1. Ua ntej Petus yuav tuag, Yehauvas siv nws ua dab tsi?

 TUS tub txib Petus paub tias tshuav tsis ntev xwb nws txoj sia yuav tu. Nws tau teev tiam Yehauvas tau ntau ntau xyoo. Nws tau nrog Yexus mus qhia txoj xov zoo rau ub rau no, nws kuj mus tshaj tawm rau lwm haiv neeg, thiab tom qab no nws kuj yog ib tug ntawm pab uas ntaus thawj. Ua ntej thaum nws yuav tuag, Yehauvas kuj muab hauj lwm ntxiv rau nws ua. Kwv lam li xyoo 62 txog 64 tom qab Yexus yug, Yehauvas siv Petus sau ob tsab ntawv uas yog phau 1 thiab phau 2 Petus hauv phau Vajlugkub. Petus vam thiab cia siab tias ob tsab ntawv no yuav pab cov ntseeg tom qab nws nruam sim lawm.​—2 Petus 1:12-15.

2. Vim li cas Petus ob tsab ntawv ho raws caij raws nyoog kawg li?

² Petus sau ob tsab ntawv no rau lub caij uas cov ntseeg tab tom “raug ntau yam kev sim siab.” (1 Petus 1:6) Cov neeg lim hiam pib qhia tej yam tsis tseeb thiab ntxias cov ntseeg hauv lub koom txoos kom mus ua phem ua qias. (2 Petus 2:1, 2, 14) Cov ntseeg nyob hauv lub nroog Yeluxalees yuav pom “lub sijhawm uas txhua yam yuav kawg” thaum cov tub rog Loos tuaj muab lawv lub nroog thiab lub tuam tsev rhuav tshem. (1 Petus 4:7) Yog li ntawd, Petus ob tsab ntawv thiaj li pab cov ntseeg seb lawv yuav thev li cas tam sim ntawd thiab yuav npaj li cas rau yav tom ntej. b

3. Vim li cas peb yuav tau ua tib zoo soj ntsuas Petus ob tsab ntawv?

³ Txawm tias Petus sau ob tsab ntawv no rau cov ntseeg nyob thawj 100 xyoo xwb los Yehauvas kuj cia muaj nyob rau hauv phau Vajlugkub thiab, xwv thiaj li pab tau peb niaj hnub nim no. (Loos 15:4) Zoo ib yam li cov ntseeg txheej thaum ub, peb kuj  nyob rau ib lub caij muaj kev phem kev qias uas yuav sim peb txoj kev ntseeg heev. Tsis tas li ntawd, tsis ntev tom ntej no yuav txog lub sij hawm muaj kev txom nyem loj kawg nkaus uas tseem yuav loj tshaj qhov uas los raug lub nroog Yeluxalees thiab lub tuam tsev. Yog li ntawd, zoo rau peb kawm txog Petus ob tsab ntawv xwv peb thiaj tos ntsoov Yehauvas hnub, tsis txhob ntshai neeg, thiab ib leeg hlub ib leeg. Cov lus no kuj yuav pab kom cov txwj laus txawj pab cov kwv tij nkauj muam hauv lub koom txoos tuav rawv lawv txoj kev ntseeg.

4. Raws li 2 Petus 3:3, 4, muaj dab tsi ua tau rau peb txoj kev ntseeg tsuag?

⁴ Cov tib neeg uas tsis ntseeg tej lus faj lem hauv phau Vajlugkub nyob puag ncig peb. Tej zaum yuav muaj cov neeg uas thuam tias peb twb hais tau ntau xyoo lawm tias lub sim ceeb no yuav kawg tiam sis tsis pom muaj dab tsi li. Hos muaj ib txhia tib neeg hais tias yeej yuav tsis kawg li. (Nyeem 2 Petus 3:3, 4.) Yog peb hnov ib tug uas peb mus qhia Vajlugkub rau, ib tug peb ua hauj lwm nrog los sis ib tug hauv peb tsev neeg hais li no, tej zaum kuj yuav ua rau peb txoj kev ntseeg tsuag zuj zus. Yog li ntawd, Petus thiaj qhia tias peb yuav tau ua li cas xwv thiaj pab tau peb.

