1. Vim li cas Yehauvas Cov Timkhawv ho muaj kev zoo siab ua luaj? (Saib thawj daim duab hauv zaj no.)

YEHAUVAS COV TIMKHAWV yeej yog ib co neeg uas muaj kev zoo siab heev. Thaum lawv tau ua ke, lawv yeej tham luag ntxhwb ntxhi, tsis hais thaum mus kev sib txoos, thaum mus tej rooj sib txoos, lossis thaum mus ua si lomzem. Vim li cas lawv ho muaj kev zoo siab ua luaj li? Twb yog vim lawv paub Yehauvas, “tus Vajtswv uas muaj kev zoo siab.” Lawv teev tiam nws thiab xyaum li nws. (1 Timaute 1:11, NW; Ntawv Nkauj 16:11) Yehauvas yog lub hauv paus kev zoo siab, nws xav kom peb muaj kev zoo siab thiab. Nws qhia rau peb seb yuav ua li cas peb thiaj muaj kev zoo siab xyiv fab.​—Kevcai 12:7; Laj Lim Tswvyim 3:12, 13.

2, 3. (1) Tus neeg uas muaj kev zoo siab zoo li cas? (2) Vim li cas niaj hnub no tibneeg thiaj tsis muaj kev kaj siab li?

² Ua li koj ne? Koj puas muaj kev zoo siab thiab? Tus neeg uas muaj kev zoo siab yeej noj qab nyob zoo thiab txaus siab rau nws  lub neej thiab nyob kaj siab lug. Phau Vajlugkub qhia tias cov uas Yehauvas foom koob hmoov rau yeej nyob kaj siab lug. Tiamsis vim li cas niaj hnub no tej zaum yuav tsis yoojyim rau peb muaj kev zoo siab thiab kev kaj siab?

³ Vim niaj hnub no peb ntsib ntau yam kev nyuaj siab. Peb muaj cov uas raug kev ploj kev tuag lossis raug rho tawm. Hauv peb lub cuab lub yig kuj muaj kev sib cav sib ceg lossis kev sib nrauj. Kuj muaj cov uas poob haujlwm lossis niaj hnub raug luag thuam tom haujlwm lossis tom tsev kawm ntawv. Peb ib txhia tseem raug tsim txom lossis raug kaw vim peb teev tiam Yehauvas. Tsis tas li ntawd, peb ib txhia ho muaj mob muaj nkeeg, muaj mob hnyav, thiab muaj tus mob nyuaj siab. Vim tej no peb thiaj tsis muaj kev kaj siab. Tiamsis nco ntsoov tias Yexus Khetos hlub peb heev. Nws yuav nplig peb lub siab kom peb muaj kev kaj siab. (Mathai 11:28-30) Txawm Xatas lub qab ntuj ua rau peb muaj ntau yam kev nyuaj siab los, tej yeeb yam uas Yexus tham txog hauv nws zaj lus qhia saum roob yuav pab tau peb ua neej nyob kaj siab lug.

4, 5. Peb yuav tau ua li cas xwv thaum peb ntsib teeb meem peb thiaj tsis nyuaj siab?

⁴ Thawj yam uas Yexus tham txog yog ib yam uas tseem ceeb heev. Yexus hais tias: “Cov uas paub tias lawv cheem tsum Vajtswv tau nyob kaj siab lug, rau qhov Vajtswv lub Nceeg Vaj yog lawv tug lawm.” (Mathai 5:3, NW) Yog peb paub tias peb cheem tsum Vajtswv ces peb yuav kawm phau Vajlugkub, ua raws li Vajtswv tej lus sam hwm, thiab muab Vajtswv txojkev pe hawm saib ua yam uas tseem ceeb tshaj. Yog peb ua li no ces peb yuav muaj kev kaj siab. Peb yuav yimhuab tso siab rau Vajtswv tej lus cog tseg, thiab “txojkev vam kaj siab lug” hauv phau Vajlugkub yuav cuab peb lub zog.​—Titau 2:13.

