1-2. Peb muab ib tug ntseeg piv rau ib lub tsev siab siab li cas? (1 Kauleethaus 15:58)

 NYOB rau xyoo 1978, hauv teb chaws Nyiv Pooj ntawm lub nroog Toki-au (Tokyo), lawv ua tau ib lub tsev siab siab heev. Cov tib neeg uas pom lub tsev ntawd xav tias yog muaj av qeeg lub tsev ntawd puas yuav khov. Cov kws ua lub tsev no yeej ua tib zoo soj ntsuas kom lub tsev khov khwb kho thiab ywj ywj xwv thaum muaj av qeeg los thiaj tsis ua li cas. Peb muab cov ntseeg piv tib yam li lub tsev ntawd. Ua li lawv ho zoo li ntawd tau li cas?

² Ib tug ntseeg twg yuav tau txawj ua tib zoo luj seb thaum twg yuav tau ua tawv qhawv los sis ua muag muag. Nws yuav tau saib xyuas kom nws ua tau tawv qhawv thaum hais txog Yehauvas tej kev cai. (Nyeem 1 Kauleethaus 15:58.) Nws yeej yuav mloog lus thiab tsis ua ywj fab ywj fwj. Txuas ntxiv ntawd nws yuav tau ua tib zoo soj ntsuas los sis ua muag muag thaum tsim nyog. (Yakaunpaus 3:17) Ib tug ntseeg twg uas txawj luj tej no yuav tsis coj nruj nruj los sis ho cia ywj siab dhau. Nyob rau hauv zaj kawm no yuav qhia seb peb yuav ua tawv qhawv li cas. Tsis tas li ntawd, peb yuav kawm txog tsib yam Xatas siv los mus txo peb kom peb tsis txhob muab siab rau ntseeg thiab seb peb yuav ua li cas thiaj kov yeej nws.

3. Tus txiav txim uas siab tshaj plaws siv tej kev cai twg hauv Tes Haujlwm 15:28, 29?

³ Yehauvas yog tus txiav txim uas siab tshaj plaws, nws yeej qhia meej tseeb nws tej kev cai rau nws cov tib neeg. (Yaxayas 33:22) Xws li pab uas ntaus thawj nyob thawj 100 xyoo hais txog peb txoj hau kev uas cov ntseeg yuav tsum tau ua tawv qhawv: (1) teev tiam Yehauvas ib leeg xwb tsis txhob pe dab  mlom, (2) mloog Yehauvas txoj kev cai tias ntshav muaj nuj nqis, thiab (3) mloog tej lus hais nyob hauv phau Vajlugkub kom tsis txhob mus ua kev nkauj kev nraug. (Nyeem Tes Haujlwm 15:28, 29.) Niaj hnub nim no cov ntseeg yuav ua tawv qhawv rau peb yam no li cas?

4. Yuav ua li cas peb thiaj pe hawm Yehauvas tib leeg xwb? (Tshwmsim 4:11)

⁴ Peb teev tiam Yehauvas tib leeg xwb, peb tsis pe dab pe mlom. Yehauvas sam hwm rau cov Ixayees kom teev tiam nws tib leeg xwb. (2 Kevcai 5:6-10) Thaum dab Ntxwg Nyoog los sim Yexus, Yexus hais tias peb yuav tsum pe hawm Yehauvas tib leeg xwb. (Mathais 4:8-10) Yog li ntawd, peb tsis pe hawm tej moj zeej. Peb tsis teev tiam tib neeg xws li peb tsis saib tej xib hwb ntawm kev ntseeg, tej nom tej tswv, tej neeg muaj koob nto npe yam li ntaus npas, ncaws npas, ua yeeb yaj kiab los sis hu nkauj tam li ib tug vajtswv. Peb tuaj Yehauvas tog thiab teev tiam nws tib leeg uas yog tus “tsim ib puas tsav yam.”​—Nyeem Tshwmsim 4:11.

