1-2. (1) Thaum tus tub txib Povlauj sau tsab ntawv rau cov Khixatias hauv Yudias, lawv lub neej zoo li cas? (2) Vim li cas tsab ntawv no ho pab tau lawv ua luaj?

 TOM QAB Yexus tuag, cov Khixatias uas nyob hauv lub nroog Yeluxalees thiab Yudias raug ntau yam kev nyuaj siab ntxhov plawv. Tsis ntev thaum muaj lub koom txoos, lawv raug kev tsim txom hnyav heev. (Tes Hauj Lwm 8:1) Kwv lam li 20 lub xyoos tom qab ntawd, lawv raug kev tshaib nqhis thiab kev txom nyem. (Tes Hauj Lwm 11:27-30) Muaj ib ncuas sij hawm thaum kwv lam li xyoo 61 tom qab Yexus, cov Khixatias tsis raug kev tsim txom npaum li tseem yuav muaj los yav tom ntej. Nyob rau ncua sij hawm ntawd, Yehauvas tshoov tus tub txib Povlauj siab kom nws xa ib tsab ntawv mus rau lawv. Cov lus uas nyob rau hauv tsab ntawv ntawd pab tau lawv thev tej yam uas yuav muaj los raug lawv.

² Tsab ntawv uas sau rau cov Henplais mas sau raws caij raws nyoog kawg li vim cov Khixatias tsuas ntsib kev thaj yeeb ib nyuag ntu xwb. Povlauj cov lus ntuas pab tau lawv thev dhau txoj kev txom nyem nyuaj siab uas lawv tab tom yuav raug. Tej lus faj lem uas Yexus hais txog lub nroog Yeluxalees thiab lub tuam tsev yuav raug puas tsuaj twb los ze ze lawm. (Lukas 21:20) Povlauj thiab cov Khixatias nyob hauv Yudias yeej tsis paub tias thaum twg yuav muaj tej no li. Txawm li ntawd los cov Khixatias yuav tau siv lub sij hawm uas lawv muaj los  mus tsav lawv txoj kev ntseeg xwv lawv thiaj thev taus.​—Henplais 10:25; 12:1, 2.

3. Vim li cas cov Khixatias niaj hnub nim no yuav tau ua zoo soj ntsuas tsab ntawv uas sau rau cov Henplais?

³ Peb tab tom yuav raug txoj kev txom nyem uas loj tshaj cov Khixatias uas yog neeg Henplais. (Mathais 24:21; Tshwmsim 16:14, 16) Yog li ntawd, cia peb mus ua zoo soj ntsuas Yehauvas tej lus ntuas uas nws faj tseg los pab cov Khixatias txheej thaud xwv thiaj pab tau peb.

UA NEEG PAUB TAB

4. Cov Khixatias uas yog neeg Yudais raug dab tsi? (Saib daim duab.)

⁴ Cov Yudais uas tau pauv lawv lub neej los ua ib tug Khixatias yuav tau hloov ntau yam thiab yeej tsis yooj yim rau lawv ua li ntawd hlo li. Tau ntau ntau xyoo, lub nroog Yeluxalees yog ib qho chaw uas tseem ceeb heev. Tus vaj ntxwv uas sawv cev Yehauvas kuj kav nyob rau qhov ntawd. Cov neeg uas xav teev tiam Yehauvas kuj tuaj rau ntawm lub tuam tsev. Txhua tus Yudais uas muaj kev ntseeg puav leej coj raws li Mauxes Txoj Kev Cai uas cov thawj coj qhia. Xws li muaj kev cai los qhia lawv noj zaub noj mov, ua kev cai txiav, thiab yuav coj li cas rau lwm haiv neeg. Tiam sis tom qab Yexus tuag, Yehauvas tsis kam txais yuav tej khoom fij ntawm lub tuam tsev ntxiv lawm. Yog li ntawd, thiaj tsis yooj yim rau cov Yudais uas los ua ib tug Khixatias hloov lawv txoj kev teev tiam. (Henplais 10:1, 4, 10) Tsis hais cov Khixatias uas muaj kev ntseeg xws li tus tub txib Petus los haj tseem nyuaj quj qees rau lawv hloov tej yam no thiab. (Tes Hauj Lwm 10:9-14; Kalatias 2:11-14) Vim lawv hloov lawv txoj kev ntseeg, cov Yudais tej thawj coj thiaj li tsim txom lawv heev.