⁵ Peb yuav tau rau siab ntso kom peb txojkev sib raug zoo nrog Yehauvas ruaj khov xwv thaum peb ntsib teeb meem peb thiaj tsis nyuaj siab. Tus tubtxib Povlauj sau tias: “Cia li xyiv fab rau hauv tus Tswv txhua lub sijhawm. Kuv rov hais dua tias, cia li xyiv fab hlo.” (Filipi 4:4) Yuav kom peb nyob ze Yehauvas, peb yuav tsum muaj nws lub tswvyim. Vajtswv Txojlus hais tias: “Tus uas nrhiav tau tswvyim thiab txawj nkag siab mas kaj siab lug,” thiab “tswvyim yog tsob ntoo uas pub txojsia rau cov uas tuav rawv nws, cov uas tuav rawv tswvyim cia ruaj, luag yuav hu tias kaj siab lug.”​—Paj Lug 3:13, 18.

6. Peb yuav tau ua li cas peb thiaj muaj kev kaj siab tas mus li?

⁶ Tiamsis yuav kom peb muaj kev kaj siab tas mus li, peb yuav tau ua li cas? Peb yuav tau coj raws li phau Vajlugkub qhia. Yexus hais tias tseem ceeb heev rau peb ua li ntawd. Nws hais tias “yog [peb] paub li no thiab ua raws nraim mas [peb] yuav nyob kaj siab lug.” (Yauhas 13:17; nyeem Yakaunpau 1:25.) Yog peb ua li no ces peb yuav nyob ze Vajtswv thiab peb yuav muaj kev kaj siab tiag tiag. Cia peb kawm ntxiv txog Yexus cov lus hauv nws zaj lus qhia saum roob, seb peb yuav tau ua li cas xwv tej kev nyuaj siab thiaj tsis ua rau peb nyob tsaus ntuj nti.

7. Ua li cas tus uas quaj ntsuag ho tau nyob kaj siab lug?

⁷ “Cov uas quaj ntsuag tau nyob kaj siab lug, rau qhov lawv yuav tau txais kev nplij siab.” (Mathai 5:4) Ua li cas tus uas quaj ntsuag ho tau nyob kaj siab lug? Yexus tsis yog hais tias txhua tus uas quaj ntsuag yuav tau nyob kaj siab lug. Coob tus neeg limhiam quaj ntsuag thiab tu siab vim lawv raug tej kev “txom nyem nyuaj siab” uas muaj tshwm sim nyob rau “tiam kawg.” (2 Timaute 3:1) Tiamsis cov ntawd tsis yog cov uas yuav tau nyob kaj siab lug vim lawv tsuas xav txog lawv tus kheej xwb, lawv tsis xav txog Yehauvas. Lawv tsis muaj kev sib raug zoo nrog Vajtswv, lawv thiaj tsis muaj kev kaj siab. Tiamsis cov uas Yexus hais tias yuav tau nyob kaj siab lug yog cov uas paub tias lawv cheem tsum Vajtswv txojkev pab. Lawv quaj thiab tu siab heev vim coob tus hauv lub qab ntuj no tsis nyiam Vajtswv thiab tsis kam coj raws li Vajtswv tej lus qhia. Lawv kuj paub tias lawv yog neeg txhaum, thiab lawv pom tej kev phem uas noob txaug neeg txhaum tau ua hauv lub qab ntuj no. Yehauvas pom thiab paub cov uas quaj ntsuag thiab tu siab li no. Nws thiaj muab nws Txojlus los nplig lawv, muab kev vam tau txojsia ntev mus ib txhis rau lawv, thiab pab kom lawv nyob kaj siab lug.​—Nyeem Exekhee 5:11; 9:4.

8. Yog peb muaj lub siab mos siab muag ces peb yuav tau nyob kaj siab lug li cas?

⁸ “Cov uas siab mos muag tau nyob kaj siab lug, rau qhov lawv yuav tau lub ntiajteb ua lawv tug.” (Mathai 5:5, NW) Yog peb muaj lub siab mos siab muag ces peb yuav tau nyob kaj siab lug li cas? Niaj hnub no tibneeg ua nruj ua tsiv thiab saib tsis taus lwm tus, qhov no thiaj tsim tau ntau yam teeb meem. Tiamsis thaum lawv los paub qhov tseeb, lawv hloov lawv tus cwj pwm thiab lawv muab “tus neeg tshiab” coj los hnav. Lawv “hnav lub siab tab ncuab, siab khuvleej, siab txo hwjchim, siab mos siab muag thiab thev taus.” (Khaulauxi 3:9-12) Lawv hloov tau li no lawv thiaj muaj lub siab tus, nrog lwm tus sib raug zoo, thiab muaj kev kaj siab. Vajtswv Txojlus cog tseg tias lawv yuav tau lub ntiajteb ua lawv teej lawv tug.​—Ntawv Nkauj 37:8-10, 29.

