1. Piav seb Yehauvas muaj tej haujlwm twg uas coob leej xav mus ua.

  Ua ntej lub sijhawm kawg yuav xaus peb muaj haujlwm ntau heev ua. (Mathais 24:14; Lukas 10:2; 1 Petus 5:2) Peb txhua leej txhua tus yeej kub siab lug xav ua npaum li peb ua tau rau Yehauvas. Xws li ib txhia muaj lub siab xav ua ib tug thov kev, ua haujlwm hauv Npe-ee, lossis tsa vaj tsa tsev kom tau sib txoos los yog tau siv dhia Yehauvas tes haujlwm. Muaj ib co kwvtij yeej phwb teg tsog ua lawv tes haujlwm lawv thiaj ua tau ib tug tub leg num lossis ib tug txwj laus. (1 Timautes 3:1, 8) Yehauvas txaus siab kawg nkaus li thaum nws pom nws cov tibneeg txaus siab ua nws tes haujlwm!​—Phau Ntawv Nkauj 110:3; Yaxayas 6:8.

2. Yog tias peb ncav tsis cuag peb tej hom phiaj peb yuav xav li cas?

² Tej zaum peb twb cia cia siab tias peb yuav ncav kom cuag peb lub hom phiaj ua Yehauvas tes haujlwm tiamsis muaj tej thaum tsis mus raws li peb lub siab xav. Lossis peb ua tsis tau vim peb lub hnub nyoog nchav lawm lossis muaj lwm yam hauv peb lub neej los tab kaum. Thaum zoo li no tej zaum peb yuav tag kev cia siab. (Pajlug 13:12) Muaj ib tug npe hu ua Maiv b tau ntsib li no dua los lawm. Nws xav tias kheev lam nws tau ua haujlwm hauv Npe-ee lossis mus Kev Kawm Rau Cov Qhia Lub Nceeg Vaj. Nws hais tias: “Tos kuv mus tsis tau los vim kuv twb dhau lub hnub nyoog uas lawv txais yuav kuv. Muaj tej thaum ua rau kuv qaug zog kawg nkaus li vim kuv ncav tsis cuag kuv lub hom phiaj.”

3. Ua ntej peb ua tau haujlwm ntxiv rau Yehauvas peb yuav tau coj li cas?

 ³ Muaj tej thaum peb yuav tau hloov peb tus cwj pwm qho mentsis kom peb thiaj ncav cuag peb lub hom phiaj. Xws li yog tias peb tseem hluas peb yuav tau paub tab mentsis thiab coj zoo zoo ua ntej tso peb thiaj yuav tau txais haujlwm ntxiv. Lossis tej zaum peb yog ib tug neeg ua yam twg los khaws pes nkaus ua pes hlo, tsuas yog tiav xwb tsis to leej twg. Peb yuav tau maj mam xyaum maj mam ua thiab saib taus lwm tus. Yog tias peb rau siab ntso xyaum tiag kom coj tau tus cwj pwm zoo ces tej zaum cov kwvtij yuav faib haujlwm zuj zus rau peb ua. Muaj ib tug kwvtij hu ua Nij (Nick) tau pom muaj tseeb li no. Thaum nws muaj 20 xyoo nws ua tsis tau ib tug tub leg num li nws lub siab xav. Tej no ua rau nws tu siab kawg nkaus li nws thiaj hais tias, “Kuv xav tias ntshe kuv tsis zoo txaus.” Txawm li ntawd los Nij tsis tag kev cia siab. Nws tsis xav txog qhov ua nws ua tsis tau ib tug tub leg num tiamsis nws rau siab ntso ua tes haujlwm nws twb muaj hauv lub koom txoos, thiab rau siab mus tshaj tawm tsis tseg tsis tu. Niam no nws kuj dhau mus ua ib tug ntawm Pab Uas Saib Xyuas Ib Ceg.

