1-2. Vim li cas Yehauvas tsim kom peb muaj lub siab pub rau luag?

 THAUM Yehauvas tsim tib neeg, nws tsim kom lawv muaj lub siab pub rau luag thiaj ua rau lawv zoo siab. (Tes Hauj Lwm 20:35) Qhov no tsis tau txhais hais tias thaum lwm tus muab rau peb mas peb yuav tsis muaj kev zoo siab. Txhua leej txhua tus puav leej zoo siab thaum tau txais ib yam khoom pub twg. Tiam sis thaum peb muab rau lwm tus mas ua rau peb zoo siab heev. Vim li cas ho yog ib qho zoo uas Yehauvas tsim kom peb muaj lub siab pub rau luag?

² Tos Yehauvas tsim peb zoo li no los vim tej ntawd yuav tsav ntxiv kom peb huab yam muaj kev zoo siab. Xws li thaum peb xav hauv nruab siab tias peb yuav muab ib yam khoom twg pub rau lwm tus es tom qab ntawd peb muab tag lawm mas ua rau peb zoo siab heev. Yog li ntawd, thaum Yehauvas tsim peb yam li no mas zoo tiag tiag li.​—Phau Ntawv Nkauj 139:14.

3. Vim li cas ho hais tias Yehauvas yog tus Vajtswv uas muaj kev zoo siab?

³ Nyob hauv phau Vajlugkub qhia rau peb tias cov uas pub rau luag yeej zoo siab dua. Yog li ntawd, peb thiaj paub vim li cas Yehauvas yog tus Vajtswv uas muaj kev zoo siab. (1 Timautes 1:11) Yehauvas yog thawj tug uas pub rau lwm tus thiab yeej tsis muaj ib tug twg yuav muab tau npaum li Yehauvas muab. Yehauvas muab txoj sia rau peb, “peb thiaj txawj mus txawj los, muaj txoj sia nyob li no.” (Tes Hauj Lwm 17:28) Yog li ntawd, “ib puas tsav yam uas zoo thiab ib puas tsav yam koob hmoov uas zoo kawg nkaus” yeej yog los ntawm Yehauvas los tiag.​—Yakaunpaus 1:17.

4. Muaj dab tsi pab tau kom peb huab yam muaj kev zoo siab?

 ⁴ Peb txhua tus yuav zoo siab heev yog tias peb xyaum pub ub pub no rau luag lwm tus ib yam li Yehauvas. (Efexus 5:1) Nyob rau hauv zaj kawm no peb yuav tham seb Yehauvas muaj lub siab pub rau luag li cas rau li cas thiab peb yuav tham seb peb yuav coj li cas thaum peb pub rau luag tiam sis zoo li lawv tsis ris peb txiaj ntsig. Qhov uas peb kawm tej no yuav pab tau kom peb muaj lub siab kaj thiab zoo siab hlo pub rau lwm tus mus li.

XYAUM YEHAUVAS TXOJ KEV PUB RAU LUAG

5. Yehauvas tau muab dab tsi rau peb?

⁵ Cia peb mus tham txog qho yam uas Yehauvas zoo siab muab pub rau peb. Txawm Yehauvas tsis muab ntau ntau kom peb muaj txiag nplua nuj los nws pub kom peb muaj txawm peem rau lub cuab lub yig. Xws li zaub mov, khaub ncaws, thiab muaj ib qho chaw los nkaum tshav nkaum nag. (Phau Ntawv Nkauj 4:8; Mathais 6:31-33; 1 Timautes 6:6-8) Tsis yog Yehauvas muab tej hais tas no vim nws yuav tsum muab. Yog li ntawd, vim li cas Yehauvas ho zoo siab hlo ua tej no rau peb?

