1. Peb koom nrog Yehauvas ua tej haujlwm twg?

THAUM Yehauvas tsim tau tibneeg, nws xav kom lawv koom nrog nws ua haujlwm ua ke. Niaj hnub no txawm tibneeg yog neeg txhaum los, cov uas muab siab npuab Yehauvas yeej koom tau nrog nws ua haujlwm txhua hnub. Thaum peb mus tshaj tawm txoj xov zoo txog lub Nceeg Vaj thiab coj tibneeg los ua thwjtim ces twb yog “peb koom nrog Vajtswv ua haujlwm.” (1 Khaulee 3:5-9) Tes haujlwm no yeej yog ib qho koob hmoov zoo tshaj plaws li! Tiamsis qhov uas peb nrog tus Tswv Tsim ua haujlwm tseem muaj ntau fab ntxiv. Hauv zaj no peb yuav kawm tias thaum peb pab peb tsev neeg thiab cov hauv lub koom txoos, thaum peb tos txais qhua, thaum peb pab txhawb tes haujlwm ua Tsev Nceeg Vaj lossis nqes tes pab cov kwvtij uas raug xwm txheej phem, thiab thaum peb ua lwm yam ntxiv rau Yehauvas ces kuj yog peb koom nrog nws ua haujlwm thiab.​—Khaulauxi 3:23.

2. Vim li cas peb yuav tsum tsis txhob muab tej uas peb ua tau rau Yehauvas piv rau tej uas lwm tus ua tau?

² Thaum peb kawm zaj no, tseem ceeb heev rau peb nco  ntsoov tias peb sawvdaws nyias txawv nyias thiab nyias muaj nyias peevxwm. Ib txhia laus ib txhia hluas, ib txhia muaj mob ib txhia noj qab nyob zoo, ib txhia muaj metub menyuam ib txhia tsis muaj. Yog li ntawd, tsis txhob muab tej uas koj ua tau rau Yehauvas piv rau tej uas lwm tus ua tau. Tus tubtxib Povlauj hais tias: “Txhua tus nyias yuav tsum tshuaj nyias tes haujlwm thiaj khav tau nws tus kheej xwb, tsis muab piv rau lwm tus.”​—Kalatia 6:4.

3. Vim li cas thiaj hais tau tias tus uas saib xyuas nws tsev neeg kuj yog koom nrog Yehauvas ua haujlwm?

³ Yehauvas xav kom peb saib xyuas peb tsev neeg. Yog li ntawd, peb yuav tau mus khwv los yug peb tsev neeg. Coob tus niam tsev yuav tau nyob tsev zov lawv tej menyuam. Thiab thaum peb niam peb txiv tsis taus lawd, peb yuav tau saib xyuas lawv. Tej no yog tej uas peb yuav tau ua. Phau Vajlugkub hais tias: “Yog leejtwg tsis yug nws cov kwvtij thiab qhov loj tsis yug nws tsev neeg, tus ntawd twb tso kev ntseeg tseg lawm, nws tseem phem dua tus uas tsis tau ntseeg thiab.” (1 Timaute 5:8) Yog koj yuav tau saib xyuas koj tsev neeg li no, tej zaum koj yuav ua tsis tau Yehauvas tes haujlwm npaum li uas koj siab xav. Txawm li ntawd los tsis txhob qaug zog! Yehauvas txaus siab heev vim koj saib xyuas koj tsev neeg.​—1 Khaulee 10:31.

4. Cov niam txiv muab Yehauvas tes haujlwm tso ua ntej hauv lawv lub neej li cas thiab thaum lawv ua li ntawd pab tau leejtwg?

