1. Tej zaum nyob rau hauv chaw ua hauj lwm los sis tom tsev kawm ntawv, luag yuav nug peb txog dab tsi?

 YOG tias ib tug neeg ua hauj lwm los sis ib tug nrog koj kawm ntawv ua ke nug koj txog koj txoj kev ntseeg, koj puas ntshai? Feem ntau peb yeej ntshai. Qhov lawv nug peb ntawd yeej zoo heev vim qhov ntawd yuav pab tau peb paub tias lawv xav li cas rau li cas los sis ntseeg li cas peb thiaj paub qhia txoj xov zoo rau lawv. Muaj qee lub sij hawm, tej txhia hnov lus paj lus cua txog peb txoj kev ntseeg lawv thiaj xav nrog peb sib cav los sis lawv tsis ntseeg tej uas peb qhia ntawd. (Tes Haujlwm 28:22) Tsis tas li ntawd, peb nyob rau tiam kawg ces yuav muaj coob leej ntau tus “tsis zam txim rau lwm tus” thiab yuav “ua neeg tsivtsaim.”​—2 Timautes 3:1, 3.

2. Vim li cas peb yuav tau ua siab mos siab muag?

² Tej zaum koj twb xav dua lawm tias, ‘Yuav ua li cas kuv thiaj tsis hais lus tshawv tshawv rau tus uas tab tom hais lus los twm kuv txoj kev ntseeg?’ Qhov uas yuav pab tau koj yog ua lub siab mos siab muag. Tus uas muaj lub siab mos tsis chim sai tiam sis tswj nws lub siab thaum lwm tus hais lus twm nws los sis tsis paub tias yuav teb li cas rov qab. (Pajlug 16:32) Tej zaum koj yuav xav tias yooj yim hais tiam sis tsis yooj yim ua. Yuav ua li cas koj thiaj yuav muaj lub siab mos siab muag? Koj yuav ua lub siab mos siab muag teb lwm tus li cas thaum lawv hais lus twm koj txoj kev ntseeg? Yog tias koj muaj me tub me nyuam, koj yuav pab koj cov me nyuam li cas xwv lawv thiaj muaj lub siab mos siab muag teb cov uas twm lawv txoj kev ntseeg? Cia peb mus tham seb yuav ua li cas rau li cas.

3. Vim li cas ua lub siab mos siab muag ho qhia tias peb muaj lub siab tawv? (2 Timautes 2:24, 25)

³ Tus uas muaj lub siab mos siab muag qhia tias nws muaj lub  siab tawv. Tus uas muaj lub siab tawv thiaj li muaj lub siab tus thiab thev taus tej uas nws raug. Nco ntsoov tias Vajtswv lub hwj huam dawb huv yuav pab tau kom peb muaj lub “siab mos siab muag.” (Kalatias 5:22, 23) Thaum cov neeg Kilis siv lo lus “siab mos siab muag” yog siv rau thaum lawv cob tau ib tug nees qus qus kom seej. Tus nees qus no txawm nws seej lawm los nws haj tseem muaj zog. Zoo tib yam li ntawd, peb yuav ua li cas thiaj muaj lub siab mos siab muag thiab ua lub siab tawv? Peb ua tsis tau tej no yog tsis muaj Vajtswv pab. Peb yuav tau thov Vajtswv kom nws muab nws lub hwj huam dawb huv los pab peb muaj lub siab mos siab muag. Muaj coob leej ntau tus yeej xyaum tau lub siab mos siab muag lawm. Cov kwv tij nkauj muam yeej muaj lub siab mos muag thaum tib neeg hais lus twm lawv. Qhov uas lawv coj li no kuj pab tau tej neeg ib ncig uas pom ntawd xav zoo txog Yehauvas Cov Tim Khawv. (Nyeem 2 Timautes 2:24, 25.) Yuav ua li cas koj thiaj muaj lub siab mos siab muag?