5. Muaj dab tsi pab kom peb ua siab ntev tos hnub Yehauvas yuav los rhuav tshem lub qab ntuj phem? (2 Petus 3:8, 9)

⁵ Muaj ib txhia saib yam li Yehauvas pheej tsis txawj los rhuav tshem lub qab ntuj phem no li. Yog li ntawd, Petus cov lus yuav pab kom peb nkag siab tias Yehauvas lub sij hawm txawv neeg lub sij hawm. (Nyeem 2 Petus 3:8, 9.) Yehauvas saib ib txhiab xyoo tam li ib hnub. Yehauvas ua siab ntev vim nws tsis xav kom ib tug twg raug puas tsuaj. Thaum Yehauvas hnub los txog, lub sim ceeb no yeej yuav kawg. Tam sim no yog ib lub caij nyoog zoo rau peb mus qhia Vajlugkub rau txhua haiv neeg nyob thoob plaws ntiaj teb.

6. Peb yuav “niaj hnub tos hnub” Yehauvas yuav los li cas? (2 Petus 3:11, 12)

⁶ Petus txhawb kom peb “niaj hnub tos hnub” Yehauvas yuav los. (Nyeem 2 Petus 3:11, 12.) Yuav ua li cas peb thiaj li tos taus? Peb yuav tau niaj hnub xav ntsoov txog lub neej uas nyob hauv lub qab ntuj tshiab seb zoo npaum li cas. Xws li tej cua los tsw qab ntxiag, tej zaub mov los qab heev, cov neeg uas peb hlub yuav rov qab muaj txoj sia dua, thiab peb yuav qhia cov neeg nyob puag txheej thaum ub txog tej lus faj lem hauv phau Vajlugkub seb muaj tiav li cas rau li cas. Yog peb zaum tsaws xav li no ces yuav pab peb tos rawv yav tom ntej thiab pab kom peb ntseeg tias peb yeej nyob rau tiam kawg lawm tiag. Qhov uas peb “paub zaj no lawm,” yuav pab kom peb tsis txhob mloog cov neeg phem uas xav ntxias kom peb “yuam kev ua txhaum.”​—2 Petus 3:17.

7. Ntshai neeg ua tau li cas rau peb?

⁷ Vim peb paub tias Yehauvas hnub twb los txog ze lawm, peb yuav tau ua npaum li peb ua tau mus qhia txoj xov zoo rau lwm leej lwm tus. Tiam sis muaj qee lub sij hawm peb yuav ntshai thiab tsis kam qhia txoj xov zoo rau lwm tus vim peb ntshai nyob tsam lawv xav li cas los sis ho ua li cas rau peb. Hmo uas luag coj Yexus mus kom, Petus tsis kam lees paub Yexus thiab qhia tias nws yog Yexus ib tug thwj tim vim nws ntshai neeg. (Mathais 26:69-75) Tom qab no Petus kuj tsis ntshai neeg lawm, nws thiaj sau los txhawb sawv daws li no tias: “Nej tsis txhob ntshai lawv thiab tsis txhob txhawj.” (1 Petus 3:14) Petus cov lus no cuab tau peb lub zog tias txawm peb ntshai neeg los peb yeej muaj peev xwm peem dhau qhov ntawd.

8. Yuav ua li cas peb thiaj tsis ntshai neeg? (1 Petus 3:15)

 ⁸ Yuav kom koj tsis txhob ntshai neeg, Petus hais tias: “Nej lub siab nej yuav tsum hwm Khetos ua tus Tswv.” (Nyeem 1 Petus 3:15.) c Raws li nqe no, koj yuav tau nco ntsoov tias Yexus Khetos yog koj tus Vaj Ntxwv thiab nws muaj hwj chim heev. Yog tias muaj ib lub cij fim zoo rau koj qhia txoj xov zoo rau lwm tus tiam sis koj ho ntshai, cia li nco ntsoov tias koj muaj ib tug Vaj Ntxwv. Nws kav saum ntuj ceeb tsheej thiab muaj qas txhiab qas vam cov tub txib saum ntuj nrog nws. Nws muaj hwj chim “saib xyuas ib puas tsav yam saum ntuj thiab hauv ntiaj teb” thiab nws “yuav nrog nraim [koj] mus txog thaum lub sim ceeb no kawg.” (Mathais 28:18-20) Petus txhawb kom koj “npaj txhij txhua lub sijhawm” xwv koj thiaj paub piav koj txoj kev ntseeg rau lwm tus. Ua li koj puas xav qhia txoj xov zoo thaum mus ua hauj lwm, mus kawm ntawv los sis lwm qhov chaw? Ua tib zoo xav seb lub sij hawm twg thiaj zoo rau koj qhia ces npaj ua ntej seb koj yuav hais li cas rau li cas thiaj zoo. Thov Yehauvas pab kom koj muaj lub siab tawv qhawv thiab tso siab tias Yehauvas yuav pab kom koj tsis txhob ntshai neeg.​—Tes Haujlwm 4:29.

