Kuv txiv yog ib tug txwj laus ntawm pawg ntseeg Yunaithim Tshawj Au Kanada (United Church of Canada). Txhua txhua lub lim tiam kuv txiv xa kuv thiab kuv tus muam wb mus kawm Vajlugkub Hnub 7 (Sunday) thaum sawv ntxov. Thaum 11 teev sawv ntxov ces wb rov qab los koom nrog nws hauv chav loj. Thaum tav su dua, wb nrog kuv niam mus tom Tsev Nceeg Vaj. Wb pom tias ob txoj kev ntseeg no nyias coj txawv nyias lawm ib yam.

Kuv niam thiaj li pib qhia nws txoj kev ntseeg rau nws ob tug phooj ywg Npaj Hatsexees (Bob Hutcheson) thiab nws tus poj niam Melias (Marion). Nkawd kuj los ntseeg Yehauvas lawm thiab. Nyob rau xyoo 1958, Npaj lawv tsev neeg coj kuv nrog lawv mus lub rooj sib txoos yim hnub nyob rau hauv Nus Yauj Xiti (New York City). Tam sim no kuv paub hais tias yeej tsis yooj yim rau lawv coj kuv nrog lawv mus tiam sis lub rooj sib txoos no pab tau kuv kawg li.

Thaum kuv tiav hluas, peb nyob rau ntawm ib daim teb thiab kuv nyiam tu tsiaj txhu heev. Kuv xav mus kawm ntawv qib siab mus ua ib tug kws tshuaj rau tsiaj. Kuv niam thiaj li mus piav rau ib tug txwj laus. Tus txwj laus thiaj li hais rau kuv tias peb nyob rau tiam kawg thiab yog kuv mus kawm ntawv qib siab ntau xyoo tom ntej no ces nyob tsam kuv txoj kev sib raug nrog Yehauvas tsis zoo li qub lawm.  (2 Timautes 3:1) Yog li ntawd, kuv thiaj li txiav txim siab tsis mus kawm ntawv qib siab.

Tiam sis kuv tsis paub xyov tom qab kuv kawm qib kaum ob tag kuv yuav ua dab tsi. Txawm niaj lub lim tiam kuv mus qhia Vajlugkub los kuv tsis xis mus qhia tib neeg thiab kuv tsis xav ua ib tug tho kev. Kuv txiv thiab txiv ntxawm nkawd tsis ntseeg Yehauvas thiab txhawb kom kuv mus ua hauj lwm rau ntawm kuv txiv ntxawm lub tuam txhab muag is saws las (insurance) hauv lub nroog Thaulatau. Kuv tus txiv ntxawm yog ib tug thawj nyob rau hauv, yog li ntawd kuv thiaj mus ua hauj lwm nyob rau hauv.

Nyob rau hauv lub nroog Thaulatau, kuv ua hauj lwm tas zaj tas zog thiab nrog cov tib neeg uas tsis ntseeg Yehauvas ua ke kuv thiaj tsis tshua mus kev sib txoos thiab mus qhia Vajlugkub. Kuv nrog kuv yawg uas tsis ntseeg Yehauvas nyob tiam sis thaum nws tas sim neej lawm, kuv yuav tau nrhiav ib qho chaw tshiab nyob.

Npaj tsev neeg thiaj li cia kuv mus nrog lawv nyob. Lawv pab kom kuv txoj kev sib raug zoo nrog Yehauvas loj zuj zus tuaj. Kuv suav Npaj thiab nws tus poj niam tam li niam thiab txiv. Nyob rau xyoo 1960, nkawd tus tub Ntsos (John) wb ua kev cai raus dej ua ke. Ntsos txawm pib ua ib tug tho kev mas txhawb tau kuv lub zog kom rau siab mus qhia Vajlugkub. Cov kwv tij nyob hauv lub koom txoos los kuj pom hais tias kuv ua tau zoo zuj zus tuaj ces tsis ntev tom qab ntawd lawv thiaj muab kuv tsa ua ib tug saib xyuas txoj kev kawm tshaj tawm. a

Nyob rau xyoo 1966, kuv yuav Ladis Npawj (Randi Berge) los ua kuv poj niam. Nws yog ib tug tho kev uas kub siab heev mus qhia rau tej thaj tsam tsis muaj cov ntseeg coob pes tsawg. Tus saib xyuas thaj tsam txhawb kom wb mus pab lub koom txoos nyob rau ntawm lub xeev Autaliaus (Ontario) hauv lub nroog Aulias (Orillia). Yog li ntawd, wb thiaj sau nra tsiv mus nyob rau ntawd.