5. Cov Khixatias yuav tau ua tib zoo xyuam xim li cas?

⁵ Cov Khixatias uas yog neeg Henplais raug ob pab tib neeg tsim txom. Ib pab yog cov Yudais tej thawj coj uas saib lawv tam li yog neeg fav xeeb. Hos muaj dua ib pab yog ib txhia hauv lub koom txoos pheej txhob kom coj raws li Mauxes Txoj Kev Cai. Tos lawv txhob li no los tej zaum lawv tsis xav raug kev tsim  txom. (Kalatias 6:12) Ua li muaj dab tsi yuav pab tau kom cov Khixatias tuav rawv lawv txoj kev ntseeg rau Yehauvas?

6. Povlauj txhawb kom cov Khixatias ua dab tsi? (Henplais 5:14–6:1)

⁶ Povlauj tsab ntawv uas nws sau mus rau cov Henplais txhawb kom lawv kawm Vajtswv Txoj Lus thiab muab coj los ua tib zoo xav. (Nyeem Henplais 5:14–6:1.) Povlauj siv Cov Nqe Lus Henplais thiab ua tib zoo piav tias vim li cas cov Khixatias txoj kev pe hawm Yehauvas zoo tshaj li cov Yudais txoj kev pe hawm. a Tsis tas li ntawd, Povlauj txhawb kom cov Khixatias paub Vajtswv Txoj Lus zoo zoo xwv lawv thiaj paub cais thaum ib tug twg qhia yog thiab tsis yog.

7. Niaj hnub nim no peb raug dab tsi?

⁷ Niaj hnub nim no peb yeej pom coob leej ntau tus qhia tej yam uas tsis raws li Yehauvas pom zoo. Muaj ib txhia tib neeg hais tias Yehauvas Cov Tim Khawv ua tsis yog vim lawv mloog tej lus hauv phau Vajlugkub ua hais txog kev pw ua niam txiv. Tsis tas li ntawd, lawv hais tias peb coj tsis ncaj vim peb rho tib neeg tawm hauv lub koom txoos mus. Xyoo tas xyoo tuaj, tib neeg tej kev xav tawm tsam Yehauvas txoj kev xav ua ntu zus. (Pajlug 17:15) Yog li ntawd, peb yuav tau tawm tsam tej kev xav zoo li ntawd thiab tsis txhob cia lawv ua rau peb qaug zog thiab tso Yehauvas tseg.​—Henplais 13:9.

8. Yuav ua li cas peb thiaj ua tau ib tug Khixatias uas paub tab?

⁸ Povlauj qhia rau cov Henplais thaum ub kom kav tsij tsav lawv txoj kev ntseeg xwv lawv thiaj ua tau cov Khixatias uas paub tab. Peb los yuav tau ua tib yam nkaus li ntawd. Peb yuav tau ua tib zoo kawm phau Vajlugkub kom paub tshab tshab xwv peb thiaj li paub Yehauvas thiab nws tej kev xav. Txawm peb twb ua kev cai raus dej los sis twb ntseeg Yehauvas tau ntev loo lawm los peb yuav tau rau siab ntso kawm Vajtswv Txoj Lus tsis tseg tsis tu. (Phau Ntawv Nkauj 1:2) Yog peb kawm tsis tu ncua ces yuav tsav tau peb txoj kev ntseeg yam li Povlauj tau qhia rau cov Henplais.​—Henplais 11:1, 6.

