1. Kwv lam li xyoo 95, Yauhas lub neej zoo li cas xwb?

KWV lam li xyoo 95, tus tubtxib Yauhas muaj kev nyuaj siab heev. Nws laus heev lawm thiab raug kaw tim lub koog Povtxwv Pamaus. Thaum ntawd tej zaum tas nrho Yexus cov tubtxib tsuas tshuav nws tib leeg lawm xwb. (Tshwmsim 1:9) Yauhas paub tias cov Khixatia cuav qhuab qhia tej yam tsis yog thiab ua rau cov koom txoos sib tawg tas. Zoo li tsis ntev xwb yuav tsis tshuav ib tug tseem Khixatia li lawm.​—Yudas 4; Tshwmsim 2:15, 20; 3:1, 17.

2. Raws li Tshwmsim 7:9-14, zaj yog toog uas Yauhas pom ua txog dabtsi? (Saib daim duab ntawm lub khaum.)

² Thaum Yauhas tseem nyob txom nyem ntsuav li no, Vajtswv ua ib zaj yog toog rau nws pom txog yav tom hauv ntej. Nws pom ib tug timtswv lossis tubtxib saum ntuj hais kom 4 tug tubtxib saum ntuj txwv tsis pub cua ntsawj lub ntiajteb mus txog thaum nias homthawj rau Vajtswv cov tub qhe tas tso. Tej cua ntsawj ntiajteb hais txog kev ceeblaj txom nyem loj kawg li. (Tshwmsim 7:1-3) Cov tub qhe hais txog 144,000 leej uas yuav tau nrog Yexus kav saum ntuj. (Lukas 12:32; Tshwmsim 7:4) Tom qab ntawd, Yauhas pom ib pab neeg uas coob heev. Nws hais tias: “Kuv pom muaj neeg coob coob suav tsis txheeb li tuaj txhua lub tebchaws tuaj! tsis hais xeem twg, haivneeg twg thiab cov neeg uas hais yam lus twg los muaj; sawvdaws tuaj sawv ntawm hauv ntej lub zwmtxwv thiab tus menyuam Yaj.” (Nyeem Tshwmsim 7:9-14.) Sim xav seb thaum Yauhas pom tias yav tom hauv ntej yuav muaj cov tseem Khixatia uas teev tiam Yehauvas coob heev, ho ua rau nws zoo siab npaum li cas!

3. (1) Vim li cas zaj yog toog uas Yauhas pom thiaj txhawb tau peb lub zog? (2) Zaj no, peb yuav kawm txog dabtsi?

³ Peb yeej paub tias zaj yog toog no txhawb tau Yauhas txojkev  ntseeg kawg li. Yimhuab txhawb tau peb txojkev ntseeg rau qhov zaj yog toog ua txog tiam kawg uas peb nyob no! Nyob rau peb tiam, peb pom tias tsheej plhom leej los pe hawm Yehauvas. Lawv muaj kev cia siab tias lawv yuav thev dhau kev ceeblaj txom nyem loj kawg li thiab yuav tau nyob mus ib txhis hauv ntiajteb. Yim caum tawm xyoo tas los no Yehauvas qhia tias pab neeg coob coob no yog leejtwg. Zaj no, peb yuav kawm tias nws tau ua li no li cas. Peb yuav kawm txog 2 yam: (1) Pab neeg no coob npaum li cas? (2) Pab neeg no tuaj qhovtwg tuaj? Tej uas peb kawm no yuav txhawb tau cov uas muaj feem nrog pab neeg coob coob.

4. Tej kev ntseeg cuav tsis qhia qhov tseeb hauv phau Vajlugkub li cas, thiab Cov Tub Kawm Vajlugkub txawv ntawm lawv li cas?

⁴ Tej kev ntseeg cuav tsis qhia qhov tseeb hauv phau Vajlugkub. Lawv tsis qhia tias muaj ib hnub cov uas mloog Vajtswv lus yuav tau nyob mus ib txhis hauv ntiajteb. (2 Kauleethaus 4:3, 4) Niaj hnub nimno, ntau txojkev ntseeg cuav qhia tias txhua tus neeg zoo yuav tau mus nyob saum ntuj thaum lawv tuag lawm. Tiamsis txij xyoo 1879 los, Cov Tub Kawm Vajlugkub * uas luam tawm phau ntawv Watch Tower (Phau Tsom Faj) tsis qhia li ntawd. Lawv pom tias Vajtswv yuav muab lub ntiajteb kho ua ib lub Vaj Kaj Siab dua thiab cov neeg mloog lus tsheej plhom leej yuav tau nyob hauv ntiajteb no, tsis yog saum ntuj. Tiamsis tseem yuav ntev heev lawv mam li paub tias cov neeg mloog lus no yog leejtwg tiag.​—Mathais 6:10.

