ZAJ KAWM 33
Yehauvas Yeej Saib Xyuas Nws Cov Tib Neeg
“[Yehauvas] yeej saib ntsoov txhua tus uas hwm nws.”—PHAU NTAWV NKAUJ 33:18.
ZAJ NKAUJ 4 Yehauvas Yog Kuv Tus Tswv Yaj
ZAJ NO THAM TXOG DAB TSI? *
1. Vim li cas Yexus ho thov nws Txiv kom saib xyuas nws cov thwj tim?
HMO ua ntej Yexus tuag, nws thov kom nws Txiv pab saib xyuas nws cov thwj tim. (Yauhas 17:15, 20) Txawm Yehauvas ib txwm yeej saib xyuas nws cov tib neeg los Yexus paub ntsoov hais tias Xatas yuav sawv tawm tsam nws cov thwj tim heev. Yexus xam pom tias yuav kom cov thwj tim thev dhau tej uas Xatas ua rau lawv, yuav tsum muaj Yehauvas ua tus pab lawv.
2. Raws li Phau Ntawv Nkauj 33:18-20, vim li cas peb yuav tau txhob ntshai tej kev sim siab peb raug?
2 Lub sim ceeb uas Xatas kav no, tsub ntau yam kev nyuaj siab ntxhov plawv rau peb. Tej teeb meem peb raug yuav txo tau peb txoj kev ntseeg thiab sim seb peb puas tseem teev tiam Yehauvas. Nyob rau hauv zaj kawm no, peb yuav pom tau hais tias kom cia li ua lub siab loj nteev. Yehauvas yeej saib ntsoov peb thiab nws pom txhua yam teeb meem los raug peb. Cia peb mus soj ntsuas ob tug yam ntxwv nyob hauv phau Vajlugkub uas qhia hais tias Yehauvas “yeej saib ntsoov txhua tus uas hwm nws.”—Nyeem Phau Ntawv Nkauj 33:18-20.
THAUM PEB XAV TIAS PEB IB LEEG
3. Lub sij hawm twg peb xav tias tshuav peb ib leeg?
3 Txawm peb muaj cov kwv tij nkauj muam coob heev nyob rau hauv tej koom txoos los qee lub caij zoo yam li peb ntsuag ntsuag nos. Xws li muaj tej tug hluas, thaum lawv yuav tau qhia lawv txoj ntseeg rau tej tub ntxhais uas nrog lawv kawm ntawv los sis thaum lawv tsiv mus nyob dua lwm lub koom txoos tshiab. Ib txhia lub siab puas tsoj puas tsus tag ua rau lawv xav hais tias yuav ua li cas thiaj thev dhau. Lawv tsis xav qhia rau leej twg paub, txawm qhia los lwm tus yeej tsis to taub li. Muaj qee lub sij hawm lawv yuav xav tias twb tsis muaj neeg khuv leej lawv. Muaj ib txhia ua neej nyob ntxhov siab hnyo, tig sab twg los tws kev tag. Yehauvas tsis xav pom peb nyob lub neej zoo li ntawd. Cia peb mam mus tham ntxiv seb yog li cas tiag.
