1. Muaj coob tus hluas tau ua tej yam zoo twg?

 IB XYOOS twg, yeej muaj coob leej ntau tus hluas tau ua kev cai raus dej rau Yehauvas. Yog tias koj tau ua kev cai raus dej yam li no, Yehauvas thiab cov kwv tij nkauj muam hauv koj lub koom txoos yuav nrog koj zoo siab heev. (Pajlug 27:11) Nco ntsoov hais tias koj twb tau kawm Vajlugkub tau ntau ntau xyoo lawm thiab tej uas koj tau kawm ntawd qhia rau koj tias yeej yog Vajtswv Txoj Lus tiag. Tsis tas li ntawd, koj txoj kev sib raug zoo nrog Vajtswv los yeej mos nyoos thiab tawg paj txi txiv koj thiaj txiav txim siab los mus ua kev cai raus dej. Yog muab zaum tsaws xav mas koj yeej ua tau ntau ntau yam zoo.

2. Nyob rau hauv zaj kawm no, yuav piav txog dab tsi?

 ² Ua ntej koj ua kev cai raus dej, koj txoj kev ntseeg Yehauvas yeej raug sim mus mus los los. Tsis tas li ntawd, thaum koj tiav niam tiav txiv lawm los, haj tseem yuav muaj lwm yam kev sim siab los raug koj. Nco ntsoov tias Xatas yuav sim koj txoj kev ntseeg thiab ua rau kom koj tso Yehauvas tseg. (Efexus 4:14) Koj yuav tau peem tiag tsis txhob pub Xatas rhuav tau koj txoj kev ntseeg. Ib yam uas yuav pab tau koj teev tiam Yehauvas mus li yog koj yuav tau rau siab ntso “kawm ntxiv lawm tom ntej” los tsav koj txoj kev ntseeg. (Henplais 6:1) Cia peb mam li soj ntsuas seb yuav kawm li cas.

3. Cov ntseeg yuav tau ua li cas tom qab ua kev cai raus dej tag?

³ Tom qab ua kev cai raus dej tag, peb txhua leej txhua tus yuav tau coj ib yam li tus tub txib Paulus tau hais rau cov ntseeg hauv lub nroog Efexus. Nws txhawb kom lawv rau siab ntso tsav lawv txoj kev ntseeg ntxiv zuj zus. (Efexus 4:13) Paulus muab peb txoj kev ntseeg piv ib yam li tus me nyuam hlob mos nyoos dhia rhees. Thaum ob niam txiv muaj ib tug me  nyuam mas nkawd hlub hlub tus me nyuam plhws ntshis. Tsis yog nkawd tus me nyuam yuav mos liab mus li, tiam sis yuav tau txawj hlob zuj zus. (1 Kauleethaus 13:11) Cov ntseeg los yuav tau txawj loj hlob yam li tus me nyuam tom qab ua kev cai raus dej tag lawm. Cia peb mam li ua tib zoo mus tham ib nqes zuj zus seb yuav tau ua li cas.

4. Piav seb peb yuav tau muaj dab tsi kev ntseeg thiaj hlob taus. (Filipis 1:9)

⁴ Cog peb txoj kev sib hlub rau Yehauvas kom khov kho. Koj twb paub Yehauvas lawm, tiam sis koj txoj kev ntseeg yuav tsum khov khwb kho rau Yehauvas. Tus tub txib Paulus qhia ib txoj hau kev uas yuav tsav tau koj txoj kev ntseeg nyob rau hauv Filipis 1:9. (Nyeem.) Paulus thov Vajtswv pab kom cov ntseeg nyob Filipis “yim huab txawj sib hlub.” Zoo tib yam li ntawd, yuav kom peb txoj kev sib hlub cog tau ruaj khov khwb kho rau Yehauvas, peb yuav tau “paub qhov tseeb thiab ua neeg thoob tsib.” Yog peb yim paub Yehauvas zoo, peb yim ris txiaj ntsig rau nws thiab tej uas nws tau ua. Peb xav ua txhua yam kom haum nws siab nkaus nkaus xwb. Yog li ntawd, Yehauvas lub siab xib li cas, peb xyaum ua li ntawd.

5-6. Piav seb txoj kev hlub yuav cog li cas thiaj ruaj khov rau Yehauvas.

