1. Koj puas ris Yehauvas txiaj ntsig rau qhov uas nws cia peb nrog tau nws sib txuas lus?

 PEB tau txais ib qho koob hmoov zoo kawg li. Tus Tswv Tsim cia peb nrog nws sib txuas lus. Peb qhia tau tej uas nyob puag hauv peb nruab siab rau Yehauvas txhua lub sij hawm thiab tsis hais peb yuav hais yam lus twg. Txawm peb pw tom tsev kho mob los sis nyob hauv tsev loj cuj los peb cia siab tias peb Leej Txiv yuav hnov peb tej lus thov. Peb nco Yehauvas txiaj ntsig rau qhov koob hmoov no.

2. Vaj Ntxwv Daviv saib txoj kev thov Vajtswv rau nqi li cas?

² Vaj Ntxwv Daviv saib txoj kev thov Vajtswv rau nqi heev. Nws hu nkauj rau Yehauvas tias: “Thov txais kuv tej lus thov ua cov tshuaj tsw qab rau koj.” (Phau Ntawv Nkauj 141:1, 2) Nyob rau Daviv lub caij, cov tshuaj tsw qab uas cov pov thawj siv los hlawv rau Yehauvas mas yuav tau ua tib zoo tov. (Khiav Dim 30:34, 35) Ib yam li ntawd, ua ntej Daviv thov Vajtswv, nws yeej ua tib zoo xav seb nws yuav hais li cas. Peb yuav tau ua ib yam li Daviv thiab rau qhov peb yeej xav kom peb cov lus thov haum Yehauvas siab.

3. Thaum peb thov Vajtswv, peb yuav tau ua li cas, thiab yog vim li cas?

³ Thaum peb thov Vajtswv, peb yuav tau ua tib zoo xaiv peb cov lus es hais tej lus saib taus Yehauvas. Cia peb xav txog cov yog toog uas Yaxayas, Exekees, Daniyees, thiab Yauhas lawv pom. Lawv nyias pom nyias ib zaj yog toog tiam sis lawv sawv daws kuj pom Yehauvas zoo li tus Vaj Ntxwv uas muaj hwj chim ci ntsa iab. Yaxayas pom Yehauvas “zaum saum nws lub zwmtxwv uas nyob siab heev.” (Yaxayas 6:1-3) Exekees pom  Yehauvas zaum saum nws lub tsheb nees thiab muaj ib yam “cig lam lug . . . zoo li tus duab zaj” nyob puag ncig. (Exekees 1:26-28) Daniyees pom “tus uas muaj sia nyob ibtxhis” hnav ib ce ris tsho dawb paug thiab muaj nplaim taws cig laim lias ntawm nws lub zwm txwv tuaj. (Daniyees 7:9, 10) Thiab Yauhas pom Yehauvas zaum saum nws lub zwm txwv uas muaj tus duab zaj zoo li tej qe zeb ntsuab nyob puag ncig. (Tshwmsim 4:2-4) Thaum peb muab tej no los ua tib zoo xav, peb pom tias Yehauvas muaj hwj chim npaum li cas. Qhov no yuav pab peb nco Yehauvas txiaj ntsig rau qhov uas nws cia peb los thov nws. Peb yuav thov txog tej twg?

4. Yexus cov lus hauv Mathais 6:9, 10 pab tau peb li cas?

⁴ Nyeem Mathais 6:9, 10. Hauv Yexus zaj lus qhia saum roob, nws qhia kom nws cov thwj tim paub thov Vajtswv raws li Vajtswv lub siab nyiam. Tom qab Yexus hais tias “nej yuav tsum thov Vajtswv li no,” nws qhia nws cov thwj tim thov kom sawv daws hwm Yehauvas lub npe, thov kom Yehauvas los kav los muab cov tawm tsam nws rhuav tshem, thiab thov kom Yehauvas foom koob hmoov rau lub ntiaj teb thiab tib neeg. Thaum peb thov txog tej no ces qhia tias peb xav kom muaj raws li Yehauvas siab nyiam tib yam nkaus.

5. Puas tsim nyog peb thov Vajtswv txog tej yam nyob hauv peb lub neej?

⁵ Yexus kuj qhia nws cov thwj tim thov Vajtswv txog tej yam uas nyob hauv lawv lub neej thiab. Peb thov tau Yehauvas pub kom peb muaj txaus noj ib hnub dhau hnub, kom nws zam peb lub txim, kom tsis txhob cia peb qaug rau tej kev sim siab, thiab kom cawm peb dim ntawm Xatas txhais tes. (Mathais 6:11-13) Thaum peb thov Yehauvas txog tej no ces peb qhia tias peb xav kom Yehauvas pab peb thiab xav ua raws li nws pom zoo.

