KUV LUB NEEJ
Kuv Tsuas Ua Raws Li Kuv Tes Haujlwm
DANAUS LAILIS (Donald Ridley) ua ib tug kws lij choj rau Yehauvas Cov Timkhawv tau 30 tawm xyoo. Nws pab ntau tus neeg to taub tias cov neeg mob muaj cai tsis pub kws kho mob txhab ntshav rau lawv. Nws pab Yehauvas Cov Timkhawv yeej ntau rooj plaub qib siab hauv tebchaws U.S.A. Danaus yog ib tug neeg nquag, txo hwjchim, thiab zoo siab hlo pab lwm tus.
Xyoo 2019, Danaus muaj ib tug mob loj uas kho tsis tau. Nws mob tsis ntev ces nws txawm tas sim neej rau lub 8 Hli tim 16 xyoo 2019 lawm. Zaj no yog hais txog nws lub neej.
Kuv yug hauv lub nroog Xees Phos xeev Minixauta tebchaws U.S.A. (St. Paul, Minnesota) xyoo 1954. Peb tsev neeg tsis nplua nuj tiamsis peb kuj tsis txom nyem thiab. Kuv niam thiab kuv txiv muaj 3 tug tub thiab 2 tug ntxhais. Kuv yog tus tub nrab. Peb tsev neeg yog Kav Tos Liv thiab kuv yog ib tug tub pab tus txiv plig. Kuv kawm ntawv hauv lub tsev kawm ntawv Kav Tos Liv. Txawm li ntawd los kuv tsis paub ntau txog phau Vajlugkub. Kuv paub tias yuav tsum muaj ib tug Vajtswv uas tsim ib puas tsav yam tiamsis lub tshawj Kav Tos Liv pab tsis tau kuv txojkev ntseeg.
KAWM PAUB QHOV TSEEB
Thawj xyoo uas kuv kawm ua kws lij choj, muaj ob niam txiv uas yog Yehauvas Cov Timkhawv tuaj ntawm kuv tsev. Thaum ntawd kuv tseem tabtom ntxhua khaub ncaws ces nkawd hais tias nkawd mam rov tuaj dua. Thaum nkawd rov qab tuaj kuv nug nkawd tias: “Ua cas cov neeg phem ho ua neej zoo dua cov neeg zoo?” thiab “Yuav ua li cas peb thiaj muaj kev zoo siab?” Nkawd muab ib phau ntawv thiab ib phau Vajlugkub ntsuab ntsuab rau kuv. Thaum kuv kawm Vajlugkub nrog nkawd kuv kawm tau ntau yam. Kuv zoo siab heev thaum kuv paub tias Vajtswv lub Nceeg Vaj yog lub tseem fwv uas yuav kav lub ntiajteb no. Kuv pom tau tias tibneeg tsis muaj peevxwm kav lub ntiajteb peb thiaj li raug kev txomnyem ntau yam.
Xyoo 1982, kuv muab kuv lub neej cob rau Yehauvas thiab ua kevcai raus dej ntawm lub rooj sib txoos hu ua “Kingdom Truth” (Qhov Tseeb Txog Lub Nceeg Vaj) nyob hauv Xees Phos. Lub lim tiam tom qab ntawd kuv mus xeem ua kws lij choj nyob ntawm tib lub tsev uas peb ua lub rooj sib txoos. Lub 10 Hli ntuj lawv qhia kuv tias kuv xeem tau lawm.
Thaum kuv mus lub rooj sib txoos kuv ntsib Kwvtij Maij Litshawxeem (Mike Richardson). Nws tuaj ntawm lub Npe-ee nyob Npluavlees (Brooklyn) tuaj. Nws qhia kuv tias lub koom haum hauv paus loj nyuam qhuav tsa ib chav uas pab hais plaub ntug rau cov Timkhawv. Ua rau kuv xav txog tus nraug sam Ethi-aupias cov lus hauv Tes Haujlwm 8:36. Kuv xav tias, ‘Muaj dabtsi khuam cheem ua rau kuv mus pab tsis tau cov kwvtij hais plaub ntug?’ Kuv thiaj rau npe mus ua haujlwm hauv Npe-ee.
Thaum kuv los ua Yehauvas ib tug Timkhawv kuv niam thiab kuv txiv tsis zoo siab hlo li. Kuv txiv nug kuv tias ua haujlwm hauv Npe-ee yuav pab tau kuv txoj haujlwm ua kws lij choj li cas. Kuv thiaj qhia nws tias kuv ua haujlwm pab dawb xwb thiab Npe-ee muab mentsis nyiaj rau kuv siv ib yam li cov uas ua haujlwm hauv Npe-ee.
