1. Vim li cas koj thiaj nyiam cov neeg uas ua siab ntev?

 PEB sawv daws yeej nyiam cov neeg uas ua siab ntev. Peb nyiam lawv rau qhov peb yeej zoo siab heev thaum peb pom ib tug neeg ua siab ntev tos ib yam dab tsi. Txawm tsis tau li nws lub siab xav los nws yeej tsis chim thiab tsis npau taws. Peb zoo siab heev thaum peb ua yuam kev es lwm tus ua siab ntev rau peb. Thiab peb kuj zoo siab heev uas tus qhia Vajlugkub rau peb ua siab ntev thaum peb tsis to taub tej uas peb kawm, nyuaj rau peb lees yuav los sis ua li tej uas phau Vajlugkub qhia. Tiam sis qhov uas ua rau peb zoo siab tshaj plaws yog Vajtswv Yehauvas ua siab ntev rau peb.​—Loos 2:4.

2. Thaum twg yuav nyuaj rau peb ua siab ntev?

² Txawm peb nyiam cov neeg uas ua siab ntev los, muaj tej thaud, yeej tsis yooj yim rau peb ua siab ntev. Xws li thaum peb maj maj mus ib qho twg vim peb twb lig lawm los peb tseem yuav tau tos lwm tus thiab. Los sis thaum lwm tus ua meem txom peb yuav ua rau peb npau taws. Thiab muaj tej thaud yuav nyuaj heev rau peb nyob tos lub qab ntuj tshiab uas Yehauvas cog tseg. Yog li yuav ua li cas peb thiaj ua tau siab ntev mus ntxiv? Hauv zaj no, peb yuav kawm tias ua siab ntev yog li cas tiag? Thiab vim li cas thiaj tseem ceeb rau peb ua siab ntev? Thiab peb kuj yuav tham txog tej uas yuav pab kom peb haj yam ua tau siab ntev.

3. Tus neeg siab ntev ua li cas thaum muaj neeg txhob txwm ua kom nws npau taws?

³ Peb yuav tham txog plaub qho uas qhia tias tus neeg siab ntev zoo li cas. Qhov ib, tus neeg siab ntev tsis chim sai. Thaum muaj neeg txhob txwm ua kom nws npau taws los nws ua tau siab tus tus thiab thaum nws muaj kev ntxhov siab los nws tsis ua kub ua heev rau lwm tus. Thawj zaug uas peb pom lo lus “tsis chim  sai” hauv phau Vajlugkub yog thaum uas Yehauvas piav txog nws tus kheej tias nws yog tus Vajtswv uas “muaj lub siab puv nkaus kev hlub thiab tshua, yog tus uas tsis chim sai thiab yog tus uas muaj kev hlub thiab ncaj ncees.”​—Khiav Dim 34:6.

4. Tus neeg siab ntev ua li cas thaum nws tos ib yam dab tsi?

⁴ Qhov ob, tus neeg siab ntev ua tau siab tus. Thaum nws tos ib yam dab tsi ntev dhau lawm los nws tsis ntxhov siab thiab tsis ua rau nws nyob tsis tswm. (Mathais 18:26, 27) Muaj ntau yam peb yuav tau ua siab ntev tos. Xws li thaum muaj neeg tseem tab tom hais lus, peb yuav tsis tshuam lawv lus thiab ua siab ntev mloog lawv. (Yauj 36:2) Peb kuj yuav tau ua siab ntev pab tus kawm Vajlugkub kom nws to taub tej uas phau Vajlugkub qhia los sis pab nws tso tej yam phem tseg.

5. Tus neeg siab ntev yuav ua li cas ntxiv?

⁵ Qhov peb, tus neeg siab ntev tsis maj. Yeej muaj tej thaud uas peb yuav tau maj nrawm nroos. Tiam sis, thaum muaj ib teg hauj lwm tseem ceeb, tus neeg siab ntev yuav tsis maj thiab tsis lam tau lam ua tsuag tsuag kom tas xwb. Tiam sis nws yuav siv sij hawm los ua zoo npaj tias nws yuav ua li cas. Thiab nws npaj sij hawm kom txaus los ua tes hauj lwm ntawd kom tiav log.

6. Thaum muaj teeb meem los sis kev nyuaj siab, tus neeg siab ntev ua li cas?

⁶ Qhov plaub, tus neeg siab ntev yuav ua tiag nyiaj nws tej teeb meem thiab tsis yws daws dom. Yeej tsis txhaum yog hais tias peb qhia peb tus phooj ywg zoo txog peb tej kev nyuaj siab. Tiam sis thaum muaj teeb meem los sis muaj kev nyuaj siab, tus neeg siab ntev yuav xav txog tej uas zoo hauv nws lub neej xwb thiab rau rau siab teev tiam Yehauvas li nws ua tau. (Kaulauxais 1:11) Vim li cas txhua tus Khixatia yuav tau ua li plaub qho uas hais tag no? Peb mam li tham me ntsis ntxiv.

