• “Ua rau kuv xav tias kuv tus txiv pheej mus deev lwm tus tas mus li.”

• “Kuv txaj muag, kuv xav tias ntshe yog kuv tsis zoo nkauj, thiab kuv saib kuv tus kheej tsis muaj nuj nqis.”

• “Kuv qhia tsis tau rau leej twg li ces tsis muaj leej twg pab tau kuv. Kuv nyuaj siab ib leeg xwb.”

• “Kuv xav tias tej zaum Yehauvas twb tsis niam khuv leej kuv.”

Cov lus uas cov poj niam no hais qhia tias thaum cov txiv saib duab liab qab ua rau lawv txom nyem siab ntsws npaum li cas. Thiab yog hais tias tus txiv twb nyiag ua li ntawd tsheej hli tsheej xyoo lawm ces tej zaum nws yuav ua rau nws tus poj niam ntseeg tsis tau nws siab. Ib tug poj niam hais tias, “Kuv pheej xav twj ywm tias: ‘Tus txiv neej uas nrog kuv nyob no yog leeg twg? Puas tshuav lwm yam uas nws zais tsis pub kuv paub thiab?’”

Zaj no yog npaj los rau cov poj niam uas lawv tus txiv muaj yees saib duab liab qab. a Zaj no yuav tham txog cov ntsiab lus hauv phau Vajlugkub uas yuav nplig tau lawv siab thiab qhia lawv tias Yehauvas hlub lawv thiab xav pab lawv kom lawv rov kaj siab thiab muaj kev sib raug zoo nrog Yehauvas. b

Txawm hais tias koj yuam tsis tau koj tus txiv kom nws tsis txhob saib duab liab qab los yeej muaj ntau yam uas koj ua tau los pab koj kom koj tsis txhob chim chim siab thiab muaj lub siab tus. Xws li:

Tsis txhob pheej xav tias yog tim koj. Tej zaum koj yuav xav tias tos koj tus txiv pheej mus saib duab liab qab los ntshe twb yog tim koj. Nkauj Ab c xav tias tej zaum ntshe yog nws zoo tsis txaus rau nws tus txiv. Nws xav tias, ‘Ua cas kuv tus txiv ho nyiam siab lwm tus poj niam es tsis saib kuv?’ Ib co poj niam xav tias yog vim lawv tsis txawj nrog lawv tus txiv tham, lawv tus txiv thiaj chim. Maiv Dawb hais tias, “Rau qhov kuv tus txiv ua rau kuv nyuaj siab thiab chim chim siab ces zoo li kuv yog ib tug poj niam uas phem phem heev es kuv tus txiv thiaj mus saib duab liab qab.”

Yog koj xav ib yam li nkawd ces nco ntsoov tias Yehauvas tsis muab koj tus txiv lub txim txhaum nog rau koj ris. Yakaunpaus 1:14 hais tias: “Tus  uas ua txhaum, yeej yog nws lub siab uas nyiam ua phem coj nws mus ua txhaum.” (Loos 14:12; Filipis 2:12) Yog li tsis txhob xav hais tias yog tim koj rau qhov Yehauvas saib koj muaj nqis vim koj muab siab npuab nws.​—2 Xwmtxheej Vajntxwv 16:9.

Kuj zoo kom koj to taub tias tsis yog koj zoo tsis txaus es koj tus txiv thiaj saib duab liab qab. Cov kws uas paub zoo txog cov neeg saib duab liab qab hais tias tib neeg nyiam saib duab liab qab vim cov duab lawv saib ntawd ua rau lawv ntshaw thiab xav sim ua tej yam uas yeej tsis muaj ib tug poj niam yuav ua tau txaus lawv siab.

Tsis txhob muab txhawj dhau lawm. Kab hais tias qhov ua nws pheej txhawj txhawj txog nws tus txiv saib duab liab qab ua rau nws ua tsis tau dab tsi li. Hos Paj Huab hais tias, “Hnub twg kuv tsis paub tias kuv tus txiv dua twg lawm mas hnub ntawd kuv yeej txhawj ib hnub nkaus li.” Muaj ib txhia poj niam hais tias lawv txaj muag heev rau cov kwv tij nkauj muam yog muaj neeg paub txog lawv tus txiv qhov teeb meem. Hos muaj ib txhia hais tias zoo li lawv twm zeej heev vim tsis muaj leej twg to taub lawv qhov teeb meem.