⁵ Yehauvas coj li cas, Yexus coj li ntawd. Yog peb yim paub Yexus ces peb txoj kev ntseeg yim khov rau Yehauvas. (Henplais 1:3) Yog peb kawm plaub phau txoj xov zoo hauv phau Vajlugkub ces peb yuav paub seb Yexus coj li cas rau li cas. Yog tias peb tsis nyeem Vajlugkub txhua txhua hnub, tej zaud plaub phau txoj xov zoo yuav pab tau kom peb niaj hnub nyeem Vajtswv Txoj Lus. Thaum peb nyeem txog Yexus, ua tib zoo xav txog nws tus xeeb ceem. Neeg nyiam poog nws thiab los cuag nws, tsis hais tej me nyuam los yeej los nyob rau hauv nws lub xub ntiag. (Malakaus 10:13-16) Yexus muaj siab dawb siab zoo thiab nrog tau txhua tus, nws cov thwj tim thiaj qhia siab txhua yam rau nws. (Mathais 16:22) Yexus yoog tau raws nraim li nws Leej Txiv Yehauvas ntag. Yog peb xav thov Yehauvas lub sij hawm twg los tau. Peb qhib siab lug qhia txhua yam rau nws paub. Nws yeej tsis thuam peb rau ib qho twg vim nws txoj kev hlub tshua peb loj kawg nkaus li.​—1 Petus 5:7.

⁶ Yexus hmov tshua tib neeg kawg nkaus li. Tus tub txib Mathais sau li no tias: “Thaum Yexus pom cov neeg coob coob ntawd, nws hlub lawv heev vim lawv zoo li pab yaj uas tshaib tshaib tsis muaj tus tswv yug.” (Mathais 9:36) Yehauvas los kuj xav tib yam nkaus li ntawd. Yexus hais tias: “Kuv Leej Txiv uas nyob saum ntuj yeej tsis xav kom cov me nyuam no ib tug puas tsuaj li.” (Mathais 18:14) Cov lus no raug peb siab kawg nkaus li. Thaum peb yim paub txog Yexus, peb txoj kev ntseeg Yehauvas yim cog ruaj khov.

7. Yog peb nrog tus ntseeg paub tab, yuav pab tau peb li cas?

⁷ Thaum peb lauj sij hawm nrog cov ntseeg uas paub tab hauv koom txoos ces peb yuav txawj sib hlub thiab paub tab zuj zus tuaj. Cov ntseeg uas paub tab, lawv yeej muaj kev zoo siab thiab lawv yeej tsis khuv xim tej yam lawv tau ua rau Yehauvas. Tsis txhob ua siab deb, cia li nug kom lawv piav tej yam lawv tau ua rau Yehauvas qhia pub rau peb. Thaum peb txiav txim siab ua ib yam twg, yog peb xav nug seb lawv xav li cas los yeej tau. Nco ntsoov tias “yog muaj coob tus tuavxam yuav ua rau muaj kev tswjhwm ruaj khov.”​—Pajlug 11:14.

8. Peb yuav ua li cas yog peb ua xyem xyav txog tej yam peb kawm hauv phau Vajlugkub?

⁸ Tsis txhob ua xyem xyav. Nyob rau hauv  nqe 2, qhia hais tias Xatas yuav ua npaum li  nws ua tau los rhuav peb txoj kev sib raug zoo nrog Yehauvas. Ib qho nws ua ntawd yog nws xav kom ua xyem xyav txog tej yam peb kawm hauv phau Vajlugkub. Xws li, muaj ib txhia neeg yuav qhia rau peb tias, tos peb tshwm sim tau ua neeg los twb yog txia los. Thaum peb tseem yau ces yuav xav tsis txog tiam sis nim no peb hlob tuaj lawm, luag yuav qhia tej lus no rau hauv tsev kawm ntawv. Tej zaud peb yuav xav tias peb tus xib hwb tej lus hais tau raug siab kawg li. Nco ntsoov tias lawv twb tsis tau soj ntsuas seb puas muaj tus kws tsim. Nyob rau hauv Pajlug 18:17 hais tias: “Tus yeejkom uas xub peev lus hauv tsev tu plaub zoo li nws muaj cai kawg, tiamsis cia txog thaum tus pemkom peev lus tas tso.” Ua ntej peb yuav lam tau lam mloog tej lus qhia hauv tsev kawm ntawv, peb yuav tau ua zoo soj ntsuas seb Vajtswv Txoj Lus hais li cas. Peb mus tshawb nrhiav tej ntaub ntawv uas lub koom haum tau sau tseg thiab mus tsham nrog cov kwv tij nkauj muam uas yav thaum ub ntseeg tias neeg yog txia los seb lawv hais li cas. Nug seb ua li cas nim no lawv ho hloov siab los ntseeg tus kws tsim lawm. Yog peb mloog tej lawv piav ces peb yuav pom tau hais tias yeej muaj tus kws tsim tiag.

