1. Niaj hnub nim no Yehauvas xav kom peb ua dab tsi?

 NIAJ hnub nim no, Vajtswv xav kom muab txoj xov zoo txog Vajtswv txoj kev kav tshaj tawm thoob plaws ntiaj teb. (Malakaus 13:10; 1 Timautes 2:3, 4) Tes hauj lwm tshaj tawm txoj xov zoo yog Yehauvas tes. Yog li ntawd, nws thiaj muab tso rau nws Leej Tub saib xyuas. Peb yeej tso siab tias yog Yexus ua tus saib xyuas ces tes hauj lwm tshaj tawm txoj xov zoo yeej yuav tiav raws li Yehauvas siab nyiam ua ntej lub sim ceeb no kawg.​—Mathais 24:14.

2. Nyob hauv zaj no, peb yuav kawm txog dab tsi?

² Nyob rau hauv zaj no, peb yuav kawm seb Yexus siv “tus qhev ncaj thiab ntse” los cev Vajtswv Txoj Lus thiab los npaj Yexus cov thwj tim ua tes hauj lwm uas tseem ceeb tshaj plaws niaj hnub nim no li cas. (Mathais 24:45) Peb kuj yuav kawm seb peb yuav txhawb nqa Yexus thiab tus qhev ncaj thiab ntse li cas.

3. Vajtswv tau muab lub hwj chim twg rau Yexus?

³ Yexus yog tus uas saib xyuas tes hauj lwm tshaj tawm txoj xov zoo. Ua cas peb thiaj paub li no? Ua ntej Yexus mus saum ntuj, nws tau mus ntsib nws cov thwj tim ib txhia saum ib lub roob hauv cheeb tsam Kalilais. Nws hais rau lawv tias: “Vajtswv twb pub hwj chim rau kuv saib xyuas ib puas tsav yam saum ntuj thiab hauv ntiaj teb no lawm.” Nws hais ntxiv tias: “Cia li mus coj txhua haiv neeg los ua kuv cov thwj tim.” (Mathais 28:18, 19) Yog li ntawd, Vajtswv twb muab tes hauj lwm tshaj tawm txoj xov zoo cob rau Yexus saib xyuas lawm.

4. Ua li cas peb thiaj li paub tseeb tias Yexus tseem yog tus saib xyuas tes hauj lwm tshaj tawm txoj xov zoo?

 ⁴ Yexus tau hais rau nws cov thwj tim kom mus tshaj tawm txoj xov zoo rau “txhua haiv neeg” es coj lawv los ua nws cov thwj tim thiab nws kuj hais rau lawv tias: “Kuv yuav nrog nraim nej mus txog thaum lub sim ceeb no kawg.” (Mathais 28:20) Yexus cov lus no qhia rau peb tias nws yuav ua tus saib xyuas tes hauj lwm tshaj tawm txoj xov zoo kom los txog niaj hnub nim no.

5. Peb ua tau raws li Phau Ntawv Nkauj 110:3 li cas?

⁵ Yexus yeej tsis txhawj tias tsam tsis muaj neeg txaus los tshaj tawm txoj xov zoo rau thaum lub sim ceeb no yuav kawg. Yexus paub tias yuav tsum muaj raws li cov lus faj lem uas tus sau nkauj tau hais no: “Hnub uas koj tawmtsam koj cov yeebncuab koj haivneeg yuav yeem tuaj koj tog.” (Phau Ntawv Nkauj 110:3) Yog koj mus tshaj tawm txoj xov zoo ces twb yog koj txhawb nqa Yexus thiab tus qhev ncaj thiab ntse thiab ua raws li zaj faj lem tau hais tas los no. Tes hauj lwm tshaj tawm txoj xov zoo yeej yuav tiav tiam sis kuj yuav muaj ntau tsav ntau yam teeb meem los cuam tshuam thiab.

