Ib xyoo tom qab ntawd ceg Npe-ee nyob Afika Qab Teb tau ib lub tshuab luam ntawv tshiab. Ces cov kwvtij thiaj nug seb peb puas muaj leejtwg xav mus pab lawv, kuv thiaj tso npe mus. Ntawm peb ceg Npe-ee lawv xaiv kuv thiab 3 tug kwvtij. Peb tug ntawd yog kwvtij Deniv Lij (Dennis Leech), Npis Makhelees (Bill McLellan), thiab Khees Nuadees (Ken Nordin). Cov kwvtij hais rau peb tias peb yuav mus nyob Afika Qab Teb ntev heev.

Kuv thiaj hu xov tooj mus qhia kuv niam tias: “Niam, kuv yuav mus Afika Qab Teb!” Kuv niam yog ib tug neeg ncauj lus tsawg tiamsis nws hlub Yehauvas heev ces txawm nws tsis hais dabtsi ntau los kuv paub tias nws kheev kuv mus. Kuv paub hais tias kuv yuav mus deb deb heev ces kuv niam thiab kuv txiv yuav nco kuv heev. Tiamsis nkawd yeej tsis cheem kuv.

Cov kwvtij xub xa peb mus kawm siv lub tshuab luam ntawv tshiab no nyob Npluavlees li 3 hlis. Ces peb mam li caij nkoj mus rau Afika Qab Teb. Thaum ntawd kuv nyuam qhuav muaj 20 xyoo xwb. Thaum peb mus txog Afika Qab Teb peb caij ib lub tsheb nqaj hlau mus rau Yauhananpaw (Johannesburg). Thaum ntawd twb tsaus ntuj lawm ces peb mus ib hmos twb yuav kaj ntug peb mam li mus txog ib lub menyuam zos muaj muaj plua plav thiab kub kub heev. Peb 4 leeg xauj nraum zoov ces peb thiaj xav hais tias peb tuaj ua dabtsi ntawm no? Ntau ntau xyoo tom qab ntawd peb rov tuaj txog thaj tsam ntawm no peb mam pom tias cov menyuam zos no kuj zoo xis nyob kawg.

Kuv lub luag haujlwm tau ob peb xyoo yog khiav lub tshuab luam Phau Tsom Faj thiab phau Tsim Dheev! Peb siv lub tshuab luam ntawv no heev kawg rau qhov peb luam ntau ntau yam lus tsis yog rau Afika Qab Teb xwb tiamsis rau ntau ntau lub tebchaws nyob rau sab Afika.

Tom qab ntawd, kuv ho mus ua haujlwm rau hauv ib cha uas saib xyuas kev luam ntaub ntawv, xa peb tej ntaub ntawv tawm thiab saib xyuas kev txhais lus. Kuv yeej khwv kawg tiamsis kuv zoo siab heev.

Kuv yuav pojniam xyoo 1968. Nws lub npe hu ua Lauvlam Npauees (Laura Bowen), nws ua ib  tug tho kev thiab nws ntaus ntawv rau Chav Saib Xyuas Kev Txhais Lus hauv Npe-ee. Lub sijhawm ntawd lawv tsis pub cov niam txiv uas nyuam qhuav sib yuav tshiab tshiab nyob hauv Npe-ee ces lawv thiaj kom wb mus ua 2 tug tho kev tshwj xeeb. Qhov no yeej ua rau kuv txhawj mentsis rau qhov 10 xyoo uas kuv ua haujlwm rau hauv Npe-ee kuv tsis nco qab txhawj txog zaub mov thiab chaw nyob. Nimno yog hais tias wb mus tshaj tawm tau cov sijhawm, rov mus xyuas cov uas wb mus tshaj tawm rau, thiab tseb tau cov ntaub ntawv raws li ib tug tho kev tshwj xeeb yuav tsum tau ua ces ib lub hlis twg wb ib leeg tau 25 lees (rand) uas thaum ub raug li $35 duas las nyiaj Mekas. Cov nyiaj no wb siv mus yuav zaub mov noj, them nqi vaj nqi tsev, them nqi tsheb, them nqi kho mob thiab lwm yam.

