1. Thaum koj pib kawm Vajlugkub, koj kawm tau dab tsi?

 KOJ puas nco qab thaum koj nyuam qhuav pib kawm Vajlugkub? Ntshe koj xav tsis thoob li thaum koj paub tias Vajtswv muaj ib lub npe. Tej zaum raug koj siab heev thaum koj paub tias Vajtswv tsis muab neeg tsim txom rau hauv ntuj tawg, thiab koj zoo siab tshaj plaws uas tau paub tias koj yuav rov pom cov neeg uas koj hlub sawv rov qab los muaj sia dua nyob rau hauv lub vaj kaj siab.

2. Dua li tej koj kawm hauv phau Vajlugkub, koj tau ua dab tsi ntxiv? (Efexus 5:1, 2)

² Thaum koj yim kawm Vajtswv Txoj Lus, koj txoj kev hlub rau Yehauvas yim tob. Txoj kev hlub no ua rau koj muab tej uas koj kawm tau siv rau hauv koj lub neej. Koj txawj muab tej hauv paus ntsiab lus hauv phau Vajlugkub coj los pab koj txiav txim siab ua ub ua no. Koj kuj coj cwj pwm zoo thiab ua yam zoo rau qhov koj xav ua haum Vajtswv siab. Zoo ib yam li tus me nyuam xyaum leej niam leej txiv uas hlub hlub nws, koj kuj xyaum tau koj Leej Txiv tus uas nyob saum ntuj ceeb tsheej tib yam nkaus.​—Nyeem Efexus 5:1, 2.

3. Peb yuav tau nug peb tus kheej li cas?

³ Tej zaum peb yuav tau nug peb tus kheej li no tias: ‘Kuv txoj kev hlub rau Yehauvas puas tob tshaj thaum kuv nyuam qhuav pib los ntseeg? Txij thaum kuv ua kev cai raus dej los, kuv txoj kev hlub puas zoo ib yam li Yehauvas rau cov kwv tij nkauj muam ntseeg?’ Yog “txojkev hlub uas koj muaj thaum chiv thawj” txias lawm ces tsis txhob tag kev cia siab. Cov ntseeg nyob thawj 100 xyoo los kuj ua ib yam li ntawd thiab. Yexus twb tsis tso lawv tseg, yog li ntawd nws yeej yuav tsis tso peb tseg tib yam nkaus. (Tshwmsim 2:4, 7) Nws paub tias peb yeej muaj rab peev xwm ua tau kom peb txoj kev hlub rov qab loj tuaj.

4. Nyob rau hauv zaj kawm no yuav piav txog dab tsi?

 ⁴ Nyob rau hauv zaj kawm no yuav tham seb yuav ua li cas peb txoj kev hlub rau Yehauvas thiab lwm tus thiaj yuav tob zuj zus. Tom qab ntawd peb mam li tham seb peb yuav txais koob hmoov li cas thaum peb hlub Yehauvas thiab cov kwv tij nkauj muam yam li no.

5-6. Thaum Povlauj mus qhia txoj xov zoo nws raug li cas, tiam sis ho muaj dab tsi pab tau nws rau siab ntso teev tiam Yehauvas kam tiag?

⁵ Tus tub txib Povlauj yeej txaus siab ua Yehauvas tes hauj lwm tiam sis yeej tsis yooj yim. Povlauj mus ncig deb heev thiab lub caij uas nws nyob yeej tsis yooj yim mus rau ub rau no. Thaum Povlauj mus ncig ntawd, muaj qee lub sij hawm muaj “dej nyab” thiab nws raug “tubsab ntaus.” Tsis tas li ntawd, nws kuj raug cov neeg uas tawm tsam muab nws ntaus. (2 Kauleethaus 11:23-27) Txawm Povlauj txaus siab hlo pab cov kwv tij ntseeg los lawv twb tsis ris nws txiaj ntsig li.​—2 Kauleethaus 10:10; Filipis 4:15.

⁶ Muaj dab tsi pab tau Povlauj rau siab ntso teev tiam Yehauvas? Ib qho uas pab tau nws yog nyeem Vajtswv Txoj Lus thiab xav txog tej uas nws raug, nws thiaj paub txog Yehauvas tus xeeb ceem. Nws thiaj xam pom tias Yehauvas hlub nws heev. (Loos 8:38, 39; Efexus 2:4, 5) Yog li ntawd, nws thiaj li tig los hlub Yehauvas kawg nkaus li. Povlauj qhia nws txoj kev hlub rau Yehauvas los ntawm qhov uas nws rau siab ntso “pab cov ntseeg.”​—Henplais 6:10.