Cov uas lawv tus txiv nyiam siab duab liab qab, leej twg los yeej yuav xav tib yam nkaus. Tiam sis yog koj pheej muab coj los xav tas mus li ces yuav ua rau koj haj yam ntxhov siab xwb. Yog li, tsis txhob muab xav ntau ntau koj thiaj tsis nyuaj siab, rau rau siab ua kom koj muaj kev sib raug zoo nrog Yehauvas xwb koj thiaj yuav thev taus.​—Phau Ntawv Nkauj 62:2; Efexus 6:10.

Kuj yuav pab tau koj thiab yog koj mus nyeem thiab ua zoo xav txog cov poj niam uas muaj kev nyuaj siab hauv phau Vajlugkub es lawv mus cuag Yehauvas thiab thov nws pab lawv. Txawm yog hais tias Yehauvas tsis tshem kiag lawv cov teeb meem mus txhua zaus los nws yeej pab kom lawv muaj lub siab tus. Xws li, muaj ib zaug Hanas “ntxhov siab heev,” nws thiaj “thov [Yehauvas] ntev loo.” Txawm nws tsis paub xyov Yehauvas yuav pab nws li cas los thaum nws thov Yehauvas tas nws tsis ntxhov siab lawm.​—1 Xamuyees 1:10, 12, 18; 2 Kauleethaus 1:3, 4.

Mus cuag cov txwj laus pab koj. Lawv “yuav zoo ib yam li lub tsev uas thaiv cua thiab lub chaw nkaum cua daj cua dub” rau koj. (Yaxayas 32:2) Tej zaum lawv kuj yuav hais kom koj mus nrog ib tug viv ncaus hauv lub koom txoos uas lawv paub hais tias nws yuav nplig tau koj thiab koj tsis txaj muag qhia siab rau tham.​—Pajlug 17:17.

Phau Vajlugkub hais tias “ob leeg zoo dua ib leeg” thaum peb sib kom nrog peb tus yeeb ncuab uas muaj zog heev. (Tej Lus Qhia 4:9-12) Ces tej zaum, koj yeej yuav pab tau koj tus txiv kom nws tsis txhob saib duab liab qab thiab. Cov neeg tshawb fawb txog qhov teeb meem no hais tias cov niam txiv uas sib pab daws qhov teeb meem yeej keev pab tau tus txiv tsis saib duab liab lawm thiab pab tau nkawd rov sib ntseeg siab dua.

Tiam sis qhov tseem ceeb tiag ces yuav tsum yog tus txiv yeej xav tso tseg thiab thiaj li ua tau. Ua li, nws puas tau thov Yehauvas thiab thov cov txwj laus pab nws? (2 Kauleethaus 4:7; Yakaunpaus 5:14, 15) Nws puas paub tias nws yuav ua li cas nws thiaj tso tau tseg? Xws li, tsis txhob saib nws tej twj ntawm tes los sis koos pis tawj ntau ntau thiab tsis txhob ua tej yam uas yuav rau nws rov mus saib duab liab qab. (Pajlug 27:12) Nws puas kam koj pab nws thiab qhia siab hlo rau koj? Yog nws kam ces tej zaum koj yuav pab tau nws.

Koj yuav pab koj tus txiv li cas? Peb yuav tham txog ib nkawm niam txiv hu ua Xis thiab Eev. Thaum nkawd sib yuav, Eev twb muaj yees saib duab liab qab txij thaum me nyuam hluas los lawm. Xis yeej ua zoo nrog nws tham kom yooj yim rau nws qhia Xis txog tej thaum uas yuav ua rau nws xav mus saib duab liab qab. Eev piav hais tias: “Kuv yeej qhia siab hlo thiab tsis zais dab tsi rau kuv poj niam. Nws yeej ua zoo pab kom kuv zam tej uas yuav rau kuv rov ua txhaum thiab nco ntsoov nrog kuv tham. Thiab Xis tsuas pub kuv muaj Is Taws Nej tej lub sij hawm xwb.” Qhov uas Eev muaj yees saib duab liab qab yeej ua rau Xis mob siab kawg. Tiam sis Xis hais tias, “Qhov uas kuv chim chim siab thiab mob mob siab ntawd pab tsis tau nws tso tseg tsis saib duab liab qab. Thaum wb muab nws qhov teeb meem los ua tib zoo tham, nws kam pab kho wb qhov teeb meem kom kuv thiaj tsis mob siab.”