4. Peb khaws tau li cas los ntawm Ixaj kom ua lub siab mos siab muag?

⁴ Muaj ntau zaj nyob rau hauv phau Vajlugkub qhia tias qhov ua siab mos siab muag ntawd tseem ceeb heev. Xws li zaj uas hais txog Ixaj. Thaum nws mus nyob rau ntawm cov Filitees ciam dej ciam av hauv Nkelales, cov neeg zej zog tuaj muab nws txiv tej qhov tshij txhub tas lawm. Ixaj tsis nrog lawv sib txeeb tiam sis nws thiab nws tsev neeg tsiv mus nyob lwm qhov chaw thiab khawb dua lwm lub qhov tshij. (Chivkeeb 26:12-18) Tiam sis cov Filitees tseem tuaj txeeb cov dej hauv tej qhov tshij tib yam nkaus. Txawm lawv txeeb npaum li no los Ixaj tsuas xav kom sawv daws nyob sib haum xeeb xwb. (Chivkeeb 26:19-25) Muaj dab tsi pab tau Ixaj ua lub siab mos siab muag tab txawm lwm tus txhob txwm ua los twm nws? Nws yoog tau nws niam thiab nws txiv nkawd ob tug yam ntxwv. Nws pom nws txiv Anplahas nyiam nrog luag sib haum xeeb thiab nws niam muaj “lub siab mos siab muag thiab muaj lub siab tus yees.”​—1 Petus 3:4-6; Chivkeeb 21:22-34.

5. Muaj ib tug yam ntxwv twg qhia tias cov niam txiv yeej cob qhia tau lawv cov me nyuam ua lub siab mos siab muag?

⁵ Cov niam txiv uas ntseeg Yehauvas yeej cob qhia tau lawv cov me nyuam kom muaj tus cwj pwm siab mos siab muag. Xws li muaj ib tug lub npe hu ua Mexeem (Maxence) uas muaj hnub nyoog 17 xyoo. Thaum nws mus tsev kawm ntawv thiab mus qhia Vajlugkub, nws yeej ntsib cov tib neeg siab luv luv. Nws niam thiab nws txiv thiaj li pab kom nws xyaum rub lub siab kom ntev. Nkawd hais tias, “Tam sim no Mexeem paub hais tias yeej yooj yim rau yus chim thiab ua npau taws vog tiam sis tus uas tswj taus nws lub siab nws muaj peev xwm heev.” Yog li ntawd, Mexeem thiaj xyaum rub tau nws lub siab kom ua ib tug neeg siab mos siab muag.

6. Kev thov Vajtswv ho pab tau kom peb muaj lub siab mos siab muag li cas?

⁶ Peb yuav ua li cas xwb thaum raug ib tug twg thuam peb xws li hais lus dag txog Vajtswv los sis hais lus thuam txog tej yam hauv phau Vajlugkub? Peb yuav tau thov Vajtswv kom muab nws lub hwj huam dawb huv los pab peb thiab kom nws muab tswv yim rau peb txawj hais lus mos lus muag teb lawv. Txawm tias peb twb teb tag es peb mam li ras tias peb teb tsis tau zoo npaum li lub siab xav los peb yuav tau thov Vajtswv txog qhov no thiab xav seb lwm zaus peb yuav teb li cas thiaj zoo. Ua li no Vajtswv thiaj yuav muab nws lub hwj huam dawb huv rau peb kom lwm zaus peb thiaj li tswj taus peb lub siab kom tus tus.

7. Vim li cas qhov uas peb cim tau qho nqe Vajlugkub ho pab tau peb tswj tej lus peb hais thiab tej peb tab tom yuav ua? (Pajlug 15:1, 18)

⁷ Muaj ntau nqe nyob hauv phau Vajlugkub yeej pab tau peb kom tswj taus peb tej lus thaum raug ib tug twg hais siab hais qes. Vajtswv lub hwj huam yuav pab kom peb ras txog  cov nqe Vajlugkub ntawd los pab peb. (Yauhas 14:26) Xws li cov hauv paus ntsiab lus nyob hauv phau Pajlug pab tau kom peb muaj lub siab mos siab muag. (Nyeem Pajlug 15:1, 18.) Nyob hauv phau Pajlug no qhia vim li cas ho zoo rau peb tswj peb lub siab kom nyob tus tus thaum muaj tej yam ua rau peb ntxhov siab.​—Pajlug 10:19; 17:27; 21:23; 25:15.