7. Ib txoj kev uas pab tau kom peb txoj kev hlub rau Yehauvas tob zuj zus ntxiv yog li cas?

⁷ Yog peb kub siab lug kawm Vajtswv Txoj Lus ces peb txoj kev hlub rau Vajtswv yuav tob zus tob zus. Thaum koj nyeem phau Vajlugkub, ua zoo xav txog txhua zaj uas koj nyeem ntawd seb qhia koj li cas txog Yehauvas. Ua zoo tshuaj koj tus kheej li no: ‘Zaj kuv nyeem no qhia tias Yehauvas hlub kuv npaum li cas? Muaj dab tsi hauv zaj kuv nyeem no ua rau kuv hlub Yehauvas?’

8. Kev thov pab tau peb txoj kev hlub rau Vajtswv kom tob zuj zus li cas?

⁸ Muaj dua lwm txoj kev yuav pab tau kom peb txoj kev hlub rau Yehauvas tob zus yog qhib siab lug thov nws tsis tseg tsis tu. (Phau Ntawv Nkauj 25:4, 5) Yehauvas yeej yuav teb peb tej lus thov. (1 Yauhas 3:21, 22) Muaj ib tug muam npe hu ua Kab nyob rau sab Axias hais tias: “Thaum chiv thawj kuv txoj kev hlub rau Yehauvas yog vim kuv kawm txog nws tiam sis kuv txoj kev hlub tob zuj zus rau nws thaum nws teb kuv tej lus thov. Qhov no ua rau kuv xav ua tej ub tej no kom haum nws siab.” b

9. Timautes tsav ntxiv nws txoj kev hlub rau cov kwv tij nkauj muam li cas?

⁹ Tau ob peb xyoos tom qab Povlauj hloov los ua ib tug ntseeg, nws ntsib ib tug tub hluas npe hu ua Timautes. Timautes hlub Yehauvas thiab hlub tib neeg heev. Povlauj qhia rau cov ntseeg hauv Filipis tias: “Tsis muaj leej twg yuav mob siab txog nej li Timautes.” (Filipis 2:20) Povlauj tsis yog qhuas tias Timautes txawj ua ub ua no los sis txawj cev lus qhuab qhia tiam sis Povlauj qhuas txog qhov uas Timautes txawj hlub cov kwv tij nkauj muam. Tej zaum cov koom txoos uas Timautes mus xyuas twb tos tsis hnyu nws tuaj saib lawv.​—1 Kauleethaus 4:17.

10. Anas thiab nws tus txiv nkawd qhia nkawd txoj kev hlub rau cov kwv tij nkauj muam li cas?

¹⁰ Peb yuav tau nrhiav nrhw kev los pab cov  kwv tij nkauj muam ntseeg. (Henplais 13:16) Raws li zaj uas peb twb kawm tag los lawm, cia peb rov mus piav txog Anas thiab nws tus txiv nkawd. Tom qab cua daj cua dub, nws thiab nws tus txiv nkawd mus xyuas ib tse neeg uas ntseeg Yehauvas. Nkawd pom tias lawv lub ru tsev vau lawm. Tsis tas li ntawd los lawv tej khaub ncaws los qias neeg tag. Anas hais tias: “Wb thiaj muab lawv tej khaub ncaws sau coj mus ntxhua thiab muab liv thiab muab tais nqa mus rau lawv. Txawm wb ua tej nyuag qhov no me me xwb los yeej ua rau peb sib raug zoo los txog tav no.” Anas thiab nws tus txiv nkawd txoj kev hlub rau cov kwv tij nkauj muam rub tau nkawd lub siab mus pab lawv.​—1 Yauhas 3:17, 18.

11. (1) Lwm tus xav li cas thaum peb hlub lawv? (2) Raws li Pajlug 19:17, Yehauvas xav li cas thaum peb hlub lwm tus?

