1. Muaj li cas xwb tom qab ib tug ua txhaum loj?

 NYOB rau zaj kawm tag los lawm, peb kawm hais tias Povlauj qhia kom lub koom txoos hauv Kauleethaus ua li cas rau li cas thaum ib tug ua txhaum loj. Tus ua txhaum loj ntawd tsis hloov dua siab tshiab ces nws yuav tau raug muab tshem tawm mus. Raws li Loos 2:4, Vajtswv maj mam ua siab ntev qhia mus txog thaum ib tug kam hloov dua siab tshiab. Ua li Yehauvas siv cov txwj laus los pab ib tug mus txog thaum nws hloov dua siab tshiab li cas?

2-3. Peb yuav ua li cas yog hais tias peb paub ib tug kwv tij los sis nkauj muam uas tau ua txhaum loj, thiab yog vim li cas?

² Yog tias cov txwj laus tsis paub tias ib tug twg tau ua txhaum loj ces lawv yuav tsis pom qab pab nws. Yog tias koj paub ib tug twg uas tau ua ib qho txhaum loj es yuav ua rau nws raug tshem tawm hauv lub koom txoos mus, koj yuav ua li cas? Koj yuav tau txhawb kom tus ua txhaum loj ntawd mus cuag cov txwj laus pab.​—Yaxayas 1:18; Tes Hauj Lwm 20:28; 1 Petus 5:2.

³ Yog tias tus ua txhaum loj ntawd tsis kam mus cuag cov txwj laus ces koj yuav tau mus qhia rau cov txwj laus paub kom tus ua txhaum ntawd thiaj tau kev pab. Thaum koj ua li no qhia tau tias koj hlub tus kwv tij los sis nkauj muam ntawd thiab koj paub tias cov txwj laus thiaj pab tau nws. Yog tus ua txhaum loj ntawd xib tim tsis kam hloov ces nws txoj kev sib raug zoo nrog Yehauvas yuav puas zuj zus mus. Tsis tas li ntawd, yog tej neeg ob cag paub tej nws tau ua ces lawv yuav thuam Yehauvas thiab Yehauvas cov tib neeg. Txawm yuav nyuaj npaum twg los koj yuav tau mus cuag cov txwj laus vim koj hlub Yehauvas thiab hlub tus kwv tij los sis nkauj muam ntawd.​—Phau Ntawv Nkauj 27:14.

 COV TXWJ LAUS PAB TUS UA TXHAUM LOJ LI NO

4. Cov txwj laus lub hom phiaj yog li cas thaum lawv mus ntsib ib tug uas tau ua txhaum loj?

⁴ Thaum muaj ib tug twg hauv lub koom txoos ua txhaum loj, cov txwj laus xaiv peb tug txwj laus mus cuag tus ntawd. a Cov txwj laus no yuav tsum yog neeg txo hwj chim thiab coj kom tsim nyog raws li tej hauv paus ntsiab lus hauv phau Vajlugkub. Thaum lawv mus pab tus ua txhaum loj ntawd, lawv tsis yuam ntiag kom nws hloov. (2 Kevcai 30:19) Lawv to taub tias tsis yog txhua tus ua txhaum yuav kam hloov dua siab tshiab ib yam li Vaj Ntxwv Daviv. (2 Xamuyees 12:13) Tej zaud ib co uas tau ua txhaum loj yuav tsis kam mloog Yehauvas tej lus qhuab ntuas. (Chivkeeb 4:6-8) Txawm li ntawd los cov txwj laus lub hom phiaj yog pab kom tus ua txhaum loj ntawd hloov dua siab tshiab. Ua li cov txwj laus yuav tau nco ntsoov li cas thaum lawv mus ntsib ib tug uas tau ua txhaum loj?

5. Cov txwj laus yuav tau coj cwj pwm li cas thaum lawv mus ntsib tus ua txhaum loj? (2 Timautes 2:24-26) (Saib daim duab.)