9. (1) Thaum Yexus hais tias cov siab mos muag yuav tau lub ntiajteb ua lawv teej lawv tug, yog Yexus hais li cas tiag? (2) Ua li cas cov uas “tshaib nqhis txojkev ncaj ncees” ho tau nyob kaj siab lug?

⁹ Thaum Yexus hais tias cov siab mos muag yuav tau lub ntiajteb ua lawv teej lawv tug, yog Yexus hais li cas tiag? Cov xaiv tseg yuav tau lub ntiajteb ua lawv teej lawv tug thaum lawv ua vajntxwv thiab ua pov thawj kav lub ntiajteb. (Qhia Tshwm 20:6) Tsheej plhom leej uas tsis yog cov xaiv tseg mus saum ntuj yuav tau lub ntiajteb ua lawv teej lawv tug thaum lawv tau nyob hauv lub ntiajteb mus ib txhis. Thaum ntawd lawv yuav zoo tiav log thiab yuav muaj lub siab tus thiab nyob kaj siab lug. Yexus hais tias lawv yog “cov uas tshaib nqhis txojkev ncaj ncees, [thiab] tau nyob kaj siab lug.” (Mathai 5:6) Lawv yuav pom txojkev ncaj ncees thaum Yehauvas muab txhua yam kev limhiam tshem tawm. (2 Petus 3:13) Hauv lub qab ntuj tshiab, cov ncaj ncees yuav muaj kev zoo siab xyiv fab thiab yuav tsis quaj ntsuag li lawm vim cov limhiam twb dua tag lawm.​—Ntawv Nkauj 37:17.

10. Tus neeg khuvleej zoo li cas xwb?

¹⁰ “Cov uas muaj lub siab khuvleej tau nyob kaj siab lug, rau qhov lawv yuav tau txais kev khuvleej.” (Mathai 5:7) Tus neeg khuvleej zoo li cas xwb? Nws muaj lub siab mos siab muag thiab hlub tshua cov txom  nyem. Tus neeg khuvleej tsis yog hlub ntawm lub ncauj xwb, tiamsis phau Vajlugkub qhia tias nws yeej zoo siab hlo nqes tes pab cov uas txom nyem.

11. Zaj lus piv txwv txog tus neeg Xamali qhia li cas rau peb?

¹¹ Nyeem Luka 10:30-37. Yexus zaj lus piv txwv txog tus neeg Xamali qhia meej tias tus uas muaj kev khuvleej yuav tsum coj li cas. Thaum tus neeg Xamali pom tus yawg Yudai raug tub sab ntaus pw txom nyem ntsuav hauv av, nws hlub tshua tus yawg ntawd kawg li. Nws thiaj nqes tes pab tus yawg ntawd. Tom qab Yexus piav zaj lus piv txwv tas, nws txawm hais rau tus uas nrog nws tham tias: “Koj cia li mus ua ib yam nkaus li ntawd.” Peb yuav tau nug peb tus kheej tias: ‘Kuv puas ua ib yam li ntawd? Kuv puas xyaum ua li tus neeg Xamali? Thaum kuv pom cov txom nyem, kuv puas cev tes pab lawv? Kuv puas ua tau lwm yam ntxiv los pab lawv? Ua li, cov uas nyob hauv kuv lub koom txoos, xws li cov laus, cov poj ntsuam, thiab cov uas tsis muaj niam muaj txiv teev tiam Yehauvas ne, kuv puas pab lawv? Kuv puas yuav hais ib los nplig “cov uas qaug zog”?’​—1 Thexalaunika 5:14; Yakaunpau 1:27.

12. Ua li cas thaum peb khuvleej lwm tus, peb ho nyob kaj siab lug?

¹² Ua li cas thaum peb khuvleej lwm tus, peb ho nyob kaj siab lug? Rau qhov thaum peb khuvleej lwm tus ces twb yog peb pub rau tus ntawd. Yexus hais tias qhov uas pub rau luag ua rau yus kaj siab dua. Tsis tas li ntawd xwb, peb kaj siab vim peb paub tias peb ua tau haum Yehauvas siab. (Tubtxib Tes Haujlwm 20:35; nyeem Henplais 13:16.) Vajntxwv Davi hais txog cov uas khuvleej lwm tus li no: “[Yehauvas] tsom kwm nws thiab tuav nws txojsia nyob, nws raug hu tias yog tus uas tau nyob kaj siab lug hauv lub [ntiajteb].” (Ntawv Nkauj 41:1, 2) Yog peb khuvleej thiab hlub tshua lwm tus ces Yehauvas yuav khuvleej peb, thiab peb yuav tau nyob kaj siab lug mus ib txhis.​—Yakaunpau 2:13.