5. Vim li cas peb yuav tsum mloog Yehauvas txoj cai kom saib txoj sia thiab ntshav rau nqi?

⁵ Peb yeej saib taus Yehauvas txoj cai uas hais kom saib txoj sia thiab ntshav muaj nuj nqis. Tos peb ua li no los Yehauvas hais tias ntshav piv txwv txog txoj sia thiab yog ib yam uas muaj nuj nqis heev uas nws tau muab rau peb. (Levis Kevcai 17:14) Thaum Yehauvas pib cia tib neeg noj tej tsiaj txhu, nws hais kom tib neeg tsis txhob noj ntshav. (Chivkeeb 9:4) Nws kuj rov sam hwm cov lus no dua thaum nws muab Mauxes Txoj Kev Cai rau cov Ixayees. (Levis Kevcai 17:10) Tsis tas li ntawd, nws sam hwm rau pab uas ntaus thawj nyob thawj 100 xyoo kom qhia rau cov ntseeg kom “tsis txhob noj ntshav.” (Tes Haujlwm 15:28, 29) Peb yeej mloog lo lus sam hwm no thaum peb yuav txiav txim siab rau ib yam kev kho mob twg. b

6. Peb yuav tau ua dab tsi peb thiaj mloog Yehauvas tej kev cai kom tsis txhob mus ua kev nkauj kev nraug?

⁶ Peb coj raws nraim li Yehauvas tej kev cai kom tsis txhob mus ua kev nkauj kev nraug. (Henplais 13:4) Tus tub txib Povlauj txhawb kom peb muab tej kev phem kev qias “tso povtseg.” Qhov no yog peb yuav tau ua npaum li peb ua tau kom tsis txhob ntshaw plias mus ua phem ua qias. Peb tsis lam tau lam mus saib los sis ua tej yam yuav rub tau peb lub siab mus ua kev nkauj kev nraug. (Kaulauxais 3:5; Yauj 31:1) Thaum muaj kev sim siab, peb yuav tau xav kiag dua lwm yam los sis ua dua lwm yam kom peb txoj kev sib raug zoo nrog Yehauvas nyob ruaj khov khwb kho.

7. Peb yuav tau txiav txim siab ua dab tsi thiab yog vim li cas?

⁷ Yehauvas xav kom peb “muaj lub siab xav mloog” nws lus. (Loos 6:17) Txhua yam nws hais puav leej zoo rau peb, thiab peb muab nws tej kev cai hloov tsis tau los haum peb. (Yaxayas 48:17, 18; 1 Kauleethaus 6:9, 10) Peb yuav tau ua npaum li peb ua tau kom haum Yehauvas siab thiab xyaum tus sau phau ntawv nkauj tus yam ntxwv uas hais li no tias: “Kuv txiav txim siab ua raws li koj tej kevcai mus txog hnub kawg.” (Phau Ntawv Nkauj 119:112) Tiam sis Xatas yeej tsis ua kom yooj yim rau peb. Ua li Xatas yuav siv dab tsi los mus sim peb?

8. Xatas siv kev tsim txom los sim kom peb muab peb txoj kev ntseeg tso pov tseg li cas?

⁸ Kev tsim txom. Dab Ntxwg Nyoog siv kev quab yuam los sis ntaus los txo peb txoj kev ntseeg. Nws lub hom phiaj yog xav rhuav peb  txoj kev sib raug zoo nrog Yehauvas. (1 Petus 5:8) Cov ntseeg nyob thawj 100 xyoo raug hem, ntaus, thiab tua, yeeb vim yog lawv tuav rawv lawv txoj kev ntseeg. (Tes Haujlwm 5:27, 28, 40; 7:54-60) Niaj hnub nim no los Xatas haj tseem tsim txom cov ntseeg quj qees. Xws li peb cov kwv tij nkauj muam nyob rau Lav Xias teb thiab nyob rau lwm lub teb chaws. Nyob thoob plaws ntiaj teb no yeej muaj neeg tawm tsam cov kwv tij nkauj muam tsis tseg tsis tu.

9. Piav seb peb yuav tau ceev faj li cas thaum raug luag tej ntxias.

⁹ Maj mam raug ntxias. Xatas tsis yog siv kev tsim txom xwb tiam sis nws kuj ua tib zoo “ntxias” peb. (Efexus 6:11) Xws li muaj ib tug kwv tij npe hu ua Npaj (Bob) raug mus kho ib qho mob hnyav heev. Nws twb ceeb toom cov kws tshuaj tias cuaj kaum los nws yeej tsis kam txais ntshav. Tus kws phais mob yeej pom zoo ua raws li nws txiav txim siab. Tiam sis tom qab Npaj tsev neeg mus tsev tag lawm, muaj dua ib tug kws tshuaj los saib Npaj. Nws txawm hais rau Npaj tias lawv tsis muab ntshav txhab rau nws tiam sis lawv lam npaj ib qho ntshav cia tsam nws ho hloov siab. Tej zaum tus kws tshuaj xav tias Npaj yuav hloov siab yog tsis muaj nws tsev neeg nyob rau ntawd. Tiam sis Npaj hais tawv qhawv tias nws tsis kam txais ntshav tab txawm yuav zoo li cas los xij peem.