4. Piav seb peb yuav kawm txog dabtsi hauv zaj kawm no.

⁴ Yog tias koj qaug zog vim koj ncav tsis cuag koj lub hom phiaj los tsis txhob tag kev cia siab. Nthuav hlo koj lub siab tawm rau Vajtswv Yehauvas. (Phau Ntawv Nkauj 37:5-7) Ntxiv ntawd, mus cuag cov kwvtij uas paub qab hau hauv koj lub koom txoos. Nug lawv seb koj yuav tau hloov li cas koj thiaj ua tau haujlwm rau Yehauvas ntxiv. Khaws lawv tej lus ntuas tseg cia. Yog tias koj coj li no, tej zaum koj thiaj li yuav ncav cuag koj lub hom phiaj. Tiamsis yog tias peb ncav tsis cuag peb lub hom phiaj yam li tus muam Maiv nev? Muaj 3 yam uas yuav pab tau peb txaus siab rau tej ua peb ua tau rau Yehauvas. Hauv zaj no peb yuav tham seb (1) kev zoo siab yog dabtsi tiag, (2) dabtsi yuav pab peb muaj kev zoo siab, thiab (3) tej hom phiaj uas yuav pab peb muaj kev zoo siab.

5. Yuav ua li cas peb thiaj muaj taus kev zoo siab? (Tej Lus Qhia 6:9)

⁵ Nqe Vajlugkub hauv Tej Lus Qhia 6:9, piav tias kev zoo siab yog dabtsi tiag. (Nyeem.) Tus neeg uas txaus siab rau tej uas nws twb muaj thiab tej uas nws ua tau yeej yuav muaj kev kaj siab, tiamsis tus neeg uas “pheej ntshaw lwm yam” lub siab yuav tsis kaj li. Lub ntsiab yog li cas? Peb yuav zoo siab dua yog tias peb txaus siab rau tej yam peb ua tau xwb.

6. Peb yuav kawm txog zaj kwv huam twg thiab peb kawm tau li cas los ntawm zaj ntawd?

⁶ Coob leej ntau tus xav tias tsis lam muaj leejtwg xav ua yam qub tas li xwb. Peb ua neej nyob peb xav kawm yam tshiab tas li. Txawm li ntawd los peb yeej txaus siab tau rau tej yam peb ua tau rau Yehauvas. Peb yuav kawm txog Yexus zaj kwv huam hauv Mathais 25:14-30. Zaj kwv huam no hais txog tus los pav thiab nws 3 tug tub qhe thiab yuav qhia rau peb seb peb yuav ua li cas peb thiaj muaj kev zoo siab rau tej uas peb muaj thiab ua tau tamsim no.

7. Piav Yexus zaj kwv huam txog tus los pav thiab nws 3 tug tub qhe.

⁷ Zaj kwv huam no hais txog ib tug los pav uas tab tom yuav mus ncig tebchaws. Ua ntej nws yuav mus nws txib kom nws cov tub qhe saib xyuas nws tej cuab txhiaj cuab tam. c Tus los pav paub tias nws cov tub qhe nyias muaj nyias peevxwm, nws thiaj faib cov nyiaj rau cov tub qhe raws li lawv rab peevxwm. Nws  muab 5 talas rau ib tug, 2 talas rau ib tug, thiab 1 talas rau tus kawg. Thawj 2 tug tub qhe rau siab ntso muab cov talas coj mus ua lag ua luam tsam tau nyiaj rau lawv tus los pav. Tiamsis tshuav tus tub qhe uas tau 1 talas, nws tsis coj nws tus los pav cov nyiaj mus ua lag ua luam li. Tus los pav thiaj li muab tus tub qhe no tso tawm mus lawm.

8. Vim li cas thawj tug tub qhe hauv zaj kwv huam ho zoo siab?

⁸ Ntshe thawj tug tub qhe zoo siab heev vim nws tus los pav muab 5 talas rau nws. Cov nyiaj no ntau heev thiab qhov no qhia tias tus los pav tso siab heev rau tus tub qhe no! Tus tub qhe uas tau 2 talas puas chim siab tias nws tus los pav tsis muab nyiaj ntau pes tsawg rau nws? Tej zaum qhov no kuj txo tau nws lub zog thiab. Nws yuav ua li cas xwb?