6. Ib qho teeb meem uas cov tshaj tawm txoj xov zoo ntsib niaj hnub nim no yog dab tsi?

⁶ Ib yam teeb meem uas cov tshaj tawm txoj xov zoo ntsib yog kev tawm tsam. Cov fav xeeb, cov thawj coj ntawm tej kev ntseeg, thiab tej nom tej tswv tau hais ntau yam tsis zoo txog peb tes hauj lwm. Thaum peb cov txheeb ze, cov peb paub, thiab cov peb nrog ua hauj lwm hnov txog tej lus dag ntawd ces tej zaum lawv yuav txwv kom peb tsis txhob teev tiam Yehauvas thiab tsis txhob mus tshaj tawm txoj xov zoo. Nyob rau tej lub teb chaws, peb cov kwj tij nkauj muam kuj raug hem, raug ntaus, thiab raug kaw hauv tsev loj cuj. Tej no tsis yog ib yam tshiab uas peb raug. Yexus tau hais tias: “Txhua haiv neeg yuav ntxub nej vim nej yog kuv cov thwj tim.” (Mathais 24:9) Qhov uas peb raug ntxub ntxaug qhia tias peb yog Yehauvas cov tib neeg. (Mathais 5:11, 12) Xatas yog tus ua rau tib neeg tawm tsam peb. Tiam sis Yexus muaj hwj chim tshaj Xatas. Yexus yog tus pab peb. Yog li ntawd, txoj xov zoo yeej yuav nrov ncha mus txog txhua haiv neeg. Cia peb mus saib ib qho pov thawj txog qhov no.

7. Koj pom Tshwmsim 14:6, 7 tab tom muaj tiav li cas?

⁷ Ib yam teeb meem ntxiv uas peb muaj thaum peb mus tshaj tawm txoj xov zoo yog thaum peb ntsib cov uas hais lwm yam lus. Nyob rau hauv phau Tshwmsim, Yexus tau hais rau Yauhas tias nyob rau peb lub caij, tib neeg yuav hnov txoj xov zoo ua lawv yam lus. (Nyeem Tshwmsim 14:6, 7.) Yexus hais li ntawd rau qhov niaj hnub no muaj ntau txoj kev rau tib neeg los hnov txoj xov zoo txog Vajtswv txoj kev kav. Niaj hnub no, peb muaj ntaub ntawv Vajlugkub tshaj 1,000 tawm yam lus rau tib neeg nyeem hauv peb lub vej xaij jw.org. Pab Uas Ntaus Thawj tau tso cai txhais phau ntawv Nyob Kaj Siab Lug Mus Ib Txhis ua 700 tawm yam lus. Phau no yog phau uas peb siv los qhia Vajlugkub rau tib neeg. Peb kuj muaj yeeb yaj kiab rau cov tsis hnov lus thiab muaj ntaub ntawv rau cov tsis pom kev los kawm Vajlugkub thiab. Peb pom tias tej no yeej muaj tiav raws li cov faj lem hauv phau Vajlugkub. Tam sim no yeej muaj tib neeg los hauv “txhua lub tebchaws thiab txhua haiv neeg” los kawm qhov tseeb hauv phau Vajlugkub. (Xakhaliyas 8:23; Xefaniyas 3:9) Twb yog muaj Yexus Khetos ua tus saib xyuas thiaj muaj tau li no.

8. Peb txoj kev tshaj tawm mus zoo li cas lawm xwb?

⁸ Niaj hnub no, Yehauvas lub koom haum muaj tshaj li 8,000,000 tus tib neeg nyob hauv  240 lub teb chaws. Ib xyoos twg, muaj qas txhiab qas vam tus tib neeg tau ua kev cai raus dej. Tiam sis qhov tseem ceeb tshaj yog qhov uas lawv tau hloov los ua tus “neeg tshiab.” (Kaulauxais 3:8-10) Coob tus kuj tseg tsis ua phem ua qias, tsis ua nruj ua tsiv, tsis xaiv ntsej xaiv muag, thiab tsis khav txog lawv haiv neeg lawv lub teb lub chaw. Yeej muaj tiav raws li zaj lus faj lem hauv Yaxayas 2:4 uas hais tias “lawv yuav tsis kawm txujci ua tsov ua rog dua li lawm.” Thaum tib neeg pom peb tus yam ntxwv zoo ces yuav pab tau lawv los teev tiam Yehauvas thiab. Yog peb ua li no ces twb yog peb ua raws li Yexus Khetos hais. (Yauhas 13:35; 1 Petus 2:12) Ua cas peb thiaj ua tau li no? Rau qhov peb muaj Yexus pab peb.

9. Raws li Mathais 24:45-47, Yexus tau hais tias nyob rau lub sij hawm kawg yuav muaj li cas?

⁹ Nyeem Mathais 24:45-47. Yexus tau hais tias nyob rau lub sij hawm kawg, nws yuav tsa ib tug “qhev ncaj thiab ntse” los muab Vajtswv Txoj Lus qhia rau Yehauvas cov tib neeg. Niaj hnub no tus qhev ntawd yeej rau siab ntso ua nws tes hauj lwm. Yexus tau tsa cov xaiv tseg ib txhia los ua cov muab Vajtswv Txoj Lus qhia rau Yehauvas cov tib neeg kom “raws caij raws nyoog.” Lawv tsis muab lawv tus kheej saib loj dua lwm tus. (2 Kauleethaus 1:24) Lawv paub tias Yexus Khetos yog tus “thawjcoj thiab kav” Yehauvas cov tib neeg.​—Yaxayas 55:4.

