1. Raws li Henplais 12:1, peb yuav ua li cas peb thiaj khiav mus txog tus ciam kawg thiab tau txoj sia?

 PHAU Vajlugkub muab peb lub neej Khixatia piv rau kev sib tw khiav. Cov uas khiav mus txog tus ciam kawg yuav tau txoj sia ntev dhawv mus ib txhis. (2 Timautes 4:7, 8) Peb yuav tsum sib zog khiav tiag tiag vim rau qhov twb yuav txog tus ciam kawg lawm. Tus tub txib Povlauj uas twb khiav mus txog tus ciam kawg thiab tau txoj sia lawm qhia tias peb yuav khiav li cas peb thiaj tau txoj sia. Nws hais tias peb yuav tsum “muab txhua yam uas thaiv peb kev . . . tso povtseg, thiab peb cia li sib tw khiav ncaj nraim mus kom txog tus ciam tom kawg.”​—Nyeem Henplais 12:1.

2. Thaum Povlauj hais kom “muab txhua yam uas thaiv peb kev. . . . tso povtseg,” yog nws hais li cas tiag?

² Thaum Povlauj hais kom “peb cia li muab txhua yam uas thaiv peb kev . . . . tso povtseg,” puas yog nws hais kom peb tsis txhob nqa ib yam dab tsi li? Tsis yog. Nws tsuas kom peb muab tej uas peb twb tsis cheem tsum thiab yuav ua lub nra hnyav rau peb tso pov tseg xwb, peb thiaj li tsis poob qab los sis khiav tsis taus. Yuav kom peb khiav taus, peb yuav tsum paub tias yam twg yuav ua nra hnyav rau peb thiab muab pov tseg kiag tam sid. Tiam sis muaj tej yam peb yuav tau ris nrog peb, peb thiaj muaj cai sib tw khiav. (2 Timautes 2:5) Yog li, tej uas peb yuav tau ris yog dab tsi?

3. (1) Raws li Kalatias 6:5, peb yuav tau ris dab tsi nrog peb? (2) Hauv zaj no peb yuav kawm txog dab tsi, thiab vim li cas peb thiaj li kawm?

³ Nyeem Kalatias 6:5. Povlauj hais tias muaj tej yam peb yuav tsum tau ris nrog peb. Nws sau tias “txhua tus nyias yuav tsum ris nyias lub nra.” Tej ntawd yog tej uas Vajtswv xav kom peb nyias yuav tsum ua nyias uas tsis muaj leej twg ua tau rau peb. Hauv zaj  no peb yuav tham tias peb “lub nra” yog dab tsi thiab peb yuav ris peb lub nra li cas. Peb kuj yuav tham txog tej yam uas peb ris uas tsis tsim nyog peb ris nrog peb thiab seb peb yuav muab pov tseg li cas. Qhov uas peb nyias ris nyias lub nra thiab muab tej uas tsis tsim nyog ris pov tseg yuav pab tau peb sib twb khiav mus txog tus ciam kawg thiab tau txoj sia nyob mus ib txhis.

4. Vim li cas thiaj tsis nyuaj rau peb ua li peb cog lus rau Yehauvas?

⁴ Peb cob peb tus kheej rau Yehauvas. Thaum peb muab peb lub neej cob rau Yehauvas, peb cog lus rau nws tias peb yuav teev tiam nws thiab ua raws li nws lub siab nyiam. Yog li peb yuav tau ua li peb hais. Qhov uas peb ua li peb cog lus rau Yehauvas yeej tseem ceeb heev, tiam sis kuj tsis nyuaj rau peb ua rau qhov Yehauvas yeej tsim peb los kom peb ua tau li nws lub siab nyiam. (Tshwmsim 4:11) Yehauvas tsim kom peb vam khom nws thiab muaj tus yam ntxwv zoo li nws, peb thiaj muaj kev sib raug zoo nrog nws thiab muaj kev zoo siab thaum peb ua li nws lub siab nyiam. (Phau Ntawv Nkauj 40:8) Thaum peb ua txhua yam li Yehauvas xav kom peb ua thiab ua li Yexus hais ces peb lub nra yuav sib thiab peb yuav tau “so los siav.”​—Mathais 11:28-30.

