1-2. Vim li cas Vajtswv cov tib neeg muaj kev zoo siab? (Yakaunpaus 1:22-25)

 YEHAUVAS thiab nws tus Tub xav kom peb tau txais kev zoo siab xwb. Tus sau Phau Ntawv Nkauj 119:2 hais tias: “Cov uas tuav rawv [Yehauvas] tej lus qhia kuj tau nyob kaj siab lug, yog cov uas nrhiav [Yehauvas] kawg siab kawg ntsws.” Yexus hais tias: “Tus uas hnov Vajtswv txoj lus thiab coj raws nraim li ntawd thiaj yog tus uas tau koob hmoov!”​—Lukas 11:28.

² Yehauvas cov tib neeg puav leej muaj kev zoo siab. Vim li cas peb thiaj zoo siab? Muaj ntau yam ua rau peb zoo siab tiam sis qhov uas tseem ceeb tshaj plaws yog peb nyeem Vajtswv Txoj Lus tas zaj tas zog thiab muab siv rau hauv peb lub neej.​—Nyeem Yakaunpaus 1:22-25.

3. Thaum peb coj raws li Vajtswv Txoj Lus pab tau peb li cas?

³ Qhov uas “xyaum ua raws li Vajtswv Txojlus” pab tau peb ntau yam. Xws li thaum peb coj raws li tej uas peb kawm hauv Vajtswv Txoj Lus, peb yuav ua rau Yehauvas zoo siab thiab qhov ntawd kuj yuav ua rau peb zoo siab thiab. (Tej Lus Qhia 12:13) Tsis tas li ntawd, peb yuav nrog peb tsev neeg thiab cov nyob hauv lub koom txoos sib raug zoo. Ntxiv ntawd, peb yuav zam dhau ntau yam teeb meem uas cov tib neeg tsis mloog Yehauvas lus niaj hnub raug. Tom qab Vaj Ntxwv Daviv hais txog Yehauvas tej kev cai thiab kev txiav txim, nws thiaj hais li no: “Kuv tau txais nqi zog vim  yog kuv hwm tej kevcai ntawd ntag.”​—Phau Ntawv Nkauj 19:7-11.

4. Vim li cas ho tsis yooj yim rau peb muab Vajtswv Txoj Lus siv rau hauv peb lub neej?

⁴ Yeej tsis yooj yim rau peb nyeem Vajtswv Txoj Lus thiab muab tej ntawd coj los siv rau hauv peb lub neej. Txawm peb lub neej muaj ntau yam ua rau peb tsis xyeej los peb yuav tau lauj sij hawm los nyeem thiab kawm phau Vajlugkub kom peb thiaj li nkag siab seb Yehauvas xav kom peb ua li cas rau li cas. Peb yuav mus kawm txog qho yam kom pab tau peb nyeem phau Vajlugkub tsis tu ncua, dab tsi yuav pab tau peb xav txog tej uas peb nyeem, thiab yuav muab siv rau hauv peb lub neej li cas rau li cas.

SEJ SIJ HAWM LOS NYEEM VAJTSWV TXOJ LUS

5. Muaj dab tsi tab kaum peb lub sij hawm?

⁵ Yehauvas cov tib neeg feem coob yeej khwv kawg nkaus li. Xws li peb ib txhia ua hauj lwm los koob lub cuab lub yig. (1 Timautes 5:8) Muaj ib txhia kuj tu lawv cov txheeb ze uas laus lawm los sis muaj mob. Txhua tus yeej yuav tau lauj sij hawm los saib xyuas lawv txoj kev noj qab haus huv thiab. Tsis tas li ntawd, peb kuj muaj hauj lwm khiav nyob rau hauv lub koom txoos. Ib yam uas tseem ceeb tshaj uas peb yuav tau ua yog mus qhia txoj xov zoo. Vim koj muaj hauj lwm khuam tes khuam taw, ua li cas koj thiaj yuav nrhiav tau sij hawm los nyeem phau Vajlugkub tsis tu ncua, muab tej ntawd coj los ua zoo xav, thiab muab siv rau hauv koj lub neej?

