1. Raws li Malakis 3:16, Yehauvas tau sau phau ntawv twg tsis tseg tsis tu, thiab nws sau txog dab tsi?

 YEHAUVAS tau sau ib phau ntawv tau ntau txhiab xyoo dhau los lawm. Phau ntawv no ntim tib neeg tej npe nyob rau hauv. Thawj thawj lub npe ces txawm yog Anpees tus uas ib txwm npuab siab rau Yehauvas. b (Lukas 11:50, 51) Txij ntua thaum ntawd los txog niaj hnub niam no, Yehauvas tau txhab tib neeg tej npe rau hauv phau ntawv no zuj zus thiab muaj qas txhiab qas vam lub npe nyob rau hauv lawm. Raws li nyob rau hauv phau Vajlugkub, phau ntawv no hu ua “phau ntawv rau [Yehauvas] khaws tseg,” “phau ntawv uas sau cov neeg uas muaj sia ntev mus ibtxhis lawm tej npe,” thiab phau ntawv uas tau txoj sia. Nyob rau hauv zaj kawm no, peb yuav muab piav tias yog phau ntawv uas tau txoj sia.​—Nyeem Malakis 3:16; Tshwmsim 3:5; 17:8.

2. Leej twg thiaj muaj npe nyob rau hauv phau ntawv uas tau txoj sia, thiab yuav ua li cas peb lub npe thiaj muaj nyob rau hauv?

² Phau ntawv no muaj txhua tus uas teev tiam Yehauvas lub npe nyob rau hauv vim lawv hwm nws thiab saib taus nws lub npe. Lawv yuav tau txais txoj sia ntev dhawv mus ib txhis. Niaj hnub niam no, yog peb nrog Yehauvas sib raug zoo ces peb yuav muaj npe rau hauv phau ntawv uas tau txoj sia, yeeb vim yog Yexus Khetos tus nqe txhiv. (Yauhas 3:16, 36) Txawm peb yuav mus rau saum ntuj ceeb tsheej los sis nyob hauv lub ntiaj teb no, peb yeej xav kom peb muaj npe suam nyob rau hauv phau ntawv ntawd.

3-4. (1) Piav seb peb puas nyob tau mus ib txhis yog tias peb twb muaj npe nyob rau hauv phau ntawv uas tau txoj sia. (2) Nyob rau hauv zaj kawm no thiab zaj txuas ntxiv tom ntej yuav piav txog dab tsi?

 ³ Puas yog txhua tus uas muaj npe nyob rau hauv phau ntawv uas tau txoj sia yuav tau nyob mus ib txhis? Cia peb mam mus saib seb Yehauvas hais li cas rau Mauxes nyob rau hauv Khiav Dim 32:33. Yehauvas hais tias: “Cov twg ua txhaum rau kuv, cov ntawd thiaj yog cov uas yuav raug rho npe tawm hauv kuv phau ntawv mus xwb.” Raws li hais no, txawm cov muaj npe nyob rau hauv phau ntawv lawm los yeej yuav muab rho tawm tau ib yam nkaus. Zoo li Yehauvas xuas cwj mem qhuav kos neeg cov npe thiab muab txhuam tau tawm. (Tshwmsim 3:5) Cia peb ua npaum li peb ua tau xwv Yehauvas thiaj muab tus cwj mem los sau peb lub npe rau hauv phau ntawv uas tau txoj sia.

⁴ Nyob rau hauv zaj kawm no thiab zaj txuas ntxiv tom ntej, yuav teb cov lus nug raws li hais no: Nyob hauv phau Vajlugkub hais li cas txog cov neeg uas muaj npe nyob rau hauv phau ntawv uas tau txoj sia thiab hais li cas txog cov uas tsis muaj npe rau hauv phau ntawv? Thaum twg cov neeg uas muaj npe nyob rau hauv phau ntawv mam li tau txais txoj sia nyob mus ib txhis? Ua li cov neeg nruam sim lawm es tsis tau paub Yehauvas, lawv puas yuav muaj npe rau hauv phau ntawv uas tau txoj sia?

LEEJ TWG THIAJ MUAJ NPE?

5-6. (1) Raws li Filipis 4:3, leej twg yog cov muaj npe nyob rau hauv phau ntawv uas tau txoj sia? (2) Thaum twg mam li muab cwj mem los sau lawv tej npe rau hauv phau ntawv uas tau txoj sia?

