ZAJ KAWM 28
ZAJ NKAUJ 126 Ceev Faj Zov, Sawv Ruaj Nreeg, Ruaj Khov
Koj Puas Paub Cais Qhov Tseeb Thiab Qhov Cuav?
“Nej yuav tsum npaj tos. Cia li muab Txojlus tseeb los ua siv sia.”—EFEXUS 6:14.
LUB NTSIAB RAU ZAJ NO
Peb yuav kawm kom paub cais qhov tseeb uas Yehauvas qhia tawm ntawm tej yam cuav uas Xatas thiab cov uas tawm tsam peb qhia.
1. Koj xav li cas txog tej lus tseeb?
YEHAUVAS cov tib neeg yeej nyiam tej lus tseeb uas hais nyob rau hauv phau Vajlugkub. Peb yeej coj raws li tej lus uas hais nyob rau hauv. (Loos 10:17) Peb yeej ntseeg hais tias Yehauvas tsa kom muaj lub koom txoos Khixatias kom zoo yam li “tus ncej uas txawb Vajtswv Txojlus uas yog qhov tseeb.” (1 Timautes 3:15) Peb yeej txaus siab hlo mloog “cov thawj uas saib xyuas” peb thaum lawv qhia qhov tseeb hauv phau Vajlugkub thiab qhia seb peb yuav ua li cas rau li cas thiaj haum Vajtswv siab.—Henplais 13:17.
2. Raws li Yakaunpaus 5:19, tom qab peb paub qhov tseeb peb yuav raug dab tsi?
2 Txawm peb nyiam tej lus tseeb hauv phau Vajlugkub thiab coj raws li Yehauvas lub koom haum qhia lawm los yog peb tsis ua zoo ceev faj ces peb haj tseem ntseeg tau tej yam yuam kev. (Nyeem Yakaunpaus 5:19.) Xatas nyiam heev yog tias peb tsis tso siab rau tej lus tseeb hauv phau Vajlugkub thiab tsis kam mloog Yehauvas lub koom haum qhia.—Efexus 4:14.
3. Vim li cas peb yuav tsum coj raws li qhov tseeb? (Efexus 6:13, 14)
3 Nyeem Efexus 6:13, 14. Tsis ntev tom ntej no Dab Ntxwg Nyoog yuav siv tej lus dag ntxias los haub ntxias ib tsoom teb chaws kom tawm tsam Yehauvas. (Tshwmsim 16:13, 14) Peb paub tias Dab Ntxwg Nyoog yuav yim huab dag ntxias Yehauvas cov tib neeg kom yuam kev. (Tshwmsim 12:9) Yog li ntawd, thiaj li tseem ceeb heev rau peb cob qhia peb tus kheej kom paub cais qhov tseeb tawm ntawm qhov cuav thiab coj raws li qhov tseeb. (Loos 6:17; 1 Petus 1:22) Tej no yuav pab kom peb dim lub sij hawm muaj kev txom nyem loj kawg nkaus!
4. Nyob rau hauv zaj kawm no peb yuav tham txog dab tsi?
4 Nyob rau hauv zaj kawm no yuav tham txog ob qho yeeb yam uas peb yuav tsum muaj kom peb thiaj paub qhov tseeb uas hais nyob rau hauv phau Vajlugkub thiab ua raws li Yehauvas lub koom haum qhia. Ces tom qab ntawd, peb yuav tham txog peb lub ntsiab uas yuav pab kom peb tuav rawv qhov tseeb.
TEJ YEEB YAM PAB KOM PEB PAUB TIAS QHOV TWG TSEEB
5. Qhov uas peb hwm Yehauvas ho pab tau peb li cas kom peb thiaj paub cais qhov tseeb ntawm qhov cuav?
5 Hwm Yehauvas. Thaum peb hwm Yehauvas yog thaum peb hlub thiab tsis xav ua ib yam dab tsi kom nws tu siab rau peb. Tsis tas li ntawd, peb tos rwg xav kawm seb qhov twg yog thiab qhov twg tsis yog, qhov twg tseeb thiab qhov twg cuav xwv peb thiaj ua tau haum Yehauvas siab. (Pajlug 2:3-6; Henplais 5:14) Nco ntsoov tsis txhob cia txoj kev ntshai neeg ua rau peb tsis nco qab txog Yehauvas. Tej yam uas haum neeg siab ntau zaus yeej tsis haum Yehauvas siab.