6. Yuav ua li cas koj thiaj li yuav muaj siab nyeem phau Vajlugkub? (Saib daim duab.)

⁶ Nyeem Vajlugkub yog ib “yam uas tseem ceeb dua ntais” rau hauv peb lub neej. (Filipis 1:10) Yog li ntawd, peb yuav tau saib ntshis kom peb tau nyeem tas zaj tas zog. Nyob hauv phau ntawv nkauj hais tias: “Qhov uas ua rau nws zoo siab yog [Yehauvas] txoj kevcai, nws tshawb nrhiav [Yehauvas] txoj kevcai nruab hnub hmo ntuj.” (Phau Ntawv Nkauj 1:1, 2) Qhov no qhia tias kom peb nco ntsoov nyeem phau Vajlugkub. Thaum twg thiaj yog lub sij hawm zoo  nyeem Vajlugkub? Tej zaum nyias yuav xaiv nyias ib lub sij hawm tiam sis qhov tseem ceeb yog yuav tau nyeem Vajlugkub tsis tu ncua. Muaj ib tug kwv tij npe hu ua Vitawm (Victor) hais tias: “Kuv nyiam sawv lig tiam sis kuv xav nyeem Vajlugkub rau thaum sawv ntxov rau qhov tsis muaj ub muaj no los tab kaum kuv. Thaum lub caij ntawd kuv cus plaws thiab kuv lub hlwb los khiav zoo dua.” Tej zaud koj kuj xav li Vitawm thiab. Rov tshuaj koj tus kheej li no tias, ‘Thaum twg thiaj li zoo caij zoo nyoog rau kuv nyeem phau Vajlugkub?’

XAV TXOG TEJ KOJ NYEEM

7-8. Piav seb tsis zoo rau peb ua dab tsi thaum nyeem Vajlugkub.

⁷ Yog koj teem sij hawm nyeem Vajlugkub, muaj ib yam uas koj yuav tau ua tib zoo ceev faj. Koj puas tau nyeem ib yam dab tsi es tom qab ntawd koj twb tsis nco qab tias koj nyeem txog dab tsi? Yog peb tsis ua zoo saib, peb kuj coj ib yam li ntawd thaum nyeem Vajlugkub. Tej zaum peb kuj txiav txim siab nyeem ob peb tshooj txhua txhua hnub. Yeej zoo kawg li uas peb ua li no tiam sis peb yuav tsum teem kom muaj hom phiaj los mus nyeem thiab nco ntsoov nyeem thaum txog caij. (1 Kauleethaus 9:26) Tiam sis yuav kom pab tau peb, peb yuav tau ua tshaj li qhov uas nyeem Vajlugkub xwb.

⁸ Muab ua piv txwv li no tias: Tej nroj tsuag yuav tsum tau nag thiaj ciaj. Tiam sis yog nag los hlob hlob ces tej av yuav nkos ntsab nkos ntsuav. Thaum muaj li no ces dej nag kuj tsis zoo thiab, vim dej cia li ntws si lawm xwb tsis txheem mus rau hauv tej cag kom pab tej nroj tsuag hlob. Zoo ib yam li ntawd, peb yuav tau tsis txhob nyeem Vajlugkub tsawg tsuag kom tag vim peb yuav tsis muaj sij hawm xav, tsis nco qab, thiab tsis paub muab tej uas peb nyeem coj los siv.​—Yakaunpaus 1:24.

