1. Yog peb tsis ceev faj lub qab ntuj no tej cwj pwm yuav ua rau peb xav li cas?

VIM LI CAS ho nyuaj ua luaj rau peb ua raws li tej uas peb kawm hauv Vajtswv Txojlus? Ib qho yog vim peb yuav tau txo hwjchim peb thiaj ua tau qhov yog. Nyob rau tiam kawg no yeej tsis yoojyim ua neeg txo hwjchim. Tej tibneeg uas nyob puag ncig peb tsuas “xam pom lawv tus kheej xwb, ntshaw nyiaj txiag, khav theeb, muab hlob,” thiab “tsis tswj lub siab.” (2 Timaute 3:1-3) Peb yog Vajtswv cov tub qhe, peb yeej paub tias tej cwj pwm no tsis zoo. Txawm li ntawd los tej zaum peb yuav xav tias: ‘Puas tsim nyog rau kuv xam pom lwm tus ua ntej tiag? Yog kuv ua neeg txo hwjchim, luag puas yuav saib taus kuv?’ Ua cas zoo li cov neeg ntawd ho ua neej vam meej ntxhias nyob kaj siab lug thiab. (Ntawv Nkauj 37:1; 73:3; Luka 9:48) Tiamsis yog peb coj li lub qab ntuj no ces peb txojkev sib raug zoo nrog peb cov kwvtij yuav ploj zuj zus mus, thiab peb yuav tsis coj li ib tug Khixatia lawm. Yog peb kawm Vajtswv cov tub qhe uas txo hwjchim thiab xyaum coj li lawv, peb lub neej thiaj vam meej.

2. Peb xav paub dabtsi txog Vajtswv cov tub qhe yav thaud?

 ² Dabtsi ho pab tau Vajtswv cov tub qhe yav thaud nrog nws sib raug zoo? Lawv tau ua li cas thiaj haum Vajtswv siab? Ua cas lawv ho muaj lub peevxwm ua tau qhov yog? Thaum peb nyeem txog lawv tej qauv hauv phau Vajlugkub thiab ua tib zoo xav txog tej uas peb nyeem ces peb yuav muaj kev ntseeg ruaj.

3, 4. (1) Yehauvas tej lus qhuab ntuas thiab tej kev cob qhia muaj nyob rau qhovtwg? (2) Yog paub xwb puas pab tau peb txojkev ntseeg ruaj khov? Piav seb.

³ Yehauvas pub txhua yam rau peb kom peb txojkev ntseeg ruaj khov. Nws tej lus qhuab ntuas thiab tej kev cob qhia muaj nyob rau hauv phau Vajlugkub, hauv peb tej ntaub ntawv Khixatia, hauv jw.org, hauv Yehauvas Cov Timkhawv Tshooj T.V., tom peb tej kev sib txoos, thiab tom peb tej rooj sib txoos. Tiamsis Yexus piav tias yog peb paub xwb zoo tsis txaus. Yexus hais tias: “Kuv cov mov yog ua raws li tus uas txib kuv los lub siab nyiam thiab ua nws tes haujlwm kom tiav.”​—Yauhas 4:34.

⁴ Qhov uas ua raws li Vajtswv lub siab nyiam tseem ceeb npaum li cas? Yexus hais tias tseem ceeb npaum li tej zaub mov. Yog peb noj tej zaub tej mov zoo ces peb lub cev yuav muaj zog. Ib yam li ntawd, yog peb ua raws li Vajtswv lub siab nyiam ces peb yuav muaj kev kaj siab thiab peb txojkev ntseeg yuav ruaj khov. Puas tau muaj ib zaug uas koj sib ntsib mus qhia Vajlugkub es koj sab heev tiamsis thaum koj mus qhia Vajlugkub los txog ua cas ua rau koj zoo siab thiab tsis nco qab nkees li lawm?

5. Yog peb muaj tswvyim pab tau peb li cas?

⁵ Thaum peb ua tej uas Yehauvas hais kom peb ua thiaj yog peb muaj tswvyim. (Yakaunpau 3:13) Cov uas muaj tswvyim yuav tau txais ntau yam zoo. “Txhua yam uas koj ntshaw tsis muaj ib yam zoo cuag li tswvyim. . . . Tswvyim yog tsob ntoo uas pub txojsia rau cov uas tuav rawv nws, cov uas tuav rawv tswvyim cia ruaj, luag yuav hu tias kaj siab lug.” (Paj Lug 3:13-18) Yexus hais tias: “Yog nej paub li no thiab ua raws nraim mas nej yuav nyob kaj siab lug.” (Yauhas 13:17) Yexus cov thwjtim yuav nyob kaj siab lug yog lawv ua raws nraim li tej uas nws kom lawv ua. Lawv yeej ua raws li Yexus tej lus qhia thiab xyaum nws tus qauv txhua hnub.

