1. Yehauvas tau ua dabtsi los pab koj, koj thiaj los paub qhov tseeb?

KOJ los paub qhov tseeb li cas? Tej zaum koj niam koj txiv, cov neeg koj ua haujlwm nrog lossis cov koj kawm ntawv nrog qhia txoj xov zoo rau koj lossis tej zaum Yehauvas Cov Timkhawv tuaj nrog koj tham txog txoj xov zoo. (Malakaus 13:10) Yeej yog muaj ib tug mob siab qhia Vajlugkub rau koj, koj thiaj muaj kev sib raug zoo nrog Yehauvas thiab paub tias nws hlub koj. Yehauvas yog tus coj koj los rau nws thiab coj koj los ua Yexus Khetos ib tug thwjtim, koj thiaj li muaj kev vam thiab kev cia siab tias koj yuav tau nyob mus ib txhis. (Yauhas 6:44) Peb ua Yehauvas tsaug uas nws muab ib tug neeg qhia qhov tseeb rau peb thiab nws lees yuav peb.

2. Hauv zaj no peb yuav tham txog dabtsi?

² Nimno peb paub qhov tseeb lawm ces peb yuav tau mus qhia lwm tus kom lawv thiaj tau txojsia nyob mus ib txhis. Tej zaum yuav yoojyim rau peb mus tshaj tawm tiamsis tej zaum peb ho ntshai nug ib tug seb nws puas xav kawm Vajlugkub lossis peb ho ntshai qhia Vajlugkub rau lwm tus. Yog koj zoo li no ces tej peb yuav tham hauv zaj no yuav pab tau koj. Hauv zaj no peb yuav tham seb vim li cas peb thiaj xav mus coj tibneeg los ua Yexus cov thwjtim thiab peb yuav tham seb peb yuav ua li cas peb thiaj tsis ntshai qhia Vajlugkub rau ib tug. Ua ntej ntawd cia peb tham seb vim li cas peb yuav tsum mus tshaj tawm thiab qhia txoj xov zoo rau lwm tus.

3. Vim li cas peb thiaj mus tshaj tawm?

³ Thaum Yexus tseem nyob hauv ntiajteb, nws muab 2 tes haujlwm rau nws cov thwjtim ua. Ib txoj haujlwm yog nws kom lawv mus tshaj tawm txog Vajtswv lub Nceeg Vaj. (Mathais 10:7, NWT ) Yexus qhia rau nws cov thwjtim tias lawv yuav ua li cas thaum tibneeg mloog txoj xov zoo thiab tsis mloog. (Lukas 9:2-5) Yexus kuj qhia rau lawv tias lawv yuav mus tshaj tawm rau txhua qhov txhia chaw thiab “ua timkhawv rau txhua haivneeg.” (Mathais 24:14; Tes Haujlwm 1:8) Txawm tibneeg yuav mloog thiab tsis mloog los Yexus cov thwjtim yuav tsum mus tshaj tawm txoj xov zoo txog Vajtswv lub Nceeg Vaj.

4. Raws li Mathais 28:18-20, tsis yog hais tias peb mus tshaj tawm txog Vajtswv lub Nceeg Vaj xwb tiamsis peb yuav tau ua dabtsi thiab?

⁴ Yexus kuj hais kom nws cov thwjtim mus qhia tibneeg kom lawv paub coj raws li txhua yam uas nws twb qhia rau nws cov thwjtim lawm. Muaj ib txhia neeg hais tias Yexus cov lus sam hwm kom mus tshaj tawm thiab qhia txoj xov zoo yog hais rau nws cov thwjtim thaum ub xwb tiamsis tsis yog li ntawd. Yexus qhia tias nws cov thwjtim yuav tshaj tawm li no mus txog lub sijhawm kawg uas yog lub sijhawm uas peb nyob tamsim no. (Nyeem Mathais 28:18-20.) Tej zaum Yexus muab cov lus sam hwm no thaum nws los tshwm rau nws 500 tus thwjtim pom. (1 Kauleethaus 15:6) Thiab Yexus cov lus uas nws hais rau Yauhas qhia meej tias nws xav kom nws cov thwjtim mus pab lwm tus los paub txog Yehauvas.​—Tshwmsim 22:17.

5. Hauv 1 Kauleethaus 3:6-9, Paulus muab qhov uas peb mus tshaj tawm thiab coj tibneeg los ua Yexus cov thwjtim piv rau dabtsi?

