1. Koj tau hnov li cas txog tus tsim ntuj tsim teb?

 MUAJ ib txhia twb paub Yehauvas txij ntua puag thaum lawv tseem yau los lawm. Lawv yeej hnov lawv niam lawv txiv los yog ib tug twg piav txog Yehauvas rau lawv dua los lawm tias Yehauvas yog tus tsim ntuj tsim teb, nws tus xeeb ceem los zoo, thiab nws yuav los muab lub ntiajteb kho dua tshiab.​—Chivkeeb 1:1; Tes Haujlwm 17:24-27.

2. Ib txhia tau hais li cas rau cov ntseeg tias muaj tus Tswv tsim ntuj tsim teb?

² Muaj coob leej ntau tus thiab cov neeg txawj ntse hais tias tsis muaj Vajtswv thiab Vajtswv tsis yog tus Tswv tsim ntuj tsim teb. Lawv hais tias yav ntuj qub qab, muaj tej nyuag txhiam laj txhiam xws tawg plho ciaj sia los ces ib yam txawm txia mus ua lwm yam. Lawv ntseeg hais tias yog tibneeg mus kawm txuj kawm ci ces tibneeg yeej yuav tsis lam tau lam ntseeg tej lus hauv phau Vajlugkub. Tsis tas li ntawd, lawv hais tias cov neeg mus mloog phau Vajlugkub mas yog neeg tsis txawj tsis ntse, tsis paub ntaub paub ntawv.

3. Vim li cas peb yuav tau tsav peb txojkev ntseeg?

³ Thaum cov neeg txawj ntse hais li no, puas ua rau nej ua xyem xyav? Yog nej ua xyem xyav, nej yuav tau ua tib zoo soj ntsuam seb vim li cas nej thiaj ntseeg tias Yehauvas yog tus Tswv Tsim tiag. Nej yuav tau soj qab taug lw saib seb puas yog nej hnov luag lub ncauj hais tias Yehauvas tsim txhua tsav txhua yam, los yog nej tshawb nrhiav tau. (1 Kauleethaus 3:12-15) Txawm tias peb ib tug twg twb ntseeg Yehauvas tau ntev loo lawm lossis nyuam qhuav los ntseeg, peb yuav tau tsav peb txojkev ntseeg kam tiag luag thiaj ntxias tsis tau peb ntseeg “tej zaj uas tsis muaj hauvpaus hauvntsis uas sawvdaws qhuas hais tias, yog kev txawj kev ntse.” (Kaulauxais 2:8; Henplais 11:6) Zaj kawm ntawm no yuav tham me ntswb mentsis seb (1) vim li cas  coob leej ntau tus tsis ntseeg tias muaj tus Tswv tsim ntuj tsim teb, (2) koj yuav tsav koj txojkev ntseeg li cas rau Yehauvas, thiab (3) koj yuav ua li cas koj txojkev ntseeg thiaj nyob ruaj khov ruaj nreeg.

4. Raws li Henplais 11:1, kev ntseeg yog li cas tiag?

⁴ Muaj ib txhia tibneeg lam tau lam ntseeg tej yam twb tsis muaj hauv paus hauv ntsis. Vajtswv Txojlus qhia tias kev ntseeg zoo tsis thooj li ntawd. (Nyeem Henplais 11:1) Peb yeej muaj puav pheej qhia meej tseeb tiag tiag thaum peb ntseeg tej yam peb pom tsis tau, xws li Yehauvas, nws txojkev kav, thiab Yexus. (Henplais 11:3) Muaj ib tug neeg tshawb fawb uas tom qab no los ntseeg Yehauvas tau hais tias: “Yehauvas Cov Timkhawv tsis lam tau lam ntseeg. Tej lawv ntseeg yeej muaj hauv paus hauv ntsis tiag tiag thiab raws li neeg tshawb nrhiav tau.”

