Paulus hais tias: “Thaum kuv tus npawg wb sib ceg, kuv txawm ntsiab nthos nws caj dab zawm. Kuv xav ua kom nws tuag kiag.”

Makaum (Marco) hais tias: “Nyob tom tsev yog kuv npau taws thaum twg ces kuv ntau rooj ncaws tog tsoo ub tsoo no kom puas tag.”

Tej zaum peb yuav tsis ua heev npaum li ntawd tiamsis muaj tej thaum yeej tsis yoojyim rau peb tswj peb tus kheej. Yog vim li cas? Rau qhov peb yog Adas cov xeeb ntxwv thiab peb yog noob txaug neeg txhaum. (Loos 5:12) Muaj ib co neeg siab luv ib yam li Paulus thiab Makaum nkawd. Hos ib txhia pheej xav txog tej uas lawv ntshai thiab tej uas ua rau lawv poob siab. Ib txhia lub siab pheej ntshaw mus ua plees ua yi, haus dej haus cawv, lossis haus yeeb haus tshuaj.

Cov uas tswj tsis tau lawv tus kheej yuav ua rau lawv lub neej puas. Yog li ntawd peb yuav tswj peb tus kheej li cas? Cia peb tham txog 3 lo lus nug no: (1) Tswj tus kheej yog li cas tiag? (2) Vim li cas thiaj tseem ceeb rau peb tswj peb tus kheej? Thiab (3) peb yuav ua li cas Yehauvas lub hwj huam dawb huv thiaj pab tau peb tswj peb tus kheej? (Kalatias 5:22, 23) Peb kuj yuav tham seb peb yuav ua li cas thaum peb tswj tsis tau peb tus kheej.

Tus neeg uas tswj tau nws tus kheej, nws xav tau li cas los nws tsis ua li ntawd. Nws tswj tsis ua tej yam uas yuav ua rau Vajtswv tu siab.

Yexus paub tswj nws tus kheej. Phau Vajlugkub hais tias: “Thaum luag thuam nws, nws tsis teb luag ib los li; thiab thaum luag tsimtxom nws, nws tsis foom luag, tiamsis nws muab tej ntawd tso rau Vajtswv tus uas txiav txim ncaj ncees.” (1 Petus 2:23) Thaum Yexus cov yeeb ncuab muab nws dai saum tus ntoo thiab thuam nws los nws tswj nws tus kheej tsis hais dabtsi rov qab rau lawv. (Mathais 27:39-44) Ua ntej ntawd, thaum cov Falixais txhob txwm nug kom Yexus hais lus yuam kev los nws tsis npau taws. (Mathais 22:15-22) Thiab thaum muaj ib co Yudais khaws pob zeb yuav ntaus Yexus vim lawv npau taws heev rau nws los nws tsis ua phem rov qab tiamsis nws “khiav nkaum thiab tawm hauv lub Tuamtsev mus lawm.”​—Yauhas 8:57-59.

Peb puas yuav xyaum tau li Yexus? Tus tubtxib Petus sau tias: “Yexus Khetos twb raug kev tsimtxom this nej thiab ua yam ntxwv rau nej xyaum lawm.” (1 Petus 2:21) Txawm peb yog neeg zoo tsis tiav los peb yeej xyaum tau Yexus thiab tswj tau peb tus kheej. Vim li cas thiaj tseem ceeb rau peb ua li ntawd?

Txawm peb twb teev tiam Yehauvas tau ntev heev lawm los yog peb tswj tsis tau peb tus kheej ces peb yuav plam peb txojkev sib raug zoo nrog Yehauvas los muaj. Yog li ntawd peb yuav tsum paub tswj peb tus  kheej peb thiaj ua tau haum Yehauvas siab.

Cia peb tham txog Mauxes. Nyob rau Mauxes tiam, nws yog tus “txo hwjchim tshaj plaws tej neeg uas nyob hauv qab ntuj no.” (Teev Npe 12:3) Tau ntau xyoo, txawm cov Yixalayees yws npaum li cas los Mauxes ua siab ntev rau lawv. Tiamsis muaj ib zaug cov Yixalayees yws tias lawv tsis muaj dej haus, ua rau Mauxes npau taws heev. Nws thiaj tswj tsis tau nws tus kheej thiab hais lus hnyav heev rau lawv tias: “Nej cov uas yog neeg ntxeev siab, nej cia li ua tib zoo mloog! Nej tseem cia wb ua kom dej txhawv hauv lub pobzeb no los rau nej haus thiab los?”​—Teev Npe 20:2-11.

Mauxes tsis hais tias Yehauvas yog tus ua txujci kom dej txhawv hauv pob zeb los rau cov Yixalayees. (Phau Ntawv Nkauj 106:32, 33) Twb yog vim li ntawd Yehauvas thiaj tsis pub nws mus rau hauv tebchaws Kana-as. (Teev Npe 20:12) Tej zaum tas nws sim neej, nws yuav tu siab heev tias nws tswj tsis tau nws tus kheej.​—2 Kevcai 3:23-27.