¹¹ Thaum peb hlub thiab ua zoo rau lwm tus, lawv yeej pom tias peb xyaum ua raws li Yehauvas. Lawv yeej ris peb tus txiaj tus ntsig kawg nkaus li. Kab yeej nco ntsoov cov uas tuaj pab nws. Nws hais tias: “Kuv ris cov viv ncaus uas coj kuv mus qhia Vajlugkub txiaj ntsig kawg li. Lawv tuaj tos kuv, caw kuv mus noj khoom txom ncauj los sis noj sus, thiab coj kuv rov qab los rau ntawm kuv lub vaj lub tsev. Kuv xam pom tias yeej siv dag siv zog kawg li thiab lawv muaj kev hlub kawg li.” Tsis yog txhua leej txhua tus yuav ris txiaj ntsig rau tej peb ua rau lawv. Kab hais txog cov uas pab nws li no tias: “Kuv yeej xav pauj lawv tus txiaj tus ntsig tiam sis kuv tsis paub tias lawv nyob qhov twg. Tiam sis kuv paub tias Yehauvas yeej paub lawv thiab kuv thov kom nws them lawv tus txiaj ntsig rau kuv.” Kab yeej hais yog lawm. Yehauvas yeej paub txhua yam zoo uas peb tau ua, tsis hais loj thiab me. Nws yeej saib tej peb ua rau nqi heev thiab  nws yuav them rov rau peb.​—Nyeem Pajlug 19:17.

12. Cov kwv tij qhia lawv txoj kev hlub tau li cas rau cov uas nyob hauv lub koom txoos? (Saib cov duab.)

¹² Yog tias koj yog ib tug kwv tij, koj yuav ua li cas koj thiaj qhia tau koj txoj kev hlub rau lwm tus thiab cev tes hlo mus pab lawv? Muaj ib tug kwv tij hluas npe hu ua Txam nug ib tug txwj laus tias nws yuav ua li cas nws thiaj pab tau cov uas nyob hauv lub koom txoos. Tus txwj laus kuj qhuas tias nws ua tau zoo thiab kuj pab tsav tswv yim kom nws ua li cas rau li cas ntxiv. Xws li tus txwj laus hais rau Txam tias kom tuaj ntxov rau ntawm lub Tsev Nceeg Vaj xwv nws thiaj tau tos txais sawv daws, tsa tes teb thaum tuaj sib txoos, mus qhia txoj xov zoo nrog nws pawg tsis tu ncua, thiab nrhiav kev pab lwm tus. Thaum Txam ua raws li cov lus no, nws tsis yog paub khiav hauj lwm xwb tiam sis nws kuj muaj kev hlub rau cov kwv tij nkauj muam ntxiv zuj zus. Txam khaws tau tias thaum ib tug kwv tij rais los mus ua ib tug tub leg num, tsis yog nws mam pib pab lwm tus tiam sis nws yeej ib txwm pab ua ntej ntawd thiab yuav pab mus li.​—1 Timautes 3:8-10, 13.

13. Qhov uas Vaj muaj kev hlub pab tau kom nws xav ua ib tug txwj laus li cas?

¹³ Koj puas tau ua ib tug tub leg num los sis ib tug txwj laus yav tas los? Yehauvas yeej nco ntsoov koj tes hauj lwm uas koj tau ua yav tas los lawm thiab qhov uas koj ua vim koj muaj kev hlub. (1 Kauleethaus 15:58) Nws yeej pom tias koj haj tseem hlub sawv daws. Muaj ib tug kwv tij npe hu ua Vaj tu siab kawg li thaum nws tsis tau ua ib tug txwj laus lawm. Nws hais tias: “Kuv yeej yuav ua npaum li kuv ua tau los teev tiam Yehauvas tab txawm kuv yuav yog txwj laus los sis tsis yog.” Tsis tau ntev xwb nws kuj tau rov qab los ua ib tug txwj laus dua.  Vaj hais tias: “Kuv yeej ntshai kawg li uas tau rov qab los ua ib tug txwj laus. Tiam sis kuv xav tias yog Yehauvas twb pub kuv rov qab ua ib tug txwj laus ces kuv yuav ua vim kuv hlub nws thiab cov kwv tij nkauj muam.”

14. Koj khaws tau tus muam nyob Ntsaus Ntsia cov lus li cas?

¹⁴ Yehauvas cov tib neeg yeej hlub lawv tej kwv tij zej zog. (Mathais 22:37-39) Muaj ib tug muam nyob rau teb chaws Ntsaus Ntsia (Georgia) npe hu ua Nag hais tias: “Thaum thawj qhov uas rub tau kuv mus qhia txoj xov zoo yog kuv txoj kev hlub rau Yehauvas. Tiam sis thaum kuv txoj kev hlub rau Yehauvas tob zuj zus tuaj lawm, kuv txoj kev hlub rau tib neeg kuj tob zuj zus ntxiv, thiaj ua rau kuv xav tias tib neeg raug teeb meem li cas rau li cas thiab kuv yuav mus piav li cas thiaj raug lawv siab. Thaum kuv yim xav li no ces ua rau kuv yim xav pab lawv.”​—Loos 10:13-15.

