1. Tshuav tsis ntev tom ntej no Yexus yuav ua dab tsi?

 PEB nyob rau ib lub sij hawm uas yuav muaj ntau yam tshwm sim! Tshuav tsis ntev tom ntej no Yexus yuav txiav txim rau txhua tus tib neeg hauv ntiaj teb. Tiam sis nws twb xub qhia rau nws cov thwj tim paub txog qhov “pov thawj” uas qhia tias thaum twg nws yuav rov los thiab seb thaum twg “lub sim ceeb yuav kawg” xwv peb thiaj paub. (Mathais 24:3) Qhov pov thawj no muaj nyob hauv Mathais tshooj 24 thiab 25, Malakaus tshooj 13, thiab Lukas tshooj 21.

2. Peb yuav tham txog dab tsi nyob hauv zaj kawm no, thiab vim li cas ho yuav pab tau peb?

² Yexus siv peb zaj lus piv txwv los mus qhia kom peb thiaj paub npaj. Cov piv txwv no yog cov yaj thiab cov tshis, kaum tus hluas nkauj, thiab cov talas. Cov no yuav pab kom peb paub tias Yexus yuav txiav txim raws li tus neeg ntawd txoj kev coj noj coj ua. Nyob rau hauv zaj kawm no peb yuav tham txog cov lus piv txwv thiab seb peb khaws tau dab tsi. Cia peb mus tham thawj zaj txog cov yaj thiab cov tshis ua ke.

COV YAJ THIAB COV TSHIS

3. Thaum twg Yexus mam li txiav txim rau tib neeg?

³ Nyob rau hauv Yexus zaj lus piv txwv txog cov yaj thiab cov tshis, nws hais tias nws yuav txiav txim rau tib neeg seb nyob ntawm lawv mloog thiab tsis mloog txoj xov zoo thiab seb lawv puas txhawb nqa cov xaiv tseg. (Mathais 25:31-46) Thaum lub caij “muaj kev txom nyem loj kawg nkaus,” ua  ntej Amankedoos los, nws yuav txiav txim seb tus twg yog yaj tus twg yog tshis. (Mathais 24:21) Zoo ib yam li tus tswv yaj muab cov yaj thiab cov tshis sib cais, Yexus yuav muab cov uas txhawb nqa cov xaiv tseg cais tawm ntawm cov uas tsis kam txhawb nqa.

4. Raws li Yaxayas 11:3, 4, vim li cas peb ho paub tias Yexus yuav txiav txim kom ncaj ncees? (Saib daim duab.)

⁴ Nyob hauv phau Vajlugkub hais tias thaum Yexus txiav txim, nws yeej yuav txiav txim kom ncaj ncees. (Nyeem Yaxayas 11:3, 4.) Nws yuav ua zoo soj ntsuas seb tib neeg ua dab tsi, hais li cas, coj cwj pwm li cas, thiab coj li cas nrog cov xaiv tseg. (Mathais 12:36, 37; 25:40) Yexus yeej paub tias tus twg txhawb nqa cov xaiv tseg thiab tes hauj lwm lawv ua. a Ib yam hauj lwm uas txhawb nqa cov xaiv tseg loj tshaj plaws yog mus tshaj tawm txoj xov zoo. Yexus yuav txiav txim tias cov txhawb nqa no “ncaj ncees” thiab lawv yuav muaj rab peev xwm “tau txoj sia ib txhis tsis kawg” hauv ntiaj teb no. (Mathais 25:46; Tshwmsim 7:16, 17) Qhov no yog ib yam uas zoo kawg nkaus rau cov uas tuav rawv lawv txoj kev ntseeg! Yog lawv tuav rawv lawv txoj kev ntseeg thaum txog txoj kev txom nyem loj kawg nkaus thiab tom qab ntawd ces lawv lub npe yuav nyob rau hauv phau ntawv uas tau txoj sia.​—Tshwmsim 20:15.

5. Peb khaws tau li cas los ntawm zaj lus piv txwv txog cov yaj thiab cov tshis, thiab zaj no pab tau leej twg?

⁵ Qhia tias koj muaj kev ntseeg thiab npuab siab nraim rau Yehauvas. Yexus zaj lus piv txwv txog cov yaj thiab cov tshis yog hais txog cov uas muaj kev vam kev cia siab nyob hauv lub ntiaj teb no mus ib txhis. Lawv qhia tias lawv muaj kev ntseeg thaum lawv pab Khetos cov kwv tij mus tshaj tawm txoj xov zoo thiab ua raws li tus qhev ncaj thiab ntse hais. (Mathais 24:45) Tiam sis cov uas muaj kev vam kev cia siab mus saum ntuj yuav tau mloog cov lus ceeb toom uas hais txog cov yaj thiab cov tshis vim Yexus yuav saib seb lawv coj li cas, muaj cwj pwm li cas, thiab hais lus zoo li cas. Lawv los yuav tau muaj kev ntseeg tib yam nkaus. Yexus kuj tau hais ob zaj lus piv txwv ntxiv los ceeb toom cov xaiv tseg uas hais nyob hauv Mathais tshooj 25. Cia peb mus tham txog zaj uas hais txog kaum tus hluas nkauj.