Tom qab kuv ua haujlwm tiav rau ib lub tsev hais plaub, kuv mam li mus ua haujlwm rau lub Npe-ee hauv Npluavlees xeev Nus Yauj xyoo 1984. Kuv pib ua haujlwm hauv chav uas pab hais plaub ntug rau cov Timkhawv. Qhov uas kuv ua haujlwm hauv tsev hais plaub dua los lawm pab tau kuv kawg li.
KHO LUB TSEV XATEELIS TIADAWS
Lub tsev Xateelis Tiadaws thaum nyuam qhuav yuav tau
Lub 11 Hlis xyoo 1983 lub koom haum yuav tau lub tsev Xateelis Tiadaws (Stanley Theater) hauv lub nroog Ntsawxis Xiti xeev Nus Ntsawxis (Jersey City, New Jersey). Cov kwvtij mus thov ntawv los kho hluav taws xob thiab ciav dej rau lub tsev ntawd tiamsis thaum lawv mus ntsib cov nom tswv hauv lub nroog ntawd thiab qhia lawv tias Yehauvas Cov Timkhawv yuav siv lub tsev ntawd los ua lub tsev rooj sib txoos, cov nom tswv tsis tso cai. Lub nroog Ntsawxis Xiti txoj cai tsuas pub ua tsev pe hawm rau thaj tsam ua vaj tse rau neeg nyob xwb. Tiamsis lub tsev Xateelis Tiadaws nyob rau thaj tsam uas luag ua lag ua luam. Cov kwvtij rov thov dua tiamsis nom tswv tsis kam.
Lub koom haum coj qhov teeb meem no mus hais hauv lub tsev hais plaub. Kuv nyuam qhuav mus ua haujlwm hauv Npe-ee lub limtiam ntawd xwb tiamsis kuv twb ua haujlwm tau 2 lub xyoos hauv ib lub tsev hais plaub hauv Xees Phos lawm. Kuv thiaj paub txog qhov teeb meem no zoo. Peb ib tug kws lij choj nrog lawv cam tias tibneeg twb siv lub tsev Xateelis Tiadaws los ua ntau yam uas muaj neeg coob coob tuaj ua ke, xws li tuaj xyuas yeeb yaj kiab lossis tuaj xyuas neeg hu nkauj. Ua li cas lawv ho txwv tsis pub peb siv lub tsev ntawd los pe hawm Vajtswv? Lub tsev hais plaub txiav txim tias lub nroog Ntsawxis Xiti yuam cai rau peb txojkev teev tiam Vajtswv lawm. Lub tsev hais plaub thiaj kom lawv ua ntaub ntawv tso cai rau peb kho lub tsev Xateelis Tiadaws. Kuv thiaj pom tias Yehauvas siv txoj kev lij choj los pab nws lub koom haum ua nws tes haujlwm kom tiav li cas. Kuv zoo siab uas kuv muaj ib feem pab thiab.
Cov kwvtij txawm pib kho lub tsev Xateelis Tiadaws. Twb tsis tau muaj ib xyoos ces lub koom haum twb pib siv lub tsev ntawd lawm. Lub 9 Hlis tim 8 xyoo 1985 lub koom haum siv lub tsev no rau cov kawm Kile-a pab 79 mus nqa lawv daim ntawv kawm tiav. Kuv txoj haujlwm ua ntej kuv tuaj Npe-ee yeej piv tsis tau rau txoj haujlwm uas kuv ua rau Yehauvas. Kuv zoo siab heev uas kuv tau ua ib tug kws lij choj rau Yehauvas. Thaum ntawd kuv tsis paub tias Yehauvas tseem yuav siv kuv mus pab hais plaub rau nws cov neeg ntau tshaj no thiab.
TIV THAIV TXOJ CAI TSIS PUB TXHAB NTSHAV
Thaum 1980, txawm cov Timkhawv tsis pub tej tsev kho mob thiab kws kho mob txhab ntshav rau lawv los ntau zaus lawv yeej ua lawv lawm. Hajyam nyuaj heev rau cov pojniam uas muaj menyuam hauv plab rau qhov cov txiav txim plaub ntug hais tias lawv tsis muaj cai txwv cov kws kho mob kom tsis txhob txhab ntshav. Cov txiav txim plaub ntug hais tias yog leej niam tsis kam txhab ntshav es nws tuag lawm ces tus menyuam yuav tsis muaj niam tu nws.