Thaum wb mus txog rau ntawm lub nroog Aulias, kuv txawm nrog kuv poj niam ua ib tug tho kev. Qhov uas nws kub siab lug pab tau kuv kawg li! Thaum kuv qhib siab hlo ua ib tug tho kev, kuv nyiam siv Vajlugkub mus qhia tib neeg thiab thaum  pom tib neeg nkag siab Vajtswv Txoj Lus, ua rau kuv zoo siab kawg li. Kuv zoo siab heev uas wb tau pab ib khub niam txiv nyob hauv Aulias los paub Yehauvas.

Thaum wb mus xyuas lub nroog Thaulatau, kuv ntsib Aunom Manamalas (Arnold MacNamara) uas yog ib tug kwv tij ua hauj lwm rau hauv Npe-ee. Nws nug kuv seb wb puas xav ua ob tug tho kev tshwj xeeb. Kuv teb ntua nws tias: “Tau kawg li! Mus qhov twg los tau tsuav txhob yog Khuanpev (Quebec) xwb!” Ib txhia tib neeg nyob hauv Kanada pheej xyav cov tib neeg nyob hauv Khuanpev tias lawv sib ntaus sib tua, yog li kuv thiaj xav tsis zoo txog lawv. Nyob rau lub sij hawm ntawd, ib txhia tib neeg sawv tawm tsam nom tswv thiab xav kom lawv muaj kev ywj pheej.

Aunom teb kuv tias, “Tam sim no ceg Npe-ee tsuas xa cov tho kev tshwj xeeb mus rau hauv Khuanpev lawm xwb.” Kuv teb tias wb mam li mus. Kuv paub tias kuv poj niam yeej txaus siab mus tshaj tawm rau qhov chaw ntawd. Tom qab no kuv mam li paub tias qhov wb txiav txim siab no yeej zoo kawg li!

Tom qab wb mus kawm lus Fab Kis tau tsib lub lim tiam, kuv poj niam wb nrog ib khub niam txiv mus rau hauv lub nroog Limukis (Rimouski) uas nyob kwv lam li 540 kilumev (336 mais) ntawm lub nroog Mootilia (Montreal) sab qaum teb hnub tuaj. Tseem tshuav ntau yam wb tseem tsis tau paub. Muaj ib zaug peb mus kev sib txoos es kuv nyeem cov lus tshaj tawm. Kuv hais tias thaum peb mus lub rooj sib txoos tom ntej no, peb yuav muaj “ib co qaib ntxhw tuaj koom” tiam sis tiag tiag mas kuv xav tshaj tawm tias peb yuav muaj “ib co neeg Auxita (Austrian) tuaj koom.”

Nyob rau hauv lub nroog Limukis, muaj plaub tug muam tuaj koom nrog peb plaub leeg. Tsis tas li ntawd, muaj Kwv Tij Hunpadi-aus (Huberdeaus) lawv tsev neeg nrog peb mus. Kwv Tij Hunpadi-aus lawv xauj tau ib lub tsev loj loj rau sawv daws mus nyob. Peb hu lub tsev ntawd hu ua Tsev Dawb vim lub tsev ntawd lawv muab thas ua xim dawb thiab muaj ob tug ncej txheem loj loj nyob rau ntawm qhov rooj. Tej thaum peb muaj txog li 12 leeg mus rau 14 leeg nyob rau hauv. Kuv poj niam wb ua ob tug tho kev tshwj xeeb wb thiaj mus qhia Vajlugkub thaum sawv ntxov mus txog ntua tsaus ntuj. Wb ris txiaj ntsig kawg li uas yeej muaj tib neeg nrog wb mus qhia ua ke tsis hais lub caij ntuj no.

Peb sawv daws sib raug zoo heev thiab ib leeg suav ib leeg tam li ib tse neeg. Muaj qee zaug peb rauv taws nte ua ke los sis peb ua noj ua ke. Muaj ib tug kwv tij txawj ntaus nkauj, yog li ntawd txhua Hnub 6 (Saturday) thaum tsaus ntuj, peb hu nkauj thiab seev cev.

Nyob rau hauv lub nroog Limukis, muaj coob leej ntau tus nyiam kawm Vajlugkub kawg li! Tau tsib xyoos xwb, ib txhia kawm Vajlugkub kuj ua kev cai raus dej thiab hauv lub koom txoos muaj txog li 35 tug tshaj tawm.

Nyob rau hauv Khuanpev, peb kawm tau ntau yam ua rau peb txawj mus qhia Vajlugkub heev. Peb yeej pom tias Yehauvas yeej pab peb mus tshaj tawm txoj xov zoo thiab pab kom peb muaj txawm peem. Tsis tas li ntawd, peb kuj nyiam cov neeg Fab Kis, lawv yam lus, thiab lawv tej kev coj noj coj ua kawg li.​—2 Kauleethaus 6:13.