⁵ Cov txwj laus xam pom tias tus ua txhaum loj zoo yam li ib tug yaj uas poob zoo lawm thiab muaj nuj nqis heev rau Yehauvas. (Lukas 15:4, 6) Yog li ntawd thaum cov txwj laus mus nrog tus tib neeg ntawd tham, lawv tsis hais lus hnyav los sis ua nruj ua tsiv rau nws. Tsis tas li ntawd, lawv tsis lam mus ntsib nws kom tag kev tag cai xwb. Tiam sis cov txwj laus xyaum coj tej yeeb yam raws li hais nyob rau hauv 2 Timautes 2:24-26. (Nyeem.) Cov txwj laus ua siab mos siab muag, ua tib zoo hais, thiab ua zoo rau tus ua txhaum loj vim lawv xav rub kom tau nws lub siab rov qab los cuag Yehauvas.

6. Ua ntej cov txwj laus ntsib tus ua txhaum loj, lawv npaj lawv lub siab li cas? (Loos 2:4)

⁶ Cov txwj laus npaj lawv lub siab kom xav ib yam li Yehauvas xav. Lawv nco ntsoov Povlauj cov lus tias: “Vajtswv ua siab ntev qhia mus txog thaum koj hloov dua siab tshiab.” (Nyeem Loos 2:4.) Cov txwj laus zoo tam li ib co tswv yug yaj thiab lawv yuav tau coj ib yam li Khetos qhia thiab xyaum nws thaum lawv saib xyuas lub koom txoos. (Yaxayas 11:3, 4; Mathais 18:18-20) Ua ntej cov txwj laus ntsib nrog tus ua txhaum loj, lawv yuav tau thov Yehauvas pab kom lawv thiaj pab tau nws hloov dua siab tshiab. Lawv mus tshawb nrhiav tej nqe Vajlugkub thiab tej ntaub ntawv uas Yehauvas lub koom haum luam tawm. Tom qab ntawd lawv thov kom Yehauvas pab lawv to taub tus neeg ntawd. Lawv kuj ua zoo xav txog  tus tib neeg ntawd seb nws loj hlob li cas nws thiaj li xav li nws xav thiab coj li nws coj.​—Pajlug 20:5.

7-8. Thaum cov txwj laus mus ntsib nrog tus ua txhaum loj, lawv xyaum ua siab ntev ib yam li Yehauvas li cas?

⁷ Cov txwj laus xyaum ua siab ntev ib yam li Yehauvas. Lawv yeej nco ntsoov tej uas Yehauvas tau ua los mus pab cov ua txhaum loj yav tas los lawm. Xws li thaum Yehauvas ua siab ntev rau Ka-ees es ceeb toom tias yog nws tsis hloov ces nws yuav raug li cas rau li cas tiam sis yog nws mloog lus ces nws yuav tau txais koob hmoov. (Chivkeeb 4:6, 7) Yehauvas xa Nathas tus uas cev nws lus mus cuag Daviv. Nathas siv ib zaj lus piv txwv los pab kom Daviv hloov dua siab tshiab. (2 Xamuyees 12:1-7) Tsis tas li ntawd, Yehauvas “txib” cov uas cev nws lus mus cuag cov Ixayees “tsis tu ncua” thaum lawv tsis mloog lus. (Yelemis 7:24, 25) Yehauvas tsis tos kom nws cov tib neeg hloov dua siab tshiab es nws mam li pab lawv tiam sis thaum lawv tseem tab tom ua txhaum, nws ua tus ntaus thawj hlo txhob kom lawv hloov dua siab tshiab.

⁸ Cov txwj laus coj raws li Yehauvas tus yam ntxwv thaum lawv mus pab cov uas tau ua txhaum loj lawm. Cov txwj laus “ua siab ntev” pab lawv li tau hais hauv 2 Timautes 4:2. Cov txwj laus yuav tau ua siab txias txias thiab rub lub siab kom ntev xwv tus uas ua txhaum loj thiaj li xav ua zoo. Yog tias cov txwj laus npau taws vog los sis meem txom ces tej zaud yuav ua rau tus ua txhaum loj ntawd tsis kam mloog tej lus ntuas los sis tsis kam hloov dua siab tshiab.