Peb kawm tau li cas xwb? Txawm peb twb teev tiam Yehauvas tau ntev heev lawm los peb yuav tsum tsis txhob hais lus saib tsis tau cov uas ua txob peb siab lossis cov uas ua tsis yog lawm. (Efexus 4:32; Kaulauxais 3:12) Thaum peb laus lawd peb siab yeej tsis ntev. Tiamsis nco ntsoov tsis txhob ua li Mauxes es cia peb tej kev npau taws ua rau peb tswj tsis tau peb tus kheej thiab ua rau Yehauvas tu siab. Yog li ntawd peb yuav ua li cas peb thiaj paub tswj peb tus kheej?

Thov Vajtswv pub nws lub hwj huam dawb huv pab. Vim li cas? Vajtswv lub hwj huam dawb huv pab kom peb tswj tau peb tus kheej. Yehauvas yuav muab nws lub hwj huam rau cov uas thov nws. (Lukas 11:13; 2 Kauleethaus 4:7) Vajtswv lub hwj huam dawb huv kuj pab kom peb muaj kev hlub thiab. Thaum peb muaj kev hlub ces yuav yoojyim rau peb tswj peb tus kheej.

Zam tej uas yuav ua rau koj tswj tsis tau koj tus kheej. Xws li tsis txhob mus saib tej yam tsis zoo hauv Is Taws Nej lossis mus saib tej yeeb yaj kiab uas tsis huv. (Efexus 5:3, 4) Lossis tus neeg uas muaj lub siab ntshaw kev plees kev yi, tej zaum yuav zoo rau nws tsis txhob saib tej yeeb yaj kiab lossis nyeem tej ntaub ntawv txog kev nkauj kev nraug. Peb yuav tsum zam tej yam uas yuav coj peb mus ua txhaum.​—Pajlug 22:3; 1 Kauleethaus 6:12.

Yuav tsis yoojyim rau peb ua li no tiamsis yog peb siv zog xyaum tswj peb tus kheej ces  Yehauvas yuav pab kom peb ua tau. (2 Petus 1:5-8) Nws yuav pab kom peb tswj tau peb txojkev xav, tej peb hais, thiab tej peb ua. Paulus thiab Makaum nkawd los twb tswj tau nkawd lub siab kub siab ceev. Cia peb tham ntxiv txog ib tug kwvtij uas pheej npau taws rau lwm tus thaum nws tsav tsheb. Muaj tej thaud nws tseem nrog lawv sib cav sib ceg thiab. Nws ua li cas xwb? Nws hais tias: “Kuv thov Vajtswv tsis tseg li. Kuv nyeem tej ntaub ntawv thiab cim tej nqi Vajlugkub uas yuav pab kuv tswj tau kuv tus kheej. Txawm kuv twb xyaum ua li no ntev heev lawm los kuv yeej tseem niaj hnub qhia kuv tus kheej kom ua siab ntev. Thaum kuv yuav mus ib qho twg los kuv mus kom ntxov kuv thiaj li tsis maj.”

Muaj tej thaud peb yuav tswj tsis tau peb tus kheej. Thaum muaj li no ces tej zaum peb yuav txaj muag mus cuag Yehauvas tiamsis peb yuav tsum thov nws zam txim thiab thov nws pab kom peb tsis txhob ua ntxiv lawm. (Phau Ntawv Nkauj 51:9-11) Tsis txhob xav tias Yehauvas yuav tsis teb koj tej lus thov thiab khuvleej koj. (Phau Ntawv Nkauj 102:17) Tus tubtxib Yauhas hais tias: “Vajtswv tus Tub Yexus Khetos cov ntshav twb ntxuav peb tej kev txhaum huv tibsi lawm.” (1 Yauhas 1:7; 2:1; Phau Ntawv Nkauj 86:5) Yehauvas twb hais kom nws cov tub qhe ib leeg zam txim rau ib leeg. Yog li ntawd peb tso siab tau tias nws yeej yuav zam txim rau peb.​—Mathais 18:21, 22; Kaulauxais 3:13.

Txawm Yehauvas chim heev thaum Mauxes tswj tsis tau nws tus kheej tom toj roob moj sab qhua los Yehauvas twb zam txim rau nws. Vajtswv Txojlus hais tias Mauxes yog ib tug uas muaj kev ntseeg heev thiab peb yuav tau xyaum nws tus qauv. (2 Kevcai 34:10; Henplais 11:24-28) Yehauvas tsis cia Mauxes mus rau hauv tebchaws Kana-as tiamsis Yehauvas yuav tsa nws sawv los nyob mus ib txhis hauv lub Vaj Kaj Siab. Yog peb xyaum tswj peb tus kheej ces peb yuav tau nyob mus ib txhis hauv Vaj Kaj Siab thiab.​—1 Kauleethaus 9:25.