1, 2. Qhov uas peb ntsia ntsoov tos Yehauvas yog li cas tiag?

 PEB nyob rau lub caij lub nyoog uas muaj kev “txom nyem nyuaj siab kawg.” (2 Timaute 3:1) Tsuas yuav muaj kev txom nyem nyuaj siab ntau zuj zus mus txog thaum Yehauvas muab lub qab ntuj limhiam no rhuav tshem thiab coj kev thaj yeeb los rau ntiajteb. Vim li no, peb yuav tsum ua tib zoo xav seb peb yuav tos ntsoov leejtwg txojkev pab. Yog peb hais tias peb ntsia ntsoov tos Yehauvas ces kuj zoo heev.

² Qhov uas peb ntsia ntsoov tos Yehauvas yog li cas tiag? Thaum peb muaj teeb meem, peb yuav ua li cas thiaj qhia tias peb tos Yehauvas? Tus uas sau Ntawv Nkauj 123 hais tias thaum peb raug kev nyuaj siab, peb yuav tsum ‘ntsia ntsoov tos Yehauvas.’ (Nyeem Ntawv Nkauj 123:1-4.) Nws hais tias peb ntsia ntsoov tos Yehauvas ib yam li tus tub qhe uas ntsia ntsoov tos nws tus lospav xwv nws thiaj paub ua haum tus  lospav siab. Ib yam li ntawd, peb yuav tsum ua tib zoo kawm Vajtswv Txojlus txhua txhua hnub xwv peb thiaj paub tias Yehauvas xav kom peb ua dabtsi. Yog peb ua raws li Vajtswv siab nyiam ces nws yuav pab peb thiab tsom kwm peb ib yam li tus lospav tsom kwm nws tus tub qhe.​—Efexau 5:17.

3. Dabtsi yuav ua rau peb tsis nco qab ntsia ntsoov Yehauvas?

³ Txawm peb paub tias peb yuav tsum ntsia ntsoov tos Yehauvas los, muaj tej lub sijhawm yuav tsis yoojyim rau peb ua li ntawd. Tau muaj li no rau Yexus tus phoojywg Matha, nws “ntxhov siab rau nws tej haujlwm.” (Luka 10:40-42) Txawm Matha twb muaj kev ntseeg heev thiab Yexus twb nrog lawv nyob tim ntsej tim muag los, Matha tseem ntxhov siab ntau yam. Niaj hnub no peb yuav tsum yimhuab ceev faj tsis txhob cia ib yam dabtsi ua rau peb ntxhov siab es tsis nco qab Yehauvas. Hauv zaj no peb yuav kawm tias peb yuav tsum tsis txhob cia lwm tus ua rau peb ntxhov siab. Peb kuj yuav kawm tias yuav ua li cas peb thiaj ntsia ntsoov Yehauvas.

4. Thaum koj paub tias Mauxe tsis tau mus rau hauv lub tebchaws uas Vajtswv cog tseg ua rau koj xav li cas?

⁴ Mauxe yeej ntsia ntsoov tos Yehauvas pab nws xwb. Phau Vajlugkub hais tias Mauxe “ua siab ntev thev cuag li nws pom tus uas neeg qhov muag tsis pom.” (Nyeem Henplais 11:24-27.) Phau Vajlugkub hais tias “tsis muaj ib tug xibhwb cev Vajtswv lus twg tshwm rau hauv cov Yixayee zoo ib yam li Mauxe uas [Yehauvas] nrog nraim tim ntsej tim muag.” (Kevcai 34:10) Txawm Mauxe twb nrog Yehauvas sib raug zoo npaum li ntawd los, Yehauvas tseem tsis pub Mauxe mus rau hauv lub tebchaws uas Nws cog tseg thiab. (Xwm Txheej Taug Kev 20:12) Vim li cas?

5-7. Tsis ntev tom qab cov Yixayee tawm hauv tebchaws Iyi mus tau muaj li cas, thiab Mauxe ho ua li cas?

⁵ Cov Yixayee tawm hauv tebchaws Iyi mus twb tsis tau 2 lub hlis thiab twb mus tsis tau txog lub roob Xinai, tiamsis lawv txawm siv pib yws tias tsis muaj dej haus. Lawv yws Mauxe thiab ua npau taws vog rau nws. Phau Vajlugkub hais tias: “Mauxe thiaj quaj thov [Yehauvas] tias, ‘Kuv yuav ua li cas rau cov pejxeem no? Lawv twb yuav xuas pob zeb muab kuv ntaus tuag.’” (Khiav Dim 17:4) Yehauvas thiaj hais kom Mauxe muab nws tus pas nrig ntaus phab zeb ntawm lub roob Haule. Mauxe thiaj ua raws li Yehauvas hais tab meeg Yixayee cov kev txwj laus ces dej txawm txhawv los rau cov pejxeem haus, lawv thiaj tsis yws nws lawm.​—Khiav Dim 17:5, 6.