9. Yog tias peb nyeem phau Vajlugkub tsawg tsuag kom tag xwb peb yuav tau ua dab tsi?

⁹ Puas muaj tej thaud koj nyeem Vajlugkub tsawg tsuag kom tag xwb? Yog koj ua  li hais no ces maj mam nyeem kom qeeb zog, koj thiaj muaj sij hawm los xav txog tej uas koj tau nyeem. Tsis txhob xav tias nyuaj dhau. Tej zaud lauj sij hawm kom ntev zog xwv koj thiaj ua tib zoo xav txog tej koj nyeem. Los sis nyeem Vajlugkub kom tsawg zog xwv koj thiaj muaj sij hawm xav mus xav los txog tej koj tau nyeem ntawd. Vitawm hais tias: “Kuv nyeem ib tshooj zuj zus xwb. Vim kuv nyeem thaum sawv ntxov, kuv thiaj muab cov nqe Vajlugkub coj los xav thawm hnub.” Txawm koj yuav nyeem li cas los xij peem, nco ntsoov maj mam nyeem kom koj thiaj nkag siab tej yam uas koj nyeem ntawd.​—Phau Ntawv Nkauj 119:97; saib lub ntsiab “ Xav Txog Cov Lus Nug No.”

10. Piav seb koj yuav muab tej koj kawm siv li cas hauv koj lub neej. (1 Thexalaunikes 5:17, 18)

¹⁰ Thaum koj nyeem tej nqe Vajlugkub, ua zoo xav seb koj yuav muab siv rau hauv koj lub neej li cas. Xws li ua zoo xav tias, ‘Kuv yuav siv nqe no tam sim no los sis lwm hnub li cas?’ Piv txwv tias peb nyeem 1 Thexalaunikes 5:17, 18. (Nyeem.) Tom qab nyeem ob nqes no tag, ua zoo xav seb koj thov Yehauvas pes tsawg zaus thiab koj puas thov tawm plaws hauv nruab siab tuaj. Koj kuj xav txog tej yam uas koj ris Yehauvas txiaj ntsig rau. Hos tej zaud koj kuj ua Yehauvas tsaug rau peb yam uas koj tau lawm. Txawm koj siv ob peb feeb los mus xav txog tej yam nyob hauv phau Vajlugkub los yuav pab tau kom koj nkag siab Vajtswv Txoj Lus thiab muab siv rau hauv koj lub neej. Yog txhua txhua hnub koj siv tej uas koj tau nyeem hauv phau Vajlugkub, ntev mus ntev tuaj koj yuav paub tab teev tiam Yehauvas dua. Tiam sis koj yuav ua li cas yog tias tseem tshuav ntau yam koj yuav tau xyaum?

MUAJ TEJ HOM PHIAJ UAS KOJ UA TAU

11. Piav seb vim li cas muaj qee lub sij hawm zoo yam li ntau dhau koj ua tsis tau.

¹¹ Thaum koj nyeem Vajlugkub, tej thaud yuav ua rau koj qaug zog vim koj xam pom tias tseem tshuav ntau yam koj ua tseem tsis tau tau. Xws li muaj ib hnub koj nyeem phau Vajlugkub es ho hais tias kom tsis txhob xaiv ntsej muag. (Yakaunpaus 2:1-8) Koj xam pom tias koj yuav tau hloov es coj zoo zog rau lwm tus. Tiam sis hnub tom qab koj nyeem dua ib qho kom tswj koj tus nplaig. (Yakaunpaus 3:1-12) Koj mam nco dheev tias koj tau hais siab hais qis rau ib tug twg lawm ces koj xav tias koj yuav tau xyaum kom txawj hais lus rau lwm tus. Hnub tom qab koj nyeem Vajlugkub dua ho ceeb  toom kom tsis txhob mus nrog cov tsis teev tiam Yehauvas koom ua ke. (Yakaunpaus 4:4-12) Koj xam pom tias koj yuav tau ua tib zoo xaiv tej uas koj saib, koj nyeem, thiab koj mloog. Hnub tom qab ntawd, koj xav mus xav los thiab hais tias tej no ntau dhau ua rau koj coj tsis tag.

12. Vim li cas koj yuav tau tsis txhob ntaus siab yau thaum koj nyeem Vajlugkub es tseem tshuav ntau yam koj yuav tau hloov? (Saib cov taw ntawv.)

¹² Qhov uas koj zeem tias tshuav ntau yam koj yuav tau hloov qhia tau tias koj txo hwj chim kawg li. Yog peb txo hwj chim ces thaum nyeem phau Vajlugkub, peb yuav nrhiav seb peb yuav tau hloov li cas rau li cas. a Nco ntsoov tias peb yuav tau rau siab ntso hloov dua siab tshiab tsis tseg tsis tu. (Kaulauxais 3:10) Muaj dab tsi yuav pab tau kom koj xyaum coj raws li Vajtswv Txoj Lus?