5. Vim li cas ib txhia tsis ntseeg tias muaj ib tug Tswv tsim ntuj tsim teb?

⁵ Muaj ib txhia tsis tau soj ntsuam kom meej tseeb, lawv thiaj hais tias Vajtswv tsis yog tus Tswv tsim ntuj tsim teb. Ua ntej Lanpaw (Robert) los ntseeg Yehauvas, nws hais tias: “Kuv ib txwm xav tias tsis muaj tus Tswv Tsim vim kuv yeej tsis hnov luag piav hauv tsev kawm ntawv ib zaug li. Tiamsis thaum kuv tiav txiv lawd, kuv mam li kawm Vajlugkub nrog Yehauvas Cov Timkhawv. Lawv qhia meej meej hauv phau Vajlugkub tias Vajtswv yeej yog tus tsim ib puas tsav yam tiag.” b​—Saib lub ntsiab “ Peb Xav Tshaj Xo Rau Cov Niam Txiv Paub.”

6. Vim li cas ib txhia tsis ntseeg tias muaj tus Tswv tsim ntuj tsim teb?

⁶ Muaj ib txhia hais tias ntsej tsis hnov muag  tsis pom ces lawv yeej tsis kam ntseeg. Txawm lawv cov no twb tsis pom cua kiag li los lawv yeej ntseeg tias muaj cua nplawm ntws txias zias tuaj raug lawv plhu. Phau Vajlugkub thiaj hais tias kev ntseeg yog “tej uas peb qhovmuag tsis pom.” (Henplais 11:1) Yog li ntawd, yuav tau lauj sijhawm los kawm ib tug twg thiaj paub meej tseeb txog yam ntawd. Tiamsis muaj coob leej ntau tus tsis xav lauj sijhawm los kawm, lawv thiaj xaus lus tias tsis muaj Vajtswv.

7. Puas yog txhua tus neeg txawj ntse tsis ntseeg tias Vajtswv tsim ib puas tsav yam?

⁷ Muaj ib co neeg tshawb txujci soj ntsuam txhua txhia ceg kaum ntuj, lawv thiaj paub meej thiab ntseeg tias muaj Vajtswv ua tus tsim lub ntuj lub teb. c Muaj ib txhia tau hais tib yam li  Lanpaw tias vim tej tsev kawm ntawv qeb siab tsis qhia tias muaj ib tug Tswv Tsim ces lawv thiaj tsis paub tias muaj tiag. Thaum cov neeg tshawb txujci ib txhia kawm txog Yehauvas, lawv nyiam kawg nkaus li. Tib yam li cov neeg tshawb txujci no, peb yuav tau tsav peb txojkev ntseeg rau Vajtswv, txawm tias nyias yuav txawj yuav ntse li cas los xij. Peb tsis txhob tos lwm tus.

8-9. (1) Tom ntej no peb yuav tham txog lo lus nug twg? (2) Vim li cas ho zoo rau koj kawm txog tej yam nyob puag ncig koj?

⁸ Koj yuav tsav koj txojkev ntseeg rau tus tsim ntuj tsim teb li cas? Cia peb mus tham me ntswb mentsis txog 4 yam yuav pab tau koj.

⁹ Ua zoo saib ua zoo kawm txhua yam nyob puag ncig koj. Thaum koj ntsia tej tsiaj tej txhu, tej nplooj xyoob nplooj ntoos, tej hnub qub ntsais pes tsias dawb pes vog, koj yuav pom tias muaj ib tug Tswv tsim tej no. (Phau Ntawv Nkauj 19:1; Yaxayas 40:26) Yog tias koj pheej kawm tas zaj tas zog ces koj yeej yuav paub tseeb tseeb tias muaj Yehauvas ua tus tsim txhua yam tiag tiag. Yehauvas lub koom haum tau luam rau hauv lawv tej ntaub ntawv txog tej uas Yehauvas tsim. Thaum koj nyeem txog tej zaj zoo li ntawd, txhob cia li hla mus rau lwm zaj. Txawm tias koj tsis nkag siab pes tsawg los nyeem thiab khaws tej uas koj nkag siab tseg cia. Tsis tas li ntawd, nco ntsoov mus saib tej yeeb yaj kiab hauv lub vej xaij jw.org/hmn txog tej Yehauvas tau tsim. Cov yeeb yaj kiab no twb tau muab tso tawm rau sawvdaws saib hauv tej rooj sib txoos lawm.