⁵ Tus tubtxib Paulus muab qhov uas peb mus coj tibneeg los ua Yexus cov thwjtim piv rau kev cog qoob cog loo. Nws hais rau cov kwvtij nyob Kauleethaus tias: “Kuv yog tus cog, Apaulaus yog tus ywg dej . . . nej yog Vajtswv thaj teb.” (Nyeem 1 Kauleethaus 3:6-9.) Thaum peb mus tshaj tawm txoj xov zoo ces zoo ib yam li peb mus cog qoob loo. Thiab thaum peb mus qhia Vajlugkub rau ib tug ces zoo ib yam li peb mus ywg dej rau cov qoob hauv “Vajtswv thaj teb.” (Yauhas 4:35) Tiamsis peb paub hais tias Vajtswv yog tus ua kom cov qoob loj hlob.

6. Thaum peb qhia Vajlugkub rau ib tug peb yuav tsum pab kom lawv ua tau dabtsi?

⁶ Peb mus nrhiav cov uas xav tau txojsia ntev dhawv mus ib txhis. (Tes Haujlwm 13:48, NWT ) Peb xav pab kom lawv totaub Vajtswv Txojlus, ntseeg tej lawv kawm, thiab ua raws li tej uas lawv tau kawm. (Yauhas 17:3; Kaulauxais 2:6, 7; 1 Thexalaunikes 2:13) Yog hais tias txhua tus hauv lub koom txoos tos txais cov kawm Vajlugkub thiab hlub tshua lawv ces yuav pab tau lawv heev thaum lawv tuaj kev sib txoos. (Yauhas 13:35) Tus qhia Vajlugkub los yuav tau siv sijhawm ntau heev los pab tus kawm Vajlugkub nws thiaj yuav tso tau tej uas nws ib txwm ua uas tsis haum Vajtswv siab tseg. (2 Kauleethaus 10:4, 5) Tej zaum yuav siv sijhawm ntev heev peb thiaj li pab tau ib tug hloov nws lub neej thiab los ua kevcai raus dej tiamsis yeej tsis nkim peb lub zog li.

7. Vim li cas peb thiaj mus tshaj tawm thiab coj tibneeg los ua Yexus cov thwjtim?

⁷ Peb rau siab ntso mus tshaj tawm thiab coj tibneeg los ua Yexus cov thwjtim los twb yog vim peb hlub Yehauvas. (1 Yauhas 5:3) Sim xav seb thawj zaug uas koj mus tshaj tawm koj puas ntshai? Tej zaum koj yeej ntshai kawg tiamsis yog vim koj hlub Yehauvas thiab  koj xav ua li Yexus sam hwm koj thiaj li ua siab tawv qhawv mus tshaj tawm. Ua li, qhov uas mus qhia Vajlugkub rau lwm tus ne, puas nyuaj rau koj? Yog hais tias nyuaj rau koj ces mus thov Yehauvas cuab koj lub zog kom koj muaj lub siab xav mus coj tibneeg los ua Yexus cov thwjtim.

8. Raws li Malakaus 6:34, vim li cas peb thiaj xav mus qhia lwm tus txog txoj xov zoo?

⁸ Peb hlub peb cov kwvtij zej zog peb thiaj xav mus qhia qhov tseeb rau lawv. Muaj ib zaug thaum Yexus thiab nws cov thwjtim mus tshaj tawm ib hnub sab sab los, lawv xav hais tias lawv yuav mus so tiamsis ua cas thaum lawv tawm hauv lub nkoj los twb muaj ib pab neeg coob coob tuaj nyob tos lawv ntawm ntug dej lawm. (Nyeem Malakaus 6:34.) Txawm hais tias Yexus sab sab kawg los nws tsis mus so vim nws paub hais tias lawv raug kev txom nyem ntau heev thiab tsis muaj kev vam khom. Yexus hlub lawv heev nws “thiaj pib qhia ntau zaj rau lawv mloog.” Tibneeg niaj hnub nimno los yeej tsis txawv ntau. Txawm tias peb pom lawv muaj lub neej zoo thiab muaj kev zoo siab los lawv yeej muaj teeb meem thiab tsis muaj kev vam khom ib yam li cov neeg thaum ub thiab. Lawv zoo ib yam li cov yaj uas tsis muaj tsw. Paulus thiaj hais tias lawv zoo li cov neeg uas tsis muaj Vajtswv thiab tsis muaj chaw cia siab. (Efexus 2:12) Lawv tab tom taug txojkev uas yuav coj lawv mus raug kev puam tsuaj. (Mathais 7:13, TT ) Thaum peb xav txog cov neeg nyob hauv peb thaj tsam peb yeej hlub lawv kawg, peb thiaj li mus nrog lawv tham seb lawv puas xav kawm Vajlugkub.

