1. Vim li cas cov Npanpiloos thiaj nyiam thiab qhuas Daniyees?

 THAUM Daniyees raug ntes mus rau Npanpiloos uas nyob deb heev ntawm Yeluxalees nws tseem yog tub hluas xwb. Txawm tias nws tseem hluas los muaj cov nom tswv Npanpiloos uas nyiam thiab qhuas nws vim lawv pom nws “zoo nraug” thiab nws yog noob nom noob tswv. (1 Xamuyees 16:7) Twb yog li ntawd, cov Npanpiloos thiaj cob qhia Daniyees ua hauj lwm nyob hauv vaj ntxwv lub loog.​—Daniyees 1:3, 4, 6.

2. Yehauvas xav li cas txog Daniyees? (Exekees 14:14)

² Yehauvas hlub Daniyees, tsis yog vim nws zoo nraug los sis nws muaj hauj lwm zoo ua nyob hauv vaj ntxwv lub loog, tiam sis yog vim nws muab siab npuab Yehauvas. Thaum Yehauvas hais tias Daniyees zoo ib yam li Nau-as thiab Yauj nkawd, Daniyees tsuas muaj kwv lam li 20 xyoo xwb. Txawm li los, Yehauvas yeej suav tias Daniyees yog ib tug neeg ncaj ncees li Nau-es thiab Yauj uas twb teev tiam Yehauvas ntev ntev los lawm. (Chivkeeb 5:32; 6:9, 10; Yauj 42:16, 17; nyeem Exekees 14:14.) Thaum Daniyees laus laus lawm los Yehauvas yeej tseem hlub nws.​—Daniyees 10:11, 19.

3. Peb yuav kawm txog dab tsi hauv zaj no?

³ Hauv zaj no, peb yuav kawm txog Daniyees ob tug yeeb yam uas ua rau nws muaj nqis heev rau Yehauvas. Peb yuav tham seb ob tug yeeb yam ntawd yog dab tsi, thaum twg nws coj li ob tug yeeb yam ntawd, dab tsi ho pab tau nws muaj ob tug yeeb yam ntawd, thiab peb yuav xyaum nws tus qauv li cas. Txawm hais tias zaj no yog sau rau cov hluas xwb los Daniyees tus qauv yeej pab tau peb sawv daws.

4. Piav seb ua li cas peb thiaj paub tias Daniyees siab tawv heev.

⁴ Muaj tej thaum cov neeg siab tawv los yeej ntshai thiab, tiam  sis lawv yeej tseem ua qhov zoo qhov yog. Daniyees yog ib tug tub hluas uas siab tawv heev. Muaj ob zaug uas nws ua siab tawv heev. Thawj zaug yog kwv lam li ob xyoos tom qab cov Npanpiloos ua rau Yeluxalees puas tsuaj tas. Vaj Ntxwv Nenpukajnexales ua npau suav pom ib tug mlom loj siab thiab txaus ntshai heev. Nws thiaj hawv tias yog nws cov tuav xam piav tsis tau thiab txhais tsis tau nws zaj npau suav rau nws mas nws yuav muab lawv tua kom tas. Daniyees los yuav raug tua thiab. (Daniyees 2:3-5) Ces Daniyees thiaj mus cuag vaj ntxwv tam sim ntawd thiab “thov vajntxwv kom pub sijhawm ntev mentsis” es “nws mam li qhia thiab txhais zaj npau suav ntawd rau vajntxwv.” (Daniyees 2:16) Daniyees siab yuav tsum tawv thiab nws yuav tsum muaj kev ntseeg nws thiaj ua tau li no rau qhov Vajtswv Txoj Lus yeej tsis tau hais tias Daniyees twb txhais npau suav dua los lawm. Daniyees kuj hais kom nws peb tug kwv luag uas npe Npanpiloos hu ua Sadalas, Mesakas thiab Anpenekaus “thov Vajtswv tus uas nyob saum ntuj hlub lawv thiab qhia tej yam uas tsis muaj leejtwg paub rau lawv.” (Daniyees 2:18) Yehauvas teb lawv tej lus thov. Daniyees thiaj mus txhais tau Nenpukajnexales zaj npau suav rau nws. Daniyees thiab nws peb tug kwv luag thiaj dim kev tuag.

