1, 2. (1) Peb yuav tsum paub ua dabtsi thiab yog vim li cas? (2) Hauv zaj no, peb yuav kawm txog dabtsi?

PEB txhua leej txhua tus yuav tsum paub ntsuas tej xov xwm uas luag tshaj tawm seb muaj tseeb tiag los tsis muaj, peb thiaj tsis yuam kev. (Paj Lug 3:21-23; 8:4, 5) Yog peb tsis paub ua li no ces peb yuav raug Xatas thiab nws lub qab ntuj ntxias. (Efexau 5:6; Khaulauxi 2:8) Peb yuav tsum paub tias tej uas luag hais ntawd muaj tseeb tiag peb mam ntseeg. Paj Lug 18:13 hais tias: “Yog leejtwg teb ua ntej uas nws tsis tau hnov [“qhov tseeb,” NW] kuj yog nws txojkev ruam thiab kev txaj muag.”

² Vim li cas tsis yoojyim rau peb paub seb tej xov xwm peb hnov muaj tseeb tiag los tsis muaj? Phau Vajlugkub tej hauv paus ntsiab lus twg thiab tej qauv twg yuav pab tau peb? Zaj no yuav teb 2 lo lus nug no.

3. Vim li cas ho zoo rau peb ua raws li lub hauv paus ntsiab lus hauv Paj Lug 14:15? (Saib thawj daim duab hauv zaj no.)

³ Niaj hnub no, muaj ntau txojkev rau tibneeg tshaj tawm xov xwm, tsis hais hauv this vis, hauv Is Taws Nej, lossis lwm yam.  Tej zaum peb cov phoojywg kuj xa e-mail lossis ntaus hauv xov tooj xa xov xwm tuaj rau peb thiab. Xov xwm yeej muaj tsis txawj tag li. Yog li ntawd, peb yuav tsum ua tib zoo ntsuam xyuas kom zoo zoo. Tej zaum peb cov phoojywg yuav tsis xa tej lus dag tuaj rau peb, tiamsis muaj ib co neeg txhob txwm tshaj tawm tej lus dag lossis lus ya tuaj ntxias peb. Phau Vajlugkub tej hauv paus ntsiab lus twg yuav pab tau peb ntsuas seb tej uas peb hnov puas muaj tseeb tiag? Paj Lug 14:15 hais tias: “Tus neeg tsis thoob tsib ntseeg txhua yam, tiamsis tus uas paub qabhau ua tib zoo saib nws taug txojkev twg.”

4. (1) Raws li Filipi 4:8, 9 peb yuav tsum nyeem tej yam zoo li cas xwb? (2) Vim li cas ho tseem ceeb rau peb nyeem thiab saib tej yam tseeb xwb? (Saib lub ntsiab me “ Tej Xov Xwm Tseeb.”)

⁴ Yuav kom peb paub txiav txim siab zoo, peb yuav tsum saib seb qhovtwg yog qhov tseeb. Yog li ntawd, peb yuav tsum ua tib zoo xaiv tej uas peb nyeem. (Nyeem Filipi 4:8, 9.) Peb yuav tsum tsis txhob muab peb lub sijhawm xuam pov tseg mus saib tej vej xaij lossis nyeem tej e-mail uas hais lus paj lus cuav. Yimhuab tseem ceeb rau peb tsis txhob mus saib cov uas fav xeeb rau Yehauvas tej vej xaij uas txhawb nqa lawv lub tswvyim phem. Lawv lub hom phiaj yog los haub ntxias kom Vajtswv cov tibneeg plam kev ntseeg. Yog peb ntseeg tej xov xwm dag ces yuav ua rau peb yuam kev. Tsis txhob xav tias tej lus dag ntawd yuav ntxias tsis tau peb.​—1 Timaute 6:20, 21.