⁴ Thaum cov niam txiv Khixatia pab kom menyuam muaj hom phiaj ua Yehauvas tes haujlwm ces kuj yog lawv koom nrog Yehauvas ua haujlwm thiab. Coob nkawm niam txiv twb pab tau lawv cov menyuam li no lawm. Thaum lawv tej tub tej ntxhais loj hlob, lawv thiaj txiav txim siab mus ua Yehauvas tes haujlwm puv ntoob, tsis hais yuav mus rau sab ntuj twg. Ib txhia mus ua tubtxib tshaj tawm txawv tebchaws, ib txhia mus tho kev rau tej thaj chaw uas tsis muaj cov tshaj tawm coob, thiab ib txhia kuj mus ua haujlwm hauv Npe-ee. Cov uas muaj menyuam ua Yehauvas tes haujlwm li no yeej tsis tau nrog lawv ua ke pes tsawg. Txawm li ntawd los, lawv tseem rau siab ntso txhawb kom lawv cov menyuam ua Yehauvas tes haujlwm tsis tseg. Vim li cas? Rau qhov lawv zoo siab tias lawv cov menyuam muab Yehauvas tso ua ntej hauv lawv lub neej. (3 Yauhas 4) Cov niam txiv ntawd xav ib yam li Hana uas muab Xamuyee “qev” rau Yehauvas. Lawv zoo siab heev uas lawv muaj txoj koob hmoov nrog Yehauvas ua haujlwm ua ke.​—1 Xamuyee 1:28.

5. Koj pab tau cov kwvtij nkauj muam hauv lub koom txoos li cas? (Saib thawj daim duab hauv zaj no.)

⁵ Yog koj tsis muaj dabtsi khuam tes khuam taw, koj puas kam mus pab cov kwvtij nkauj muam muaj mob muaj nkeeg, cov laus, lossis cov uas xav tau kev pab? Tsis tas li ntawd xwb xav seb hauv koj lub koom txoos puas muaj tej tug uas xav tau kev pab. Tej zaum muaj tej tug muam uas tu nws niam lossis nws txiv, koj puas kam mus nrog nws niam nws txiv nyob ib tsam kom nws tau tes mus ua lwm yam? Lossis koj puas kam pab coj ib tug uas tsis muaj tsheb mus kev sib txoos, mus tom khw, lossis mus xyuas nws tus neeg tom tsev kho mob? Thaum koj ua li no ces kuj yog koj koom nrog Yehauvas ua haujlwm, tej zaum twb yog Nws siv koj los teb lwm tus tej lus thov.​—Nyeem 1 Khaulee 10:24.

6. Qhov uas peb tos txais qhua yog li cas tiag?

⁶ Cov uas koom nrog Vajtswv ua haujlwm ua ke yeej nyiam tos txais qhua. Hauv phau Vajlugkub, lo lus Kili “tos txais qhua” txhais tias “ua zoo rau cov uas txawv ntsej muag.” (Henplais 13:2) Muaj ntau tus qauv hauv phau Vajlugkub qhia tias yuav tsum ua siab dawb siab zoo li cas, zoo rau peb mus nyeem txog lawv cov qauv. (Chiv Keeb 18:1-5) Cia peb nrhiav kev los tos txais tej qhua, txawm lawv yog “cov uas ua ib tse neeg hauv txojkev ntseeg” thiab tsis yog los xij.​—Kalatia 6:10.

7. Yog koj tos txais cov uas ua haujlwm puv ntoob, yuav pab tau koj li cas?

⁷ Koj puas kam koom nrog Yehauvas ua haujlwm es tos txais cov uas ua haujlwm puv ntoob los so hauv koj tsev? (Nyeem 3 Yauhas 5, 8.) Yog koj ua li ntawd yuav pab tau lawv thiab kuj yuav pab tau koj. Phau Vajlugkub hais tias yog ua li ntawd “ib leeg yuav txhawb ib leeg lub zog.” (Loos 1:11, 12) Cia peb tham txog Aulas (Olaf). Thaum nws tseem hluas, muaj ib tug saib xyuas thaj tsam uas tsis muaj pojniam tuaj xyuas nws lub koom txoos tiamsis tsis muaj leejtwg muaj chaw rau nws so li. Yog li ntawd, Aulas thiaj thov nws niam nws txiv uas tsis yog Yehauvas Cov Timkhawv seb nkawd puas kam tus kwvtij los so hauv lawv tsev. Nkawd kam tiamsis nkawd hais tias Aulas yuav tau pw ntawm rooj xaus fas (sofa). Aulas thiaj zoo siab hlo ua li ntawd. Nws zoo siab heev uas nws tau nrog tus saib xyuas thaj tsam ua ke ib lub lim tiam nkaus. Txhua tagkis nkawd sawv los noj tshais, nkawd tham txog ntau yam. Tus saib xyuas thaj tsam txhawb tau Aulas heev nws thiaj txiav txim siab ua haujlwm puv ntoob rau Yehauvas. Aulas thiaj ua ib tug tubtxib tshaj tawm txawv tebchaws rau ntau lub tebchaws tau 40 lub xyoos lawm.