Wb raug xa mus tshaj tawm nyob ze lub zos Daws Npees (Durban), uas nyob ntawm tus dej hiavtxwv Is Dias. Thaj tsam no muaj cov neeg Is Dias nyob coob heev. Lawv yog cov neeg uas thaum ub tuaj ua teb kab tsib nyob thaj tsam no cov xeeb leej xeeb ntxwv. Nimno lawv ua lwm yam haujlwm lawm tiamsis lawv tej kab lig kevcai thiab lawv tej kev noj kev haus tseem zoo li qub thiab lawv hais lus Askiv ces yoojyim heev rau wb mus tshaj tawm rau lawv.

Cov tshaj tawm tshwj xeeb ib lub hlis twg yuav tsum mus tshaj tawm li 150 txoos teev. Ces thawj thawj hnub kuv pojniam wb thiaj li mus tshaj tawm li 6 txoos teev. Hnub ntawd mas kub thiab vaum kawg tiamsis wb tsis muaj cov rov mus xyuas thiab tsis muaj cov kawm Vajlugkub ces wb tsuas mus ib lub qhov rooj rau ib lub qhov rooj xwb. Zoo li wb mus ntev ntev lawm tiamsis kuv saib kuv lub moo no wb nyuam qhuav mus tau 40 feeb xwb. Kuv thiaj xav hais tias wb yuav ua li cas wb thiaj mus tshaj tawm tau 150 txoos teev.

Txhua hnub wb ntim su thiab ntim dej nrog wb. Thaum wb los so wb nres wb lub tsheb hauv qab ntoos nkaum tshav mas muaj cov menyuam Is Dias coob coob los sawv ncig wb thiab ntsia wb vim wb tsis zoo li lawv. Ob peb hnub tom qab xwb ces tsis nyuaj rau wb lawm. Zoo li ib hnub mus sai kawg tom qab wb mus tshaj tawm li ob peb txoos teev.

Wb zoo siab heev uas wb tau tuaj tshaj tawm rau cov neeg no. Lawv yog neeg siab dawb siab zoo, nyiam tos txais qhua thiab hwm Vajtswv heev. Muaj cov neeg His Dus (Hindus) coob coob nyiam txoj xov zoo uas wb coj tuaj qhia rau lawv. Lawv nyiam kawm txog Yehauvas, Yexus, phau Vajlugkub, lub neej uas yuav tsis muaj kev tsov kev rog yav tom hauv ntej thiab cov tuag yuav sawv rov qab los. Wb zoo siab kawg nkaus li uas 1 xyoo tom qab xwb wb muaj 20 tus kawm Vajlugkub. Txhua txhua hnub wb nrog ib tsev neeg uas wb qhia Vajlugkub rau noj mov ua ke.

Tsis ntev xwb ces wb ho raug xa mus ua tus saib xyuas thaj tsam rau cov zos uas nyob nram ntug dej hiavtxwv Is Dias. Txhua lub lim tiam uas wb mus xyuas cov koom txoos wb mus nrog ib tsev neeg nyob. Lawv hlub wb li wb yog lawv tsev neeg. Wb zoo siab uas wb tau nrog lawv tsev neeg thiab cov menyuam ua ke. Wb kuj nyiam lawv cov tsiaj thiab. Tib pliag ntshis xwb 2 xyoo twb dhau lawm. Muaj ib hnub Npe-ee hu xov tooj tuaj rau wb tias lawv xav kom wb rov qab mus ua haujlwm hauv Npe-ee. Kuv teb lawv tias kuv pojniam wb nyiam nyob no heev txawm li ntawd los wb yeej zoo siab hlo mus.

Kuv ua haujlwm hauv Chav Saib Xyuas Kev Tshaj Tawm hauv Npe-ee. Lub sijhawm ntawd thaum cov saib xyuas thaj tsam mus xyuas cov koom txoos tag ces lawv sau ntawv tuaj rau Npe-ee. Chav Saib Xyuas Kev Tshaj Tawm mam li sau ntawv rov qab mus rau cov koom txoos mus txhawb lawv zog. Kuv tau nrog cov kwvtij paub tab coob tus ua haujlwm ua ke. Thaum cov kwvtij saib xyuas thaj tsam sau ntawv tuaj rau Npe-ee, kuj muaj cov kwvtij uas pab muab txhais ua lus Hauxa (Xhosa), Xulus (Zulu) thiab lwm yam lus Afika. Kuv ua cov kwvtij no tsaug kawg uas lawv khwv heev thiab lawv pab kuv to taub tias peb cov kwvtij nkauj muam dub nyob Afika teb raug teeb meem li cas.