⁶ Phau Vajlugkub qhia tias Mauxe muab qhov chaw ntawd hu ua Maxa, uas txhais tias “Sim,” thiab muab hu ua Melinpa, uas txhais tias “Nrhiav Txim.” Vim li cas? “Vim yog cov Yixayee nrhiav txim rau nws thiab sim [Yehauvas] hais tias, ‘[Yehauvas] nrog peb nyob los tsis nyob lawm?’”​—Khiav Dim 17:7.

⁷ Yehauvas xav li cas txog tej uas cov Yixayee ua hauv Melinpa? Yehauvas pom tias tsis yog lawv fav xeeb rau Mauxe xwb, tiamsis twb yog lawv fav xeeb rau nws thiab. (Nyeem Ntawv Nkauj 95:8, 9.) Tej uas cov Yixayee ua no txhaum loj kawg li. Tiamsis Mauxe ntsia ntsoov tos Yehauvas thiab ua raws li Nws hais.

8. Thaum cov Yixayee mus yuav luag txog lub tebchaws uas Vajtswv cog tseg rau lawv, tau muaj li cas?

 ⁸ Kwvlam 40 lub xyoos tom qab tej no tshwm sim, cov Yixayee los tsuam chaw ze lub moos Khade, tsis deb ntawm lub tebchaws uas Vajtswv cog tseg rau lawv. Lawv txawm rov yws dua tias tsis muaj dej haus, twb yog vim li ntawd thiaj muab qhov chaw no hu ua Melinpa thiab. a (Saib cov lus hauv qab taw qhia.) (Xwm Txheej Taug Kev 20:1-5) Tiamsis zaum no Mauxe ua tau yuam kev loj heev.

9. Zaum no Yehauvas hais kom Mauxe ua li cas, tiamsis Mauxe puas ua li Yehauvas hais? (Saib thawj daim duab hauv zaj no.)

⁹ Thaum cov Yixayee rov qab fav xeeb rau Mauxe, nws yeej tseem ntsia ntsoov tos Yehauvas. Tiamsis zaum no Yehauvas tsis hais kom Mauxe muab nws tus pas nrig ntaus phab zeb lawm. Nws hais kom Mauxe tuav nws tus pas nrig, hu cov pejxeem tuaj ua ke, thiab hais lus rau phab zeb xwb. (Xwm Txheej Taug Kev 20:6-8) Mauxe puas ua li Yehauvas hais? Nws tsis ua. Mauxe chim thiab npau taws heev rau cov pejxeem nws cia li nthe lawv tias: “Nej cov niag neeg fav xeeb, cia li tig ntsej mloog. Yuav cia wb ua dej txhawv hauv phab zeb no los rau nej lov?” Ces nws txawm xuas pas nrig ntaus phab zeb 2 nplawg.​—Xwm Txheej Taug Kev 20:10, 11.

10. Yehauvas xav li cas txog qhov uas Mauxe tsis mloog lus?

¹⁰ Yehauvas chim heev rau Mauxe. (Kevcai 1:37; 3:26) Vim li cas nws thiaj chim? Rau qhov zaum no Yehauvas hais kom nws ua ib yam tshiab tiamsis nws tsis mloog, nws rov mus ua li zaum tas los xwb.

11. Vim li cas qhov uas Mauxe ntaus phab zeb ho ua rau cov Yixayee xav yuam kev?

¹¹ Kuj muaj lwm yam uas ua rau Yehauvas chim heev thiab. Yog dabtsi? Cia peb kawm txog tej pob zeb pob tsuas uas nyob rau sab tebchaws ntawd. Phab zeb hauv thawj qhov chaw Melinpa yog hom zeb uas tawv heev. Txawm neeg siv zog ntaus npaum li cas los tsis muaj leejtwg yuav xav tias dej yuav txhawv tau los ib zaug li. Tiamsis hom zeb nyob hauv qhov chaw Melinpa tom qab no phom heev. Dej yeej txeem tau rau hauv tej zeb ntawd mus tauv ua pas dej. Yog muaj neeg tho cov zeb ntawd ces dej yeej txhawv los xwb. Yog li ntawd, thaum Mauxe tsis mloog Yehauvas lus es ntaus phab zeb, puas yog cov Yixayee xav tias phab zeb ntawd yeej muaj dej nyob rau hauv es tsis yog Yehauvas ua txujci? b (Saib cov lus hauv qab taw qhia.) Peb tsis paub.