“PEB YOG COV UAS NTSEEG MUS TXOG HNUB UAS PEB DIM PEB LUB TXIM”

9. Vim li cas cov Khixatias yuav tau muaj kev ntseeg loj heev?

⁹ Cov Khixatias yuav tau muaj kev ntseeg ruaj nreeg lawv thiaj li dim txoj kev txom nyem uas yuav los raug Yudias. (Henplais 10:37-39) Yexus qhia rau nws cov thwj tim kom kav tsij khiav mus lawm pem roob thaum lawv pom cov tub rog tuaj vij lub nroog Yeluxalees. Nws cov lus no yog hais rau tag nrho cov Khixatias, tsis hais cov uas nyob hauv zos los sis nyob toj siab. (Lukas 21:20-24) Txhua txhua zaus thaum muaj tub rog vij ib lub nroog twg, cov tib neeg toj siab yeej khiav mus nyob rau hauv tus ntsa yeej kom thiaj tiv thaiv lawv. Thaum Yexus hais tias kom khiav mus saum roob es tsis txhob khiav mus rau hauv nroog, tej zaum cov Khixatias saib tam li tsis yog lawm. Yog li ntawd, lawv yuav tau muaj kev ntseeg loj heev lawv thiaj mloog Yexus cov lus.

10. Yog cov Khixatias muaj kev ntseeg ces lawv yuav ua dab tsi? (Henplais 13:17)

¹⁰ Cov Khixatias uas yog neeg Henplais yuav tau tso siab rau cov uas Yexus siv los mus coj lub koom txoos. Tej zaum cov uas coj lub koom txoos twb qhia rau lawv tias yuav khiav thaum twg thiab yuav khiav li cas rau li cas. (Nyeem Henplais 13:17.) Yog li ntawd, tus  tub txib Povlauj thiaj li hais rau cov kwv tij nkauj muam tias: “Nej yuav tsum mloog cov thawj uas saib xyuas nej tej lus thiab ua raws li lawv hais.” Nws tsis tau yuam kom lawv mloog cov txwj laus tiam sis nws xav kom lawv tso siab rau cov txwj laus. Ces cov Khixatias yuav tau xyaum mloog cov txwj laus lus ua ntej txoj kev txom nyem los txog. Yog lawv mloog cov txwj laus thaum teb chaws tseem tiaj tus ces yuav yooj yim rau lawv mloog cov txwj laus thaum muaj tej yam kev nyuaj siab los raug.

11. Vim li cas cov Khixatias niaj hnub nim no yuav tau muaj kev ntseeg ruaj nreeg?

¹¹ Zoo ib yam li cov Khixatias uas yog neeg Henplais, peb yuav tau muaj kev ntseeg. Peb nyob rau lub sij hawm uas tib neeg feem coob tsis ntseeg tias lub sim ceeb no yuav kawg thiab lawv thuam peb vim peb ntseeg. (2 Petus 3:3, 4) Txawm nyob hauv phau Vajlugkub qhia peb txog qho yam uas yuav muaj tshwm sim thaum txog lub sij hawm muaj kev txom nyem loj kawg nkaus los haj tseem tshuav ntau yam uas peb tsis tau paub txog. Peb yuav tau muaj kev ntseeg ruaj nreeg tias Yehauvas yuav los muab lub sim ceeb no rhuav tshem kom raws caij raws nyoog thiab nws yeej yuav saib xyuas peb.​—Hanpakus 2:3.

12. Dab tsi yuav pab tau kom peb dim txoj kev txom nyem loj kawg nkaus?

¹² Peb yuav tau tsav peb txoj kev ntseeg tias Yehauvas siv “tus qhev ncaj thiab ntse” los mus coj peb txoj hau kev niaj hnub nim no. (Mathais 24:45) Thaum txoj kev txom nyem loj kawg nkaus pib, tej zaum peb yuav hnov xov kom ua li cas rau li cas ib yam li cov Khixatias uas yog neeg Henplais txheej thaum ub tau hnov thaum cov Loos tuaj vij lub nroog Yeluxalees. Tam sim no yog lub sij hawm uas peb kav tsij npaj peb tus kheej kom mloog cov uas coj Yehauvas lub koom haum lus. Yog peb twb tsis kam mloog tam sim no ces yuav tsis yooj yim rau peb mloog thaum muaj txoj kev txom nyem loj kawg nkaus.