4. Vim li cas Eliyas ho hais tias: “Tsuas tshuav kuv tib leeg xwb”?
4 Cia peb mus tham txog Eliyas lub neej. Thaum Yexenpees cog lus yuav muab nws tua pov tseg, nws tau khiav mus nkaum tshaj li 40 hnub. (1 Vajntxwv 19:1-9) Lub sij hawm ntawd nws nyob ib leeg txias to hauv ib lub qhov tsua quaj thov Yehauvas tias: “[Cov cev Vajtswv lus] tsuas tshuav kuv tib leeg xwb.” (1 Vajntxwv 19:10) Nyob rau hauv lub teb chaws ntawd, Aunpadiyas mus cawm tau 100 leej uas cev Vajtswv lus dim kom Yexenpees txhob tua tau lawv. (1 Vajntxwv 18:7, 13) Vim li cas Eliyas ho xav tias tshuav nws tib leeg xwb? Puas yog nws xav tias cov cev Vajtswv lus uas Aunpadiyas cawm tau tuag tag lawm? Los yog nws xav hais tias, Yehauvas twb qhia rau sawv daws paub saum lub Roob Kalemees tias Yehauvas yog tus tseem Vajtswv, ua cas haj tseem tsis muaj neeg pe hawm Yehauvas thiab? Tej zaum nws xav hais tias txawm nws yuav ciaj yuav tuag, tej yeeb ncuab nrhiav nrhw nws tua pov tseg los twb tsis muaj neeg txhawj txog nws ib qho li. Vajtswv Txoj Lus sau tsis txhij tsis txhua tej nyob nraim nkoos hauv Eliyas nruab siab tiam sis peb paub hais tias Yehauvas yeej paub vim li cas Eliyas xav li ntawd thiab Yehauvas yeej paub yuav pab Eliyas li cas rau li cas.
Qhov uas Yehauvas pab Eliyas txhawb tau koj li cas thaum koj muaj kev nyuaj siab ntxhov plawv? (Saib nqe 5-6)
5. Yehauvas qhia li cas rau Eliyas tias tsis yog nws ib leeg xwb?
5 Yehauvas nrhiav ntau txoj hau kev los pab Eliyas. Nws txhawb kom Eliyas nrog nws sib txuas lus. Nws nug Eliyas ob zaug tias: “Koj tuaj ua dabtsi ntawm no?” (1 Vajntxwv 19:9, 13) Yehauvas yeej mloog ntsoov thaum Eliyas qhia tawm tej nyob nraim nkoos hauv nws nruab siab. Yehauvas qhia nws lub hwj chim tshwm rau Eliyas pom. Ntxiv ntawd, nws qhia rau Eliyas paub tias tseem tshuav coob leej ntau tus Ixayees teev tiam nws. (1 Vajntxwv 19:11, 12, 18) Thaum Eliyas qhib siab hlo qhia tej nyob nraim nkoos hauv nws nruab siab rau Yehauvas thiab Yehauvas teb nws tej lus thov, nws txawm kaj siab lug tuaj. Yehauvas txib kom Eliyas mus khiav ntau txoj hauj lwm. Xws li kom Eliyas muab Haxayees tsa ua vaj ntxwv kav cov Xilias, muab Yehus ua vaj ntxwv kav cov Ixayees, thiab muab Elisas tsa ua ib tug cev Vajtswv lus. (1 Vajntxwv 19:15, 16) Thaum Yehauvas txib Eliyas mus ua tej hauj lwm no, pab tau kom Eliyas xav txog qhov zoo. Tsis tas li ntawd, Yehauvas tseem cia Elisas nrog Eliyas ua khub rau ub rau no. Yog li ntawd, thaum koj nyob koj ib leeg, Yehauvas ho pab tau koj li cas?