6. Peb khaws tau dab tsi los ntawm Mathais 6:25, 26?

⁶ Tos Yehauvas pub yam ub yam no rau peb los twb yog vim nws hlub peb. Cia peb ua tib zoo xav txog Yexus cov lus nyob hauv Mathais 6:25, 26 txog tej uas Yehauvas tau tsim. (Nyeem.) Yexus hais li no txog tej noog tias: “Tej noog twb tsis txawj cog tsis txawj sau qoob los cia hauv txhab. Txawm li ntawd los, nej Leej Txiv saum ntuj tseem pub tej noog tau noj.” Tom qab ntawd, Yexus mam li nug li no tias: “Nej yeej muaj nqis tshaj tej noog ntawd los tsis yog?” Yexus tus nru lus qhia tau tias Yehauvas saib cov uas teev tiam nws muaj nuj nqis tshaj tej tsiaj txhu uas nws tau tsim. Yog li ntawd, yog Yehauvas twb saib xyuas tej tsiaj txhu ces nws yim huab yuav saib xyuas peb heev dua! Yehauvas zoo tam li ib leej txiv uas niaj hnub mus khwv los koob nws lub cuab lub yig vim nws hlub nws tsev neeg.​—Phau Ntawv Nkauj 145:16; Mathais 6:32.

7. Peb yoog tau Yehauvas es pub ub pub no rau lwm tus li cas? (Saib daim duab.)

⁷ Peb kuj yoog tau Yehauvas es pub ub pub no rau lwm tus vim peb hlub lawv. Xws li koj puas paub ib tug kwv tij los sis nkauj muam twg uas tsis muaj noj tsis muaj hnav? Tej zaud Yehauvas yuav tshoj koj lub siab  kom cev tes mus pab lawv. Thaum muaj xwm txheej, Yehauvas cov tib neeg yeej mus pab tib neeg ntawg ntiag. Xws li thaum muaj tus kab mob khaus viv-19 (COVID-19), cov kwv tij nkauj muam yeej sib pab koom tes pub zaub pub mov, khaub ncaws, thiab tej khoom ub khoom no rau cov uas tsis muaj txawm peem. Ib txhia kuj muab dej siab coj mus pab rau tes hauj lwm thoob qab ntuj. Cov dej siab no pab tau cov kwv tij nkauj muam nyob thoob plaws lub ntiaj teb no heev thaum muaj xwm txheej. Tos cov kwv tij nkauj muam txaus siab hlo muab dej siab los twb yog vim lawv ua raws li cov lus nyob hauv Henplais 13:16 uas hais tias: “Nco ntsoov ua haujlwm zoo thiab ib tug pab ib tug, rau qhov tej ntawd haum Vajtswv siab.”

8. Yehauvas pub dag pub zog kom peb ua taus dab tsi? (Filipis 2:13)

⁸ Yehauvas pub dag pub zog. Yehauvas lub zog yeej tsis txawj ploj li. Nws yeej txaus siab hlo muab nws lub zog ntawd rau cov uas teev tiam nws. (Nyeem Filipis 2:13.) Ua li koj puas tau thov Yehauvas kom pub dag pub zog rau koj tswj koj lub siab kom tsis txhob qaug rau tej kev sim siab los sis kom koj thev taus tej kev sim siab uas koj tab tom raug? Tej zaud koj twb tau thov kom nws pab koj thev taus ib hnub ntxiv. Thaum Yehauvas teb koj cov lus thov mas ntshe koj yuav xav ib yam li tus tub txib Povlauj xav tias: “Kuv thev taus tej no tib si vim Vajtswv pub dag pub zog rau kuv.”​—Filipis 4:13.

9. Peb yuav xyaum Yehauvas li cas? (Saib daim duab.)

⁹ Txawm peb ntxiv tsis tau dag zog ib yam li Yehauvas ntxiv dag zog rau lwm tus los peb yeej siv tau peb lub zog mus pab lwm tus. Xws li peb kuj mus pab tu tau cov kwv tij nkauj muam uas laus lawm los sis muaj mob tej tsev los sis mus pab lawv khiav me ntsis hauj lwm. Yog tias peb ua tau los kuj mus pab tu los sis kho lub Tsev Nceeg Vaj. Yog peb siv peb lub dag lub zog los mus ua tej no ces peb yuav ua tau ntau yam los mus pab cov kwv tij nkauj muam.