13. Vim li cas thiaj muaj cov lus ntuas hauv Henplais 13:5?

¹³ Cheem cov Khixatias uas yog neeg Henplais tseem tos kom khiav, lawv yuav tau ua lub neej kom yooj yim thiab tsis txhob qaug “rau nyiaj rau kub.” (Nyeem Henplais 13:5.) Lawv ib txhia yeej raug kev tshaib kev nqhis thiab nyob txom nyem ntsuav dua los lawm. (Henplais 10:32-34) Txawm lawv tiv kev txom nyem tag los, ib txhia txawm pib xav kom tau nyiaj txiag los mus pab tiv thaiv lawv tsev neeg. Tiam sis tsis muaj ib qho nyiaj twg yuav cawm tau lawv dim thaum lub nroog Yeluxalees raug puas tsuaj. (Yakaunpaus 5:3) Txhua tus uas ntshaw tej khoom ub khoom no tej zaum yuav tso tsis tau lawv tej tsev thiab khoom vaj khoom tsev tseg.

14. Yog peb muaj kev ntseeg ruaj nreeg yuav pab kom peb txawj txiav txim siab li cas txog nyiaj txiag thiab tej khoom ub khoom no?

¹⁴ Yog peb ntseeg tias tshuav tsis ntev Yehauvas yuav muab lub sim ceeb no rhuav tshem ces peb yeej tsis kam vuag ub vuag no kom peb muaj nyiaj txiag los sis muaj khoom ub khoom no. Thaum txog txoj kev txom nyem loj kawg nkaus, nyiaj txiag yuav tsis muaj nuj nqis lawm. Nyob hauv phau Vajlugkub hais tias tib neeg yuav “muab lawv tej nyiaj tej kub povtseg rau hauv plawv kev ib yam li tej liamsim, vim tej nyiaj tej kub ntawd pab tsis tau lawv dim ntawm [Yehauvas] txojkev chim uas loj kawg nkaus.” (Exekees 7:19) Yog li ntawd, peb yuav tau ua lub neej kom yooj yim kom koob tau peb tsev neeg thiab teev tiam tau Yehauvas xwb. Tsis txhob mus luab ub luab no los sis yuav tej yam khoom noj peb lub sij hawm ntau ntau mus tu. Ntxiv  ntawd, peb yuav tau ceev faj tsis txhob khuv xim tej khoom uas peb xav tias tseem ceeb heev hauv peb lub neej. (Mathais 6:19, 24) Thaum lub sim ceeb no yuav kawg zuj zus, peb txoj kev ntseeg yuav raug sim seb peb lub siab nyob rau ntawm Yehauvas los sis nyob rau ntawm tej khoom uas peb muaj.

“NEJ YUAV TSUM UA SIAB NTEV”

15. Vim li cas cov Khixatias uas yog neeg Henplais ho yuav tau thev kam tiag?

¹⁵ Cov Khixatias uas yog neeg Henplais yuav tau thev kam tiag vim lawv txoj kev ntseeg yuav raug sim. (Henplais 10:36) Txawm ib txhia raug tsim txom hnyav heev yav tag los lawm los ib txhia haj tseem tsis tau raug. Yog li ntawd, Povlauj thiaj li npaj lawv lub siab kom ceev faj tias lawv yuav huab yam raug kev tsim txom thiab lawv yuav tau thev ib yam li Yexus kom mus txog ntua hnub tuag. (Henplais 12:4) Lub sij hawm ntawd cov neeg Yudais tsiv tsaim thiab npau taws heev vim muaj coob leej los ua Khixatias lawm. Ob peb xyoos ua ntej ntawd, thaum Povlauj mus qhia txoj xov zoo hauv lub nroog Yeluxalees, muaj ib pab tib neeg muab nws ntaus. Muaj tshaj li 40 tus Yudais “coglus hais tias lawv yuav tsis noj tsis haus ib yam dabtsi mus txog thaum lawv tua tau [Povlauj] tso.” (Tes Hauj Lwm 22:22; 23:12-14) Txawm cov Khixatias yuav raug ntxub thiab tsim txom los lawv yuav tau rau siab ntso teev tiam Yehauvas ua ke, mus tshaj tawm txoj xov zoo, thiab tsav lawv txoj kev ntseeg.