6. Thaum koj ntshai los sis ntxhov siab, koj yuav thov Vajtswv li cas? (Phau Ntawv Nkauj 62:8)
6 Yehauvas txhawb kom koj thov nws ntshuj ntshis. Nws yeej mloog ntsoov koj tej lus thov thiab pom txhua yam uas koj raug. (1 Thexalaunikes 5:17) Nws yeej tos tsis hnyu mloog nws cov tib neeg tej lus thov. (Pajlug 15:8) Thaum koj ntshai los sis ntxhov siab, koj yuav thov Vajtswv li cas? Cia li qhib siab lug thov Yehauvas tib yam nkaus li Eliyas. (Nyeem Phau Ntawv Nkauj 62:8.) Qhia koj tej kev nyuaj siab ntxhov siab thiab seb koj xav li cas rau Yehauvas. Thov kom nws pab koj thev dhau tej yam koj raug. Xws li thaum koj yuav tau piav koj txoj kev ntseeg rau tej tub ntxhais kawm ntawv, cia li thov Yehauvas tsawg tsuag kom pab koj muaj siab tawv qhawv qhia rau lawv paub seb yog li cas rau li cas. Txuas ntxiv ntawd, koj kuj thov kom Yehauvas pub tswv yim rau koj txawj qhia lawv. (Lukas 21:14, 15) Yog koj muaj kev nyuaj siab ntxhov siab rau ib yam twg, thov Yehauvas pab koj mus cuag ib tug ntseeg uas paub tab. Qhia rau Yehauvas tias koj xav kom tus ntawd qhib siab mloog thaum koj mus nrog nws tham. Qhia txhua yam uas nyob nraim nkoos hauv koj lub siab rau Yehauvas paub, tos seb nws yuav teb koj li cas rau li cas, thiab yog lwm tus pab los txhob yig. Yog koj ua raws li hais tas los no, yuav txhawb tau koj lawm hov ntau.
Koj puas nrhiav txhua txoj hau kev mus tshaj tawm txoj moo zoo thiab nrog lwm tus mus tshaj tawm ua ke? (Saib nqe 7)
7. Koj khaws tau Muas tus yam ntxwv li cas?
7 Yehauvas muab tej hauj lwm zoo zoo rau peb ua. Cia li tso siab plhuav hais tias nws yeej pom tej hauj lwm koj tau ua nyob rau hauv lub koom txoos thiab thaum mus tshaj tawm txoj moo zoo. Nws yeej txaus siab rau txhua yam koj tau ua pub rau nws. (Phau Ntawv Nkauj 110:3) Thaum koj muaj kev ntxhov siab, vim li cas zoo rau koj rau siab ntso ua Yehauvas tes hauj lwm? Cia peb mus piav txog ib tug kwv tij npe hu ua Muas. * Tsis ntev tom qab Muas ua kev cai raus dej tag, nws ib tug phooj ywg kwv luag txawm tso Yehauvas tseg lawm. Nws hais tias: “Thaum kuv pom nws tso Yehauvas tseg mas kuv puas siab puas ntsws tas li. Kuv xav hais tias, kuv puas yuav ua tau raws li tau cog tseg rau Yehauvas thiab nrog Yehauvas cov tib neeg mus li. Kuv nyuaj nyuaj siab thiab kuv xav tias yeej tsis muaj neeg paub kuv kiag li.” Muaj dab tsi ho pab tau Muas? Nws hais ntxiv tias: “Kuv rau siab ntso mus tshaj tawm txoj moo zoo. Qhov kuv ua li no pab kom kuv tsis txhob xav txog kuv tus kheej thiab xav txog tej yam tsis zoo. Thaum kuv nrog lwm tus mus qhia txoj moo zoo, ua rau kuv zoo siab kawg nkaus li.” Txawm peb mus qhia tsis tau txoj moo zoo nrog cov ntseeg tim ntsej tim muag los, peb nrog tau lawv sau ntawv los sis hu xov tooj rau lwm tus. Muas hais li no ntxiv tias: “Kuv kub siab lug pab cov ntseeg hauv lub koom txoos. Yog kuv muaj ib zaj kawm qhia rau hauv lub koom txoos, kuv kub siab lug npaj kom qhia tau zoo zoo. Tam sim no kuv kaj siab lug lawm. Kuv xam pom tias Yehauvas thiab lwm tus yeej txaus siab rau tej kuv ua.”