9. Raws li Filipis 2:13, Yehauvas yuav pab koj li cas?

⁹ Yog hais tias koj ntshai qhia Vajlugkub rau ib tug vim koj paub hais tias yuav siv sijhawm ntau los npaj thiab mus qhia nws ces qhia rau Yehauvas paub thiab thov kom Yehauvas pub koj muaj lub siab xav mus nrhiav kom tau ib tug uas xav kawm Vajlugkub. (Nyeem Filipis 2:13.) Tus tubtxib Yauhas hais rau peb tias yog peb thov raws li Vajtswv lub siab nyiam ces Vajtswv yeej yuav teb peb tej lus thov. (1 Yauhas 5:14, 15) Yog li ntawd Yehauvas yeej yuav pab kom koj muaj siab xav mus qhia lwm tus.

10-11. Vim li cas thiaj nyuaj rau peb ib txhia qhia Vajlugkub rau lwm tus?

¹⁰ Peb paub hais tias qhov uas peb mus coj tibneeg los ua Yexus cov thwjtim yeej tseem ceeb heev tiamsis yuav muaj ntau yam ua nyuaj rau peb. Yog li ntawd cia peb tham seb tej uas yuav ua nyuaj rau peb yog dabtsi thiab peb yuav ua li cas peb thiaj peem dhau tej ntawd.

¹¹ Muaj ib txhia kwvtij nkauj muam ua tsis tau npaum li lawv lub siab xav vim lawv laus lawm lossis lawv muaj mob muaj nkeeg. Tiamsis thaum muaj tus kab mob COVID-19 no peb pom tias peb siv tau peb lub xov tooj ntawm tes thiab lwm yam twj los qhia Vajlugkub rau lwm tus. Yog li ntawd txawm hais tias peb mus tsis tau qhovtwg thiab nyob hauv tsev xwb los peb yeej tseem qhia tau Vajlugkub rau ib tug. Qhov no puas yoojyim mentsis rau koj? Muaj ib co, lawv xav kawm Vajlugkub tiamsis lawv tsuas khoom rau yav sawv ntxov lossis yav tsaus ntuj xwb. Koj puas qhia Vajlugkub tau rau lawv? Yexus los kuj mus qhia txoj xov zoo rau Nikaudemaus thaum tsaus ntuj thiab, vim nws xav kawm rau lub caij ntawd.​—Yauhas 3:1, 2.

12. Vim li cas peb thiaj paub hais tias peb yeej muaj peev xwm mus qhia Vajlugkub tau rau lwm tus?

¹² Tej zaum peb ntshai tsam peb mus qhia tsis  tau Vajlugkub rau lwm tus vim peb xav hais tias peb tsis paub thiab tsis txawj txaus. Yog koj xav li no ces tej zaum 3 yam no yuav pab tau koj. (1) Yehauvas paub tias koj yeej muaj tswvyim txaus mus qhia rau lwm tus. (2 Kauleethaus 3:5) (2) Yexus uas yog tus saib xyuas ib puas tsav yam saum ntuj thiab hauv ntiajteb no yog tus sam hwm kom koj mus qhia. (Mathais 28:18) Thiab (3), koj cov kwvtij nkauj muam yuav pab tau koj. Yexus los kuj cia nws Txiv pab nws thiab nws tsuas qhia li tej uas nws Txiv qhia nws xwb. Ces koj los yeej tso siab tau rau Yehauvas thiab. (Yauhas 12:49) Tsis tas li ntawd xwb tus kwvtij saib xyuas pawg koj nrog mus tshaj tawm, cov tho kev, thiab cov kwvtij nkauj muam uas paub tab yuav pab kom koj txawj qhia Vajlugkub rau lwm tus. Yog thaum lawv mus qhia Vajlugkub rau ib tug es koj nrog lawv mus los koj kuj kawm tau ntawm lawv thiab.

13. Vim li cas peb yuav tau hloov peb txojkev qhia Vajlugkub rau lwm tus?

¹³ Tej zaum yuav tsis yoojyim rau peb kawm ib yam tshiab lossis kawm siv ib yam twj tshiab. Xws li tamsim no peb yuav tau kawm kom peb paub siv phau ntawv Nyob Kaj Siab Lug Mus Ib Txhis. Phau ntawv tshiab no, peb yuav tsum ua tib zoo npaj ua ntej peb thiaj paub tias peb yuav qhia dabtsi thiab yuav qhia li cas rau tus kawm. Thaum peb qhia Vajlugkub rau nws, peb yuav tsum nyeem nqe puav xwb, dua li ntawd ces peb nrog nws tham txog zaj ntawd. Peb tso yeeb yaj kiab thiab saib lwm yam hauv peb lub vej xaij lossis JW Library^® nrog lawv. Yeej tsis yoojyim rau peb kawm ib yam tshiab tiamsis Yehauvas thiab koj cov kwvtij nkauj muam yuav pab kom koj txawj siv cov twj no mus qhia lwm tus. Thaum koj txawj siv cov twj no lawm ces koj yuav nyiam heev. Ib tug tho kev hais tias: “Txojkev kawm Vajlugkub tshiab tamsim no mas tsis yog tus qhia nyiam xwb tiamsis tus kawm los kuj nyiam thiab.”

