1. Muaj ib tug me tub hais li cas txog txoj kev vam kev cia siab uas Vajtswv yuav tsa cov tuag sawv rov los?

 MUAJ ib tug me tub npe hu ua Mathus (Matthew) muaj ib tug mob hnyav uas yuav tau muab nws phais ntau zaus. Thaum nws muaj 7 lub xyoos, nws tsev neeg lawv saib Yehauvas Cov Tim Khawv Tshooj TV ua ke. Lawv pom ib zaj nkauj hais txog tsa cov uas tag sim neej lawm sawv rov qab los. b Tom qab lawv saib tag, Mathus mus tuav nkaus nws niam thiab nws txiv tes thiab hais tias: “Niam thiab txiv, neb puas pom? Txawm tias kuv tuag los kuv yeej yuav sawv tau rov qab los. Neb ua tiag tos kuv, txhua yam yeej yuav mus rau qhov zoo xwb.” Qhov no txhawb tau nkawd ob niam txiv kawg li vim nkawd tus me tub muaj kev ntseeg kawg nkaus li rau Vajtswv tej lus cog tseg.

2-3. Vim li cas zoo rau peb xav txog Vajtswv lo lus cog tseg uas yuav tsa cov tuag sawv rov qab los?

² Qee lub sij hawm, zoo rau peb zaum tsaws xav txog Vajtswv lo lus cog tseg uas yuav tsa cov tuag sawv rov qab los. (Yauhas 5:28, 29) Peb yuav tau xav txog tej no, yeeb vim yog peb tsis paub tias peb yuav ntsib kev mob kev nkeeg rau thaum twg los sis ib tug uas peb hlub tshua ho tag sim neej lawm. (Tej Lus Qhia 9:12; Yakaunpaus 4:13, 14) Tsis tas li ntawd, txoj kev vam kev cia siab no yuav pab kom peb thev taus tej uas los raug peb. (1 Thexalaunikes 4:13) Nyob hauv phau Vajlugkub qhia tias peb Leej Txiv tus uas nyob saum ntuj ceeb tsheej yeej nkag siab peb zoo zoo thiab hlub peb kawg nkaus li. (Lukas 12:7) Vajtswv Yehauvas yeej paub txhij paub txhua txog peb. Thaum nws tsa peb rov los, peb tus xeeb ceem thiab tej kev xav tseem zoo li qub. Nws yeej qhib txoj hau kev rau peb nyob tau mus ib txhis. Txawm peb nruam sim lawm los, nco ntsoov tias ib hnub nws yeej yuav tsa peb rov los.

 ³ Nyob rau hauv zaj kawm no yuav piav tias vim li cas peb thiaj ntseeg qhov uas Vajtswv yuav tsa cov tuag sawv rov qab los. Tom qab ntawd, peb ho yuav kawm txog zaj uas hais nyob hauv phau Vajlugkub tias: “Koj tus nus yeej yuav sawv rov qab los.” (Yauhas 11:23) Txuas ntxiv ntawd, peb yuav kawm seb dab tsi yuav pab kom peb txoj kev ntseeg ruaj khov khwb kho rau Vajtswv lo lus cog tseg tias nws yuav tsa cov tuag sawv rov qab los.

4. Piav seb yuav kom peb ntseeg tau ib lo lus cog tseg twg, peb yuav tsum ntseeg li cas.

⁴ Yuav kom peb ntseeg tau ib lo lus cog tseg twg, peb yuav tsum ntseeg tias tus uas cog lus ntawd muaj lub siab xav ua tiag thiab muaj hwj chim los sis rab peev xwm ua tau li ntawd. Muab ua piv txwv li no tias: Cua daj cua dub los nplawm koj lub tsev puas ntsoog tag. Muaj ib tug phooj ywg kwv luag los cuag koj thiab hais tias, ‘Kuv yuav pab koj kho koj lub tsev.’ Koj yeej paub ntsoov tias nws yeej muaj lub siab xav pab koj tiag. Yog tias nws muaj twj txhij zog thiab nws yog ib tug neeg txawj tsa vaj tsa tsev ces koj yeej paub tias nws yeej muaj rab peev xwm ua tau li nws hais. Ua li Vajtswv puas muaj lub siab xav ua tiag thiab muaj hwj chim tsa tau cov tuag raws li nws tau cog lus tseg?

5-6. Vim li cas peb ho paub tseeb tias Yehauvas muaj lub siab xav tsa cov tuag sawv rov qab los?

