1. Vim li cas tej thaud Yehauvas cov neeg tej tug thiaj kho siab thiab xav hais tias muaj lawv tib leeg xwb?

 MUAJ TEJ THAUD, peb yuav kho siab lossis tu siab tias muaj peb tib leeg xwb. Muaj tej tug xav li no ib vuag xwb dhau lawm tiamsis muaj tej tug pheej xav li no tas mus li txawm hais tias muaj neeg coob coob nyob puag ncig lawv. Muaj tej tug, nyuaj heev rau lawv zeem phoojywg thaum lawv tsiv mus rau ib lub koom txoos tshiab. Hos muaj tej tug, lawv loj hlob nrog tsev neeg coob coob ces thaum lawv tsis nrog lawv tsev neeg nyob lawm, lawv thiaj kho siab heev. Muaj ib co kho siab vim lawv nco lawv cov neeg uas tas sim neej lawm. Hos muaj ib txhia, lawv tu siab thiab kho siab vim lawv tsev neeg thiab cov qub phoojywg tawm tsam lawv thaum lawv los paub qhov tseeb.

2. Peb yuav tham txog 3 yam twg?

² Yehauvas paub txhua yam txog peb. Thaum peb kho siab los nws yeej paub thiab nws xav pab peb. Hauv zaj no peb yuav tham seb Yehauvas yuav pab peb li cas, peb ho yuav pab peb li cas, thiab peb yuav pab cov kwvtij nkauj muam hauv lub koom txoos li cas.

3. Yehauvas saib xyuas Eliyas li cas?

³ Yehauvas xav kom nws cov neeg muaj kev zoo siab. Nws nyob ze peb txhua tus thiab nws yeej paub thaum peb muaj kev tu siab thiab qaug zog. (Phau Ntawv Nkauj 145:18, 19) Tus cev Vajtswv lus Eliyas nyob rau lub sijhawm uas muaj kev nyuaj siab ntau kawg nkaus. Nyob hauv lub tebchaws Yixalayees tus Poj Vajntxwv Yexenpees thiab cov uas tsis hlub Yehauvas  tawm tsam cov uas teev tiam Yehauvas thiab yuav muab Eliyas tua. (1 Vajntxwv 19:1, 2) Thaum ntawd Eliyas xav tias cov uas teev tiam Yehauvas tsuas tshuav nws tib leeg lawm xwb. Nws thiaj li qaug zog heev. (1 Vajntxwv 19:10) Yehauvas txhawj txog Eliyas heev nws thiaj xa ib tug tubtxib saum ntuj los qhia rau Eliyas tias tseem tshuav cov Yixalayees coob tus uas teev tiam Yehauvas thiab.​—1 Vajntxwv 19:5, 18.

4. Malakaus 10:29, 30 qhia tias Yehauvas txhawj txog cov uas teev tiam nws uas tsis tau kev txhawb zog los ntawm lawv tsev neeg thiab lawv tej qub phoojywg lawm li cas?

⁴ Yehauvas paub tias thaum peb los teev tiam nws, peb ib txhia yuav tau tso tseg ntau tsav ntau yam thiab peb yuav tsis tau kev txhawb zog los ntawm peb tsev neeg thiab peb tej qub phoojywg uas tsis teev tiam Yehauvas. Tej zaum tus tubtxib Petus los yeej txhawj thiab thaum nws nug Yexus tias: “Peb twb tso txhua yam tseg thiab nrog koj txog tav no, peb yuav tau dabtsi?” (Mathais 19:27) Yexus teb nws cov thwjtim tias lawv cov kwvtij nkauj muam hauv lub koom txoos yuav zoo tam li lawv tsev neeg ntag. (Nyeem Malakaus 10:29, 30.) Thiab peb Leej Txiv Yehauvas cog lus tias nws yuav pab cov uas teev tiam nws. (Phau Ntawv Nkauj 9:10) Yog li, ua zoo xav seb koj yuav ua li cas Yehauvas thiaj pab tau koj kom koj tsis txhob xav tias muaj koj ib leeg xwb.