6. Qhov uas ntshai neeg ho ua rau kaum tug thawj coj xam tsis pom qhov tseeb li cas?
6 Yog tias peb ntshai neeg tshaj li hwm Vajtswv ces peb yuav pib ntseeg tej yam uas tsis raws li Yehauvas qhia. Cia peb mus tham txog 12 tug thawj coj uas mus tshuaj lub teb chaws uas Yehauvas cog tseg yuav muab rau cov Ixayees. Muaj kaum tug ntawd ntshai cov Kana-as heev, lawv thiaj tsis nco qab txog Yehauvas lawm. Lawv txawm los hais rau cov Ixayees tias: “Peb tseem tsis tau muaj zog txaus yuav mus tua yeej lawv; cov neeg uas nyob tid muaj zog tshaj peb.” (Teev Npe 13:27-31) Raws li tib neeg pom xwb ces cov neeg Kana-as yeej muaj zog dua cov Ixayees. Tiam sis yog leej twg hais tias cov Ixayees yeej kov tsis yeej lawv cov yeeb ncuab ces twb yog nws xam tsis muaj Yehauvas. Tsim nyog rau kaum tug ntawd xav txog tej uas Yehauvas xav kom cov Ixayees ua. Ntxiv ntawd, lawv yuav tau nco ntsoov tej uas Yehauvas twb ua rau lawv lawm. Yog lawv ua li no ces lawv yuav xam pom tias txawm cov Kana-as muaj zog los lawv yeej kov tsis yeej Yehauvas. Yausuas thiab Kalej tsis coj yam li lawv vim nkawd xav ua kom haum Yehauvas siab. Nkawd hais rau cov tib neeg tias: “Yog [Yehauvas] txaus siab rau peb, nws yeej yuav coj peb mus nyob hauv lub tebchaws ntawd thiab nws yuav muab lub tebchaws . . . rau peb.”—Teev Npe 14:6-9.
7. Yuav ua li cas peb thiaj hwm Yehauvas? (Saib daim duab.)
7 Yuav kom peb hwm Yehauvas, ua ntej peb yuav txiav txim siab ua ib yam dab tsi, peb yuav tsum xav seb dab tsi thiaj haum Yehauvas siab. (Phau Ntawv Nkauj 16:8) Thaum koj nyeem Vajlugkub, koj yuav tau nug koj tus kheej li no tias, ‘Yog tias muaj li no raug rau kuv, kuv yuav txiav txim siab li cas?’ Xws li yog tias koj nyob rau thaum kaum tus thawj coj hais tsis zoo, koj puas yuav ntshai neeg es ntseeg lawv cov lus los sis koj yuav ua haum Yehauvas siab? Cov neeg Ixayees feem coob tsis kam ntseeg Yausuas thiab Kalej nkawd tej lus. Yog li ntawd, Yehauvas thiaj tsis cia cov ntawd mus nyob rau lub teb chaws uas nws cog tseg.—Teev Npe 14:10, 22, 23.
Koj yuav ntseeg tus twg? (Saib nqe 7)
8. Tus yeeb yam twg yog tus uas peb yuav tau xyaum kom muaj, thiab yog vim li cas?
8 Txo hwj chim. Yehauvas tsuas qhia qhov tseeb rau cov uas txo hwj chim. (Mathais 11:25) Peb txo hwj chim los kawm qhov tseeb. (Tes Haujlwm 8:30, 31) Txawm li ntawd los peb yuav tau nco ntsoov tsis txhob ua neeg khav theeb. Yog peb ua neeg khav theeb ces peb yuav xav tias peb lub tswv yim yeej mus raws li tej hauv paus ntsiab lus hauv phau Vajlugkub thiab ua raws li Yehauvas lub koom haum hais.
9. Yuav ua li cas peb thiaj txo hwj chim mus li?
9 Yuav kom peb ua neeg txo hwj chim mus li, peb yuav tau nco ntsoov tias peb luaj li cas piv rau Yehauvas. (Phau Ntawv Nkauj 8:3, 4) Tsis tas li ntawd, peb kuj thov Yehauvas kom pab peb txo hwj chim thiab muaj tus cwj pwm kam kawm ub kawm no. Yehauvas yuav pab kom peb saib nws cov lus hauv phau Vajlugkub thiab ntawm nws lub koom haum muaj nuj nqis tshaj li tej uas peb xav tseg hauv nruab siab. Thaum koj nyeem phau Vajlugkub, nrhiav seb Yehauvas nyiam kev txo hwj chim li cas, thiab nws ntxub txoj kev khav theeb thiab tsab ua loj li cas. Nco ntsoov txo hwj chim thaum koj tau txais ib teg hauj lwm twg uas saib xyuas lwm tus los sis yuav ua rau lwm tus qhuas.
