau li cas los ntawm Yau-ases tus qauv? Yau-ases zoo li tsob ntoo uas tsis khov uas yuav tsum muaj ib tug ncej txheem. Thaum tsis muaj Yehauyadas txheem nws lawm ces thiaj yooj yim heev rau nws qaug rau cov neeg fav xeeb rau Yehauvas tej lus dag ntxias, nws thiaj tso tseg tsis teev tiam Yehauvas lawm. Nws tus qauv qhia rau peb tias peb yuav tsum tsis txhob tos lwm tus hauv lub koom txoos los sis peb tsev neeg pab peb xwb es peb thiaj li mloog Yehauvas lus. Tiam sis peb yuav tsum rau siab kawm Vajtswv Txoj Lus, ua tib zoo xav txog tej uas peb kawm, thiab nco ntsoov thov Vajtswv tsis tseg. Yog peb ua li no ces peb txoj kev ntseeg thiab kev sib raug zoo nrog Yehauvas thiaj li yuav ruaj khov.​—Nyeem Yelemis 17:7, 8; Kaulauxais 2:6, 7.

19. Yehauvas xav kom peb ua dab tsi?

¹⁹ Yehauvas twb tsis hais kom peb ua dab tsi ntau. Nws tsuas kom peb ua raws li Tej Lus Qhia 12:13 hais no xwb: “Hwm Vajtswv thiab ua raws li nws tej lus samhwm, rau qhov nws tsim neeg los ua tes haujlwm ntawd.” Thaum peb hwm Yehauvas ces txawm yuav muaj xwm dab tsi yav tom hauv ntej no los peb yeej tsis ntshai thiab tuav rawv peb txoj kev ntseeg ib yam li Aunpadiyas thiab Yehauyadas nkawd. Thiab yeej tsis muaj ib yam dab tsi yuav los rhuav tau peb txoj kev sib raug zoo nrog Yehauvas.