5. Daniyees raug sim li cas ntxiv uas nws yuav tau ua siab tawv thiab?

⁵ Thaum Daniyees txhais zaj npau suav txog tus mlom loj thiab siab heev no tau ib ntus ces nws txawm rov raug sim dua. Vaj Ntxwv Nenpukajnexales rov ua ib zaj npau suav uas txaus ntshai heev thiab. Zaum no nws npau suav pom ib tsob ntoo loj thiab siab heev. Daniyees siab tawv heev thiab yeej tsis ntshai txhais vaj ntxwv zaj npau suav rau nws tias nws yuav vwm thiab yuav tsis tau ua vaj ntxwv ib ntus. (Daniyees 4:25) Daniyees yeej paub tias yog vaj ntxwv yuav xav tias nws ntxeev siab rau vaj ntxwv lawm thiab muab nws tua los yeej tau. Tiam sis Daniyees yeej ua siab tawv qhawv tsis ntshai txhais zaj npau suav rau vaj ntxwv.

6. Daniyees ua li cas nws thiaj muaj lub siab tawv?

⁶ Daniyees muaj lub siab tawv tas nws sim neej los twb yog nws kawm ntawm nws niam thiab nws txiv puag thaum yau los. Nkawd mloog Yehauvas lus thiab cob qhia Daniyees kom nws paub Yehauvas tej kev cai uas Yehauvas muab rau cov Ixayees cob qhia lawv cov me nyuam. (2 Kevcai 6:6-9) Daniyees tsis yog paub  txog 10 Txoj Kev Cai xwb, tiam sis nws kuj paub ntxaws ntxaws tias cov Ixayees noj tau dab tsi thiab noj tsis tau dab tsi. b (Levis Kevcai 11:4-8; Daniyees 1:8, 11-13) Daniyees kuj kawm txog Yehauvas cov neeg tej keeb kwm thiab paub tias ua li cas rau lawv thaum lawv tsis mloog Yehauvas lus. (Daniyees 9:10, 11) Tej uas nws ntsib hauv nws lub neej ua rau nws tso siab tau tias txawm yuav muaj dab tsi los Yehauvas thiab Yehauvas cov tub txib saum ntuj yeej yuav pab nws.​—Daniyees 2:19-24; 10:12, 18, 19.

7. Muaj dab tsi ntxiv pab kom Daniyees muaj lub siab tawv? (Saib daim duab.)

⁷ Daniyees kawm txog cov cev Vajtswv lus cov lus faj lem thiab Yelemis cov lus faj lem. Tom qab no nws thiaj paub tias twb tshuav tsis ntev ces cov neeg Yudais hauv Npanpiloos yuav tau rov mus lawv qub teb qub chaw. (Daniyees 9:2) Thaum Daniyees pom muaj li cov lus faj lem hais ua rau nws haj yam tso siab rau Yehauvas. Cov uas tso siab tuag nthi rau Yehauvas yuav ua tau siab tawv heev. (Muab piv rau Loos 8:31, 32, 37-39.) Qhov tseem ceeb tshaj yog Daniyees keev thov Yehauvas tsis tu ncua. (Daniyees 6:10) Nws lees hlo nws tej kev txhaum, qhia nws tej kev xav rau Yehauvas, thiab thov Yehauvas pab nws. (Daniyees 9:4, 5, 19) Daniyees yog neeg ib yam li peb xwb ces nws yeej tsis yug los muaj lub siab tawv. Nws ua tau siab tawv los twb yog vim nws rau siab kawm Vajtswv Txoj Lus, thov Yehauvas tsis tu ncua, thiab tso siab rau Yehauvas.

8. Peb yuav ua li cas peb thiaj muaj lub siab tawv?

⁸ Yuav kom peb muaj lub siab tawv, peb yuav tau ua li cas? Peb niam peb txiv yeej xav kom peb muaj lub siab tawv, tiam sis lawv muab tsis tau rau peb li lawv muab tej qub txeeg qub teg. Ces yuav kom peb ua tau siab tawv peb yuav tsum tau kawm li peb kawm kom peb txawj ua ib yam dab tsi. Ib qho uas yuav pab kom peb ua tau li no ces yog saib peb tus xib hwb. Nws ua li cas ces peb xyaum tas zog kom peb txawj li nws. Zoo ib yam li ntawd, yog peb xyaum cov neeg siab tawv ces peb yuav ua tau siab tawv li lawv thiab. Yog li, peb kawm tau li cas los ntawm Daniyees? Ib yam li Daniyees pebyuav tsum to taub Vajtswv Txoj Lus kom zoo, nrog Yehauvas tham tsis tu ncua, thiab qhia tej peb xav rau Yehauvas peb thiaj muaj kev sib raug zoo nrog nws. Thiab peb yuav tsum tso siab plhuav tias Yehauvas yeej yuav pab peb. Thaum peb raug kev sim siab peb thiaj yuav ua tau siab tawv.