10. Vim li cas tib neeg tej kev xav yog ib rooj ntxiab? (1 Kauleethaus 3:19, 20)

¹⁰ Tib neeg tej kev xav. Yog peb xav li tib neeg xav ces peb yuav tsis xav txog Yehauvas thiab nws tej kev cai lawm. (Nyeem 1 Kauleethaus 3:19, 20.) “Tej tswvyim hauv ntiajteb no” feem ntau yeej ntxias tau tib neeg kom tsis txhob mloog Vajtswv lus. Muaj ib txhia ntseeg nyob hauv Penkamus thiab Thiyatilas pib xav tib yam li cov tib neeg ua phem ua qias thiab pe dab pe mlom uas nyob ib ncig lawv. Yexus qhuab ntuas ob lub koom txoos no vim lawv cia muaj kev nkauj kev nraug. (Tshwmsim 2:14, 20) Niaj hnub nim no tib neeg kuj ntxias kom peb xav ib yam li lawv xav thiab. Tej nruab ze los sis tej tib neeg uas peb paub kuj ntxias kom peb ua ib yam li lawv ua es tsis txhob coj Vajtswv tej kev cai nruj nruj. Xws li lawv hais kom peb kav tsij ua tej yam uas peb lub siab ntshaw, thiab tej lus nyob hauv phau Vajlugkub yog hais rau txheej thaum ub xwb.

11. Peb yuav tau zam dab tsi yog tias peb xav sawv khov kho?

¹¹ Muaj qee lub sij hawm peb yuav xav tias peb paub tsis tseeb tej uas Yehauvas hais peb. Tej thaum peb yuav muaj lub siab ntshaw kom “ua dhau Vajtswv txojlus.” (1 Kauleethaus 4:6) Cov thawj coj uas nyob rau Yexus tiam yeej ua li hais no. Lawv txhab ntxiv kev cai rau Mauxes Txoj Kev Cai mas ua nra hnyav kawg li rau tej pej xeem. (Mathais 23:4) Yehauvas yeej qhia txhua yam rau hauv nws Txoj Lus thiab ntawm nws lub koom haum. Nws twb hais txaus lawm tsis tas peb yuav txhab ntxiv rau. (Pajlug 3:5-7) Yog li ntawd, peb tsis txhob tsa cai kom ntau tshaj li twb sau rau hauv phau Vajlugkub los sis tsa cai rau cov kwv tij nkauj muam coj txawm tias phau Vajlugkub twb hais tsis txog.

12. Xatas siv “tej zaj uas tsis muaj hauvpaus hauvntsis” li cas?

¹² Tej zaj uas tsis muaj hauv paus hauv ntsis. Xatas siv “tej zaj uas tsis muaj hauvpaus hauvntsis” thiab “tej uas neeg ibtxwm qhia ib tiam dhau ib tiam” los ntxias thiab cais tib neeg. (Kaulauxais 2:8) Nyob thawj 100 xyoo, tej zaj no yog tej uas tib neeg lub tswv yim xev, tej yam uas cov neeg Yudais qhia uas tsis raws li Vajtswv Txoj Lus, thiab tej zaj uas qhia kom cov ntseeg coj raws li Mauxes Txoj Kev Cai. Tej zaj no haub ntxias tib neeg kom tsis txhob  mloog Yehauvas lub tswv yim. Niaj hnub nim no Xatas siv tib neeg tej xov xwm thiab tej zeem phooj ywg hauv is taws nej los qhia lus xaiv lus cua txog tej zaj tsis tseeb, thiab tej nom tswv kuj siv tej xov xwm los qhia txog tej yam tsis muaj tseeb. Peb pom muaj raws nkaus li no thaum muaj tus kab mob Khaus Viv-19 (COVID-19). c Yehauvas Cov Tim Khawv uas mloog Yehauvas lub koom haum qhia tsis muaj kev nyuaj siab li cov uas mus mloog tej lus xaiv lus cua no.​—Mathais 24:45.

