1. Muaj pov thawj dabtsi qhia tias Yehauvas siab dawb siab zoo?

UA NTEJ Yehauvas tsim ib puas tsav yam, nws nyob nws tib leeg xwb. Nws mam tsim cov tubtxib saum ntuj thiab tibneeg hauv ntiajteb. Yehauvas yog tus Vajtswv uas “muaj kev zoo siab,” nws thiaj pub txhua yam zoo rau lwm tus. (1 Timaute 1:11, NW; Yakaunpau 1:17) Yehauvas xav kom peb muaj kev zoo siab, nws thiaj qhia kom peb paub ua siab dawb siab zoo.​—Loos 1:20.

2. Thaum peb pub rau luag, ua cas peb ho zoo siab dua?

² Vajtswv tsim tibneeg raws li nws tus yam ntxwv. (Chiv Keeb 1:27) Qhov no txhais tias Yehauvas tsim kom peb muaj tej yeeb yam zoo li nws. Yuav kom peb muaj kev zoo siab thiab tau Yehauvas tej koob hmoov, peb yuav tau xyaum nws. Peb yuav tsum xam pom lwm tus thiab muaj lub siab dawb paug pub rau luag. (Filipi 2:3, 4; Yakaunpau 1:5) Yehauvas yeej tsim kom peb txawj coj li ntawd. Txawm peb yog neeg txhaum los, peb yeej xyaum tau Yehauvas ua siab dawb siab zoo.

3. Hauv zaj no peb yuav kawm txog dabtsi?

 ³ Cia peb kawm seb phau Vajlugkub qhia li cas txog kev siab dawb siab zoo. Hauv zaj no peb yuav kawm tias thaum peb ua siab dawb siab zoo peb yuav ua rau Yehauvas zoo siab li cas, peb yuav muaj siab ua Yehauvas tes haujlwm li cas, thiab peb yuav muaj kev zoo siab li cas. Peb kuj yuav kawm tias vim li cas peb yuav tau rau siab ntso ua neeg siab dawb siab zoo.

4, 5. Yehauvas thiab Yexus nkawd ua siab dawb siab zoo li cas rau peb xyaum?

⁴ Yehauvas xav kom peb yoog nws. Yog peb ua siab dawb siab zoo, nws yuav txaus siab heev rau peb. (Efexau 5:1) Nws xav kom tibneeg muaj kev zoo siab thiab. Ua li cas peb thiaj paub li ntawd? Rau qhov nws tsim tau peb zoo heev thiab tsim tau lub ntiajteb thiab txhua yam hauv lub ntiajteb rau peb kom peb muaj kev zoo siab. (Ntawv Nkauj 104:24; 139:13-16) Yog li ntawd, thaum peb ua rau lwm tus zoo siab ces qhia tias peb hwm Yehauvas thiab xav yoog nws.

⁵ Peb kuj yoog tau Yexus thiab. Nws ua qauv qhia peb tias tibneeg yeej ua tau siab dawb siab zoo. Nws hais tias: “Neeg leej Tub tsis yog los rau leejtwg tu, tiamsis nws los tu lawv, thiab pub nws txojsia ua nqe txhiv neeg coob coob.” (Mathai 20:28) Thiab tus tubtxib Povlauj tau txhawb cov Khixatia kom “cia li muaj lub siab yam li no rau hauv nej ib yam li muaj rau hauv Yexus Khetos. . . . Nws yeem muab txhua yam tso tseg es saws lub neej zoo li tus qhev.” (Filipi 2:5, 7) Zoo rau peb xav txog lo lus nug no: ‘Kuv yuav xyaum Yexus li cas thiab?’​—Nyeem 1 Petus 2:21.

6. Yexus zaj lus piv txwv txog tus neeg Xamali qhia li cas rau peb? (Saib thawj daim duab hauv zaj no.)

⁶ Yog peb yoog raws li Yehauvas thiab Yexus nkawd yuav ua rau Yehauvas txaus siab heev. Peb yuav tsum xam pom lwm tus thiab nrhiav kev los pab lawv tiag tiag. Qhov uas peb ua li no tseem ceeb heev, Yexus thiaj hais zaj lus piv txwv txog tus neeg Xamali rau cov uas raws nws qab xyaum. (Nyeem Luka 10:29-37.) Yexus qhia tias lawv yuav tsum pab lwm tus, txawm tus ntawd yog haiv neeg twg thiab tuaj qhovtwg tuaj los xij. Tus txivneej Yudai nug Yexus li cas nws thiaj hais zaj lus piv txwv ntawd? Tus txivneej nug tias: “Leejtwg yog kuv li kwvtij zej zog?” Yexus zaj lus piv txwv qhia tias yog peb xav ua haum Yehauvas siab, peb yuav tsum ua siab dawb siab zoo rau lwm tus li tus Xamali.