8. Txawm luag tsis ris peb txiaj ntsig los ua li cas peb yuav tsum ua zoo? Piav seb.

⁸ Peb yeej ua tau ntau yam pab cov uas txawv ntsej muag, txawm luag tsis ris peb txiaj ntsig los xij. Muaj ib tug muam hauv tebchaws Xapee kawm Vajlugkub nrog ib tug pojniam tuaj hauv tebchaws Ekadaus (Ecuador) tuaj uas hu ua Yexikas (Yesica). Muaj ib hnub thaum nkawd tabtom kawm Vajlugkub, Yexikas txawm quaj ntev loo rau nws. Yexikas hais tias ua ntej nws tsiv mus rau tebchaws Xapee, nws txom nyem heev. Muaj ib hnub nws thiab nws tus mentxhais tsis muaj dabtsi noj, tsuas tshuav dej haus lawm xwb. Nws thiaj muab mentsis dej rau nws tus mentxhais haus thiab muab nws ntxias pw ces Yexikas txawm thov Vajtswv. Ib pliag tom qab ntawd, 2 tug Timkhawv txawm tuaj khob Yexikas qhov rooj thiab muab tau ib phau ntawv rau nws. Tiamsis nws ua phem heev rau nkawd thiab muab phau ntawv dua kiag pov tseg. Nws hais tias: “No yog tej zaub mov uas neb muab rau kuv tus ntxhais noj lod?” Ob tug muam ua tib zoo nplig nws tiamsis nws tsis mloog li. Hnub ntawd 2 tug muam thiaj nqa tau ib co zaub mov mus tso rau ntawm nws qhov rooj. Yexikas xav txog thaum ntawd, nws thiaj quaj rau tus muam. Nws pom tias Vajtswv twb teb nws cov lus thov los nws tsis quav ntsej li. Yexikas thiaj txiav txim siab teev tiam Yehauvas. Twb yog vim 2 tug muam  muaj lub siab dawb siab zoo thiaj pab tau Yexikas.​—Laj Lim Tswvyim 11:1, 6.

9, 10. (1) Cov Yixayee tau nqes tes sib pab ua tej haujlwm twg? (2) Niaj hnub no cov kwvtij sib pab tuav tej haujlwm twg hauv lub koom txoos?

⁹ Txheej thaum ub, cov Yixayee nqes tes sib pab ua tej haujlwm pub dawb. (Khiav Dim 36:2; 1 Vaj Keeb Kwm 29:5; Nehemi 11:2) Niaj hnub no los kuj muaj ntau yam haujlwm rau koj pab ua thiab. Koj siv tau koj lub sijhawm, koj tej nyiaj txiag, thiab tej uas koj txawj los pab cov kwvtij nkauj muam. Yog koj ua li ntawd, koj yuav muaj kev zoo siab xyiv fab thiab Yehauvas yuav foom koob hmoov nplua mias rau koj.

¹⁰ Vajtswv Txojlus txhawb kom cov txivneej hauv lub koom txoos koom nrog Yehauvas ua haujlwm ua ke es ua tub leg num thiab ua txwj laus. (1 Timaute 3:1, 8, 9; 1 Petus 5:2, 3) Cov uas koom nrog Yehauvas ua haujlwm li no yeej xav pab lwm tus, tsis hais pab ntawm sab nqaij tawv lossis ntawm sab kev ntseeg. (Tubtxib Tes Haujlwm 6:1-4) Cov txwj laus puas tau thov koj pab tu thiab kho Tsev Nceeg Vaj, pab ua ib tug tub ncig num, pab saib xyuas tej ntaub ntawv, tej koog, lossis lwm yam? Cov kwvtij uas tau pab tuav haujlwm li no hais tias lawv yeej nyiam kawg li.

