1. Vim li cas peb yuav tsum mloog Yehauvas lus?

PEB yuav tsum mloog Yehauvas lus vim nws yog tus Tswv tsim. Nws muaj cai qhia peb tias peb yuav tsum coj li cas. (Tshwmsim 4:11) Tsis tas li ntawd xwb, peb yuav tsum mloog Yehauvas lus rau qhov nws txojkev kav yog txoj uas zoo tshaj plaws. Tibneeg coob tus tau kav lwm leej lwm tus. Tiamsis thaum peb muab neeg txojkev kav piv rau Yehauvas txoj, peb pom tias Yehauvas yog tus uas ntse tshaj plaws, nws muaj kev hlub nplua mias, nws siab dawb siab zoo, thiab yog tus Vajntxwv uas hlub tshua sawvdaws.​—Khiav Dim 34:6; Loos 16:27; 1 Yauhas 4:8.

2. Raws li Henplais 12:9-11, vim li cas tsim nyog peb mloog Yehauvas lus?

² Yehauvas xav kom peb mloog nws lus tsis yog vim peb ntshai tsam nws tu siab xwb tiamsis vim nws yog peb Leej Txiv uas hlub peb heev. Thaum Paulus sau nws tsab ntawv mus rau cov kwvtij Henplais, nws piav tias “tsimnyog peb mloog peb Txiv tus uas nyob saum ntuj ceebtsheej lus” rau qhov nws cob qhia tej uas “muaj nqis rau peb.”​—Nyeem Henplais 12:9-11.

3. (1) Peb yuav ua li cas qhia tias peb mloog Yehauvas lus? (2) Peb yuav teb cov lus nug twg?

³ Peb mloog Yehauvas lus thaum peb ua raws nws lub siab nyiam es tsis cia siab rau peb txojkev txawj ntse xwb. (Pajlug 3:5) Thaum peb paub txog tej uas Yehauvas ua ces yuav tsis nyuaj rau peb mloog nws lus. Yog vim li cas? Rau qhov thaum peb kawm txog tej uas nws ua, peb yuav pom nws tej yeeb yam zoo. Yog peb yim kawm txog Yehauvas, peb yim hlub nws. (Phau Ntawv Nkauj 145:9) Yog peb hlub nws, ces tsis tas Yehauvas yuav sau ib nqis zuj zus tias yam twg peb ua tau thiab  yam twg peb ua tsis tau. Peb yuav xyaum kom peb txawj xav li Yehauvas xav es zam tej uas phem. (Phau Ntawv Nkauj 97:10) Tiamsis, tej thaud yuav tsis yoojyim rau peb mloog Yehauvas lus. Vim li cas thiaj tsis yoojyim? Cov txwj laus yuav xyaum tus tswv xeev Nehemis tus qauv li cas? Leej txiv yuav xyaum Vajntxwv Daviv tus qauv li cas? Leej niam yuav xyaum Malis uas yog Yexus niam tus qauv li cas? Hauv zaj no peb yuav teb cov lus nug no.

4, 5. Raws li Loos 7:21-23, vim li cas tsis yoojyim rau peb mloog Yehauvas lus?

⁴ Ib qho uas tsis yoojyim rau peb mloog Yehauvas lus yog qhov uas peb muaj kev txhaum thiab zoo tsis tiav los ntawm Adas thiab Evas nkawd. Yog li ntawd muaj tej tsam peb thiaj tsis xav mloog Vajtswv lus. Thaum Adas nkawd noj tsob txiv ntoo uas Vajtswv txwv ces yog nkawd xav ua tus txiav txim siab tias qhovtwg zoo qhovtwg phem. (Chivkeeb 3:22) Niaj hnub no, tibneeg feem coob los yeej zoo li nkawd thiab. Lawv tsis quav ntsej Vajtswv, lawv xav ua tus txiav txim siab tias qhovtwg zoo qhovtwg phem.

