1, 2. (1) Yehauvas coj txawv tej tibneeg uas muaj hwjchim li cas? (2) Zaj no peb yuav kawm txog dabtsi?

COV tibneeg uas muaj hwjchim yeej tswj rawv lossis quab yuam tej pejxeem tiamsis Yehauvas tsis zoo li ntawd. (Mathai 20:25; Laj Lim Tswvyim 8:9) Txawm nws yog tus uas muaj hwjchim loj kawg nkaus los, nws tseem khuvleej tibneeg thiab txawj xav heev. Nws muaj lub siab zoo, to taub tej uas peb xav, thiab paub tej uas peb cheem tsum. Nws nco ntsoov tias peb yog neeg txhaum, muaj ntau yam peb ua tsis tau. Yog li ntawd, nws yeej tsis kom peb ua ib yam dabtsi uas peb ua tsis tau.​—Ntawv Nkauj 103:13, 14

² Phau Vajlugkub qhia rau peb tias Yehauvas paub nws cov tibneeg zoo heev. Cia peb kawm seb: (1) Yehauvas khuvleej tus tub hluas Xamuyee li cas nws thiaj pab Xamuyee cev lus txiav txim rau tus pov thawj hlob Eli. (2) Yehauvas ua siab ntev rau Mauxe li cas thaum Mauxe tsis kam coj haiv neeg Yixayee tawm hauv tebchaws Iyi mus. Thiab (3) Yehauvas paub cawm cov Yixayee li  cas thaum lawv tawm hauv tebchaws Iyi mus. Tej uas Yehauvas tau ua no qhia li cas rau peb txog nws, thiab peb yuav xyaum nws li cas?

3. Muaj ib hmos tau muaj li cas rau Xamuyee, thiab ua rau peb xav nug li cas? (Saib thawj daim duab hauv zaj no.)

³ Thaum Xamuyee tseem yau, nws twb mus ua Yehauvas tes haujlwm hauv lub tsev ntaub lawm. (1 Xamuyee 3:1) Muaj ib hmos thaum Xamuyee tseem pw, nws txawm hnov ib lub suab hu nws. * (Saib cov lus hauv qab taw qhia.) (Nyeem 1 Xamuyee 3:2-10.) Xamuyee xav tias ntshe yog Eli hu, nws thiaj sawv tsees khiav khiav mus hais rau Eli tias: “Kuv nyob noʹos, koj hu kuv.” Tiamsis Eli teb tias: “Kuv tsis tau hu koj.” Muaj li no 2 zaug ntxiv, Eli thiaj paub tias Yehauvas yog tus uas hu Xamuyee. Eli qhia rau Xamuyee tias yog nws rov hnov lub suab hu, nws yuav teb li cas. Ua li cas thaum thawj, Yehauvas ho tsis qhia kiag rau Xamuyee tias nws yog tus hu Xamuyee? Phau Vajlugkub tsis qhia txog qhov ntawd. Tiamsis tej zaum Yehauvas ua li ntawd vim nws khuvleej Xamuyee thiab paub tias Xamuyee xav li cas.

4, 5. (1) Thaum Yehauvas kom Xamuyee mus cev lus rau Eli, Xamuyee ua li cas xwb? (2) Zaj no qhia li cas rau peb txog Yehauvas?

⁴ Nyeem 1 Xamuyee 3:11-18. Yehauvas Txoj Kevcai sam hwm kom menyuam yuav tsum hwm tej laus, hajyam hwm cov uas ua thawj. (Khiav Dim 22:28; Levi Tej Kevcai 19:32) Vim li no thiaj tsis yoojyim rau Xamuyee mus cev Vajtswv cov lus txiav txim rau Eli. Phau Vajlugkub hais tias Xamuyee “ntshai tsis kav hais zaj yog toog ntawd rau Eli.” Tiamsis Vajtswv hu Xamuyee li ntawd Eli thiaj paub tseeb tias Nws yog tus uas txib Xamuyee cev lus. Eli thiaj kom Xamuyee qhia txhua yam uas Yehauvas tau hais rau Eli tsis txhob zais kiag li. Xamuyee thiaj qhia “txhua yam rau Eli.”

⁵ Cov lus uas Xamuyee muab cev rau Eli ntawd tsis yog ib co lus tshiab rau qhov Vajtswv twb txib lwm tus cev cov lus ntawd rau Eli dua lawm. (1 Xamuyee 2:27-36) Zaj no pab peb pom tias Yehauvas khuvleej Xamuyee heev thiab muaj tswvyim kawg li.

