1. Ib tug neeg uas hloov dua siab tshiab ua li cas xwb?

 THAUM peb ua tau ib yam yuam kev, peb yuav tau hloov dua siab tshiab. Nyob hauv phau Vajlugkub thaum ib tug tib neeg hloov dua siab, twb yog nws ntxub tej yam nws ua yuam kev, nws tseg tsis ua tej yam ntawd ntxiv, thiab tswj nws lub siab kom txhob rov ua dua.​—Mathais 3:8; Tes Haujlwm 3:19; 2 Petus 3:9.

2. Vim li cas peb yuav tau kawm kom paub hloov dua siab tshiab? (Nehemis 8:9-11)

² Txhua tus tib neeg uas muaj sia nyob yuav tau kawm kom thiaj paub hloov dua siab tshiab rau qhov peb ua txhaum txhua txhua hnub. Peb uas yog Adas thiab Evas cov xeeb leej xeeb ntxwv saws tau txoj kev txhaum thiab kev tuag ntawm nkawd los. (Loos 3:23; 5:12) Txawm cov muaj kev ntseeg ib yam li tus tub txib Povlauj los yuav tau tswj lub siab uas xav ua qhov phem. (Loos 7:21-24) Ua li puas yog peb yuav tau ua lub ntsej muag ntshaus ntsho nyob mluas mob nkaus nkaus xwb vim muaj kev txhaum? Yehauvas muaj kev khuv leej heev thiab nws xav kom peb nyob luag ntxhwb ntxhi. Cia peb mus tham txog cov Yudais uas nyob rau Nehemis tiam. (Nyeem Nehemis 8:9-11.) Yehauvas tsis xav kom lawv nyob mluas mlob vim lawv tau ua kev txhaum yav tag los lawm tiam sis nws xav kom lawv teev tiam nws kaj siab lug. Yehauvas paub tias hloov dua siab tshiab yuav ua rau kom muaj kev kaj siab. Yog li ntawd, nws thiaj cob qhia peb txog tej no. Yog peb hloov dua siab tshiab ces peb yeej tso siab tau tias peb Leej Txiv Yehauvas yeej yuav zam peb lub txim.

3. Nyob rau hauv zaj kawm no peb yuav tham txog dab tsi?

³ Nyob rau hauv zaj kawm no peb yuav tham txog hloov dua siab tshiab. Thaum thawj, peb yuav kawm seb Yehauvas qhia  kom cov Ixayees hloov dua siab tshiab li cas. Ces tom qab ntawd peb yuav tham txog seb Yehauvas pab tib neeg hloov dua siab tshiab li cas. Txuas ntxiv ntawd, peb yuav kawm seb Yexus ho cob qhia li cas txog hloov dua siab tshiab rau nws cov thwj tim.

YEHAUVAS QHIA COV IXAYEES TXOG KEV HLOOV DUA SIAB TSHIAB

4. Yehauvas qhia cov Ixayees txog kev hloov dua siab tshiab li cas?

⁴ Thaum Yehauvas qhia nws tej kev cai rau cov Ixayees, lawv cog lus tias lawv yuav ua li nws hais. Yog lawv mloog nws tej kev cai ces nws yuav tiv thaiv thiab foom koob hmoov rau lawv. Yehauvas qhia li no txog nws tej kev cai tias: “Tej kevcai uas hnub no kuv qhia rau nej, nej tsis txhob xav hais tias nyuaj thiab coj tsis tau.” (2 Kevcai 30:11, 16) Yog lawv tsis mloog nws lus, xws li mus pe hawm tej vajtswv cuav ces nws yuav tsis tiv thaiv lawv ntxiv lawm. Tab txawm li ntawd los nws haj tseem tsis tau tso lawv tseg. Lawv yeej tseem muaj cuab kav “rov los cuag [Yehauvas] thiab ua raws li nws tej kevcai.” (2 Kevcai 30:1-3, 17-20) Qhov no txhais tau tias lawv yeej hloov tau siab tshiab. Yog lawv ua li ntawd ces Yehauvas yuav nrog lawv sib raug zoo thiab nws yuav tiv thaiv lawv li qub.