5. Yuav ua li cas koj thiaj ua tau txhua yam li koj cog lus rau Yehauvas? (1 Yauhas 5:3)

 ⁵ Koj yuav ris koj lub nra li cas? Muaj ob yam uas yuav pab kom koj ua tau li koj cog lus rau Yehauvas. Thawj yam, yog rau rau siab ua kom koj haj yam hlub Yehauvas ntxiv. Yog li, ua zoo xav txog txhua yam zoo uas Yehauvas twb ua rau koj lawm thiab tej uas nws npaj tseg tseem yuav muab rau koj yav tom hauv ntej. Koj yim hlub Yehauvas ces yim yooj yim rau koj mloog nws lus. (Nyeem 1 Yauhas 5:3.) Yam ob, yog xyaum Yexus tus qauv. Yexus ua tau txhua yam li Yehauvas xav kom nws ua los twb yog vim nws thov Yehauvas pab nws, thiab nws xav ntsoov txog tus nqi zog xwb. (Henplais 5:7; 12:2) Zoo ib yam li Yexus, peb yuav tau thov Yehauvas pab txhawb peb lub zog thiab xav ntsoov txog thaum uas peb yuav tau nyob mus ib txhis. Thaum peb hlub Yehauvas ntau tuaj thiab peb xyaum Yexus tus qauv ces peb yeej yuav ua tau txhua yam li peb cog lus rau Yehauvas.

6. Vim li cas peb yuav tsum ua peb lub luag hauj lwm rau peb tsev neeg? (Saib daim duab.)

⁶ Peb lub luag hauj lwm rau peb tsev neeg. Thaum peb sib tw khiav kom tau txoj sia, peb yuav tsum hlub Yehauvas thiab Yexus nkawd tshaj peb hlub peb tsev neeg. (Mathais 10:37) Tiam sis kuj tsis yog hais tias peb yuav tau tso peb lub luag hauj lwm rau peb tsev neeg tseg peb thiaj li ua tau haum Yehauvas thiab Yexus nkawd siab. Rau qhov yuav kom peb ua tau haum nkawd siab, peb yuav tsum ua peb tes hauj lwm rau peb tsev neeg. (1 Timautes 5:4, 8) Thaum peb ua li no, peb yeej zoo siab dua vim Yehauvas yog tus tsim peb ces nws yeej paub tias peb tsev neeg yuav zoo siab dua yog ob niam txiv paub sib hlub sib hwm, cov niam cov txiv hlub thiab cob qhia lawv cov me nyuam, thiab cov me nyuam mloog lawv niam lawv txiv lus.​—Efexus 5:33; 6:1, 4.

7. Koj yuav ua li cas koj thiaj ua tau koj tes hauj lwm rau tsev neeg?

⁷ Koj yuav ris koj lub nra li cas? Txawm koj yog tus txiv, tus poj niam, los sis tus me nyuam los yeej pab tau koj dua yog koj ua li cov tswv yim hauv phau Vajlugkub qhia es tsis txhob ua li koj lub siab xav tias yog xwb, los sis ua li cov neeg hauv koj lub zej lub zos ua xwb, los sis ua li cov neeg txawj ntse hais kom ua xwb. (Pajlug 24:3, 4) Kav tsij siv peb tej ntaub ntawv Vajlugkub thiab tej yeeb yaj kiab los pab kom koj paub siv tej hauv paus ntsiab lus hauv phau Vajlugkub. Xws li, cov ntaub ntawv “Kev Pab Lub Cuab Lub Yig” uas yog npaj los pab cov txij nkawm, cov uas ua niam ua txiv, thiab cov tub ntxhais hluas rau tej teeb meem uas lawv raug niaj hnub nim no. b Txawm hais tias koj tsev neeg tsis ua li phau Vajlugkub hais los xij, koj kav tsij rau rau siab ua koj thiaj yuav pab tau koj tsev neeg thiab Yehauvas yuav foom koob hmoov rau koj.​—1 Petus 3:1, 2.