6. Qhov uas Vajtswv tau pab Xamuyee qhia li cas rau peb?

⁶ Koj puas yog ib tug hluas? Tej uas Yehauvas tau ua pab Xamuyee no qhia tias Yehauvas yeej to taub koj tej teeb meem thiab koj tej kev xav. Tej zaum koj kuj yog ib tug neeg txaj muag heev, tsis kav mus qhia Vajlugkub rau cov laus lossis tsis kav coj txawv tej npoj. Nco ntsoov tias Yehauvas yeej xav pab koj. Cia li thov Yehauvas es qhia txhua yam hauv koj siab rau nws. (Ntawv Nkauj 62:8) Ua tib zoo xav txog cov hluas uas zoo li Xamuyee hauv phau Vajlugkub. Tham nrog cov kwvtij nkauj muam, tsis hais cov laus cov hluas, uas twb peem dhau tej teeb meem zoo li tej uas koj raug. Tej zaum lawv yuav qhia koj seb Yehauvas tau pab lawv li cas.

7, 8. Yehauvas tau ua siab ntev rau Mauxe li cas?

⁷ Thaum Mauxe muaj 80 xyoo, Yehauvas txib nws mus tso haiv neeg Yixayee dim cev qhev hauv tebchaws Iyi. (Khiav Dim 3:10) No yog ib tes haujlwm nyuaj heev. Ntshe Mauxe tsis xav tias nws yuav ua tau, rau qhov nws tsuas yog ib tug neeg yug yaj hauv tebchaws Midee xwb. Nws yug yaj tau 40 xyoo. Vim li no Mauxe thiaj teb tias: “Kuv yog leejtwg es yuav mus cuag tau Falau thiab coj cov Yixayee tawm hauv Iyi tebchaws mus?” Yehauvas thiaj txhawb Mauxe zog tias: “Kuv yuav nrog nraim koj.” (Khiav Dim 3:11, 12) Yehauvas kuj cog lus rau Mauxe tias Yixayee cov txwj laus “yuav mloog” nws lus. Txawm li ntawd los, Mauxe tseem hais tias: “Ntshai lawv yuav tsis ntseeg kuv thiab tsis quav ntsej tej uas kuv hais.” (Khiav Dim 3:18; 4:1) Mauxe hais li ntawd ces yog nws hais rau Yehauvas tias Yehauvas tsis paub! Tiamsis Yehauvas ua siab ntev rau Mauxe. Nws tseem muab hwjchim rau Mauxe ua tau txujci thiab. Mauxe yog thawj tug tibneeg hauv phau Vajlugkub uas muaj hwjchim ua tau txujci.​—Khiav Dim 4:2-9, 21.

⁸ Txawm Yehauvas twb ua npaum ntawd los, Mauxe tseem tsis kam mus qees. Nws tseem yig tias nws yog ib tug uas ncauj lus tsawg hais tsis tau lus npliag. Yog li ntawd, Yehauvas thiaj hais rau Mauxe tias: “Kuv yuav nyob ntawm koj qhov ncauj thiab kuv yuav qhia lus rau koj hais.” Mauxe puas kam mus lawd? Nws tseem tsis kam thiab. Mauxe thov kom Yehauvas txib lwm tus mus. Tamsim ntawd Yehauvas thiaj npau taws rau Mauxe. Txawm li ntawd los, Yehauvas tseem ua siab ntev rau Mauxe. Nws thiaj txib Aloo ua Mauxe tus cev lus.​—Khiav Dim 4:10-16.

9. Qhov uas Yehauvas ua siab ntev thiab ua tib zoo hais Mauxe pab tau nws ua ib tug thawj coj zoo li cas?

⁹ Qhov uas Yehauvas ua siab ntev rau Mauxe qhia li cas rau peb? Yehauvas yog tus uas muaj hwjchim loj kawg nkaus, yog nws xav yuam Mauxe ua li nws hais los yeej tau,  tiamsis Yehauvas tsis ua li ntawd. Yehauvas ua siab ntev thiab ua tib zoo hais Mauxe. Yehauvas paub tias Mauxe yog ib tug neeg txo hwjchim thiab muaj siab mos siab muag heev nws thiaj txhawb Mauxe tias nws yuav nrog nraim Mauxe. Qhov no puas txhawb tau Mauxe? Txhawb tau heev. Mauxe ua tau ib tug thawj coj zoo heev rau Vajtswv cov tibneeg. Mauxe ua siab mos siab muag thiab khuvleej lwm tus, ib yam li Yehauvas tau ua rau nws.​—Xwm Txheej Taug Kev 12:3.