5. Cov Tub Kawm Vajlugkub paub li cas txog pab 144,000 leej?

⁵ Cov Tub Kawm Vajlugkub yeej paub tias yuav muaj ib “cov uas Vajtswv twb txhiv tawm hauv ntiajteb lawm” yuav tau mus nrog Yexus kav saum ntuj. (Tshwmsim 14:3) Cov no yuav muaj 144,000 leej thiab yuav yog cov Khixatia uas tau muab lawv lub neej cob rau Yehauvas thiab tau teev tiam Yehauvas tsis tseg thaum lawv tseem nyob hauv ntiajteb. Ua li Cov Tub Kawm Vajlugkub ho paub li cas txog pab neeg coob coob?

6. Cov Tub Kawm Vajlugkub xav li cas txog pab neeg coob coob?

⁶ Hauv zaj yog toog, Yauhas pom pab neeg coob coob “sawv ntawm hauv ntej lub zwmtxwv thiab tus menyuam Yaj.” (Tshwmsim 7:9) Nqe Vajlugkub no ua rau Cov Tub Kawm Vajlugkub xav tias pab neeg coob coob no kuj yuav tau mus nyob saum ntuj thiab. Yog 2 pab no puavleej yuav mus nyob saum ntuj, lawv ho sib txawv li cas? Cov Tub Kawm Vajlugkub xav tias pab neeg coob coob yuav tsum yog cov Khixatia uas mloog Vajtswv lus tsis tag thaum lawv tseem nyob hauv ntiajteb. Txawm cov no coj lub neej dawb huv raws li phau Vajlugkub qhia los, tej zaum lawv ib txhia tseem yog tswv cuab ntawm kev ntseeg cuav tej tshawj (church). Cov Tub Kawm Vajlugkub xav tias cov no yeej muaj kev hlub rau Vajtswv tiamsis lawv txojkev hlub tsawg zog lawm, lawv thiaj tsis tau nrog Yexus kav xwb. Vim lawv hlub Vajtswv tsis txaus, pab neeg coob coob yuav mus sawv ntawm hauv ntej lub zwmtxwv xwb, tiamsis yuav tsis tau zaum kiag.

7. Raws li Cov Tub Kawm Vajlugkub xav, leejtwg yuav tau nyob hauv ntiajteb thaum Khetos Kav 1,000 Xyoo, thiab lawv xav li cas txog cov txivneej puag thaum ub?

⁷ Yog li ntawd, leejtwg yuav nyob hauv ntiajteb? Cov Tub Kawm Vajlugkub xav tias tom qab 144,000 leej thiab pab neeg coob coob mus nyob saum ntuj lawd, tseem yuav muaj tsheej plhom leej uas yuav tau txojsia nyob hauv ntiajteb thaum Khetos Kav 1,000 Xyoo. Cov Tub Kawm Vajlugkub tsis xav tias tsheej plhom leej no yuav teev tiam Yehauvas ua ntej Khetos Kav 1,000 Xyoo. Lawv xav tias cov no yuav  kawm txog Yehauvas thaum Khetos tseem tabtom kav xwb. Tom qab ntawd, cov uas txais yuav Yehauvas tej kevcai yuav tau txojsia nyob mus ib txhis hauv ntiajteb, tiamsis cov uas ntxeev siab yuav raug puam tsuaj. Cov Tub Kawm Vajlugkub kuj xav tias cov txivneej puag thaum ub uas muaj kev ntseeg thiab tas sim neej ua ntej Khetos tuag, tej zaum lawv yuav ua “vajntxwv” hauv ntiajteb no rau thaum 1,000 xyoo. Ces thaum 1,000 xyoo xaus, cov no yuav tau mus nyob saum ntuj thiab.​—Phau Ntawv Nkauj 45:16.