 Lub sijhawm ntawd cov neeg nyob Afika Qab Teb nyob tsis tau ua ke. Ib haivneeg nyias nyob nyias ib qho chaw ces lawv yeej tsis ua dabtsi ua ke li. Peb cov kwvtij nkauj muam dub uas nyob Afika Qab Teb los lawv muaj ntau ntau yam lus ces lawv tsuas mus tshaj tawm rau cov neeg uas hais lawv cov lus thiab mus lub koom txoos uas hais lawv cov lus xwb.

Thaj tsam uas kuv saib xyuas yog cov neeg hais lus Askiv xwb ces kuv tsis paub cov kwvtij dub coob. Nimno kuv mam li kawm thiab paub txog lawv tej kevcai dab qhuas. Kuv pom tias yeej tsis yoojyim rau peb cov kwvtij tiamsis lawv siab tawv kawg thaum lawv tseg tsis kam ua tej kevcai dab qhuas lossis tej kab lig kevcai uas tsis raws li phau Vajlugkub qhia es lawv tsev neeg thiab lawv tej zej zog tawm tsam lawv. Thaj tsam uas cov neeg txom nyem nyob, lawv tsis muaj kev kawm ntaub kawm ntawv hos cov uas ho tau kawm ntawv los kawm tsis siab. Tiamsis lawv sawvdaws nyiam phau Vajlugkub heev.

Kuv tau mus pab nrog lawv hais ob peb rooj plaub txog peb txojkev teev tiam Vajtswv thiab qhov uas peb tsis tuaj ib tog nom tswv twg tog. Kuv pom hais tias Yehauvas Cov Timkhawv cov menyuam raug rho tawm tsev kawm ntawv los twb yog vim lawv txojkev ntseeg. Lawv ua siab tawv qhawv tsis kam koom nrog lwm cov menyuam uas tsis teev tiam Yehauvas, thov Vajtswv ua ke thiab tsis nrog lawv hu lawv cov nkauj.

Peb cov kwvtij nyob hauv ib lub menyuam tebchaws Afika uas thaum ub hu ua Xuaxilees (Swaziland) los ntsib lwm yam teeb meem thiab thaum lawv tus huab tais Xaunpuxas tus 2 (Sobhuza II) tuag. Tag nrho cov pej xeem yuav tsum ua kab ke pam tuag xws li cov txivneej yuav tsum chais plaub hau hos cov pojniam yuav tsum txiav lawv cov plaub hau kom luv luv. Tiamsis tej no yog kev pe hawm tej poj koob yawm txwv ces peb cov kwvtij nkauj muam thiaj tsis kam ua. Twb yog vim li ntawd lawv thiaj raug kev tsim txom. Peb cov kwvtij txojkev ntseeg txhawb tau peb kawg li. Peb kawm tau los ntawm peb cov kwvtij Afika tias peb yuav tsum muab siab npuab rawv Vajtswv thiab ua siab ntev, peb txojkev ntseeg thiaj li yuav ruaj khov.

Xyoo 1981, kuv rov qab mus ua haujlwm hauv lub tsev luam ntawv. Kev luam ntaub ntawv hloov lawm ntau heev. Ib tug txiv neej muag tshuab luam ntawv muab tau ib lub tshiab rau peb sim siv dawb xwb seb peb puas nyiam. Peb thiaj li yuav tau 5 lub tshuab luam ntawv tshiab los hloov 9 lub qub. Nimno peb thiaj luam tau ntaub ntawv ntau tshaj qub.

Peb siv qhov computer program hu ua MEPS los pab peb npaj thiab muab cov ntaub ntawv tso ua ke ua ntej peb muab luam tawm. Cov tshuab luam ntawv nimno hloov ntau heev ntawm cov tshuab luam ntawv uas thaum ub peb 4 tug kwvtij uas tuaj Kanada tuaj ua haujlwm hauv Afika Qab Teb. (Yaxayas 60:17) Npis thiab kuv thiab wb ob tug pojniam tseem ua haujlwm hauv Npe-ee hos Khees thiab Deniv nkawd muaj pojniam tub se lawm thiab lawv nyob tsis deb ntawm Npe-ee. Peb cov pojniam hlub Yehauvas heev thiab puav leej tho kev ua ntej peb sib yuav.