⁵ Txawm cov uas paub thiab hlub Yehauvas los yeej tsis yoojyim rau lawv ua li Yehauvas lub siab nyiam txhua zaus. Tus tubtxib Paulus los hais tias yeej nyuaj kawg li rau nws thiab. (Nyeem Loos 7:21-23.) Zoo ib yam li Paulus, peb yeej xav ua kom haum Yehauvas siab xwb. Tiamsis peb yuav tsum tas zog tswj peb lub siab uas pheej xav mus ua phem.

6, 7. Dabtsi yuav ua kom nyuaj heev rau peb teev tiam Yehauvas? Piav seb.

⁶ Tej kev lig kevcai thiab tej tswvyim uas peb kawm thaum peb loj hlob los kuj yog ib qho uas ua kom nyuaj heev rau peb mloog Yehauvas lus thiab. Muaj coob tus yuav qhia peb lawv tej tswvyim tiamsis lawv tej tswvyim txawv ntawm Yehauvas tej. Yog li ntawd, peb yuav tsum sib zog zam lawv tej tswvyim. Cia peb mus kawm txog ib tug muam seb tau muaj li cas rau nws.

⁷ Nyob rau tej lub tebchaws luag ib txwm cob qhia menyuam mus khwv kom tau nyiaj ntau. Ib tug muam hu ua Mab * tau raug li no. Ua ntej nws paub Yehauvas, nws mus kawm ntawv hauv ib lub tsev kawv ntawv zoo tshaj plaws hauv nws lub tebchaws. Mab tsev neeg tseev kom nws mus nrhiav ib txoj haujlwm uas them nyiaj ntau ntau kom luag lwm tus thiaj saib nws tsim txiaj. Nws los kuj xav li ntawd thiab. Tiamsis tom qab nws los paub thiab hlub Yehauvas, nws tsis xav li ntawd lawm. Txawm li ntawd los tseem tsis yoojyim rau nws. Nws hais tias: “Muaj tej thaud kuv pom tej haujlwm zoo uas yuav ua tau nyiaj ntau tiamsis ho yuav ua rau kuv teev tiam tsis tau Yehauvas li qub. Vim kuv ib txwm xav tias khwv nyiaj yeej yog ib qho zoo ces thiaj nyuaj heev rau kuv. Kuv thov kom Yehauvas pab kuv txhua txhua hnub kom kuv tsis txhob txais ua ib txoj haujlwm uas yuav ua nyuaj rau kuv teev tiam nws.”​—Mathais 6:24.

8. Peb yuav kawm txog dabtsi?

⁸ Peb tau kawm tias zoo rau peb mloog Yehauvas lus. Tiamsis yog cov uas tuav haujlwm xws li cov txwj laus, leej niam, thiab leej txiv mloog Vajtswv lus, lawv yuav pab tau lwm tus. Cia peb kawm txog 3 tug qauv hauv phau Vajlugkub seb yuav tsum saib xyuas lwm tus li cas thiaj li haum Yehauvas siab.

9. Nehemis pom cov Yudais ua dabtsi?

⁹ Yehauvas muab tes haujlwm saib xyuas nws cov tibneeg rau cov txwj laus ua. (1 Petus  5:2) Cov txwj laus yuav xyaum tau ntau yam zoo ntawm Nehemis tus qauv. Nehemis yog tus tswv xeev kav Yudas, yog li ntawd nws yeej muaj hwjchim heev. (Nehemis 1:11; 2:7, 8; 5:14) Nws pom ntau yam tsis zoo uas cov Yudais ua. Nws pom lawv pheej siv lub tuam tsev ua tej yam uas saib tsis tau kev pe hawm Yehauvas. Tsis tas li ntawd xwb, lawv tsis pub nyiaj txiag mus pab cov Levis raws li Yehauvas Txojcai. Cov Yudais tsis coj raws li Hnub Xanpataus, thiab cov txivneej ib txhia mus yuav tej pojniam uas tsis pe hawm Yehauvas. Nehemis yuav tsum ua tus pab lawv hloov.​—Nehemis 13:4-30.