9. Muaj ib zaug Petus tsis qhia kev hlub li cas? (Saib daim duab.)

⁹ Petus yuav tau kawm kom txawj qhia kev hlub rau lwm tus. Nws kuj nyob ntawd hnov thaum Yexus hais tias: “Nimno kuv yuav muab ib txoj kevcai tshiab rau nej: Nej ib leeg yuav tsum hlub ib leeg ib yam li kuv hlub nej. Nej ib leeg yuav tsum hlub ib leeg.” (Yauhas 13:34) Txawm Petus hnov li no los, tom qab no nws tsis kam noj mov nrog cov ntseeg uas yog lwm haiv neeg vim nws ntshai cov ntseeg uas yog neeg Yudais. Tus tub txib Povlauj thiaj hu Petus tias nws yog neeg siab nkhaus. (Kalatias 2:11-14) Petus kuj mloog Povlauj tej lus ntuas thiab kawm los ntawm tej lus ntawd. Nyob rau hauv Petus ob tsab ntawv, nws thiaj sau tias tsis yog peb hais tias peb hlub cov kwv tij nkauj muam xwb tiam sis yog ib qho tseem ceeb heev uas peb yuav tau ua qhia tias peb hlub lawv.

10. Piav seb yuav ua li cas peb thiaj txawj “hlub txhua tus”? (1 Petus 1:22)

¹⁰ Petus hais tias peb yuav tau “hlub txhua tus” uas nyob hauv lub koom txoos. (Nyeem 1 Petus 1:22.) Peb yuav muaj txoj kev hlub no yog peb coj raws li “qhov tseeb.” Xws li qhov uas hais tias “Vajtswv tsis xaiv leejtwg ntsejmuag.” (Tes Haujlwm 10:34, 35) Qhov uas peb tsis mloog Yexus cov lus yog peb hlub ib co hauv lub koom txoos tiam sis ho tseg ib co. Zoo ib yam li Yexus, tej zaum peb yuav ncawg ib co dua li lwm cov. (Yauhas 13:23; 20:2) Tiam sis Petus txhawb kom peb nco ntsoov “hlub txhua tus” kwv tij nkauj muam tam li ib tse neeg.​—1 Petus 2:17.

11. “Ib tug yuav tsum hlub ib tug tiag tiag” yog li cas?

¹¹ Petus txhawb kom peb “ib tug yuav tsum hlub ib tug tiag tiag.” Nyob rau nqe no, qhov uas “hlub ib tug tiag tiag” yog yuav tau hlub tus neeg ntawd tab txawm nyuaj heev rau peb. Xws li yog muaj ib tug kwv tij hais los sis ua ib yam phuv rau peb lawm, peb yeej xav ua pauj kiag tam sid rov rau nws. Tiam sis Yexus qhia Petus tias qhov uas peb ua pauj ntawd tsis haum Vajtswv siab. (Yauhas 18:10, 11) Petus sau li no tias: “Nej tsis txhob ua phem pauj phem, yog leejtwg foom phem rau nej, nej tsis txhob foom phem pauj, tiamsis nej cia li thov Vajtswv foom koob hmoov rau nws.” (1 Petus 3:9) Thaum koj “hlub ib tug tiag tiag” lawm, koj yuav ua zoo rau nws tab txawm nws ua phuv rau koj.

12. (1) Peb yuav ua tau li cas yog peb ib tug hlub ib tug tiag tiag? (2) Raws li zaj yeeb yaj kiab Ua Kom Muaj Kev Sib Haum Xeeb, koj xyaum tau li cas?