5. Cov Yixayee tau hnov tej xov xwm twg thiab lawv ua li cas xwb?

⁵ Tej xov xwm uas tsis muaj tseeb yeej tsim tau teeb meem loj heev. Nyob rau Mauxe tiam, thaum 12 tug tub tshuaj tebchaws mus tshuaj lub tebchaws uas Vajtswv cog tseg rov los, 10 tus tsuas qhia txog tej uas phem nkaus xwb. (Xwm Txheej Taug Kev 13:25-33) Lawv hais ntau tshaj qhov uas muaj tseeb thiaj ua rau Yehauvas cov tibneeg ntshai poob siab tag. (Xwm Txheej Taug Kev 14:1-4) Ua li cas Vajtswv cov tibneeg ho ntseeg 10 tus ntawd? Tej zaum lawv xav tias cov coob hais tsis zoo ces ntshe yeej tsis zoo tiag. Yog li ntawd, lawv thiaj tsis kam mloog 2 tug uas qhia txog tej yam zoo. (Xwm Txheej Taug Kev 14:6-10) Cov tibneeg tsis ua tib zoo nug kom paub hauv paus hauv ntsis, thiab lawv tsis tso siab rau Yehauvas. Lawv ua li cov neeg ruam es cia li ntseeg luag tej lus paj lus cuav.

6. Thaum muaj xov xwm txog Yehauvas cov tibneeg, vim li cas peb yuav tsum tsis txhob poob siab?

 ⁶ Vim li cas tseem ceeb heev rau peb ceev faj tsis txhob ntseeg txhua yam uas tibneeg hais txog Yehauvas Cov Timkhawv? Nco ntsoov tias peb tus yeeb ncuab Xatas yog “tus uas iab hiam peb cov kwvtij.” (Qhia Tshwm 12:10) Yexus ceeb toom peb tias cov uas tawm tsam Yehauvas yuav “dag iab hiam txhua yam lus phem” txog peb. (Mathai 5:11) Yog peb nco ntsoov Yexus cov lus ceeb toom ces txawm peb hnov tej xov tsis zoo txog Yehauvas cov tibneeg los peb yuav tsis poob siab.

7. Thaum peb xa e-mail lossis ntaus ntawv mus rau lwm tus, peb yuav tsum xub xav li cas?

⁷ Koj puas nyiam xa e-mail lossis ntaus ntawv mus rau koj cov phoojywg? Thaum koj hnov tej xov uas luag tshaj tawm lossis hnov txog ib yam dabtsi tsis txaus ntseeg li, koj puas ua li tug neeg tshaj xov xwm hauv this vis es maj nroos muab tshaj tawm rau sawvdaws paub? Ua ntej koj yuav xa e-mail lossis ntaus ntawv mus rau lwm tus, xub xav li no tso: ‘Kuv puas paub tias txoj xov ntawd muaj tseeb tiag? Kuv puas tau nug hauv paus hauv ntsis ua ntej tso?’ Yog koj muab tshaj tawm ua ntej koj paub qhov tseeb ces koj yuav zoo ib yam li tus neeg dag thiab. Yog li, yog koj  tsis paub tias muaj tseeb, tsis txhob muab xa mus rau lwm tus. Cia li muab lwv pov tseg!

8. Hauv tej lub tebchaws cov uas tawm tsam peb tau ua li cas thiab peb yuav tsum ceev faj tsis txhob txhawb lawv li cas?

⁸ Kuj tsis zoo rau peb lam tau lam xa e-mail lossis ntaus ntawv mus rau lwm tus rau qhov tej lub tebchaws tsis tso cai lossis txwv hlo peb tes haujlwm. Hauv cov tebchaws no, cov uas tawm tsam peb txhob txwm hais lug dag kom peb ntshai thiab kom peb ib leeg tsis tso siab rau ib leeg. Yav tas los tau muaj li no hauv lub tebchaws Xauviaj (Soviet Union). Lawv muaj ib pab tub ceev xwm hu ua KGB. Lawv txhob txwm dag tias ib co kwvtij uas tuav haujlwm hauv Yehauvas lub koom haum tau fav xeeb lawm. * (Saib cov lus hauv qab taw qhia.) Tu siab kawg uas cov kwvtij coob leej ntseeg tej lus dag ntawd thiab tsis kam nrog Yehauvas lub koom haum lawm. Thaum kawg ib txhia kuj rov los lawm tiamsis ib txhia tsis rov los li. Lawv cia tej lus dag ua rau lawv txojkev ntseeg qaug. (1 Timaute 1:19) Yuav ua li cas peb thiaj zam dhau tej teeb meem zoo li no? Peb yuav tsum tsis txhob maj ntseeg txhua yam uas peb hnov lossis maj muab qhia rau lwm tus. Tiamsis cia peb ua tib zoo nug seb puas muaj tseeb tiag tso.