10. Nehemis ua li cas rau Yehauvas cov tibneeg?

¹⁰ Nehemis tsis muab nws lub hwjchim kav los tswj tibneeg kom lawv ua raws li nws lub siab xav. Tiamsis nws thov Vajtswv pab thiab qhia cov Yudais txog Yehauvas txoj kevcai. (Nehemis 1:4-10; 13:1-3) Nehemis kuj txo hwjchim nrog cov pejxeem txhim kho Yeluxalees tus ntsa yeej thiab.​—Nehemis 4:15.

11. Raws li 1 Thexalaunikes 2:7, 8, cov txwj laus yuav ua li cas thiaj pab tau cov kwvtij nkauj muam hauv lawv lub koom txoos?

¹¹ Tej zaum cov txwj laus yuav tsis ntsib tej uas Nehemis ntsib, tiamsis lawv tseem xyaum tau ntau yam ntawm Nehemis. Xws li qhov uas sib zog pab cov kwvtij nkauj muam, thiab tsis txhob tsab ua loj. Lawv hlub cov kwvtij nkauj muam hauv lub koom txoos. (Nyeem 1 Thexalaunikes 2:7, 8.) Vim lawv txo hwjchim thiab hlub lwm tus tiag, lawv ua tib zoo hais luag xwb. Pheej yog ib tug txwj laus tau ntau xyoo lawm, nws hais tias: “Kuv pom tias thaum ib tug txwj laus ua siab mos muag rau cov kwvtij nkauj muam, yeej raug lawv siab heev. Qhov no ua rau lawv zoo siab hlo ua raws li cov txwj laus hais.” Ib tug uas tau ua txwj laus tau ntau xyoo lawm thiab hu ua Xaiv Xyooj. Nws hais tias: “Kuv rau siab xyaum li Filipis 2:3 es muab lwm tus saib zoo dua kuv.”

12. Vim li cas tseem ceeb heev rau cov txwj laus txo hwjchim?

¹² Cov txwj laus yuav tsum txo hwjchim ib  yam li Yehauvas. Txawm Yehauvas yog tus Vajtswv loj dua ntais los, nws tseem “saib tuaj rau . . . lub ntiajteb” thiab “tsa cov neeg pluag sawv hauv av los.” (Phau Ntawv Nkauj 18:35; 113:6, 7) Phau Vajlugkub hais tias Yehauvas ntxub cov neeg khav theeb.​—Pajlug 16:5.

13. Vim li cas ib tug txwj laus yuav tsum “ceev nws tus nplaig”?

¹³ Tus txwj laus uas mloog Yehauvas lus yuav tau “ceev nws tus nplaig.” Yog nws tsis ua li no ces thaum lwm tus ua saib tsis taus nws, tej zaum nws yuav hais tau tej yam tsis zoo rau lawv. (Yakaunpaus 1:26; Kalatias 5:14, 15) Pheej hais ntxiv tias: “Thaum kuv xav tias ib tug kwvtij nkauj muam saib tsis taus kuv ua rau xav hais ib lo kom sab lawv. Tiamsis kuv xav txog cov txivneej hauv phau Vajlugkub uas muaj kev ntseeg loj heev, ua rau kuv pom tias tseem ceeb heev rau kuv ua ib tug neeg txo hwjchim.” Yog cov txwj laus mloog Yehauvas lus ces lawv yuav hlub cov kwvtij nkauj muam thiab lwm cov txwj laus thiab ua tib zoo hais lawv.​—Kaulauxais 4:6.