7. Raws li Yakaunpaus 5:7, 8, vim li cas thiaj tseem ceeb rau peb yuav tsum ua siab ntev? (Saib daim duab.)

⁷ Peb yuav tsum ua siab ntev peb thiaj yuav tau txoj sia nyob mus ib txhis. Ib yam li Vajtswv cov tub qhe uas muab siab npuab nws thaum ub, peb yuav tau ua siab ntev tos tej uas Vajtswv cog lus tseg lawm hais tias nws yuav muab pub rau peb. (Henplais 6:11, 12) Phau Vajlugkub muab peb piv rau tus neeg ua liaj ua teb. (Nyeem Yakaunpaus 5:7, 8.) Tus neeg ua liaj ua teb rau siab ntso cog thiab ywg dej rau nws tej qoob loo, tiam sis nws yeej tsis paub tias thaum twg nws tej qoob loo mam li loj hlob. Txawm li los, nws yeej ua siab ntev tos thiab cia siab tias nws yuav tau sau nws tej qoob loo. Peb los yuav tau ua li ntawd thiab. Txawm hais tias peb “tsis paub tias [peb] tus Tswv yuav los rau hnub twg” los peb yeej rau siab ntso ua li Yexus hais. (Mathais 24:42) Peb ua siab ntev tos vim peb paub tias thaum txog caij txog nyoog lawm Yehauvas yeej yuav ua kom muaj tiav li nws cog lus tseg. Tiam sis yog peb tsis ua siab ntev ces tej zaum peb yuav qaug zog thiab pib nrug deb zuj zus ntawm Yehauvas. Thiab peb yuav mus vuag ua tej uas yuav ua rau peb zoo siab tam sid xwb. Tiam sis yog hais tias peb ua siab ntev ces peb yuav thev taus mus txog thaum kawg thiab yuav dim.​—Mikhas 7:7; Mathais 24:13.

8. Qhov uas peb ua siab ntev pab tau peb thiab lwm tus li cas? (Kaulauxais 3:12, 13)

⁸ Qhov uas peb ua siab ntev yuav pab tau peb muaj kev sib raug zoo nrog lwm leej lwm tus, pab tau peb ua zoo mloog thaum lwm tus nrog peb tham. (Yakaunpaus 1:19) Pab tau peb muaj kev sib haum xeeb nrog lwm tus. Thiab kuj yuav pab kom peb tsis txhob lam tau lam ua thiab lam tau lam hais lus phem thaum muaj kev nyuaj siab ntxhov plawv. Thiab yog peb ua siab ntev ces peb yuav tsis chim sai thaum muaj neeg ua mob peb siab. Peb yuav tsis ua phem pauj phem, tiam sis peb “ib tug yuav tsum pab ib tug” thiab “ib tug yuav tsum zam txim rau ib tug.”​—Nyeem Kaulauxais 3:12, 13.

9. Vim li cas qhov uas peb ua siab ntev thiaj pab tau peb txiav txim siab kom zoo? (Pajlug 21:5)

⁹ Qhov uas peb ua siab ntev kuj yuav pab kom peb paub txiav txim siab zoo. Rau qhov yog peb ua siab ntev ces peb yuav ua zoo xav thiab ua zoo tshuaj xyuas kom zoo zoo ua ntej peb txiav txim siab ua ib yam dab tsi. Peb yuav tsis maj thiab tsis lam tau lam ua. (Nyeem Pajlug 21:5.) Muab ua piv txwv li no, thaum peb mus nrhiav hauj lwm, tej zaum peb yuav cia li lees ua thawj txoj hauj lwm uas peb nrhiav tau txawm hais tias txoj hauj lwm ntawd yuav nyuaj rau peb pe hawm Yehauvas. Tiam sis yog peb ua siab ntev ces peb yuav ua tib zoo xav seb txoj hauj lwm ntawd nyob qhov twg, peb yuav ua hauj lwm thaum twg rau thaum twg, yuav ua li cas rau peb tsev neeg, thiab peb txoj kev sib raug zoo nrog Yehauvas. Yog li ntawd, thaum peb ua siab ntev ces peb thiaj yuav paub txiav txim siab zoo.