9. Peb khaws tau li cas los ntawm Paj Dawb?

⁹ Muaj ib tug muam ntseeg npe hu ua Paj Dawb. * Qhov uas pab tau nws tsis txhob ua xyem xyav yog mus kawm txog tej yam uas Vajtswv tau tsim. Nws hais tias: “Nyob rau hauv tej tsev kawm ntawv, cov xib hwb piav txog tej yam uas neeg txia los mas txaus ntseeg kawg li. Thaum thawj kuv yeej tsis xav mus tshawb fawb li vim kuv ntshai nyob tsam txia los, ho yog tiag. Tiam sis kuv xav mus xav los tias Yehauvas yeej tsis xav kom peb teev tiam nws es tsis paub tom ntej tom qab li. Yog li ntawd, kuv thiaj tshawb fawb. Kuv txawm mus nyeem tej ntaub ntawv lub koom haum luam tawm txog tej yam uas yog tsim los. * Kheev kuv lam mus tshawb fawb ua ntej ces kuv twb paub txog tej no zoo lawm.”

10-11. Dab tsi thiaj pab tau kom peb xav txog qhov zoo? (1 Thexalaunikes 4:3, 4)

¹⁰ Zam txoj kev phem. Thaum koj nto hluas plaws, koj yuav muaj lub siab ntshaw nrog lwm tus ua txij ua nkawm thiab tej zaud lwm tus los yuav haub ntxias kom koj nrog lawv pw  ua txij ua nkawm tib yam nkaus. Xatas xav kom koj mus ua li koj lub siab ntshaw. Yuav ua li cas koj thiaj ua tau qhov zoo qhov yog? (Nyeem 1 Thexalaunikes 4:3, 4.) Cia li qhib siab lug rau Yehauvas thaum koj thov nws. Qhia tej yam nyob nraim nkoos hauv koj lub siab rau nws paub thiab thov kom nws txhawb koj lub zog. (Mathais 6:13) Nco ntsoov tias Yehauvas yuav tsis rau txim rau koj tiam sis nws yuav pab koj. (Phau Ntawv Nkauj 103:13, 14) Mus nyeem Vajtswv Txoj Lus kom thiaj pab tau koj. Paj Dawb muaj ib lub siab ntshaw ntshaw mus ua kev plees kev yi. Nws thiaj hais tias: “Nyeem Vajlugkub txhua txhua hnub pab tau kom kuv tsis txhob mus ua li kuv lub siab ntshaw. Thaum kuv nyeem Vajtswv Txoj Lus li no, pab tau kom kuv nco ntsoov tias kuv yuav tsum muaj Yehauvas nyob rau hauv kuv lub neej thiab kuv yog nws ntiag tug.​—Phau Ntawv Nkauj 119:9.

¹¹ Tsis txhob xav tias koj mam li kho koj tej teeb meem xwb. Kav tsij mus qhia rau koj niam koj txiv paub xwv nkawd thiaj pab tau koj. Tej zaud koj yuav txaj muag piav qhia rau koj niam koj txiv paub tiam sis koj yuav tau ua tiag mus qhia rau nkawd, nkawd thiaj yuav txo tau koj lub nra. Paj Dawb hais ntxiv tias: “Kuv thov Yehauvas kom kuv muaj siab tawv qhawv mus nrog kuv txiv tham txog kuv tej teeb meem. Tom qab kuv qhia rau kuv txiv paub tag lawm, kuv lub siab txawm kaj lug. Kuv paub hais tias Yehauvas txaus siab rau qhov kuv ua ntawd.”