THAUM PEB RAUG KEV SIM SIAB
8. Kev sim siab txo tau peb lub zog li cas?
8 Nyob rau tiam kawg no, peb yeej yuav raug kev sim siab. (2 Timautes 3:1) Tej zaum peb tsis paub tias peb yuav raug kev sim siab mus rau seem twg. Xws li tsis muaj nyiaj muaj txiaj, peb lub cev ntaj ntsug txawm xeeb mob los sis ib tug peb hmov tshua ho tag sim neej. Tej ntwb ntu zoo li no mas yuav ua rau peb nyuaj siab ntxhov plawv kawg li, tsis pom qab tig rau seem twg. Txawm muaj li no los nco ntsoov tias Yehauvas pom txhua yam thiab nws yuav pab kom peb thev taus tej kev sim siab peb raug.
9. Piav txog qho yam uas los raug Yauj.
9 Cia peb mus piav txog tej yam uas Yehauvas tau pab Yauj. Tib sij huam xwb, Yauj raug ntau yam kev sim siab. Tib hnub xwb, Yauj hnov hais tias luag tuaj nyiag nws tej tsiaj txhu thiab ho muab ib txhia tsiaj txhu tua pov tseg. Txuas ntxiv ntawd, nws hnov tias nws cov tub mab tub qhe thiab nws cov me nyuam tuag huv tib si. (Yauj 1:13-19) Thaum Yauj tab tom quaj ntsuag txog tej no, nws ib ce txawm siv mob thoob plaws ua paug viag. (Yauj 2:7) Nws ntxhov siab hnyo xwb, nws thiaj hais tias: “Kuv dhuav heev; kuv tsis xav ua neej nyob lawm.”—Yauj 7:16.
Yehauvas qhia rau Yauj txog txhua yam nws tau tsim xwv Yauj thiaj paub hais tias Yehauvas hlub thiab hmov tshua Yauj heev (Saib nqe 10)
10. Yehauvas pab Yauj li cas nws thiaj thev taus nws tej kev sim siab? (Saib daim duab ntawm lub khaum.)
10 Yehauvas tsom kwm thiab hlub tshua Yauj heev, Yehauvas thiaj pab Yauj thev txhua yam uas nws raug. Yehauvas qhia rau Yauj tias Nws muaj tswv yim thiab Nws yeej saib xyuas tau tej uas Nws tsim. Nws piav txog tej tsiaj txhu uas peb xav tsis thoob. (Yauj 38:1, 2; 39:9, 13, 19, 27; 40:15; 41:1, 2) Txuas ntxiv ntawd, Yehauvas kuj siv ib tug tub hluas npe hu ua Elihus tuaj txhawb Yauj lub zog. Elihus qhia rau Yauj tias Yehauvas yeej ib txwm foom koob hmoov rau Nws cov tib neeg uas thev tej kev sim siab lawv raug. Yehauvas kuj cia Elihus ntuas Yauj kom Yauj tsis txhob xav txog nws tus kheej nkaus nkaus xwb tiam sis yuav tau xav kom deb tshaj ntawd. Elihus tej lus pab kom Yauj nco ntsoov tias Yehauvas muaj hwj chim heev. (Yauj 37:14) Yehauvas txawm kom Yauj ua ib yam uas yog thov kom Yehauvas zam txim pub rau Yauj peb tug phooj ywg kwv luag uas tau hais txhaum lawm. (Yauj 42:8-10) Ua li niaj hnub niam no thaum peb raug kev sim siab, Yehauvas ho pab peb li cas?