6. Piav seb puas yog peb thov Vajtswv txog tej uas Yexus qhia xwb.

⁶ Yexus tsis xav kom nws cov thwj tim thov Vajtswv raws nraim li tej nws qhia. Muaj ntau zaus thaum Yexus thov Vajtswv, nws kuj thov txog lwm yam uas nws txhawj txog nyob rau lub sij hawm ntawd thiab. (Mathais 26:39, 42;  Yauhas 17:1-26) Ib yam li ntawd, peb kuj thov tau Vajtswv txog txhua yam uas peb txhawj txog thiab. Thaum peb yuav tau txiav txim siab ua ib yam dab tsi, peb kuj thov kom Yehauvas muab tswv yim thiab kev thoob tsib to nrog rau peb. (Phau Ntawv Nkauj 119:33, 34) Thaum peb yuav ua ib tes hauj lwm nyuaj heev rau Yehauvas, zoo rau peb thov kom nws muab laj lim tswv yim thiab kev to taub rau peb. (Pajlug 2:6) Zoo rau cov niam txiv thov Vajtswv pab cov me nyuam, cov me nyuam thov Vajtswv pab cov niam txiv, thiab peb txhua tus thov Vajtswv pab cov peb qhia Vajlugkub rau thiab cov peb tshaj tawm rau. Tiam sis tsis yog peb yuav tas zog thov kom Yehauvas pab peb xwb.

7. Thaum peb thov Vajtswv, vim li cas zoo rau peb qhuas nws?

⁷ Thaum peb thov Vajtswv, peb yuav tsum nco ntsoov qhuas Yehauvas. Tsis muaj leej twg uas tsim nyog peb qhuas tshaj peb tus Vajtswv Yehauvas. Nws yog tus uas “ua zoo rau peb thiab zam peb lub txim.” Nws kuj “yog tus uas muaj kev hlub thiab yog tus Vajtswv uas muaj kev hlub tshua . . . ibtxwm muaj lub siab ntev, siab zoo thiab ua ncaj ncees.” (Phau Ntawv Nkauj 86:5, 15) Vim li no, yeej tsim nyog peb qhuas Yehauvas thiab tej uas nws ua.

8. Thaum peb thov Vajtswv, zoo rau peb ua nws tsaug rau tej twg? (Phau Ntawv Nkauj 104:12-15, 24)

⁸ Tsis tas li ntawd xwb thaum peb thov Vajtswv, peb kuj ua Yehauvas tsaug rau txhua yam zoo uas nws tau tsim. Zoo rau peb ua nws tsaug rau tej paj hmab paj ntoos uas tawg zoo nkauj heev, tej zaub tej mov uas qab heev, thiab tej phooj tej ywg uas zoo heev. Peb Leej Txiv Yehauvas muab tag nrho tej no rau peb vim nws xav kom peb muaj kev zoo siab xwb. (Nyeem Phau Ntawv Nkauj 104:12-15, 24.) Tsis tas li ntawd xwb, haj yam tseem ceeb rau peb ua Yehauvas tsaug rau tej nws siv los pab kom peb txoj kev ntseeg nyob ruaj nreeg thiab rau txoj kev vam kev cia siab uas peb muaj rau yav tom ntej.

9. Yuav ua li cas koj thiaj nco ntsoov ua Yehauvas tsaug? (1 Thexalaunikes 5:17, 18)

⁹ Tej thaud thaum peb thov Vajtswv, yeej muaj ntau zaus peb tsis nco qab ua Yehauvas tsaug rau tej nws tau ua rau peb. Yuav ua li  cas koj thiaj nco ntsoov? Zoo rau koj muab tej uas koj tau thov Yehauvas cim tseg es seb tom qab ntawd Yehauvas tau pab koj li cas. Ces tom qab ntawd, ua Yehauvas tsaug uas nws tau pab koj. (Nyeem 1 Thexalaunikes 5:17, 18.) Thaum lwm tus ua peb tsaug rau tej peb tau ua, yeej ua rau peb zoo siab heev. Ib yam li ntawd, thaum peb nco ntsoov ua Yehauvas tsaug rau tej uas nws tau ua pab peb, yeej ua rau nws zoo siab thiab. (Kaulauxais 3:15) Tseem ceeb rau peb ua Yehauvas tsaug rau tej twg thiab?

