TSAIB no tau muab txhiab txhiab tus kwvtij tsa ua tub leg num lossis txwj laus. Yog koj raug tsa ua ib tug tub leg num lossis ib tug txwj laus, koj yeej zoo siab heev uas koj tau leg haujlwm rau Yehauvas li no thiab tau pab koj cov kwvtij li no ntxiv.

Tiamsis yog koj nyuaj siab thiab txhawj txog tej haujlwm tshiab, tsis yog koj ib leeg thiaj xav li ntawd xwb. Yaxoo uas yog ib tug txwj laus hluas hais tias: “Thaum lawv nyuam qhuav muab kuv tsa ua ib tug txwj laus, kuv tsis paub xyov kuv puas yuav tuav tau tes haujlwm ntawd.” Mauxe thiab Yelemi nkawd kuj xav li ntawd thiab. Nkawd xav tias xyov nkawd puas yuav ua tau tes haujlwm uas Yehauvas muab rau nkawd ua. (Khiav Dim 4:10; Yelemi 1:6) Yog koj xav li ntawd, yuav ua li cas koj thiaj ua taus siab loj tsis txhob nkaum tes? Xyaum Timaute tus qauv.​—Tubtxib Tes Haujlwm 16:1-3.

Thaum Timaute muaj li 20 xyoo, nws nrog Povlauj mus ncig qhia Vajlugkub ib lub moos rau ib lub. Tej zaum Timaute yuav xav tias nws tsis tsim nyog mus qhia thiab qhuab ntuas cov kwvtij vim nws tseem hluas heev. (1 Timaute 4:11, 12; 2 Timaute 1:1, 2, 7) Tiamsis ntev mus ntev tuaj, nws ua tau zoo kawg li. Kaum xyoo tom qab ntawd Povlauj thiaj hais rau cov kwvtij hauv Filipi tias: “Kuv muaj siab vam rau hauv tus Tswv Yexus tias tsis ntev no kuv yuav txib Timaute tuaj cuag nej.” Vim li cas Povlauj thiaj txib Timaute mus? Nws hais tias: “Kuv tsis muaj leejtwg thooj li nws uas mob siab nej tiag tiag.”​—Filipi 2:19, 20.

Vim li cas zoo rau cov txwj laus xyaum Timaute tus qauv? Muaj 6 yam.

1. Nws hlub tibneeg tiag tiag. Povlauj hais rau cov kwvtij hauv Filipi tias Timaute “mob siab [lawv] tiag tiag.” (Filipi 2:20) Timaute xav kom cov kwvtij txav ze rau Yehauvas. Nws zoo siab hlo siv nws lub sijhawm dag zog pab lawv.

Viyees (William) uas twb ua ib tug txwj laus tau tshaj li 20 lub xyoos lawm hais rau cov txwj laus tshiab tias: “Hlub cov kwvtij. Xav ntsoov seb yuav pab lawv li cas es tsis txhob xav txog tias yuav tsum ua li cas lub koom txoos thiaj dhia zoo xwb.” Txhob ua li ib tug tsav tsheb npav uas xav mus kom ncav sijhawm tiamsis tsis tos tibneeg.

2. Nws muab Yehauvas tes haujlwm tso ua ntej hauv nws lub neej. Povlauj hais tias Timaute tsis zoo li cov uas “nrhiav tej uas muaj qabhau rau lawv xwb, tsis yog nrhiav tej uas muaj qabhau rau Yexus Khetos.” (Filipi 2:21) Povlauj pom tias lwm cov tsuas xav txog lawv lub neej xwb. Ib txhia tseem muab Yehauvas tes haujlwm tso ua qab lawm thiab. Tiamsis Timaute tsis ua li ntawd! Thaum Yehauvas qheb kev rau nws ua haujlwm ntxiv, nws ua raws li Yaxaya es teb hlo tias: “Kuv nyob ntawm no, thov txib kuv mus.”​—Yaxaya 6:8.

Yuav ua li cas koj thiaj pab tau koj tus kheej thiab lub koom txoos? Qhov 1, koj yuav tau ua li Povlauj cov lus no: “Xam pom tias yam twg tsim txiaj kawg nkaus.” (Filipi 1:10) Muab Yehauvas tso ua ntej. Qhov 2, zam tej uas nkim sijhawm thiab dag zog. Povlauj hais rau Timaute tias: “Cia li khiav ntawm tej kev phem uas cov hluas ntshaw . . . , cia li nrhiav txojkev ncaj ncees, kev ntseeg, kev hlub thiab kev sib hum xeeb.”​—2 Timaute 2:22.