13. Vim li cas peb yuav tau ceev faj txog tej yam uas los tab kaum peb?

¹³ Tej yam uas tab kaum peb. Peb yuav tau nco ntsoov tias “yam twg yog yam uas tseem ceeb dua ntais.” (Filipis 1:9, 10) Thaum muaj tej yam los tab kaum peb, yeej nkim peb lub sij hawm thiab lub dag lub zog heev. Xws li kev noj kev haus, mus ncig ua si, thiab hauj lwm, yuav tab kaum tau peb yog tias peb tsis ceev faj thiab saib tej yam ntawd tseem ceeb tshaj rau hauv peb lub neej. (Lukas 21:34, 35) Tsis tas li ntawd, txhua hnub yeej muaj tej xov xwm txog tib neeg sib cav sib ceg thiab sib cav txog kev nom kev tswv. Peb yuav tau ceev faj tsis txhob cia tej yam zoo li no los tab kaum peb. Tsis li ces peb yuav mus nrog lawv ua txij tog txij peg. Xatas siv tej kev zoo li hais tas los no los ntxias kom peb tsis txhob ua qhov zoo qhov yog. Cia peb mus tham txuas ntxiv seb peb yuav ua li cas peb thiaj tawm tsam tau nws tej kev haub ntxias thiab sawv khov kho.

14. Ib yam uas yuav pab tau peb nyob rau Yehauvas tog yog dab tsi?

¹⁴ Xav txog qhov uas koj cob koj tus kheej rau Yehauvas thiab ua kev cai raus dej. Koj ua li ntawd, yeeb vim yog koj xav tuaj Yehauvas tog. Xav txog seb thaum ub thaum koj tseem tsis tau paub Yehauvas, ho muaj dab tsi pab tau koj xam pom tias koj nrhiav tau qhov tseeb lawm. Thaum ntawd koj kawm txog Yehauvas, koj thiaj paub hwm thiab hlub nws uas yog koj Leej Txiv tus uas nyob saum ntuj ceeb tsheej. Koj pib muaj kev ntseeg  thiab tso koj tej kev txhaum tseg. Koj lub siab tsis kheev koj ua tej yam phem thiab koj ua lub neej raws li Vajtswv lub siab nyiam. Thaum koj pom tias Vajtswv zam txim pub rau koj mas ua rau koj zoo siab heev. (Phau Ntawv Nkauj 32:1, 2) Koj pib mus kev sib txoos thiab pib qhia rau lwm tus paub txog tej yam zoo zoo uas koj kawm tau. Thaum koj muab koj tus kheej cob rau Yehauvas thiab ua kev cai raus dej tag lawm, koj yeej ua npaum li koj ua tau los mus taug txoj kev uas coj mus tau txoj sia.​—Mathais 7:13, 14.

15. Vim li cas kawm thiab xav txog Vajtswv Txoj Lus ho zoo rau peb?

¹⁵ Kawm Vajtswv Txoj Lus thiab xav txog tej koj kawm. Ib tsob ntoo twg yog nrhau cag tob tob ces yuav khov dua. Zoo tib yam li ntawd, yog peb txoj kev ntseeg tob tob ces peb yeej yuav sawv khov khwb kho. Ib tsob ntoo twg thaum loj zuj zus, tej cag yuav nrhau dav zus thiab tob zus tob zus. Thaum peb kawm Vajtswv Txoj Lus thiab muab tej uas peb kawm ntawd ua tib zoo xav ces peb yuav pom tias Vajtswv txoj kev yeej yog txoj zoo tshaj. (Kaulauxais 2:6, 7) Ua tib zoo xav txog Yehauvas tej lus qhia thiab qhov nws tsom kwm nws cov tib neeg ho pab tau lawv li cas rau li cas. Xws li Exekees ua tib zoo mloog thaum nws ua yog toog pom tus tub txib saum ntuj ceeb tsheej ntsuas lub tuam tsev. Zaj yog toog no txhawb tau Exekees thiab pab tau kom peb txhawb nqa Yehauvas tej kev cai li cas rau li cas. d (Exekees 40:1-4; 43:10-12) Yog peb lauj sij hawm los kawm thiab ua tib zoo xav txog tej yam tob tob hauv Vajtswv Txoj Lus ces yuav pab tau peb heev.