10. Ua cas peb thiaj paub tias muaj ib tug Tswv Tsim? (Loos 1:20)

¹⁰ Thaum koj ua tib zoo kawm txog tej yam nyob hauv lub ntiajteb, tej ntawd yuav qhia koj ntau ntau yam txog tus Tswv Tsim. (Nyeem Loos 1:20.) Xws li lub hnub tsis yog lam ci kom sov xwb. Tej sab hnub kuj txawj ua rau peb muaj mob. Thaum peb ua zoo tsom lub ntiajteb ces peb yuav pom tias lub ntiajteb muaj ib daim pam thaiv nyob puag ncig saum nruab ntug los pab tiv thaiv tej sab hnub. Thaum tej sab hnub kub kub ces daim pam yim huab tuab. Thaum koj ua tib zoo xav txog tej no, puas ua rau koj nco txog tus Tswv Tsim tias nws txawj tsim kawg li thiab hmov tshua peb tibneeg kawg nkaus?

11. Koj yuav mus tshawb nrhiav li cas koj thiaj paub tias muaj tus Tswv Tsim? (Saib lub ntsiab “ Tej Yam Yuav Tsav Nej Txojkev Ntseeg.”)

¹¹ Yog tias koj ho xav paub ntxiv txog lub ntiajteb ces mus saib Yehauvas Cov Timkhawv Phau Ntawv Tshawb Nrhiav Vajlugkub lossis mus saib hauv lub vej xaij jw.org/hmn ntawm ntu hu ua “Puas Muaj Ib Tug Tsim?” Ntu no muaj tej ntaub ntawv lossis tej yeeb yaj kiab luv luv los piav txog tej tsiaj txhu thiab tej qoob loo. Thaum koj mus nyeem thiab saib, koj yuav pom tias tej neeg tshawb txujci siv tej uas Vajtswv tsim los pab lawv tsim tej ub tej no.

12. Peb yuav tau khaws tej yam twg thaum peb nyeem phau Vajlugkub?

¹² Kawm phau Vajlugkub. Nyob rau nqe 4, peb tau tham me ntswb mentsis txog tus neeg tshawb fawb. Thaum thawj nws tsis ntseeg tias muaj tus Tswv Tsim. Tiamsis ntev mus ntev tuaj, nws pom tias yeej muaj tus Tswv Tsim tiag. Nws thiaj hais li no: “Kuv muaj kev ntseeg tsis yog kuv kawm txuj kawm ci nkaus nkaus xwb. Kuv yeej muab phau Vajlugkub coj los soj ntsuam kom tshab tshab.” Tej zaum peb twb paub phau Vajlugkub txaus lawm. Txawm li ntawd los tsis txhob tso tseg, kav tsij tsav peb txojkev ntseeg kam tiag thiab ua hnub ua hmo kawm Vajtswv Txojlus. (Yausuas 1:8; Phau Ntawv Nkauj 119:97) Thaum peb nyeem, saib seb yav ntuj qub qab puag thaum ub muaj li cas rau li cas thiab tej lus fajlem ho sib dhos li  cas. Yog peb lauj sijhawm los ua li no, yuav tsav tau peb txojkev ntseeg txog tus Tswv Tsim tshaj dua qhov qub tias nws muaj laj lim tswvyim, hmov tshua tibneeg, thiab tshoov neeg los sau phau Vajlugkub.​—2 Timautes 3:14; 2 Petus 1:21.