7. Yog peb ntseeg tias tej uas Yehauvas hais yog tej uas zoo tshaj plaws, peb yuav ua li cas?

⁷ Vim li cas peb yuav tsum tsis txhob xam pom peb tus kheej tiamsis yuav tau ua neeg siab dawb siab zoo? Cia peb kawm seb tau muaj li cas hauv lub vaj Edee. Xatas hais tias yog Adas thiab Eva nkawd hla Yehauvas tej kevcai es xam pom nkawd tus kheej xwb nkawd yuav muaj kev zoo siab dua. Eva ntshaw kom nws zoo li Vajtswv nws thiaj tsis mloog Vajtswv lus. Adas los xav tau Eva xwb nws thiaj yeem ua kom haum Eva siab dua li ua haum Vajtswv siab. (Chiv Keeb 3:4-6) Thaum kawg thiaj tsim tau teeb meem loj heev. Qhov no qhia tias yog leejtwg xam pom nws tus kheej xwb, nws yeej yuav tsis muaj kev zoo siab li. Tiamsis yog peb xam pom lwm tus thiab ua siab dawb siab zoo ces yuav qhia tias peb xav ua li Yehauvas siab nyiam rau qhov tej uas nws hais yeej yog tej uas zoo tshaj plaws.

8. Vim li cas tsim nyog Adas thiab Eva nkawd xam pom lwm tus?

⁸ Adas thiab Eva nkawd ob leeg nyob hauv lub vaj Edee xwb, tiamsis tsim nyog nkawd yuav tsum xam pom leejtwg thiab? Tsim nyog nkawd xam pom nkawd cov menyuam thiab xav kom lawv tau lub neej zoo, muaj kev zoo siab li Yehauvas tau npaj tseg. Yehauvas tau muab ib teg haujlwm rau nkawd ua. Yehauvas hais kom nkawd muaj tub ki huaj vam coob puv nkaus ntiajteb thiab kom muab lub ntiajteb ua ib lub vaj kaj siab. (Chiv Keeb 1:28) Yehauvas xav kom nkawd tsev neeg sawvdaws sib pab ua tes haujlwm tseem ceeb ntawd ua ke!

9. Vim li cas qhov uas tibneeg muab lub ntiajteb ua ib lub vaj kaj siab ho ua rau lawv zoo siab?

⁹ Yog Adas thiab Eva nkawd tsis ua txhaum ces tsuas yuav muaj tibneeg zoo tiav log hauv lub ntiajteb no xwb. Lawv yuav tau nrog Yehauvas ua haujlwm muab lub ntiajteb no ua ib lub vaj kaj siab raws li Nws lub ntsiab. Xav seb lawv yuav txaus siab rau lawv lub neej npaum li cas! Yehauvas yuav foom koob hmoov nplua mias rau lawv vim lawv tsis xam pom lawv tus kheej xwb tiamsis xam pom lwm tus.

10, 11. Dabtsi yuav pab tau peb tshaj tawm txoj xov zoo thiab coj tibneeg los ua thwjtim?

¹⁰ Niaj hnub no, Yehauvas tau muab ib tes haujlwm tshwj xeeb heev rau peb ua. Nws xav kom peb tshaj tawm txoj xov zoo thiab coj  tibneeg los ua Yexus cov thwjtim. Yuav kom ua tau tes haujlwm no, peb yuav tsum hlub tibneeg. Yog peb hlub Yehauvas thiab hlub tibneeg tiag tiag peb yuav ua taus tes haujlwm no mus li.

¹¹ Povlauj hais tias nws thiab cov Khixatia nyob thawj 100 xyoo “koom nrog Vajtswv ua haujlwm” rau qhov lawv tshaj tawm txoj xov zoo thiab qhia qhov tseeb rau tibneeg. (1 Khaulee 3:6, 9) Niaj hnub no, yog peb ua neeg siab dawb siab zoo es siv peb lub dag zog, tej qhov txhia chaw, thiab lub sijhawm ua tes haujlwm uas Vajtswv pub rau peb ces kuj yog peb “koom nrog Vajtswv ua haujlwm” thiab. Qhov no yog ib qho koob hmoov zoo heev!