9. Piav seb yog peb muaj lub siab tawv no, yuav pab tau peb li cas?

⁹ Yog peb muaj lub siab tawv yuav pab tau peb ntau yam. Muaj ib tug tub hluas hu ua Npees (Ben) nyob teb chaws Ntsaws Mes Nis (Germany). Nyob hauv nws lub tsev kawm ntawv, sawv daws ntseeg tias txhua yam yog txia los xwb thiab lawv tsis ntseeg tias txhua yam yog Vajtswv tsim li phau Vajlugkub hais. Muaj ib hnub, nws tus xib hwb txawm hais kom nws mus sawv pem hauv ntej thiab piav rau sawv daws tias yog vim li cas nws thiaj li ntseeg tias txhua yam uas muaj sia yog tsim los. Nws ua siab tawv qhawv tsis ntshai piav nws txoj kev ntseeg rau lawv. Nws hais tias: “Kuv tus xib hwb ua tib zoo mloog thiab nws muab phau Tsim Dheev! uas kuv siv los txhawb kuv zaj lus luam rau sawv daws. Lawv coob tus kuj ua zoo mloog kuv thiab qhuas kuv.” Muaj ntau zaus, cov uas ua tau siab tawv li Npees yuav ua rau lwm tus qhuas thiab saib taus lawv. Thiab tej zaum lawv tseem pab tau ib txhia los paub Yehauvas.

10. Muab siab npuab yog dab tsi?

¹⁰ Lo lus “muab siab npuab” yog txhais los ntawm lo lus Henplais uas phau Vajlugkub siv los qhia txog Vajtswv txoj kev hlub rau nws cov phooj ywg. Phau Vajlugkub kuj siv lo lus no los piav txog txoj kev sib hlub uas Vajtswv cov neeg ib leeg muaj rau ib leeg thiab. (2 Xamuyees 9:6, 7) Yog hais tias peb rau siab xyaum tiag ces ntev mus peb yeej yuav muab siab npuab Yehauvas ntau zuj zus ntxiv. Yog li, cia peb kawm mus ntxiv seb ho muaj tseeb li no rau Daniyees li cas.

11. Daniyees txoj kev npuab siab rau Yehauvas raug sim li cas thaum nws laus lawm? (Saib daim duab ntawm lub khaum.)

¹¹ Daniyees txoj kev npuab siab rau Yehauvas yeej raug sim tas nws sim neej. Ib zaug yog thaum nws muaj li 90 tawm xyoo. Thaum ntawd cov Medes thiab Pawxias twb tuaj txeeb tau Npanpiloos lawm thiab Vaj Ntxwv Dali-us yog tus kav. Muaj ib co nom tswv ntxub Daniyees thiab saib tsis taus Daniyees tus Vajtswv ces lawv thiaj sib tuav tswv yim los tua nws. Lawv rhawv ib txoj cai los sim Daniyees seb Daniyees yuav npuab siab rau Yehauvas los npuab siab rau vaj ntxwv. Txoj cai ntawd tsuas txwv tsis pub Daniyees thov Vajtswv li 30 hnub xwb. Tiam sis Daniyees yeej npuab siab rawv rau Yehauvas thiab tsis ua li lawv txoj cai hais. Lawv thiaj muab nws pov rau hauv lub qhov tsov ntxhuav. Vim Daniyees npuab siab rau Yehauvas, Yehauvas thiaj cawm nws dim ntawm cov tsov ntxhuav qhov ncauj. (Daniyees 6:12-15, 20-22) Peb yuav ua li cas peb thiaj li yuav muab siab npuab Yehauvas li Daniyees?

12. Daniyees ua li cas nws txoj kev npuab siab rau Yehauvas thiaj li ruaj khov?

¹² Yuav kom peb muab siab npuab Yehauvas peb yuav tsum hlub nws tiag tiag. Daniyees txoj kev npuab siab rau Yehauvas ruaj khov los twb yog nws hlub Yehauvas kawg siab kawg ntsws. Nws siv sij hawm los ua zoo xav txog Yehauvas tej yeeb yam thiab seb Yehauvas ho ua li nws tej yeeb yam ntawd li cas. (Daniyees 9:4) Nws kuj ua zoo xav txog txhua yam zoo uas Yehauvas tau ua rau nws thiab rau Yehauvas cov neeg thiab.​—Daniyees 2:20-23; 9:15, 16.