5. Yehauvas tau ua li cas los qhia tias nws tseem tsis tau tso nws cov tib neeg tseg? (2 Vajntxwv 17:13, 14)

⁵ Yehauvas cov tib neeg txhob txwm ntxeev siab rau nws tas zaj tas zog. Lawv pe tej dab mlom thiab ua tej yam qias vuab tsuab tsis huv. Thaum kawg lawv thiaj raug kev txom nyem ntsuav. Txawm li ntawd los Yehauvas tsis tso lawv tseg thiab pab lawv tsis so. Nws xa cov uas cev nws lus mus cuag lawv thiab txhawb kom lawv hloov dua siab tshiab thiab rov qab los cuag nws.​—Nyeem 2 Vajntxwv 17:13, 14.

6. Yehauvas siv cov cev nws lus kom qhia txog kev hloov dua siab tshiab rau nws cov tib neeg li cas? (Saib daim duab.)

⁶ Thaum Yehauvas cov tib neeg tsis mloog nws lus, nws xa cov uas cev nws lus mus ntuas thiab ceeb toom tias yog lawv tsis hloov yuav muaj li cas rau li cas los raug lawv. Xws li Vajtswv  txib Yelemis mus qhia tias: “[Ixayees] uas siab tsis ncaj . . . Kuv yog tus uas muaj kev hlub thiab yuav tsis chim; kuv yuav tsis chim rau koj mus ibtxhis. Koj cia li lees hais tias koj tau ua txhaum thiab ntxeev siab rau [Yehauvas].” (Yelemis 3:12, 13) Yehauvas txib kom Yau-ees hais tias: “Tig rov los cuag kuv ntawm nej lub siab dawb paug.” (Yau-ees 2:12, 13) Nws kuj hais kom Yaxayas hais tias: “Tso plhuav tej kev phem kev qias uas kuv pom nej ua no tseg. Tso plhuav kev phem kev qias tseg.” (Yaxayas 1:16-19) Yehauvas kuj txib Exekees kom hais li no ntxiv: “Nej xav hais tias kuv xav pom tus neeg ua txhaum tuag no los? . . . Kuv tsuas xav pom tus neeg txhaum tso nws tej kev txhaum tseg thiab muaj sia nyob xwb. . . . Kuv tsis xav kom ib tug twg tuag li. Cia li tso nej tej kev txhaum tseg, nej thiaj muaj sia nyob.” (Exekees 18:23, 32) Yehauvas zoo siab heev thaum nws pom tib neeg hloov dua siab tshiab vim nws xav kom lawv nyob mus ib txhis! Tiam sis puas yog Yehauvas tsuas pab tib neeg tom qab lawv hloov dua siab tshiab xwb?

