Thaum peb kawm Vajlugkub, peb yuav tau ua zoo xav li hais no, ‘Kuv yuav kawm tau dab tsi?’ Peb yuav tau nco ntsoov tias tej zaud peb xav tias peb twb paub tias yam uas peb kawm ntawd yog hais txog dab tsi lawm tiam sis Yehauvas kuj qhia peb txog ib yam tshiab. Yuav ua li cas peb thiaj qhib siab kawm txog Yehauvas?

Thov Yehauvas kom muaj tswv yim. Thov kom Yehauvas pab koj paub seb nws xav kom koj kawm dab tsi tam sim no. (Yakaunpaus 1:5) Tsis txhob xav hais tias koj twb paub paub lawm es tsis tas kawm ntxiv.​—Pajlug 3:5, 6.

Siv Vajtswv Txoj Lus rau hauv koj lub neej. Nyob rau hauv Henplais 4:12 hais tias: “Vajtswv txojlus muaj txojsia.” Txhua zaus peb nyeem phau Vajlugkub, peb yeej yuav kawm tau ib yam tshiab thiab kuj yuav pab tau peb rau ntau txoj kev. Tiam sis tsuas muaj li no xwb yog tias peb xam pom tias peb yuav tau cia Vajtswv ua tus cob qhia peb.

Ris txiaj ntsig rau txhua yam uas Yehauvas siv los qhia peb. Tej uas Yehauvas muab los tsav peb txoj kev ntseeg zoo yam li “ib rooj mov.” (Yaxayas 25:6) Thaum koj kawm Vajlugkub, tsis txhob hla tej lub ntsiab uas koj tsis tshua nyiam. Tiam sis cia Vajtswv pab koj txawj hloov koj tus cwj pwm. Yog koj ua li no mas koj yuav nyiam kawm heev!