1. Yau-ases, Uxiyas, thiab Yauxiyas tau ntsib tej twg?

 KOJ yuav xav li cas xwb yog tias koj tseem hluas hluas los sis yog ib tug me nyuam yaus es koj twb tau rais los ua ib tug vaj ntxwv kav Vajtswv cov tib neeg lawm? Koj yuav siv koj lub hwj chim los mus tswj hwm li cas? Nyob hauv phau Vajlugkub piav txog ob peb tug hluas uas tau los mus ua vaj ntxwv kav teb chaws Yudas. Xws li Yau-ases muaj 7 xyoo, Uxiyas muaj 16 xyoo, thiab Yauxiyas muaj 8 xyoo. Tej zaum ntshe nyuaj kawg li rau lawv! Txawm li ntawd los Yehauvas thiab lwm cov kuj pab kom lawv ua tau qhov zoo qhov yog.

2. Vim li cas zoo rau peb kawm txog Yau-ases, Uxiyas, thiab Yauxiyas?

² Peb tsis tau ua ib tug vaj ntxwv los sis niam vaj ntxwv tiam sis peb yeej khaws tau ntau yam los ntawm Yau-ases, Uxiyas, thiab Yauxiyas. Muaj qho lub sij hawm lawv yeej txiav txim tau qhov zoo tiam sis muaj qee lub sij hawm lawv ho txiav txim ua tau tej yam tsis zoo. Lawv cov yam ntxwv yuav pab kom peb paub xaiv tej tib neeg uas peb nrog, ua neeg txo hwj chim, thiab nrog Yehauvas sib raug zoo.

3. Tus pov thawj hlob Yehauyadas pab Vaj Ntxwv Yau-ases li cas?

³ Xyaum kom txawj txiav txim zoo li Yau-ases. Thaum Yau-ases tseem yau, nws txiv tag sim neej ces tus pov thawj hlob Yehauyadas tu nws loj hlob thiab cob qhia nws txog Yehauvas. Vim Yau-ases mloog tej uas Yehauyadas qhia, nws thiaj li ntse ntse. Yehauyadas tus yam ntxwv pab tau Yau-ases heev, Yau-ases thiaj li teev tiam Yehauvas thiab pab tej pej xeem teev tiam Yehauvas. Tsis tas li ntawd, Yau-ases kuj txhim kho Yehauvas lub tuam tsev.​—2 Xwmtxheej Vajntxwv 24:1, 2, 4, 13, 14.

4. Yog peb nyiam thiab mloog Yehauvas tej lus sam hwm, yuav pab tau peb li cas? (Pajlug 2:1, 10-12)

 ⁴ Yog koj niam koj txiv los sis lwm tus cob qhia koj kom hlub Yehauvas thiab coj raws li nws tej lus sam hwm ces twb yog koj tau txais ib yam zoo heev. (Nyeem Pajlug 2:1, 10-12.) Koj niam thiab koj txiv yeej cob qhia koj txog ntau yam. Xws li ib tug muam npe hu ua Khayas (Katya). Nws txiv cob qhia kom nws txawj txiav txim rau qhov zoo. Txhua txhua hnub thaum nws txiv coj nws mus kawm ntawv, nws txiv piav txog phau ntawv niaj hnub tshawb nrhiav rau nws mloog. Nws hais tias: “Qhov uas kuv txiv qhia li no pab tau kuv kom txawj ua qhov yog thaum muaj teeb meem los raug kuv rau hnub ntawd.” Tej zaum koj niam thiab koj txiv yuav siv cov lus hauv phau Vajlugkub los tsa cai rau koj coj ces koj xav tias tej cai ntawd nruj dhau koj ua tsis tau ib yam dab tsi li. Muaj dab tsi pab tau koj kom mloog nkawd hais? Muaj ib tug muam npe hu ua Anatexias (Anastasia) nco txog qhov uas nws niam thiab nws txiv piav vim li cas nkawd thiaj tsa tej cai ntawd rau nws. Nws hais tias, “Nkawd pab kom kuv nkag siab tias cov cai ntawd tsis yog los tswj hwm kuv tiam sis yog los mus tiv thaiv kuv vim nkawd hlub kuv.”