12. Yuav ua li cas koj thiaj txawj txiav txim siab tau zoo?

¹² Xyaum coj raws li tej hauv paus ntsiab lus hauv phau Vajlugkub. Thaum koj hlob zuj zus, koj niam koj txiv kuj cia koj txiav txim siab ua yam ub yam no zuj zus. Txawm li ntawd los tseem tshuav ntau yam koj haj tseem tsis tau paub. Yuav ua li cas koj thiaj tsis ua tau tej yam los rhuav koj txoj kev sib raug zoo nrog Yehauvas? (Pajlug 22:3) Muaj ib tug muam npe hu ua Kiab hais tias qhov uas pab tau nws coj tau zoo yog nws yuav tau ua ib tug ntseeg paub tab, nws thiaj tsis ua neeg coj nruj nruj. Nws hais tias: “Kuv yuav tsum paub tej hauv paus ntsiab lus hauv phau Vajlugkub zoo zoo kuv thiaj paub hais tias Yehauvas nyiam li cas.” Yog li ntawd, thaum koj nyeem Vajlugkub, koj yuav tau zaum tsaws xav li no tias: ‘Yehauvas nyiam li cas nyob rau hauv zaj kuv nyeem no? Kuv yuav khaws tej hauv paus ntsiab lus twg coj mus siv rau hauv kuv lub neej? Yuav pab tau kuv li cas yog kuv coj raws li tej hauv paus ntsiab lus ntawd?’ (Phau Ntawv Nkauj 19:7; Yaxayas 48:17, 18) Thaum koj nyeem phau Vajlugkub thiab zaum tsaws xav mus xav los txog tej hauv paus ntsiab lus ces koj yuav pom tau hais tias yeej tsis nyuaj ua luaj twg mloog Yehauvas lus. Ntev mus ntev tuaj thaum koj txoj kev ntseeg hlob zuj zus lawm, koj yuav tsis coj nruj li qub tiam sis yuav paub hais tias Yehauvas nyiam li cas xav li cas.

13. Koj tej phooj ywg pab tau koj li cas? (Pajlug 13:20)

¹³ Nrog cov phooj ywg uas rau rau siab teev tiam Yehauvas ua ke. Tej phooj ywg kwv luag uas koj niaj hnub nrog ua ke yuav pab tau kom koj ua ib tug ntseeg paub tab. (Nyeem Pajlug 13:20.) Muaj ib tug nkauj muam ntseeg hu ua Xw. Nws txoj kev ntseeg txawm tsuag zuj zus. Muaj ib yam uas pab tau nws kom nws rov qab kub siab teev tiam Yehauvas dua. Nws hais tias: “Kuv txawm mus poo tau ib co phooj ywg uas txhawb txhawb kuv lub zog. Txhua txhua lub lim tiam, muaj ib tug viv ncaus uas yog cov ntseeg, wb kawm Phau Tsom Faj ua ke. Hos muaj dua lwm tus pab kom kuv tsa tes teb hauv koom txoos. Vim muaj cov phooj ywg no txhawb txhawb kuv lub zog,  kuv thiaj kub siab kawm Vajtswv Txoj Lus thiab thov Vajtswv. Kuv txoj kev sib raug zoo nrog Yehauvas txawm nthuav dav zuj zus tuaj thiab kuv muaj kev zoo siab tshaj li yav thaud lawm.”

14. Ntxaij nrog tej phooj ywg kwv luag zoo li cas?

¹⁴ Koj yuav mus nrog tej phooj ywg kwv luag twg thiaj yuav pab tau koj? Muaj ib tug txwj laus npe hu ua Ntxaij tau hais tias: “Thaum kuv tseem hluas, kuv mus qhia Vajlugkub kuv thiaj mus poo tau tej phooj ywg kwv luag zoo. Qhov uas lawv kub siab lug teev tiam Yehauvas pab tau kom kuv rau siab ntso mus tshaj tawm txoj moo zoo tib yam nkaus. Kuv thiaj pib muaj hom phiaj ua hauj lwm puv ntoob rau Yehauvas. Kuv thiaj li xam pom hais tias tos kuv tsis tshua muaj phooj ywg coob los twb yog kuv pheej nrhiav tej tug uas muaj hnub nyoog tib yam nkaus li kuv xwb. Tom qab no thaum kuv nyob hauv Npe-ee, kuv muaj tej phooj ywg kwv luag zoo heev. Lawv tso tau yam ntxwv zoo heev rau kuv xyaum kom txawj xaiv tej yam kuv yuav saib los sis mloog. Tej uas lawv txhawb kuv no pab tau kom kuv yim huab nrog Yehauvas sib raug zoo.”