14. Yehauvas muab leej txiv ua dabtsi, thiab nws xav kom leej txiv ua li cas?

¹⁴ Hauv lub cuab lub yig, Yehauvas muab leej txiv ua lub taubhau thiab xav kom nws qhuab qhia, cob, thiab ntuas cov menyuam. (1 Kauleethaus 11:3; Efexus 6:4) Tiamsis tsis yog leej txiv xav ua li cas ces nws yuav ua tau li ntawd. Yehauvas yog tus tsim lub cuab lub yig, yog leej txiv coj tsis ncaj rau nws tsev neeg nws yuav tsum teb rau Yehauvas. (Efexus 3:14, 15) Thaum leej txiv ua raws li Vajtswv siab nyiam ces yog nws mloog Yehauvas lus. Yog nws kawm txog Vajntxwv Daviv tus qauv yuav pab tau nws heev.

15. Vim li cas zoo rau leej txiv kawm txog Vajntxwv Daviv tus qauv?

¹⁵ Yehauvas tsa Daviv ua lub taubhau rau nws lub cuab lub yig thiab ua lub taubhau rau tag nrog cov Yixalayees. Vim Daviv yog tus Vajntxwv, nws muaj hwjchim kawg. Tej thaud nws siv nws lub hwjchim mus ua tej yam tsis zoo ces nws thiaj li ua txhaum loj heev. (2 Xamuyees 11:14, 15) Tiamsis thaum Yehauvas ntuas nws, nws yuav li Yehauvas hais ces qhia tias nws yeej mloog Yehauvas lus. Thaum nws thov Vajtswv, nws qhia siab hlo rau Yehauvas. (Phau Ntawv Nkauj 51:1-4) Tsis tas li ntawd xwb, nws kuj txo hwjchim txais yuav luag tej tswvyim thiab, tsis hais pojniam txivneej huv tibsi. (1 Xamuyees 19:11, 12; 25:32, 33) Txawm Daviv tau ua txhaum loj heev los, nws  tsis rov mus ua dua lawm thiab nws muab Yehauvas ua qhov tseem ceeb tshaj hauv nws lub neej.

16. Daviv tus qauv pab tau leej txiv li cas?

¹⁶ Daviv tus qauv pab tau leej txiv li cas? Tsis txhob muab lub hwjchim uas Yehauvas muab rau koj los ua tej yam tsis zoo. Lees hlo tej uas koj ua yuam kev thiab thaum luag siv phau Vajlugkub los ntuas koj, cia li txais yuav. Yog koj ua li no ces koj tsev neeg yuav hwm koj rau qhov koj ua neeg txo hwjchim. Thaum koj nrog koj tsev neeg thov Vajtswv, qhia siab hlo rau Yehauvas koj tsev neeg thiaj pom tias koj xav tau Nws pab koj thiab coj koj txoj hau kev. Qhov tseem ceeb tshaj, muab koj txojkev teev tiam Yehauvas tso ua ntej hauv koj lub neej. (2 Kevcai 6:6-9) Koj tus qauv zoo yog ib qho tseem ceeb tshaj rau koj tsev neeg.

17. Yehauvas muab tes haujlwm twg rau leej niam ua?

¹⁷ Hauv lub cuab lub yig, Yehauvas kuj muab ib tes haujlwm rau leej niam ua thiab, uas yog saib xyuas nws cov menyuam. (Pajlug 6:20) Tej uas leej niam ua thiab hais rau nws cov menyuam, lawv yuav khaws mus tas lawv sim neej. (Pajlug 22:6) Cia peb kawm seb leej niam yuav xyaum Malis uas yog Yexus niam li cas.

18, 19. Leej niam xyaum tau Malis tus qauv li cas?

¹⁸ Malis paub Vajlugkub zoo. Nws paub hwm Yehauvas thiab muaj kev sib raug zoo ruaj khov nrog Nws. Txawm nws lub neej yuav hloov lawm ntau thaum Yehauvas txib nws los, nws zoo siab hlo mloog Yehauvas lus.​—Lukas 1:35-38, 46-55.