13. Ib yam uas pab kom koj xyaum coj raws li tej koj tau kawm yog dab tsi? (Saib daim duab.)

¹³ Koj tsis txhob thooj txhij ua ib zaug sim coj txhua yam raws li koj tau nyeem hauv phau Vajlugkub tiam sis maj mam sim ib ob qho zuj zus rau hauv koj lub neej. (Pajlug 11:2) Xyaum ua li no: Muab kos tseg seb koj yuav xyaum coj li cas tam sim no thiab rau yav tom ntej. Ua li koj yuav pib qhov twg tuaj?

14. Koj yuav pib qhov hom phiaj twg?

¹⁴ Tej zaud zoo rau koj pib tej hom phiaj uas yooj yim rau koj ua ntej. Los sis ua tej yam uas koj paub tias koj yuav tsum tau hloov ua ntej. Thaum koj txiav txim siab tau tias koj yuav ua li cas lawm ces mus tshawb nrhiav hauv peb tej ntaub ntawv xws li phau Yehauvas Cov Timkhawv Phau Ntawv Tshawb  Nrhiav Vajlugkub. Thov Yehauvas pab kom koj “muaj lub siab kub lug thiab muaj zog npho ua raws li nws siab nyiam.” (Filipis 2:13) Tom qab ntawd, muab tej yam uas koj kawm tau ntawd coj los siv rau hauv koj lub neej. Yog koj ua tag ib qho hom phiaj lawm ces yuav ua rau koj yim huab xav ua lwm lub hom phiaj ntxiv thiab. Thaum koj pom tias koj hloov tau lawm los sis coj tau cwj pwm li ib tug Khixatias ces yuav txhawb tau kom koj yim huab hloov ntxiv.

CIA VAJTSWV TXOJ LUS “UA HAUJLWM HAUV NEJ”

15. Yehauvas cov tib neeg txawv lwm cov tib neeg uas nyeem phau Vajlugkub li cas? (1 Thexalaunikes 2:13)

¹⁵ Muaj ib txhia tib neeg hais tias lawv tau nyeem phau Vajlugkub ntau zaus lawm tiam sis lawv puas ntseeg tej lus uas nyob rau hauv? Lawv puas xyaum coj lub neej raws li tau hais nyob hauv phau Vajlugkub? Feem coob lawv tsis ua raws li tej lus nyob rau hauv. Tiam sis Yehauvas cov tib neeg tsis coj li ntawd! Zoo ib yam li cov ntseeg nyob thawj 100 xyoo, peb ntseeg tias “yeej yog Vajtswv txoj tiag.” Tsis tas li ntawd, peb yeej ua npaum li peb ua tau los coj peb lub neej kom raws li tej lus hais nyob rau hauv.​—Nyeem 1 Thexalaunikes 2:13.

16. Muaj dab tsi pab tau kom peb xyaum ua raws li Vajtswv Txoj Lus?

¹⁶ Yeej tsis yooj yim nyeem Vajtswv Txoj Lus thiab muab coj los siv rau hauv peb lub neej. Tej zaud yeej muaj ub muab no los tab kawm kom peb tsis txhob nyeem tau. Los sis tej zaud peb kuj nyeem tsawg tsuag kom tag tiam sis tsis nco qab xyov peb nyeem txog dab tsi. Los sis tej zaud peb kuj yuav tau hloov ntau yam mas ua rau peb qaug zog tag. Txawm li cas los xij peem, yog muaj Yehauvas pab lawm ces peb yeej yuav ua tau xwb. Kav tsij cia Yehauvas pab es xyaum ua raws li nws Txoj Lus, tsis yog mloog tas xwb es tsis nco qab lawm. Yog peb yim nyeem Vajtswv Txoj Lus thiab muab siv rau hauv peb lub neej ces peb yim muaj kev zoo siab.​—Yakaunpaus 1:25.