8. Tej uas peb txiav txim siab ua yuav ua tau li cas rau peb?

⁸ Peb yuav tau ris peb lub nra. Yehauvas cia peb txiav txim siab rau tej peb ua. Thiab nws xav kom peb paub txiav txim siab zoo, peb thiaj muaj kev zoo siab. Tiam sis nws yuav tsis tiv thaiv peb thaum peb raug teeb meem vim peb txiav txim siab tsis zoo. (Kalatias 6:7, 8) Yog peb ua txhaum vim peb maj maj es lam tau lam ua lam tau lam hais ces peb yuav tau ris lub txim. Nyob ntawm seb peb ua txhaum dab tsi, tej zaum yuav ua rau peb ntxhov siab vim peb paub tias peb tau ua txhaum lawm. Txawm li cas los, yog peb paub tias thaum peb ua txhaum, peb yuav tau ris peb lub txim ces yuav pab kom peb lees peb lub txim, kho peb qhov teeb meem, thiab tsis txhob rov mus ua txhaum ntxiv lawm.  Yog peb ua li ntawd ces peb thiaj tseem yuav tau nrog luag sib tw khiav kom tau txoj sia.

9. Koj yuav ua li cas yog hais tias koj txiav txim siab tau tsis zoo? (Saib daim duab.)

⁹ Koj yuav ris koj lub nra li cas? Yog koj txiav txim siab tau tsis zoo los nco ntsoov tias peb hloov tsis tau tej peb ua yav tas los lawm. Yog li, tsis txhob nyuaj siab dhau thiab tsis txhob muab coj los xav ntau ntau, los sis pheej xav tias yog tim koj, los sis muab liam rau tus ub tus no tias yog tim lawv. Tiam sis lees hlo tej uas koj ua yuam kev thiab ua li koj ua tau los kho koj qhov teeb meem. Yog koj ntxhov siab rau tej uas koj ua txhaum ces cia li lees koj tej kev txhaum rau Yehauvas, thiab thov nws zam koj lub txim thiab pab koj. (Phau Ntawv Nkauj 25:11; 51:3, 4) Mus thov txim rau cov uas koj ua txhaum rau, thiab yog tsim nyog los mus cuag cov txwj laus pab koj. (Yakaunpaus 5:14, 15) Kawm ntawm tej uas koj ua yuam kev thiab ua tiag zam tsis txhob rov mus ua txhaum ntxiv. Yog koj ua li no ces koj yeej tso siab tau tias Yehauvas yuav hlub tshua koj thiab yuav pab koj.​—Phau Ntawv Nkauj 103:8-13.

10. Yog peb pheej xav kom peb ua tau ntau tshaj luag ces yuav ua li cas rau peb? (Kalatias 6:4)

¹⁰ Pheej xav tias koj yuav tsum ua kom tau ntau tshaj luag. Yog peb pheej muab peb piv rau lwm tus ces yuav ua nra hnyav rau peb thiab yuav rau peb khib lawv los sis xav sib tw nrog lawv. (Kalatias 5:26; nyeem Kalatias 6:4.) Yog peb pheej yuav ua kom peb ua tau li luag tej ua, tiam sis peb ho tsis muaj cuab kam ua tau, ces tej zaum yuav ua rau peb nyuaj siab thiab qaug zog. Phau Vajlugkub hais tias yog peb tos ib yam dab tsi ntev ntev ces peb yuav tag kev cia siab. (Pajlug 13:12) Peb haj yam yuav tag kev cia siab yog peb tos ib yam uas tej zaum peb yeej yuav tsis tau li. Yog peb pheej xav tias peb yuav tsum ua kom tau ntau tshaj luag ces yuav ua rau peb zog ntaug thiab poob qab thaum peb sib tw khiav kom tau txoj sia.​—Pajlug 24:10.