12. Vim li cas Yehauvas ho npau taws rau Mauxe thiab Aloo?

¹² Kuj muaj lwm yam uas ua rau Yehauvas  npau taws heev rau Mauxe thiab Aloo nkawd. Yog dabtsi? Mauxe hais rau cov pejxeem tias: “Yuav cia wb ua dej txhawv hauv phab zeb no los rau nej lov?” Thaum Mauxe hais li no tej zaum yog nws hais txog nws tus kheej thiab Aloo. Tej uas Mauxe ua ntawd qhia tias nws tsis hwm Yehauvas vim nws tsis qhuas Yehauvas tib leeg xwb. Ntawv Nkauj 106:32, 33 hais tias: “Lawv ua rau Vajtswv chim ntawm dej Melinpa, mas qhov uas lawv ua li ntawd puas tsuas Mauxe, vim yog lawv ua rau Mauxe nyuaj siab nws thiaj li ua ncauj sai lawm.” c (Saib cov lus hauv qab taw qhia.) (Xwm Txheej Taug Kev 27:14) Vim Mauxe tsis hwm Yehauvas, Yehauvas thiaj hais rau Mauxe thiab Aloo nkawd tias: “Neb ob leeg fav xeeb tej lus uas kuv hais rau neb.” (Xwm Txheej Taug Kev 20:24) Nkawd yeej ua txhaum loj heev lawm tiag!

13. Ua cas qhov uas Yehauvas rau txim rau Mauxe yeej raug cai?

¹³ Mauxe thiab Aloo nkawd yog ob tug uas coj Yehauvas haiv neeg, tsim nyog nkawd ua qauv zoo rau lwm tus xyaum. (Luka 12:48) Thaum cov Yixayee nyob hauv tebchaws moj sab qhua, Yehauvas twb tsis pub cov uas fav xeeb rau nws nkag mus rau hauv lub tebchaws uas nws cog tseg. (Xwm Txheej Taug Kev 14:26-30, 34) Yog li ntawd, thaum Mauxe fav xeeb rau Yehauvas, Mauxe kuj raug tib lub txim ntawd thiab. Yehauvas thiaj tsis pub Mauxe nkag mus rau hauv lub tebchaws uas nws cog tseg.

14, 15. Ua li cas Mauxe thiaj fav xeeb rau Yehauvas?

¹⁴ Ua li cas Mauxe thiaj fav xeeb rau Yehauvas? Ntawv Nkauj 106:32, 33 hais tias: “Lawv ua rau Vajtswv chim ntawm dej Melinpa, mas qhov uas lawv ua li ntawd puas tsuas Mauxe, vim yog lawv ua rau Mauxe nyuaj siab nws thiaj li ua ncauj sai lawm.” Txawm cov Yixayee fav xeeb rau Yehauvas los, Mauxe yog tus uas nyuaj siab thiab npau taws rau lawv. Nws tsis tswj nws tus kheej, nws thiaj ua tau ncauj sai thiab ua txhaum rau Yehauvas.

¹⁵ Mauxe tsis ntsia ntsoov tos Yehauvas, nws thiaj cia tej uas lwm tus ua, ua rau nws ntxhov siab. Thawj zaug cov Yixayee yws Mauxe, Mauxe ntsia ntsoov tos Yehauvas thiab ua raws nraim li Yehauvas hais. (Khiav Dim 7:6) Tiamsis tej zaum ntev mus ntev tuaj cov Yixayee pheej yws thiab pheej ntxeev siab rau Yehauvas, thiaj ua rau Mauxe qaug zog. Tej zaum Mauxe tsuas pom nws tej kev nyuaj siab lawm xwb, nws thiaj tsis nco qab qhuas Yehauvas lawm.

16. Vim li cas peb yuav tsum nco ntsoov qhov Mauxe ua yuam kev?

¹⁶ Mauxe yog ib tug cev Vajtswv lus thiab muaj kev ntseeg heev, tiamsis nws cia lwm tus ua rau nws nyuaj siab, nws thiaj tsis nco qab ntsia ntsoov tos Yehauvas lawm. Lub sijhawm ntawd Mauxe twb mus txog ntua ntawm ciam teb tshuav hla mus rau lub tebchaws uas Vajtswv cog tseg lawm xwb.  Nimno los, peb twb mus yuav txog lub qab ntuj tshiab, peb yuav tau ceev faj. (2 Petus 3:13) Peb yeej tsis xav plam tej koob hmoov uas peb yuav tau. Yog li ntawd, peb yuav tsum ntsia ntsoov tos Yehauvas thiab mloog nws txhua lo lus. (1 Yauhas 2:17) Qhov uas Mauxe ua yuam kev qhia li cas rau peb?