⁵ Ua li Yehauvas puas muaj lub siab xav tsa cov tuag sawv rov qab los? Nws yeej muaj siab tiag. Nws tshoov ntau tus uas sau phau Vajlugkub siab kom sau txog nws lo lus cog tseg tias yav pem suab nws yuav tsa cov tuag sawv rov qab los. (Yaxayas 26:19; Hauxeyas 13:14; Tshwmsim 20:11-13) Yehauvas tau cog lus li cas lawm, nws yeej yuav ua kom muaj tshwm sim raws li ntawd. (Yausuas 23:14) Yehauvas tos tsis hnyu yuav ntxiv siav ntxiv zog rau cov neeg uas nruam sim lawm. Vim li cas peb ho hais li ntawd?

⁶ Cia peb ua zoo xav txog Yauj cov lus. Yauj yeej paub tseeb tseeb tias thaum nws tuag, Yehauvas yeej tos tsis hnyu yuav rov pom nws dua. (Yauj 14:14, 15) Yehauvas yeej tos tsis hnyu yuav rov pom tag nrho cov uas teev tiam nws es tau nruam sim lawm thiab. Nws yeej maj maj tsa lawv kom rov muaj sia, noj qab haus huv, thiab muaj kev zoo siab. Hos cov uas tau nruam sim lawm es tsis tau paub txog Yehauvas los nws yeej yuav tsa lawv sawv rov los muaj sia dua. (Tes Haujlwm 24:15) Nws yeej xav cog kev phooj ywg nrog cov tib neeg no xwv lawv thiaj tau nyob hauv lub ntiaj teb no mus ib txhis. (Yauhas 3:16) Raws li no, peb pom tias Yehauvas yeej muaj lub siab xav tsa tib neeg sawv rov qab los muaj sia tiag tiag.

7-8. Vim li cas peb ho paub tseeb tias Yehauvas muaj hwj chim tsa cov tuag sawv rov qab los?

⁷ Yehauvas yog tus Vajtswv uas “muaj hwjchim loj kawg nkaus.” (Tshwmsim 1:8) Nws yeej muaj hwj chim tsa tau cov tuag kom sawv rov qab los thiab muaj hwj chim kov yeej tus yeeb ncuab uas yog txoj kev tuag. (1 Kauleethaus 15:26) Thaum peb paub li no mas txhawb tau peb siab kawg li. Cia peb mus piav txog ib tug muam npe hu ua Emas Aunom (Emma Arnold). Thaum muaj Ntsuj Rog Thoob Qab Ntuj Zaum 2, nws thiab nws tsev neeg txoj kev ntseeg raug sim loj kawg li. Nyob rau ntawm tej yeej kaw neeg, cov tib neeg uas lawv paub tuag coob heev. Emas thiaj txhawb nws tus ntxhais li no tias: “Yog Vajtswv tsa tsis tau cov tuag ces txoj kev tuag muaj hwj chim tshaj Vajtswv tiam sis tsis muaj tseeb li ntawd.” Yeej tsis muaj ib yam dab tsi yuav kov yeej Yehauvas li! Yog tias Vajtswv tus uas muaj hwj chim loj kawg nkaus twb tsim tau txoj sia ces nws yeej yuav rov pub tau txoj sia rau cov neeg uas tau tag sim neej lawm.

⁸ Muaj ib yam ntxiv uas pab tau peb paub tias Vajtswv muaj hwj chim tsa tau cov tuag yog Vajtswv cim tau ib puas tsav yam. Nws tis npe rau txhua lub hnub qub. (Yaxayas 40:26) Nws yeej  nco ntsoov txhua tus uas tau nruam sim lawm. (Yauj 14:13; Lukas 20:37, 38) Tsis tas li ntawd, nws yeej cim tau txhua txhua yam txog cov uas nws yuav tsa rov qab los, tsis hais tus tib neeg tus xeeb ceem, tej yam nws ua hauv lub neej, thiab tus neeg ntawd tej cim xeeb huv tib si.

9. Vim li cas koj ho ntseeg tias yav tom ntej Yehauvas yuav tsa cov neeg uas tuag lawm sawv rov qab los?

⁹ Peb ntseeg tias yav tom ntej Yehauvas yuav tsa cov tuag sawv rov qab los, yeeb vim yog nws muaj lub siab thiab nws muaj hwj chim tsa tau lawv rov muaj sia dua. Tsis tas li ntawd, yav puag thaum ub Yehauvas twb tau tsa neeg sawv rov muaj sia dua lawm. Nws twb pub hwj chim rau ob peb tug txiv neej thiab Yexus lawv tsa tau cov tuag. Cia peb mam li ua tib zoo soj ntsuas ib zag uas Yexus tsa tau ib tug tuag uas hais nyob rau hauv Yauhas tshooj 11.