10. Tej lus uas peb hais yuav txhawb tau lwm tus li cas?

¹⁰ Nco ntsoov hais tias tej lus uas koj hais yuav txhawb tau lwm tus lub dag lub zog heev. Puas muaj ib tug twg uas koj xav rau hauv nruab siab tias koj yuav mus hais lo puav lus txhawb nws lub dag lub zog? Koj puas paub leej twg xav tau kev txhawb zog? Yog koj paub ib tug twg, tsis txhob ua siab deb, kav tsij mus cuag nws. Koj mus tau ntawm nws tsev, hu xov tooj, xa ib tsab xov, ntaus email los sis ntaus ntawv hauv xov tooj. Txhob xav ntev xav ntau tias yuav hais li cas. Lo puav lus xwb los tej zaud twb ua rau nws kaj siab lawm hov  ntau tuaj los sis pab tau nws rau siab ntso teev tiam Yehauvas.​—Pajlug 12:25; Efexus 4:29.

11. Yehauvas muab nws lub tswv yim li cas rau lwm tus?

¹¹ Yehauvas tsav tswv yim. Tus thwj tim Yakaunpaus sau hais tias: “Yog nej leejtwg tsis muaj tswvyim, kom nws cia li thov ntawm Vajtswv, Vajtswv yuav pub tswvyim rau nws, rau qhov Vajtswv yog tus muaj siab dawb siab zoo pub ib puas tsav yam rau sawvdaws, nws tsis khuvxim li.” (Yakaunpaus 1:5) Raws li nqe no hais, Yehauvas tsis muab nws lub tswv yim npog cia rau nws ib leeg xwb. Nws muab nthuav qhia rau txhua leej txhua tus paub. Yakaunpaus hais tias Yehauvas yeej “tsis khuvxim li.” Thaum peb thov kom Yehauvas coj peb txoj hau kev, nws yeej tsis ua rau peb txaj muag tiam sis nws txhob kom peb kav tsij nug nws.​—Pajlug 2:1-6.

12. Thaum twg zoo rau peb muab peb lub tswv yim qhia rau lwm leej lwm tus?

¹² Peb xyaum tau Yehauvas li cas kom tsis txhob muab peb lub tswv yim npog cia? (Phau Ntawv Nkauj 32:8) Muaj ntau zaus peb yeej muaj rab peev xwm qhia peb lub tswv yim pub rau lwm leej lwm tus. Xws li cob qhia cov tshiab kom txawj mus qhia Vajlugkub. Cov txwj laus kuj pab tau kom cov tub leg num thiab cov kwv tij uas twb ua kev cai raus dej lawm txawj ua lawv tes hauj lwm hauv lub koom txoos. Tsis tas li ntawd, cov kwv tij nkauj muam uas txawj ua los sis kho tej tsev pe hawm Yehauvas kuj pab cob tau kom lwm tus txawj ua thiab.

13. Peb yuav xyaum Yehauvas thaum cob qhia lwm tus li cas?

¹³ Nco ntsoov xyaum Yehauvas thaum koj cob qhia ib tug twg. Yehauvas tsis muab nws tej tswv yim npog cia tiam sis nws zoo siab hlo muab nthuav tawm qhia rau sawv daws paub. Yog li ntawd, peb yuav tau qhia tej uas peb paub rau lwm tus. Tsis txhob xav tias tsam koj qhia lwm tus ces lawv ho los txeeb koj tes hauj lwm ua lawm. Los sis txhob xav tias: ‘Twb tsis muaj neeg cob qhia kuv ces cia nws mam li kawm nws!’ Tsis zoo rau Yehauvas cov tib neeg coj tus cwj pwm yam li no. Peb yuav tau tsis txhob ua siab deb tiam sis cia li txaus siab hlo qhia lwm tus thiab siv “peb lub zog” los pab lawv. (1 Thexalaunikes 2:8) Yog peb ua tib zoo cob qhia ces “lawv yuav txawj qhia tej ntawd rau lwm tus.” (2 Timautes 2:1, 2) Yog ib tug cob qhia dhau ib tug ces sawv daws yuav txawj thiab muaj kev kaj siab.