Tos nco xwb, ceg Npe-ee hais kom wb tsiv mus nyob rau ntawm lub zos Thakadis (Tracadie) ntawm lub xeev Nus Npluvis (New Brunswick) sab hnub tuaj. Qhov no nyuaj kawg li rau wb, yeeb vim yog wb twb kos npe nyob rau ib chav tsev ib xyoos ntxiv thiab kuv ua me ntsis hauj lwm hauv ib lub tsev  kawm ntawv. Cov neeg kawm Vajlugkub nrog wb los kuj pib mus tshaj tawm zom zaws thiab wb kuj tab tom pab tsa ib lub Tsev Nceeg Vaj.

Wb thov Vajtswv heev kawg li txog qhov no thiab mus xyuas lub zos Thakadis. Lub zos no tsis zoo li nyob hauv Limukis. Tiam sis wb txiav txim siab tias yog Yehauvas xav kom wb tsiv mus rau ntawd ces wb yuav tau mus. Wb tso siab plhuav rau Yehauvas thiab pom tias nws yeej pab wb kawg nkaus li. (Malakis 3:10) Vim kuv tus poj niam muaj kev sib raug zoo nrog Yehauvas, nws tsis khuv xim ib yam dab tsi thiab nws tus cwj pwm los yeej zoo heev ces qhov uas wb tsiv no thiaj tsis nyuaj ua luaj twg.

Nyob hauv lub koom txoos tshiab ntawd, tsuas muaj ib tug txwj laus xwb hu ua Lanpaw Loj (Robert Ross). Nws thiab nws poj niam nkawd ua ob tug tho kev thiab tom qab nkawd yug tau nkawd thawj tug me nyuam, nkawd txiav txim siab nyob rau ntawd. Tab txawm nkawd tu nkawd tus me tub los nkawd yeej txhawb wb, tos txais wb, thiab rau siab ntso mus qhia txoj xov zoo.

Tom qab wb nyob hauv lub zos Thakadis tau ob xyoos, ceg Npe-ee xav kom kuv mus ua ib tug saib xyuas thaj tsam. Wb mus xyuas cov koom txoos Askiv tau xya xyoo. Tom qab ntawd lawv kuj muab wb mus xyuas cov koom txoos Fab Kis nyob hauv Khuanpev. Tus saib xyuas cheeb tsam hauv Khuanpev hu ua Li-oos Khilepaus (Léonce Crépeault). Nws qhuas kuv tej lus qhuab qhia tiam sis tom qab ntawd nws nug kuv tias, “Koj yuav cev li cas ntxiv kom raug lwm tus siab?” b Qhov no pab tau kuv ua zoo saib tej kuv qhia kom hais tsi ntsees thiab yooj yim nkag siab.

Ib yam uas kuv nco ntsoov yog kuv tes hauj lwm nyob rau xyoo 1978 ntawm lub rooj sib txoos hauv Mootilia. Kuv ua hauj lwm rau hauv chav ua mov noj. Peb yuav tos txais li 80,000 leej thiab peb yuav tau npaj zaub mov txawv dua li txhia xyoo. Txhua yam puav leej tshiab tag nrho tsis hais tej khoom siv ua noj, seb yuav noj thiab yuav npaj li cas. Peb muaj kwv lam li 20 lub tub yees loj tiam sis muaj qee zaug kuj ua hauj lwm tsis tshua zoo thiab. Peb mus tsis tau ib hnub ua ntej mus npaj vim ua ntej hmo ntawd luag kuj siv lub tsev ntawd ua lwm yam lawm. Peb kuj sawv ntxov tsees ua ntej kaj ntug mus taws qhov cub npaj ua tshais. Peb sab kawg li tiam sis kuv kawm tau ntau yam txog cov ua hauj lwm nrog kuv. Peb sib raug zoo heev thiab peb tseem niaj hnub ua phooj ywg kwv luag los txog niaj hnub nim no. Kuv zoo siab kawg li tau mus lub rooj sib txoos hauv Khuanpev vim thaum xyoo 1940  txog 1950, Yehauvas Cov Tim Khawv raug kev tsim txom hnyav kawg li.

Kuv khaws tau ntau yam los ntawm cov saib xyuas peb xws li thaum mus tej rooj sib txoos hauv lub nroog Mootilia. Muaj ib xyoos Davi Xaple (David Splane), uas tam sim no yog ib tug ntawm Pab Uas Ntaus Thawj, saib xyuas lub rooj sib txoos. Lub rooj sib txoos tom qab no zog, lawv hais kom kuv tuav nws tes hauj lwm saib xyuas lub rooj sib txoos. Davi kuj tsis xav li cas thiab nws txaus siab hlo cia kuv ua.