11. Tej lus nyob hauv phau Vajlugkub pab tau peb thev kev sim siab li cas?
11 Yehauvas tsis nrog peb sib txuas lus li Yauj, tiam sis nws siv nws Txoj Lus hauv phau Vajlugkub los hais peb xwb. (Loos 15:4) Nws txhawb kom peb nco ntsoov txoj kev vam kev cia siab rau yav tom hauv ntej. Cia peb mus piav txog qho nqe Vajlugkub los txhawb peb lub zog thaum raug kev sim siab. Nyob hauv Yehauvas Txoj Lus hais tias tsis muaj ib yam dab tsi los sis kev sim siab twg yuav “cais tau peb ntawm Vajtswv txojkev hlub.” (Loos 8:38, 39) Ntxiv ntawd, “nws nyob ze txhua tus uas thov nws.” (Phau Ntawv Nkauj 145:18) Yehauvas hais tias yog peb tso siab rau nws ces peb yuav thev taus txhua yam kev sim siab thiab tseem yuav nyob dhia rhees. (1 Kauleethaus 10:13; Yakaunpaus 1:2, 12) Nyob hauv Vajtswv Txoj Lus qhia hais tias tej kev sim siab peb raug tsuas yog ib vuag dua xwb yog muab piv rau lub neej nyob mus ib txhis. (2 Kauleethaus 4:16-18) Yehauvas cog lus hais tias nws yuav muab Xatas thiab cov uas coj cwj pwm zoo li Xatas rhuav tshem mus huv tib si ces thaum ntawd yuav tsis muaj kev sim siab ntxiv lawm. (Phau Ntawv Nkauj 37:10) Ua li koj puas cim tau qho nqe Vajlugkub los pab koj thev tej yam kev sim siab uas koj tseem yuav raug?
12. Yuav kom Vajtswv Txoj Lus tsav tau peb lub neej, Vajtswv xav kom peb ua li cas?
12 Yehauvas xav kom peb lauj sij hawm los kawm nws Txoj Lus tsis tseg tsis tu thiab ua tib zoo xav txog tej peb tau nyeem ntawd. Yog peb muab tej peb tau nyeem siv rau hauv peb lub neej, yuav tsav tau peb txoj kev ntseeg thiab yuav rub tau kom peb yim huab nrog Yehauvas sib raug zoo. Yog peb ua raws li tau hais los no, yuav pab kom peb thev taus tej kev sim siab uas peb raug. Yehauvas yuav pub nws lub hwj huam dawb huv rau cov uas nyeem nws Txoj Lus. Thiab lub hwj huam dawb huv uas nws pub ntawd yuav pab tau peb muaj “lub hwjchim uas loj kawg nkaus” kom peb thiaj thev taus tej kev sim siab uas peb raug.—2 Kauleethaus 4:7-10.
13. Tej yam uas “tus qhev ncaj thiab ntse” muab ntawd pab tau peb thev taus kev sim siab li cas?
13 Yehauvas pab “tus qhev ncaj thiab ntse” luam tau ntaub ntawv, yeeb yaj kiab, thiab nkauj ntau heev los pab peb tsav peb txoj kev ntseeg thiab kom peb tsis txhob muab Yehauvas tso pov tseg. (Mathais 24:45) Peb yuav tau saib, nyeem thiab mloog tej no txhij txhua. Nyob hauv teb chaws Yunaithim Xatej (United States), muaj ib tug muam ntseeg tau hais txog tej uas lub koom haum tau luam tawm li no tias: “Kuv teev tiam Yehauvas tau 40 lub xyoos, kuv txoj kev ntseeg yeej raug sim mus mus los los.” Tej yam uas tus muam no raug yog ib tug neeg qaug cawv muab nws yawm txiv nrau tuag, nws niam thiab nws txiv muaj mob hnyav heev ces nkawd kuj tau nruam sim lawm. Ntxiv ntawd, nws tseem mob qog los sis kheeb xawm (cancer) ob zaug. Nws hais tias qhov uas pab tau nws thev taus txhua yam yog: “Yehauvas yeej saib xyuas kuv. Tej yam uas tus qhev ncaj thiab ntse tso tawm pab tau kuv thev taus txhua yam kuv niaj hnub raug. Kuv thiaj xav tib yam li Yauj tias yog kuv tsis tuag, kuv yuav tsis tso Yehauvas tseg.”—Yauj 27:5.