11. Yuav ua li cas koj thiaj tsis ua ntau tshaj li koj muaj peev xwm ua tau?

¹¹ Koj yuav muab lub nra ntawd pov tseg li cas? Yog koj twb ua li koj ua tau rau Yehauvas lawm ces Yehauvas tsuas yuav li ntawd xwb. Nws tsis xav kom koj muab tej uas koj tsis muaj rau nws. (2 Kauleethaus 8:12) Thiab koj tso siab tau tias Yehauvas yeej tsis muab tej uas koj ua piv rau lwm tus. (Mathais 25:20-23) Nws saib qhov uas koj pe hawm nws kawg siab kawg ntsws, qhov uas koj muab siab npuab nws, thiab qhov uas koj ua siab ntev muaj nqis heev. Koj yuav tsum paub tias thaum koj muaj hnub nyoog lawm, los sis koj muaj mob muaj nkeeg, los sis muaj lwm yam teeb meem hauv koj lub neej, koj yuav ua tsis tau li koj lub siab xav rau Yehauvas. Ua ib yam li Npaxilais, tsis txhob lees tej hauj lwm uas koj paub tias koj yuav ua tsis tau. (2 Xamuyees 19:35, 36) Thiab ua li Mauxes es cia lwm tus pab koj thiab faib hauj lwm rau lawv ua. (Khiav Dim 18:21, 22) Yog koj txo hwj chim ces koj yuav tsis ua ntau tshaj li koj muaj peev xwm ua tau. Thiab koj thiaj muaj zog sib tw khiav kom tau txoj sia.

12. Piav seb tej uas lwm tus ua tsis zoo puas yog tim peb.

¹² Koj pheej xav tias yog tim koj lwm tus thiaj ua yuam kev. Peb txiav txim siab tsis tau rau lwm tus, los sis peb tiv thaiv tsis tau lawv txhua zaus lawv raug teeb meem vim lawv txiav tsim siab tsis zoo. Piv xam tias, koj muaj ib tug me nyuam thaum nws loj tuaj nws txiav txim siab tias nws yuav tsis teev tiam Yehauvas lawm yeej yuav ua rau koj tu siab heev. Cov niam cov txiv uas pheej xav hais tias lawv tus me nyuam tso Yehauvas tseg los twb yog tim lawv tsis txawj cob qhia, yuav ua ib lub nra hnyav heev rau lawv ris. Lub nra no yog ib lub uas Yehauvas tsis xav kom lawv ris.​—Loos 14:12.

13. Leej niam thiab leej txi yuav ua li cas yog nkawd tus me nyuam tsis txiav txim siab zoo?

¹³ Koj yuav muab lub nra ntawd pov tseg li cas?  Nco ntsoov tias Yehauvas cia peb txhua tus, nyias txiav txim siab rau nyias tus kheej. Thiab seb peb puas yuav teev tiam nws. Nws paub tias txawm peb yog niam yog txiv los peb yeej zoo tsis tiav ces nws tsuas xav kom peb cob qhia peb tej me tub me nyuam li peb txawj xwb. Lawv yuav txiav txim siab ua li cas los nyob ntawm lawv, tsis yog peb hauj lwm. (Pajlug 20:11) Tiam sis yog koj ho txhawj tias nyob tsam tim koj tsis txawj ua niam ua txiv los cia li piav qhia rau Yehauvas thiab thov nws zam txim rau koj. Nws paub tias koj yeej tig tsis tau sij hawm rov qab mus kho tej uas tsis zoo yav tas los. Koj tus me nyuam tseb yam twg nws yuav tau sau yam ntawd. Ces Yehauvas yeej tsis muab koj tus me nyuam lub nra nog rau koj ris. Thiab nco ntsoov tias Yehauvas yeej tos ntsoov seb koj tus me nyuam puas yuav rov qab los cuag nws.​—Lukas 15:18-20.