THAUM LUAG TSIS RIS PEB TXIAJ NTSIG

14. Feem coob ua li cas xwb thaum peb ua ib yam zoo rau lawv?

¹⁴ Thaum peb ua siab dawb paug muab ub muab no rau lwm tus xws li cov kwv tij nkauj muam, lawv yeej ris peb tus txiaj tus ntsig. Tej zaud lawv kuj sau ib daim ntawv tuaj ua peb tsaug los sis lawv kuj ua lwm yam los qhia tias lawv ris txiaj ntsig rau tej peb tau ua. (Kaulauxais 3:15) Thaum lawv ua peb tsaug, peb yeej zoo siab heev tias peb tau ua ib yam zoo pub rau lawv.

15. Peb yuav tau nco ntsoov li cas tab txawm ib txhia tsis ris peb txiaj ntsig?

¹⁵ Muaj qee zaug ib txhia tib neeg tsis tsa ncauj los hais ib lo lus los ua peb tsaug rau tej peb tau ua rau lawv. Tej zaud peb tau siv sij hawm, siv dag siv zog los sis siv nyiaj txiag los mus pab lawv. Muaj dab tsi pab tau peb kom tsis txhob tu siab los sis chim? Nco ntsoov cov lus uas hais nyob rau hauv Tes Hauj Lwm 20:35. Qhov ua rau peb zoo siab tsis yog nyob ntawm seb lawv puas ris peb txiaj ntsig los tsis ris. Cia peb mus kawm seb dab tsi yuav pab tau kom peb rau siab ntso pub rau lwm tus tab txawm qho tus tsis ris peb txiaj ntsig.

16. Peb yuav tau nco ntsoov li cas thaum peb pub rau luag?

 ¹⁶ Nco ntsoov tias thaum koj muab rau lwm tus twb yog koj xyaum Yehauvas. Yehauvas yeej muab txhua yam zoo rau tib neeg tab txawm lawv yuav ris nws txiaj ntsig los tsis ris. (Mathais 5:43-48) Yehauvas cog lus tias thaum peb pub es tsis “tos luag them rov qab” ces peb “yuav tau koob hmoov nplua mias.” (Lukas 6:35) “Them rov qab” kuj yog tos lwm tus hais ib lo lus ua tsaug. Txawm luag yuav hais thiab tsis hais los Yehauvas yeej yuav them tej peb twb ua zoo rau lwm tus rov rau peb.​—Pajlug 19:17; 2 Kauleethaus 9:7.

17. Muaj dab tsi ua rau peb xav pub rau lwm tus? (Lukas 14:12-14)

¹⁷ Peb kuj xyaum tau Yehauvas thaum peb ua raws li Yexus cov lus uas hais nyob rau hauv Lukas 14:12-14. (Nyeem.) Yeej tsis ua li cas yog hais tias peb xav caw los sis ua zoo rau cov uas caw tau peb rov qab. Tiam sis nco ntsoov tias yog peb xav muab rau luag kom luag thiaj rov muab rau peb xwb ces peb yuav tau hloov los mus xyaum coj raws li Yexus tau hais. Peb kuj xyaum muab rau tus uas muab tsis tau rov rau peb. Yog peb ua li no ces peb yuav muaj kev kaj siab vim peb xyaum Yehauvas. Qhov uas peb tsis tos kom lwm tus pauj rov qab, yuav pab tau kom peb muaj kev zoo siab pub ntxiv rau lwm tus tab txawm lawv tsis hais ib lo twg ua peb tsaug.