17. Thaum lwm tus ua rau peb chim, peb yuav tsum ua li cas?

¹⁷ Cia li tswj koj tus kheej tsis txhob npau taws. Yog peb pheej ntsib cov teeb meem qub tas zog, tej zaum yuav ua rau peb qaug zog heev. Tiamsis phau Vajlugkub hais tias: “Peb tsis txhob qaug zog qhov uas ua zoo, rau qhov yog peb tsis tsaug leeg peb yuav tau sau raws li lub sijhawm.” (Kalatia 6:9; 2 Thexalaunika 3:13) Yog ib yam dabtsi lossis ib tug twg pheej ua rau peb meem txom tas zog, peb puas tswj peb tus nplaig? Peb puas rub peb lub siab kom ntev? (Paj Lug 10:19; 17:27; Mathai 5:22) Thaum lwm tus ua rau peb chim, peb yuav tsum ua li cas? Peb yuav tsum “muab qhov no tso rau Vajtswv txojkev npau taws.” (Nyeem Loos 12:17-21.) Cov lus no txhais li cas? Txhais tias peb yuav tsum tsis txhob npau taws, tiamsis peb yuav tsum ua siab ntev tos Yehauvas. Cia nws mam ua tus daws peb qhov teeb meem raws li nws lub caij lub  nyoog. Yog peb ua pauj luag raws li peb txojkev npau taws es tsis tos Yehauvas ces qhia tias peb ua saib tsis taus Nws.

18. Peb yuav tsum nco ntsoov li cas txog tej uas Yehauvas qhia rau peb?

¹⁸ Cia li mloog tej lus qhia tshiab. Thaum Yehauvas qhia tej yam tshiab rau peb, peb puas mloog los peb ua raws li peb ib txwm ua xwb? Peb yuav tsum maj nroos mloog thaum Yehauvas lub koom haum qhia tej yam tshiab rau peb. (Henplais 13:17) Tsis tas li ntawd xwb, peb yuav tsum nco ntsoov “tsis txhob ua dhau tej uas muab sau cia lawd.” (1 Khaulee 4:6) Thaum peb ua tib zoo mloog Yehauvas tej lus qhia txhua lo ces qhia tias peb ntsia ntsoov tos Yehauvas.

19. Yuav ua li cas peb thiaj tsis cia lwm tus rhuav tau peb txojkev sib raug zoo nrog Yehauvas?

¹⁹ Txhob cia lwm tus qhov txhaum rhuav koj txojkev sib raug zoo nrog Yehauvas. Yog peb ntsia ntsoov tos Yehauvas ces txawm lwm tus ua yuam kev los peb yuav tsis npau taws rau lawv thiab yuav tsis cia qhov ntawd rhuav tau peb txojkev sib raug zoo nrog Yehauvas. Yog peb tuav haujlwm hauv Yehauvas lub koom haum li Mauxe, peb yuav tau yimhuab tswj peb tus kheej. Rau qhov txawm nyias yuav tau ua nyias lub neej kom ‘phim txojkev dim’ los, Yehauvas xav kom cov uas tuav haujlwm tso ib tug qauv zoo rau lwm tus xyaum. (Luka 12:48; Filipi 2:12) Txawm li cas los xij, yog peb hlub Yehauvas tiag tiag, peb yeej yuav tsis cia ib yam dabtsi dawm tau peb lossis cais tau peb ntawm Vajtswv txojkev hlub.​—Ntawv Nkauj 119:165; Loos 8:37-39.

20. Peb yuav tsum ua li cas xwb?

²⁰ Peb nyob rau lub caij muaj kev nyuaj siab ntxhov plawv. Yog li ntawd, peb yuav tsum ntsia ntsoov Yehauvas tus “uas nyob lub zwm txwv saum ntuj,” seb nws xav kom peb coj li cas. Tsis txhob cia tej uas lwm tus ua yuam kev rhuav tau peb txojkev sib raug zoo nrog Yehauvas. Cia peb ua tib zoo xav txog tej uas los raug Mauxe es txhob cia tej uas lwm tus ua yuam kev ua rau peb npau taws. Cia peb ntsia ntsoov tos Yehauvas uas yog “peb tus Vajtswv . . . txog thaum nws khuvleej peb.”​—Ntawv Nkauj 123:1, 2.