14. Vim li cas peb yuav tsum tsis txhob muab txhawj dhau rau peb tej kev txhaum?

¹⁴ Muab txhawj dhau rau koj tej kev txhaum. Peb yeej txhawj heev thaum peb ua txhaum. Tiam sis Yehauvas tsis xav kom peb muab txhawj dhau lawm. Qhov nod yog ib lub nra uas peb yuav tau muab tso pov tseg. Yog hais tias peb pheej tseem txhawj tiam sis peb twb mus lees txim rau Yehauvas lawm thiab peb yeej ua npaum li peb ua tau kom peb tsis rov mus ua txhaum lawm ces peb yeej tso siab tau tias Yehauvas yuav zam txim rau peb. (Tes Haujlwm 3:19) Yehauvas paub tias yog peb muab txhawj dhau lawm ces yuav tsis zoo rau peb. Yog li, thaum Yehauvas zam txim rau peb lawm, nws tsis xav kom peb pheej tseem nyuaj siab txog peb tej kev txhaum. (Phau Ntawv Nkauj 31:10) Yog peb pheej txhawj thiab tu siab dhau ces yuav ua rau peb qaug zog, thiab tej zaum peb cia li yuav tso tseg tsis sib tw khiav kom tau txoj sia los kuj muaj.​—2 Kauleethaus 2:7.

15. Thaum koj muab koj tej kev txhaum txhawj dhau lawm, zoo rau koj ua li cas? (1 Yauhas 3:19, 20) (Saib daim duab.)

¹⁵ Koj yuav muab lub nra ntawd pov tseg li cas? Yog koj muab koj tej kev txhaum txhawj dhau lawm ces zoo rau koj ua tib zoo xav txog qhov  uas Yehauvas twb “zam txim” rau koj lawm. (Phau Ntawv Nkauj 130:4) Thaum Yehauvas zam txim rau cov uas tso lawv tej kev txhaum tseg lawm, nws hais tias: “Kuv yuav zam txim rau lawv thiab kuv yuav tsis cim ntsoov lawv tej kev txhaum li lawm.” (Yelemis 31:34) Qhov nod qhia tias Yehauvas yuav tsis xav txog koj tej kev txhaum yav tas los uas nws twb zam txim rau koj lawm. Yog li, tsis txhob xav hais tias tej teeb meem ua koj muaj tam sim no yog vim Yehauvas tsis tau zam txim rau koj. Thiab tsis txhob chim siab rau koj tus kheej yog tias koj ho tsis tau ua tej yam hauj lwm hauv lub koom txoos lawm. Yehauvas twb tsis xav txog koj tej kev txhaum lawm ces koj yuav tau ua li thiab.​—Nyeem 1 Yauhas 3:19, 20.

16. Zoo ib yam li cov neeg sib tw khiav, peb yuav tsum paub li cas?

¹⁶ Thaum peb sib tw khiav kom tau txoj sia, peb yuav tsum “khiav tiag kom yeej.” (1 Kauleethaus 9:24) Yuav kom peb khiav yeej, peb yuav tsum paub tias peb yuav ris dab tsi nrog peb xwb thiab yuav tsum muab dab tsi tso pov tseg. Hauv zaj no, peb tham txog yam puav uas peb yuav tau ris nrog peb thiab tej uas peb yuav tau muab pov tseg. Tiam sis tseem muaj ntau yam uas peb tsis tau tham txog. Yexus hais tias “nej yuav tsum ceevfaj, tsis txhob cia nej lub siab qaug rau kev noj kev haus, thiab tsis txhob txhawj rau nej lub neej.” (Lukas 21:34) Thaum koj sib tw khiav kom tau txoj sia, ua zoo xyuas seb ob nqe Vajlugkub hauv nqe 16 no thiab lwm nqe Vajlugkub yuav pab kom koj paub tias koj yuav tau hloov los sis kho koj lub neej li cas.

17. Vim li cas peb thiaj paub tias peb yeej yuav khiav yeej thiab tau txoj sia?

¹⁷ Peb paub tias peb yeej yuav khiav yeej thiab tau txoj sia rau qhov Yehauvas yog tus txhawb peb lub zog. (Yaxayas 40:29-31) Yog li, kav tsij sib zog khiav kom tag peb lub dag lub zog li tus tub txib Povlauj kom peb tau txoj sia. (Filipis 3:13, 14) Tsis muaj leej twg yuav sib tw khiav tau rau koj, tiam sis koj yeej yuav khiav yeej rau qhov Yehauvas yuav pab koj. Nws yuav pab ris koj lub nra thiab muab tej nra uas ua rau koj khiav tsis taus tso pov tseg. (Phau Ntawv Nkauj 68:19) Yog Yehauvas pab koj ces koj yeej yuav muaj zog khiav yeej.