9. Ua li cas tsis yoojyim rau peb paub tias tej xov xwm peb hnov muaj tiag los tsis muaj?

⁹ Tej thaud, tej xov xwm uas peb hnov tsuas muaj ib nrab tseeb xwb. Lwm txoj luag ho tsis qhia tag tag. Tej xov zoo li no yuav nyuaj heev rau peb paub tias muaj tseeb tiag los tsis muaj. Ib txoj xov xwm twg uas tsuas muaj ib nrab tseeb xwb yeej tsis tsim nyog peb ntseeg! Yuav ua li cas peb thiaj tsis qaug rau tej xov xwm zoo li ntawd?​—Efexau 4:14.

10. Vim li cas cov Yixayee ib txhia yuav luag mus ua rog rau lawv cov kwvtij tiamsis ua li cas lawv ho tsis mus lawm?

¹⁰ Cia peb tham txog cov Yixayee uas nyob ntawm ntug dej Yaladee sab hnub poob. (Yausua 22:9-34) Lawv hnov tias cov Yixayee uas nyob ntawm ntug dej Yaladee sab hnub tuaj tau ua ib lub thaj loj heev. Yeej muaj tseeb li ntawd tiag. Tiamsis lawv hnov tsis tag tias yog vim li cas lawv cov kwvtij ho ua lub thaj ntawd lawv thiaj xav tias lawv cov kwvtij fav xeeb rau Yehauvas lawm. Lawv txawm sau zog tuaj ua ke yuav mus ua rog rau lawv cov kwvtij. (Nyeem Yausua 22:9-12.) Tiamsis ua ntej lawv mus, lawv ho txib ib co txivneej mus nug seb puas muaj tseeb li lawv tau hnov. Lawv pom li cas xwb? Cov Yixayee uas nyob sab hnub tuaj tsis yog ua lub thaj los fij rau tej vajtswv cuav tiamsis yog los ua timkhawv rau sawvdaws tias lawv yog cov pe hawm Yehauvas. Ntshe cov Yixayee nyob sab hnub poob zoo siab heev uas lawv siv sijhawm mus nug seb puas muaj li lawv tau hnov ua ntej lawv mus ua rog rau lawv cov kwvtij.

11. (1) Mefinpause raug kev tsis ncaj ncees li cas? (2) Tsim nyog Davi yuav tsum ua li cas ua ntej tso?

¹¹ Yog peb hnov luag tham txog peb lub neej tiamsis luag tsuas piav ib nrab tseeb xwb yeej ua rau peb mob siab heev. Xav txog tej uas Mefinpause raug. Xa-u yog nws yawg, yog li ntawd Vajntxwv Davi thiaj muab hlo Xa-u tej liaj teb huvsi rau nws. (2 Xamuyee 9:6, 7) Tiamsis tom qab ntawd, luag dag rau Davi txog Mefinpause. Davi tsis nug kom paub tseeb tso, nws cia li muab ib puas tsav yam uas yog Mefinpause li tshem mus. (2 Xamuyee 16:1-4) Thaum Davi tau nrog  Mefinpause tham nws mam pom tias nws ua tsis ncaj rau Mefinpause lawm. Nws thiaj muab tej liaj teb ib nrab rov rau Mefinpause. (2 Xamuyee 19:24-29) Yog Davi siv sijhawm los nug Mefinpause seb puas muaj tseeb li nws tau hnov ntshe Mefinpause twb tsis raug tej teeb meem ntawd.