TUAV RAWV QHOV TSEEB
10. Yehauvas siv leej twg los mus qhia nws cov tib neeg seb yuav ua li cas rau li cas?
10 Tso siab plhuav rau Yehauvas lub koom haum mus li. Txheej puag thaum ub, Yehauvas siv Mauxes los mus cev nws tej lus rau cov neeg Ixayees ces tom qab no nws siv Yausuas. (Yausuas 1:16, 17) Txhua yam puav leej mus tau zoo thaum cov Ixayees saib cov txiv neej no yog cov sawv cev rau Vajtswv Yehauvas. Tau ntau pua xyoo tom qab no thaum muaj thawj lub koom txoos Khixatias ces 12 tug thwj tim yog cov qhia seb yuav ua li cas rau li cas. (Tes Haujlwm 8:14, 15) Tom qab no pawg ntawd kuj txhab cov txwj laus hauv lub nroog Yeluxalees ntxiv rau. Thaum cov koom txoos ua raws li cov txiv neej no hais, “cov ntseeg thiaj muaj zog heev thiab niaj hnub muaj neeg los ntseeg coob zuj zus ntxiv.” (Tes Haujlwm 16:4, 5) Niaj hnub nim no Yehauvas foom koob hmoov rau peb yog tias peb mloog nws lub koom haum qhia. Yehauvas yuav xav li cas rau peb yog tias peb ho tsis kam mloog cov Yehauvas tsa los saib xyuas? Cia peb mam li mus tham seb muaj li cas rau cov Ixayees thaum lawv mus rau hauv lub teb chaws uas Vajtswv cog tseg.
11. Muaj li cas rau cov uas tawm tsam qhov uas Vajtswv xaiv Mauxes los ua tus coj? (Saib daim duab.)
11 Thaum cov Ixayees taug kev los mus rau lub teb chaws uas Yehauvas cog tseg, muaj ib co txiv neej uas muaj koob nto npe tawm tsam Mauxes thiab tes hauj lwm Yehauvas muab tso rau Mauxes ua. Lawv hais tias: “[Tsis yog Mauxes xwb] ib tsoom neeg kuj dawb huv txhua tus, thiab [Yehauvas] nrog nraim lawv.” (Teev Npe 16:1-3) Vajtswv yeej pom hais tias tag nrho “ib tsoom neeg” yeej dawb huv tiam sis nws xaiv Mauxes ua tus coj Nws cov tib neeg. (Teev Npe 16:28) Qhov uas cov ntxeev siab thuam Mauxes, twb yog lawv thuam Yehauvas. Lawv tsis ua tib zoo xav seb Yehauvas xav tau li cas tiam sis lawv tsuas xam pom tej uas lawv xav tau uas yog kom muaj hwj chim thiab muaj koob nto npe. Vajtswv thiaj muab cov thawj coj uas tawm tsam thiab cov uas tuaj lawv tog rhuav tshem tawm mus. (Teev Npe 16:30-35, 41, 49) Niaj hnub nim no Yehauvas kuj tsis txaus siab rau cov uas saib tsis taus nws lub koom haum tib yam nkaus.
Koj yuav txhawb nqa tus twg? (Saib nqe 11)
12. Vim li cas peb ho tso siab tau rau Yehauvas lub koom haum?
12 Peb yeej tso siab tau rau Yehauvas lub koom haum. Thaum muaj ib yam twg hloov kom sawv daws thiaj nkag siab phau Vajlugkub los sis teev tiam Yehauvas li cas rau li cas, cov uas saib xyuas yeej tsis ua xyem xyav tiam sis lawv yeej hloov tsawg tsuag. (Pajlug 4:18) Tos lawv ua li no los twb yog vim lawv xav ua haum Yehauvas siab. Vim Yehauvas cov tib neeg coj raws li nws Txoj Lus, cov saib xyuas thiaj li ua npaum li lawv ua tau kom txiav txim siab tau raws li ntawd.
13. “Tej lus tseeb” yog dab tsi thiab peb yuav siv li cas?
13 “Muab tej lus tseeb uas kuv qhia rau koj lawm los ua yamntxwv.” (2 Timautes 1:13) “Tej lus tseeb” yog hais txog tej lus qhia hauv phau Vajlugkub. (Yauhas 17:17) Tej lus qhia ntawd yog lub hauv paus ntawm peb txoj kev ntseeg. Yehauvas lub koom haum cob qhia kom peb tuav rawv tej lus qhia ntawd. Yog peb ua li no tas zaj tas zog ces peb yuav tau txais koob hmoov.