Lub 12 Hlis tim 29 xyoo 1988, tus Muam Deniv Nikelaus (Denise Nicoleau) nchuav ntshav ntau heev tom qab nws yug tau nws tus tub. Cov kws kho mob ntshai tsam nws tuag, lawv thiaj xav txhab ntshav rau nws tiamsis nws tsis kam. Hnub tom qab ntawd thaum sawv ntxov lub tsev kho mob thiaj mus thov ib tug txiav txim plaub ntug kom nws tso cai rau lawv txhab ntshav rau Deniv. Tus txiav txim plaub ntug no yeej tsis tau nrog Deniv thiab nws tus txiv tham seb nkawd xav li cas thiab tsis qhia nkawd tias nws twb tso cai rau lub tsev kho mob txhab ntshav rau Deniv lawm.
Lub 12 Hlis tim 30, txawm tus Muam Deniv tus txiv thiab nws tsev neeg txwv npaum cas los lub tsev kho mob cia li yuam txhab ntshav rau nws. Hmo ntawd tub ceev xwm ntes nws tsev neeg ob peb tug nrog rau ib ob tug txwj laus vim lawv thaiv tsis pub txhab ntshav rau Deniv. Hnub tom qab ntawd, tej ntaub ntawv xov xwm, TV, thiab xov tooj cua muab qhov no tshaj tawm thoob plaws lub nroog Nus Yauj Xiti.
Thaum Filis Nploolis wb tseem hluas
Ob hnub tom qab ntawd kuv mus nrog ib tug txiav txim plaub ntug qib siab hu ua Metoos Malees (Milton Mollen) tham. Kuv piav rau nws txog qhov teeb meem thiab qhia tias tus txiav txim plaub ntug uas tso cai rau lub tsev kho mob txhab ntshav ntawd yeej tsis tau nrog Deniv thiab nws tus txiv tham li. Yawg Hlob Metoos hais kom kuv mus ntsib nws yav tav su dua thiab tham seb txoj cai hais li cas txog qhov teeb meem no. Tus kwvtij uas saib xyuas kuv hu ua Filis Nploolis (Philip Brumley) nrog kuv mus ntsib Yawg Hlob Metoos hmo ntawd. Yawg Hlob Metoos kuj hais kom lub tsev kho mob tus kws lij choj tuaj thiab. Peb yeej sib tham muaj ceem tsawv. Muaj ib zaug Kwvtij Filis sau ib daim ntawv cev rau kuv kom kuv ua siab txias mentsis. Qhov nws hais kuv ntawd zoo kawg li rau qhov thaum ntawd kuv yeej ua heev zog rau lub tsev kho mob tus kws lij choj.
Saib sab laug rau sab xis: Richard Moake, Gregory Olds, Paul Polidoro, Filis Nploolis, kuv, thiab Mario Moreno. Peb cov kws lij choj uas tuaj hais rooj plaub ntug Watchtower v. Village of Stratton hauv lub tsev tu plaub qib siab tshaj plaws hauv tebchaws U.S.A. (U.S. Supreme Court).—Mus saib phau Tsim Dheev! Askiv lub 1 Hlis tim 8 xyoo 2003
Tom qab ntawd Yawg Hlob Metoos hais tias tagkis lub tsev hais plaub yuav hais peb rooj plaub ua ntej. Thaum wb tabtom yuav los tsev Yawg Hlob Metoos hais ntxiv tias tagkis yuav tsis yoojyim rau lub tsev kho mob tus kws lij choj hais lawv zaj tias qhov lawv ua ntawd raug cai lawm. Cuag li Yehauvas qhia kuv tias li cas los peb yeej yuav yeej. Ua rau kuv xav tsis thoob li uas Yehauvas siv nws cov neeg los ua nws tes haujlwm.
Peb nyob ib hmo npaj peb cov lus uas peb yuav hais tagkis. Lub tsev hais plaub hauv lub nroog Npluavlees nyob tsis deb ntawm Npe-ee. Cov kwvtij nkauj muam ib txhia uas ua haujlwm hauv chav uas pab hais plaub ntug rau cov Timkhawv thiaj taug kev mus xyuas. Thaum peb hais peb zaj rau 4 tug neeg tu plaub ntug tas, lawv sawvdaws txiav txim tias qhov uas tus txiav txim plaub ntug tau tso cai rau lub tsev kho mob txhab ntshav ntawd tsis yog lawm. Lub tsev hais plaub qib siab tuaj tus Muam Deniv tog thiab hais tias qhov uas lawv cia li tso cai txhab ntshav ua ntej lawv nrog tus neeg mob tham yeej yuam cai lawm.
