1-2. (1) Yehauvas xav li cas rau cov ua txhaum loj uas tsis kam hloov dua siab tshiab? (2) Yehauvas cia siab tias cov ua txhaum loj yuav ua li cas?

 YEHAUVAS ntxub kev txhaum. Nws tsis xav kom nyias taus nyias ua ywj fab ywj fwj. (Phau Ntawv Nkauj 5:4-6) Yehauvas xav kom peb mloog nws tej kev cai hauv phau Vajlugkub. Yehauvas yeej paub tias peb yog noob txaug neeg txhaum ces peb yeej yuav ua tsis tau txhua yam zoo zoo. (Phau Ntawv Nkauj 130:3, 4) Txawm li ntawd los Vajtswv tsis xav kom muaj cov “tsis hwm Vajtswv thiab muab peb tus Vajtswv txojkev hlub ntxeev kom tau kev ua phem ua qias.” (Yudas 4) Nyob rau hauv phau Vajlugkub hais tias thaum txog Vajtswv ntsuj rog Amankedoos, ‘cov neeg ua phem yuav raug txiav txim thiab raug puastsuaj.’​—2 Petus 3:7; Tshwmsim 16:16.

² Yehauvas tsis xav kom ib tug twg raug puas tsuaj. Nyob hauv phau ntawv no peb kawm tau tias Yehauvas “xav kom txhua tus nyias muab nyias tej kev txhaum huv tibsi tso povtseg.” (2 Petus 3:9) Cov txwj laus xyaum Yehauvas es ua siab ntev pab tus ua txhaum loj hloov dua siab tshiab thiab pab nws rov qab kho nws txoj kev sib raug zoo nrog Yehauvas. Muaj qee zaug tej tug kuj xib tim tsis kam hloov dua siab tshiab. (Yaxayas 6:9) Txawm cov txwj laus kub siab lug pab lawv tas pab lawv dua los lawv tseem xav ua tej yam tsis zoo tas zaj tas zog. Ua li cov txwj laus yuav ua li cas thaum muaj li no?

 “MUAB TUS NEEG PHEM TSHEM NTAWM NEJ MUS”

3. (1) Nyob hauv phau Vajlugkub hais tias kom muab tus ua txhaum loj ua li cas? (2) Thaum ib tug tsis kam hloov dua siab tshiab, vim li cas ho hais tias nws yeem raug tshem tawm hauv lub koom txoos mus?

³ Thaum tus ua txhaum loj tsis kam hloov dua siab tshiab, cov txwj laus yuav tau coj raws li hais nyob rau hauv 1 Kauleethaus 5:13 tias: “Nej yuav tsum muab tus neeg phem tshem tawm ntawm nej mus.” Yog li ntawd, tus ua txhaum loj yeej paub hais tias yog nws tsis hloov dua siab tshiab ces nws yuav raug muab tshem tawm hauv lub koom txoos mus. Nws tsuas sau tej uas nws tseb xwb. (Kalatias 6:7) Tos hais li no los vim cov txwj laus twb nrog nws tham ntau zaus tiam sis nws xib tim tsis kam hloov. (2 Vajntxwv 17:12-15) Nws yeej ua qhia kiag hais tias nws tsis xav mloog Yehauvas tej kev cai ntxiv lawm.​—2 Kevcai 30:19, 20.

4. Thaum ib tug raug tshem tawm hauv lub koom txoos, vim li cas yuav tau muab tshaj tawm rau sawv daws paub?

⁴ Thaum ib tug tsis kam hloov dua siab tshiab thiab raug tshem tawm hauv lub koom txoos mus ces yuav tau muab tshaj tawm rau cov nyob hauv lub koom txoos paub tias nws tsis yog Yehauvas ib tug Tim Khawv lawm. a Cov lus tshaj tawm no tsis yog los rhuav nws lub koob lub npe tiam sis yog qhia rau cov nyob hauv lub koom txoos xwv lawv thiaj li coj tau raws li cov lus hauv phau Vajlukub kom “tsis txhob mus koom nrog” thiab “tsis txhob nrog tus neeg uas zoo li ntawd koom tsum.” (1 Kauleethaus 5:9-11) Yeej yog ib qho zoo uas Yehauvas sam hwm li no vim tus tub txib Povlauj sau tias: ‘Ib qho keeb me me xwb ua rau lub ncuav su tuaj.’ (1 Kauleethaus 5:6) Yog tsis muab tus tsis kam hloov dua siab tshiab tshem tawm ces tej zaud lwm tus yuav xav tias lawv tsis tas coj raws li Yehauvas tej kev cai los tau.​—Pajlug 13:20; 1 Kauleethaus 15:33.