9-10. Yuav ua li cas cov txwj laus thiaj pab tau tus ua txhaum loj pom nws qhov txhaum?

⁹ Cov txwj laus ua zoo tshuaj ntsuas seb yog tim li cas tus ntawd thiaj li mus ua tau txhaum loj. Xws li dab tsi ua rau nws txoj kev sib raug zoo nrog Yehauvas tsuag zuj zus? Puas yog nws tseg tsis kawm Vajlugkub lawm los sis tsis mus qhia txoj xov zoo? Puas yog nws tseg tsis thov Yehauvas lawm? Puas yog nws tsis tswj nws lub siab uas ntshaw plias mus ua txhaum? Nws mus poo leej twg? Nws nyiam mloog los sis saib tej yam zoo li cas? Tej nws txiav txim siab ua no rub tau nws lub siab li cas? Nws puas ras hais tias tej nws txiav txim siab ua tau rau nws Leej Txiv Yehauvas tu siab?

¹⁰ Cov txwj laus ua tib zoo nug kom tus ntawd xav seb yog ua li cas nws txoj kev sib raug zoo nrog Yehauvas thiaj tsuag zuj zus thiab nws thiaj mus ua txhaum. Lawv yuav tsum ua tib zoo nug, tsis txhob nug txog tej uas tsis tsim nyog nug. (Pajlug 20:5) Zoo ib yam li Nathas siv lus piv txwv los mus pab Daviv, cov txwj laus kuj siv tau lus piv txwv los mus pab kom tus ua txhaum ntawd xam pom vim li cas nws ua tsis yog. Tej zaud thawj zaug uas cov txwj laus ntsib nrog tus ua txhaum kuj pab tau nws pom nws qhov txhaum thiab hloov dua siab tshiab.

11. Yexus pab cov ua txhaum loj li cas?

¹¹ Cov txwj laus yeej sib zog ntsos xyaum Yexus tus yam ntxwv. Yexus pab tau Povlauj heev thaum nws nug li no tias: “Xolaus’os, Xolaus’e, koj tsim txom kuv ua dab tsi?” Qhov uas Yexus hais li no pab tau kom Povlauj ras tias nws ua tsis yog lawm. (Tes Hauj Lwm 9:3-6) Thaum hais txog “tus pojniam uas hu ua Yexenpees,” Yexus hais tias: “Kuv cia sijhawm rau nws tso nws tej kev txhaum tseg.”​—Tshwmsim 2:20, 21.

12-13. Cov txwj laus yuav tau sej sij hawm li cas rau tus ua txhaum loj hloov dua siab tshiab? (Saib daim duab.)

¹² Cov txwj laus xyaum Yexus tus yam ntxwv uas tsis maj nrawm nroos phua cai tias tus ua txhaum loj yeej yuav tsis hloov. Muaj ib txhia kuj hloov dua siab tshiab thaum cov txwj laus mus ntsib lawv thawj zaug. Hos muaj dua ib txhia yuav tau sej sij hawm me ntsis lawv mam  li hloov dua siab tshiab. Yog tias muaj li ntawd ces cov txwj laus yuav tau mus ntsib tus ua txhaum loj ntawd kom ntau tshaj li ib zaug. Tej zaud qhov uas cov txwj laus ntsib nrog nws thawj zaug yuav ua rau nws ua tib zoo xav txog tej lawv hais. Tom qab ntawd tej zaum nws yuav txo hwj chim thov Yehauvas kom zam nws lub txim. (Phau Ntawv Nkauj 32:5; 38:18) Ces thaum cov txwj laus rov qab ntsib nws dua, tej zaud nws yuav hloov nws tus cwj pwm es tsis coj li thawj zaug lawv ntsib nws lawm.