⁵ Leej twg yog cov muaj npe nyob rau hauv phau ntawv uas tau txoj sia? Cia peb mam li mus piav txog tsib pab tib neeg. Ib co yuav muaj npe nyob rau hauv phau ntawv uas tau txoj sia, hos ib co yuav tsis muaj npe nyob rau hauv.

⁶ Thawj pab tib neeg yog cov uas tau xaiv mus nrog Yexus ua nom ua tswv saum ntuj ceeb tsheej. Lawv txhua tus yeej muaj npe nyob rau hauv  phau ntawv uas tau txoj sia. Tus tub txib Paulus thiaj hais tias cov uas nrog nws ua hauj lwm nyob hauv lub nroog Filipis, lawv yog cov xaiv tseg mus nrog Yexus ua nom ua tswv kav, puav leej muaj npe nyob rau hauv phau ntawv uas tau txoj sia. (Nyeem Filipis 4:3.) Yuav kom lawv muaj npe nyob rau hauv phau ntawv ntawd mus li, lawv yuav tau tuav rawv lawv txoj kev ntseeg. Tom qab luag nias hom thawj tag rau lawv ces yuav muab tus cwj mem los sau lawv tej npe rau hauv phau ntawv uas tau txoj sia. Yuav muaj yam li no ua ntej lawv nruam sim los sis ua ntej lub sij hawm uas muaj kev txom nyem loj kawg nkaus pib.​—Tshwmsim 7:3.

7. Raws li Tshwmsim 7:16, 17, thaum twg pab neeg coob coob suav tsis txheeb tej npe thiaj li siav nyob rau hauv phau ntawv uas tau txoj sia?

⁷ Pab ob yog cov neeg coob coob suav tsis txheeb uas yog lwm pab yaj. Lawv txhua tus yeej muaj npe nyob rau hauv phau ntawv uas tau txoj sia. Tom qab Amankedoos lawm los, lawv tej npe haj tseem nyob rau hauv phau ntawv uas tau txoj sia. (Tshwmsim 7:14) Yexus hais tias, cov neeg uas coj cwj pwm li pab yaj no “yuav tau txoj sia ib txhis tsis kawg.” (Mathais 25:46) Txawm tias lawv peem dhau Amankedoos lawm los, lawv haj tseem tsis tau tau txoj sia mus ib txhis thiab lawv tej npe tseem xuas tus cwj mem qhuav sau rau hauv phau ntawv uas tau txoj sia. Nyob rau ncua sij hawm thaum Yexus Kav 1,000 Xyoo, Yexus yuav coj lawv mus haus tej qhov dej txhawv uas cawm neeg txoj sia. Cov uas mloog Khetos qhia thiab suav hais tias ua ncaj rau Yehauvas, yuav muab tus cwj mem los sau lawv tej npe rau hauv phau ntawv uas tau txoj sia.​—Nyeem Tshwmsim 7:16, 17.

8. Cov uas tsis muaj npe sau rau hauv phau ntawv uas tau txoj sia yog leej twg, thiab lawv yuav raug li cas?

⁸ Pab peb yog cov coj cwj pwm yam li cov tshis uas yuav raug puas tsuaj rau thaum Amankedoos. Lawv tej npe yuav tsis muaj nyob rau hauv phau ntawv uas tau txoj sia. Yexus hais tias lawv “yuav raug rhuav tshem mus ib txhis.” (Mathais 25:46) Paulus qhia tias “lawv yuav raug txim yog qhov uas lawv puam tsuaj mus ib txhis.” (2 Thexalaunikes 1:9; 2 Petus 2:9) Tsis tas li ntawd, cov neeg uas txhob txwm thuam lub hwj huam dawb huv yuav raug puam tsuaj. Yehauvas yuav tsis tsa lawv sawv rov qab los. (Mathais 12:32; Malakaus 3:28, 29; Henplais 6:4-6) Cia peb mus piav txog ob pab tib neeg uas Yehauvas yuav tsa sawv los nyob rau hauv lub ntiaj teb no.

COV NEEG UAS YEHAUVAS TSA

9. Raws li Tes Haujlwm 24:15, muaj ob pab tib neeg twg uas Yehauvas yuav tsa thiab ob pab neeg no ho zoo tsis sib xws li cas?