8. Ua cas ho zoo rau peb xav seb vim li cas tus neeg ntawd hais lus thom peb txoj kev ntseeg?

⁸ Yog peb ua ib tug neeg thoob tsib yuav pab tau peb vim tus neeg thoob tsib yeej txawj tswj nws lub siab thaum raug luag hais lus thom nws txoj kev ntseeg. (Pajlug 19:11) Muaj ntau zaus tib neeg nug peb li ub li no tiam sis lawv tsis kam qhia phua hlo seb lawv xav paub li cas tiag. Ua ntej koj yuav teb lawv, nco ntsoov tias koj tsis paub vim li cas nws ho nug li ntawd.​—Pajlug 16:23.

9. Nkide-oos ua siab mos siab muag thiab thoob tsib li cas nrog cov Efalayees?

⁹ Cia peb mus tham seb Nkide-oos teb li cas rau cov neeg Efalayees. Thaum Nkide-oos tsis hu lawv mus ntaus cov Ixayees tej yeeb ncuab, lawv chim siab heev thiab xav paub tias vim li cas nws ho hu tsis txog lawv. Tiam sis puas yog lawv chim vim tsis hu txog lawv los sis yog vim lawv tsav hwj chim? Txawm yog li cas los xij  peem, Nkide-oos thoob tsib to nrog, nws thiaj li paub tias vim li cas lawv chim heev thiab nws ua siab mos siab muag teb lawv. Nyob rau hauv phau Vajlugkub qhia tias “thaum Nkide-oos hais li no tas, lawv thiaj zoo siab tsis chim lawm.”​—Cov Thawjtswj 8:1-3.

10. Yuav ua li cas peb thiaj txawj teb cov uas nug txog peb txoj kev ntseeg? (1 Petus 3:15)

¹⁰ Tej zaum cov neeg nrog peb ua hauj lwm los sis nrog peb kawm ntawv yuav nug seb peb ntseeg li cas rau li cas. Peb yuav tau ua tib zoo qhia peb txoj kev ntseeg rau lawv thiab hais lus saib taus lawv. (Nyeem 1 Petus 3:15.) Zoo rau peb tsis txhob ua siab nqaim nqaim tias lawv hais lus los twm peb tiam sis ua tib zoo xav txog tej lawv nug, peb thiaj li yuav pab tau lawv. Txawm leej twg yuav nug li cas los xij peem, cia peb ua tib zoo hais lus los teb lawv xwb. Tej zaum qhov uas peb ua tib zoo teb ntawd kuj rub tau lawv lub siab. Txawm tus neeg ntawd yuav hais tau lus siab lus qes los cia peb ua tib zoo teb nws rov qab.​—Loos 12:17.

11-12. (1) Peb yuav tau ua tib zoo xav li cas ua ntej yuav teb ib lo lus nug twg? (Saib daim duab.) (2) Piav seb peb muab tau qhov uas lwm tus nug peb hloov mus rau ib qho zoo li cas rau li cas.

¹¹ Yog tias ib tug neeg peb nrog ua hauj lwm nug peb xws li tias vim li cas peb ho tsis ua koob tsheej rau hnub yug, tej zaum nws kuj xav paub tias peb puas muaj kev lom zem ua si li. Los sis tej zaum nws ho txhawj tias peb tsis ua hnub yug ces yuav ua rau sawv daws tom hauj lwm muaj kev sib tu siab. Yog li ntawd, zoo rau peb ua nws tsaug rau qhov uas nws txhawj li ntawd, thiab peb yuav tau ua tib zoo qhia rau nws tias peb xav kom sawv daws nyob sib haum xeeb ntawm chaw hauj lwm. Yog peb ua li no yuav qhib tau ib txoj hau kev kom peb nrog tau nws tham seb nyob hauv phau Vajlugkub hais li cas txog ua koob tsheej rau hnub yug.