5. Koj niam, koj txiv thiab Yehauvas yuav xav li cas txog tej koj ua? (Pajlug 22:6; 23:15, 24, 25)

⁵ Koj niam thiab koj txiv yuav zoo siab heev thaum nkawd pom hais tias koj mloog tej lus nkawd qhia koj. Tsis tas li ntawd, Vajtswv kuj yuav zoo siab heev, thiab koj txoj kev sib raug zoo nrog nws yuav ruaj khov ruaj nreeg. (Nyeem Pajlug 22:6; 23:15, 24, 25.) Tej no yog tej yam zoo uas koj xyaum tau los ntawm Yau-ases thaum nws tseem yau.

6. Tom qab Yehauyadas tag sim neej lawm, Yau-ases ho mloog leej twg thiab muaj li cas tom qab ntawd? (2 Xwmtxheej Vajntxwv 24:17, 18)

⁶ Txhob mus xyaum tej uas Yau-ases txiav txim tsis zoo. Tom qab Yehauyadas tag sim neej lawm, Yau-ases mus poo nrog tej neeg tsis zoo. (Nyeem 2 Xwmtxheej Vajntxwv 24:17, 18.) Nws mloog cov nom tswv hauv Yudas uas tsis hlub Yehauvas tej lus. Yeej tsim nyog rau nws tsis txhob mus poo lawv. (Pajlug 1:10) Tiam sis nws mloog cov neeg ntawd tej lus haub ntxias. Thaum Xakhaliyas mus hais Yau-ases, Yau-ases hais kom tej pej xeem muab nws ntaus kom tuag. (2 Xwmtxheej Vajntxwv 24:20, 21; Mathais 23:35) Tej Yau-ases ua no tsis zoo thiab phem kawg li! Thaum nws yau nws lub neej zoo kawg li tiam sis tom qab no nws fav xeeb thiab rais los mus ua ib tug tua neeg. Nws ob tug thawj tub rog thiaj muab nws tua tuag lawm. (2 Xwmtxheej Vajntxwv 24:22-25) Yog nws mloog Yehauvas thiab cov uas hlub nws lus, ntshe nws lub neej twb tsis zoo li ntawd! Koj khaws tau li cas los ntawm nws tus yam ntxwv no?

7. Koj yuav tau xaiv cov phooj ywg zoo li cas? (Saib daim duab.)

 ⁷ Qhov uas peb khaws tau los ntawm Yau-ases yog tsis txhob mus nrog tej phooj ywg tsis zoo tiam sis yuav tau xaiv cov phooj ywg uas hlub Yehauvas thiab xav ua rau Yehauvas zoo siab. Cov phooj ywg no thiaj yuav pab tau peb ua tej yam zoo. Peb yeej ua tau phooj ywg nrog cov laus cov hluas huv tib si. Nco ntsoov tias Yehauyadas yeej laus dua Yau-ases. Ua ntej koj yuav ua phooj ywg nrog ib tug twg, rov tshuaj koj tus kheej li no tias: ‘Lawv puas pab tsav kuv txoj kev ntseeg rau Yehauvas? Lawv puas txhawb kom kuv ua neej raws li Yehauvas tej kev cai? Lawv puas nyiam tham txog Yehauvas thiab saib qhov tseeb rau nqi? Lawv puas saib taus Vajtswv tej kev cai? Puas yog lawv hais tej yam uas kuv xav mloog rau kuv mloog xwb los sis lawv puas ntuas kuv thaum kuv ua tej yam tsis yog?’ (Pajlug 27:5, 6, 17) Yog tias koj tej phooj ywg tsis hlub Yehauvas ces zoo rau koj tsis txhob nrog lawv. Tiam sis yog koj cov phooj ywg hlub Yehauvas ces kav tsij nrog lawv ua ke, lawv thiaj pab tau koj!​—Pajlug 13:20.