⁹ Nyob rau hauv phau Vajlugkub hais txog ob pab tib neeg uas Yehauvas yuav tsa sawv rov los nyob hauv lub ntiaj teb no mus ib txhis. Lawv yuav yog “cov ncaj ncees thiab cov tsis ncaj.” (Nyeem Tes Haujlwm 24:15.) “Cov ncaj ncees” yog cov kub siab lug teev tiam Yehauvas thaum lawv tseem ua neej nyob. Hos “cov tsis ncaj” yog cov tsis teev tiam Yehauvas, lawv thiaj tsis paub ua ncaj. Yog Yehauvas twb tsa ob pab no sawv rov los, ua li lawv tej npe puas nyob rau hauv phau ntawv uas tau txoj sia? Cia peb mam li mus piav txog ib pab zuj zus xwv peb thiaj paub.

10. Vim li cas Yehauvas yuav tsa “cov ncaj ncees,” thiab lawv yuav tau txais tej koob hmoov twg? (Mus saib zaj “Tej Uas Peb Xav Paub” txog qhov uas yuav tsa neeg sawv rov los nyob hauv ntiaj teb.)

¹⁰ Pab plaub yog “cov ncaj ncees.” Thaum lawv tseem ua neej nyob, lawv tej npe twb nyob rau hauv phau ntawv uas tau txoj sia lawm. Txawm lawv nruam sim lawm los, lawv tej npe haj tseem nyob rau hauv phau ntawv vim lawv haj tseem “ciaj” hauv Yehauvas lub cim xeeb. Yehauvas “yog cov neeg ciaj tus Vajtswv, nws tsis yog cov neeg tuag tus Vajtswv.” (Lukas 20:38) Yog li ntawd thaum Yehauvas tsa lawv sawv rov los muaj sia dua hauv ntiaj teb no, lawv tej npe haj tseem yog xuas tus cwj mem qhuav sau rau hauv phau ntawv uas tau txoj sia. (Lukas 14:14) Tsis tas li ntawd, ib txhia yuav tau ua “thawj  kav thoob plaws lub ntiaj teb” no.​—Phau Ntawv Nkauj 45:16.

11. “Cov tsis ncaj” yuav tau ua li cas xwv lawv tej npe thiaj li muaj nyob rau hauv phau ntawv uas tau txoj sia?

¹¹ Pab tsib yog “cov tsis ncaj.” Lawv cov no tsis tau paub los sis tsis tau hnov Yehauvas tej kev cai. Yog li ntawd, lawv thiaj ua tsis tau lub neej ncaj ncees raws li Yehauvas pom zoo ua ntej lawv nruam sim. Lawv thiaj tsis muaj npe nyob rau hauv phau ntawv uas tau txoj sia. Tiam sis Yehauvas yuav tsa lawv sawv rov los xwv lawv thiaj muaj caij nyoog los kawm txog Yehauvas kom lawv thiaj muaj npe rau hauv phau ntawv. Txhua tus yuav tau cev tes pab “cov tsis ncaj” no vim yav thaum ub lawv coj lub neej tsis dawb huv. Lawv yuav tau kawm kom paub coj Yehauvas tej kab lig kev cai. Thaum lub caij ntawd, yuav yog ib txoj kev cob qhia uas zoo tshaj plaws thoob ntiaj teb no, tsis tau pom dua ib zaug li rau hauv neeg lub neej.

12. (1) Leej twg yuav cob qhia cov tsis ncaj? (2) Yuav muaj li cas rau cov neeg uas xib tim tsis mloog?

¹² Leej twg yuav cob qhia cov tsis ncaj? Yuav yog cov neeg coob coob suav tsis txheeb thiab cov ncaj ncees uas Yehauvas tsa sawv rov los. Yuav kom cov tsis ncaj muaj npe rau hauv phau ntawv uas tau txoj sia, lawv yuav tau sib raug zoo nrog Yehauvas thiab muab lawv lub neej cob rau nws. Yexus Khetos thiab cov nrog nws txiav txim yuav saib ntsoov saum ntuj tuaj seb cov tsis ncaj puas mloog tej lawv tau kawm los sis tsis mloog. (Tshwmsim 20:4) Cov neeg uas xib tim tsis mloog yuav tsis tau ua neej nyob ntxiv lawm, tab txawm lawv hnub nyoog muaj 100 xyoo los xij peem. (Yaxayas 65:20) Yehauvas thiab Yexus nkawv paub tej uas nyob nraim nkoos hauv neeg nruab siab thiab nkawv yuav tsis cia ib tug twg los ua ib yam dab tsi phem nyob rau hauv lub ntiaj teb tshiab.​—Yaxayas 11:9; 60:18; 65:25; Yauhas 2:25.