3. Nws siv zog ua haujlwm rau Yehauvas. Povlauj hais tias: “[Timaute] nrog kuv koom ua haujlwm rau txoj xov zoo ib yam li ob txiv tub.” (Filipi 2:22) Timaute tsis tub nkeeg. Nws nquag nrog Povlauj ua  haujlwm. Qhov no kuj txhawb tau nkawd txojkev sib raug zoo thiab.

Yehauvas lub koom haum muaj haujlwm ntau heev rau sawvdaws ua. Tej haujlwm no yuav pab kom koj muaj kev kaj siab thiab pab kom koj nrog koj cov kwvtij nkauj muam sib raug zoo. Yog li, “cia li ua tus Tswv tes haujlwm puv npo txhua lub sijhawm.”​—1 Khaulee 15:58.

4. Nws ua raws li nws tau kawm. Povlauj sau ntawv mus rau Timaute tias: “Koj twb paub kuv tej lus qhia, kuv lub neej, tej uas kuv xav tseg, kuv txojkev ntseeg, qhov uas kuv ua siab ntev, qhov uas kuv hlub luag, qhov uas kuv tiv thev.” (2 Timaute 3:10) Timaute ua raws li nws tau kawm. Thaum kawg Povlauj thiaj txib nws mus ua haujlwm ntxiv.​—1 Khaulee 4:17.

Koj puas paub ib tug txwj laus uas twb ua txwj laus ntev heev lawm? Cia li xyaum li nws. Thoj (Tom) uas twb ua ib tug txwj laus tau ntau xyoo lawm, tseem nco thaum ib tug txwj laus uas paub tab dua nws tau pab nws. Nws hais tias: “Kuv niaj zaus thov kom nws pab tswvyim rau kuv. Kuv xyaum raws li nws hais. Kuv ua li no thiaj pab tau kuv ua siab loj.”

5. Nws rau siab ntso kawm ntxiv. Povlauj hais rau Timaute tias: “Koj yuav tsum ua lub neej xyaum kom tau lub siab uas hwm Vajtswv.” (1 Timaute 4:7) Tus neeg sib tw dhia yeej muaj xibhwb qhia tiamsis nws yuav tsum rau siab ntso xyaum nws tus kheej thiab. Povlauj txhawb Timaute tias: “Cia li kub siab nyeem Vajtswv txojlus rau sawvdaws mloog, thiab txhawb lawv lub zog thiab qhuab qhia. . . . Cia li ua tej haujlwm no thiab siv zog ua kom txhua tus thiaj pom tias koj kheev hlob zuj zus.”​—1 Timaute 4:13-15.

Koj yuav tau ua ib yam li ntawd thiab. Rau siab ntso kawm Vajlugkub thiab kawm tej yam tshiab uas lub koom haum luam tawm. Tsis txhob tso siab rau koj lub tswvyim. Tsis zoo rau koj xav tias vim koj niaj hnub kawm Vajlugkub ces thaum muaj teeb meem tsis tas koj yuav tshawb nrhiav ntxiv lawm. Xyaum li Timaute es “cia li ua tib zoo saib koj tus kheej thiab tej uas koj qhia.”​—1 Timaute 4:16.

6. Nws tso siab rau Yehauvas lub hwj huam dawb huv. Thaum Povlauj hais txog kev qhia Vajlugkub, nws hais rau Timaute tias: “Cia [lub hwj huam] dawb huv uas nyob hauv peb pab koj tuav rawv yam tsim txiaj uas muab cob rau koj lawd.” (2 Timaute 1:14) Timaute yuav tsum cia Vajtswv lub hwj huam dawb huv pab nws.

Danaus (Donald) uas yog ib tug txwj laus tau ntau xyoo hais tias: “Cov kwvtij uas tuav haujlwm yuav tsum muab lawv txojkev sib raug zoo nrog Vajtswv saib rau nqe. Cov uas ua li no yuav ‘muaj zog tsav ntxiv.’ Yog lawv thov kom Vajtswv pub nws lub hwj huam dawb huv rau lawv thiab yog lawv txi txiv raws li lub hwj huam ntawd, lawv yuav yog ib qho koob hmoov uas Vajtswv pub rau cov kwvtij.”​—Ntawv Nkauj 84:7; 1 Petus 4:11.

Zoo kawg li uas muaj cov tub leg num thiab cov txwj laus tshiab zoo li koj uas siv zog ua haujlwm ntxiv rau Yehauvas. Yaxoo uas hais tas los no hais tias: “Kuv ua ib tug txwj laus kuv kawm tau ntau yam kuv thiaj ua tau siab loj. Nimno kuv nyiam kuv tes haujlwm heev thiab pom tias yog ib qho koob hmoov zoo tshaj plaws!”

Koj puas rau siab ntso kom koj ua tau haujlwm ntxiv? Yog koj xyaum Timaute tus qauv ces koj yuav yog ib qho koob hmoov uas Vajtswv pub rau koj cov kwvtij.