Tsis ntev tom qab ntawd lub xeev Nus Yauj lub tsev hais plaub qib siab kuj tuaj tus Muam Deniv tog tias nws yeej muaj cai tsis kam txhab ntshav. Rooj plaub no yog thawj roog ntawm 4 roog plaub ntug uas hais txog ntshav uas kuv muaj feem pab hais. (Saib lub ntsiab me “ Tej Plaub Ntug Peb Yeej Ntawm Tej Tsev Hais Plaub Qib Siab.”) Kuv kuj tau nrog lwm tus kws lij choj hauv Npe-ee pab hais plaub ntug txog kev sib txeeb metub menyuam, kev sib nrauj, thiab txog txoj cai siv av thiab vaj tse.
KUV TUS POJNIAM THIAB KUV TSEV NEEG
Kuv thiab kuv tus pojniam
Kuv tus pojniam lub npe hu ua Daum (Dawn). Thaum kuv ntsib nws, nws twb nrauj txiv lawm thiab muaj 3 tug menyuam. Nws ua haujlwm yug nws tsev neeg thiab tseem ua ib tug tho kev. Nws lub neej yeej txom nyem kawg tiamsis nws rau siab ntso teev tiam Yehauvas, ua rau kuv qhuas nws kawg. Xyoo 1992 thaum peb mus koom lub Rooj Sib Txoos 3 Hnub hauv lub nroog Nus Yauj Xiti kuv thiaj nug nws seb nws puas kam tham kuv. Ib xyoos tom qab xwb wb twb sib yuav lawm. Kuv zoo siab kawg li uas Yehauvas pub tus pojniam uas hlub nws thiab nyiam tso dag tso luag rau kuv. Kuv lub neej nrog Daum mas tsuas muaj qhov zoo nkaus xwb.—Pajlug 31:12.
Thaum wb sib yuav, cov menyuam muaj 11, 13, thiab 16 xyoo. Kuv xav ua ib leej txiv zoo rau lawv kuv thiaj nyeem tag nrho peb tej ntaub ntawv txog ua niam ua txiv tshiab. Yeej tsis yoojyim tiamsis kuv zoo siab heev uas tom qab no cov menyuam muab kuv hu ua txiv thiab saib kuv li ib tug phoojywg zoo. Wb zoo siab tos txais wb cov menyuam cov phoojywg thiab peb muaj kev lomzem kawg.
Xyoo 2013, Daum wb tsiv rau hauv lub xeev Vixawkooxees (Wisconsin) mus pab kuv txiv thiab Daum niam thiab txiv. Kuv zoo siab heev uas Npe-ee tseem siv kuv los pab lawv txog kevcai lij choj tej thaum thiab.
TIB PLIAG XWB KUV LUB NEEJ HLOOV LAWM
Lub 9 Hlis xyoo 2018, kuv pheej hus qa tsis tseg. Kuv mus ntsib kuv tus kws kho mob tiamsis nws tsis paub tias yog tim li cas. Lub 1 Hlis xyoo 2019 kuv mus ntsib dua ib tug kws kho mob, nws qhia kuv tias kuv muaj ib tug mob uas lawv kho tsis tau. Tus mob no yuav ua rau kuv mob thoob plaws ib ce.
Peb hnub tom qab ntawd kuv mus ua si. Kuv txawm ntog thiab sav kuv yag tes. Thaum ntawd kuv paub tias kuv tswj tsis tau kuv lub cev li qub lawm. Tus mob no mob sai kawg, ua rau kuv hais tsis tau lus, mus tsis taus kev, thiab nqos tsis tau dabtsi.
Kuv zoo siab heev uas kuv tau ua ib tug kwv lij choj pab Yehauvas lub koom haum. Thiab kuv zoo siab uas kuv tau sau ntau zaj ntawv rau hauv tej ntaub ntawv uas cov kws kho mob, kws lij choj, thiab cov txiav txim plaub ntug nyeem. Kuv kuj tau mus hais lus rau qhov txhia chaw thoob ntiajteb txog qhov uas Yehauvas cov neeg muaj cai tsis pub txhab ntshav thaum lawv raug mob lossis muaj mob. Txawm li cas los kuv xav ib yam li Lukas hais hauv Lukas 17:10 tias: ‘Kuv yog tus tubtxib uas tsis tseemceeb dabtsi li, kuv tsuas ua raws li kuv tes haujlwm xwb.’