SAWV LOS TAU TXOJ SIA THIAB SAWV LOS RAUG TXIAV TXIM

13-14. (1) Yav tag los lawm, peb ib txwm ntseeg li cas txog Yexus cov lus nyob rau hauv Yauhas 5:29? (2) Ua li Yexus cov lus nws hais ntawd yog li cas tiag?

¹³ Yexus los yeej tau hais txog cov neeg uas Yehauvas yuav tsa sawv rov los nyob hauv lub ntiaj teb no. Xws li, nws tau hais tias: “Lub  sijhawm tabtom los lawm; thaum ntawd cov neeg uas tuag lawm yuav hnov Leej Tub lub suab hu, thiab lawv yuav tawm hauv lawv tej qhov ntxa los: cov neeg uas ua zoo yuav sawv los tau txojsia, cov neeg uas ua phem ua qias yuav sawv los raug kev txiav txim.” (Yauhas 5:28, 29) Yexus cov lus no yog li cas tiag?

¹⁴ Yav tag los lawm, peb nkag siab Yexus cov lus no tias yog nws hais txog tom qab Yehauvas tsa neeg sawv rov los es ib txhia xyaum ua zoo tiam sis ib txhia ua phem. Raws li Yexus cov lus, nws tsis tau hais tias cov uas sawv hauv qhov tuag rov qab los, ib txhia yuav ua phem hos ib txhia yuav ua zoo. Nws tus nru lus yog hais txog yav tag los lawm, tsis yog yav yuav tuaj tom ntej vim nws hais tias “cov neeg uas ua zoo” thiab “cov neeg uas ua phem ua qias.” Cov lus no qhia tau tias tej uas cov tib neeg ntawd tau ua, yog ua ntej lawv nruam sim. Cov lus no yeej muaj tseeb vim thaum txog lub ntiaj teb tshiab, yuav tsis pub leej twg ua phem ua qias ntxiv lawm. Thaum hais txog tej yam cov neeg tsis ncaj tau ua phem ua qias, twb yog hais txog ua ntej lawv nruam sim. Ua li Yexus cov lus uas hais txog “yuav sawv los tau txojsia” thiab “yuav sawv los raug kev txiav txim” yog li cas tiag?

15. Leej twg “yuav sawv los tau txojsia,” thiab vim li cas?

¹⁵ Cov neeg ncaj ncees uas tau ua zoo ua ntej lawv nruam sim, “yuav sawv los tau txojsia” vim lawv tej npe twb muaj nyob rau hauv phau ntawv uas tau txoj sia. Yog li ntawd raws li hais nyob rau hauv Yauhas 5:29 thiab Tes Haujlwm 24:15, “cov neeg uas ua zoo” thiab “cov ncaj ncees” ces yog hais txog tib pab neeg xwb. Ob nqes Vajlugkub no hais dhos daws rau nqe Vajlugkub hauv Loos 6:7 uas hais tias: “Tus uas tuag lawd kuj dim lub txim lawm.” Raws li hais no, thaum cov ncaj ncees nruam sim, Yehauvas twb zam lawv lub txim lawm thiab Yehauvas yeej nco ntsoov txhua tsav txhua yam zoo uas lawv tau ua. (Henplais 6:10) Txawm cov ncaj ncees sawv rov los muaj sia lawm los lawv yuav tau tuav rawv lawv txoj kev ntseeg xwv lawv tej npe thiaj nyob rau hauv phau ntawv uas tau txoj sia.

16. “Sawv los raug kev txiav txim” yog hais txog dab tsi tiag?

¹⁶ Cov neeg uas ua phem ua qias ua ntej lawv nruam sim yuav tau saws dab tsi? Txawm tias Yehauvas twb zam lawv lub txim thaum lawv nruam sim lawm los lawv twb tsis tau muaj kev sib raug zoo nrog Yehauvas. Lawv tej npe tsis tau muaj nyob rau hauv phau ntawv uas tau txoj sia. Yog li ntawd raws li Tes Haujlwm 24:15, “cov neeg uas ua phem ua qias” thiab “cov tsis ncaj” ces yog hais txog tib pab neeg xwb. Yuav tsa lawv “los raug kev txiav txim.” c Qhov no txhais hais tias Yexus yuav tshuaj cov neeg tsis ncaj. (Lukas 22:30) Nyob rau ncua sij hawm ntawd, Yexus yuav cia lub sij hawm dhau mus zuj zus seb lawv puas hloov thiab muab lawv lub neej cob rau Yehauvas. Yog lawv hloov, nws yuav muab lawv tej npe sau rau hauv phau ntawv uas tau txoj sia.