13. (1) Piav seb niaj hnub no cov hluas txoj kev npuab siab rau Yehauvas yuav raug sim li cas. (Saib daim duab.) (2) Koj yuav teb li cas yog muaj neeg nug tias Yehauvas Cov Tim Khawv puas txhawb txoj kev uas txiv neej deev txiv neej thiab pov niam deev poj niam?

¹³ Zoo ib yam li nyob rau Daniyees tiam, niaj  hnub no cov hluas yeej ntsib cov neeg uas tsis hwm Yehauvas thiab tsis quav ntsej txog tej uas Yehauvas hais tias zoo thiab phem coob heev. Tej zaum cov neeg no yuav tsis nyiam cov hluas uas hlub Vajtswv thiab ua phem rau lawv kom lawv tsis txhob npuab siab Yehauvas. Xws li tau muaj rau tus tub hluas hu ua Nke-as (Graeme) nyob teb chaws Auxitalia (Australia). Nws ntsib ib qho teeb meem uas nyuaj kawg rau nws tom tsev kawm ntawv. Nws tus xib hwb nug cov me nyuam kawm ntawv tias yog lawv tus phooj ywg uas yog ib tug tub hluas los qhia rau lawv tias nws nyiam me nyuam tub thiab no, lawv yuav ua li cas? Ces tus xib hwb txawm kom cov uas txhawb tus tub hluas ntawd mus sawv rau ib sab hos cov tsis txhawb mus rau ib sab. Nke-as hais tias: “Lawv sawv daws txawm sawv zom zaws mus tag rau sab uas txhawb tus tub hluas ntawd lawm, tsuas tshuav kuv thiab ib tug tub hluas uas yog Yehauvas Cov Tim Khawv thiab xwb.” Tom qab ntawd yeej nyuaj kawg rau nkawd npuab siab rau Yehauvas. Nke-as hais ntxiv tias: “Cov me nyuam kawm ntawv thiab tus xib hwb hais lus saib tsis taus wb thiab thuam wb tas zog. Txawm kuv ua siab ntev thiab ua zoo tiv thaiv kuv txoj kev ntseeg li cas los lawv yeej tsis mloog ib los li.” Qhov uas Nke-as raug sim no pab tau nws li cas? Nws hais tias: “Kuv yeej tsis nyiam thaum lawv thuam kuv li no, tiam sis kuv zoo siab heev uas kuv tiv thaiv tau kuv txoj kev ntseeg thiab muab siab npuab rawv Yehauvas.” c

14. Ib qho uas yuav pab kom peb muab siab npuab rawv Yehauvas yog dab tsi?

¹⁴ Yog peb hlub Yehauvas ib yam li Daniyees ces peb yeej yuav muab siab npuab rawv Nws. Thiab yog peb kawm kom peb paub txog Yehauvas tej yeeb yam zoo, xws li kawm txog tej uas nws tsim, ces peb txoj kev hlub rau nws yeej yuav ruaj khov. (Loos 1:20) Yog koj xav kom koj txoj kev hlub rau Yehauvas ruaj khov thiab paub hwm nws ces mus nyeem cov zaj lus luv luv “Puas Muaj Ib Tug Tsim?” los sis saib cov yeeb yaj kiab no. Thaum tus muam Exathaws (Esther) uas nyob teb chaws Deemaj (Denmark) nyeem Yehauvas Cov Tim Khawv tej ntaub ntawv uas tham txog tej uas Yehauvas tsim, nws hais tias: “Cov ntaub ntawv no txawj qhia thiab muaj laj thawj zoo heev thiab tsuas muab tej pov thawj uas muaj tiag los qhia xwb, koj yuav ntseeg li cas los nyob ntawm koj.” Hos tus kwv tij Npees uas peb tham txog puag ta hais tias: “Cov ntaub ntawv no txhawb tau kuv txoj kev ntseeg thiab ua tau pov thawj tias Vajtswv yog tus tsim txhua yam uas muaj sia.” Thaum koj nyeem cov ntaub ntawv no los, tej zaum koj yuav xav li nqe Vajlugkub no hais thiab: “[Yehauvas] uas yog peb sawvdaws tus Vajtswv! Koj yog tus uas muaj hwjchim, tsimnyog peb sawvdaws hwm koj thiab ua rau koj tau koob meej. Rau qhov koj yog tus uas tsim ib puas tsav yam huv tibsi; koj pom zoo tsim tej ntawd thiab pub tej ntawd muaj sia nyob.”​—Tshwmsim 4:11.