14. (1) Peb yuav tsum nco ntsoov li cas yog tias cov neeg nyob thaj tsam uas peb mus tshaj tawm tsis nyiam mloog txoj xov zoo? (2) Ib Kauleethaus 3:6, 7 txhawb tau peb lub zog li cas?

¹⁴ Tej zaum nyuaj rau peb nrhiav tau cov uas xav kawm Vajlugkub vim cov neeg uas nyob thaj tsam uas peb mus tshaj tawm rau tsis nyiam txoj xov zoo lossis tawm tsam peb. Yog muaj li ntawd, yuav ua li cas peb thiaj tsis qaug zog? Nco ntsoov tias tibneeg lub neej hloov tas mus li ces cov uas thaum ub tsis vam khom Vajtswv nimno kuj hloov lawm los muaj. (Mathais 5:3, NWT ) Muaj ib txhia yav tas los tsis kam txais yuav peb tej ntaub ntawv li tiamsis nimno lawv los kawm Vajlugkub lawm. Tsis tas li ntawd, nco ntsoov tias Yehauvas yog tus Tswv teb thiab nws yog tus ua kom cov qoob loj hlob tiamsis nws xav kom peb mus cog thiab mus ywg dej. (Mathais 9:38; 1 Kauleethaus 3:6, 7) Thiab yog peb nco ntsoov tias Yehauvas muab nqi zog rau peb tsis yog vim peb qhia Vajlugkub rau coob coob tus tiamsis yog vim peb rau siab ntso mus pab tibneeg los paub txog nws ces yuav txhawb tau peb lub zog heev. *

15. Yehauvas xav li cas thaum nws pom ib tug los ntseeg thiab ua li tej nws kawm?

¹⁵ Yehauvas zoo siab heev thaum ib tug los ntseeg thiab pib mus qhia tej nws kawm rau lwm tus. (Pajlug 23:15, 16) Txawm hais tias xyoo 2020 muaj tus kab mob COVID-19 thoob plaws ntiajteb los Yehauvas cov tibneeg tseem mus qhia Vajlugkub tau rau  7,705,765 tus kawm Vajlugkub. Xyoo ntawd muaj 241,994 tus los ua kevcai raus dej ces cov uas nyuam qhuav ua kevcai raus dej no ho yuav mus qhia Vajlugkub thiab coj tibneeg los ua Yexus cov thwjtim. (Lukas 6:40) Peb paub tias Yehauvas yeej zoo siab heev thaum nws pom peb rau siab ntso mus coj tibneeg los ua Yexus cov thwjtim.

16. Zoo rau peb muaj lub hom phiaj zoo li cas?

¹⁶ Mus coj tibneeg los ua thwjtim yeej tsis yoojyim tiamsis yog Yehauvas pab peb ces peb yeej yuav ua tau. Yog li ntawd kuj yuav zoo rau peb muaj ib lub hom phiaj mus nrhiav kom tau ib tug uas xav kawm Vajlugkub. Yog hais tias peb nug txhua tus uas peb ntsib seb lawv puas xav kawm Vajlugkub ces tej zaum yeej yuav muaj ib tug uas xav kawm Vajlugkub nrog peb thiab. Yehauvas yeej yuav pab peb yog hais tias peb rau siab ntso ua tes haujlwm no.

17. Yog hais tias muaj ib tug uas peb qhia Vajlugkub rau, yuav ua rau peb zoo siab npaum li cas?

¹⁷ Qhov uas Yehauvas cia peb mus tshaj tawm thiab qhia qhov tseeb rau lwm tus yog ib qho koob hmoov uas zoo kawg nkaus thiab ua rau peb zoo siab heev. Tus tubtxib Paulus pab tau coob tus hauv lub nroog Thexalaunikes los ua Yexus cov thwjtim. Paulus hais tias: ‘Cov neeg uas yuav ua rau peb cia siab, ua rau peb zoo siab thiab ua rau peb muaj lus khav hais tias peb kovyeej lawm twb yog nej ntag. Rau qhov nej yog cov uas ua rau peb tau ntsejmuag thiab ua rau peb zoo siab.’ (1 Thexalaunikes 2:19, 20; Tes Haujlwm 17:1-4) Niaj hnub nimno los muaj coob tus xav ib yam li Paulus thiab. Tus muam Xatefanis (Stéphanie) thiab nws tus txiv uas coj tau coob tus los ua kevcai raus dej hais tias, “Yeej tsis muaj ib yam ua rau wb zoo siab npaum li qhov uas wb mus pab tau tibneeg los teev tiam Yehauvas.”