17-18. Tag nrho cov neeg uas tsa sawv rov los muaj sia nyob rau hauv ntiaj teb no yuav tau ua dab tsi thiab “tes haujlwm” uas hais nyob hauv Tshwmsim 20:12, 13, yog li cas tiag?

¹⁷ Txawm cov neeg uas tsa sawv rov los muaj sia no yuav yog cov ncaj ncees los sis cov tsis ncaj, lawv yuav tau mloog Yehauvas cov kev cai uas muaj nyob rau hauv tej thooj ntawv tshiab uas muab qhib coj los qhia thaum 1,000 xyoo ntawd. Tus tub txib Yauhas tau piav txog tej uas nws ua yog toog pom tias: “Kuv pom cov neeg uas tuag lawm, tsis hais tus hlob tus yau, sawvdaws puavleej sawv ntawm tus uas zaum saum lub zwmtxwv hauv ntej. Luag muab tej phau ntawv los nthuav, thiab muab ib phau ntawv los nthuav saib, phau ntawd yog phau ntawv uas sau  cov neeg uas muaj sia ntev mus ibtxhis lawm tej npe. Luag txiav txim rau cov neeg uas tuag lawm raws li lawv tes haujlwm uas twb muab sau cia rau hauv tej ntawv ntawd lawm.”​—Tshwmsim 20:12, 13.

¹⁸ Cov neeg uas tsa sawv rov los muaj sia yuav raug txiav txim raws li lawv “tes haujlwm” li cas? Puas yog lawv raug txiav txim raws li lawv “tes haujlwm” ua ntej lawv nruam sim? Tsis yog li ntawd vim hais tias Yehauvas twb zam lawv lub txim thaum lawv nruam sim lawm. “Tes haujlwm” uas hais txog no tsis yog hais txog tej uas lawv tau ua yav tas los tiam sis yog hais txog tes hauj lwm lawv ua hauv lub ntiaj teb tshiab tom qab cob qhia lawv tag. Tsis hais cov txiv neej ib txwm muaj kev ntseeg yam li Nau-as, Xamuyees, Daviv, thiab Daniyees los yuav tau kawm kom paub Yexus Khetos thiab ntseeg tias Yexus theej tau neeg lub txhoj. Yog lawv cov txiv neej no twb yuav tau kawm kom thiaj paub ces cov neeg tsis ncaj haj yam yuav tsum sib zog ntsos kawm kom lawv thiaj paub.

19. Cov neeg uas xib tim tsis kam hloov lawv lub neej yuav raug li cas?

¹⁹ Cov neeg uas xib tim tsis kam hloov lawv lub neej yuav raug li cas? Nyob rau hauv Tshwmsim 20:15 qhia rau peb tias: “Tus twg lub npe tsis tshwm nyob hauv phau ntawv txheeb txoj sia, mas luag muab nws pov rau hauv lub pas hluav taws ntawd.” Raws li nqe no, lawv yeej yuav tuag mus ib txhis tiag tiag li. Yog li ntawd, peb yuav tau ua npaum li peb ua tau xwv peb lub npe thiaj li nyob rau hauv phau ntawv uas tau txoj sia mus li.

20. Yuav muaj hauj lwm dab tsi nyob rau thaum 1,000 xyoo ntawd? (Saib daim duab ntawm lub khaum.)

²⁰ Thaum txog 1,000 xyoo ntawd, ntshe yuav lom zem heev. Nyob rau lub caij ntawd, yuav muaj ib txoj kev los cob qhia sawv daws uas zoo heev thoob plaws lub ntiaj teb no. Tsis tas li ntawd, yuav yog ib lub sij hawm los soj ntsuas cov ncaj ncees thiab cov tsis ncaj ncees. (Yaxayas 26:9; Tes Haujlwm 17:31) Nyob rau zaj kawm txuas ntxiv tom ntej, yuav qhia tias txoj kev cob qhia no yuav zoo li cas rau li cas xwv peb thiaj nkag siab thiab ris txiaj ntsig rau tej yam zoo zoo yuav los tom ntej no.