¹² Nyob rau Petus thawj tsab ntawv, nws siv cov lus ‘ib leeg yuav tsum hlub ib leeg tiag tiag.’ Txoj kev hlub no npog tau “txhua yam kev txhaum huv tibsi,” tsis yog npog tau qho yam kev txhaum xwb. (1 Petus 4:8) Tej zaum thaum Petus sau cov lus no, nws ras txog tej uas Yexus tau qhia nws yav nram ntej ub. Thaum lub sij hawm ntawd Petus yeej xav hais tias nws yog ib tug neeg siab dawb siab zoo lawm thaum nws zam nws tus kwv tij “xya zaus.” Tiam sis Yexus qhia Petus thiab peb kom zam “txog 77 zaus,” uas txhais tias zam tag los zam dua. (Mathais 18:21, 22) Yog tias nyuaj rau koj ua li hais no, tsis txhob tag kev cia siab! Tag nrho Yehauvas cov tib neeg yog noob txaug neeg txhaum ces yeej tsis yooj yim zam lwm tus lub txim. Yog li ntawd, cia li ua npaum li koj ua tau los zam tus kwv tij los sis nkauj muam uas tau ua phuv rau koj kom neb nyob sib haum xeeb. d

13. Ua li cas ho nyuaj rau cov txwj laus lauj sij hawm los txhawb cov kwv tij nkauj muam?

¹³ Petus yeej nco ntsoov Yexus cov lus tias: “Koj cia li yug kuv pab yaj.” (Yauhas 21:16) Yog  tias koj yog ib tug txwj laus ces koj yeej paub tias cov lus no yeej yog hais cob coos rau koj ntag. Tej zaum yeej tsis yooj yim rau ib tug txwj laus twg nrhiav sij hawm los mus txhawb cov kwv tij nkauj muam. Cov txwj laus yuav tau saib xyuas lawv tsev neeg kom noj qab haus huv, kom ib leeg hlub ib leeg, thiab tsev neeg txoj kev ntseeg ruaj khov khwb kho. Cov txwj laus yuav tau ntaus thawj hlo mus qhia txoj xov zoo, npaj lus qhuab qhia rau tej kev sib txoos thiab tej rooj sib txoos. Tsis tas li ntawd, ib txhia txwj laus haj tseem yog Pab Kwv Tij Sawv Cev Kev Kho Mob los sis ua hauj lwm rau Chav Tsim Tsa Thiab Kho Tsev. Yog li ntawd, cov txwj laus yeej khwv kawg nkaus li!

14. Muaj dab tsi pab tau kom cov txwj laus mus txhawb cov kwv tij nkauj muam? (1 Petus 5:1-4)

¹⁴ Petus txhawb cov txwj laus tias: “Nej yuav tsum yug pab yaj uas Vajtswv muab tso rau nej saib.” (Nyeem 1 Petus 5:1-4.) Yog tias koj yog ib tug txwj laus, peb yeej paub tias koj hlub cov kwv tij nkauj muam thiab koj yeej xav txhawb lawv. Muaj qee lub sij hawm tej zaum koj yuav xav tias koj tsis xyeej los sis koj sab sab lim lim, koj mus txhawb tsis tau lawv. Yog li koj yuav ua li cas xwb? Qhib siab lug thov Yehauvas txog koj tej kev txhawj xeeb. Petus sau tias: “Tus uas pab ua haujlwm, nws yuav tsum siv nws lub dag lub zog uas Vajtswv pub rau nws.” (1 Petus 4:11) Tej zaum qhov uas cov kwv tij nkauj muam raug yuav kho tsis tau txog thaum lub qab ntuj tshiab. Nco ntsoov tias Yexus Khetos yog “tus Tswv yug yaj uas yog tus thawj” ces nws yuav pab tau lawv zoo dua li koj pab. Nws yuav pab tau lawv tam sim no thiab thaum nyob rau hauv lub ntiaj teb tshiab. Qhov uas Yehauvas xav kom cov txwj laus ua yog tsuas hlub cov kwv tij nkauj muam, saib xyuas lawv, thiab “ua yam ntxwv zoo rau lawv xyaum.”