¹⁹ Leej niam yeej xyaum tau ntau yam zoo ntawm Malis. Nws xyaum tau dabtsi? Qhov 1, nws yuav tsum kawm Vajlugkub thiab thov Vajtswv nws ib leeg, thiaj txhawb tau nws txojkev sib raug zoo nrog Yehauvas kom ruaj khov. Qhov 2, nws yuav tsum zoo siab hlo hloov nws lub neej kom haum Yehauvas siab. Tej zaum koj niam koj txiv yog neeg chim taus thiab nyiam nthe menyuam xwb. Yog koj loj hlob li no, tej zaum koj yuav xav tias ua li no tsis txhaum dabtsi. Tab txawm koj twb los paub Yehauvas tej kevcai lawm los, tseem nyuaj heev rau koj ua siab ntev rau koj cov menyuam. Thiab thaum koj lim heev es menyuam tsis mloog lus, yuav hajyam nyuaj rau koj tswj koj tus kheej thiab ua siab ntev. (Efexus 4:31) Thaum zoo li no, tseem ceeb heev rau koj thov Yehauvas pab. Ib leej niam hu ua Cib hais tias: “Thaum kuv tus tub tsis mloog kuv lus, kuv yuav tsum thov Yehauvas pab kuv tiag tiag kuv thiaj tsis cem nws npau taws vog. Tej thaud to nco xwb kuv twb cem nws lawm. Kuv yuav tsum cheem kuv tus kheej thiab ua twjywm  thov Vajtswv pab. Thaum kuv thov Vajtswv, pab kuv ua tau siab tus.”​—Phau Ntawv Nkauj 37:5.

20. Nyuaj heev rau cov niam ua li cas thiab lawv yuav ua li cas thiaj hloov tau?

²⁰ Ib qho ntxiv uas nyuaj heev rau cov niam yog qhov uas lawv tsis paub qhia menyuam tias lawv hlub lawv cov menyuam. (Titus 2:3, 4) Lawv zoo li no rau qhov thaum lawv loj hlob, lawv niam lawv txiv ib txwm tsis paub ua thiab. Yog koj tsev neeg zoo li no, tsis tas koj yuav ua li koj niam koj txiv ua thiab. Ib leej niam uas mloog Yehauvas lus yuav tau xyaum qhia menyuam tias nws hlub lawv. Tej zaum yuav tsis yoojyim rau nws hloov nws lub siab, nws txojkev xav, lossis tej uas nws ua. Tiamsis nws yeej hloov tau. Thaum nws hloov tau lawd, yuav ua rau nws thiab nws tsev neeg muaj kev zoo siab dua.

21, 22. Raws li Yaxayas 65:13, 14, yog peb mloog Yehauvas lus yuav pab tau peb li cas?

²¹ Vajntxwv Daviv paub tias qhov uas mloog Yehauvas lus yeej yog qhov uas zoo tshaj plaws. Nws sau tias: “[Yehauvas] tej kevcai yeej yog tej uas ncaj ncees, thiab cov neeg uas hwm tej kevcai ntawd yuav tau txais kev kaj siab lug. [Yehauvas] tej lus qhia puavleej yog lus tseeb thiab ua rau neeg paub qabhau.” (Phau Ntawv Nkauj 19:8, 11) Niaj hnub no peb yeej pom tias cov uas mloog Yehauvas txawv ntawm cov uas tsis mloog. Cov uas mloog Yehauvas lus yuav “hu nkauj zoo siab.”​—Nyeem Yaxayas 65:13, 14.

²² Thaum cov txwj laus, leej niam, thiab leej txiv zoo siab hlo mloog Yehauvas lus, lawv lub neej yuav zoo dua, lawv tsev neeg yuav muaj kev zoo siab dua, thiab lub koom txoos yuav muaj kev sib haum xeeb dua. Qhov tseem ceeb tshaj yog qhov uas peb ua rau Yehauvas zoo siab. (Pajlug 27:11) Yuav tsis muaj ib qho ua rau peb zoo siab tshaj no lawm!