5. Thaum ib tug raug tshem tawm peb yuav coj li cas, thiab yog vim li cas?

⁵ Thaum ib tug kwv tij los sis nkauj muam raug tshem tawm hauv lub koom txoos mus, peb yuav coj li cas? Txawm peb tsis koom nrog tus ntawd lawm los peb yuav tau nco ntsoov tias nws tsis yog tag li ntawd lawm xwb tiam sis nws zoo yam li tus yaj uas poob zoo lawm. Thaum ib tug yaj poob zoo lawm, nws yeej yuav txawj rov qab los poo npoj. Nco ntsoov tus uas raug tshem tawm twb muab nws tus kheej cob rau Yehauvas. Tsuas yog lub sij hawm ntawd nws ua tsis tau raws li nws cog tseg lawm xwb. (Exekees 18:31) Cheem tseem tshuav sij hawm thiab Yehauvas tseem khuv leej, peb yeej tos ntsoov kom tus ntawd hloov dua siab tshiab. Ua li cov txwj laus yuav pab tus uas raug tshem tawm li cas?

COV TXWJ LAUS PAB COV UAS RAUG TSHEM TAWM LI NO

6. Cov txwj laus ua tau dab tsi los mus pab tus uas raug tshem tawm?

⁶ Thaum ib tug raug tshem tawm, ua li cov txwj laus puas mus pab kom nws rov qab los nrog Yehauvas sib raug zoo? Lawv yeej pab! Thaum cov txwj laus qhia rau tus ntawd tias lawv yuav muab nws tshem tawm hauv lub koom txoos mus, lawv kuj qhia rau nws seb nws yuav ua li cas nws thiaj rov qab ua tau Yehauvas ib tug Tim Khawv. Tsis yog tas li ntawd xwb, feem ntau lawv kuj qhia rau tus raug tshem tawm tias lawv yuav rov ntsib nws ob peb lub hlis tom qab ntawd seb nws puas tau hloov siab. Thaum ob peb lub hlis dhau  lawm es tus raug tshem tawm kam ntsib nrog cov txwj laus ces cov txwj laus yuav txhawb kom nws hloov dua siab tshiab. Hos yog nws tsis tau kam hloov rau lub sij hawm ntawd los cov txwj laus mam li teem dua lwm lub sij hawm thiab txhawb kom nws hloov dua siab tshiab.

7. Thaum ib tug raug tshem tawm hauv lub koom txoos mus, cov txwj laus yuav xyaum Yehauvas txoj kev hmov tshua li cas? (Yelemis 3:12)

⁷ Cov txwj laus xyaum Yehauvas es hmov tshua cov uas raug tshem tawm hauv lub koom txoos mus. Xws li yav tas los Yehauvas tsis tos nws cov neeg Ixayees hloov dua siab tshiab es nws mam li pab lawv. Nws yeej xa cov uas cev nws lus mus cuag lawv tab txawm lawv tsis tau hloov dua siab tshiab. Nyob rau zaj kawm ob hauv phau ntawv no, Yehauvas hais kom Hauxeyas zam txim rau nws tus poj niam thiab coj nws tus poj niam rov los tab txawm nws tus poj niam haj tseem ua txhaum loj. Yehauvas ua li no los qhia Nws cov tib neeg tias Nws muaj kev hmov tshua heev. (Hauxeyas 3:1; Malakis 3:7) Cov txwj laus coj ib yam li Yehauvas uas xav kom tus ua txhaum loj hloov dua siab tshiab thiab rov qab los rau hauv lub koom txoos. Lawv tsis xav ua nyuaj nyuaj kom nws tsis xav rov qab los.​—Nyeem Yelemis 3:12.

8. Yexus zaj lus piv txwv txog tus tub loj leeb pab tau kom peb nkag siab Yehauvas txoj kev hmov tshua thiab kev khuv leej li cas? (Lukas 15:7)

⁸ Nco ntsoov Yexus zaj lus piv txwv txog tus tub loj leeb. Thaum leej txiv pom dheev nws tus tub rov qab los tsev, “leej txiv thiaj dhia loo mus puag nkaus nws hnia.” (Lukas 15:20) Leej txiv yeej tsis tos kom nws tus tub thov nws zam txim tso. Tiam sis leej txiv yog tus xub dhia mus tos nws tus tub vim nws hlub nws tus tub heev. Zaj no qhia tias Yehauvas hlub cov uas tso nws tseg npaum li cas. Cov txwj laus ua npaum li lawv ua tau los mus xyaum Yehauvas vim lawv xav pab cov uas tso Yehauvas tseg lawm kom lawv rov qab los cuag Nws. (Lukas 15:22-24, 32) Thaum ib tug ua txhaum loj rov qab los mas Yehauvas, Yexus, cov tub txib saum ntuj, thiab tag nrho cov nyob hauv lub koom txoos puav leej zoo siab!​—Nyeem Lukas 15:7.