6. Ua li cas peb yuav tau tas zog ua raws li tej peb kawm?

⁶ Niaj hnub no los, peb yuav tau tas zog ua raws li tej peb kawm. Zoo li tus neeg kho tsheb, txawm nws muaj tej twj kho tsheb, muaj tej khoom kho tsheb, thiab paub kho tsheb heev los, yog nws tsis siv tej ntawd los pab nws ces nws yeej kho tsis tau tsheb li. Tsis tas li ntawd xwb, txawm nws twb kho tsheb tau ntau lub xyoos lawm los, yog nws tsis niaj hnub siv tej nws tau kawm ces nws kuj yuav kho tsis tau tsheb thiab. Peb los kuj zoo ib yam li ntawd thiab, thaum peb xub kawm qhov tseeb, peb yeej zoo siab hlo ua raws nraim li tej uas peb tau nyeem hauv phau Vajlugkub. Tiamsis yuav kom peb nyob kaj siab lug, peb yuav tau muab tej uas Yehauvas qhia peb siv ua peb lub neej txhua hnub.

7. Peb yuav tau ua li cas cov qauv hauv phau Vajlugkub thiaj pab tau peb?

⁷ Muaj tej zaud yuav nyuaj heev rau peb ua neeg txo hwjchim. Hauv zaj no, peb yuav kawm seb cov neeg ncaj ncees txheej thaum ub tau txo hwjchim li cas. Peb kuj yuav kawm txog tej yam uas qhia tias peb txo hwjchim. Peb yuav tau ua tib zoo xav zoo zoo txog tej uas peb kawm thiab muab tej ntawd coj los siv ua peb lub neej txhua hnub.

8, 9. Tubtxib Tes Haujlwm 14:8-15 pab tau peb pom tias Povlauj txo hwjchim npaum li cas? (Saib thawj daim duab hauv zaj no.)

⁸ Vajtswv xav kom txhua leej txhua tus “dim thiab paub txojkev tseeb.” (1 Timaute 2:4) Xav txog txhua tus uas tseem tsis tau los paub qhov tseeb, koj saib lawv zoo li cas xwb? Tus tubtxib Povlauj tshaj tawm qhov tseeb rau cov Yudai uas twb paub Yehauvas lawd thiab rau cov uas pe hawm tej vajtswv cuav huvsi. Qhov uas Povlauj tshaj tawm txoj xov zoo rau sawvdaws li no tau sim seb nws puas txo hwjchim tiag.

⁹ Thaum Povlauj mus tshaj tawm txoj xov zoo zaum 1, Povlauj thiab Npananpa nkawd mus rau lub nroog Lixatha. Cov neeg Likhaunia uas nyob hauv lub nroog ntawd saib Povlauj thiab Npananpa nkawd zoo li tej timtswv. Lawv thiaj muab nkawd tis npe raws lawv ob tug vajtswv cuav, Xu thiab Hawme. Povlauj thiab Npananpa xav li cas xwb? Nkawd yeej tsis nyiam hlo li. Nkawd thiaj dua rhe nkawd tej ris tsho thiab hais tias: “Nej ua dabtsi li no? Wb kuj yog neeg thooj ib yam li nej xwb.” (Tubtxib Tes Haujlwm 14:8-15) Txawm nkawd tsis raug tsim txom li thaum mus rau 2 lub nroog tas los no los, nkawd yeej tsis txaus siab rau qhov uas cov neeg Likhaunia muab nkawd hu li ntawd. Thiab nkawd tsis xav tias yuav pab tau nkawd qhia txoj xov zoo.

10. Ua li cas Povlauj thiab Npananpa nkawd tsis xav tias nkawd zoo dua cov Likhaunia?

¹⁰ Thaum Povlauj thiab Npananpa nkawd hais tias nkawd kuj yog neeg ib yam li cov Likhaunia, twb yog nkawd xav kom lawv paub tias nkawd kuj yog neeg txhaum thiab xwb. Nkawd tsis yog hais tias nkawd txojkev pe hawm zoo ib yam li lawv txoj. Povlauj thiab Npananpa nkawd yog ob tug uas raug Vajtswv cais los tshaj tawm txoj xov zoo mus txawv tebchaws. (Tubtxib Tes Haujlwm 13:2) Nkawd yog ob tug uas Vajtswv lub hwj huam tau xaiv tseg thiab nkawd muaj kev vam yuav tau mus nyob saum ntuj. Txawm li ntawd los, nkawd tsis khav tias nkawd zoo dua cov neeg Likhaunia. Nkawd paub tias yog cov Likhaunia txais yuav txoj xov zoo, lawv kuj yuav muaj feem mus saum ntuj ib yam thiab.