¹² Peb kuj ua tau li no thiab thaum muaj neeg nug peb txog tej qhov nyuaj nyuaj. Xws li muaj ib tug neeg nrog peb kawm ntawv ua ke cam tias Yehauvas Cov Tim Khawv yuav tau hloov lawv txoj kev xav txog qhov uas txiv neej deev txiv neej, poj niam deev poj niam. Puas yog nws nug li no vim nws tsis paub xyov Yehauvas Cov Tim Khawv ho ntseeg li cas txog qhov no? Los sis tej zaum nws kuj muaj ib tug phooj ywg kwv luag los sis ib tug nruab ze yog cov uas txiv neej deev txiv neej, poj niam deev poj niam? Peb yuav tau ua tib zoo hais rau nws tias peb yeej saib taus txhua leej txhua tus thiab peb cia nyias txiav txim siab rau nyias tus kheej. b (1 Petus 2:17) Tej zaum peb yuav qhia tau rau nws seb tau hais li cas nyob hauv phau Vajlugkub thiab yog peb coj li phau Vajlugkub qhia yuav pab tau rau peb muaj kev zoo siab dua.

13. Koj yuav ua li cas koj thiaj pab tau ib tug neeg uas thuam kev ntseeg Vajtswv?

¹³ Thaum ib tug twg tsis nyiam li tej peb qhia, peb yuav tau tsis txhob xav tias peb twb paub nws ntseeg li cas lawm. (Titus 3:2) Xws li thaum muaj ib tug neeg nrog peb kawm ntawv ua ke thuam txog kev ntseeg Vajtswv, tej zaum peb yuav xav twj ywm tias ntshe nws ntseeg tias neeg txawj txia los. Qhov tseeb tiag, tej zaum nws tsuas hais raws li nws tau hnov xwb. Peb yuav tau tsis txhob nrog nws sib cam txog lub ntsiab uas neeg puas txawj txia tiam sis cia peb mam xav mam hais kom tus neeg nrog peb kawm ntawv ntawd coj peb cov lus coj mus xav. Tej zaum koj kuj xa tau tej yam hauv lub vej xaij jw.org txog tej uas Vajtswv tsim rau nws tau nyeem tau saib. Tom qab ntawd, tej zaum nws kuj yuav rov los nrog koj tham txog ib zag uas nws tau nyeem los sis nws tau saib. Thaum peb saib taus nws li no yuav pab tau nws xav kawm ntxiv txog tej yam nyob hauv phau Vajlugkub.

14. Nai-aus txawj siv peb lub vej xaij los teb lwm tus li cas?

 ¹⁴ Muaj ib tug hluas npe hu ua Nai-aus (Niall) siv peb lub vej xaij los mus qhia ib co tib neeg uas hais tsis tseeb txog Yehauvas Cov Tim Khawv. Nws hais tias, “Muaj ib tug hluas pheej los hais rau kuv tias kuv yeem ntseeg ib phau ntawv uas piav dab neeg dua li tej neeg tshawb txuj ci qhia.” Tus hluas ntawd tsis pub Nai-aus teb nws, yog li ntawd Nai-aus thiaj li hais kom nws mus saib lub vej xaij jw.org ntawm ntu “Kev Tshawb Txujci Thiab Phau Vajlugkub.” Tom qab ntawd, Nai-aus xam pom tias tus hluas ntawd kuj tau mus nyeem tej ntaub ntawv hauv lub vej xaij thiab nws kuj txaus siab nrog Nai-aus tham txog seb tib neeg chiv li cas los tiag. Tej zaum koj kuj tau nrog lwm tus tham dua li no lawm thiab.

15. Cov niam txiv pab tau kom lawv cov me nyuam txawj teb cov nug txog lawv txoj kev ntseeg li cas?

¹⁵ Cov niam txiv yeej pab tau lawv cov me nyuam ua siab mos siab muag teb cov uas nug lawv txog lawv txoj kev ntseeg. (Yakaunpaus 3:13) Ib txhia niam txiv siv lub caij uas lawv kawm Vajlugkub ua ib tse neeg, los xyaum seb yuav teb li cas thiaj zoo. Lawv tham seb tej me nyuam hauv tsev kawm ntawv yuav nug txog dab tsi ces lawv zaum tsaws tham ua ke tas. Tom qab ntawd lawv mam li muab coj los ua yeeb yam seb yuav teb li cas. Tsis tas li ntawd, cov niam txiv qhia kom lawv cov me nyuam ua tib zoo teb es tsis txhob hais lus tshawv tshawv.​—Saib lub ntsiab “ Xyaum Ua Ke Xwv Thiaj Pab Tau Koj Tsev Neeg.”