Peb pab tau cov ntseeg hauv lub koom txoos li cas? (Saib nqe 14)
14. Thaum peb raug kev sim siab, Yehauvas siv cov kwv tij nkauj muam ntseeg los txhawb peb li cas? (1 Thexalaunikes 4:9)
14 Yehauvas cob qhia nws cov tib neeg kom sib hlub sib pab rau tej lub caij nyoog uas ntsib kev nyuaj siab. (2 Kauleethaus 1:3, 4; nyeem 1 Thexalaunikes 4:9.) Peb cov kwv tij nkauj muam coj cwj pwm zoo ib yam li Elihus es kub siab lug txhawb peb lub zog kom tsis txhob tso Yehauvas tseg thaum raug kev nyuaj siab. (Tes Haujlwm 14:22) Xws li muaj ib tug muam ntseeg npe hu ua Diav. Nws tus txiv npua ib tug mob hnyav heev. Yog li ntawd, cov ntseeg nyob hauv nws lub koom txoos thiaj hais lus txhawb nws lub zog thiab pab kom nws tsis txhob tso Yehauvas tseg. Nws hais li no tias: “Yeej tsis yooj yim kiag li tiam sis kuv paub hais tias Yehauvas yeej puag rawv kuv rau lub caij lub nyoog ntawd. Cov ntseeg hauv wb lub koom txoos yeej ua ntau yam los txhawb wb. Thaum lawv hu xov tooj, tuaj saib wb hauv tsev, thiab cev tes puag wb mas txhawb tau wb lub zog kawg li. Kuv tsis txawj tsav tsheb ces cov kwv tij nkauj muam yeej saib xyuas kom kuv mus tshaj tawm tau txoj moo zoo thiab mus tau rau tej kev sib txoos.” Yeej yog ib txoj koob hmoov zoo kawg li uas peb muaj cov kwv tij nkauj muam txawj sib hlub sib pab yam li no.
RIS YEHAUVAS TXIAJ NTSIG
15. Vim li cas peb ho paub tias peb yuav thev dhau tej kev sim siab peb raug?
15 Txhua leej txhua tus nyias yeej raug nyias lawm ib yam kev sim siab. Tiam sis Yehauvas yeej saib ntsoov thiab nws yeej tos tsis hnyu yuav pab peb thaum peb thov hu nws. (Yaxayas 43:2) Peb paub tias txawm yuav raug kev sim siab npaum li cas los, nws twb npaj txhua yam los txhawb peb kom thev taus. Xws li, Yehauvas cia peb thov nws, muab phau Vajlugkub pab peb, luam tawm ntau yam los txhawb peb txoj kev ntseeg, thiab nws haj tseem cia peb muaj ib tsoom kwv tij nkauj muam ntseeg txhawb peb lub zog.
16. Yuav kom Yehauvas tiv thaiv peb, peb yuav tau ua li cas?
16 “Peb zoo siab kawg” rau qhov muaj Yehauvas saib xyuas peb ntshis. (Phau Ntawv Nkauj 33:21) Yog peb ris txiaj ntsig rau txhua yam Yehauvas tau ua los pab peb ces peb yuav ua peb feem los mus mloog Yehauvas lus. Nco ntsoov tias yog peb ua npaum li peb ua tau los mloog Yehauvas lus thiab coj lub neej li nws pom zoo ces nws yuav tsom kwm peb mus tas ib txhiab ib txhis.—1 Petus 3:12.
ZAJ NKAUJ 30 Vajtswv Tsom Kwm Kuv
^ Peb yuav tau tos ntsoov Yehauvas thaum peb ntsib teeb meem. Zaj kawm no yuav pab kom peb nco ntsoov tias Yehauvas yeej saib xyuas peb txhua leej txhua tus. Nws yeej pom ntsoov peb ib tug dhau ib tug tej teeb meem, thiab nws yuav ntxiv dag ntxiv zog kom peb kov yeej tej teeb meem ntawd.
^ Tau muab cov npe hauv zaj no ib txhia hloov lawm.