10. Muaj li cas xwb thaum Yexus tseem qhia txoj xov zoo ntawm tus dej Yaladees sab tid, thiab tom qab ntawd nws ho ua dab tsi? (Yauhas 11:1-3)

¹⁰ Nyeem Yauhas 11:1-3. Xav txog lub caij yuav xaus xyoo 32 tom qab Yexus yug. Yexus muaj ib co phooj ywg nyob hauv lub zos Npethanis. Lawv hu ua Laxalaus, Maivliag thiab Mathas. (Lukas 10:38-42) Laxalaus txawm muaj ib tug mob hnyav heev ua rau nws ob tug muam txhawj kawg li. Nkawd thiaj li xa xov mus rau Yexus uas nyob ntawm tus dej Yaladees sab tid. Yexus yuav tau mus ob hnub ke thiaj txog lub zos Npethanis. (Yauhas 10:40) Ntshaus siab heev uas Laxalaus tau nruam sim ua ntej tus tshaj xo mus cuag Yexus. Txawm Yexus paub hais tias nws tus phooj ywg nruam sim lawm los nws haj tseem nyob ob hnub ntxiv rau ntawm thaj chaw ntawd ua ntej nws mus rau hauv Npethanis. Thaum Yexus mus txog, Laxalaus twb tuag tau plaub hnub lawm. Yexus npaj siab yuav ua ib yam los pab nws cov phooj ywg thiab ua rau Vajtswv tau koob meej.​—Yauhas 11:4, 6, 11, 17.

11. Peb khaws tau li cas txog txoj kev sib cog ua phooj ywg?

¹¹ Peb khaws tau ib yam los ntawm zaj no txog kev sib cog phooj ywg. Xws li: Thaum Maivliag thiab Mathas xa xov mus rau Yexus, nkawd tsis hais kom nws tuaj rau hauv Npethanis. Nkawd tsuas qhia rau Yexus tias nws tus phooj ywg Laxalaus mob mob xwb. (Yauhas 11:3) Thaum Laxalaus tuag, Yexus xav nyob deb deb tsa nws xwb los yeej tau tiam sis Yexus yeem mus nrog nws cov phooj ywg nyob ua ke ntawd. Koj puas muaj ib tug phooj ywg uas koj tsis tau thov los nws yeej tuaj pab koj? Koj yeej tso siab plhuav tias thaum koj raug “kev txomnyem,” nws yeej yuav tuaj. (Pajlug 17:17) Cia peb xyaum Yexus es nco ntsoov mus pab peb tej phooj ywg thiab. Txuas ntxiv no cia peb rov mus piav txog seb ua li cas ntxiv.

12. Yexus cog lus rau Mathas li cas, thiab vim li cas Mathas ho ntseeg Yexus cov lus? (Yauhas 11:23-26)

¹² Nyeem Yauhas 11:23-26. Mathas hnov xov tias Yexus tuaj yuav txog lub zos Npethanis. Nws thiaj maj ceev nrooj mus cuag Yexus thiab hais tias: “Tus Tswv, yog koj nrog peb nyob ntawm no, kuv tus nus yuav tsis tuag.” (Yauhas 11:21) Yog Yexus xav kho Laxalaus los yeej tau tiam sis Yexus npaj siab yuav ua ib yam zoo tshaj qhov kho nws ntawd. Yexus cog lus  tias: “Koj tus nus yeej yuav sawv rov qab los.” Nws txhawb Mathas ntxiv kom ruaj siab rau nws lo lus cog tseg tias: “Kuv yog txojkev sawv hauv qhov tuag rov qab los thiab yog txojsia.” Vajtswv muab hwj chim rau Yexus tsa tau cov tuag sawv rov los muaj sia. Ua ntej no, Yexus twb tsa ib tug me ntxhais sawv rov qab los thiab nws kuj tsa ib tug tub hluas tej zaum rau tib hnub uas nws tag sim neej ntawd. (Lukas 7:11-15; 8:49-55) Ua li Yexus puas tsa tau ib tug uas tuag tau plaub hnub thiab lub cev twb pib lwj zuj zus lawm tiag?

13. Raws li Yauhas 11:32-35, Yexus ua li cas xwb thaum nws pom Maivliag thiab lwm cov tib neeg quaj quaj? (Saib daim duab.)