8. Zoo li yuav muaj 3 pab neeg twg yuav nyob saum ntuj thiab hauv ntiajteb?

⁸ Cov Tub Kawm Vajlugkub xav tias yuav muaj 3 pab neeg: (1) 144,000 leej uas yuav nrog Yexus kav saum ntuj; (2) pab neeg coob coob uas muaj kev ntseeg tsawg thiab yuav mus sawv ntawm hauv ntej Yexus lub zwmtxwv saum ntuj; thiab (3) tsheej plhom leej hauv ntiajteb uas yuav kawm txog Yehauvas tej kevcai rau thaum Khetos Kav 1,000 Xyoo. * Tiamsis tom qab no, Yehauvas pab lawv pom qhov tseeb txog tas nrho tej no.​—Pajlug 4:18.

9. (1) Pab neeg coob coob yuav sawv tau “ntawm hauv ntej lub zwmtxwv thiab tus menyuam Yaj” hauv ntiajteb li cas? (2) Vim li cas qhov uas Yehauvas Cov Timkhawv kawm tau rau xyoo 1935 yeej tsim nyog ntseeg?

⁹ Xyoo 1935, Yehauvas Cov Timkhawv mam li los paub tseeb tias pab neeg coob coob uas Yauhas pom yog leejtwg tiag. Zaum no Yehauvas Cov Timkhawv pom tias pab neeg coob coob tsis tas yuav mus kiag saum ntuj thiaj li sawv tau “ntawm hauv ntej lub zwmtxwv thiab tus menyuam Yaj.” Txawm lawv nyob hauv ntiajteb los, yog lawv txais yuav Yehauvas ua tus kav thoob qab ntuj thiab zoo siab hlo mloog nws lus ces twb yog lawv “sawv ntawm hauv ntej lub zwmtxwv” lawm. (Yaxayas 66:1) Yog lawv ntseeg ruaj nreeg Yexus tus nqi txhiv ces twb yog lawv sawv ntawm hauv ntej “tus menyuam Yaj” lawm thiab. Tsis tas li ntawd xwb, Mathais 25:31, 32 kuj hais tias, “txhua haivneeg hauv qab ntuj” tsis hais cov neeg phem huv tibsi “yuav tuaj sib sau ua ke” rau ntawm Yexus lub zwm txwv. Yog li ntawd, peb pom tseeb tias txhua tej haivneeg no yuav tuaj sib sau ua ke hauv ntiajteb, tsis yog saum ntuj. Qhov uas Yehauvas Cov Timkhawv kawm tau rau xyoo 1935 no yeej tsim nyog ntseeg rau qhov phau Vajlugkub tsis qhia tias pab neeg coob coob yuav tau mus rau saum ntuj. Tsuas qhia tias yuav muaj tib pab yuav mus xwb uas yog 144,000 leej. Lawv yuav tau nrog Yexus “kav lub ntiajteb no.”​—Tshwmsim 5:10.

10. Vim li cas pab neeg coob coob yuav tsum kawm txog Yehauvas ua ntej Khetos Kav 1,000 Xyoo?

¹⁰ Txij xyoo 1935, Yehauvas Cov Timkhawv pom tseeb tias pab neeg coob coob hauv Yauhas zaj yog toog yog cov Khixatia uas cia siab tias lawv yuav tau nyob hauv ntiajteb mus ib txhis. Yuav kom lawv thev dhau kev ceeblaj txom nyem loj kawg li, lawv yuav tsum kawm txog Yehauvas thiab los teev tiam nws ua ntej Khetos Kav 1,000 Xyoo. Lawv yuav tsum muaj kev ntseeg ruaj nreeg lawv thiaj li “nyiaj taus txhua yam uas yuav muaj los” mus txog hnub ntawd.​—Lukas 21:34-36.

11. Vim li cas Cov Tub Kawm Vajlugkub thiaj xav tias thaum 1,000 xyoo xaus, yuav muaj ib co tau mus saum ntuj?

¹¹ Tiamsis tseem tshuav cov txivneej uas muaj kev ntseeg puag thaum ub. Cov Tub Kawm Vajlugkub xav li cas txog cov no? Lawv muab xav li no, ‘Vim li cas cov Khixatia uas muaj kev ntseeg tsawg tsawg ho yuav tau mus nyob saum ntuj tiamsis cov txivneej puag thaum ub uas muaj kev ntseeg ruaj nreeg yuav nyob hauv ntiajteb xwb?’ Phau The Watch Tower lub 2 Hlis tim 15, 1913 thiaj li piav tias ntshe cov no yeej yuav  tsum mus nyob saum ntuj xwb, tiamsis 1,000 xyoo xaus tso lawv mam li mus. Lub tswvyim no, lawv xav yuam kev 2 qho lawm. Qhov 1, lawv xav tias pab neeg coob coob yuav mus nyob saum ntuj. Qhov 2, lawv xav tias pab neeg coob coob muaj kev ntseeg tsawg zog lawm.