10. Yuav ua li cas peb thiaj ua tau siab ntev?

¹⁰ Thov Vajtswv pab kom peb ua tau siab ntev dua qub. Vajtswv lub hwj huam dawb huv yuav pab kom peb ua tau siab ntev. (Kalatias 5:22, 23) Yog li peb yuav tau thov Yehauvas kom pub nws lub hwj huam dawb huv rau peb xwv peb thiaj coj tau tej cwj pwm zoo. Yeej meem thov Yehauvas kom nws muab nws lub hwj huam pab peb thaum peb ntsib tej yam ua peb yuav tsum tau ua siab ntev. (Lukas 11:9, 13) Peb kuj thov Yehauvas pab kom peb pom qhov teeb meem ntawd li nws pom. Thaum peb thov Yehauvas tas, nco ntsoov ua siab ntev txhua txhua hnub. Thaum peb pheej thov Yehauvas pab peb ua siab ntev tsis tseg thiab ua siab ntev  li peb ua tau ces ntev mus ntev tuaj peb yuav swm tus cwj pwm ntawd.

11-12. Yehauvas ua siab ntev li cas?

¹¹ Ua zoo xav txog cov neeg siab ntev hauv phau Vajlugkub. Cov neeg ua siab ntev hauv phau Vajlugkub muaj coob. Thaum peb muab lawv cov yam ntxwv coj los ua zoo xav, ua zoo kawm, ces peb yuav paub tias ua siab ntev ua li cas. Tiam sis ua ntej peb ua li ntawd, cia peb xub mus tshuaj xyuas seb Yehauvas ua siab ntev li cas tso.

¹² Thaum Xatas xyav Yehauvas lub npe thiab tawm tsam Yehauvas hauv lub vaj Edees tias Yehauvas txoj kev kav tsis ncaj ncees thiab nws tsis hlub Adas thiab Eva nkawd, Yehauvas tsis muab Xatas tua tiam sis nws ua siab ntev thiab tswj nws tus kheej. Nws paub tias yeej yuav siv sij hawm ntev heev sawv daws thiaj yuav paub tias nws txoj kev kav yog txoj zoo tshaj plaws. Txawm luag hais phem npaum li cas txog nws los nws ua siab ntev. Tsis tas li ntawd xwb, Yehauvas ua siab ntev los twb yog nws cia kom muaj neeg coob li coob tau tau txoj sia nyob mus ib txhis. (2 Petus 3:9, 15) Vim Yehauvas ua siab ntev thiaj muaj neeg coob heev los paub nws. Yog peb xav txog qhov uas Yehauvas ua siab ntev pab tau peb li cas ces yuav tsis nyuaj luaj twg rau peb ua siab ntev tos txog thaum lub qab ntuj phem no kawg.

13. Yexus xyaum ua tau siab ntev li nws Txiv li cas? (Saib daim duab.)

¹³ Thaum Yexus tseem nyob hauv ntiaj teb, txhua yam uas nws ua qhia tias nws xyaum ua tau siab ntev ib yam li nws Txiv, Yehauvas. Tiam sis muaj tej thaud yeej tseem tsis yooj yim rau nws ua siab ntev rau cov xib hwb thiab cov Falixais uas ncauj lus zoo siab phem. (Yauhas 8:25-27) Txawm li los, Yexus yeej ua siab ntev li nws Txiv thiab tsis chim sai. Thaum luag ua saib tsis taus nws thiab txhob txwm ua kom nws  chim los nws tsis ua phem rov rau lawv. (1 Petus 2:23) Nws ua siab ntev thev tej kev txom nyem uas nws raug thiab tsis yws li. Twb yog li ntawd, phau Vajlugkub thiaj hais rau peb tias “nej yuav tsum nco ntsoov Yexus tej kev txomnyem thiab qhov uas nws ua siab ntev rau cov neeg txhaum uas ntxub nws.” (Henplais 12:2, 3) Yog peb muaj Yehauvas pab, peb kuj yuav ua tau siab ntev thiab thev taus txhua yam kev txom nyem uas yuav los raug peb.