¹³ Nyeem Yauhas 11:32-35. Tom qab no, Laxalaus tus muam Maivliag txawm ho mus txog ntawm Yexus. Nws txawm hais tib yam li Mathas hais rau Yexus tias: “Tus Tswv, yog koj nrog peb nyob ntawm no, kuv tus nus yuav tsis tuag.” Nws thiab lwm cov uas nrog nws nyob ntawd quaj quaj. Yexus pom lawv quaj li ntawd ua rau nws nrog lawv mob siab kawg li. Nws lub siab dua rhe rau lawv nws thiaj li quaj. Nws paub txoj ke uas muaj ib tug hlub tshua tau tag sim neej lawm mas lub siab yeej dua rhe. Nws txawm maj nrawm nroos xav ua kom tauv tau lawv lub kua muag.

14. Qhov uas Yexus pom Maivliag quaj quaj ntawd qhia tau peb li cas txog Yehauvas?

¹⁴ Qhov uas Yexus pom Maivliag quaj quaj es ua rau nws lub siab dua rhe qhia hais tias Yehauvas lub siab yeej dua rhe tib yam nkaus. Vim li cas peb ho paub li ntawd? Raws li zaj peb twb kawm dua los lawm qhia hais tias Yexus ua txhua yam raws nkaus li nws Txiv ua. (Yauhas 12:45) Thaum peb nyeem tias Yexus lub siab dua rhe thiab quaj thaum pom nws cov phooj ywg quaj quaj ces peb paub tias Yehauvas lub siab yeej mob ntsim qhe thaum peb raug kev quaj ntsuag tib yam nkaus. (Phau Ntawv Nkauj 56:8) Thaum koj paub li no puas rub tau koj lub siab kom huab yam nrog Yehauvas sib raug zoo?

15. Raws li Yauhas 11:41-44, muaj li cas ntawm Laxalaus lub ntxa? (Saib daim duab.)

¹⁵ Nyeem Yauhas 11:41-44. Yexus mus txog rau ntawm Laxalaus lub ntxa thiab nws hais kom muab daim txiag zeb tshem tawm. Mathas txawm hais tias ntshe tam sim no Laxalaus lub  cev twb pib tsw lawm. Yexus teb tias: “Kuv puas tau hais rau koj tias yog koj ntseeg koj yeej yuav pom Vajtswv lub hwjchim xwb no?” (Yauhas 11:39, 40) Yexus tsa muag ntsia saum ntuj thiab thov Yehauvas tab meeg sawv daws. Nws xav kom Yehauvas tau koob meej rau qhov uas nws tseem tab tom yuav ua. Yexus txawm hu tias: ‘Laxalaus, koj cia li tawm los!’ Ces Laxalaus taug kev tawm hauv lub qhov ntxa los! Yexus ua tau ib yam uas lwm tus xav hais tias ua tsis tau.

16. Zaj uas hais nyob rau Yauhas tshooj 11 tsav tau peb txoj kev ntseeg li cas txog qhov uas Vajtswv yuav tsa cov tuag sawv rov qab los?

¹⁶ Zaj uas hais nyob rau hauv Yauhas tshooj 11 tsav tau peb txoj kev ntseeg heev txog qhov uas Vajtswv yuav tsa cov tuag sawv rov qab los rau qhov Yexus cog lus rau Mathas hais tias: “Koj tus nus yeej yuav sawv rov qab los.” (Yauhas 11:23) Yexus zoo tib yam li nws Txiv uas muaj lub siab xav tsa thiab muaj hwj chim ua tau li nws tau cog tseg. Yexus tej kua muag ntws qhia tias nws lub siab yeej ntsim qhe thiab xav rhuav kev ploj kev tuag thiab kev quaj ntsuag mus huv tib si. Thaum Laxalaus taug kev hauv qhov ntxa tawm los qhia tau tias Yexus yeej muaj hwj chim tsa tau cov tuag tiag. Tsis tas li ntawd, nco ntsoov Yexus cov lus uas nws hais rau Mathas tias: “Kuv puas tau hais rau koj tias yog koj ntseeg koj yeej yuav pom Vajtswv lub hwjchim xwb no?” (Yauhas 11:40) Yog li ntawd, peb thiaj ntseeg tau tias yog Vajtswv twb cog lus yuav tsa cov tuag sawv rov los ces yeej yuav muaj li ntawd. Yuav ua li cas peb txoj kev ntseeg thiaj li ruaj khov khwb kho rau qhov uas Vajtswv tau cog tseg no?