14. Ib txhia Khixatias tsis coj raws li “tej lus tseeb” li cas?
14 Muaj li cas xwb yog tias peb tsis coj raws li “tej lus tseeb”? Xws li thaum nyob thawj 100 xyoo, muaj ib co Khixatias hais lus xov lus cua mus thoob plaws sawv daws tias Yehauvas hnub twb los lawm. Tej zaum muaj ib tsab ntawv uas lawv xav hais tias yog Povlauj sau uas tau hais li ntawd. Lawv tsis ua zoo tshuaj xyuas seb puas muaj tseeb. Yog li ntawd, ib txhia Khixatias uas nyob hauv Thexalaunikes ntseeg tej lus xov lus cua ntawd thiab muab piav rau qhov txhia qhov chaw. Yog lawv nco ntsoov tej lus uas Povlauj qhia rau lawv thaum nws tseem nrog lawv nyob ces tej lus xov lus cua ntawd yuav dag ntxias tsis tau lawv. (2 Thexalaunikes 2:1-5) Povlauj qhuab ntuas nws cov kwv tij kom tsis txhob mloog txhua yam uas lawv hnov. Qhov uas pab kom lawv tsis txhob xav yuam kev ntxiv rau yav tom ntej, Povlauj thiaj sau nws cov lus xaus rau tsab ntawv ob rau cov Thexalaunikes tias: “Kuv yog Paulus, tsab ntawv no yog kuv txhais tes sau tuaj rau nej ntag. Kuv suam kuv lub npe rau txhua tsab ntawv uas kuv xa tuaj rau nej.”—2 Thexalaunikes 3:17.
15. Piav seb peb yuav ua li cas peb thiaj tsis mloog tej lus cuav uas ntxim li yog qhov tseeb. (Saib cov duab.)
15 Peb khaws tau Povlauj cov lus uas hais rau cov Thexalaunikes li cas? Thaum peb hnov ib yam dab tsi uas tsis hais raws li tej peb tau kawm hauv phau Vajlugkub los sis hnov tej lus xov lus cua, peb yuav tau siv tswv yim seb puas muaj tseeb. Thaum lub caij Xauviaj (Soviet Union) kav, peb cov yeeb ncuab muab tau ib tsab ntawv tseb rau cov kwv tij yam nkaus li yog los ntawm lub hauv paus koom haum loj los. Tsab ntawv txhawb kom cov kwv tij cais ua pab ua pawg thiab nyias pib nyias ib lub koom haum. Tsab ntawv ntxim yog los ntawm lub hauv paus koom haum loj los tiag. Tiam sis tej lus ntawd ntxias tsis tau cov kwv tij uas ntseeg Yehauvas ruaj nreeg. Cov kwv tij paub hais tias tej lus hauv tsis thooj li tej uas lawv tau kawm dua los lawm. Niaj hnub nim no cov yeeb ncuab uas tsis nyiam qhov tseeb kuj siv tej twj hauv Is Taws Nej los mus cais thiab ua rau kom peb cais ua pab ua pawg. Thaum peb hnov los sis nyeem tau ib yam twg, peb yuav tau “tsis txhob rawm poob siab” tiam sis ua zoo tshuaj seb puas raws li tej uas peb ib txwm tau kawm.—2 Thexalaunikes 2:2; 1 Yauhas 4:1.
Tsis txhob ntseeg tej yam cuav uas ntxim li yog qhov tseeb (Saib nqe 15) a
16. Raws li Loos 16:17, 18, peb yuav ua li cas yog ib tug twg qhia tej yam cuav?
16 Nrog cov uas npuab siab rau Yehauvas sib koom siab. Vajtswv xav kom peb sib koom siab teev tiam nws. Yog peb tuav rawv qhov tseeb ces peb yeej yuav sib koom siab mus li. Yog muaj ib tug twg qhia tej yam cuav ces yuav ua rau sawv daws sib cais ua pab ua pawg. Yog li ntawd, Vajtswv thiaj ceeb toom kom peb “tsis txhob mus poo lawv hlo li.” Tsis li ces peb yuav tso qhov tseeb tseg zuj zus mus.—Nyeem Loos 16:17, 18.
17. Peb yuav tau dab tsi yog tias peb paub qhov tseeb thiab tuav rawv qhov tseeb kom khov kho?
17 Thaum peb paub qhov tseeb thiab tuav rawv qhov tseeb khov kho ces peb yuav nrog nraim Yehauvas thiab peb txoj kev ntseeg yuav tsis qaug. (Efexus 4:15, 16) Peb yuav tsis mus mloog tej lus uas Xatas siv los haub ntxias tiam sis peb yuav nrog nraim Yehauvas thaum txog lub sij hawm muaj kev txom nyem loj kawg nkaus. Yog li ntawd kav tsij tuav rawv qhov tseeb, “tus Vajtswv uas pub peb muaj lub siab tus yuav nrog nraim nej.”—Filipis 4:8, 9.
ZAJ NKAUJ 122 Nyob Ruaj Nreeg!
a DAIM DUAB: Daim duab no lam ua piv txwv txog cov kwv tij uas nyob Xauviaj puag thaum ub. Lawv tau txais ib tsab ntawv zoo yam li yog tuaj ntawm lub hauv paus koom haum loj tuaj tiam sis tsuas yog los ntawm cov yeeb ncuab los xwb. Niaj hnub nim no cov yeeb ncuab kuj siv tej Is Taws Nej los dag txog Yehauvas lub koom haum.