7. Yehauvas siv Hauxeyas thiab nws tus poj niam zaj los mus cob qhia Nws cov tib neeg li cas?

⁷ Yehauvas siv Hauxeyas tus uas cev Nws lus thiab Hauxeyas tus poj niam Nkaumes los ua piv txwv qhia Nws cov tib neeg. Tom qab Nkaumes mus deev hluas nraug, nws tso Hauxeyas tseg mus caum lwm tus txiv neej lawm. Ua li Nkaumes puas hloov tau? Yehauvas tus uas paub neeg lub siab hais rau Hauxeyas tias: “Koj cia li rov qab mus hlub tus pojniam uas mus deev hluas nraug lawm. Koj yuav tsum hlub nws ib yam li kuv tseem hlub cov [Ixayees], txawm yog lawv tso kuv tseg thiab mus pe lwm tus vajtswv thiab muab tej txiv hmab qhuav coj mus fij rau tej mlom, los kuv tseem hlub lawv.” (Hauxeyas 3:1; Pajlug 16:2) Txawm Hauxeyas tus poj niam tseem tab tom ua txhaum loj heev los Yehauvas hais kom Hauxeyas mus cuag nws tus poj niam thiab qhia hais tias Hauxeyas zam nws lub txim thiab xav kom nkawd ua txij ua nkawm dua. a Zoo ib yam li ntawd, Yehauvas siv zaj no los qhia nws cov tib neeg tias tab txawm lawv ua tau txhaum lawm los nws tseem hlub lawv, xav ua tus cev tes pab lawv, thiab tseem yuav pab kom lawv hloov dua siab tshiab. Zaj no qhia tau tias Yehauvas paub txhua tsav txhua yam txog ib tug twg, thiab nws yuav pab tus uas tab tom ua txhaum loj kom hloov dua siab tshiab.​—Pajlug 17:3.

YEHAUVAS PAB TIB NEEG HLOOV DUA SIAB TSHIAB LI CAS?

8. Yehauvas tau ua dab tsi los pab kom Ka-ees hloov dua siab tshiab? (Chivkeeb 4:3-7) (Saib daim duab.)

⁸ Ka-ees yog Adas thiab Evas nkawd tus tub hlob. Ka-ees saws tau nws niam thiab nws txiv lub siab ntshaw ua phem. Nyob hauv phau Vajlugkub hais txog nws tias: “Nws tes haujlwm phem.” (1 Yauhas 3:12) Vim li no Ka-ees tej khoom fij thiaj tsis haum Yehauvas siab. Ka-ees tsis kam hloov nws tus cwj pwm, nws “thiaj chim thiab ua ntsejmuag npautaws vog.” Yehauvas thiaj li mus nrog Ka-ees sib tham lus. (Nyeem Chivkeeb 4:3-7.) Yehauvas ua tib zoo hais Ka-ees, thiab hais tias nws yuav foom koob hmoov rau Ka-ees yog tias Ka-ees ua zoo. Tsis tas li ntawd, Yehauvas kuj ceeb toom Ka-ees tias yog nws tsis hloov ces nws yuav ua phem heev. Cuaj kaum los Ka-ees tsis mloog Yehauvas lus thiab tsis cia Yehauvas pab nws hloov dua siab tshiab. Txawm Ka-ees tsis mloog Yehauvas lus los qhov no  tsis txwv Yehauvas pab lwm tus kom hloov dua siab tshiab.

9. Yehauvas pab Daviv hloov dua siab tshiab li cas?

⁹ Yehauvas hlub Vaj Ntxwv Daviv heev. Nws hu Daviv tias tus uas “ua haum kuv siab.” (Tes Hauj Lwm 13:22) Tiam sis Daviv ua txhaum loj heev xws li deev luag poj luag sev thiab tua neeg. Raws li Mauxes Txoj Kev Cai ces tsim nyog Daviv tuag. (Levis Kevcai 20:10; Teev Npe 35:31) Tiam sis Yehauvas xav pab kom Daviv hloov dua siab tshiab. b Nws thiaj li xa Nathas tus uas cev nws lus mus cuag Daviv tab txawm Daviv twb tsis muaj lub siab yuav hloov qhov twg li. Nathas siv ib zaj lus piv txwv uas raug Daviv siab. Daviv mam li ras dheev tias nws ua rau Yehauvas tu siab heev. Yog li ntawd, Daviv thiaj hloov dua siab tshiab. (2 Xamuyees 12:1-14) Nws sau tau ib zaj nkauj uas qhia tias nws tu siab rau tej nws tau ua. (Phau Ntawv Nkauj 51) Muaj coob leej ntau tus uas tau ua txhaum nyeem txog zaj no mas ua rau lawv hloov dua siab tshiab. Peb ris txiaj ntsig kawg li uas Yehauvas ua siab ntev pab kom Daviv hloov dua siab tshiab.