Peb muab tej ntaub ntawv Vajlugkub txhais thiab luam tawm ua ntau yam lus thiab muab xa mus rau lwm ceg Npe-ee ces haujlwm muaj ntau zuj zus tuaj xwb. Twb yog vim li ntawd cov kwvtij thiaj ua tau ib lub tsev Npe-ee tshiab nyob rau hauv Yauhananpaw thiab muab lub tsev cob rau Yehauvas xyoo 1987. Kuv zoo siab heev uas Yehauvas cia kuv muaj feem nrog cov kwvtij nkauj muam ua lub tsev Npe-ee tshiab thiab tau ua ib tug ntawm Pab Uas Saib Xyuas Ib Ceg hauv ceg Npe-ee nyob Afika Qab Teb tau ntau ntau xyoo.

Xyoo 2001, kuv pojniam wb zoo siab kawg uas cov kwvtij caw kom kuv mus ua ib tug ntawm Pab Uas Saib Xyuas ceg Npe-ee nyob Mekas teb uas nyuam qhuav muaj tshiab. Wb yeej tsis xav tso wb tes haujlwm thiab tsis xav ncaim wb cov phoojywg hauv Afika Qab Teb li tiamsis wb zoo siab hlo mus ua haujlwm rau ceg Npe-ee nyob Mekas teb.

Wb tsuas txhawj mentsis txog Lauvlam niam xwb vim nws laus lawm thiab wb nyob Nus Yauj ces wb yuav pab tsis tau nws. Tiamsis Lauvlam 3 tug viv ncaus zoo siab hlo pab nws niam. Lawv hais tias txawm lawv ua tsis tau haujlwm puv ntoob rau Yehauvas los qhov uas lawv sib pab saib xyuas niam yuav pab wb ua tau wb tes haujlwm. Wb ua lawv tsaug uas lawv pab wb li ntawd.

Ib yam li Lauvlam 3 tug viv ncaus pab tu nws niam, kuv tus tijlaug thiab niam tij uas nyob Kanada kuj pab tu kuv niam thiab. Kuv niam twb nrog nkawd nyob tau 20 tawm xyoo lawm. Kuv pojniam wb los txog Nus Yauj tsis ntev ces kuv niam txawm tas sim neej lawm. Wb ua kuv niam tij thiab tijlaug tsaug uas nkawd hlub thiab tu kuv niam mus txog thaum tsis muaj nws lawm. Tu cov laus yeej tsis yog ib tes haujlwm yoojyim tiamsis wb zoo siab kawg uas wb tsevneeg zoo siab hlo sib pab.

Thaum kuv los txog tebchaws Mekas kuv pab saib xyuas chav uas luam ntaub ntawv. Cov tshuab luam ntawv nimno zoo dua thiab yoojyim dua qub lawm. Nimno kuv saib xyuas Chav Muas Khoom. Kuv los ua haujlwm rau ceg Npe-ee no tau 20 xyoo. Ceg Npe-ee no loj heev. Peb muaj li 5,000 tus uas nyob hauv no thiab muaj li 2,000 tus uas niaj hnub tuaj nrog peb ua haujlwm.

Rau caum xyoo dhau los, kuv yeej tsis tau xav tias kuv yuav tau los ua haujlwm ntawm no. Kuv pojniam yeej nrog nraim kuv thiab txhawb kuv lub zog los txog tas no. Thaum kuv xav txog tej haujlwm uas wb ua yav tas los, cov neeg uas wb ntsib, thiab tej ceg Npe-ee uas wb mus xyuas ua rau kuv zoo siab kawg. Yeej tsis muaj ib lub neej yuav zoo tshaj no lawm. Nimno kuv muaj 80 tawm xyoo thiab muaj cov hluas coob tus los pab ua haujlwm lawm ces cov kwvtij tsis pub kuv ua haujlwm ntau li qub lawm.

Tus sau Ntawv Nkauj hais tias: “Haivneeg uas muaj [“Yehauvas,” NWT ] ua lawv tus TSWV muaj kev kaj siab.” (Phau Ntawv Nkauj 33:12) Yeej muaj li tus sau nkauj no hais tiag! Kuv zoo siab heev uas kuv tau nrog Yehauvas cov neeg teev tiam nws ua ke.