13. Yam lus ntuas twg muaj nyob hauv Vajtswv Txojlus?

¹³ Thaum peb kawm Vajtswv Txojlus, peb yuav pom tias muaj tej lus qhuab ntuas zoo kawg nkaus li. Xws li, kev ntshaw nyiaj ntshaw txiaj ua tau rau tibneeg “raug ntau yam kev txomnyem.” (1 Timautes 6:9, 10; Pajlug 28:20; Mathais 6:24) Tej lus no yeej muaj tseeb tiag tiag. Nyob rau peb tiam no, tibneeg tau sau lawv tej cwj pwm nyob rau hauv ib phau ntawv hais tias: “Cov tibneeg muaj cuab txhiaj cuab tam ntau yeej nyuaj siab thiab ntxhov siab dua. Cov neeg uas ntshaw lub neej nplua nuj tsuas ntsib kev mob kev nkeeg kev iab kev daw.” Puas muaj dua lwm qhov peb nyeem hauv phau Vajlugkub uas pab tau peb? Yog peb saib cov lus hauv phau Vajlugkub muaj txiaj ntsig ces peb yuav tso siab plhuav rau tus Tswv Tsim. (Yakaunpaus 1:5) Thaum peb muab tej peb kawm coj rau hauv peb lub neej, peb yuav kaj siab lug.​—Yaxayas 48:17, 18.

14. Kawm Vajlugkub yuav qhia peb txog Yehauvas li cas?

¹⁴ Thaum peb kawm phau Vajlugkub, peb yuav tau kawm kom nrog Yehauvas sib raug zoo. (Yauhas 17:3) Thaum peb kawm txog Yehauvas, peb yuav pom tias tej nws tsim qhia txog nws tus xeeb ceem. Yog li ntawd, tej no qhia tseeb tseeb tias yeej muaj Yehauvas tiag tiag. (Khiav Dim 34:6, 7; Phau Ntawv Nkauj 145:8, 9) Thaum peb yim kawm txog Yehauvas, peb yuav yim huab paub nws zoo zuj zus, peb yuav yim nyiam thiab yim huab ntseeg nws.

15. Piav seb txojke mus qhia Vajlugkub yuav pab tau peb li cas.

¹⁵ Piav qhia tej peb tau kawm rau lwm tus. Thaum peb qhia lwm tus txog Vajtswv, yuav tsav tau peb txojkev ntseeg ntxiv zuj zus. Tiamsis peb yuav ua zaj twg tsav twg yog tias peb ho ntsib tej tug ua xyem xyav? Nyeem ib nqes Vajlugkub hauv peb tej ntaub ntawv los teb nws. (1 Petus 3:15) Lossis hais kom ib tug ntseeg Yehauvas tau ntev loo lawm pab peb. Txawm tias tus peb nrog tham ntawd ho tsis ntseeg tej peb tshawb nrhiav tau los twb tsav tau peb txojkev ntseeg lawm hov ntau vim peb mus tshawb mus nrhiav. Tsis tas li ntawd, yog tias ib hnub nram ntsis ho muaj tej tug neeg txawj ntse piav li ub li no txog tus Tswv Tsim los peb thiaj tsis mloog nws tej lus.

16. Piav seb yuav ua li cas yog tias peb pheej tsis tsav peb txojkev ntseeg.

¹⁶ Txawm tias peb nyuam qhuav los ntseeg Yehauvas lossis twb ntseeg nws tau ntev loo lawm, cia li kav tsij tsav peb txojkev ntseeg kam tiag. Tsis txhob tso tso siab, tib ntsais muag xwb peb txojkev ntseeg qaug lias lawm los kuj muaj. Nco ntsoov tias txawm ntsej tsis hnov qhov muag tsis pom, kev ntseeg kuj ua tau puav pheej tias muaj tseeb tiag tiag. Rau qhov thaum ib yam twg uas dhau ntawm peb ob lub qhov muag mus lawm, peb yuav tsis nco tias zoo li cas. Yog li ntawd, Paulus thiaj li muab txojkev ntseeg uas qaug lawm piv txog “tej kev txhaum uas khi peb.” (Henplais 12:1) Peb yuav ua li cas peb txojkev ntseeg thiaj li ruaj khov?​—2 Thexalaunikes 1:3.