11. Thaum peb mus tshaj tawm, peb yuav tau txo hwjchim li Povlauj li cas?

¹¹ Dabtsi yuav qhia tias peb txo hwjchim li Povlauj? Peb tsis xav tias peb zoo dua lwm tus vim peb tshaj tawm txoj xov zoo los yog vim tej uas Yehauvas pab peb ua tau. Yuav kom peb paub seb peb yog tus neeg zoo li cas, zoo rau peb nug li no: ‘Kuv xav li cas txog cov uas nyob hauv kuv koog? Kuv puas xaiv qho hom neeg ntsej muag?’ Yehauvas Cov Timkhawv thoob ntiajteb rau siab ntso nrhiav cov uas xav mloog txoj xov zoo. Txawm muaj tej haiv neeg uas tibneeg saib tsis muaj nqes los, Yehauvas Cov Timkhawv yeej kub siab kawm lawv yam lus los yog lawv tej kevcai. Cov Timkhawv yeej tsis xav tias lawv zoo dua cov uas lawv tshaj tawm txoj xov zoo rau. Lawv zoo siab hlo pab txhua tus li lawv pab tau los txais yuav txoj xov zoo txog lub Nceeg Vaj.

12. Vim li cas peb thiaj paub tias Epafa txhawj txog lwm tus?

¹² Peb kuj qhia tias peb txo hwjchim yog peb thov Vajtswv rau peb cov kwvtij nkauj muam uas “tau txais txojkev ntseeg uas tsim txiaj kawg nkaus ib yam li peb.” (2 Petus 1:1) Epafa tau ua li ntawd. Phau Vajlugkub tsuas hais txog nws 3 zaug xwb. Thaum Povlauj raug kaw hauv Loos, nws sau ntawv mus rau pawg ntseeg hauv Khaulauxi txog Epafa li no: “Nws siv zog thov Vajtswv pab nej tsis tu li kom nej nyob ruaj.” (Khaulauxi 4:12) Epafa paub cov  kwvtij zoo heev thiab mob siab lawv kawg li. Povlauj hais tias nws “raug kaw” nrog Povlauj. Qhov no qhia tias Epafa nws muaj nws ib txojkev nyuaj siab. (Filemoo 23) Txawm li ntawd los, Epafa tseem txhawj txog lwm tus, nco ntsoov thov Vajtswv rau lawv. Peb kuj ua tau ib yam li ntawd. Thaum nws thov Vajtswv rau cov kwvtij nkauj muam, nws tuav lawv npe. Yog peb ua li no yuav pab tau peb cov kwvtij nkauj muam heev. Tej lus thov zoo li no yeej “muaj hwjchim ua tau tiav.”​—2 Khaulee 1:11; Yakaunpau 5:16.

13. Thaum koj thov Vajtswv, koj xyaum tau Epafa li cas?

¹³ Puas muaj ib tug twg uas koj xav thov Vajtswv pab? Koj kuj tuav nws npe thaum koj thov. Tej zaum kuj yog cov phoojywg hauv koj lub koom txoos lossis tej yim uas koj hnov tias muaj kev nyuaj siab lossis raug kev sim siab. Koj kuj thov tau Vajtswv pab cov kwvtij zoo li cov uas hais hauv jw.org. * (Saib cov lus hauv qab taw qhia.) Koj kuj thov Vajtswv pab cov uas muaj ib siab ob qeg, cov uas raug xwm txheej phem lossis raug tsov rog, thiab cov uas txom nyem nyiaj txiag. Muaj coob tus kwvtij nkauj muam uas peb yuav tau thov Vajtswv pab. Thaum peb thov Vajtswv pab lawv qhia tias peb xam pom lawv, tsis yog xam pom peb tus kheej xwb. (Filipi 2:4) Yog peb ua li no, Yehauvas yeej yuav hnov peb tej lus thov.

14. Ua li cas thiaj hais tias Yehauvas yog tus uas ua siab ntev mloog lwm tus?

¹⁴ Ib yam ntxiv uas qhia tias peb txo hwjchim yog ua tib zoo mloog lwm tus. Yakaunpau 1:19 qhia kom peb “yuav tsum maj mloog.” Yehauvas yog tus uas zoo li ntawd. Nws ua tib zoo mloog thaum lwm tus nrog nws tham. (Chiv Keeb 18:32; Yausua 10:14) Mus nyeem Khiav Dim 32:11-14 ua piv txwv. Txawm tsis tas Yehauvas mloog Mauxe los, nws tseem cia Mauxe piav tej uas nyob hauv Mauxe lub siab rau nws mloog. Yog koj no, koj  puas kam mloog ib tug uas tau ua yuam kev yav tas los, thiab tseem ua li nws hais? Txawm tibneeg niaj hnub ua yuam kev los, Yehauvas tseem ua siab ntev mloog cov uas muaj kev ntseeg thov nws.