15. Paulus ceeb toom Timautes li cas? (2 Timautes 2:20-22)

¹⁵ Yog muaj tej tug nyob hauv lub koom txoos txw kom koj ua tej yam tsis zoo, koj yuav ua li cas? Paulus paub hais tias ib co neeg nyob hauv koom txoos tsis coj yam li ib tug ntseeg. Nws thiaj qhia kom Timautes tsis txhob mus poo lawv. (Nyeem 2 Timautes 2:20-22.) Peb txoj kev sib raug zoo nrog Yehauvas tseem ceeb heev. Peb twb khwv khwv los nrhiav tau Yehauvas. Yog li ntawd, tsis txhob kheev ib tug twg muab peb txoj kev sib raug zoo nrog Yehauvas rhuav pov tseg.​—Phau Ntawv Nkauj 26:4

16. Koj yuav tau xaiv tej hom phiaj twg?

¹⁶ Xaiv tej hom phiaj uas muaj nuj nqis. Xaiv tej hom phiaj uas yuav tsav tau koj txoj kev ntseeg thiab pab kom koj ua ib tug ntseeg paub tab. (Efexus 3:16) Xws li, lauj sij hawm los kawm thiab nyeem phau Vajlugkub. (Phau Ntawv Nkauj 1:2, 3) Los sis thov Yehauvas kom ntau zog thiab thov tawm plaws hauv nruab siab tuaj. Txuas ntxiv ntawd, ua zoo soj ntsuas tej yam koj saib los sis koj mloog thiab siv koj lub sij hawm kom muaj nuj nqis. (Efexus  5:15, 16) Thaum Yehauvas pom tias koj sib zog ntsos txhawb koj txoj kev ntseeg yam li no, nws yuav txaus siab heev rau koj.

17. Vim li cas ho zoo rau koj pab lwm tus?

¹⁷ Yuav kom koj ua ib tug ntseeg paub tab, koj yuav tau pab lwm tus. Yexus hais tias: “Thaum yus pub rau luag yus zoo siab heev dua thaum yus tau luag li.” (Tes Haujlwm 20:35) Yog koj lauj sij hawm thiab siv dag zog mus pab lwm tus, yuav ua rau koj kaj siab heev. Xws li, mus pab cov laus los sis cov muaj mob hauv lub koom txoos. Tej zaud koj mus pab lawv dhia lawv tej hauj lwm los sis pab qhia kom lawv txawj siv lawv tej twj ntawm tes. Yog koj yog ib tug kwv tij, cia li npaj koj lub hom phiaj los ua ib tug tub leg num xwv koj thiaj pab tau cov kwv tij nkauj muam ntseeg. (Filipis 2:4) Tsis tas li ntawd, nco ntsoov mus tshaj tawm txoj moo zoo kom thiaj pab tau neeg los paub Yehauvas. (Mathais 9:36, 37) Yog ua tau, cia li teem hom phiaj mus ua hauj lwm puv ntoob rau Yehauvas.

18. Ua hauj lwm puv ntoob pab tau koj txoj kev sib raug zoo nrog Yehauvas li cas?

¹⁸ Ua hauj lwm puv ntoob rau Yehauvas yuav ua rau koj yim huab nrog Yehauvas sib raug zoo. Yog koj ua ib tug tho kev, yuav pab tau kom koj mus kawm txoj Kev Kawm Rau Cov Qhia Lub Nceeg Vaj. Tej zaud, koj kuj mus ua tau hauj lwm rau hauv Npe-ee los sis mus pab ua vaj ua tsev rau lub koom haum. Muaj ib tug ntxhais hluas uas thov kev npe hu ua Kab hais tias: “Mus tshaj tawm txoj moo zoo tom qab ua kev cai raus dej nrog cov kwv tij nkauj muam mas txhawb tau kuv txoj kev ntseeg kawg nkaus li. Qhov uas lawv kub siab lug teev tiam Yehauvas pab tau kuv rau rau siab kawm Vajlugkub thiab kawm kom kuv haj yam txawj mus qhia Vajlugkub rau tib neeg.”

19. Yog koj rau siab ntso tsav koj txoj kev ntseeg, koj yuav tau txais tej koob hmoov twg?

¹⁹ Yehauvas yuav muab ntau yam rau koj yog koj rau siab ntso tsav kev ntseeg. Koj yuav mus ua tej yam uas muaj ntsiab rau hauv koj lub neej. (1 Yauhas 2:17) Koj yuav txawj txiav txim siab ua neej ces koj yuav tsis muaj kev nyuaj siab ntxhov plawv. Mus txog twg los koj yuav nyob kaj siab lug tso siab plhuav thiab ua dab tsi, los tau dab tsi. (Pajlug 16:3) Ntxiv ntawd, koj tseem yuav txhawb tau cov kwv tij nkauj muam ntseeg, tsis hais tus laus tus hluas. (1 Timautes 4:12) Qhov tseem ceeb tshaj, yog koj ua haum Yehauvas siab thiab nrog nws sib raug zoo, koj lub siab los yuav tus yees thiab txaus siab rau txhua yam koj tau ua.​—Pajlug 23:15, 16.