14. Peb kawm tau li cas los ntawm qhov uas Anplahas ua siab ntev? (Henplais 6:15) (Saib daim duab.)

¹⁴ Peb ib txhia twb tos hnub kawg los ntev lawm ces tej zaum peb yuav xav tias xyov peb puas yuav nyob pom hnub ntawd. Yog li, peb yuav ua li cas ua tau siab ntev tos txog hnub ntawd? Xav txog Anplahas, thaum Yehauvas cog lus rau nws tias: “Kuv yuav pub koj muaj xeebntxwv coob,” nws twb muaj 75 xyoos lawm. (Chivkeeb 12:1-4) Anplahas puas pom tag nrho tej uas Yehauvas cog lus rau nws? Nws yeej tsis pom tag nrho. Twb yog thaum nws hla tus Dej Efalates lawm thiab twb yog 25 xyoos tom qab ntawd lawm mam li yug tau nws tus tub Ixaj. Ces 60 xyoo tom qab no ntxiv mam li yug tau nws ob tug tub xeeb ntxwv, Exaus thiab Yakhauj. (Nyeem Henplais 6:15.) Tiam sis Anplahas tsis pom nws cov xeeb leej xeeb ntxwv ua ib haiv neeg tseem ceeb thiab tsis pom thaum lawv mus rau hauv lub teb chaws uas Yehauvas cog tseg. Txawm li los Anplahas yeej muaj kev sib raug zoo nrog nws. (Yakaunpaus 2:23) Thaum Yehauvas tsa Anplahas sawv rov qab los yav tom hauv ntej, Anplahas yuav zoo heev tias vim nws muaj kev ntseeg thiab ua siab ntev, Yehauvas thiaj foom koob hmoov rau txhua haiv neeg hauv ntiaj teb no. (Chivkeeb 22:18) Peb kawm tau los ntawm Anplahas tias  tej zaum peb yuav tsis pom tag nrho Yehauvas tej lus cog tseg muaj tiav. Tiam sis yog peb ua siab ntev li Anplahas, Yehauvas yeej yuav muab koob hmoov rau peb tam sim no thiab tseem yuav muab ntau tshaj ntxiv rau peb hauv lub qab ntuj tshiab.​—Malakaus 10:29, 30.

15. Peb yuav tau ua zoo xav txog li cas thaum peb kawm txog cov neeg hauv phau Vajlugkub?

¹⁵ Tseem tshuav coob tus uas ua siab ntev hauv phau Vajlugkub uas zoo rau peb mus kawm txog lawv thiab. b (Yakaunpaus 5:10) Lawv cov nod ib tug yog Daviv. Thaum Yehauvas xaiv nws los ua cov Ixayees tus vaj ntxwv nws tseem hluas heev ces nws yuav tau ua siab ntev tos ntau ntau xyoo nws mam li tau ua vaj ntxwv. Hos muaj ob tug yog Xime-oos thiab Anas, nkawd ob leeg puav leej rau rau siab pe hawm Yehauvas thaum nkawd ua siab ntev tos tus Mexiyas los. (Lukas 2:25, 36-38) Thaum koj kawm txog lawv, ua zoo xav seb ua li cas lawv thiaj ua tau siab ntev tos thiab koj yuav xyaum lawv cov qauv li cas. Yog koj kawm txog cov uas tsis ua siab ntev los kuj yuav pab tau koj thiab. (1 Xamuyees 13:8-14) Ua zoo xav seb yog vim li cas lawv thiaj tsis ua siab ntev thiab qhov uas lawv tsis ua siab ntev, lawv ho ntsib teeb meem li cas.

16. Thaum peb ua siab ntev pab tau peb li cas?

¹⁶ Xav seb ua siab ntev pab tau peb li cas. Thaum peb ua siab ntev peb zoo siab dua thiab muaj lub siab tus. Twb yog li ntawd, thaum peb ua siab ntev peb thiaj noj qab nyob zoo, muaj kev sib raug zoo nrog lwm tus, thiab muaj kev sib haum xeeb hauv lub koom txoos. Thaum muaj neeg txhob txwm ua kom peb chim siab los peb tsis chim sai thiab tsis tsim teeb meem kom loj ntxiv. (Phau Ntawv Nkauj 37:8; Pajlug 14:29) Tiam sis qhov uas tseem ceeb tshaj plaws thaum peb ua siab ntev yog peb xyaum peb Leej Txi tus uas nyob saum ntuj thiab peb haj yam muaj kev sib raug zoo nrog nws.

17. Peb yuav ua li cas lawm yav tom ntej?

¹⁷ Qhov uas peb ua siab ntev yeej pab tau peb kawg nkaws li. Txawm muaj tej thaud tsis yooj yim los, yog peb muaj Yehauvas pab ces peb yuav ua tau siab ntev. Thiab peb tso siab plhuav tias thaum peb ua siab ntev nyob tos lub qab ntuj tshiab, Yehauvas yuav “saib ntsoov txhua tus uas hwm nws, thiab cov uas cia siab rau nws txojkev hlub uas tsis hloov li.” (Phau Ntawv Nkauj 33:18) Yog li, thov kom peb sawv daws ua tau siab ntev mus lawm yav tom ntej.