15. Muaj ib tug txwj laus txhawb cov kwv tij nkauj muam li cas? (Saib daim duab.)

¹⁵ Muaj ib tug txwj laus hu ua Viyees (William) tau ua ib tug txwj laus tau ntau xyoo los lawm. Nws yeej paub zoo txog qhov uas yuav tau mus txhawb cov kwv tij nkauj muam. Thaum muaj tus kab mob khaus viv-19 (COVID-19), txhua txhua lub lim tiam, nws thiab cov txwj laus nyias nug nyias pawg mus qhia Vajlugkub seb lawv noj nyob li cas. Viyees piav tias: “Tos peb ua li no los muaj coob leej kwv tij nkauj muam nyob hauv vaj hauv tsev ces lawv pheej xav li ub li no.” Thaum ib tug  kwv tij nkauj muam twg muaj kev nyuaj siab, Viyees kuj ua tib zoo mloog seb tus ntawd txhawj txog dab tsi rau dab tsi thiab xav tau kev pab li cas. Viyees kuj mus tshawb tej ntaub ntawv los sis yeeb yaj kiab nyob hauv peb lub vej xaij los txhawb tus ntawd. Nws hais li no ntxiv tias: “Qhov uas mus saib xyuas cov kwv tij nkauj muam mas tseem ceeb tshaj plaws tam sim no dua li txhia zaus. Peb twb lauj sij hawm ntau heev mus pab tib neeg los paub txog Yehauvas ces peb huab yam yuav tau siv sij hawm los pab cov kwv tij nkauj muam uas twb teev tiam Yehauvas lawm kom lawv tuav rawv lawv txoj kev ntseeg.”

16. Peb muab Petus ob tsab ntawv siv li cas hauv lub neej?

¹⁶ Peb tsuas tham ob peb nyuag qhov uas nyob hauv Petus ob tsab ntawv xwb. Tej zaum koj yuav pom tau tias muaj qho yam koj yuav tau kho. Xws li, puas ua rau koj xav txog tej koob hmoov koj yuav tau thaum txog lub qab ntuj tshiab? Koj puas tau teem seb koj yuav mus qhia Vajlugkub li cas tom hauj lwm, tom tsev kawm ntawv, los sis lwm qhov chaw? Koj puas pom ib txoj hau kev twg uas koj yuav tau qhia koj txoj kev hlub rau cov kwv tij nkauj muam? Cov txwj laus, nej puas muaj siab kub lug mus pab Yehauvas cov tib neeg? Ua zoo tshuaj xyuas koj tus kheej seb tseem tshuav qhov twg koj ua tsis tau tau, tiam sis tsis txhob rawm maj tag kev cia siab. Nco ntsoov tias “tus Tswv zoo kawg nkaus,” thiab nws yuav pab koj. (1 Petus 2:3) Petus txhawb peb li no tias: “Vajtswv . . . yuav pab kom nej ua tau neeg zoo kawg nkaus, thiab kom nej muab siab rau ntseeg Vajtswv heev ntxiv. Nws yuav txhawb nej lub zog kom nej nyob ruaj nrees.”​—1 Petus 5:10.

17. Yog peb peem tiag thiab cia Yehauvas cob qhia peb ces yuav zoo li cas xwb?

¹⁷ Petus xav hais tias tsis tsim nyog nws nrog Yexus ntxiv lawm. (Lukas 5:8) Tiam sis Yehauvas thiab Yexus nkawd txhawb nqa thiab hlub Petus heev, Petus thiaj li peem tiag ua Yexus ib tug thwj tim. Petus thiaj li muaj feem “mus nyob hauv peb tus Tswv Yexus Khetos tus uas yog peb tus Cawmseej lub [Nceeg Vaj] uas nyob mus ibtxhis li.” (2 Petus 1:11) Qhov no yog ib qho koob hmoov zoo kawg li uas Petus tau txais! Yog tias koj peem tiag ib yam li Petus thiab cia Yehauvas cob qhia koj ces koj yuav tau txais txoj sia ntev dhawv mus ib txhis. Koj yuav “txais txojkev dim [koj] lub txim raws li uas [koj] cia siab rau Vajtswv.”​—1 Petus 1:9.