KAUM TUS HLUAS NKAUJ

6. Tsib tug hluas nkauj tau ua li cas los qhia tias lawv muaj tswv yim? (Mathais 25:6-10)

⁶ Nyob hauv Yexus zaj lus piv txwv txog kaum tus hluas nkauj, nws hais tias lawv tawm mus tos tus nraug vauv. (Mathais 25:1-4) Lawv cia siab hais tias lawv txhua tus yuav tau nrog tus nraug vauv mus noj tshoob ua ke. Yexus piav tias muaj tsib tug muaj “tswv yim” hos tsib tug “tsis muaj tswv yim.” Cov muaj tswv yim npaj txhij thiab tos rawv tus nraug vauv tab txawm nws yuav tuaj thaum ib tag hmo. Lawv npaj lawv cov teeb thiab ib hwj roj xwv lawv cov teeb thiaj li tsis tuag thaum tsaus ntuj. (Nyeem Mathais 25:6-10.) Thaum tus nraug vauv tuaj txog, cov hluas nkauj uas muaj tswv yim nrog nws mus noj nws rooj tshoob. Zoo ib yam li ntawd, cov xaiv tseg uas npaj txhij thiab tuav rawv kev ntseeg txog thaum Khetos los yuav tau txais lawv tej nqi zog uas yog mus nrog tus nraug vauv Yexus mus kav lub Nceeg Vaj saum  ntuj ceeb tsheej. b (Tshwmsim 7:1-3) Ua li cas rau tsib tug hluas nkauj uas tsis muaj tswv yim?

7. Ua li cas rau tsib tug hluas nkauj uas tsis muaj tswv yim thiab yog vim li cas?

⁷ Tsib tug hluas nkauj uas tsis muaj tswv yim npaj tsis txhij thaum tus nraug vauv tuaj txog. Lawv lub teeb tab tom yuav tuag thiab lawv tsis muaj roj los txhab rau lub teeb. Thaum lawv paub hais tias tus nraug vauv tuaj yuav txog, lawv txawm mus yuav roj lawm. Thaum tus nraug vauv tuaj txog, lawv tseem tsis tau rov qab los. “Cov uas npaj txhij lawd thiaj tau nrog tus nraug vauv mus rau hauv tsev mus noj tshoob. Tom qab ntawd, luag txawm muab lub qhov rooj kaw kiag lawm.” (Mathais 25:10) Thaum tsib tug hluas nkauj uas tsis muaj tswv yim rov los txog thiab xav mus koom rooj tshoob, tus nraug vauv hais tias: “Kuv yeej tsis paub nej.” (Mathais 25:11, 12) Lawv npaj tsis txhij tos tus nraug vauv kom tuaj txog. Ua li cov xaiv tseg khaws tau zaj no li cas?

8-9. Cov xaiv tseg khaws tau dab tsi los ntawm zaj lus piv txwv txog kaum tus hluas nkauj? (Saib daim duab.)

⁸ Npaj kom txhij thiab ua zoo zov tos. Yexus tsis tau hais tias muaj ob pab xaiv tseg uas ib pab npaj txhij hos ib pab npaj tsis txhij. Tiam sis nws qhia tias yuav muaj li cas rau cov xaiv tseg ib leeg tus twg yog hais tias lawv tsis npaj thiab tsis thev mus txog thaum kawg. Yog lawv npaj tsis txhij ces lawv yuav tsis tau txais lawv tej nqi zog. (Yauhas 14:3, 4) Txawm peb muaj kev vam kev cia siab mus saum ntuj los sis nyob hauv ntiaj teb no los peb yuav tau mloog cov lus ceeb toom hauv zaj lus piv txwv txog kaum tug hluas nkauj. Peb txhua tus yuav tau zov tos, npaj kom txhij, thiab thev mus txog thaum kawg.​—Mathais 24:13.

⁹ Tom qab Yexus piav zaj lus piv txwv txog kaum tus hluas nkauj kom peb thiaj paub npaj txhij thiab zov tos, nws hais txog zaj talas. Zaj ntawd qhia kom peb ua neeg nquag.

