Vim li cas thiaj tsis pub muab Yehauvas Cov Timkhawv tej ntaub ntawv tso rau lwm lub vej xaij lossis tej vej xaij zeem phoojywg?

Vim peb tej ntaub ntawv peb muab pub dawb rau sawvdaws saib xwb, tsis yuav nqe, ib txhia xav tias yog lawv muab tso tawm lwm lub vej xaij lossis tej vej xaij zeem phoojywg los tsis txhaum. Tiamsis yog ib qho txhaum loj vim hla cai lawm, thiab kuj tsim tau teeb meem. Peb cov vej xaij muaj cov cai tiv thaiv hu ua Tso Cai Siv Li Cas. * (Saib cov lus hauv qab taw qhia.) Cov cai ntawd qhia meej tias: “Tsis pub muab cov duab, cov ntaub ntawv, cov cim, cov nkauj, cov yeeb yaj kiab, lossis lwm zaj lus qhia hauv lub vej xaij no tso tawm rau lwm lub vej xaij hauv Is Taws Nej (tsis pub tso rau lwm lub vej xaij, tsis pub tso hauv tej vej xaij uas luag theej tawm ywj siab, thiab tsis pub tso hauv tej vej xaij zeem phoojywg).” Vim li cas yuav tsum rhawv tej kevcai no?

Yehauvas Cov Timkhawv lub koom haum tuav tag nrho cov cai, txojcai tsis pub lwm tus luam lossis tso tawm. Tseem ceeb rau peb tsa tej cai tiv thaiv li no xwv lwm tus thiaj siv tsis tau peb tej ntaub ntawv ua tej uas tsis raws kevcai. Tej thaud, cov uas fav xeeb rau Yehauvas thiab lwm cov uas xav ua phem, muab peb tej ntaub ntawv tso rau hauv lawv tej vej xaij los ntxias Yehauvas Cov Timkhawv thiab lwm tus mus saib. Tiamsis lawv kuj muab tej yam uas txo tau peb txojkev ntseeg tso rau hauv thiab. (Ntawv Nkauj 26:4; Paj Lug 22:5) Ib txhia siv tej duab hauv peb lub vej xaij lossis lub cim jw.org los ua lag ua luam. Ib txhia muab tso tawm rau hauv lwm lub vej xaij rau luag tej nruab hauv twj. Vim txojcai txwv tsis pub ua li ntawd, peb muaj cai coj cov zoo li ntawd mus kom hauv tsev tu plaub, thiab txwv tsis pub lawv siv peb lub vej xaij ntxiv lawm. (Paj Lug 27:12) Yog peb cia ib txhia, tsis hais peb cov kwvtij lossis lwm tus ua li no ces tej zaum tej tsev tu plaub yuav tsis kam tiv thaiv peb lawm.

Tsis zoo rau peb mus theej tawm peb tej ntaub ntawv hauv lwm lub vej xaij los. Yehauvas siv “tus qhev ncaj thiab ntse” faib mov rau peb noj raws sijhawm. (Mathai 24:45) Tus “qhev” ntawd tsuas siv 3 lub vej xaij xwb, uas yog www.pr418.com, tv.pr418.com, thiab wol.pr418.com los pub zaub mov rau peb. Thiab tsuas siv JW Language^®, JW Library^®, thiab JW Library Sign Language^® nruab rau tej twj xwb. Cov vej xaij no thiaj tsis siv ua lag luam, thiab thiaj tsis muaj ib yam dabtsi txuam nrog Xatas lub qab ntuj. Tiamsis yog peb theej tawm peb tej ntaub ntawv hauv lwm lub vej xaij los ces lawv twb muab tej lo hloov lawm los peb tsis paub.​—Ntawv Nkauj 18:26; 19:8.

Tsis tas li ntawd xwb, yog peb muab peb tej ntaub ntawv thiab tej yeeb yaj kiab tso rau hauv cov vej xaij uas tibneeg ntaus tau lus rau ces cov uas fav xeeb rau Yehauvas thiab lwm tus yuav muaj lus thuam Yehauvas lub koom haum. Tej tug kwvtij kuj tau teb lawv tej lus thuam thiab nrog lawv sib cam. Qhov no yimhuab ua rau Yehauvas poob koob poob npe. Ntaus ntawv hauv Is Taws Nej li no yeej kho tsis tau tibneeg tej kev xav thiab pab tsis tau lawv los paub qhov tseeb. (1 Timaute 6:3-5; 2 Timaute 2:23-25) Peb yuav tau ceev faj tej vej xaij uas muaj ntsis zoo li lub koom haum lub lossis Pab Uas Ntaus Thawj ib tug twg lub. Tej vej xaij no yog vej xaij cuav xwb. Pab Uas Ntaus Thawj yeej tsis muaj ib tug muaj tej vej xaij zoo li no thiab lawv yeej tsis tso npe rau hauv tej vej xaij zeem phoojywg ib lub twg li.

Thaum peb qhia kom tibneeg mus saib jw.org, twb yog peb txhawb tes haujlwm tshaj tawm “txoj xov zoo.” (Mathai 24:14) Peb cov vej xaij tsuas zoo zuj zus tuaj lawm xwb. Peb xav kom txhua leej txhua tus paub txog peb cov vej xaij thiaj pab tau lawv. Yeej tso cai rau peb muab peb tej ntaub ntawv lossis peb lub vej xaij xa e-mail mus rau lwm tus. Yog peb ua li no, peb yuav coj tau tibneeg mus rau tej zaub mov uas “tus qhev ncaj thiab ntse” tau npaj. Lawv thiaj yog cov uas Yehauvas tsa los yug peb txojkev ntseeg xwb.