15. Ib qho ntxiv uas yuav pab kom peb muaj kev sib raug zoo nrog Yehauvas yog dab tsi?

¹⁵ Ib qho ntxiv uas yuav pab kom peb txoj kev hlub rau Yehauvas ruaj khov yog peb kawm txog Yehauvas tus Tub, Yexus lub neej. Tus muam Xamilam (Samira) uas yog ib tug ntxhais hluas nyob teb chaws Ntsaws Mes Nis hais tias: “Nim no kuv paub Yehauvas zoo tshaj qub los twb yog kuv kawm los ntawm Yexus.” Thaum Xamilam tseem yau nws tsis to taub tias Yehauvas yuav ua tau nws tus phooj ywg thiab yuav hlub tau nws. Tiam sis nws to taub Yexus. Nws hais ntxiv tias: “Kuv nyiam Yexus vim nws ua zoo rau txhua tus thiab nws hlub cov me nyuam yaus.” Thaum Xamilam paub Yexus zoo zuj zus ces kuj ua rau nws muaj kev sib raug zoo nrog Yehauvas zuj zus thiab. Nws hais tias: “Kuv maj mam to taub zuj  zus tias Yexus coj tau kiag nws Txiv tus yeeb yam. Nkawd ob txiv tub zoo ib yam nkaus. Twb yog vim li ntawd, Yehauvas thiaj li xa Yexus los rau hauv ntiaj teb no kom tib neeg thiaj li paub Yehauvas zoo tshaj qub.” (Yauhas 14:9) Yog koj xav muaj kev sib raug zoo nrog Yehauvas ces koj yuav tau qee sij hawm los kawm kom koj paub txog Yexus zoo, koj txoj kev hlub rau Yehauvas thiaj yuav ruaj khov thiab koj thiaj yuav muab siab npuab rawv Nws.

16. Thaum peb muab siab npuab Yehauvas pab tau peb li cas? (Yelemis 31:3)

¹⁶ Cov phooj ywg uas muaj kev sib raug zoo yog cov uas ib leeg muab siab npuab rau ib leeg tiag tiag. (Luv 1:14-17) Cov uas npuab siab rau Yehauvas tsis nco qab txhawj thiab txaus siab rau tej uas lawv muaj vim Yehauvas cog lus rau lawv tias nws yuav hlub lawv mus ib txhis. (Nyeem Yelemis 31:3.) Muab xav li no, yog muab Yehauvas uas yog tus Tswv Tsim uas muaj hwj chim tshaj plaws piv rau peb ces peb yeej me me heev. Txawm li los, nws tseem cog lus tias nws yuav hlub peb mus ib txhis. Thiab thaum peb muaj kev sib raug zoo nrog Yehauvas ces yeej yuav tsis muaj ib txoj kev sim siab twg, ib tug neeg twg, thiab txawm yog txoj kev tuag kiag los yeej cais tau peb ntawm Yehauvas txoj kev hlub. (Daniyees 12:13; Lukas 20:37, 38; Loos 8:38, 39) Vim li ntawd, thiaj tseem ceeb heev rau peb xyaum Daniyees thiab muab siab npuab rawv Yehauvas.

17-18. Peb yuav kawm tau dab tsi ntxiv ntawm Daniyees thiab?

¹⁷ Hauv zaj no peb tsuas kawm txog Daniyees ob tug yeeb yam xwb tiam sis tseem tshuav ntau yam uas peb yuav kawm tau ntawm nws. Xws li, Yehauvas los ua npau suav thiab ua yog toog ua ntu zus rau nws pom, thiab pab nws txhais tej lus faj lem. Cov lus faj lem ntawd, ib txhia twb muaj tiav lawm hos ib txhia qhia ntxaws ntxaws txog yav tom hauv ntej tias yuav muaj dab tsi tshwm sim los raug peb txhua leej txhua tus hauv ntiaj teb no.

¹⁸ Zaj tom ntej, peb yuav ua zoo kawm txog Daniyees ob zaj lus faj lem. To taub ob zaj lus faj lem no yuav pab tau peb sawv daws, tsis hais tus laus tus hluas, kom peb paub txiav txim siab zoo tias tam sim no peb yuav ua peb lub neej li cas. Ob zaj lus faj lem no kuj yuav txhawb kom peb ua tau siab tawv thiab tsis ntshai muab siab npuab Yehauvas thaum peb ntsib tej kev sim siab tsis ntev tom ntej no.