17. Peb yuav ua li cas peb txojkev ntseeg thiaj li ruaj khov?

¹⁷ Peb yuav tau xub xub thov Yehauvas kom pub nws lub hwj huam dawb huv rau peb. Txawm peb thov tag lawm los kav tsij rov thov dua. Yog peb ua li no ces peb yuav muaj Vajtswv lub hwj huam pab peb tuav rawv peb txojkev ntseeg. (Kalatias 5:22, 23) Yog tsis muaj Vajtswv lub hwj huam dawb huv pab tas zaj tas zog ces ntev mus ntev tuaj peb yuav tsis ntseeg tias muaj ib  tug Tswv Tsim. Yog peb thov lawm, Vajtswv yeej yuav pub nws lub hwj huam dawb huv rau peb xwb xwb li. (Lukas 11:13) Peb kuj thov tau yam li no: “Thov koj pab kom peb muab siab rau ntseeg ntxiv.”​—Lukas 17:5.

18. Raws li Phau Ntawv Nkauj 1:2, 3, peb muaj txoj koob hmoov twg?

¹⁸ Tsis tas li ntawd, rau siab ntso kawm Vajtswv Txojlus tsis tseg tsis tu. (Nyeem Phau Ntawv Nkauj 1:2, 3.) Thaum pib sau phau ntawv nkauj, cov Yixalayees qho leej yeej muaj Vajtswv tej kevcai los saib. Tiamsis tsuas yog tus vajntxwv thiab cov pov thawj thiaj li muab tau los nyeem xwb. Thaum txwm ib lub xya xyoo twg, lawv yeej hu sawvdaws tuaj txoos ua ke “tsis hais pojniam txivneej, tus hlob tus yau thiab lwm haivneeg” uas nrog lawv nyob tuaj mloog Vajtswv tej kevcai. (2 Kevcai 31:10-12) Tom qab no los mus rau Yexus tiam, tsuas yog qho leej thiaj muaj tej thooj ntawv no los nyeem xwb. Feem ntau, lawv muab tej thooj ntawv no khaws cia rau hauv tej tsev sablaj. Yog ib qho koob hmoov zoo kawg nkaus li uas niaj hnub niam no ib txhia tibneeg muaj Vajtswv Txojlus los nyeem. Ua li, peb puas txaus siab tias peb muaj Vajtswv Txojlus?

19. Peb yuav tau ua li cas txojkev ntseeg thiaj nyob ruaj khov?

¹⁹ Yog peb txaus siab tias muaj Vajtswv Txojlus ces peb yuav ua hnub ua hmo nyeem. Txhob xav tias thaum twg peb khoom ces peb mam li nyeem. Peb yuav tau teem ib lub caij tseg cia ces thaum txog lub caij ntawd, peb yuav tau muab Vajtswv Txojlus los nthuav nyeem. Ua li no peb txojkev ntseeg thiaj li yuav ruaj yuav khov.

20. Peb yuav tsum rau siab ntso ua tej twg?

²⁰ Peb tsis zoo li “cov neeg muaj tswvyim thiab txawj ntse” uas yuav cia li ntseeg tej tsis muaj hauv paus hauv ntsis. (Mathais 11:25, 26) Tej peb ntseeg yeej muaj puav pheej hauv Vajtswv Txojlus. Twb yog peb muab coj los nyeem thiab ua tib zoo kawm, peb pom tias lub ntiajteb zoo tsis thooj li yav thaud lawm. Ntxiv ntawd, Yehauvas tseem yuav los kho ib puas tsav yam. Yog li ntawd, cia peb rau siab ntso tsav peb txojkev ntseeg tsis tseg tsis tu thiab pab kom ib zej tsoom neeg los paub thiab los ntseeg tus Tswv Tsim. (1 Timautes 2:3, 4) Peb yeej tos ntsoov lub caij thaum txhua leej txhua tus hauv ntiajteb hais tawm cov lus hauv Tshwmsim 4:11 tias: ‘Yehauvas uas yog peb sawvdaws tus Vajtswv! Koj yog tus uas muaj hwjchim, tsimnyog peb sawvdaws hwm koj thiab ua rau koj tau koob meej. Rau qhov koj yog tus uas tsim ib puas tsav yam huv tibsi.’