10. Yog peb ua siab ntev rau lwm tus li Yehauvas, pab tau peb li cas?

¹⁰ Zaj no qhia li cas rau peb? Yog koj muaj pojniam, muaj menyuam, lossis yog ib tug txwj laus ces koj muaj tes haujlwm saib xyuas lwm tus. Tseem ceeb rau koj xyaum Yehauvas es ua siab zoo thiab ua siab ntev rau koj tus pojniam, koj cov menyuam, thiab cov hauv koj lub koom txoos. (Khaulauxi 3:19-21; 1 Petus 5:1-3) Yog koj xyaum Vajtswv Yehauvas thiab Yexus Khetos nkawd, lwm tus yuav tsis ntshai los cuag koj thiab nrog koj tham, thiab koj yuav txhawb tau lawv lub zog. (Mathai 11:28, 29) Koj kuj yuav tso tau ib tug qauv zoo heev rau lawv xyaum thiab.​—Henplais 13:7.

11, 12. Thaum Yehauvas coj cov Yixayee tawm hauv tebchaws Iyi mus, nws tau ua li cas lawv thiaj mus tso siab plhuav?

¹¹ Xyoo 1513 ua ntej Yexus, thaum cov Yixayee tawm hauv tebchaws Iyi mus, tej zaum lawv muaj tshaj li 3 plhom leej. Ib co yog cov menyuam thiab cov laus. Ib co yog cov uas muaj mob muaj nkeeg thiab cev tsis meej xeeb. Yuav tsum yog ib tug Thawj Coj uas txawj xav heev thiaj saib xyuas tau cov neeg ntawd. Yehauvas yog tus Thawj Coj zoo li ntawd, nws thiaj siv Mauxe coj nws cov tibneeg. Vim li no, thaum cov Yixayee tawm lawv vaj lawv tsev hauv tebchaws Iyi mus, lawv thiaj mus tso siab plhuav.​—Ntawv Nkauj 78:52, 53.

¹² Ua li cas Yehauvas cov tibneeg ho mus tso siab plhuav? Phau Vajlugkub qhia tias thaum Yehauvas coj lawv tawm hauv tebchaws Iyi mus, nws coj lawv mus ua “tej xwbxeem” thiab “ua kabsab niab.” (Khiav Dim 6:26, VTL) Vim lawv tawm mus li no, lawv thiaj pom meej tias Vajtswv yuav tsom kwm lawv thiab yuav tiv thaiv lawv. Thaum nruab hnub Yehauvas muab ib “tauv huab coj lawv” thiab “hmo ntuj nws ua nplaim taws ci coj lawv ib hmos kaj ntug.” (Ntawv Nkauj 78:14) Haiv neeg Yixayee yuav tsum tau Vajtswv pab. Vim li cas? Cia peb kawm ntxiv seb.

13, 14. (1) Thaum cov Yixayee mus txog Hiavtxwv Liab, Yehauvas tau pab lawv li cas? (2) Yehauvas ua li cas los qhia tias nws muaj hwjchim dua cov Iyi?

 ¹³ Nyeem Khiav Dim 14:19-22. Muab xav tias koj nrog cov Yixayee tawm hauv tebchaws Iyi mus. Nej mus tws kev rau ntawm Hiavtxwv Liab. Iyi cov tub rog twb caum tuaj yuav cuag nej. Ua ciav nej txawm pom tus ncej huab uas ua nej ntej rov mus nyob tom nej qub qab nyob ntawm Iyi cov tub rog thiab nej ntu nruab nrab. Cov Iyi pab tub rog sab tsaus ntuj nti, tiamsis nej sab pom kev lam lug! Nej txawm pom Mauxe tsa nws txhais tes rau saum hiavtxwv mas Yehauvas ua rau cua ntsawj hlob hlob sab hnub tuaj tuaj ntsawj dej hiavtxwv ua rau hiavtxwv qhuav qhawv muab dej faib kiag rau ob sab. Koj thiab koj tsev neeg, nej tej tsiaj ntxhu nrog rau sawvdaws huvsi taug kev qhuav qhawv hauv nruab nrab hiavtxwv ua kab sab niab mus rau sab dej tim ub. Koj xav twjywm tias ua cas cov av twb tsis ntub li, qhuav qhawv xwb. Tus mus tsis taus los kuj maj mam mus txog rau sab tid huvsi.