11. Qhov uas ib tug muam pab tsim tsa tej Tsev Nceeg Vaj pab tau nws li cas?

¹¹ Cov uas ua haujlwm pub dawb rau lub koom haum ntaus tau coob tus phoojywg. Ib tug muam hu ua Mantsis (Margie) tau nrog pab uas ua Tsev Nceeg Vaj tau 18 lub xyoos lawm. Txhua zaus lawv ua Tsev Nceeg Vaj, nws siv sijhawm nrog cov muam hluas thiab cob qhia lawv ua haujlwm. Nws hais tias ua li no ib leeg txhawb ib leeg lub zog heev. (Loos 1:12) Thaum Mantsis muaj kev nyuaj siab,  cov phoojywg ntawd yog cov uas txhawb nws lub zog. Koj puas tau ua haujlwm pub dawb tsim tsa tej Tsev Nceeg Vaj dua li? Txawm koj tsis txawj ua vaj tse los, koj yeej pab tau thiab.

12. Thaum muaj xwm txheej phem, koj pab tau li cas?

¹² Thaum muaj xwm txheej phem peb yuav koom nrog Yehauvas ua haujlwm ua ke li cas? Peb kuj pab tau nyiaj siab dawb. (Yauhas 13:34, 35; Tubtxib Tes Haujlwm 11:27-30) Tsis tas li ntawd xwb, peb kuj pab tu thiab kho cov kwvtij tej vaj tse. Ib tug muam Phaulees (Poland) hu ua Nkanpi-elas (Gabriela) lub tsev raug av qeeg puas ntau heev. Tiamsis thaum nws pom cov kwvtij nkauj muam tuaj pab nws, nws zoo siab heev. Nws hais tias thaum twg nws xav txog lub caij ntawd, nws tsuas xav txog tej koob hmoov uas nws tau xwb. Nws tsis nco txog tej qhov txhia chaw uas puas tsuaj tag lawd. Nws hais tias: “Tej uas kuv raug ntawd ua rau kuv pom tseeb tias los nyob hauv Yehauvas lub koom haum yog ib qho koob hmoov zoo heev thiab ua rau kuv zoo siab xyiv fab tshaj plaws li.” Coob tus uas tau kev pab li tus muam no kuj hais ib yam li ntawd thiab. Cov kwvtij uas tau mus pab lawv los yeej muaj kev zoo siab xyiv fab kawg li thiab.​—Nyeem Tubtxib Tes Haujlwm 20:35; 2 Khaulee 9:6, 7.

13. Thaum peb nqes tes pab lwm tus hajyam txhawb kom peb hlub Yehauvas li cas? Piav seb.

¹³ Thaum koj pab cov neeg thoj nam kuj yog koj koom nrog Vajtswv ua haujlwm ua ke thiab. Ib tug muam nyob tebchaws U.S.A. hu ua Xatefanis (Stephanie) thiab ib co tshaj tawm hauv nws thaj tsam tau ua li ntawd. Lawv tau pab cov Timkhawv uas ua thoj nam nrhiav tsev nyob thiab nrhiav rooj tog txaj chaw pw. Nws hais tias: “Peb pom tias lawv zoo siab xyiv fab thiab ris txiaj ntsig kawg li uas lawv muaj ib tsoom kwvtij hlub lawv. Tej no txhawb tau peb zog kawg li. Lawv xav tias peb pab lawv, tiamsis qhov tseeb tiag twb yog lawv pab peb. Peb pom tias lawv muaj kev hlub, kev sib koom siab, kev ntseeg, thiab tso siab plhuav rau Yehauvas mas hajyam ua rau peb hlub Yehauvas thiab nco nws lub koom haum txiaj ntsig.”

14, 15. (1) Tus cev Vajtswv lus Yaxaya coj li cas? (2) Cov Khixatia xyaum tau Yaxaya tus qauv li cas?