9. Yehauvas xav kom cov ua txhaum loj ua dab tsi?

⁹ Raws li peb tau kawm, Yehauvas tsis xav kom cov uas tsis kam hloov dua siab tshiab nyob rau hauv lub koom txoos. Txawm li ntawd los nws haj tseem nrhiav txoj hau kev los pab kom lawv rov qab los. Thaum lawv hloov dua siab tshiab, Yehauvas xav li hais nyob hauv Hauxeyas 14:4 tias: “Kuv yuav coj kuv haivneeg rov qab los cuag kuv dua. Kuv yuav hlub lawv kom kawg kuv lub siab lub ntsws; kuv yuav tsis chim rau lawv ntxiv lawm.” Cov txwj laus paub hais tias Yehauvas xav li no, lawv thiaj li ua tib zoo saib seb tus raug tshem tawm puas pib hloov dua siab tshiab. Tsis tas li ntawd, Yehauvas cov lus no qhia rau tus uas raug tshem tawm tias nws tseem hlub tus ntawd thiab xav kom tus ntawd rov qab los.

10-11. Cov txwj laus yuav pab cov uas raug tshem tawm tau ntau lub xyoos lawm li cas?

¹⁰ Cov txwj laus yuav pab cov uas tau raug tshem tawm tau ntau xyoo lawd li cas? Ib txhia no kuj tsis ua tej kev txhaum uas lawv ua thaum lawv raug tshem tawm hauv lub koom txoos ntxiv lawm. Hos ib txhia tsis nco qab vim li cas lawv ho raug tshem tawm thiab. Txawm li cas los xij peem, cov txwj laus yuav tau nrhiav lawv thiab yuav mus xyuas cov no ib tug zuj zus. Thaum ob tug txwj laus mus xyuas ib tug twg, nkawd kuj thov Yehauvas pab tus ntawd thiab txhawb kom tus ntawd rov los rau hauv lub koom txoos. Yog  ib tug twg twb ncaim lub koom txoos tau ntau lub xyoos lawm ces tej zaud nws txoj kev ntseeg yuav tsuag heev. Yog nws hais tias nws xav rov los rau hauv lub koom txoos ces zoo rau cov txwj laus nrhiav ib tug mus qhia Vajlugkub rau nws tab txawm nws tseem tsis tau rov ua ib tug Tim Khawv. Tsuas yog cov txwj laus xwb thiaj yog cov uas xaiv seb tus twg yog tus uas zoo mus qhia Vajlugkub rau nws.

¹¹ Cov txwj laus yeej xav xyaum Yehauvas txoj kev hmov tshua rau sawv daws. Yog li ntawd, lawv yuav mus nrhiav txhua tus uas tau tso Yehauvas tseg thiab txhawb cov ntawd kom rov qab los cuag Yehauvas dua. Thaum tus ua txhaum loj ntawd ua qhia tias nws hloov nws txoj kev xav thiab nws tus cwj pwm lawm ces nws kuj rov qab los ua tau Yehauvas ib tug Tim Khawv.​—2 Kauleethaus 2:6-8.

12. (1) Cov txwj laus yuav tau ua tib zoo ceev faj txog dab tsi? (2) Vim li cas peb yuav tau tsis txhob xav hais tias Yehauvas yuav tsis khuv leej tej tug uas tau ua qho yam txhaum loj? (Saib cov taw ntawv.)

 ¹² Muaj tej thaud cov txwj laus yuav tau ceev faj thaum cia ib tug twg rov qab los ua Yehauvas ib tug Tim Khawv dua. Xws li yog tus tib neeg ntawd tsim txom me nyuam, yog ib tug neeg fav xeeb los sis tuav hauv los rhuav nws txoj kev txij nkawm ces cov txwj laus yuav tau ua tib zoo saib seb nws puas hloov dua siab tshiab tiag tiag. (Malakis 2:14; 2 Timautes 3:6) Tos cov txwj laus ua li no los lawv yuav tau tiv thaiv cov kwv tij nkauj muam hauv lub koom txoos kom zoo zoo. Tiam sis peb yuav tau nco ntsoov tias Yehauvas yeej txais tos txhua tus ua txhaum loj uas hloov dua siab tshiab lawm tiag tiag rov qab los. Txawm cov txwj laus yuav tau ua tib zoo soj ntsuas tus ua txhaum loj ntawd los lawv yuav tau tsis txhob xav hais tias Yehauvas tsis khuv leej tus ntawd ntxiv lawm. b​—1 Petus 2:10.