 COV TALAS

10. Ob tug qhev muab siab npuab nkawd tus los pav li cas? (Mathais 25:19-23)

¹⁰ Nyob rau hauv Yexus zaj lus piv txwv txog cov talas, nws hais txog ob tug tub qhe uas muab siab npuab rau nkawd tus los pav hos ib tug tsis muab siab npuab nws tus los pav. (Mathais 25:14-18) Ua ntej thaum tus los pav yuav mus kev deb, nws muab nws cov nyiaj talas coj los faib rau nws cov tub qhe. Muaj ob tug tub qhe sib zog ntsos ua hauj lwm heev, nkawd thiaj muab cov nyiaj coj mus ua luam tau peev ob npaug rov qab los rau nkawd tus los pav. Thaum nkawd tus los pav rov qab los txog, nws qhuas nkawd heev mas nkawd “nrog [nkawd] tus los pav zoo siab xyiv fab.” (Nyeem Mathais 25:19-23.) Ua li tus qhev thib peb muab tus los pav cov nyiaj ua dab tsi?

11. Ua li cas rau tus qhev uas “tub nkeeg,” thiab yog vim li cas?

¹¹ Tus qhev thib peb tau ib lub talas tiam sis nws “tub nkeeg” heev. Nws tus los pav xav kom nws ua zoo siv qhov nyiaj ntawd tiam sis nws muab coj mus log rau hauv av xwb. Thaum tus los pav rov qab los, tus qhev ntawd tsis muaj dab tsi muab rau tus los pav, tsuas yog muab lub qub talas rov qab xwb. Tsis tas li ntawd, tus qhev haj tseem muaj cwj pwm rau tus los pav. Nws tsis thov kom tus los pav zam txim pub rau nws tiam sis nws tseem hais tias tus los pav yog “ib tug neeg tsiv tsaim.” Tus los pav tsis txaus siab rau tus qhev no, nws thiaj muab lub talas tshem mus thiab muab tus qhev ntiab tawm ntawm nws lub tsev mus.​—Mathais 25:24, 26-30.

12. Ob tug qhev uas siab zoo piv txwv txog leej twg?

¹² Ob tug qhev uas siab zoo piv txwv txog cov xaiv tseg uas muaj kev ntseeg. Tus Los Pav uas yog Yexus thiaj li caw lawv los “nrog [lawv] tus los pav zoo siab xyiv fab.” Lawv yog thawj phaum uas sawv hauv qhov tuag rov qab los tau lawv tej nqi zog saum ntuj ceeb tsheej. (Mathais 25:21, 23; Tshwmsim 20:5) Ua li tus qhev uas tub nkeeg tus cwj pwm ceeb toom cov xaiv tseg li cas?

13-14. Cov xaiv tseg khaws tau li cas los ntawm zaj lus piv txwv txog cov talas? (Saib daim duab.)

 ¹³ Qhia tau tias koj yog ib tug neeg nquag. Nyob rau hauv Yexus zaj lus piv txwv txog cov talas thiab kaum tus hluas nkauj, Yexus tsis tau qhia tias cov xaiv tseg yuav tub nkeeg. Tiam sis nws qhia tias yog lawv tsis kub siab teev tiam Yehauvas tiag ces Yehauvas yuav tsis “hu thiab xaiv [lawv] cia” thiab lawv yuav nkag tsis tau rau hauv lub Nceeg Vaj saum ntuj.​—2 Petus 1:10.

¹⁴ Yexus ob zaj lus piv txwv ntawd kuj qhia tseeb tseeb tias tag nrho cov xaiv tseg yuav tau kub siab lug npaj, zov tos, thiab nquag. Yexus kuj hais ntxiv ib qho lus ceeb toom rau cov xaiv tseg nyob hauv Mathais 24:40, 41.

YUAV “COJ” LEEJ TWG?

15-16. Mathais 24:40, 41 pab kom cov xaiv tseg pom tias lawv yuav tau ua zoo zov tos li cas?

¹⁵ Ua ntej Yexus piav seb peb zaj lus piv txwv sib dhos li cas, nws piav txog txoj kev txiav txim zaum kawg rau cov xaiv tseg uas qhia seb yuav xaiv leej twg. Nws hais txog ob tug txiv neej nyob tom teb thiab ob tug poj niam uas tab tom zom zeb. Cov tib neeg no ua hauj lwm tib yam nkaus tiam sis “yuav coj ib tug tseg ib tug.” (Nyeem Mathais 24:40, 41.) Yexus txhawb cov uas raws nws qab tias: “Cia li ceev faj zov tos rau qhov nej tsis paub tias nej tus Tswv yuav los rau hnub twg.” (Mathais 24:42) Tom qab Yexus piav zaj lus piv txwv txog kaum tus hluas nkauj, nws kuj tau hais ib co lus zoo thooj li hais tas los no thiab. (Mathais 25:13) Tej zaud ob zaug uas Yexus hais no yeej sib dhos. Yog li ntawd, Yexus tsuas “coj” cov xaiv tseg uas muaj kev ntseeg ruaj nreeg mus rau hauv lub Nceeg Vaj saum ntuj xwb.​—Yauhas 14:3.