12. Thaum tibneeg dag txog Yexus nws ua li cas xwb?

¹² Yog muaj leejtwg dag txog koj, koj yuav ua li cas? Tau muaj li no rau Yexus thiab Yauhas uas muab neeg ua kevcai raus dej. (Nyeem Mathai 11:18, 19.) Yexus ua li cas xwb? Nws tsis siv nws lub dag lub zog los daws nws zaj. Tiamsis nws txhawb kom sawvdaws ua tib zoo ntsuas tej uas lawv hnov, lawv thiaj paub seb puas muaj tseeb los tsis muaj. Nws xav kom lawv saib nws tes haujlwm thiab tej uas nws qhia. Yexus hais tias: “Tswvyim tes haujlwm qhia tias tswvyim ua raug cai lawm.”

13. Thaum tibneeg dag txog peb, peb yuav ua li cas?

¹³ Yexus tus qauv pab tau peb li cas? Peb pom tias tej lub sijhawm tibneeg yuav ua tsis ncaj rau peb lossis yuav hais phem txog peb. Tej zaum peb txhawj tsam tej lus ntawd yuav rhuav tau peb lub npe. Tiamsis yog leejtwg dag txog peb, rau siab ntso ua qhov zoo, luag thiaj pom tias peb yog tus neeg zoo li cas tiag. Cia peb xyaum Yexus tus qauv. Peb tes haujlwm zoo mam qhia tias tej uas luag hais ntawd tsis muaj tseeb.

14, 15. Vim li cas tsis zoo rau peb vam khom peb txojkev txawj ntse?

¹⁴ Peb pom tias tsis yoojyim paub seb tej xov xwm twg muaj tseeb tiag. Tsis tas li ntawd xwb, vim peb yog neeg txhaum, muaj tej lub sijhawm peb yuav to taub yuam kev. Tej zaum peb twb teev tiam Yehauvas tau ntau lub xyoos thiab paub ntau yam lawm. Hos tej zaum lwm tus saib taus peb vim peb yog ib tug neeg paub tab. Yog muaj li no peb yuav tau ceev faj rau qhov tej no kuj yuav tsim tau teeb meem rau peb thiab.

¹⁵ Peb yuav tsum tsis txhob vam khom peb txojkev txawj ntse thiab tsis txhob cia peb lub siab ntxias tau peb xav yuam kev. Yog peb tsis ceev faj ces txawm peb tsis paub tag tag los, peb yuav cia li xav tias peb twb paub tshab lawm. Thaum muaj li no, yuav tsis zoo rau peb! Phau Vajlugkub ceeb toom tias peb yuav tsum ‘tsis txhob vam khom peb li kev txawj ntse.’​—Paj Lug 3:5, 6; 28:26.

16. Hauv zaj lus piv txwv no, tau muaj li cas hauv ib lub khw noj mov thiab Vam Tuam xav li cas?

¹⁶ Muab ua piv txwv li no: Muaj ib tug txwj laus hu ua Vam Tuam. Nws mus noj mov hauv ib lub khw, ua ciav nws pom Nom Pheej tuaj noj mov hauv thiab. Nom Pheej yog ib tug txwj laus muaj pojniam tub se tiamsis ua cas nws ho nrog lwm tus pojniam zaum noj mov luag ntxhi ua ke. Vam Tuam txhawj heev thiab xav tias: ‘Ntshe zaum no Nom Pheej nkawd ob niam txiv lub neej yuav tawg tas. Yuav ua li cas rau cov menyuam?’ Vam Tuam twb ua txwj laus tau ntau xyoo thiab twb  pom coob nkawm niam txiv lub neej tawg tag vim tej no. Yog koj yog Vam Tuam, koj yuav xav li cas?