5. Vim li cas thiaj zoo rau koj ua tib zoo xav txog tej uas Yehauvas niaj hnub pab koj?

⁵ Thaum koj pheej xav tias muaj koj ib leeg xwb ces ua zoo xav seb Yehauvas niaj hnub pab koj li cas. (Phau Ntawv Nkauj 55:22) Muaj ib tug muam hu ua Khalaum (Carol), b nws tsis muaj txiv thiab nws tsev neeg tsis muaj ib tug teev tiam Yehauvas li. Nws hais tias: “Thaum kuv xav txog kuv tej kev nyuaj siab uas Yehauvas pab kuv thev dhau lawm, ua rau kuv pom tias tsis yog muaj kuv ib leeg xwb, Yehauvas yeej nyob nrog nraim kuv.”

6. Ib Petus 5:9, 10 pab tau cov uas muaj lawv tib leeg xwb los teev tiam Yehauvas li cas?

⁶ Ua zoo xav seb Yehauvas niaj hnub pab koj cov kwvtij nkauj muam li cas. (Nyeem 1 Petus  5:9, 10.) Muaj ib tug kwvtij hu ua Hilausim (Hiroshi) uas tau ntau ntau xyoo hauv nws tsev neeg tsuas muaj nws tib leeg xwb thiaj teev tiam Yehauvas. Nws hais tias: “Peb paub hais tias hauv lub koom txoos peb sawvdaws nyias yeej muaj muaj nyias teeb meem tiamsis peb yeej rau siab ntso teev tiam Yehauvas thiab txhawb cov uas hauv lawv tsev neeg tsuas muaj lawv tib leeg xwb los teev tiam Yehauvas.”

7. Thaum koj thov Vajtswv ho pab tau koj li cas xwb?

⁷ Niaj hnub thov Vajtswv thiab qhia hlo tej uas nyob hauv koj lub siab rau nws. (1 Petus 5:7) Muaj ib tug muam hu ua Mas Xis Yaus (Massiel) kho siab heev vim nyob hauv nws tsev neeg tsuas muaj nws tib leeg xwb thiaj los teev tiam Yehauvas. Nws hais tias: “Thaum kuv kho siab, kuv thov Yehauvas pab kuv. Yehauvas yog ib Leej Txi uas hlub kuv kawg. Kuv niaj hnub thov nws thiab qhia hlo tej uas nyob hauv kuv lub siab rau nws.”

8. Thaum koj nyeem phau Vajlugkub thiab ua zoo xav txog tej uas koj nyeem ho pab tau koj li cas xwb?

⁸ Niaj hnub nyeem phau Vajlugkub thiab ua tib zoo xav txog tej zaj uas qhia tias Yehauvas hlub koj. Tus muam Npis Yas Kas (Bianca) hais tias nws yuav tsum ua tiag uv thaum nws tsev neeg hais lus chob chob nws. Nws hais tias: “Thaum kuv nyeem phau Vajlugkub thiab ua zoo xav txog Yehauvas cov tub qhe uas raug tej teeb meem zoo ib yam li kuv, txhawb tau kuv lub zog kawg.” Cov kwvtij nkauj muam ib txhia cim tej nqi Vajlugkub uas txhawb tau lawv zog, xws li Phau Ntawv Nkauj 27:10 thiab Yaxayas 41:10. Hos ib txhia mloog phau Vajlugkub lossis tej ntaub ntawv Vajlugkub uas muab kaw ua suab cia lawm. Lawv ua li no lawv thiaj tsis kho siab.