13, 14. Vim li cas ho tseem ceeb ua luaj rau peb muaj “lub siab dawb huv”?

¹³ Yexus hais tias: “Cov uas lub siab dawb huv tau nyob kaj siab lug, rau qhov lawv yuav pom Vajtswv.” (Mathai 5:8) Yuav kom peb muaj lub siab dawb huv, peb yuav tsum  xav txog tej yam dawb huv xwb. Yog peb xav pe hawm Yehauvas tseem ceeb rau peb ua li no.​—Nyeem 2 Khaulee 4:2; 1 Timaute 1:5.

¹⁴ Cov uas muaj lub siab dawb huv nrog tau Yehauvas sib raug zoo. Yehauvas hais tias: “Cov uas ntxhua nws cev tsoos tsho huv lawd . . . kuj tau nyob kaj siab lug.” (Qhia Tshwm 22:14) Qhov uas lawv ‘ntxhua lawv cev tsoos tsho’ yog txhais li cas? Rau cov xaiv tseg, qhov no txhais tias Yehauvas suav tias lawv dawb huv lawm. Nws yuav muab txojsia tsis txawj tuag rau lawv thiab lawv yuav tau nyob kaj siab lug mus ib txhis saum ntuj. Rau pab neeg coob coob uas yuav nyob hauv ntiajteb, qhov no txhais tias Yehauvas cia lawv los nrog nws sib raug zoo vim nws pom tias lawv ncaj ncees. Phau Vajlugkub hais tias “lawv twb ntxhua lawv tej tsoos tsho hauv tus Menyuam Yaj cov ntshav kom dawb paug.”​—Qhia Tshwm 7:9, 13, 14.

15, 16. Cov uas muaj lub siab dawb huv pom tau Vajtswv li cas?

¹⁵ Yehauvas hais tias: “Tsis muaj leejtwg pom [kuv] es tseem muaj txojsia nyob.” (Khiav Dim 33:20) Ua li, cov uas muaj lub siab dawb huv ho pom Vajtswv li cas? Lo lus Kili “pom” txhais tias xav txog, to taub, lossis paub. Yog li ntawd, thaum ib tug neeg paub thiab to taub Vajtswv zoo lawd ces kuj zoo li nws pom Vajtswv, thiab nws yuav nyiam Vajtswv tej yeeb yam. (Efexau 1:18) Yexus xyaum tau Vajtswv tej yeeb yam zoo kawg li, nws thiaj hais tias: “Tus uas pom kuv kuj yog pom leej Txiv.”​—Yauhas 14:7-9.

¹⁶ Tsis tas li ntawd xwb, thaum peb pom Vajtswv pab peb hauv peb lub neej ces kuj zoo li peb twb pom Vajtswv lawm. (Yauj 42:5) Cov uas muaj lub siab dawb huv thiab muab siab npuab Vajtswv teev tiam nws yuav pom tej yam zoo uas nws tau cog tseg. Thaum cov xaiv tseg raug tsa sawv mus nyob saum ntuj, lawv lub qhov muag yuav pom kiag Yehauvas.​—1 Yauhas 3:2.

17. Vim li cas cov uas tsim kev sib haum xeeb nrog lwm tus ho nyob kaj siab lug?

¹⁷ Yexus hais ntxiv tias: “Cov uas tsim kev haum xeeb tau nyob kaj siab lug.” (Mathai 5:9) Yog peb nrhiav kev sib haum xeeb nrog lwm tus, peb yuav nyob kaj siab lug. Tus thwjtim Yakaunpau sau tias: “Cov uas tsim kev sib haum xeeb thiab tseb txojkev sib haum yuav tau sau txojkev ncaj ncees.” (Yakaunpau 3:18) Yog muaj tej tug hauv koj lub koom txoos lossis hauv koj tsev neeg uas koj pheej tsis sib haum nrog, cia li thov Yehauvas pab koj kom koj nyob tau sib haum nrog nws. Yog koj ua li ntawd, Yehauvas yuav muab nws lub hwj huam dawb huv los pab kom koj muaj tej yeeb yam zoo xwv koj thiaj muaj kev kaj siab. Yexus piav tias tseem ceeb rau peb nrhiav kev sib haum xeeb nrog lwm tus. Nws hais tias: “Yog koj tabtom muab qhov txhia chaw xyeem rau ntawm lub thaj es nco tau tias koj kwvtij tseem muaj kev tu siab rau koj, koj cia li muab tej uas yuav muab xyeem ntawd tso rau ntawm lub thaj ib sab es rov mus nrog tus kwvtij ntawd hais haum sib raug zoo tso mam li tuaj muab xyeem.”​—Mathai 5:23, 24.