17. Hauv zaj lus piv txwv no, tom qab Vam Tuam nrog Nom Pheej tham, nws mam pom li cas thiab peb kawm tau li cas?

¹⁷ Vam Tuam xav tias Nom Pheej coj tsis ncaj rau nws pojniam lawm tiamsis Vam Tuam ho ua tib zoo nug kom paub tseeb ua ntej tso. Hmo ntawd, Vam Tuam thiaj hu xov tooj mus nrog Nom Pheej tham. Nom Pheej thiaj qhia rau Vam Tuam tias tus pojniam ntawd yog nws tus muam. Nws nyob deb heev, tau ob peb xyoos no nkawd tsis tau sib pom lawm. Nws tuaj dua kev thiab tsuas muaj sijhawm nrog nkawd noj ib pluag mov tom khw xwb. Tiamsis Nom Pheej pojniam tsis xyeej nrog nkawd mus. Vam Tuam zoo siab heev uas nws tsis muab tej uas nws xav coj mus qhia rau lwm tus! Peb kawm tau li cas? Peb kawm tau tias txawm peb twb teev tiam Yehauvas tau ntau xyoo lawm los, peb yuav tsum ua tib zoo nug kom paub tseeb tso peb thiaj tsis xav yuam kev.

18. Peb yuav tsum ua li cas peb thiaj tsis ntseeg tej lus dag txog peb cov kwvtij?

¹⁸ Thaum hais txog ib tug kwvtij uas peb tsis tshua sib haum nrog, peb yuav tau ua tib zoo nug kom paub qhov tseeb peb thiaj tsis xav yuam kev rau nws. Yog peb pheej tib nws, peb yuav tsis tso siab rau nws. Ces thaum peb hnov luag hais tsis zoo txog nws, txawm tsis muaj pov thawj qhia tias tej luag hais muaj tseeb los, peb yuav cia li ntseeg hlo. Tej no qhia li cas rau peb? Qhia tias yog peb tsis muaj kev sib raug zoo nrog peb cov kwvtij, yuav yoojyim heev rau peb ntseeg tej lus dag txog lawv. (1 Timaute 6:4, 5) Peb yuav tsum tsis txhob khib peb cov kwvtij. Nco ntsoov tias Yehauvas xav kom peb hlub peb cov kwvtij thiab xav kom peb zam txim rau lawv tawm hauv lub siab dawb paug tuaj.​—Nyeem Khaulauxi 3:12-14.

19, 20. (1) Phau Vajlugkub cov hauv paus ntsiab lus twg pab tau peb ntsuas seb tej uas peb hnov muaj tseeb tiag los tsis muaj? (2) Zaj tom ntej no peb yuav kawm txog dabtsi?

¹⁹ Niaj hnub no, yeej tsis yoojyim nug kom tau qhov tseeb lossis ntsuas seb tej uas peb hnov muaj tseeb tiag los tsis muaj. Vim li cas? Rau qhov tej xov xwm uas peb hnov tsuas muaj ib nrab tseeb hos lwm txoj luag ho tsis qhia tag tag, thiab vim peb yog neeg txhaum peb kheev tso siab rau peb txojkev txawj ntse xwb. Tiamsis phau Vajlugkub tej hauv paus ntsiab lus yuav pab tau peb. Xws li, Paj Lug 18:13 uas hais tias: “Yog leejtwg teb ua ntej uas nws tsis tau hnov kuj yog nws txojkev ruam thiab kev txaj muag.” Paj Lug 14:15 kuj qhia rau peb tias: “Tus neeg tsis thoob tsib ntseeg txhua yam, tiamsis tus uas paub qabhau ua tib zoo saib nws taug txojkev twg.” Thiab Paj Lug 3:5, 6 sam hwm tias txawm peb twb teev tiam Yehauvas tau ntev heev lawm los, tsis zoo rau peb vam khom peb txojkev txawj ntse. Cia peb ua tib zoo ntsuas tej uas peb hnov seb muaj tseeb tiag los tsis muaj, phau Vajlugkub tej hauv paus ntsiab lus thiaj tiv thaiv thiab pab tau peb. Yog peb ua li no, peb yuav txawj txiav txim zoo thiab yuav tsis xav yuam kev.

²⁰ Puas muaj dabtsi uas yuav ua rau peb xav yuam kev thiab? Yeej muaj. Tibneeg kheev txiav txim raws li lub qhov muag pom. Hauv zaj tom ntej, peb yuav kawm tias ib txhia tau txiav txim raws li lawv lub qhov muag pom li cas thiab peb yuav ua li cas thiaj zam dhau tej ntawd.