10. Raws li 1 Petus 2:21, vim li cas ho zoo rau peb ua Yehauvas tsaug uas nws tau txib Yexus los hauv ntiaj teb?

¹⁰ Nyeem 1 Petus 2:21. Peb yuav tsum ua Yehauvas tsaug uas nws tau txib nws Leej Tub los qhia peb. Thaum peb kawm txog Yexus lub neej, peb kawm tau ntau yam txog Yehauvas. Twb yog vim li no, peb thiaj paub ua haum Yehauvas siab. Yog peb muaj kev ntseeg rau Khetos tus nqe txhiv ces peb yuav muaj ib txoj kev sib raug zoo nrog Vajtswv Yehauvas.​—Loos 5:1.

11. Ua li cas peb thiaj tuav Yexus lub npe thov Vajtswv?

¹¹ Peb ua Yehauvas tsaug tias twb yog muaj nws tus Tub, peb thiaj mus cuag tau nws. Yog peb tuav Yexus lub npe thov Yehauvas ces nws yuav hnov peb thiab ua raws li peb thov. Yexus hais tias: “Yog nej tuav kuv lub npe thov ib yam dabtsi kuv yuav pub yam ntawd rau nej, tej uas Leej Tub ua ntawd yuav ua rau Leej Txiv tau ntsejmuag.”​—Yauhas 14:13, 14.

12. Vim li cas tsim nyog peb ua Yehauvas tsaug rau nws tus Tub?

¹² Yehauvas zam tau peb tej kev txhaum vim muaj Yexus tus nqi txhiv. Vajtswv Txoj Lus qhia tias Yexus yog peb tus “Povthawj Hlob” thiab “nws zaum ntawm tus uas muaj hwjchim loj kawg nkaus lub zwmtxwv sab xis saum ntuj ceebtsheej.” (Henplais 8:1) Yexus yog tus uas “thov Leej Txiv pab peb.” (1 Yauhas 2:1) Peb ua Yehauvas tsaug uas nws muab ib tug Pov Thawj Hlob uas hlub peb, to taub peb, thiab “thov Vajtswv pab peb.” (Loos 8:34; Henplais 4:15) Peb yog noob txaug neeg txhaum ces peb yeej mus cuag tsis tau Yehauvas yog tsis muaj Yexus tus nqi txhiv. Tsim nyog peb nco Yehauvas txiaj ntsig rau tus nqi txhiv ntawd mus li.

13. Hmo ua ntej Yexus tuag, nws tau ua li cas los qhia tias nws hlub nws cov thwj tim heev?

¹³ Hmo ua ntej Yexus tuag, nws thov Vajtswv pab nws cov thwj tim ntev heev. Nws thov tias: “Tsomkwm lawv kom lawv tsis txhob raug dab Ntxwgnyoog dag ntxias.” (Yauhas 17:15) Yexus hlub nws cov thwj tim kawg li. Yexus twb yuav raug kev sim siab hnyav heev los nws tseem txhawj txog nws cov tub txib thiab.

14. Peb qhia tau li cas tias peb hlub peb cov kwv tij nkauj muam?

¹⁴ Cia peb xyaum Yexus es tsis txhob xav txog peb tus kheej xwb. Zoo rau peb thov Vajtswv pab peb cov kwv tij nkauj muam tsis tseg. Thaum peb thov Vajtswv pab lawv ces twb yog peb ua raws li Yexus tau sam hwm kom ib leeg hlub ib leeg thiab kuj qhia rau Yehauvas tias peb hlub peb cov kwv tij nkauj muam npaum li cas. (Yauhas 13:34) Thaum peb thov Vajtswv pab peb cov kwv tij nkauj muam yeej tsis nkim peb lub sij hawm ib zaug li rau qhov Vajtswv Txoj Lus qhia rau peb tias “tej lus uas tus neeg ncaj ncees thov Vajtswv, tej lus ntawd muaj hwjchim heev.”​—Yakaunpaus 5:16.