17. Peb yuav tau nco ntsoov li cas thaum nyeem txog tej zaj uas Vajtswv tsa cov tuag sawv rov qab los hauv phau Vajlugkub?

¹⁷ Nyeem thiab xav txog tej zaj uas yav tas los Vajtswv tau tsa cov tuag sawv rov los. Nyob hauv phau Vajlugkub hais txog yim zaug uas Vajtswv tsa tib neeg sawv rov los muaj sia dua nyob hauv ntiaj teb. c Zoo rau peb muab txhua zaj ua tib zoo soj ntsuas. Nco ntsoov tias cov tib neeg uas Vajtswv tsa no tsis yog lam hais tiam  sis lawv yog neeg tiag tiag. Ua zoo soj ntsuas seb koj khaws tau dab tsi. Ua zoo xav seb ib zag twg uas koj nyeem qhia txog qhov uas Vajtswv muaj lub siab thiab muaj hwj chim tsa tau cov tuag li cas rau li cas. Nco ntsoov tias qhov uas Vajtswv tsa Yexus sawv rov qab los yog zaj uas tseem ceeb tshaj. Muaj coob leej ntau tus yeej ua tau tim khawv tias Yexus sawv rov qab los thiab qhov no pab kom peb ruaj siab tias yav tom ntej Vajtswv yeej yuav tsa cov tuag rov los.​—1 Kauleethaus 15:3-6, 20-22.

18. Koj puas mloog cov nkauj uas hais txog txoj kev vam kev cia siab yuav rov pom cov tas sim neej lawm? (Saib cov lus hauv qab taw qhia.)

¹⁸ Mloog, hu thiab xav txog cov nkauj uas hais txog txoj kev vam kev cia siab yuav rov pom cov tas sim neej lawm. d (Efexus 5:19) Cov nkauj no yuav tsav tau peb txoj kev ntseeg tias Vajtswv yuav tsa cov uas peb hlub tshua sawv rov qab los tiag tiag. Nco ntsoov mloog, xyaum hu, thiab nco ntsoov muab coj los tham thaum nej tsev neeg pe hawm Vajtswv ua ke. Cim kom tau zaj nkauj rau hauv nruab siab xwv thaum koj raug kev sim siab hauv lub neej los sis ib tug uas koj hlub tshua tau nruam sim lawm, Yehauvas lub hwj huam thiaj yuav pab kom koj nco tau cov nkauj xwv thiaj nplig thiab txhawb tau koj.

19. Peb nyias xav nyias li cas txog qhov uas Vajtswv tsa tau cov tuag sawv rov los? (Mus saib lub ntsiab “ Koj Yuav Nug Lawv Dab Tsi?”)

¹⁹ Xav txog seb thaum ntawd zoo li cas. Yehauvas cia peb nyias xav nyias seb thaum nyob hauv lub ntiaj teb tshiab yuav zoo npaum li cas. Muaj ib tug muam hais tias: “Kuv xav txog thaum nyob hauv lub ntiaj teb tshiab heev kawg li ua rau kuv twb hnia tau tej paj tawg tsw qab ntxiag.” Xav txog thaum koj ntsib cov txiv neej thiab poj niam uas hais nyob hauv phau Vajlugkub seb zoo li cas rau li cas. Koj tos nrhw yuav xav ntsib tus twg? Koj yuav nug nws txog dab tsi? Xav txog thaum koj rov ntsib ib tug neeg uas koj hlub tshua sawv rov qab los. Xav seb thaum ntawd koj yuav hais li cas rau li cas thiab koj yuav nrog nws sib qawg quaj li cas rau li cas.

20. Peb yuav tau ua dab tsi kam tiag?

²⁰ Peb ris txiaj ntsig kawg nkaus li rau Yehauvas cov lus cog tseg tias nws yuav tsa cov tuag sawv rov qab los! Yog Yehauvas twb muaj lub siab thiab muaj hwj chim tsa tau cov tuag ces peb paub tias yeej yuav muaj raws li nws tau cog tseg. Cia peb tsav peb txoj kev ntseeg kam tiag kom nco ntsoov txoj kev vam kev cia siab uas hais no. Yog peb ua li hais no ces yuav rub tau peb kom huab yam nrog Vajtswv sib raug zoo. Nws cog lus rau txhua tus tias, ‘Cov uas koj hlub tshua yeej yuav sawv rov qab los!’