COV NYOB HAUV LUB KOOM TXOOS UA TAU LI NO

13. Qhov txawv txav ntawm tus raug ntuas thiab tus raug tshem tawm yog li cas?

¹³ Raws li zaj kawm tag los lawm, yog tshaj tawm tias ib tug twg raug ntuas ces peb haj tseem nrog tau nws ua ke vim nws hloov dua siab tshiab thiab tseg tsis ua txhaum ntxiv lawm. (1 Timautes 5:20) Tus raug ntuas ntawd tsis tau ncaim lub koom txoos thiab nws tseem xav kom sawv daws txhawb nws lub zog. (Henplais 10:24, 25) Tiam sis thaum ib tug raug tshem tawm hauv lub koom txoos ces peb yuav tau “tsis txhob mus koom nrog” tus ntawd thiab “tsis txhob nrog tus neeg uas zoo li ntawd koom tsum.”​—1 Kauleethaus 5:11.

14. Cov Khixatias yuav tau coj li cas rau ib tug uas raug tshem tawm? (Saib daim duab.)

¹⁴ Raws li hais nyob hauv 1 Kauleethaus 5:11, puas yog peb muab tus raug tshem tawm txiav tu nrho? Tsis yog. Yog tus raug tshem tawm yog ib tug nruab ze los sis ib tug phooj ywg kwv luag zoo ces koj kuj caw tau nws tuaj koom tej kev sib txoos. Tiam sis nyob ntawm nyias txiav txim siab raws li nyias tau kawm hauv phau Vajlugkub seb nyias xav caw los tsis  caw. Nco ntsoov tsis txhob mus nrog nws ua ub ua no ua ke. Yog tus raug tshem tawm ntawd tuaj kev sib txoos, koj yuav coj li cas rau nws? Yav tag los lawd, peb tsis hu nws. Tiam sis tam sim no peb tos txais tau nws thaum nws tuaj kev sib txoos. Tiam sis nyob ntawm nyias txiav txim siab raws li nyias tau kawm hauv phau Vajlugkub seb nyias xav hu los tsis hu. Nco ntsoov tsis txhob mus nrog nws tham ntev tham ntau thiab ua ub ua no ua ke.

15. 2 Yauhas 9-11 yog hais txog cov ua kev txhaum loj twg? (Saib lub ntsiab “ Puas Yog Yauhas Thiab Povlauj Nkawd Hais Txog Tib Qho Kev Txhaum?”)

¹⁵ Muaj ib txhia xav li no tias, ‘Nyob hauv phau Vajlugkub twb hais tias yog yus hu ib tug ua txhaum loj ces twb cuag li yus nrog nws ua txhaum lawm ntag.’ (Nyeem 2 Yauhas 9-11.) Raws li hais no, yog hais txog tus tib neeg uas fav xeeb los sis tseem niaj hnub haub ntxias lwm tus mus ua txhaum. (Tshwmsim 2:20) Yog tias ib tug ua txhaum loj haj tseem hais tej lus fav xeeb rau ub rau no los sis txhawb kom lwm tus ua txhaum ces cov txwj laus yuav tsis teem sij hawm mus ntsib nws. Txawm li no los muaj ib hnub twg tej zaum nws yuav hloov dua siab tshiab. Cheem nws tseem tsis tau hloov, peb yuav tau tsis txhob hu thaum pom nws thiab tsis txhob caw nws tuaj peb tej kev sib txoos.

XYAUM YEHAUVAS TXOJ KEV KHUV LEEJ THIAB HMOV TSHUA

16-17. (1) Yehauvas xav pom cov ua txhaum loj ua dab tsi? (Exekees 18:32) (2) Cov txwj laus yuav nrog Yehauvas sib koom tes pab cov ua txhaum loj li cas?

¹⁶ Peb kawm tau dab tsi nyob hauv phau no? Hauv phau no qhia tias Yehauvas tsis xav kom ib tug twg raug puas tsuaj! (Nyeem Exekees 18:32.) Nws xav kom cov ua txhaum loj rov qab los nrog nws sib raug zoo. (2 Kauleethaus 5:20) Twb yog vim li ntawd txij puag thaum ub los txog nim no, Yehauvas thiaj txhawb kom cov tib neeg uas tso nws tseg hloov dua siab tshiab thiab rov qab los cuag nws. Tsis tas li ntawd, cov txwj laus hauv lub koom txoos nrog Yehauvas sib koom tes mus pab cov tib neeg uas tau ua txhaum loj hloov dua siab tshiab.​—Loos 2:4; 1 Kauleethaus 3:9.

¹⁷ Thaum ib tug ua txhaum loj hloov dua siab tshiab mas txhua tus nyob saum ntuj puav leej zoo siab! Peb Leej Txiv Yehauvas txaus siab heev thaum nws pom ib tug ua txhaum loj rov qab los rau hauv lub koom txoos. Yog peb zaum tsaws xav txog Yehauvas txoj kev khuv leej, hmov tshua, thiab txoj kev hlub uas nplua mias ces yuav ua rau peb txoj kev hlub rau Yehauvas loj zuj zus ntxiv.​—Lukas 1:78.