Nyob rau xyoo 2011, tom qab kuv poj niam wb saib xyuas thaj tsam tau 36 xyoo, lawv kuj cia kuv mus ua ib tug cob qhia txoj Kev Kawm Rau Cov Txwj Laus. Tau ob lub xyoos xwb, wb tau mus so rau 75 qhov chaw. Txawm li ntawd los wb tsis xav li cas. Tom qab ib lub lim tiam twg, cov txwj laus yeej ris txiaj ntsig kawg li tias Pab Uas Ntaus Thawj yeej txhawj txog lawv txoj kev sib raug zoo nrog Yehauvas.

Tom qab no kuv kuj tau qhia txoj Kev Kawm Rau Cov Qhia Lub Nceeg Vaj. Cov tuaj kawm yeej sab sab lim lim vim lawv muaj ntau yam lawv yuav tau ua, xws li: zaum xya txoos teev kawm ntawv txhua hnub, ua lawv cov ntaub ntawv peb txoos teev txhua hmo, thiab lawv yuav tau npaj plaub los sis tsib zag los mus hais rau sawv daws mloog. Kuv thiab tus uas nrog kuv qhia hais rau lawv tias lawv yeej ua tsis tau yog tias tsis muaj Yehauvas pab. Kuv yeej nco ntsoov thaum cov tuaj kawm tso siab rau Yehauvas, lawv thiaj ua tau ntau yam uas lawv xav tsis txog tias lawv yuav ua tau.

Qhov uas kuv niam nyiam pab lwm tus kuj pab tau cov nws kawm Vajlugkub nrog ua ntau yam ntxiv rau Yehauvas, thiab kuj pab tau kom kuv txiv muaj lub siab mos siab muag txog peb txoj kev ntseeg. Peb hnub tom qab kuv niam tag sim neej lawm, kuv txiv kuj tuaj mloog zaj lus qhuab qhia tom lub Tsev Nceeg Vaj. Tsis tas li ntawd, nws kuj tuaj tsis so tej kev sib txoos tau 26 lub xyoos. Txawm nws tsis kam ua kev cai raus dej los, cov txwj laus qhia rau kuv tias nws yog thawj tug uas tuaj tej kev sib txoos txhua txhua lub lim tiam.

Kuv niam tso tau ib tug yam ntxwv zoo kawg li rau kuv cov muam peb. Kuv peb tug muam nrog rau lawv peb tug txiv kuj teev tiam Yehauvas ruaj nreeg. Kuv muaj ob tug muam ua hauj lwm rau hauv Npe-ee. Ib tug ua rau ceg Npe-ee hauv Po Tsu Nkau (Portugal) hos ib tug ua rau hauv ceg Hedis (Haiti).

Tam sim no kuv poj niam wb ua ob tug tho kev tshwj xeeb nyob rau hauv lub xeev Autaliaus ntawm lub nroog Hamutees (Hamilton). Thaum kuv tseem ua tus saib xyuas thaj tsam, wb tsuas nrog lwm tus mus xyuas cov uas lawv kawm Vajlugkub nrog xwb. Tiam sis nim no wb zoo siab heev pom cov wb kawm Vajlugkub nrog los paub Yehauvas. Thaum wb nrog cov kwv tij nkauj muam hauv lub koom txoos tshiab uas wb mus ntawd ua ke, txhawb tau wb lub zog kawg li thaum wb pom tias Yehauvas pab lawv rau txhua lub caij lub nyoog.

Thaum wb rov xav txog wb lub neej, wb ris txiaj ntsig rau cov uas tau pab thiab hlub wb. Yog li ntawd, wb thiaj tig mus pab lwm tus thiab txhawb kom lawv kub siab lug teev tiam Yehauvas npaum li lawv ua tau. (2 Kauleethaus 7:6, 7) Xws li muaj ib tse neeg, leej niam, tus tub, thiab tus ntxhais puav leej tho kev. Kuv thiaj nug tus txiv tias nws puas xav ua ib tug tho kev thiab. Nws teb kuv tias nws yog tus pab kom lawv thiaj tho kev tau. Yog li ntawd kuv thiaj nug nws ntxiv tias, “Koj tseem pab lawv zoo dua li Yehauvas pab lawv thiab lod?” Kuv thiaj txhawb nws tho kev kom nws thiaj li pom lawv txoj kev zoo siab. Rau lub hlis tom qab xwb, nws rau npe ua ib tug tho kev lawm.

Kuv poj niam wb yuav rau siab ntso qhia cov hluas txog Yehauvas “tej haujlwm uas zoo kawg nkaus,” thiab wb vam thiab cia siab tias lawv yuav txaus siab ua Yehauvas tes hauj lwm li wb.​—Phau Ntawv Nkauj 71:17, 18.