12, 13. Raws li koj pom, thaum yus mus coj tibneeg los ua thwjtim yus tau txais tej koob hmoov twg?

¹² Yog peb zoo siab hlo siv sijhawm thiab dag zog mus tshaj tawm thiab qhia Vajlugkub ces peb yuav muaj kev zoo siab xyiv fab. Coob tus kwvtij nkauj muam uas qhia Vajlugkub rau lwm tus tau pom li ntawd. Peb zoo siab heev thaum peb pom tus uas peb qhia Vajlugkub rau nkag siab tej uas nws kawm. Peb kuj zoo siab heev thaum nws kev ntseeg loj tuaj, nws pib hloov nws lub neej, thiab pib qhia lwm tus txog tej uas nws tau kawm. Thaum peb pom nws muaj kev zoo siab ua rau peb zoo siab thiab. Yexus kuj zoo siab ib yam li ntawd thaum 70 tus thwjtim mus qhia Vajlugkub rov los zoo siab xyiv fab hlo.​—Luka 10:17-21.

¹³ Peb cov kwvtij nkauj muam thoob ntiajteb zoo siab heev vim lawv pom tias txoj xov zoo hauv phau Vajlugkub yeej pab tau tibneeg lub neej. Xws li tus muam Ana. * (Saib cov lus hauv qab taw qhia.) Nws xav ua Yehauvas tes haujlwm ntxiv nws thiaj tsiv mus rau Yus Luv sab hnub tuaj. Nws mus pab tej koog uas tsis muaj cov tshaj tawm coob. Nws hais tias: “Kuv zoo siab kawg uas muaj tibneeg coob heev xav kawm Vajlugkub. Yehauvas tes haujlwm ua rau kuv zoo siab kawg li. Thaum kuv los txog tsev, kuv tsis muaj sijhawm xav txog kuv tus kheej. Kuv xav txog cov uas kuv qhia Vajlugkub rau seb yuav nrhiav kev mus pab daws lawv tej teeb meem thiab tej kev nyuaj siab li cas. Kuv pom muaj tseeb tias ‘thaum yus pub rau luag yus zoo siab heev dua thaum yus tau luag li.’”​—Tubtxib Tes Haujlwm 20:35, TMZ.

14. Txawm tibneeg tsis kam mloog los, ua li cas koj tseem muaj kev zoo siab?

¹⁴ Txawm tias peb thaj tsam tsis muaj neeg xav mloog los, peb yeej muaj kev zoo siab. Vim li cas? Rau qhov peb twb coj txoj xov zoo mus rau tibneeg lawm. Yehauvas txib peb li nws tau txib Exekhee: “Koj cia li hais kuv tej lus rau lawv mloog, lawv yuav mloog thiab tsis mloog kuj xijpeem.” (Exekhee 2:7; Yaxaya 43:10) Yog li ntawd, txawm tibneeg yuav mloog thiab tsis mloog los, Yehauvas yeej saib peb tes haujlwm rau nqe. (Nyeem Henplais 6:10.) Ib tug kwvtij hais tias: “Peb cog, peb ywg dej, thiab peb thov Vajtswv.  Vam tias Yehauvas mam ua kom lawv txojkev ntseeg loj hlob.”​—1 Khaulee 3:6.

15. Puas yog peb ua siab dawb siab zoo rau cov uas ris peb txiaj ntsig xwb? Piav seb.

¹⁵ Yexus xav kom peb muaj kev zoo siab nws thiaj qhia kom peb pub rau luag. Yog peb ua siab dawb siab zoo rau luag, luag yuav ua siab dawb siab zoo rau peb thiab. Yexus thiaj txhawb peb tias: “Cia li pub rau luag, mas nej thiaj li tau txais. Nej yuav tau txais co ceev nias puv nkaus thoob phwj yos rau hauv nej lub xubntiag. Nej muab lub thoob twg luj rau luag, yuav muab lub thoob ntawd luj rov rau nej ib yam nkaus.” (Luka 6:38) Thaum koj ua siab dawb siab zoo rau luag, tsis yog txhua tus yuav nco koj txiaj ntsig. Txawm tibneeg nco thiab tsis nco koj txiaj ntsig los rau siab ntso ua siab dawb siab zoo, koj yeej tsis paub tias yuav pab tau lawv npaum li cas.