10. Koj xav li cas xwb txog qhov uas Yehauvas ua siab ntev thiab zam neeg lub txim?

¹⁰ Yehauvas ntxub txhua yam kev txhaum. (Phau Ntawv Nkauj 5:4, 5) Tiam sis Yehauvas hlub peb kawg nkaus li. Txawm peb ua txhaum loj los sis txhaum me los nws haj tseem cev tes los pab peb hloov dua siab tshiab thiab coj peb rov qab los nrog nws sib raug zoo. Peb zoo siab kawg li uas Yehauvas tseem xav zam peb lub txim! Thaum peb xav txog Yehauvas lub siab ntev thiab nws txoj kev zam txim mas peb yuav rau siab ntso teev tiam nws thiab tig ntiag hlo hloov dua siab tshiab thaum peb ua tau txhaum. Cia peb mus ua tib zoo kawm seb Yexus qhia nws cov thwj tim li cas txog kev hloov dua siab tshiab.

YEXUS COV THWJ TIM KAWM KEV HLOOV DUA SIAB TSHIAB

11-12. Yexus siv zaj lus piv txwv twg los qhia tias Yehauvas tos tsis hnyu zam neeg lub txim? (Saib daim duab ntawm lub khaum.)

¹¹ Nyob rau thawj 100 xyoo, yog lub sij hawm rau tus Mexiyas tshwm los. Raws li peb  twb kawm nyob rau zaj tag los lawm, Yehauvas siv Yauhas tus uas muab neeg ua kev cai raus dej thiab Yexus Khetos nkawd qhia tib neeg kom hloov dua siab tshiab.​—Mathais 3:1, 2; 4:17.

¹² Thaum Yexus tseem nyob hauv ntiaj teb no, nws qhia rau tib neeg tias nws Txiv tos tsis hnyu zam peb lub txim. Yexus tau muab zaj lus piv txwv txog tus tub loj leeb coj los qhia. Tus hluas ntawd txiav txim siab khiav ntawm nws lub vaj lub tsev mus ua kev phem kev qias. Tom qab tau ib nyuag ntu, nws mam li “ras dheev tias nws ua yuam kev lawm” thiab rov qab los tsev. Ua li leej txiv ua li cas xwb? Yexus hais tias thaum leej tub “tseem los txog deb tsawv, leej txiv pom nws thiab hlub nws heev. Leej txiv thiaj dhia loo mus puag nkaus nws hnia.” Leej tub tsis xav tias leej txiv yuav zam nws lub txim, nws thiaj li thov kom nws txiv cia nws ua ib tug tub zog. Tiam sis nws txiv twb zam nws lub txim lawm thiab hu nws ua “kuv tus tub.” Leej txiv kuj hais tias: “Nws twb ploj lawm tiam sis nim no nws rov los txog tsev.” (Lukas 15:11-32) Thaum Yexus tseem nyob saum ntuj, nws yeej pom tias nws Txiv yeej hmov tshua thiab zam coob leej ntau tus uas hloov dua siab tshiab. Zaj lus piv txwv no qhia tau tias Yehauvas yog ib Leej Txiv uas muaj lub siab khuv leej heev!

13-14. Tus tub txib Petus khaws tau dab tsi txog kev hloov dua siab tshiab, thiab nws ho muab qhia li cas rau lwm tus? (Saib daim duab.)

¹³ Tus tub txib Petus kawm tau ntau yam los ntawm Yexus txog Yehauvas txoj kev zam txim rau cov uas hloov dua siab tshiab. Petus tau ua ntau yam yuam kev tiam sis Yexus tos tsis hnyu yuav zam nws lub txim. Xws li tom qab Petus tsis lees paub tus Tswv peb zaug mas ua rau Petus puas siab puas ntsws tas. (Mathais 26:34, 35, 69-75) Tiam sis tom qab Yexus sawv rov qab los, nws mus nrog Petus ib leeg tham ntsiag to. (Lukas 24:33, 34; 1 Kauleethaus 15:3-5) Yexus paub hais tias Petus twb hloov dua siab tshiab lawm thiab nws xav qhia rau Petus  tias nws twb zam Petus lub txim lawm.​—Malakaus 16:7.