¹⁴ Koj puas xav nrog Yehauvas ua haujlwm ntxiv? Koj puas kam tsiv mus nyob tej thaj chaw uas tsis muaj cov tshaj tawm coob? Tseeb tiag, hauv peb zej peb zos los peb yeej ua tau siab dawb siab zoo rau lwm tus. Tiamsis cov kwvtij nkauj muam uas tsiv mus deb kuj ua tau zoo li Vajtswv tus cev lus Yaxaya. Thaum Yehauvas nug tias: “Kuv yuav txib leejtwg mus, thiab leejtwg yuav sawv peb  chaw mus?” nws txawm teb ntua tias, “Kuv nyob ntawm no, thov txib kuv mus.” (Yaxaya 6:8) Yog koj pab tau, koj puas yeem pab Yehauvas lub koom haum li no? Koj pab tau dabtsi xwb?

¹⁵ Yexus hais tias tes haujlwm tshaj tawm txoj xov zoo thiab qhov uas coj neeg los ua nws li thwjtim yuav zoo li cas? Nws hais tias: “Cov qoob uas zoo hlais muaj ntau heev, tiamsis cov tub zog muaj tsawg. Vim li no nej yuav tsum thov tus tswv teb kom txib tub zog mus hlais nws tej qoob.” (Mathai 9:37, 38) Koj puas kam mus tho kev rau tej thaj chaw uas tsis muaj cov tshaj tawm coob? Yog koj mus tsis tau, koj puas kam pab lwm tus mus? Coob tus mus tho kev rau tej thaj chaw uas tsis muaj cov tshaj tawm coob vim lawv xav qhia rau Yehauvas tias lawv hlub nws thiab tej neeg zej zog. Puas muaj lwm txojke uas koj ua tau ntau ntxiv rau Yehauvas? Yog koj ua tau, koj yuav muaj kev zoo siab heev.

16, 17. Koj ua tau haujlwm rau Yehauvas li cas ntxiv thiab?

¹⁶ Koj puas yeem mus ua haujlwm hauv Npe-ee lossis mus pab ua vaj ua tsev rau lub koom haum tsis hais mus ib ntus lossis mus ib ob hnub txhua lub lim tiam? Yehauvas lub koom haum xav tau cov uas yeem hlo xav mus pab. Txawm koj txawj ua yam haujlwm twg los, yog koj yeem hlo ua tes haujlwm uas Yehauvas lub koom haum muab rau koj ces lawv yeej tsis xyeej li. Yehauvas saib txhua tus uas yeem hlo xav pab nws lub koom haum rau nqe heev.​—Ntawv Nkauj 110:3.

¹⁷ Koj puas xav tau kev cob qhia ntxiv kom koj teev tiam tau Yehauvas ntau dua qub? Koj kuj rau npe mus kawm txoj Kev Kawm Rau Cov Qhia Lub Nceeg Vaj. Txojkev kawm no cob qhia cov kwvtij nkauj muam uas twb paub tab thiab twb ua Yehauvas tes haujlwm puv ntoob lawm. Lawv mus kawm ntxiv xwv lub koom haum thiaj siv tau lawv ua haujlwm ntau dua qub. Lub koom haum txib mus qhovtwg los lawv yuav tsum yeem hlo mus. Koj puas yeem hlo ua haujlwm ntxiv rau Yehauvas li no?​—1 Khaulee 9:23.

18. Yog koj koom nrog Yehauvas ua haujlwm txhua hnub yuav pab tau koj li cas?

¹⁸ Peb yog Yehauvas cov tibneeg, peb thiaj niaj hnub xyaum ua neeg zoo, hlub lwm tus, muaj lub siab dawb siab zoo, ua zoo rau luag, thiab txhawj txog luag. Peb ua li no peb thiaj muaj kev xyiv fab, kev siab tus, thiab kev zoo siab. (Kalatia 5:22, 23) Txawm koj lub neej zoo li cas los, yog koj xyaum Yehauvas es ua neeg siab dawb siab zoo thiab koom nrog nws ua haujlwm ua ke, koj yuav muaj kev zoo siab xyiv fab!​—Paj Lug 3:9, 10.