15. Peb xyaum tau Yehauvas es saib taus lwm tus li cas?

¹⁵ Nug koj tus kheej li no: ‘Yog Yehauvas twb txo hwjchim los mloog tibneeg li nws mloog Aplahas, Lachee, Mauxe, Yausua, Manau-a, Eliya, thiab Hexekhiya lawv, puas tsim nyog kuv ua ib yam li ntawd thiab? Kuv puas saib taus kuv cov kwvtij txhua tus es ua tib zoo mloog lawv thiab ua li lawv hais thiab? Puas muaj ib tug hauv kuv lub koom txoos lossis hauv kuv tsev neeg uas kuv yuav tau yimhuab ua tib zoo mloog? Yog muaj, kuv yuav ua li cas?’​—Chiv Keeb 30:6; Cov Thawj 13:9; 1 Vajntxwv 17:22; 2 Vaj Keeb Kwm 30:20.

16. Vajntxwv Davi ua li cas xwb thaum Sime-i ua saib tsis taus nws?

¹⁶ Yog peb txo hwjchim peb yuav tswj tau peb tus kheej thaum lwm tus ua phem rau peb. (Efexau 4:2) Muaj ib tug qauv zoo heev txog qhov no nyob hauv 2 Xamuyee 16:5-13. (Nyeem.) Sime-i uas yog Vajntxwv Xa-u ib tug txheeb ze cem thiab laim pob zeb rau Davi thiab nws cov tub teg tub taws. Txawm li ntawd los, Davi tsis txwv, nws ua siab ntev thev cia Sime-i nws cem nws. Vim li cas Davi thiaj ua tau siab ntev tswj nws tus kheej? Ntawv Nkauj 3 teb tau lo lus nug no rau peb.

17. Dabtsi pab tau Davi tswj nws tus kheej, thiab peb xyaum tau nws li cas?

¹⁷ Davi sau Ntawv Nkauj 3 rau thaum nws tus tub Axaloo yuav muab nws tua. Lub sijhawm no yog thaum Sime-i tuaj cem thiab laim pob zeb rau Davi, tiamsis Davi ua tau siab tus. Yog vim li cas? Ntawv Nkauj 3:4 hais tias: “Kuv tsa suab thov [Yehauvas], mas nws teb kuv ntawm nws lub roob uas dawb huv tuaj.” Thaum lwm tus ua phem rau peb, peb yuav tau thov Yehauvas li Davi thiab. Yog peb ua li ntawd, Yehauvas yuav pub nws lub hwj huam dawb huv rau peb xwv peb thiaj thev taus. Thaum lwm tus ua phem rau koj, koj puas ua taus siab ntev thiab koj puas zam txim rau nws? Thaum koj raug kev txom nyem, koj puas tso siab tias Yehauvas yuav tsom kwm koj thiab foom koob hmoov rau koj vim nws mob siab koj?

18. Yog peb ua li Yehauvas hais, yuav pab tau peb li cas?

¹⁸ Thaum peb ua raws li Yehauvas siab nyiam, peb yuav muaj tswvyim thiab Yehauvas yuav foom koob hmoov rau peb. Phau Vajlugkub hais tias: “Txhua yam uas koj ntshaw tsis muaj ib yam zoo cuag li tswvyim.” (Paj Lug 8:11, TMZ) Yog yus paub lossis nkag siab txog ib yam dabtsi xwb tsis yog yus txawm yuav muaj tswvyim. Tus neeg ntse thiab muaj tswvyim yog tus uas paub txiav txim siab zoo. Zoo li tej ntsaum, qhov uas lawv paub npaj rau lub caij ntuj no kuj qhia tias lawv muaj tswvyim. (Paj Lug 30:24, 25) Khetos tus uas hu ua “Vajtswv lub tswvyim” yeej ib txwm ua haum Vajtswv siab. (1 Khaulee 1:24; Yauhas 8:29) Vajtswv yuav muab nqe zog rau peb yog peb muaj tswvyim ua raws li nws siab nyiam thiab ua neeg txo hwjchim. (Nyeem Mathai 7:21-23.) Xav seb yuav ua li cas peb thiaj txo tau hwjchim teev tiam Yehauvas ua ke hauv lub koom txoos. Peb yuav tau ua siab ntev thiaj ua tau raws li Yehauvas lub siab nyiam. Yog peb txo hwjchim li ntawd ces yuav pab tau peb muaj kev zoo siab xyiv fab tamsim no thiab mus ib txhiab ib txhis.