9. Hauv zaj kwv huam no, Yexus tsis hais dabtsi txog tus tub qhe uas tau 2 talas? (Mathais 25:22, 23)

⁹ Nyeem Mathais 25:22, 23, NWT. Txawm tus tub qhe tau 2 talas xwb los Yexus hais tsis txog tias xyov tej no puas ua rau nws chim siab. Tsis tas li ntawd los tus tub qhe tsis yws tias: ‘Ua cas yawg hlob muab tsawg ua luaj rau kuv? Kuv yeej muaj peevxwm npaum li tus tub qhe ua tau 5 talas thiab! Yog tias yawg hlob tsis tso siab rau kuv ces kuv yeem muab 2 talas no faus es kuv mus ua lwm yam zoo dua.’

10. Tus tub qhe uas tau 2 talas muab cov nyiaj coj mus ua li cas?

¹⁰ Tus tub qhe uas tau 2 talas rau siab ntso coj nws tus los pav cov nyiaj coj mus ua luam yam nkaus li thawj tug tub qhe. Ces nws txawm tsam 2 talas ntxiv rau nws tus los pav. Thaum tus los pav pom tias tus tub qhe nquag thiab  muaj peevxwm heev nws thiaj txaus siab hlo muab haujlwm txhab ntxiv rau tus tub qhe.

11. Dabtsi yuav pab kom peb muaj kev zoo siab ntxiv?

¹¹ Yog tias peb rau siab ntso tiag ua peb tes haujlwm uas Yehauvas twb muab rau peb lawm ces peb yuav muaj kev zoo siab. Rau siab ntso mus tshaj tawm txoj moo zoo thiab ua peb tes haujlwm uas nyob hauv lub koom txoos. (Tes Haujlwm 18:5; Henplais 10:24, 25) Ua ntej mus kev sib txoos los ua tib zoo npaj peb tej lus teb kom thiaj txhawb tau cov tuaj mloog lub dag lub zog. Yog tias peb yog ib tug kawm rau kev sib txoos 1 los rau siab ntso xyaum zaj kawm ntawd. Yog peb muaj haujlwm dhia hauv lub koom txoos los peb yuav tau tuaj kom ntxov thiaj ua tau peb tes haujlwm. Saib tes haujlwm peb tau muaj nuj nqes. Rau siab ntso ua peb tes haujlwm kom peb thiaj txawj. (Pajlug 22:29) Yog tias peb rau siab ua peb tes haujlwm rau Yehauvas ces peb txojkev sib raug zoo nrog nws yuav nthuav dav zuj zus tuaj thiab qhov no yuav ua rau peb muaj kev zoo siab. (Kalatias 6:4) Peb yuav tsis khib thaum lwm tus txais tej haujlwm uas peb ntshaw vim peb txaus siab rau tes haujlwm uas peb muaj lawm.​—Loos 12:15; Kalatias 5:26.

12. Muaj 2 tug Timkhawv ua li cas nkawv thiaj txaus siab rau nkawv tes haujlwm?

¹² Nej puas nco qab thaum Maiv tau piav tias nws xav ua haujlwm hauv Npe-ee thiab mus Kev Kawm Rau Cov Qhia Lub Nceeg Vaj? Txawm tias nws ua tsis tau li nws lub siab xav los nws hais tias: “Kuv sim ntau txojkev tshaj tawm thiab kuv ua npaum li kuv ua tau los ua ib tug tho kev. Tej no pab kuv txaus siab rau tej yam uas kuv twb ua rau Yehauvas lawm.” Nij ua li cas xwb thaum nws tsis tau ua ib tug tub leg num? Nws hais tias: “Kuv tsis xav txog tej yam uas kuv ua tsis tau tiamsis kuv rau siab ntso ua tes haujlwm uas kuv twb muaj lawm, xws li mus tshaj tawm thiab tsa tes teb thaum sib txoos. Ntxiv ntawd kuv rau npe mus ua haujlwm hauv Npe-ee. Ib xyoos tom qab xwb lawv txawm txais kuv mus ua lawm.”