¹⁴ Nyeem Khiav Dim 14:23, 26-30. Falau khav theeb heev thiab tsab hwjchim kawg li. Nws thiaj coj hlo nws pab tub rog raws nej qab rau hauv hiavtxwv. Thaum ntawd Mauxe txawm rov tsa tes rau saum hiavtxwv dua, dej hiavtxwv thiaj nphau los nyab kiag Falau thiab nws pab tub rog tuag tag, tsis tshuav ib tug li!​—Khiav Dim 15:8-10.

15. Qhov uas Yehauvas cawm cov Yixayee qhia li cas rau peb txog Yehauvas?

¹⁵ Tej no qhia ntxiv rau peb tias thaum Yehauvas ua ib yam dabtsi, nws tsis lam tau lam  ua, tiamsis nws ua tib zoo xav ua ntej tso nws mam ua. (1 Khaulee 14:33) Yog li ntawd, peb thiaj tso siab plhuav rau nws, tsis ntshai ib yam xwm txheej phem dabtsi. Yehauvas zoo li tus tswv yaj uas hlub thiab ua tib zoo tu nws pab yaj. Yehauvas tsis pub ib yam xwm txheej dabtsi los raug nws cov tibneeg thiab nws tiv thaiv lawv ntawm lawv tej yeeb ncuab. Qhov no nplig tau peb siab heev thiab pab tau peb tso siab plhuav rau nws vim hnub kawg twb los ze zuj zus lawm.​—Paj Lug 1:33.

16. Qhov ua Yehauvas tau pab nws cov neeg txheej thaud pab tau peb li cas?

¹⁶ Niaj hnub nimno los Yehauvas yeej tseem tsom kwm nws cov tibneeg. Nws pab lawv muaj kev sib raug zoo nrog nws, thiab nws tiv thaiv lawv ntawm lawv tej yeeb ncuab. Thaum txojkev ceeblaj txom nyem loj kawg li los txog, nws kuj yuav ua ib yam li ntawd. (Qhia Tshwm 7:9, 10) Lub sijhawm ntawd, Vajtswv cov tibneeg, tsis hais tus laus tus hluas, tus noj qab nyob zoo, thiab tus cev tsis meej xeeb los yuav tsis ceeb tsis ntshai. * (Saib cov lus hauv qab taw qhia.) Lawv tsuas muaj yuav zoo siab xyiv fab lawm xwb! Lub sijhawm ntawd lawv yuav ua li Yexus tau hais no: “Cia li sawv ntsug thiab tsa taubhau, vim qhov uas txhiv nej dim los ze lawm.” (Luka 21:28) Txawm lub sijhawm ntawd Vajtswv cov tibneeg yuav raug Kau, uas yog ib tsoom tebchaws, tawm tsam los, lawv yuav tso siab plhuav rau Yehauvas. Txawm Kau muaj zog tshaj Falau los, lawv yuav tsis ntshai vim Yehauvas yuav tiv thaiv lawv. (Exekhee 38:2, 14-16) Vim li cas lawv thiaj tso siab tau rau Yehauvas? Rau qhov Yehauvas tseem yog tus qub, nws tseem yog tus Cawmseej uas hlub thiab mob siab nws cov tibneeg.​—Yaxaya 26:3, 20.

17. (1) Thaum peb kawm txog qhov uas Yehauvas tsom kwm nws cov tibneeg, peb yuav tsum ua li cas thiaj pab tau peb? (2) Zaj tom ntej, peb yuav kawm txog dabtsi?

¹⁷ Hauv zaj no, peb kawm tias Yehauvas khuvleej thiab ua siab zoo rau nws cov tibneeg. Nws saib xyuas lawv, coj lawv, thiab cawm lawv dim. Thaum koj kawm txog tej uas Yehauvas tau ua los pab nws cov tibneeg txheej thaud, ua tib zoo xav zoo zoo seb tej ntawd qhia li cas txog Yehauvas xwv koj thiaj kawm tau tej yam tshiab. Yog koj ua tib zoo kawm txog Yehauvas tej yeeb yam ces yuav pab tau koj yimhuab hlub nws thiab yimhuab ntseeg nws. Zaj tom ntej, peb yuav kawm seb peb yuav xyaum Yehauvas li cas peb thiaj xam pom cov hauv peb tsev neeg, cov hauv peb lub koom txoos, thiab cov hauv peb koog.