12, 13. Cov xaiv tseg thiab pab neeg coob coob pom li cas txog lawv tus nqi zog?

¹² Tiamsis txij xyoo 1935 los, Yehauvas Cov Timkhawv yeej pom tseeb tias pab neeg coob coob uas Yauhas ua yog toog pom yog cov uas tawm hauv Amankedoos los. Lawv “yog cov uas twb tiv dhau tej kev tsimtxom uas loj heev” hauv ntiajteb no lawm, thiab lawv yuav qw “nrov nrov hais tias, ‘Tus Vajtswv uas zaum saum lub zwmtxwv thiab tus menyuam Yaj twb txhiv peb dim lawm!’” (Tshwmsim 7:10, 14) Tsis tas li ntawd xwb, phau Vajlugkub qhia tias cov uas yuav sawv hauv qhov tuag mus nyob saum ntuj yeej tau “yam uas zoo dua” cov txivneej muaj kev ntseeg puag thaum ub. (Henplais 11:40) Thaum cov kwvtij los paub qhov tseeb txog pab neeg coob coob rau xyoo 1935, lawv kub siab lug mus caw tibneeg los teev tiam Yehauvas kom cov neeg ntawd thiaj tau nyob mus ib txhis hauv ntiajteb.

¹³ Cov uas muaj feem nrog pab neeg coob coob zoo siab heev rau lawv txojkev cia siab. Lawv paub tias Yehauvas yog tus txiav txim seb nws xav kom nws cov tibneeg mus nyob qhovtwg teev tiam nws, tsis hais saum ntuj lossis hauv ntiajteb no. Cov xaiv tseg thiab pab neeg coob coob puavleej pom tias vim Yehauvas hlub lawv heev Nws thiaj txib Yexus Khetos los ua tus nqe txhiv, lawv thiaj tau nqi zog xwb.​—Loos 3:24.

14. Tom qab 1935, vim li cas coob tus xav paub seb zaj lus faj lem txog pab neeg coob coob yuav muaj tiav li cas?

¹⁴ Tom qab Yehauvas cov tibneeg los paub qhov tseeb txog pab neeg coob coob rau xyoo 1935, coob tus xav paub seb yuav ua li cas pab no thiaj li yuav coob heev zuj zus. Xws li Lanaum Phakees (Ronald Parkin) uas thaum ntawd muaj 12 xyoos. Nws hais tias: “Thaum ntawd muaj li 56,000 tus tshaj tawm thoob ntiajteb thiab tej zaum feem coob yog cov xaiv tseg. Yog li ntawd, pab neeg coob coob zoo li tsis coob pe tsawg.”

15. Pab neeg coob coob tau sib sau ua ke zuj zus li cas?

¹⁵ Tiamsis tau ntau xyoo tom qab ntawd, lub koom haum xa cov tubtxib tshaj tawm txawv tebchaws mus rau ntau lub tebchaws thiab Yehauvas Cov Timkhawv txawm coob zuj zus tuaj. Ces xyoo 1968, peb pib siv phau ntawv The Truth That Leads to Eternal Life (Qhov Tseeb Uas Pab Peb Tau Txojsia Ib Txhis Tsis Kawg) mus qhia Vajlugkub rau tibneeg. Phau no muab qhov tseeb  hauv phau Vajlugkub piav yoojyim xwb, ua rau tibneeg coob heev xav los paub Yehauvas. Tom qab 4 xyoos xwb, muaj tshaj li 500,000 cov thwjtim tshiab los ua kevcai raus dej. Cov Kav Tos Liv pib tsawg zuj zus hauv tebchaws Amelikas Latee thiab lwm lub tebchaws. Thiab hauv Yus Luv sab hnub tuaj thiab tebchaws Afika nom tswv tsis txwv peb tes haujlwm lawm. Tsheej plhom leej thiaj los ua kevcai raus dej ntxiv. (Yaxayas 60:22) Nimno, Yehauvas lub koom haum tau tsim ntau yam los pab tibneeg kawm tej uas phau Vajlugkub qhia. Peb pom tias pab neeg coob coob uas tamsim no muaj tshaj li 8 plhom leej, tau los sib sau ua ke lawm tiag.