10. Nyob hauv daim duab, phau twg yog phau uas pab tau koj los teev tiam Yehauvas?

¹⁰ Txij xyoo 1919 los, tus qhev ncaj thiab ntse tau npaj ntau yam ntaub ntawv los pab tib neeg kawm qhov tseeb hauv phau Vajlugkub. Nyob rau xyoo 1921, tus qhev ncaj thiab ntse tau npaj phau ntawv The Harp of God los pab tib neeg kawm Vajlugkub. Tom qab no, tus qhev ncaj thiab ntse kuj tau npaj ntau phau  ntxiv. Phau twg yog phau uas koj kawm es koj thiaj los paub Yehauvas? Puas yog phau “Let God Be True,” The Truth That Leads to Eternal Life, You Can Live Forever in Paradise on Earth, Knowledge That Leads to Everlasting Life, Phau Vajlugkub Qhia Txog Dabtsi Tiag?, los sis phau Nyob Kaj Siab Lug Mus Ib Txhis uas yog phau siv tam sim no? Tag nrho cov ntawv no puav leej yog sau los pab peb coj tib neeg los ua Yexus cov thwj tim. Cov ntawv no npaj tau raws caij raws nyoog kawg li.

11. Ua li cas ho tseem ceeb rau peb rau siab ntso kawm txog Yehauvas thiab phau Vajlugkub?

¹¹ Cov uas nyuam qhuav kawm Vajlugkub yeej xav paub Yehauvas thiab phau Vajlugkub kom zoo ntxiv. Peb sawv daws los yuav tau paub Yehauvas thiab phau Vajlugkub kom zoo ntxiv thiab. Tus tub txib Paulus thiaj sau tias: “Tej zaub mov tsuas yog cov laus thiaj noj taus xwb.” Paulus hais ntxiv tias yog peb muab tej peb kawm hauv phau Vajlugkub coj los siv ces peb yuav “paub hais tias yam twg phem yam twg zoo.” (Henplais 5:14) Nyob rau lub caij nyuaj siab ntxhov plawv no, yeej tsis yooj yim rau peb coj raws li Yehauvas tej kev cai vim muaj cov neeg ua phem ua qias nyob ib ncig peb. Txawm li ntawd los, Yexus yeej npaj txhua yam los pab kom peb txoj kev ntseeg ruaj khov. Yam uas pab tau peb tshaj yog kawm Vajtswv Txoj Lus, phau Vajlugkub. Yexus yog tus saib xyuas kom tus qhev ncaj thiab ntse npaj tau tej ntaub ntawv Vajlugkub rau peb kawm.

12. Peb saib Vajtswv lub npe muaj nqis ib yam li Yexus li cas?

¹² Peb kuj saib Vajtswv lub npe muaj nqis ib yam li Yexus. (Yauhas 17:6, 26) Xyoo 1931, peb thiaj pib siv lub npe Yehauvas Cov Tim Khawv li tau hais hauv phau Vajlugkub. Thaum peb siv lub npe no ces sawv daws yuav pom tias Vajtswv lub npe muaj nqis npaum li cas rau peb. (Yaxayas 43:10-12) Txij lub 10 Hli  xyoo 1931 los, peb thiaj muab Vajtswv lub npe tso rau ntawm Phau Tsom Faj sab khauj khaum. Tsis tas li ntawd xwb, hauv phau Vajlugkub Vajtswv Txoj Lus Rau Cov Nyob Lub Qab Ntuj Tshiab, peb rov muab Vajtswv lub npe tso rau hauv txhua nqe uas thaud muaj Vajtswv lub npe. Qhov no qhia hais tias peb zoo tsis thooj li cov uas lam lees tias lawv ntseeg Vajtswv tiam sis ho muab Vajtswv lub npe Yehauvas tshem tawm hauv phau Vajlugkub lawm.