9. Thaum koj mus kev sib txoos ho pab tau koj li cas?

⁹ Rau siab ntso mus koom kom tau txhua txoj kev sib txoos rau qhov tej uas koj hnov ntawm tej kev sib txoos yuav txhawb tau koj lub zog thiab koj yuav paub cov kwvtij nkauj muam hauv koj lub koom txoos zoo dua. (Henplais 10:24, 25) Tus muam Mas Xis Yaus uas peb tham tas los hais tias: “Kuv yog ib tug neeg txaj txaj muag tiamsis kuv txiav txim siab tias kuv yuav tsum mus koom kom tau txhua txhua txoj kev sib txoos thiab tsa tes teb. Kuv ua li no kuv thiaj ncawg cov kwvtij nkauj muam hauv kuv lub koom txoos.”

10. Vim li cas peb yuav tsum ntaus phoojywg nrog peb cov kwvtij nkauj muam uas muab siab npuab Yehauvas hauv lub koom txoos?

¹⁰ Ntaus phoojywg nrog cov neeg nyob hauv koj lub koom txoos uas yuav txhawb tau koj. Txawm cov laus cov hluas lossis lwm haivneeg los koj yeej ua tau phoojywg nrog lawv. Phau Vajlugkub hais tias cov laus muaj tswvyim  tiamsis cov laus los yeej kawm tau ntawm cov hluas thiab. (Yauj 12:12, 13) Daviv yau Yaunathas ntau heev, txawm li ntawd los nkawd yog phoojywg zoo. (1 Xamuyees 18:1) Thaum muaj teeb meem los nkawd ib leeg pab ib leeg kom nkawd teev tiam tau Yehauvas. (1 Xamuyees 23:16-18) Tus muam Ais Liv Nam (Irina) uas hauv nws tsev neeg tsuas muaj nws tib leeg teev tiam Yehauvas xwb, hais tias: “Yehauvas muab peb cov kwvtij nkauj muam hauv lub koom txoos los pab peb tam li peb tsev neeg.”

11. Peb yuav ua li cas peb thiaj cog tau phoojywg nrog cov nyob hauv lub koom txoos?

¹¹ Yeej tsis yoojyim rau peb cog phoojywg tiamsis yog peb yog ib tug neeg txaj muag ces hajyam yuav tsis yoojyim rau peb. Kuj tsis yoojyim rau peb qhia siab rau ib tug twg tiamsis thaum peb ua li ntawd ces peb yuav muaj kev sib raug zoo nrog tus ntawd. Lev Nam (Ratna) yog ib tug muam uas txaj txaj muag. Thaum nws los paub qhov tseeb nws tsev neeg tawm tsam nws heev. Lev Nam hais tias: “Kuv paub tias kuv yuav tsum cia kuv cov kwvtij nkauj muam hauv lub koom txoos pab kuv.” Peb cov phoojywg yeej xav pab peb tiamsis peb yuav tsum qhia lawv, lawv thiaj paub pab.

12. Vim li cas peb thiaj ua tau phoojywg zoo nrog peb cov kwvtij nkauj muam thaum peb mus tshaj tawm nrog lawv?

¹² Ib txoj hau kev uas yuav pab kom peb muaj kev sib raug zoo nrog peb cov kwvtij nkauj muam yog nrog lawv mus tshaj tawm txoj xov zoo. Khalaum uas peb tham tas los, hais tias: “Kuv muaj cov phoojywg zoo coob tus vim kuv nrog lawv mus tshaj tawm thiab nrog lawv ua lwm yam haujlwm rau Yehauvas. Kuv cov phoojywg yog cov uas Yehauvas muab los pab kuv.” Yeej zoo rau peb muaj cov phoojywg uas muab siab npuab Yehauvas. Lawv yog cov uas Yehauvas muab los pab peb thaum peb muaj kev nyuaj siab thiab thaum peb kho siab.​—Pajlug 17:17.