16. Peb yuav tsum ua siab dawb siab zoo rau leejtwg thiab yog vim li cas?

¹⁶ Cov uas muaj lub siab dawb siab zoo tsis yog pub kom tau luag li los. Yexus hais tias: “Thaum koj muaj pluag noj cia li hu cov pluag, cov qhuav tes qhuav taw, cov tuag taw thiab cov dig muag, mas koj yuav tau hmoov zoo rau qhov lawv pauj tsis tau koj.” (Luka 14:13, 14) Phau Vajlugkub hais tias: “Tus uas lub siab dav yuav tau koob hmoov,” thiab “Tus uas mob siab cov neeg pluag kuj nyob kaj siab lug.” (Paj Lug 22:9; Ntawv Nkauj 41:1) Peb yuav tau ua siab dawb siab zoo vim peb xav pab lwm tus tiag tiag.

17. Peb yuav pub dabtsi rau luag peb thiaj muaj kev zoo siab?

¹⁷ Thaum Povlauj hais Yexus cov lus tias “thaum yus pub rau luag yus zoo siab heev dua thaum yus tau luag li,” tsis yog nws hais txog pub nyiaj txiag xwb. Peb txhawb tau luag lub zog, qhia tau phau Vajlugkub tej  tswvyim rau luag, thiab ua tau lwm yam los pab luag. (Tubtxib Tes Haujlwm 20:31-35, TMZ) Tej uas Povlauj hais thiab ua qhia tias tseem ceeb heev rau peb ua siab dav hlub lwm tus, xam pom lawv, thiab siv peb lub sijhawm lub dag zog los pab lawv.

18. Cov neeg tshawb fawb hais li cas txog qhov uas ua siab dawb siab zoo rau lwm tus?

¹⁸ Cov neeg tshawb fawb pom tias thaum tibneeg pub rau luag ua rau lawv zoo siab heev. Lawv sau tias cov neeg uas ua zoo rau lwm tus pom tias lawv kaj siab lawm ntau. Cov neeg tshawb fawb hais tias thaum peb pab lwm tus zoo li peb lub neej muaj hauv paus hauv ntsis. Yog li ntawd, lawv ib txhia thiaj hais tias tibneeg yuav tsum nqes tes pab ua haujlwm pub dawb rau lwm tus lawv thiaj noj qab nyob zoo thiab thiaj muaj kev zoo siab. Tej uas lawv pom no tsis yog ib yam tshiab rau peb rau qhov Yehauvas uas yog tus Tswv Tsim twb qhia lawm tias thaum yus pub rau luag ua rau yus zoo siab dua.​—2 Timaute 3:16, 17.

19, 20. Vim li cas koj thiaj xav ua neeg siab dawb siab zoo?

¹⁹ Vim cov tibneeg uas nyob ib ncig peb tsuas xam pom lawv tus kheej xwb, tsis yoojyim rau peb ua neeg siab dawb siab zoo. Tiamsis Yexus qhia tias 2 txoj kevcai tseem ceeb tshaj plaws yog qhov uas hlub Yehauvas kawg siab kawg ntsws, kawg tswvyim plab plaws thiab kawg dag kawg zog thiab qhov uas hlub kwvtij zej zog ib yam li peb hlub peb tus kheej. (Malakau 12:28-31) Hauv zaj no peb kawm tau tias cov uas hlub Yehauvas yeej xyaum nws tus qauv. Yehauvas thiab Yexus nkawd siab dawb siab zoo heev. Nkawd xav kom peb xyaum nkawd peb thiaj muaj kev zoo siab tiag tiag. Yog peb rau siab ntso ua neeg siab dawb siab zoo es ua Yehauvas tes haujlwm thiab pab tej neeg zej zog, peb yuav qhuas tau Yehauvas thiab yuav pab tau peb tus kheej thiab lwm tus.

²⁰ Tej zaum koj twb ua neeg siab dawb siab zoo pab txhua tus thiab yimhuab pab cov uas ua ib tse neeg hauv txojkev ntseeg lawm. (Kalatia 6:10) Yog koj rau siab ntso ua li no, tibneeg yuav nyiam koj ris koj txiaj ntsig thiab koj yuav muaj kev zoo siab. Phau Vajlugkub hais tias: “Tus uas lub siab dav pub tau yeej yuav nplua nuj, tus uas muab dej rau luag haus, luag kuj yuav pub dej rau nws.” (Paj Lug 11:25) Peb yeej ua tau siab dav pub rau luag thiab ua neeg siab dawb siab zoo. Hauv zaj tom ntej, peb yuav kawm seb peb ua tau li no li cas hauv peb lub neej thiab tes haujlwm peb ua rau Vajtswv.