15-16. Raws li cov duab, thaum hlub lwm tus peb yuav txais koob hmoov li cas?

¹⁵ Thaum peb qhia tias peb hlub cov kwv tij nkauj muam, tsis yog pab tau lawv xwb tiam sis kuj pab peb thiab. Tom qab muaj tus kab mob Khaus Viv-19 (COVID-19) muaj ib tug kwv tij hu ua Pov thiab nws poj niam mus pab ntau ntau tus muam uas hnub nyoog nchav lawm kom paub siv cov twj ntawm tes xwv lawv thiaj paub mus tshaj tawm txoj xov zoo. Muaj ib tug kawm nyuaj kawg li tiam sis ntev mus ntev tuaj nws kuj yoog tau lawm thiab. Tus  muam no kuj paub mus caw nws tej nruab ze tuaj ua kev cai nco txog Yexus ces muaj li rau caum leej tuaj koom saum huab saum cua. Twb yog vim muaj Pov thiab nws tus poj niam nkawd sib zog pab, thiaj pab tau tus muam no thiab nws cov nruab ze. Tus muam thiaj li sau tuaj rau Pov tias: “Ua tsaug uas neb tuaj pab qhia rau peb cov laus. Kuv yeej yuav nco ntsoov tias Yehauvas yeej txhawj xeeb txog peb thiab yuav nco ntsoov neb lub dag lub zog.”

¹⁶ Tej yam uas Pov ntsib zoo li no pab tau nws kawg li. Nws xam pom tias kev hlub tseem ceeb dua tej yam yus paub los sis tej yam yus txawj ua. Nws hais tias: “Thaum ub kuv kuj tau ua ib tug saib xyuas thaj tsam. Nim no kuv xam pom tias txawm cov kwv tij nkauj muam tsis nco qab kuv tej lus qhuab qhia lawm los lawv haj tseem nco ntsoov tej kuv tau pab lawv.”

17. Thaum peb muaj kev hlub ho pab tau leej twg?

¹⁷ Thaum peb qhia tias peb hlub lwm tus, kuj pab tau peb ntau yam. Muaj ib tug kwv tij nyob teb chaws Nus Xivleem (New Zealand) npe hu ua Thoj xam pom li no. Muaj ib zaug Hnub 6 (Saturday) thaum tav su, nws pom ib tug tho kev mus qhia Vajlugkub ntawm kev nws ib leeg. Thoj thiaj li txiav txim siab mus nrog tus tho kev ntawd mus tshaj tawm txoj xov zoo txhua txhua Hnub 6 thaum tav su. Thaum lub sij hawm ntawd nws tsis paub hais tias qhov nws ua zoo no yuav pab tau nws npaum li cas. Thoj hais tias: “Lub sij hawm ntawd kuv tsis tshua xav mus qhia Vajlugkub. Tiam sis thaum kuv mloog tus tho kev qhia Vajlugkub rau lwm tus thiab pom tias pab tau lwm tus npaum li cas ces kuv lub siab lub ntsws txawm kub lug xav mus ua tes hauj lwm no. Kuv kuj ntaus tau ib tug phooj ywg uas pab kom kuv txoj kev ntseeg loj zuj zus, nyiam mus qhia Vajlugkub, thiab nrog Yehauvas sib raug zoo dua qub.”

18. Yehauvas xav kom peb ua dab tsi?

¹⁸ Yehauvas xav kom peb txoj kev hlub rau nws thiab rau lwm tus tob zuj zus. Raws li peb tau kawm, peb yuav tsav ntxiv tau peb txoj kev hlub rau Yehauvas yog tias peb nyeem nws Txoj Lus, muab coj los ua tib zoo xav, thiab thov nws tsis so. Peb txoj kev hlub rau cov kwv tij nkauj muam yuav tob zuj zus yog peb nrhiav txhua txoj hau kev los mus pab lawv. Thaum peb txoj kev hlub tob zuj zus ces peb yuav txav ze zuj zus rau Yehauvas thiab cov kwv tij nkauj muam. Peb txoj kev sib raug zoo no yuav nyob taus mus ib txhis!