13. Peb sawvdaws hauv lub koom txoos yuav tsum ua dabtsi?

¹³ Peb sawvdaws hauv lub koom txoos yuav tsum sib hlub sib pab kom tsis txhob muaj ib tug twg xav tias muaj nws tib leeg xwb, tsis muaj leejtwg hlub nws. (Yauhas 13:35) Tej peb hais thiab tej peb ua nrog peb cov kwvtij nkauj muam yuav txhawb tau lawv lub zog heev. Muaj ib tug muam hais tias: “Thaum kuv los paub qhov tseeb ces cov kwvtij nkauj muam hauv lub koom txoos yog kuv tsev neeg lawm. Yog tsis muaj lawv pab kuv ces kuv yeej los ua tsis tau Yehauvas ib tug Timkhawv li.” Koj yuav ua li cas koj thiaj pab tau tus uas tsuas muaj nws tib leeg xwb los teev tiam Yehauvas kom nws paub tias cov kwvtij nkauj muam hauv lub koom txoos hlub nws?

14. Yuav ua li cas peb thiaj ua tau phoojywg nrog cov uas tuaj tshiab?

¹⁴ Nco ntsoov mus zeem cov uas tuaj tshiab hauv koj lub koom txoos thiab ua phoojywg nrog lawv. Ua zoo rau lawv kom lawv paub tias koj yeej hlub tshua lawv tiag. (Loos 15:7) Tiamsis tsis txhob nug lawv tej yam uas yuav ua rau lawv txaj muag. Rau qhov muaj ib txhia txaj muag qhia txog lawv tus kheej rau ib tug neeg tshiab uas lawv tsis tau paub zoo. Yog koj tsis paub xyov koj yuav nrog lawv tham li cas ces nrog lawv tham seb lawv los paub qhov tseeb li cas xwb los yeej tau.

15. Cov kwvtij nkauj muam uas muaj kev ntseeg ruaj khov pab tau lub koom txoos li cas?

¹⁵ Peb sawvdaws hauv lub koom txoos txoj kev ntseeg yuav ruaj khov yog peb txawj sib  hlub thiab sib pab. Tshwj xeeb heev rau cov txwj laus thiab cov uas muaj kev ntseeg ruaj khov ua li no. Mas Liv Xam (Melissa) uas nws niam tu nws loj hlob hauv qhov tseeb hais tias: “Kuv nco txiaj ntsig rau cov kwvtij uas zoo tam li ib leej txiv rau kuv. Lawv pab kuv thiab ua siab ntev mloog kuv thaum kuv nrog lawv tham txog kuv tej kev nyuaj siab.” Ib tug tub hluas uas los paub qhov tseeb hu ua Mas Liv Xis Yaus (Mauricio) tu siab heev thaum tus uas qhia Vajlugkub rau nws tso Yehauvas tseg lawm. Mas Liv Xis Yaus hais tias: “Cov txwj laus txhawj txog kuv thiab pab kuv ntau kawg. Lawv niaj hnub nrog kuv tham, nrog kuv mus tshaj tawm txoj xov zoo thiab qhia tej lus nyiaj lus kub uas lawv kawm tau rau kuv. Lawv tseem coj kuv nrog lawv mus ua si thiab.” Niaj hnub nimno Mas Liv Xam thiab Mas Liv Xis Yaus nkawd ob leeg ua haujlwm puv ntoob rau Yehauvas.

16-17. Peb yuav pab tau cov uas nyob hauv peb lub koom txoos li cas?

¹⁶ Xav seb koj yuav pab tau lwm tus li cas. (Kalatias 6:10) Kwvtij Li-aus (Leo) yog ib tug tshaj tawm txawv tebchaws. Nws mus tshaj tawm rau ib lub tebchaws deb heev ntawm nws tsev neeg. Nws hais tias: “Kuv nco qab muaj ib hnub thaum kuv ua tsheb sib tsoo es kuv nyuaj siab heev. Thaum kuv los txog tsev muaj ob niam txiv hu kuv mus nrog nkawd noj mov. Kuv tsis nco qab xyov peb noj dabtsi tiamsis kuv nco qab qhov uas nkawd ua siab ntev mloog kuv. Thaum peb noj mov tag ces kuv tsis nco qab nyuaj siab lawm.” Li-aus hais ntxiv tias: “Thaum yus muaj kev nyuaj siab es muaj ib tug los ua zoo rau yus, yeej pab tau yus kawg!”