18. Peb yuav tau nco ntsoov txhob ua dab tsi thiab yog vim li cas?

¹⁸ Tsis txhob xav qhov phem txog lwm tus. (1 Kauleethaus 13:7) Yog lwm tus tsis ris koj txiaj ntsig ces koj yuav tau rov nug koj tus kheej li no tias: ‘Puas yog lawv tsis ris txiaj ntsig tiag los sis lawv tsis nco qab lawm xwb?’ Tej zaud kuj muaj lwm yam ua rau lawv tsis nco qab ua peb tsaug. Xws li tej txhia yeej ris txiaj ntsig tiam sis lawv ncauj lus tsawg tsawg. Tej txhia lawv yeej ib txwm muab rau lwm tus ces thaum lwm tus ho muab rau lawv ces lawv ho txaj muag. Txawm li cas los xij peem, yog tias peb hlub peb cov kwv tij nkauj muam tiag ces peb yuav tsis xav qhov phem txog  lawv thiab haj tseem yuav pub rau luag.​—Efexus 4:2.

19-20. Thaum peb pub rau luag, vim li cas peb yuav tau ua siab ntev? (Saib daim duab.)

¹⁹ Ua siab ntev. Vaj Ntxwv Xalaumoos sau li no tias: “Cia li muab koj lub ncuav pov rau hauv dej, rau qhov dhau ntau hnub koj yuav rov pom thiab.” (Tej Lus Qhia 11:1) Nws tus nru lus qhia hais tias yuav yog ntev loo tib neeg mam li hais ib los ua peb tsaug. Muaj tseeb li no rau ib tug muam.

²⁰ Tau ntau ntau xyoo dhau los lawm, tus uas saib xyuas thaj tsam tus poj niam tau sau ib tsab ntawv mus txhawb ib tug muam uas nyuam qhuav ua kev cai raus dej kom nws tuav rawv nws txoj kev ntseeg. Tau yim xyoo tom qab, tus muam ntawd mam li teb hais tias: “Koj tsis paub tiam sis kuv xav sau tuaj qhia rau koj tias tej koj hais pab tau kuv ob peb xyoos dhau los no. Koj cov lus yeej zoo kawg li thiab kuv yeej nco ntsoov nqe Vajlugkub koj siv los txhawb kuv lub zog.” a Tom qab nws qhia hais tias nws raug dab tsi rau dab tsi, nws hais tias: “Muaj qee lub sij hawm kuv twb xav tso Yehauvas tseg tiam sis kuv xav txog nqe Vajlugkub uas koj sau, kuv thiaj li peem tiag tsis kam tso tseg. Yim lub xyoos dhau los no tsis muaj dab tsi pab tau kuv, tsuas yog koj cov lus sawv nraim hauv kuv nruab siab.” Thaum txais tau tsab ntawv no ntshe tus saib xyuas thaj tsam tus poj niam yuav zoo siab heev! Peb los kuj zoo ib yam li ntawd thiab. Tej zaum tom qab peb ua ib yam dab tsi zoo tag ces tau ntev loo lwm tus mam li ua peb tsaug.

21. Vim li cas koj ho yuav xyaum Yehauvas txoj kev pub rau luag mus li?

²¹ Yehauvas tsim peb kom muaj kev zoo siab pub rau luag dua li thaum luag pub rau peb. Peb yeej zoo siab heev thaum peb pab cov kwv tij nkauj muam. Thiab peb zoo siab heev thaum lawv hais ib los ua peb tsaug. Txawm tus tau ntawd yuav ua peb tsaug thiab tsis ua los peb yeej zoo siab tias peb ua qhov zoo qhov yog. Nco ntsoov tias thaum koj muab ib yam twg rau lwm tus, Yehauvas “yuav muab ntau tshaj tej ntawd rau koj.” (2 Xwmtxheej Vajntxwv 25:9) Txawm koj muab ntau yam rau lwm tus los nco ntsoov tias Yehauvas tseem muab tau ntau tshaj ntawd rau koj. Cia peb rau siab ntso xyaum peb Leej Txiv tus uas nyob saum ntuj ceeb tsheej lub siab dawb siab zoo uas pub rau luag.