¹³ Yuav kom cov txwj laus pab tau tus ua txhaum loj ntawd hloov dua siab tshiab, lawv yuav tau txawj xav txog nws thiab ua zoo rau nws. Tsis tas li ntawd, lawv thov Yehauvas foom koob hmoov kom txhua yam mus rau qhov zoo thiab kom tus ntawd thim xav thiab hloov dua siab tshiab.​—2 Timautes 2:25, 26.

14. Thaum ib tug ua txhaum hloov dua siab tshiab, leej twg yog tus pab tiag tiag thiab vim li cas ho hais li ntawd?

¹⁴ Yog hais tias tus ua txhaum loj hloov dua siab tshiab yuav ua rau sawv daws muaj kev zoo siab! (Lukas 15:7, 10) Txawm cov txwj laus mus pab tus ua txhaum loj ntawd hloov los leej twg yog tus uas pab tiag tiag? Povlauj tau sau li no txog cov ua txhaum loj tias: “Tej zaum Vajtswv yuav pub kom cov neeg ntawd muaj sijhawm tso lawv tej kev txhaum tseg.” (2 Timautes 2:25) Yehauvas tib leeg xwb thiaj yog tus pab tau tus Khixatias hloov nws tus cwj pwm thiab txoj kev xav. Povlauj kuj piav ntxiv tias thaum ib tug hloov dua siab tshiab nws yuav paub Vajtswv Txoj Lus zoo dua qhov qub, nws yuav thim xav, thiab dim Xatas lub voj hluas.​—2 Timautes 2:26.”

15. Cov txwj laus pab tau tus ua txhaum loj ntawd ntxiv zuj zus li cas?

¹⁵ Thaum ib tug ua txhaum loj hloov dua siab tshiab, cov txwj laus yuav teem sij hawm mus ntsib nws tsis so xwv thiaj txhawb tau nws txoj kev ntseeg, pab tau nws tawm tsam Xatas tej kev sim siab, thiab ua qhov zoo qhov yog. (Henplais 12:12, 13) Cov txwj laus tsis muab tej uas lawv mus nrog nws tham piav rau tus ub tus no. Tiam sis tej zaud kuj zoo rau cov nyob hauv lub koom txoos paub txog dab tsi?

 “NTUAS TUS NTAWD TABMEEG SAWVDAWS”

16. Raws li 1 Timautes 5:20, thaum Povlauj hais txog “sawvdaws” yog nws hais txog leej twg tiag?

¹⁶ Nyeem 1 Timautes 5:20. Povlauj hais rau Timautes uas yog ib tug txwj laus kom tab meeg ntuas tus ua txhaum loj rau “sawvdaws” pom. Povlauj tus nru lus yog li cas tiag? Thaum Povlauj hais txog “sawvdaws,” nws tsis yog hais txog txhua tus hauv lub koom txoos tiam sis yog hais txog cov uas paub tej uas tus ua txhaum loj ntawd tau ua. Tej zaud cov no kuj pom, los sis tus ua txhaum loj ntawd kuj qhia rau lawv paub txog tej yam nws ua. Cov txwj laus mam li ua tib zoo qhia rau cov ntawd tias lawv twb ntuas tus ua txhaum loj ntawd lawm.

17. Yog tias muaj coob tus hauv lub koom txoos twb paub txog tus ua txhaum loj ntawd lawm los sis tseem yuav paub, yuav tau tshaj tawm li cas thiab yog vim li cas?

¹⁷ Muaj qee zaug coob leej ntau tus hauv lub koom txoos twb paub tias tus ntawd ua tau kev txhaum loj lawm los sis ntev mus ntev tuaj lawv yeej yuav paub. Yog tias muaj li no ces thaum hais txog “sawvdaws,” yog hais txog txhua tus hauv lub koom txoos. Ib tug txwj laus yuav tau muab tshaj tawm kom txhua tus nyob hauv lub koom txoos paub tias tus kwv tij los sis tus nkauj muam ntawd twb raug ntuas lawm. Vim li cas ho yuav tau ua li no? Povlauj hais tias: “Kom lwm tus thiaj paub ntshai” es tsis txhob mus ua txhaum loj li ntawd.