8. Peb yuav tau ua tib zoo xav li cas thaum peb siv is taws nej?

⁸ Is taws nej kuj yog ib yam twj zoo rau peb nrog tau peb tsev neeg los sis tej phooj ywg kwv luag sib txuas lus mus mus los los. Tiam sis muaj ib txhia kuj siv is taws nej los ua kom luag tej qhuas lawv. Lawv tso duab los sis yeeb yaj kiab los khav txog tej lawv yuav los sis tau ua. Ua tib zoo tshuaj koj tus kheej li no yog tias koj siv is taws nej: ‘Puas yog kuv ua kom lwm tus qhuas? Puas yog kuv xav qhia tej yam zoo rau lwm tus los sis khav txog kuv tus kheej? Kuv puas cia lwm tus txw tau kuv tej kev xav, tej lus, thiab tej kuv ua mus rau tej yam tsis zoo?’ Kwv tij Nathas Nuas (Nathan Knorr) uas yog ib tug ntawm Pab Uas Ntaus Thawj tau hais li no tias: “Tsis txhob ua kom haum neeg siab vim koj yeej ua tsis tau kom txaus neeg lub siab qhuas. Yog koj ua haum Yehauvas siab ces koj yuav ua tau haum txhua tus uas teev tiam Yehauvas siab.”

9. Yehauvas pab Uxiyas ua tau dab tsi? (2 Xwmtxheej Vajntxwv 26:1-5)

⁹ Xyaum kom txawj txiav txim zoo li Uxiyas. Thaum Vaj Ntxwv Uxiyas tseem yau, nws txo hwj chim kawg li. Nws ua lub neej “hwm [Yehauvas].” Rau caum yim lub xyoos uas nws ua neej nyob, Yehauvas yeej tau foom koob hmoov rau nws ntau kawg li. (Nyeem 2 Xwmtxheej Vajntxwv 26:1-5.) Uxiyas ntaus yeej ntau lub teb chaws thiab nws saib ntshis kom tsis txhob muaj neeg tuaj ntaus tau lub nroog Yeluxalees. (2 Xwmtxheej Vajntxwv 26:6-15) Uxiyas zoo siab kawg li uas Vajtswv pab nws ua tau tej no.​—Tej Lus Qhia 3:12, 13.

10. Muaj li cas tshwm sim rau Uxiyas?

¹⁰ Txhob mus xyaum tej uas Uxiyas txiav txim tsis zoo. Vaj Ntxwv Uxiyas ib txwm qhia tib neeg ua ub ua no. Tej zaum qhov no ua rau nws xav tias nws xav ua dab tsi los yeej tau. Muaj ib hnub Uxiyas txawm nkag mus rau hauv Yehauvas lub tuam tsev thiab cia li mus hlawv hmoov tshuaj tsw qab rau saum lub thaj. Tej no tsis yog cov vaj ntxwv tes hauj lwm. (2 Xwmtxheej Vajntxwv 26:16-18) Tus pov thawj hlob Axaliyas tav Uxiyas tiam sis Uxiyas chim heev. Vim Uxiyas tsis mloog lus, Yehauvas thiaj li rau txim rau nws kom mob ruas. (2 Xwmtxheej Vajntxwv 26:19-21) Yog nws txo hwj chim ces nws lub neej twb tsis zoo li ntawd!

11. Muaj dab tsi pab tau kom peb ua neeg txo hwj chim? (Saib daim duab.)

¹¹ Thaum Uxiyas muaj hwj chim lawm, nws tsis nco qab tias Yehauvas yog tus uas pub tej ntawd rau nws. Peb khaws tau dab tsi los ntawm qhov no? Peb yuav tau nco ntsoov tias Yehauvas yog tus muab txhua yam zoo rau peb ua neej thiab pub peb ua nws tes hauj lwm. Yog li ntawd, peb yuav tau ris Yehauvas txiaj ntsig es  tsis txhob khav txog tej yam peb ua tau. b (1 Kauleethaus 4:7) Peb yuav tau txo hwj chim thiab xam pom tias peb yog noob txaug neeg txhaum thiab yuav tau muaj lwm tus qhuab ntuas peb. Muaj ib tug kwv tij hnub nyoog nchav kwv lam li 60 lub xyoos sau li no tias: “Kuv yuav tau tsis txhob chim los sis qaug zog thaum lwm tus pom tej yam kuv ua tau tsis yog. Thaum lwm tus qhuab ntuas kuv vim kuv ua tau tej yam tsis zoo, kuv yeej xyaum tiag kom rov ua tau zoo dua thiab ua npaum li kuv ua tau rau Yehauvas.” Thaum peb mloog Yehauvas lus thiab txo hwj chim ces peb lub neej yuav tshav ntuj nrig.​—Pajlug 22:4.