Thaum ob niam txiv txawj sib tham li no, tsis yog pab tau tus txiv thum saib duab liab qab xwb tiam sis kuj pab tau tus niam rov ntseeg nws tus txiv siab dua thiab. Yog tus txiv qhia siab hlo rau nws tus poj niam txog tej uas sim nws siab, tej uas nws niaj hnub ua, thiab niaj hnub mus ces yuav yooj yim rau nws tus poj niam rov ntseeg nws siab dua.

Yog koj xav tias koj yeej yuav pab tau koj tus txiv li no, thiab nws los yeej xav thum duab liab qab tiag tiag kom koj thiaj rov ntseeg nws siab ces kav tsij nyeem thiab tham zaj no nrog nws. Yeej tsis tsim nyog nws chim rau koj yog koj xav nrog nws tham txog qhov no rau qhov nws yuav tsum to taub lawm tias qhov teeb meem no ua rau koj mob siab npaum li cas. Koj yuav tau pab kom nws thum tau thiab cia nws ua kom koj rov qab ntseeg tau nws siab. Neb ob niam txiv yuav tsum kawm kom neb to taub tias yog vim li cas tib neeg thiaj nyiam saib duab liab qab thiab yuav ua li cas thiaj li thum tau.

 Tiam sis yog koj xav hais tias neb ob niam txiv yuav ua zoo sib tham tsis tau ces seb neb puas kam ib tug txwj laus uas neb tsis txaj muag nrog tham tuaj pab neb thaum neb tham txog neb qhov teeb meem zaum puav. Nco ntsoov tias thaum ob niam txiv ib tug muaj yees saib duab liab qab lawm yeej yuav siv sij hawm ntev loo nkawd mam li rov sib ntseeg siab. Tiam sis tsis txhob cia li kav liam. Xam pom tej yam me me uas neb ua tau zoo zuj zus hauv neb lub neej. Vam tias yog koj ua siab ntev, tej zaum ntev mus neb txoj kev txij nkawm yuav rov ruaj ntseg li qub dua.​—Tej Lus Qhia 7:8; 1 Kauleethaus 13:4.

Yog tias nyob nyob koj tus txiv ho rov saib dua ib zaug los tsis yog hais tias nws yeej yuav thum tsis tau ib zaug li. Thaum ib tug neeg muaj yees lawm ces yeej tsis yooj yim rau nws cia li tso tseg. Tej tug uas twb thum tau ntau ntau xyoo lawm los nyob nyob muaj tej zaum nws tseem rov qab mus ua ib zaug los muaj. Nws yuav tsum peem tiag nws thiaj yuav tsis rov qab mus ua dua. Txawm yog nws twb thum tau lawm los nws yuav tsum nco ntsoov ceev faj tsam nws ho rov qab mus ua dua. (Pajlug 28:14; Mathais 5:29; 1 Kauleethaus 10:12) Nws “yuav tsum hloov dua siab tshiab” thiab “ntxub tej kev phem kev qias,” tsis hais saib duab liab qab los sis lwm yam uas tsis dawb huv xws li kov los sis rhoob qhov chaw mos. (Efexus 4:23; Phau Ntawv Nkauj 97:10; Loos 12:9) Yog nws kam ua li tej uas tham tas no ces tej zaum koj yeej yuav pab nws thum tau. d

Yog koj tus txiv ho tsis kam tso tseg los nyob ntawm nws tiam sis peb yeej to taub tias tej zaum nws yuav ib sij ua rau koj tu siab ib zaug, koj yuav chim siab, thiab xav tias koj tus txiv ua tsis ncaj ncees rau koj. Tiam sis koj yuav kaj siab dua yog koj tso plhuav koj tej kev nyuaj siab rau Yehauvas. (1 Petus 5:7) Rau siab ntso kawm Vajlugkub, thov Yehauvas, thiab ua zoo xav txog tej uas koj kawm kom koj txav ze rau Yehauvas thiab muaj kev sib raug zoo nrog nws. Phau Ntawv Nkauj 34:18 hais tias Yehauvas “nyob ze cov neeg uas tas kev cia siab” vim nws xav pab kom lawv rov muaj kev zoo siab. Yog li, kav tsij rau rau siab teev tiam Yehauvas, thov cov txwj laus pab koj, thiab tsis txhob tag kev cia siab. Vam tias muaj ib hnub yav tom ntej koj tus txiv yuav hloov tau.​—Loos 2:4; 2 Petus 3:9.