18. Yog tias ib tug me nyuam hnub nyoog tsis tau muaj 18 xyoo ua txhaum loj, cov txwj laus yuav ua li cas? (Saib daim duab.)

¹⁸ Cov txwj laus yuav ua li cas xwb thaum muaj ib tug ua kev cai raus dej tiam sis tsis tau muaj 18 xyoo tau ua txhaum loj? Cov txwj laus mam li xaiv ob tug ntawm cov txwj laus mus ntsib nrog tus me nyuam thiab nws niam  nws txiv uas ntseeg Yehauvas. b Ob tug txwj laus ntawd yuav nug leej niam thiab leej txiv seb nkawd tau ua dab tsi los pab nkawd tus me nyuam kom hloov dua siab tshiab lawm. Yog tias tus me nyuam twb mloog nws niam nws txiv cov lus ntuas thiab twb hloov nws txoj kev xav thiab tus cwj pwm lawm ces tej zaud ob tug txwj laus kuj txiav txim siab cia leej niam leej txiv pab tus me nyuam ntawd xwb es tsis tas muaj ib rooj txwj laus ntsib nrog lawv. Cov txwj laus paub hais tias Yehauvas tau muab tes hauj lwm los mus qhuab ntuas me nyuam tso rau cov niam txiv. (2 Kevcai 6:6, 7; Pajlug 6:20; 22:6; Efexus 6:2-4) Tom qab ntawd cov txwj laus tsuas nug cov niam txiv qho me ntsis seb cov niam txiv puas xav tau kev pab dab tsi ntxiv rau tus me nyuam ntawd xwb. Tiam sis cov txwj laus yuav ua li cas yog tias tus me nyuam pheej tsis kam hloov? Yog tias muaj li no ces yuav tau tsa ib rooj txwj laus los mus ntsib nrog tus me nyuam thiab nws niam nws txiv uas ntseeg Yehauvas.

YEHAUVAS “MUAJ KEV TAB NCUAB THIAB KEV KHUVLEEJ”

19. Cov txwj laus yuav xyaum Yehauvas li cas thaum lawv ntsib nrog ib tug ua txhaum loj?

¹⁹ Yehauvas xav kom cov txwj laus tiv thaiv cov nyob hauv lub koom txoos ntawm cov uas tsis kam ua raws li nws tej kev cai. (1 Kauleethaus 5:7) Tiam sis cov txwj laus kuj xav pab kom cov ua txhaum loj hloov dua siab tshiab. Thaum cov txwj laus pab ib tug ua txhaum loj, lawv xav xyaum Yehauvas tus uas “muaj kev tab ncuab thiab kev khuvleej” es cia siab hais tias muaj ib hnub tus ntawd yuav hloov siab. (Yakaunpaus 5:11) Tus tub txib Yauhas tau ua li no thiab hais tias: “Cov menyuam, kuv sau tsab ntawv no tuaj qhia nej, nej thiaj li yuav tsis ua txhaum; tiamsis yog leejtwg ua txhaum, peb muaj ib tug thov Leej Txiv pab peb; tus ntawd yog Yexus Khetos tus uas ncaj ncees.”​—1 Yauhas 2:1.

20. Nyob rau zaj txuas ntxiv tom ntej peb yuav kawm txog dab tsi?

²⁰ Muaj tej thaud tej tug Khixatias yuav tsis kam hloov dua siab tshiab. Yog tias muaj li ntawd, yuav tau muab nws tshem tawm hauv lub koom txoos mus. Nyob rau zaj kawm txuas ntxiv tom ntej no peb yuav kawm seb cov txwj laus yuav ua li cas thaum muaj tej tug zoo li no.