12. Thaum Yauxiyas tseem hluas, nws nrhiav Yehauvas li cas? (2 Xwmtxheej Vajntxwv 34:1-3)

¹² Xyaum kom txawj txiav txim zoo li Yauxiyas. Thaum Yauxiyas muaj 16 xyoo, nws xav kawm txog Yehauvas thiab xav ua kom tau raws li Yehauvas lub siab nyiam. Nyob rau ncua sij hawm ntawd, tib neeg feem coob mus pe tej pej kum dab. Yog li ntawd, Yauxiyas yuav tau ua lub siab loj siab tawv txwv tsis pub kom lawv ua li ntawd. Ua ntej Yauxiyas muaj 20 xyoo, nws muab tej kev pe dab qhuas tshem tawm tag nrho hauv lawv lub teb chaws lawm.​—Nyeem 2 Xwmtxheej Vajntxwv 34:1-3.

13. Koj lub neej yuav zoo li cas yog koj muab cob rau Yehauvas?

¹³ Txawm koj haj tseem hluas los koj yeej yoog tau Yauxiyas tus yam ntxwv es kawm kom paub Yehauvas thiab nws tej yeeb yam qhuas lug. Yog koj ua li no ces koj yuav xav muab koj lub neej cob rau nws. Qhov uas koj muab koj lub neej cob li no yuav pab tau koj li cas? Muaj ib tug kwv tij hluas npe hu ua Luj (Luke) muaj li 14 xyoos thaum nws ua kev cai raus dej hais tias, “Txij hnub no lawm yav tom ntej kuv yuav muab qhov teev tiam Yehauvas ua thawj yam hauv kuv lub neej thiab kuv tsuas yuav ua kom nws zoo siab.” (Malakaus 12:30) Yog tias koj xav ua ib yam li no rau hauv koj lub neej mas yuav zoo heev!

14. Piav seb ib txhia hluas yoog Vaj Ntxwv Yauxiyas li cas.

¹⁴ Cov hluas uas teev tiam Yehauvas ntsib tej twg? Muaj ib tug kwv tij hluas npe hu ua Ntsauhees (Johan) ua kev cai raus dej thaum nws muaj 12 xyoos hais tias cov kawm ntawv nrog  nws yaum kom nws haus luam yeeb nrog lawv. Qhov uas pab tau Ntsauhees kom tsis txhob nrog lawv haus yog nws pheej hais rau nws tus kheej tias haus luam yeeb yuav ua rau nws tsis noj qab haus huv thiab yuav rhuav tau nws txoj kev sib raug zoo nrog Yehauvas. Hos muaj ib tug muam npe hu ua Letshaum (Rachel) ua kev cai raus dej thaum nws muaj 14 xyoos qhia txog tej yam uas pab tau nws thev tej kev sim siab hauv tsev kawm ntawv. Nws hais tias: “Kuv nrhiav tej yam kom pab kuv nco txog phau Vajlugkub thiab Yehauvas. Xws li thaum kuv kawm txog tej keeb kwm, ua rau kuv nco txog tej zaj los sis tej faj lem nyob hauv phau Vajlugkub. Los sis thaum kuv nrog ib tug twg tham hauv tsev kawm ntawv, kuv xav tias kuv yuav siv nqe Vajlugkub twg los pab tus ntawd.” Txawm tej koj raug txawv li tej Yauxiyas raug los, koj yeej muaj tswv yim thiab npuab siab rau Yehauvas ib yam li nws. Yog koj thev dhau tej kev sim siab koj raug thaum koj tseem hluas ces yuav pab tau koj thev dhau tej yam koj yuav ntsib yav tom ntej.

15. Muaj dab tsi pab tau Yauxiyas rau siab ntso teev tiam Yehauvas? (2 Xwmtxheej Vajntxwv 34:14, 18-21)

¹⁵ Thaum Vaj Ntxwv Yauxiyas muaj 26 xyoo, nws muab lub tuam tsev txhim kho dua tshiab. Thaum sam sim kho lub tuam tsev, lawv txawm nrhiav tau “Phau Kevcai uas Vajtswv muab cob rau Mauxes.” Thaum vaj ntxwv hnov cov lus uas nyob hauv tas, nws txawm hloov tsawg tsuag thiab mloog raws li tej lus sau tseg ntawd. (Nyeem 2 Xwmtxheej Vajntxwv 34:14, 18-21.) Koj puas xav nyeem phau Vajlugkub tsis tu ncua? Yog koj nyeem no, ho zoo li cas lawm xwb? Koj puas cim tau tej nqe uas yuav pab tau koj? Luj tau muab tej nqe uas nws nyiam sau tseg rau hauv ib phau ntawv cia. Yog koj ua ib yam li ntawd, yuav pab tau koj cim thiab khaws tau lub ntsiab. Yog koj yim paub phau Vajlugkub ces koj yuav yim nyiam teev tiam Yehauvas. Yog Vajtswv Txoj Lus twb pab tau Yauxiyas ua qhov yog ces kuj yuav pab tau koj thiab.