16. Qhov ntseeg ruaj pab tau Npaj li cas? (Phau Ntawv Nkauj 112:7)

¹⁶ Ntseeg ruaj. Vaj Ntxwv Daviv qhia tias nws hlub Yehauvas npaum li cas thaum nws hu zaj nkauj tias: “Au Vajtswv, kuv lub siab ruaj khov, kuv lub siab ruaj khov tiag.” (Phau Ntawv Nkauj 57:7) Peb yeej muaj tau lub siab uas ruaj khov thiab tso siab plhuav rau Yehauvas. (Nyeem Phau Ntawv Nkauj 112:7.) Cia peb rov mus tham txog Npaj. Thaum tus  kws tshuaj hais tias lawv lam npaj ntshav faj seeb tsam nws ho lam hloov siab, Npaj thiaj li teb ntua tias yog lawv muab ntshav rau nws ces nws yeem tawm hauv lub tsev kho mob mus. Tom qab no Npaj hais tias, “Kuv yeej tsis txhawj thiab tsis ua xyem xyav li.”

17. Peb khaws tau Npaj tus yam ntxwv li cas? (Saib daim duab.)

¹⁷ Npaj yeej muaj lub siab ruaj khov, yeeb vim yog nws twb txiav txim siab zoo zoo ua ntej nws yuav mus rau hauv tsev kho mob lawm. Yam ib, yog nws xav ua Yehauvas zoo siab. Yam ob, nws ua tib zoo kawm Vajlugkub thiab nyeem tej ntaub ntawv Yehauvas lub koom haum luam tawm txog ntshav thiab txoj sia. Yam peb, nws paub tias ua li Yehauvas hais yeej zoo dua. Peb yeej muaj taus lub siab ruaj khov tib yam nkaus txawm peb yuav raug yam kev sim siab twg los xij.

18. Npalaj tus yam ntxwv qhia tau peb li cas tias kom tso siab rau Yehauvas? (Saib daim duab ntawm lub khaum.)

¹⁸ Tso siab rau Yehauvas. Cia peb mus piav txog Npalaj seb nws tso siab rau Yehauvas li cas, nws thiaj li kov yeej. Txawm nyob rau lub teb chaws ntawd tsis muaj daim hlau thaiv hniav ntaj los sis hmuv, Yehauvas hais rau Npalaj kom mus tua rog nrog cov Kana-as uas muaj cuab yeej ua rog zoo heev tus thawj tub rog Xixelas. (Cov Thawjtswj 5:8) Denpaulas tus uas cev Vajtswv lus hais rau Npalaj kom nqis mus rau nram tiaj nrag thiab mus nrog Xixelas thiab nws 900 lub tsheb nees sib tua. Txawm Npalaj paub tias nyob rau ntawm tiaj nrag yooj yim heev rau cov tsheb nees muab cov Ixayees tua los nws mloog Yehauvas hais. Thaum cov tub rog nqis ntawm lub roob Tanpaus mus, Yehauvas ua nag los hlob heev. Xixelas cov tsheb nees daig av tag ces Npalaj lawv thiaj kov yeej ntsuj rog ntawd. (Cov Thawjtswj 4:1-7, 10, 13-16) Zoo ib yam li ntawd, Yehauvas yuav cia peb kov yeej yog peb tso siab rau nws thiab mloog tej lus uas nws lub koom haum qhia.​—2 Kevcai 31:6.

19. Vim li cas koj yuav tau ua lub siab tawv qhawv?

¹⁹ Cheem peb tseem nyob rau lub qab ntuj no peb yuav tau ua lub siab tawv qhawv. (1 Timautes 6:11, 12; 2 Petus 3:17) Peb tsis txhob ua lub siab ywj fab ywj fwj thaum raug kev tsim txom, maj mam raug ntxias, mloog tib neeg tej kev xav, muaj tej zaj uas tsis muaj hauv paus hauv ntsis, thiab muaj tej yam uas tab kaum peb. (Efexus 4:14) Cia peb sawv khov kho, muab siab rau ntseeg Yehauvas thiab mloog Yehauvas tej lus. Peb kuj yuav tau txawj yoog thiab. Nyob rau zaj txuas ntxiv tom ntej no yuav piav tias Yehauvas thiab Yexus nkawd txawj yoog li cas.