¹⁷ Peb sawvdaws yeej nyiam mus tej rooj sib txoos rau qhov peb yuav tau nrog peb cov kwvtij nkauj muam ua ke thiab nrog lawv tham txog tej peb hnov hnub ntawd. Tiamsis tus muam Khalaum uas peb tham tas los hais tias: “Thaum kuv mus tej rooj sib txoos txawm hais tias muaj cov kwvtij nkauj muam coob coob los nyias nrog nyias tsev neeg ua ke lawm ces kuv thiaj tu siab heev vim muaj kuv ib leeg xwb.” Hos muaj tej tug kho siab thaum nws mus tej rooj sib txoos nws ib leeg vim nws tus txij nkawm tas sim neej lawm. Yog koj paub tej tug zoo li no ces lwm zaus coj nws nrog koj tsev neeg mus tej rooj sib txoos ua ke.

18. Peb yuav ua li cas peb thiaj ua tau li 2 Kauleethaus 6:11-13 hais thaum peb tos txais qhua?

 ¹⁸ Nrog peb cov kwvtij nkauj muam ua ke. Thaum koj caw cov kwvtij nkauj muam hauv lub koom txoos nrog koj tsev neeg ua ib yam dabtsi, tsis txhob caw cov qub nkaus xwb. Thiab nco ntsoov caw cov uas muaj nws ib leeg xwb. (Nyeem 2 Kauleethaus 6:11-13.) Mas Liv Xam uas peb tham tas los lawd hais ntxiv tias: “Kuv niam wb zoo siab heev thaum cov kwvtij nkauj muam caw wb mus xyuas lawv lossis nrog lawv mus ib qho qhov twg.” Puas muaj ib tug uas nyob hauv koj lub koom txoos uas koj xav caw nws tuaj xyuas koj thiab nrog koj tsev neeg noj ib pluag mov ua ke?

19. Lub caij lub nyoog twg zoo rau peb caw peb cov kwvtij nkauj muam tuaj nrog peb ua ke?

¹⁹ Muaj tej lub caij lub nyoog yuav zoo rau peb caw peb cov kwvtij nkauj muam tuaj xyuas peb. Xws li thaum lawv tsev neeg uas tsis teev tiam Yehauvas ua kevcai dab qhuas lossis ua tej kab lis kevcai uas Yehauvas tsis pom zoo. Muaj ib txhia thaum ib xyoos ntuj zeeg los txog hnub uas lawv tus neeg tas sim neej, yuav ua rau lawv tu siab thiab kho siab heev. Peb kuj caw lawv tuaj xyuas peb thiab. Thaum peb caw cov kwvtij nkauj muam li no tuaj nrog peb ua ke ces lawv yuav paub tias peb hlub lawv.​—Filipis 2:20.

20. Yexus cov lus hauv Mathais 12:48-50 pab tau peb li cas thaum peb xav hais tias muaj peb tib leeg xwb?

²⁰ Muaj ntau tsav ntau yam yuav ua rau peb cov kwvtij nkauj muam Khixatia kho siab lossis tu siab hais tias muaj lawv tib leeg xwb. Tiamsis peb yuav tsum nco ntsoov tias Yehauvas yeej paub peb zoo thiab yuav pab peb. Muaj ntau zaus Yehauvas muab peb cov kwvtij nkauj muam los pab peb. (Nyeem Mathais 12:48-50.) Peb qhia rau Yehauvas tias peb ris nws txiaj ntsig rau lub koom txoos thaum peb ua li peb ua tau los pab peb cov kwvtij nkauj muam. Txawm hais tias muaj tej thaud peb yuav xav hais tias muaj peb tib leeg xwb los nco ntsoov tias Yehauvas yeej nrog nraim peb!