¹⁶ Qhia tias koj ua zoo zov tos. Cov xaiv tseg ib tug twg uas tsis ua zoo zov tos yuav tsis tau qaws nrog “cov uas Vajtswv xaiv tseg.” (Mathais 24:31) Qhov no tsis yog hais rau cov xaiv tseg xwb tiam sis kuj hais rau tag nrho cov uas muaj txoj kev vam kev cia siab yuav nyob mus ib txhis hauv ntiaj teb kom ua zoo zov tos thiab ntseeg ruaj nreeg.

17. Vim li cas peb ho tsis txhawj tias Yehauvas xaiv ib co tom qab no los ua cov xaiv tseg?

¹⁷ Thaum peb paub Yehauvas zoo lawm ces peb tso siab tias txhua yam nws ua puav leej ncaj ncees. Peb tsis txhawj txog qhov uas Yehauvas nyuam qhuav xaiv ib co los ua cov xaiv tseg. c Peb nco txog Yexus cov lus uas nws hais hauv nws zaj lus piv txwv txog cov tub zog thaum tsib teev hauv lub vaj txiv hmab. (Mathais 20:1-16) Cov uas xub tuaj ua hauj lwm thiab cov uas nyuam qhuav ua hauj lwm tau tib tug nqi zog. Zoo ib yam li ntawd, txawm Yehauvas xub xaiv ib co ua ntej ib co ua qab los lawv tus nqi zog puav leej yog mus saum ntuj ceeb tsheej yog tias lawv ntseeg ruaj nreeg.

MLOOG COV LUS CEEB TOOM

18-19. Peb kawm tau li cas los ntawm Yexus cov lus piv txwv?

¹⁸ Zaj no peb kawm tau dab tsi? Zaj lus piv txwv uas hais txog cov yaj thiab cov tshis qhia tau tias cov uas xav nyob mus ib txhis hauv lub ntiaj teb no yuav tau tuav rawv lawv txoj kev ntseeg thiab muab siab npuab rau Yehauvas tam sim no thiab thaum muaj txoj kev txom nyem loj kawg nkaus. Nyob rau lub sij hawm ntawd, Yexus yuav txiav txim tias cov uas muaj kev ntseeg ruaj nreeg  “yuav tau txoj sia ib txhis tsis kawg.”​—Mathais 25:46.

¹⁹ Tsis tas li ntawd, peb kuj tham txog Yexus ob zaj lus piv txwv uas muaj lus ceeb toom rau cov xaiv tseg. Ib zaj yog hais txog kaum tus hluas nkauj. Tsib tug uas muaj tswv yim npaj txhij thiab zov tos tus nraug vauv kom tuaj txog. Tiam sis tsib tug uas tsis muaj tswv yim npaj tsis txhij ces tus nraug vauv tsis pub lawv nrog nws mus noj tshoob. Zaj no qhia kom peb npaj thiab ua siab ntev tos txog hnub uas Yexus los mus rhuav tshem lub sim ceeb no. Txuas ntxiv ntawd, Yexus kuj piav txog zaj uas hais txog cov talas. Muaj ob tug qhev nquag thiab sib zog ntsos ua hauj lwm rau nkawd tus los pav mas ua rau tus los pav txaus siab heev. Tiam sis tus los pav tsis yuav tus qhev tub nkeeg lawm. Zaj no qhia rau peb tias peb yuav tau kub siab lug ua Yehauvas tes hauj lwm mus txog ntua thaum kawg. Peb kuj kawm tias cov xaiv tseg yuav tau zov tos xwv lawv thiaj tau txais tus nqi zog mus saum ntuj ceeb tsheej. Tom qab ntsuj rog Amankedoos, lawv yuav yog Yexus tus nkauj nyab.​—2 Thexalaunikes 2:1; Tshwmsim 19:9.

20. Yehauvas yuav ua li cas rau cov uas mloog nws tej lus ceeb toom?

²⁰ Lub sij hawm uas Yexus yuav txiav txim twb los txog ze ze lawm tiam sis peb yuav tau tsis txhob ntshai. Yog peb tuav rawv peb txoj kev ntseeg ces peb Leej Txiv uas nyob saum ntuj yuav muab “lub hwjchim uas loj kawg nkaus” rau peb xwv peb thiaj “sawv taus ntawm neeg Leej Tub xub ntiag.” (2 Kauleethaus 4:7; Lukas 21:36) Txawm peb txoj kev vam kev cia siab nyob saum ntuj los sis hauv ntiaj teb no, yog peb ua raws li Yexus cov lus ceeb toom hauv cov lus piv txwv ces peb yuav ua haum peb Leej Txiv Yehauvas siab. Tsis tas li ntawd, Yehauvas yuav muab peb cov npe sau rau hauv “phau ntawv” uas tau txoj sia.​—Daniyees 12:1; Tshwmsim 3:5.