16. Vim li cas Yauxiyas ho ua tau ib qho yuam kev loj heev, thiab peb khaws tau li cas?

¹⁶ Txhob mus xyaum tej uas Yauxiyas txiav txim  tsis zoo. Thaum Yauxiyas muaj 39 xyoos, nws ua tau ib qho yuam kev loj heev uas txo tau nws txoj sia. Nws tsis tso siab rau Yehauvas, nws tso siab rau nws tus kheej xwb. (2 Xwmtxheej Vajntxwv 35:20-25) Muaj ib yam peb kawm tau los ntawm zaj no tias txawm peb yuav laus yuav hluas los sis kawm Vajtswv Txoj Lus ntev npaum li cas lawm los peb yuav tau nrhiav ntshis Yehauvas pab. Xws li nco ntsoov thov Vajtswv tsis tseg tsis tu, kawm nws Txoj Lus, thiab mloog cov ntseeg uas paub tab lus. Yog peb ua li no, peb yuav tsis mus ua tej yam yuam kev uas loj heev tiam sis peb yuav ua lub neej nyob tshav ntuj nrig.​—Yakaunpaus 1:25.

17. Peb khaws tau peb tug vaj ntxwv cov yam ntxwv li cas?

¹⁷ Muaj ntau yam zoo koj ua tau thaum koj tseem hluas. Yau-ases, Uxiyas, thiab Yauxiyas lawv cov yam ntxwv thaum tseem hluas qhia tias cov hluas yeej txawj txiav txim tau qhov zoo thiab ua lub neej haum Yehauvas siab. Txawm lawv lub neej thaum kawg tsis zoo los yog peb khaws tej yam zoo uas lawv ua thiab zam tej yam lawv ua tsis zoo ces peb lub neej yuav tshav ntuj nrig.

18. Muaj tej yam ntxwv twg hauv phau Vajlugkub qhia tias koj yeej ua tau lub neej tshav ntuj nrig? (Saib daim duab.)

¹⁸ Nyob rau hauv phau Vajlugkub, yeej muaj dua lwm cov hluas uas muaj ib txoj kev sib raug zoo nrog Yehauvas, ua haum Yehauvas siab, thiab ua lub neej tshav ntuj nrig. Ib tug hluas ntawd kuj yog Daviv. Thaum nws tseem hluas, nws txiav txim siab teev tiam Yehauvas thiab tom qab no nws los ua ib tug vaj ntxwv. Txawm tias muaj qho lub caij nws ua tau yuam kev los thaum nws lub neej laus lawm, Vajtswv suav tias nws muaj kev ntseeg heev. (1 Vajntxwv 3:6; 9:4, 5; 14:8) Yog koj kawm txog Daviv lub neej, yuav pab kom koj teev tiam Yehauvas mus li. Ntxiv ntawd, koj kuj kawm tau txog Malakaus los sis Timautes. Nkawd yeej teev tiam Yehauvas thaum tseem hluas thiab rau siab ntso teev tiam nws, nkawd thiaj ua neej tshav ntuj nrig.

19. Koj ua tau lub neej zoo li cas?

¹⁹ Qhov uas koj lub neej yuav zoo thiab tsis zoo yog nyob ntawm koj txoj kev txiav txim siab tam sim no. Yog koj tso siab rau Yehauvas es tsis txhob tso siab rau koj lub tswv yim ces Yehauvas yuav pab koj txiav txim tau qhov zoo qhov yog. (Pajlug 20:24) Koj yuav ua tau lub neej tshav ntuj nrig. Nco ntsoov tias Yehauvas yeej saib tej uas koj ua rau nws muaj nuj nqis heev. Tsis muaj ib yam dab tsi yuav pauv tau lub neej uas teev tiam peb Leej Txiv Yehauvas.