16-17. Qhov uas xyaum ua ntej pab tau cov me nyuam li cas?

¹⁶ Xyaum ua ntej yuav pab tau cov hluas kom lawv thiaj paub tias vim li cas lawv ho ntseeg li ntawd thiab lawv thiaj paub muab piav rau lwm tus. Nyob hauv lub vej xaij jw.org, muaj ntu hu ua “Kev Pab Rau Cov Hluas” los tsav cov hluas txoj kev ntseeg thiab pab kom lawv txawj teb lwm  tus. Yog nej muab tej no los kawm ua ib tse neeg ces yuav pab kom nej txawj ua siab mos siab muag teb lwm tus thaum lawv hais txog nej txoj kev ntseeg.

¹⁷ Muaj ib tug hluas npe hu ua Matus (Matthew) hais tias qhov xyaum ua ntej pab tau nws heev. Thaum Matus lawv tsev neeg kawm Vajlugkub ua ke, lawv tshawb nrhiav tej lub ntsiab uas lawv xav tias yuav tham txog nyob rau hauv chav Matus kawm ntawv. Matus hais tias: “Peb xav seb lawv yuav nug li cas ces peb mam li xyaum seb yuav teb li cas raws li peb tau tshawb nrhiav. Thaum kuv paub tshab tshab tias peb ntseeg li cas rau li cas lawm ces kuv tsis ntshai teb lawv rov qab thiab kuv ua tau lub siab mos siab muag.”

18. Nyob rau hauv Kaulauxais 4:6, tseem ceeb heev uas peb yuav tau ua dab tsi?

¹⁸ Txawm peb qhia ntxaws ntxaws thiab hais tau zoo zoo los tsis yog txhua tus yuav mloog tej peb hais. Tiam sis qhov uas zoo dua yog peb mam xav mam hais thiab hais lus mos mos. (Nyeem Kaulauxais 4:6.) Piav peb txoj kev ntseeg rau lwm tus piv ib yam li peb pov ib lub khaub hnab rau nws. Nyob ntawm peb seb peb yuav maj mam pov los sis txawb lub khaub hnab rau nws. Thaum peb maj mam pov ces tus tod yuav txais tau lub khaub hnab thiab nws yuav kam nrog peb pov mus pov los. Zoo ib yam li ntawd, yog peb mam xav mam hais thiab hais lus mos mos ces tib neeg yuav kheev mloog peb dua thiab nrog peb sib txuas lus. Tiam sis yog muaj ib tug twg xav sib cam kom yeej kom swb los sis thuam peb txoj kev ntseeg ces peb tsis tas yuav nrog nws tham ntxiv lawm los tau. (Pajlug 26:4) Feem ntau tib neeg yeej tsis coj li ntawd, ib txhia kuj txaus siab hlo mloog thiab.

19. Muaj dab tsi pab tau kom peb hais lus mos lus muag thaum teb lwm tus txog peb txoj kev ntseeg?

¹⁹ Yog peb muaj lub siab mos siab muag, yuav pab tau peb lawm hov ntau. Thov Yehauvas kom ntxiv dag ntxiv zog rau peb kom muaj lub siab mos muag teb cov uas muaj lus nug los sis cov uas thuam peb txoj kev ntseeg. Nco ntsoov tias peb tus cwj pwm uas hais lus mos lus muag yuav ua rau kom tsis txhob muaj lus sib cav sib ceg. Qhov uas peb hais lus mos mos thiab saib taus lwm tus yuav rub tau cov uas mloog peb hloov lawv tej kev xav txog peb thiab tej uas hais nyob hauv phau Vajlugkub. Peb “yuav tsum npaj tos txhua lub sijhawm” thaum lwm tus nug txog peb txoj kev ntseeg thiab peb yuav tau ua lub siab mos siab muag thiab saib taus lawv thaum peb teb lawv. (1 Petus 3:15) Cia kom luag pom tias peb yog ib tug neeg uas muaj siab mos siab muag!