16. Tsab ntawv uas sau rau cov Henplais pab tau peb li cas thaum peb raug kev tsim txom? (Henplais 12:7)

¹⁶ Muaj dab tsi pab tau cov Khixatias uas yog neeg Henplais thev taus tej yam uas lawv raug? Povlauj xav pab kom lawv pom tias qhov uas lawv thev taus ntawd yuav pab tau lawv npaum li cas. Nws ua tib zoo qhia rau lawv tias thaum lawv thev ib yam kev sim siab twg, tej zaum yog Vajtswv cia tej ntawd los cob qhia lawv. (Nyeem Henplais 12:7.) Tej uas lawv raug yuav pab tau kom lawv pauv tej  yam uas lawv haj tseem tsis tau hloov kom thiaj haum Yehauvas siab. Yuav yooj yim rau lawv thev dua yog lawv xav txog tej yam zoo los ntawm tej yam lawv raug.​—Henplais 12:11.

17. Povlauj paub li cas txog txoj kev uas thev kev tsim txom?

¹⁷ Povlauj txhawb cov Khixatis uas yog neeg Henplais kom ua siab tawv qhawv thiab tsis txhob tso Yehauvas tseg thaum lawv raug kev sim siab. Tos Povlauj hais li no los nws kuj yog ib tug uas tau tsim txom cov Khixatias dua los lawm thiab nws twb pom dua tias txoj kev tsim txom ntawd hnyav npaum li cas. Tsis tas li ntawd, nws kuj paub hais tias yuav thev li cas rau li cas thiaj dhau txoj kev tsim txom vim tom qab nws ntseeg, nws kuj raug tawm tsam kawg li. (2 Kauleethaus 11:23-25) Yog li ntawd, Povlauj thiaj txhawb kom lawv tsis txhob tso siab rau lawv tus kheej tiam sis tso siab rau Yehauvas thaum raug kev sim siab. Povlauj hais tias: “[Yehauvas] yog tus uas pab kuv, kuv yuav tsis ntshai.”​—Henplais 13:6.

18. Qhov uas peb paub li cas txog yav tom ntej yuav pab tau kom peb thev taus kev tsim txom li cas?

¹⁸ Peb cov kwv tij nkauj muam ib txhia tab tom thev kev tsim txom tam sim no. Qhov uas peb pab tau lawv yog thov Vajtswv pab lawv thiab saib seb lawv tsis muaj yam twg txawm peem. (Henplais 10:33) Nyob hauv phau Vajlugkub hais tias “txhua tus uas xav ua lub neej kom Vajtswv tau ntsejmuag, lawv yeej raug kev tsimtxom.” (2 Timautes 3:12) Vim muaj li no peb txhua leej txhua tus yuav tau npaj rau tej yam kev nyuaj siab uas tseem yuav muaj los yav tom ntej. Cia peb tso siab plhuav rau Yehauvas tias nws yuav pab peb thev dhau tej kev sim siab uas tseem yuav los raug peb. Tsis ntev tom ntej no Yehauvas yuav cawm txhua tus uas muab siab npuab nws kom dim plaws.​—2 Thexalaunikes 1:7, 8.

19. Peb yuav npaj li cas rau txoj kev txom nyem loj kawg nkaus? (Saib daim duab.)

¹⁹ Tsab ntawv uas Povlauj sau mus rau cov Khixatias nyob thawj 100 xyoo npaj kom lawv paub thev tej kev txom nyem uas tseem yuav los mus raug lawv. Nws txhawb kom lawv rau siab kawm Vajtswv Txoj Lus kom lawv nkag siab zoo zoo. Qhov uas lawv ua li no yuav pab tau lawv kom tsis txhob mus mloog tej yam tsis tseeb uas yuav rhuav tau lawv txoj kev ntseeg. Tsis tas li ntawd, nws txhawb ntxiv kom lawv tsav lawv txoj kev ntseeg xwv lawv thiaj maj nroos mloog Yexus thiab cov uas coj hauv lub koom txoos lus. Ntxiv ntawd, nws pab kom cov Khixatias saib qhov uas lawv thev kev sim siab ib yam li yog ib txoj kev cob qhia los ntawm lawv Leej Txiv Yehauvas. Yog peb muab Povlauj cov lus ntuas no coj los siv hauv peb lub neej ces yuav pab tau kom peb thev taus mus txog thaum kawg thiab.​—Henplais 3:14.