16. Pab neeg coob coob los ntawm qhovtwg los?

¹⁶ Thaum Yauhas muab zaj yog toog uas nws pom sau cia, nws hais tias pab neeg coob coob “tuaj txhua lub tebchaws tuaj! tsis hais xeem twg, haivneeg twg thiab cov neeg uas hais yam lus twg los muaj.” Tus cev Vajtswv lus Xakhaliyas tau sau ib yam li ntawd thiab. Nws sau cia tias: “Thaum txog lub sijhawm ntawd, kaum tus neeg txawv tebchaws yuav tuaj cuag ib tug neeg Yudais thiab hais tias, ‘Peb xav nrog nej tau koob hmoov, rau qhov peb hnov hais tias  Vajtswv nrog nraim nej nyob.’”​—Xakhaliyas 8:23.

17. Lub koom haum ua dabtsi los pab txhua haivneeg?

¹⁷ Yehauvas Cov Timkhawv pom tias yuav kom txhua haivneeg los sib sau tau ua ke, yuav tsum tshaj tawm Txojmoo Zoo ua ntau yam lus. Peb twb muab tej ntaub ntawv Vajlugkub txhais ua lwm yam lus tau 130 xyoo no lawm. Tiamsis tsis tau muaj dua ib zaug uas peb txhais heev npaum li peb txhais tamsim no. Peb muab tej ntaub ntawv txhais ua ntau pua yam lus. Yeej yog Yehauvas ua txujci xwb, thiaj li sau tau pab neeg coob coob los ntawm txhua haivneeg los. Txawm lawv yuav nyob thoob qab ntuj los, vim tau muab phau Vajlugkub thiab tej ntaub ntawv Vajlugkub txhais ua ntau yam lus, sawvdaws thiaj koom tau ib lub siab los pe hawm Yehauvas. Thiab luag pom tias Yehauvas cov tibneeg ib leeg hlub ib leeg thiab kub siab lug mus tshaj tawm. Qhov no txhawb tau peb txojkev ntseeg kawg li!​—Mathais 24:14; Yauhas 13:35.

18. (1) Raws li Yaxayas 46:10, 11, vim li cas peb paub tias Yehauvas yeej yuav ua kom zaj lus faj lem txog pab neeg coob coob muaj tiav? (2) Txawm pab neeg coob coob tsis raug xaiv tseg mus saum ntuj los, vim li cas lawv tsis tu siab?

¹⁸ Zaj lus faj lem txog pab neeg coob coob ua rau peb zoo siab xyiv fab! Peb paub tias Yehauvas ua ntau yam zoo kom zaj lus faj lem no muaj tiav. (Nyeem Yaxayas 46:10, 11.) Cov uas muaj feem nrog pab neeg coob coob ris Yehauvas txiaj ntsig rau txojkev cia siab uas nws tau pub rau lawv. Txawm lawv tsis raug xaiv tseg mus nrog Yexus kav saum ntuj los, lawv yeej tsis tu siab. Thoob plaws phau Vajlugkub, peb kawm txog cov pojniam txivneej uas txawm lawv tsis yog ib tug xaiv tseg los, Vajtswv lub hwj haum dawb huv kuj coj lawv txoj hauv kev thiab. Xws li Yauhas tus uas muab neeg ua kevcai raus dej. (Mathais 11:11) Lossis Daviv. (Tes Haujlwm 2:34) Nkawd ob leeg thiab lwm tus yuav sawv rov los nyob hauv ntiajteb. Lawv yuav nrog pab neeg coob coob muab siab npuab Yehauvas thiab yuav nws ua tus kav lawv.

19. Peb pom tias Yauhas zaj yog toog twb muaj tiav rau peb tiam lawm, yog li ntawd peb yuav tsum ua li cas?

¹⁹ Zaum no yog thawj zaug uas Vajtswv tau sau tsheej plhom leej ntawm txhua haivneeg los pe hawm nws ua ke. Txawm peb cia siab yuav mus nyob saum ntuj lossis nyob hauv ntiajteb no los, peb yuav tsum mus pab tibneeg coob li coob tau los muaj feem nrog lwm pab yaj. (Yauhas 10:16) Tsis ntev xwb, Yehauvas yuav ua kom muaj kev ceeblaj txom nyem loj kawg li raws li nws tau cog tseg. Tej tseem fwv thiab kev ntseeg cuav tej thawj coj ua kom tibneeg txom nyem heev, Vajtswv yuav muab lawv ua puam tsuaj kom tag. Thaum ntawd pab neeg coob coob yuav tau teev tiam Yehauvas hauv lub ntiajteb no mus ib txhis!​—Tshwmsim 7:14.