15. Vim li cas peb cov kwv tij nkauj muam ho cheem tsum peb thov Vajtswv pab lawv?

 ¹⁵ Peb cov kwj tij nkauj muam cheem tsum peb thov Vajtswv pab lawv rau qhov lawv yeej ntsib ntau yam kev sim siab. Peb thov tau Vajtswv pab lawv thev xwm txheej, kev mob kev nkeeg, kev tsov kev rog, kev tsim txom, thiab lwm yam kev nyuaj siab ntxhov plawv. Peb kuj thov Vajtswv pab peb cov kwv tij nkauj muam uas siv lawv lub sij hawm, lub dag lub zog mus pab cov ntseeg uas raug kev txom nyem. Tej zaum koj kuj paub cov uas tab tom raug kev txom nyem. Thaum koj thov Vajtswv pab lawv, koj kuj tuav lawv cov npe thov. Peb qhia tias peb hlub peb cov kwv tij nkauj muam thaum peb thov Vajtswv Yehauvas pab lawv thev lawv tej kev txom nyem.

16. Vim li cas peb yuav tsum thov Vajtswv pab cov uas saib xyuas peb?

¹⁶ Cov uas saib xyuas lub koom txoos yeej nco txiaj ntsig heev thaum lwm tus thov Vajtswv pab lawv. Tus tub txib Paulus sau tias: “Nej thov Vajtswv pab kuv, kom thaum kuv qhia Vajtswv txojlus, kuv muaj lub siab tawv qhia Txojmoo Zoo lub ntsiab lus rau sawvdaws paub.” (Efexus 6:19) Niaj hnub no peb kuj muaj coob tus kwv tij siv zog ua hauj lwm saib xyuas peb. Yog peb thov Vajtswv Yehauvas foom koob hmoov rau lawv tes hauj lwm ces twb yog peb hlub lawv.

17-18. Thaum twg peb sawv lwm tus cev thov Vajtswv thiab zoo rau peb nco ntsoov li cas?

¹⁷ Tej thaud, peb kuj sawv cev thov Vajtswv rau lwm tus. Zoo li thaum koj nrog ib tug mus qhia Vajlugkub rau nws tus kawm. Tej zaum koj yuav tsis paub tus kawm zoo ces yuav zoo rau koj ua tus thov Vajtswv thaum nej kawm tas xwv koj thiaj paub yuav thov Vajtswv pab tus kawm li cas.

¹⁸ Thaum mus kev sib txoos los sis thaum mus sib txoos ua ntej mus qhia Vajlugkub es koj yog tus thov Vajtswv, zoo rau koj nco ntsoov lub ntsiab tuaj sib txoos. Tsis txhob siv lub sij hawm thov Vajtswv los qhuab ntuas lwm tus los sis los tshaj tawm txog tej ub tej no. Feem ntau thaum mus sib txoos, yeej tseg tsib feeb los hu nkauj thiab thov Vajtswv. Yog li ntawd, tus kwv tij uas thov Vajtswv yuav tsum tsis txhob “thov ntev thov ntau,”  xws li thaum thov pib kev sib txoos.​—Mathais 6:7.

19. Dab tsi yuav pab tau peb npaj rau hnub Yehauvas txiav txim?

¹⁹ Yehauvas hnub txiav txim twb los ze lawm. Zoo rau peb haj yam kub siab thov Vajtswv tsis tseg. Yexus hais tias: “Nej yuav tsum ceevfaj thiab zov tos, niaj hnub thov Vajtswv pab kom nej nyiaj taus txhua yam uas yuav muaj los.” (Lukas 21:36) Peb yuav tau thov Vajtswv tsis tseg xwv peb txoj kev ntseeg thiaj yuav ruaj khov thaum Vajtswv hnub txiav txim los txog.

20. Yuav ua li cas peb cov lus thov thiaj tsw qab yam li cov tshuaj tsw qab?

²⁰ Peb tau kawm li cas? Peb yuav tsum saib txoj kev thov Vajtswv rau nqi. Zoo rau peb thov kom muaj tiav raws li Vajtswv lub ntsiab. Thaum peb thov Vajtswv, nco ntsoov ua nws tsaug rau nws Leej Tub thiab nws txoj kev kav. Peb thov Vajtswv pab peb cov kwv tij nkauj muam uas teev tiam Yehauvas. Peb thov Vajtswv pab kom peb muaj txaus noj txaus hnav thiab kom peb txoj kev ntseeg nyob ruaj nreeg. Thaum peb thov Vajtswv, ua tib zoo xaiv peb tej lus. Yog peb ua li no ces qhia tias peb saib txoj kev thov Vajtswv rau nqi. Ces peb cov lus yuav tsw qab yam li cov tshuaj tsw qab uas ua rau Yehauvas “txaus siab” heev.​—Pajlug 15:8.