13. Vim li cas peb yuav zoo siab dua yog tias peb rau siab ntso ua peb tes haujlwm rau Yehauvas? (Tej Lus Qhia 2:24)

¹³ Yog peb rau siab ntso rau tes haujlwm uas peb muaj ces tej zaum peb yuav txais tau haujlwm ntxiv tib yam nkaus li Nij. Txawm peb ncav tsis cuag peb lub hom phiaj los txhob tag kev cia siab. Zoo yam nkaus li Maiv, yog tias peb tau hau ntsoov ua npaum li peb ua tau rau Yehauvas ces peb yuav muaj kev zoo siab dua. (Nyeem Tej Lus Qhia 2:24.) Ntxiv ntawd, ib yam uas yuav tsav tau peb txojkev zoo siab yog qhov uas peb tus Tswv, Yexus Khetos txaus siab rau tej uas peb ua.

14. Peb yuav tsum nco ntsoov li cas thaum peb xaiv ib lub hom phiaj twg?

¹⁴ Yog tias peb ua npaum li peb ua tau rau Yehauvas lawm los nco ntsoov tias tseem tshuav ntau lub hom phiaj uas peb yuav ncav kom tau thiab. Xws li xyaum kom txawj tshaj tawm ntxiv, txawj cob qhia luag lwm tus, thiab pab peb cov kwvtij nkauj muam. Yog li ntawd tsis txhob xaiv tej hom phiaj uas peb nyiam nkaus nkaus xwb tiamsis xaiv tej hom phiaj mus pab luag lwm tus.​—Pajlug 11:2; Tes Haujlwm 20:35.

15. Tej hom phiaj twg thiaj pab tau peb muaj kev zoo siab?

¹⁵ Yog tias peb tsis paub xyov yuav xaiv lub hom phiaj twg los thov Yehauvas pab peb xaiv ib lub hom phiaj uas peb ua tau. (Pajlug 16:3; Yakaunpaus 1:5) Peb puas ua tau ib tug pab tho kev, ib tug tho kev, ua haujlwm hauv Npe-ee, lossis pab ua vaj ua tsev khiav Yehauvas tes haujlwm yam li peb tau tham hauv  nqe 1? Peb puas kawm tau luag lwm haiv neeg lus kom peb thiaj pab tau lawv los paub Yehauvas lossis mus qhia tibneeg nyob txawv tebchaws?  Yog xav paub ntxiv seb muaj tej haujlwm twg dhia hauv Yehauvas lub koom haum ces mus nyeem tshooj 10 nyob hauv phau ntawv Askiv Organized to Do Jehovah’s Will lossis nug cov txwj laus hauv peb lub koom txoos. d Rau siab ntso ncav kam tiag peb thiaj yuav tau tej hom phiaj ntawd. Luag tej yeej yuav pom tias peb kub siab lug ua Yehauvas tes haujlwm thiab peb yuav muaj kev zoo siab.

16. Yuav ua li cas yog tias peb ncav tsis cuag peb lub hom phiaj?

¹⁶ Peb yuav ua li cas yog tias peb ncav tsis cuag tej hom phiaj uas peb tau tham tas los no? Peb yuav tau nrhiav tej hom phiaj uas peb ncav tau. Cia peb kawm ntxiv seb tej hom phiaj no yog li cas tiag.