13. Vim li cas koj thiaj ntseeg tias “tus qhev ncaj thiab ntse” yog tus Yexus siv niaj hnub nim no? (Yauhas 6:68)

¹³ Yexus siv “tus qhev ncaj thiab ntse” los tsa Yehauvas lub koom haum feem hauv ntiaj teb los txhawb nqa Yehauvas txoj kev pe hawm. Koj xav li cas txog lub koom haum ntawd xwb? Tej zaum koj yuav xav ib yam li tus tub txib Petus. Petus hais rau Yexus tias: “Yog peb tso koj tseg, peb yuav mus cuag leejtwg? Tsuas yog koj tib leeg tej lus xwb, thiaj pub tau txojsia ibtxhis rau neeg.” (Yauhas 6:68) Yog peb tsis los paub Yehauvas lub koom haum, niaj hnub nim no peb lub neej zoo li cas lawm xwb? Khetos siv Yehauvas lub koom haum los npaj txhua yam rau peb kom peb txoj kev ntseeg nyob ruaj nreeg. Khetos kuj cob qhia kom peb txawj mus qhia Vajlugkub. Tsis tas li ntawd xwb, nws kuj pab kom peb muaj ‘lub siab tshiab” uas haum Yehauvas siab.​—Efexus 4:24.

14. Yehauvas lub koom haum tau pab koj li cas thaum muaj tus kab mob thoob qab ntuj khaus viv-19?

¹⁴ Yexus nrhiav kev los pab Yehauvas cov tib neeg thaum muaj kev kub ntxhov. Peb pom li no thaum muaj tus kab mob thoob qab ntuj khaus viv-19 (COVID-19). Thaum muaj tus kab mob no, coob tus tsis paub yuav ua zaj twg. Tiam sis rau peb, Yexus siv Yehauvas  lub koom haum los qhia kom peb paub tiv thaiv peb tus kheej. Lub koom haum txhawb kom peb npog qhov ncauj qhov ntswg thiab nyob deb lwm tus thaum mus ub mus no. Lub koom haum kuj hais kom cov txwj laus nco ntsoov nug cov uas nyob hauv lub koom txoos moo kom lawv paub tiv thaiv lawv tus kheej thiab nyob ze Yehauvas. (Yaxayas 32:1, 2) Lub koom haum kuj siv Pab Uas Ntaus Thawj tej xov xwm los qhia thiab los txhawb peb sawv daws.

15. Thaum muaj tus kab mob thoob ntiaj teb, lub koom haum kom peb mus sib txoos thiab mus qhia Vajlugkub li cas, thiab qhov no mus zoo li cas?

¹⁵ Thaum muaj tus kab mob thoob qab ntuj, lub koom haum kuj qhia seb peb yuav mus sib txoos thiab yuav mus tshaj tawm txoj xov zoo li cas. Tib pliag xwb, peb txawm pib mus kev sib txoos thiab rooj sib txoos hauv Is Taws Nej. Peb kuj pib sau ntawv thiab hu xov tooj mus qhia Vajlugkub lawm xwb. Yehauvas foom koob hmoov rau peb kawg li. Nyob rau hauv ntau ceg kuj muaj ntau tus tshaj tawm ntxiv. Coob tus kuj tau ntsib ntau yam zoo thaum lawv qhia Vajlugkub.​—Saib lub ntsiab “ Yehauvas Foom Koob Hmoov Rau Peb Tes Hauj Lwm Tshaj Tawm.”

16. Peb yeej paub tseeb li cas?

¹⁶ Tej zaum ib txhia xav tias lub koom haum muab txhawj dhau lawm txog tus kab mob thoob ntiaj teb. Tiam sis ntev mus, peb pom tias yeej muaj tseeb raws li lub koom haum hais tiag. (Mathais 11:19) Yexus yeej saib xyuas Yehauvas cov tib neeg zoo kawg li. Cia peb nco ntsoov txog qhov no. Txawm yav tom ntej yuav zoo li cas los, peb yeej paub tseeb tias Yehauvas thiab nws Leej Tub yuav tsis tso peb tseg.​—Nyeem Henplais 13:5, 6.

17. Koj puas zoo siab tias Yexus yog tus saib xyuas peb?

¹⁷ Peb zoo siab tias Yexus yog tus saib xyuas peb. Peb kuj zoo siab tias peb nyob rau ib lub koom haum uas tsis xaiv ntsej xaiv muag, txawm peb coj tej kab ke twg, yog haiv neeg twg, thiab hais yam lus twg. Peb muaj kev kawm Vajlugkub thiab muaj kev cob qhia zoo heev kom peb txawj mus tshaj tawm txoj xov zoo. Yehauvas qhia kom peb muaj lub siab tshiab thiab kom peb txawj sib hlub. Yeej tsim nyog peb zoo siab rau qhov Yexus yog tus saib xyuas peb.