¹⁴ Petus paub tias hloov dua siab tshiab yog li cas rau li cas thiab qhov uas luag zam nws lub txim pab nws npaum li cas. Yog li ntawd, nws thiaj li muab tej no qhia rau lwm tus paub. Tsis ntev tom qab ua lub koob tsheej Pheetekos, Petus qhia rau ib co Yudais tias lawv yog cov muab tus Mexiyas tua. Nws txhawb lawv tias: “Cia li hloov dua siab tshiab, Vajtswv thiaj zam tau nej lub txim. Vajtswv Yehauvas yuav pub nej nyob kaj siab lug.” (Tes Hauj Lwm 3:14, 15, 17, 19) Petus qhia tias thaum ib tug twg hloov dua siab tshiab, nws hloov nws txoj kev xav, tseg tsis ua tej yam tsis zoo, thiab xyaum ua raws li Vajtswv lub siab nyiam. Tsis tas li ntawd, Petus kuj qhia tias Yehauvas zam lawv lub txim txhaum txhua nrho ib yam li ib txwm tsis muaj nyob rau ntawd. Thiab tau ntau ntau xyoo tom qab no Petus kuj txhawb cov Khixatias tias: “Vajtswv ua siab ntev rau nej, rau qhov nws tsis xav cia ib tug twg puastsuaj mus, tiamsis nws xav kom txhua tus nyias muab nyias tej kev txhaum huv tibsi tso povtseg.” (2 Petus 3:9) Peb zoo siab kawg li tias yog peb ua txhaum lawm los Yehauvas yeej zam peb lub txim tag nrho!

15-16. (1) Ua li cas Povlauj thiaj paub txog kev zam txim? (1 Timautes 1:12-15) (2) Nyob rau zaj txuas ntxiv tom ntej no yuav tham txog dab tsi?

¹⁵ Povlauj tau ua ntau yam tsis zoo. Nws tsim txom cov Khixatias heev ua rau cov Khixatias xam pom tias nws yeej yuav tsis hloov ib zaug li. Tiam sis Yexus paub hais tias Povlauj yeej hloov tau dua siab tshiab. Nws thiab nws Txiv nkawd yeej pom Povlauj lub siab zoo. Yexus thiaj hais tias: “Kuv twb xaiv nws los ua tus sawv cev rau kuv lawm.” (Tes Hauj Lwm 9:15) Thaum Yexus ua txuj ci rau Povlauj, nws txawm hloov dua siab tshiab. (Tes Hauj Lwm 7:58–8:3; 9:1-9, 17-20) Tom qab Povlauj los ua ib tug Khixatias, nws niaj zaug hais txog tias nws ris txiaj ntsig kawg li rau Yehauvas thiab Yexus nkawd uas nkawd tau khuv leej thiab ua zoo rau nws. (Nyeem 1 Timautes 1:12-15.) Povlauj qhia rau cov Khixatias tias: “Vajtswv ua siab ntev qhia mus txog thaum koj hloov dua siab tshiab.”​—Loos 2:4.

¹⁶ Muaj ib zaug Povlauj hnov hais tias lub koom txoos hauv Kauleethaus cia ib tug txiv neej ua plees ua yi nyob rau hauv. Ua li Povlauj ua li cas xwb? Nyob rau zaj txuas ntxiv tom ntej no yuav qhia seb Povlauj tau ua li cas rau li cas thiab tej uas Povlauj ua ntawd qhia li cas txog Yehauvas txoj kev hlub thiab kev khuv leej.