17. Tej hauv paus ntsiab lus hauv 1 Timautes 4:13, 15 yuav pab ib tug kwvtij xyaum li cas nws thiaj txawj qhia?

¹⁷ Nyeem 1 Timautes 4:13, 15. Yog tias koj yog ib tug kwvtij uas tau ua kevcai rau dej lawd, tej zaum koj yuav ncav tej hom phiaj pab koj xyaum kom yimhuab txawj nyeem thiab piav Vajlugkub. Yog koj txawj qhuab qhia, cob qhia, thiab nyeem Vajtswv Txojlus ces yuav raug cov uas tuaj mloog siab dua. Ntxiv ntawd rau siab kawm phau Xyaum Kom Txawj Nyeem Txawj Qhia huv tibsi. Maj mam kawm thiab xyaum ib zaj zuj zus tom vaj tom tsev. Ua li no koj thiaj li txawj qhia thaum cev lus qhuab qhia. Tsis tas li ntawd koj yeej mus cuag tau tus txwj laus uas pab ntuas lossis ib tug txwj laus twg hauv koom txoos vim lawv yog cov “qhuab qhia thiab cob qhia.” e (1 Timautes 5:17) Thaum koj cev lus qhuab qhia, ua tib zoo  xav txog cov uas tuaj mloog. Qhov tseem ceeb tshaj plaws yog qhia kom txhawb lwm tus txojkev ntseeg thiab rub lawv lub siab kom txawj siv Vajtswv tej hauv paus ntsiab lus rau hauv lawv lub neej. Thaum koj txawj txawj qhia lawd ces koj thiab lwm tus yuav muaj kev kaj siab dua.

18. Muaj dabtsi los pab kom peb txawj mus tshaj tawm?

¹⁸ Txhua leej txhua tus nyias muaj nyias ib lub luag haujlwm mus tshaj tawm thiab coj txhua haiv neeg los ua thwjtim. (Mathais 28:19, 20; Loos 10:14) Koj yuav ua li cas koj thiaj txawj qhia Vajtswv Txojlus? Mus nyeem tej tswvyim hauv Phau Txawj Qhia los pab koj thiab saib cov yeeb yaj kiab ua yam ntxwv hauv phau Lub Neej Thiab Tes Haujlwm Khixatia. Mus xyuas seb lub tswvyim twg pab tau koj dua. Yog tias koj khaws tej tswvyim ntawd tseg ces koj yuav txawj qhia Vajlugkub thiab muaj kev kaj siab.​—2 Timautes 4:5.

19. Peb yuav ua li cas peb thiaj muaj tej yam ntxwv uas haum Yehauvas siab?

¹⁹ Txawm koj yuav xaiv lub hom phiaj twg los xij. Nco ntsoov tias yam uas tseem ceeb tshaj plaws yog xyaum kom koj muaj tej yam ntxwv zoo uas haum Vajtswv siab. (Kalatias 5:22, 23; Kaulauxais 3:12; 2 Petus 1:5-8) Peb yuav ua li cas peb thiaj muaj tej yam ntxwv no? Muab piv tias koj xav txhawb koj txojkev ntseeg. Ces koj yuav mus tshawb nrhiav tej ntaub ntawv Vajlugkub uas qhia seb yuav tsav kev ntseeg li cas. Ntxiv ntawd, muaj tej yeeb yaj kiab hauv JW Tshooj TV uas piav txog peb cov kwvtij thiab nkauj muam uas muaj peevxwm peem dhau ntau yam kev sim siab. Thaum saib tas, xav zoo zoo seb yuav ua li cas koj thiaj xyaum tau li lawv.

20. Yam twg yuav pab kom peb tsis txhob poob siab rau peb tes haujlwm?

²⁰ Peb txhua tus yeej xav ua haujlwm ntau npaum li peb ua tau rau Yehauvas. Txawm tias tamsim no peb ua tsis tau li peb lub siab xav rau Yehauvas los txhob tag kev cia siab. Thaum Vajtswv kho txhua yam dua tshiab lawd peb yuav muaj peev xwm ua tau nws tes haujlwm tshaj tamsim no. Cheem lub caij lub nyoog ntawd tseem tsis tau los txog cia peb ua npaum li peb ua tau rau Vajtswv. Peb yuav tsis poob siab vim peb hwm thiab qhuas Yehauvas uas yog tus Vajtswv muab tau kev kaj siab. (1 Timautes 1:11, NWT ) Cia peb txaus siab hlo rau peb tes haujlwm niaj hnub niam no.