18, 19. Vim li cas cov Khixatia ho zoo siab thaum lawv raug tsim txom?

 ¹⁸ “Thaum luag thuam thiab tsim txom nej thiab dag iab hiam txhua yam lus phem rau nej vim yog tim kuv, nej tau nyob kaj siab lug.” Yexus cov lus no txhais li cas? Yexus hais ntxiv tias: “Cia li zoo siab xyiv fab rau qhov nej twb muaj nqe zog ntau rau saum ntuj ceeb tsheej lawm, vim luag twb tsim txom cov xibhwb cev Vajtswv lus uas nyob ua nej ntej ib yam nkaus.” (Mathai 5:11, 12) Vim li no, thaum cov tubtxib raug luag ntaus thiab raug luag txwv tsis pub tshaj tawm txoj xov zoo, lawv “txawm tawm ntawm cov thawj lub rooj sablaj mus zoo siab heev.” Lawv zoo siab tsis yog vim lawv raug ntaus, tiamsis lawv zoo siab vim “Vajtswv suav tias lawv tsim txiaj uas yuav poob koob vim yog Yexus lub npe.”​—Tubtxib Tes Haujlwm 5:41.

¹⁹ Niaj hnub no los Yehauvas cov tibneeg yeej zoo siab hlo thev tej kev tsim txom uas lawv raug vim yog Yexus lub npe. (Nyeem Yakaunpau 1:2-4.) Peb los kuj zoo li cov tubtxib thaum ub thiab, peb yeej tsis zoo siab thaum peb raug luag ntaus lossis raug luag tsim txom. Tiamsis yog peb muab siab npuab Yehauvas ruaj nreeg, nws yuav pab kom peb muaj lub siab loj siab tuab thev taus. Piv txwv li Heelij Doniv (Henryk Dornik) thiab nws tus tij laug. Lub 8 Hlis xyoo 1944, nkawd raug xa mus kaw hauv ib lub yeej kaw neeg. Cov uas muab nkawd tsim txom hais txog nkawd tias: “Yeej yuam tsis tau nkawd ua ib yam dabtsi li. Txawm tua los nkawd yeej zoo siab tuag.” Heelij piav tias: “Kuv yeej tsis xav tuag, qhov uas kuv ua siab tawv thev kev tsim txom thiab muab siab npuab Yehauvas ua rau kuv nyob kaj siab lug.” Nws hais ntxiv tias: “Qhov uas kuv thov Vajtswv tsis tseg tsis tu pab tau kuv nyob ze Yehauvas. Yehauvas yeej pab kuv txhua zaus uas kuv thov nws.”

20. Vim li cas peb ho zoo siab teev tiam “tus Vajtswv uas muaj kev zoo siab”?

²⁰ Thaum peb ua tau haum “tus Vajtswv uas muaj kev zoo siab” ces txawm peb yuav raug tsim txom, raug peb tsev neeg tawm tsam, raug mob raug nkeeg, lossis peb laus zuj zus lawm los, peb yuav nyob kaj siab lug. (1 Timaute 1:11, NW) Peb kuj nyob kaj siab lug vim peb tus Vajtswv uas “tsis txawj dag” tau cog tseg ntau yam zoo rau peb. (Titau 1:2) Thaum muaj raws li tej uas Yehauvas tau cog tseg rau peb lawd, peb yuav tsis nco qab txog tej teeb meem uas peb niaj hnub muaj tamsim no lawm. Tej uas Yehauvas tau cog tseg hauv lub Vaj Kaj Siab yuav zoo tshaj tej uas peb lub siab xav tau. Thaum ntawd peb “yuav zoo siab xyiv fab rau qhov uas [peb] vam meej nplua mias.”​—Ntawv Nkauj 37:11.